Published 22 March 2022
တနင်္လာနေ့က တရုတ်နိုင်ငံ တောင်ပိုင်း ကွမ်ရှီးကျွမ်း ကိုယ်ပိုင်အုပ်ချုပ်ခွင့်ရဒေသ ဝူဇောင်းမြို့အနီး ပျက်ကျခဲ့တဲ့ တရုတ် အရှေ့ပိုင်းလေကြောင်းလိုင်း ခရီးစဉ်အမှတ် MU5735ရဲ့ လေယာဉ်အစိတ်အပိုင်းတွေကို မြေပြင်မှာ တွေ့ရှိရပါတယ်။
ကယ်ဆယ်ရေးလုပ်ငန်းတွေကို လေယာဉ်ပျက်ကျတဲ့ အဓိက နေရာမှာ ဆက်လက်ပြီးဆောင်ရွက်နေပြီး စုံစမ်းစစ်ဆေးမှုတွေကိုလည်း ပြုလုပ်နေပါတယ်။
ခရီးသည် ၁၂၃ဦးနှင့်လေယာဉ်အမှုထမ်း(၉)ဦး စုစုပေါင်း ၁၃၂ဦးတင်ဆောင်လာတဲ့ ခြောက်နှစ်သက်တမ်းရှိ အဲဒီတရုတ်အရှေ့ပိုင်းလေကြောင်းလိုင်း ဘိုအင်း၇၃၇-၈၀၀ လေယာဉ်ဟာ တနင်္လာနေ့ မွန်းလွဲ ၂နာရီ ၃၈မိနစ်မှာ တောင်များအပေါ်ပျက်ကျခဲ့ပြီး သေဆုံးဒဏ်ရာရသူမသိရသေးပါ။ နှစ်ပေါင်း၁၈နှစ်အတွင်း ဒါဟာ ပထမဆုံးအကြိမ် ဆိုးရွားသောပျက်ကျမှုဖြစ်ပါတယ်။လေယာဉ်ဟာ ကူမင်းလေဆိပ်ကနေ မွန်းလွဲ၁နာရီ၁၅မိနစ်မှာ ပျံတက်ခဲ့တာဖြစ်ပြီး ကွမ်ကျိုးကို ဦးတည်ပျံသန်းခဲ့တာဖြစ်ပါတယ်။
Source CMG
#LocalNews
Published 22 Mar 2022
မြန်မာနိုင်ငံသိုရောက်ရှိလာသော မြန်မာနိုင်ငံဆိုင်ရာ အာဆီယံအထူးကိုယ်စားလှယ် အာဆီယံအလှည့်ကျဥက္ကဋ္ဌ ကမ္ဘောဒီးယားနိုင်ငံ နိုင်ငံခြားရေးဝန်ကြီး မစ္စတာပရက် ဆိုခွန် (Prak Sokhonn)နဲ့ နိုင်ငံရေးပါတီတစ်ခုဖြစ်တဲ့ ပြည်သူပါတီတို့တွေ့ဆုံခဲ့ကြပြီး ပါတီဘက်ကနေ လူသားချင်းစာနာမှုဆိုင်ရာအကူအညီတွေ ထိထိရောက်ရောက်ပေးဖို့နဲ့ အသွင်ကူးပြောင်းရေးကြားကာလမှာ နိုင်ငံရေးမှာပါဝင်ပတ်သတ်သူတွေ တွေ့ဆုံဆွေးနွေးနိုင်ရေးဆွေးနွေးခဲ့ကြတယ်လို့ သိရပါတယ်။
#Yangon_Media_Group
#LocalNews
Published - 22 March 2022
အိန္ဒိယ-မြန်မာနယ်စပ်တွင် လုံခြုံရေးတပ်နှင့် ဒေသတွင်းလက်နက်ကိုင်အချို့တို့ကြား ထိတွေ့တိုက်ပွဲအချို့ ဖြစ်ပွားခဲ့တယ်လို့ သိရပါတယ်။
သို့သော်လည်း လက်ရှိ တမူးမြို့ပေါ်၏ လုံခြုံရေးအခြေအနေကတော့ ကောင်းမွန်နေဆဲဖြစ်တယ်လို့ အဆိုပါမြို့နေဒေသခံတွေက ပြောပါတယ်။
အဆိုပါ တိုက်ပွဲတွေဟာ ပြီးခဲ့သောရက်ပိုင်းအတွင်းက ဖြစ်ပွားခဲ့ခြင်းဖြစ်ပါတယ်။
"မြို့ပေါ်မှာက အေးချမ်းပါတယ်။ ဖြစ်တာက နယ်စပ်ပေါ့လေ၊ မြို့ရှောင်လမ်းပေါ်မှာဖြစ်တာပါ။ပြောရရင် အိန္ဒိယနဲ့ကိုယ်တို့က ခြံစည်းရိုးပဲခြားတာကိုး တမူးကနေ ဟိုဘက်ကိုသွားရင် အိန္ဒိယကိုရောက်ပြီ အဲ့ကြားထဲမှာ တိုက်ပွဲဖြစ်တာပေါ့၊ ရင်ဆိုင်တိုက်ပွဲတော့ မဟုတ်ပါဘူး။ ဒေသတွင်း လက်နက်ကိုင်အဖွဲ့အချို့က မိုင်းလာထောင်ကြတယ်။ လုံခြုံရေးတပ်တွေနဲ့ အပြန်အလှန်ပစ်ခတ်မှုတွေဖြစ်တယ်။တစ်ဖွဲ့နဲ့ တစ်ဖွဲ့ အဝေးကနေပစ်ကြတယ်လို့ သိရတယ်။ အဲ့လောက်ပါပဲ၊ နယ်စပ်မှာပဲဖြစ်ခဲ့တာပါ။မြို့ပေါ်မှာတော့ ဘာမှမဖြစ်ခဲ့ပါဘူး။"လို့ တမူးမြို့ဒေသခံတစ်ဦးက YMG ကို ပြောပြခဲ့ပါတယ်။
အဆိုပါ တမူးဒေသတွင် လက်ရှိကာလမှာ တိုက်ပွဲများ ပြင်းထန်စွာဖြစ်ပွားနေခြင်းမျိုးမရှိဘူးလို့လည်း ၄င်းကပြောပါတယ်။
ယင်းနှစ်ဖက်အဖွဲ့တွေအကြား အပြန်အလှန်ပစ်ခတ်မှုတွေသာဖြစ်ပွားခဲ့ခြင်းဖြစ်ပြီး မြို့ပေါ်အခြေအနေက ပုံမှန်အနေအထားမှာရှိတယ်လို့ သိရပါတယ်။
"အခုက သွားသွားလာလာပုံမှန်ပါပဲ။လမ်းပန်းဆက်သွယ်ရေးတွေလည်း ပုံမှန်ပါပဲ ကောင်းပါတယ်။ တမူးနဲ့ ကလေးကြားလည်း သွား ရေးလာရေးက ကောင်းပါတယ်။ သူတို့တိုက်ပွဲဖြစ်တဲ့ အချိန်တော့ ခဏလေး ရှောင်ရတာပေါ့။ ပြီးရင်ပြန်သွားရတယ် ၊ သိပ်ကြီးကြီး မားမားဖြစ်ခဲ့တာတော့မရှိပါဘူး။"လို့ ၄င်းက ဆက်လက်ပြောပြခဲ့ပါတယ်။
ymg/kg
#Yangon_Media_Group
#LocalNews
Published_22 March 2022
ရခိုင်ပြည်နယ်၊ မင်းပြားမြို့နယ် ဇိုင်ချောင်းကျေးရွာမှာတွေ့ခဲ့တဲ့ နှစ်ပေါင်းထောင်ကျော်သက်တမ်းရှိတယ်လို့ယူဆရတဲ့ ရှေးဟောင်းစတူပါ တစ်ဆူကို သက်ဆိုင်ရာက သွားရောက်စစ်ဆေးဖို့ရှိတယ်လို့ ရှေးဟောင်းသုတေသနဌာနက သိရပါတယ်။
#Yangon_Media_Group
#LocalNews
Published - 22 March 2022
မုန်တိုင်းအရှိန်ကြောင့် ကိုကိုးကျွန်းမှာ မိုးများခဲ့ပြီး နှစ်ပေါင်း ၆၂ အတွင်း မိုးရေချိန် စံချိန်သစ်ဖြစ်လာပါတတယ်။
ယခင်က ၆၃ မီလီမီတာပဲ ရရှိရာကနေ ဒီကနေ့ မတ်လ ၂၂ ရက်နေ့မှာတော့ ၇၉ မီလီမီတာအထိ မိုးရေချိန်များခဲ့တာဖြစ်ပါတယ်။
ဒ့ါအပြင် ဧရာဝတီတိုင်းဒေသကြီးက လပွတ္တာမြို့ရဲ့ မိုးရေချိန်ဟာလည်း လွန်ခဲ့တဲ့ ၈ နှစ်အတွင်း ယခင်က မိုးရေချိန် ၁၀ မီလီမီတာကို ဒီကနေ့မှာ ၁၅ မီလီမီတာနဲ့ စံချိန်းချိုးခဲ့ပြီး စံချိန်အသစ်အဖြစ် သတ်မှတ်လိုက်တယ်လို့ မိုး/ ဇလက ကြေညာထားပါတယ်။
အခုလက်ရှိမှာ အားကောင်းတဲ့မုန်တိုင်းငယ်ဟာ ဟိုင်းကြီးကျွန်းမြို့အနီးမှ စတင်ဖြတ်ကျော်ဝင်ရောက်လာပြီး အညိုရောင်အဆင့်သတ်မှတ်ထားပါတယ်။
မုန်တိုင်းဖြတ်ကျော်စဉ်မှာ မုန်တိုင်းဒီရေမှာ ဧရာဝတီတိုင်း၊ ပုသိမ်ခရိုင်၊ လပွတ္တာခရိုင်၊ မြောင်းမြခရိုင်၊ မအူပင်ခရိုင်၊ ဖျာပုံခရိုင်တို့မှာ မြစ်ဝ၊ မြစ်လက်တက်များအတွင်း ၈ ပေမှ ၁၂ ပေခန့်အထိ မြင့်တက်လာနိုင်တယ်လို့ ခန့်မှန်းထားပါတယ်။
အခုဆိုရင် ဧရာဝတိတိုင်းအတွင်းက မုန်တိုင်းအန္တရာယ်ရှိတဲ့ဒေသက ကျေးရွာပြည်သူတွေအနေနဲ့ မုန်တိုင်းရှောင်ရွေ့ပြောင်းနေထိုင်ကြဖို့နဲ့ ပင်လယ်ငါးဖမ်းယာဉ်တွေနဲ့ လေကြောင်းလိုင်းခရီးစဉ်တွေကို သတိထားကြဖို့ မိုး/ ဇလက ထုတ်ပြန်ကြေညာထားပါတယ်။
ymg/ei
#Yangon_Media_Group
#LocalNews
Published - 22 March 2022
ဧရာဝတီတိုင်းဒေသကြီး၊ လပွတ္တာခရိုင်၊ မော်လမြိုင်ကျွန်းမြို့နယ်တွင် ဒီကနေ့ မတ်လ ၂၂ ရက်၊ နံနက်ပိုင်းတွင် မုန်တိုင်းတိုက်ခတ်မှုကြောင့် လှိုင်းဘုန်းကျေးရွာအုပ်စုရှိ စေတီတော် ထီးတော်မြေခခြင်းနှင့် လူနေအိမ်အချို့ ပျက်စီးဆုံးရှုံးခဲ့ရတယ်လို့ အဆိုပါမြို့နေ ဒေသခံများထံမှ သိရပါတယ်။
ဒါ့အပြင် လက်ရှိအချိန်ထိ မုန်တိုင်းခိုလှုံသူ စုစုပေါင်းလူဦးရေ(၂,၀၀၀)ခန့်ကိုလည်း ကူညီစောင့်ရှောက်ပေးထားရတယ်လို့ ဆိုပါတယ်။
"မုန်းတိုင်းခိုလှုံသူများကို လှိုင်းဘုန်းကျေးရွာအုပ်စုရှိ အုပ်ချုပ်ရေးအဖွဲ့များနှင့် လူမှုရေးပရဟိတအဖွဲ့များမှ ထမင်းဟင်းများ၊ သောက်သုံးရေနှင့်ဆေးဝါးများ ကူညီဆောင်ရွက်ကြရန် အုပ်စုအဖွဲ့များခွဲ၍ တာဝန်အသီးသီးခန့်အပ်ကာ ကူညီဆောင့်ရှောက်ပေးလျက်ရှိပါတယ်။
လှိုင်းဘုန်းကျေးရွာအတွင်းရှိ စေတနာရှင်များမှ ထမင်းဟင်းများ ချက်ပြုတ်လှူဒါန်းခြင်းများပေးကြပါတယ်။"လို့ လှိုင်းဘုန်းကျေးရွာအုပ်စု ဒေသခံတစ်ဦးက ပြောပါတယ်။
ယနေ့ မုန်တိုင်းတိုက်ခတ်မှုကြောင့် မော်လမြိုင်ကျွန်းမြို့နယ်၊ လှိုင်းဘုန်းကျေးရွာအုပ်စုရှိ သစ်နီဇွဲကျေးရွာ၊ဓမ္မသုခကျောင်းတိုက်ဝန်းအတွင်းတည်ထားသော အောင်တော်မူစေတီတော်သည် ဆိုင်ကလုန်းမုန်တိုင်းကြောင့် ထီးတော်မြေခခဲ့ပြီး ငွေဇင်ယော်ကျေးရွာတွင်
လူနေအိမ်(၂)လုံးပျက်စီးဆုံးရှုံးခဲ့ရတယ်လို့လည်း အဆိုပါဒေသခံများထံမှ သိရပါတယ်။
Photo - Tun Tun Naing(Mawgyun) - FB
ymg/kg
#Yangon_Media_Group
#LocalNews
Published_22 March 2022
ပြီးခဲ့တဲ့၂၀၂၀ ပြည့်နှစ် နဲ့ ၂၀၂၁ ခုနှစ်တွေမှာ သင်္ကြန်ရေသဘင်ပွဲတော်ကို ကိုဗစ်-၁၉ ကပ်ရောဂါကြောင့် မကျင်းပနိုင်ခဲ့ပေမယ့် အခု ၂၀၂၂ ခုနှစ် မှာတော့ ရန်ကုန်မြို့တော် ဗဟိုမဏ္ဍပ် မဟာသင်္ကြန်ရေသဘင်ပွဲတော်ကို စည်စည်ကားကားကျင်းပနိုင်ဖို့လုပ်နေတယ်လို့ ရန်ကုန်မြို့တော်စည်ပင်သာယာရေးကော်မတီက သိရပါတယ်။
#Yangon_Media_Group
#DailyNews
Published - 22 Mar 2022
၁။ ငါးဖမ်းရာမှတွေ့ရှိသော နှစ်ပေါင်းထောင်ကျော်သက်တမ်းရှိနိုင်မည့် ရှေးဟောင်းစတူပါအား သက်ဆိုင်ရာက သွားရောက်စစ်ဆေးမည်
၂။ ဗဟိုမဏ္ဍပ် မဟာသင်္ကြန် ရေသဘင်ပွဲတော်အတွက်သာ စီစဉ်နေပြီး ပုဂ္ဂလိကမဏ္ဍပ်များကိစ္စ စည်ပင်ညွှန်ကြားချက်မရှိသေး
၃။ မိုးလေဝသ သတင်း
၄။ အီရတ်တွင် အစ္စလာမ်အကြမ်းဖက်အဖွဲ့ဝင်များ၏အလောင်းများ အစုလိုက်အပြုံလိုက်မြှုပ်နှံထားရာနေရာ တူးဖော်တွေ့ရှိ......အစရှိတဲ့သတင်းတွေကို တင်ဆက်ပေးသွားမှာပဲဖြစ်ပါတယ်။
#Yangon_Media_Group
#LocalNews
Published - 22 March 2022
မုန်တိုင်းလာရာလမ်းမှာရှိနေတဲ့ ဧရာဝတီတိုင်းက အပန်းဖြေကမ်းခြေများအား မတ်လ ၂၁ ရက် နေ့မှစတင်ပြီး ခေတ္တယာယီပိတ်ထားလိုက်ပြီဖြစ်တယ်လို့ သိရပါတယ်။
ကမ်းခြေဒေသမှာရှိနေတဲ့ ခရီးသွားဧည့်သည်တွေအနေနဲ့လည်း ယမန်နေ့မှစတင်လို့ မိမိတို့နေထိုင်ရာဒေသသို့ ပြန်လည်ထွက်ခွာသွားကြပြီဖြစ်တယ်လို့ ချောင်းသာဒေသခံများက ပြောပါတယ်။
"ဒီကနေ့ မနက်အထိတော့ မုန်တိုင်းနဲ့ ပတ်သက်ပြီး ဘာမှထူးခြားတာမရှိသေးပါဘူး။ ရာသီဥတုအခြေအနေကတော့ မိုးတွေအုံ့နေတယ်။ ကမ်းခြေလည်း ပိတ်ထားလိုက်ပြီ။ ဧည့်သည်တွေ အဝင်မခံတော့ဘူး၊ ကမ်းခြေမှာရှိနေတဲ့ ဧည့်သည်တွေကလည်း ပြန်သွားကြတာရှိပါတယ်။ ကမ်းခြေပိတ်တယ်ဆိုတာကလည်း အခုမုန်တိုင်းကာလရက်လေးပါပဲ။"လို့ ချောင်းသာဒေသခံတစ်ဦးက YMG ကိုပြောပြခဲ့ပါတယ်။
မုန်တိုင်းကြောင့် ကမ်းခြေတွေကို ခေတ္တပိတ်လိုက်တာဖြစ်သလို လက်ရှိရောက်နေတဲ့ ဧည့်သည်တွေကို ဟိုတယ်တွေကပါ ပြန်လွှတ်နေတာဖြစ်ပါတယ်။
" အခုမုန်တိုင်းရက်တွေမှာတော့ ဒေသခံတွေက နီးစပ်ရာဘုန်းကြီးကျောင်း၊ စာသင်ကျောင်းတွေမှာ စုပြီးနေကြတာတွေရှိတယ်။ လက်ရှိအနေအထားက ချောင်းသာမှာ ရေတွေဘာတွေတော့ မတက်သေးဘူး။ ပုံမှန်အနေအထားပါပဲ၊ မုန်တိုင်း အခြေအနေကိုတော့ ဆက်ပြီး စောင့်ကြည့်နေတာပေါ့။"လို့ ၎င်းက ဆက်လက်ပြောပြခဲ့ပါတယ်။
ဧရာဝတီတိုင်းဟာ အပန်းဖြေကမ်းခြေများတည်ရှိရာ ဒေသတစ်ခုဖြစ်ပြီး ချောင်းသာကမ်းခြေ၊ ငွေဆောင်ကမ်းခြေနဲ့ ဂေါ်ရင်ဂျီကမ်းခြေဆိုပြီး နာမည်ကျော်ကမ်းခြေ (၃)ခုတည်ရှိတာပါ။
"ဒီရက်အတွင်းမှာ လာမယ့်ဧည့်သည်တွေကတော့ ရှေ့လကိုရွှေ့သွားကြတာပေါ့။ ရှေ့လက ဧပြီလလည်းဖြစ်တယ်၊ သင်္ကြန်ပိတ်ရက် တွေလည်းရှိတော့ ချောင်းသာကမ်းခြေကိုလာဖို့အတွက် ဧည့်သည်တော်တော်များများက ကြိုတင်ဘိုကင်တင်ထားတာတွေတော့ရှိပါတယ်။" လို့ ၎င်းက ထပ်လောင်းပြောပြခဲ့ပါတယ်။
အဆိုပါ အားကောင်းသောမုန်တိုင်းငယ်ဟာ ဧရာဝတီတိုင်းဒေသကြီး၊ ဟိုင်းကြီးကျွန်းအနီးမှ ဖြတ်ကျော်မည့်အခြေအနေကြောင့် အနီရောင်အဆင့်သတ်မှတ်လိုက်တယ်လို့လည်း မိုး/ဇလ ဦးစီးဌာနက ဒီကနေ့ မတ်လ ၂၂ ရက်၊ နံနက်ပိုင်းက ထုတ်ပြန်ထားပါတယ်။
Photo - CJ
ymg/kg
#Yangon_Media_Group
#LocalNews
Published - 22 March 2022
ဧရာတီတိုင်းဒေသကြီး လပွတ္တာမြို့ပေါ်ကို ကျေးရွာမှာနေထိုင်ကြတဲ့ မုန်တိုင်းရှောင်ပြည်သူတစ်ထောင်ကျော်နီးပါးဟာ မုန်တိုင်းရှောင်ဖို့ရောက်ရှိလာကြတဲ့အတွက် ကူညီကယ်ဆယ်ဖို့ လပွတ္တာမြို့အခြေစိုက် နှလုံးသားကျန်းမာရေးစောင့်ရှောက်မှုအဖွဲ့တွေ ကူညီဆောင်ရွက်ပေးနေတယ်လို့ YMG ကိုပြောပါတယ်။
မိုး/ ဇလရဲ့ နေ့လည်ပိုင်းခန့်မှန်းချက်အနေနဲ့ အားကောင်းတဲ့မုန်တိုင်းငယ်ဟာ လက်ရှိအခြေအနေအနေမှာ ဧရာဝတီတိုင်းဒေသကြီး ဟိုင်းကြီးကျွန်းမြို့အနီးမှ စတင်ဖြတ်ကျော်ဝင်ရောက်လျက်ရှိလို့ အညိုရောင်အဆင့်ရောက်ရှိနေတယ်လို့ ထုတ်ပြန်ထားပါတယ်။
လပွတ္တာမြို့ ကိုးနဝင်းပရိပတ္တိစာသင်တိုက်မှာ လာရောက်မုန်တိုင်းရှောင်နေတဲ့ ပြည်သူ ၂၀၀ ကျော်အတွက် လိုအပ်တာတွေ ဝိုင်းဝန်းကူညီပေးနေတယ်လို့ သိရပါတယ်။
“ ကျွန်တော်တို့က မုန်တိုင်းလာရှောင်နေသူတွေ လိုအပ်တာတွေ ဖြည့်ဆည်းပေးနေပါတယ်၊ အလှူရှင်တွေလည်း ဝိုင်းဝန်းရှာပေးတယ်။ အခုလက်ရှိ ကိုးနဝင်းပရိပတ္တိစာသင်တိုက်မှာ အယောက် ၂၀၀ လောက်ရှိတယ်။ တခြားနေရာတွေမှာ မုန်တိုင်းရှောင်တဲ့သူတွေ ရှိသေးတယ်၊ အားလုံးပေါင်း မြို့ပေါ်မှာ မုန်တိုင်းရှောင်သူ တစ်ထောင်ကျော်လောက်ရှိမယ်၊ အခုလက်ရှိမှာတော့ လပွတ္တာမြို့မှာ မိုးရွာပြီး လေတိုက်တာ၊ မြစ်ရေတက်တာတော့ ရှိပါတယ်” လို့ နှလုံးသားကျန်းမာရေးစောင့်ရှောက်မှုအဖွဲ့မှ တာဝန်ရှိသူတစ်ဦးက ပြောပါတယ်။
မုန်တိုင်းအဆင့်သတ်မှတ်ချက်အနေနဲ့ မြန်မာနိုင်ငံကို ဖြတ်သန်းခါနီးဖြစ်တာမို့ အနီရောင်လို သတ်မှတ်သလို၊ ဖြတ်သန်းနေချိန်ဆိုရင် အညိုရောင်သတ်မှတ်ပြီး ဖြတ်သန်းပြီးချိန်ကို အစိမ်းရောင်အဖြစ် မုန်တိုင်းအဆင့်တွေကို သတ်မှတ်လေ့ရှိပါတယ်။
မုန်တိုင်းအရှိန်ကြောင့် မနေ့ညပိုင်းက စတင်ပြီး ရန်ကုန်အပါအဝင် နေရာအများအပြားမှာ မိုးသည်းထန်စွာ ရွာသွန်းတာမျိုးတွေ ဖြစ်ပေါ်ခဲ့ပါတယ်။
ymg/ ei
Photo - နှလုံးသားကျန်းမာရေးစောင့်ရှောက်မှုအဖွဲ့ လပွတ္တာမြို့
#Yangon_Media_Group
#LocalNews
Published - 22 Mar 2022
အားကောင်းသောမုန်တိုင်းငယ် ဟိုင်းကြီးကျွန်းမြို့အနီးမှ စတင်ဖြတ်ကျော်နေကြောင်း မိုးဇလက ထုတ်ပြန်လိုက်သည်။
ဟိုင်းကြီးကျွန်းမြို့အနီးမှ ဖြတ်ကျော်နေစဉ် ဧရာဝတီတိုင်းဒေသကြီးတွင် အမြင့်ဆုံးလေတိုက်နှုန်းမှာ တစ်နာရီလျှင် (၄၅)မိုင်မှ မိုင်(၅၀)အထိနှင့် ရန်ကုန်တိုင်းဒေသကြီးတွင် အမြင့်ဆုံးလေတိုက်နှုန်းမှာ တစ်နာရီလျှင် (၃၅)မိုင်မှ မိုင်(၄၀)အထိ တိုက်ခတ်နိုင်ပြီး မုန်တိုင်းဒီရေမှာ ဧရာဝတီတိုင်းဒေသကြီး၊ ပုသိမ်ခရိုင်၊လပွတ္တာခရိုင်၊မြောင်းမြခရိုင်၊ မအူပင်ခရိုင်၊ ဖျာပုံခရိုင်တို့ရှိ မြစ်ဝ၊ မြစ်လက်တက်များအတွင်း(၈)ပေမှ (၁၂)ပေခန့်အထိ မြင့်တက်လာနိုင်ကြောင်း ခန့်မှန်းထားသည်။
အားကောင်းသော မုန်တိုင်းငယ်(Deep Depression)၏ လက်ရှိအခြေအနေမှာ မြန်မာနိုင်ငံ၊ ဧရာဝတီတိုင်းဒေသကြီးကို ဟိုင်းကြီးကျွန်းမြို့အနီးမှ စတင်ဖြတ်ကျော်ဝင်ရောက်လျက်ရှိသဖြင့် အညိုရောင်အဆင့်ဟု သတ်မှတ်ထားကြောင်း၊ နောက်(၂၄)နာရီအတွင်း မြစ်ဝကျွန်းပေါ်ကမ်းရိုးတန်းတစ်လျှောက် ပုသိမ်မြို့အနီးမှ မြောက်ဘက်သို့ ဆက်လက်ရွေ့လျားနိုင်ပြီး ရခိုင်ကမ်းရိုးတန်းတောင်ပိုင်းအနီးသို့ ရောက်ရှိနိုင်ကြောင်း ခန့်မှန်းထားသည်။
အားကောင်းသော မုန်တိုင်းငယ်(Deep Depression)၏အရှိန်ကြောင့် ယနေ့မွန်းလွဲပိုင်းမှ မနက်ဖြန် မတ်လ ၂၃ ရက်အတွင်း နေပြည်တော်၊ စစ်ကိုင်းတိုင်းဒေသကြီးအောက်ပိုင်း၊မန္တလေးတိုင်းဒေသကြီး၊ မကွေးတိုင်းဒေသကြီး၊ ပဲခူးတိုင်းဒေသကြီး၊ ရန်ကုန်တိုင်းဒေသကြီး၊ ဧရာဝတီတိုင်းဒေသကြီး၊ တနင်္သာရီတိုင်းဒေသကြီး၊ ရှမ်းပြည်နယ်၊ ချင်းပြည်နယ်၊ ရခိုင်ပြည်နယ်၊ ကယားပြည်နယ်၊ ကရင်ပြည်နယ်နှင့် မွန်ပြည်နယ်တို့တွင် နေရာစိပ်စိပ်မှ နေရာအနှံ့အပြား မိုးထစ်ချုန်းရွာပြီး၊ အချို့ဒေသများတွင် ဒေသအလိုက်နှင့် နေရာကွက်၍ မိုးကြီးနိုင်ကြောင်း သိရသည်။
မြန်မာ့ကမ်းရိုးတန်းတစ်လျှောက်နှင့် ကမ်းလွန်ပင်လယ်ပြင်တို့တွင် မကြာခဏ မိုးသက်လေပြင်းများကျရောက်ပြီး လှိုင်းကြီးကာ မိုးသက်လေပြင်းကျစဉ် ရေပြင်/မြေပြင်လေသည် တစ်နာရီလျှင် (၄၅)မိုင်အထိ တိုက်ခတ်နိုင်ပါသည်။ လှိုင်းအမြင့်မှာ မြန်မာ့ကမ်းရိုးတန်းတစ်လျှောက်နှင့် ကမ်းလွန်ပင်လယ်ပြင်တို့တွင် (၉)ပေမှ (၁၃)ပေခန့်ရှိနိုင်ကြောင်းသိရသည်။
#ymg-mt
#Yangon_Media_Group
#LocalNews
Published - 22 Mar 2022
မြန်မာနိုင်ငံ စာရေးဆရာအသင်းဥက္ကဋ္ဌ ဆရာ မနုဿကျော်ဝင်း၊ အသက် (၇၇) နှစ်သည် မတ်လ ၂၂ ရက် အင်္ဂါနေ့ နံနက် ၉နာရီ ၂၃ မိနစ်တွင် ကွယ်လွန်သွားကြောင်း သိရပါတယ်။
မနုဿကျော်ဝင်းသည် ၁၉၇၃-ခုနှစ်တွင် စာပေဗိမာန် စာမူပြိုင်ပွဲ၌ 'အခြေခံ ရှေးဟောင်းသုတေသနပညာ' စာမူဖြင့် သုတပဒေသာ(ဝိဇ္ဇာ)ဆုကို ရရှိခဲ့ပါတယ်။ ၁၉၇၅ ခုနှစ်တွင် 'တက္ကသိုလ် ဘယ်မှာရှိတယ်' စာမူဖြင့် ဝတ္ထုရှည်ဆု ရရှိခဲ့ပါတယ်။ ၁၉၇၇ ခုနှစ်တွင် 'နောက်အော်နာဂ' စာအုပ်ဖြင့် အမျိုးသား စာပေဆုကို ထပ်မံရရှိခဲ့ပါတယ်။
ထို့ပြင် ၁၉၇၉ ခုနှစ် တွင် 'ခရီးကြမ်း ဓလေ့ဆန်းဆန်း' စာမူဖြင့် စာပေဗိမာန် စာပဒေသာဆုနှင့် ၁၉၉၅ ခုနှစ်တွင် 'အိုးခြမ်းပဲ့များ သက်သေထား' စာမူဖြင့် ပခုက္ကူ ဦးအုန်းဖေ စာပေ ဝတ္ထုရှည်များ ထပ်မံရရှိပါတယ်။ ၂၀၀၁ ခုနှစ်တွင် 'အခြေခံ ပြတိုက်ပညာ' စာအုပ်ကို ပြုစု ထုတ်ဝေခဲ့ကာ ဆရာသည် လုံးချင်း ၆ အုပ် ရေးသားခဲ့ရာ ၅ အုပ်မှာ ဆုရရှိခဲ့ပါတယ်။ ၁၉၉၅ ခုနှစ်တွင် ပခုက္ကူ ဦးအုန်းဖေ စာပေဆု ပြိုင်ပွဲတွင် ဝတ္ထုရှည် ပထမဆု ရရှိခဲ့ပါတယ်။
ဆရာမနုဿ ကျော်ဝင်းကို ကချင်ပြည်နယ် မြစ်ကြီးနားမြို့တွင် အဖ ဦးအုန်းမောင်၊ အမိ ဒေါ်လှရှိန်တို့က ၁၉၄၅ ခုနှစ်၊ ဇွန်လ ၃ ရက်နေ့တွင် မွေးဖွားခဲ့သည်။ မွေးချင်း ငါးယောက်အနက် သားအကြီးဆုံးဖြစ်သည်။ အမည်ရင်းမှာ ကျော်ဝင်းဖြစ်သည်။
၁၉၆၁-ခုမှ စတင်၍ ပညာဆည်းပူးခဲ့ပြီး ရန်ကုန်တက္ကသိုလ်မှ မနုဿဗေဒပညာရပ်တွင် ဝိဇ္ဇာ(ဂုဏ်ထူး)ဘွဲ့ကိုလည်းကောင်း၊ မဟာဝိဇ္ဇာဘွဲ့ကိုလည်းကောင်ရရှိခဲ့သည်။ ၁၉၆၈-ခုနှစ် ရန်ကုန်အထိ ဝိဇ္ဇာနှင့်သိပ္ပံ တက္ကသိုလ်တွင် နည်းပြဆရာအဖြစ် တာဝန်ထမ်းဆောင်ခဲ့သည်။
'ရွှေအိုးလေး'၊ 'လှမြင့်'၊ 'မောင်ဝင်းနွယ်(ရန်ကုန် တက္ကသိုလ်)' နှင့် 'တက္ကသိုလ် ဝင်းသူ' စသည့် ကလောင်အမည်ဖြင့် ဝတ္ထု၊ ဆောင်းပါးများ ရေးသားခဲ့သည်။ မိမိ အထူးလိုက်စားခဲ့သော မနုဿဗေဒ ပညာရပ်ကို အစွဲပြု၍ ၁၉၆၈ ခုနှစ်မှ စတင်ကာ 'မနုဿကျော်ဝင်း' ဟူသော အမည်ကို ခံခဲ့သည်။ ကွင်းဆင်းလေ့လာမှု အတွေ့အကြုံများကို စာနယ်ဇင်းများတွင် ဆောင်းပါးနှင့် ဝတ္ထုတိုများအဖြစ် ရေးသားခဲ့သည်။ သုတေသန စာတမ်းများ၊ ဝတ္ထု၊ ဆောင်းပါးများ စုစုပေါင်း ၄၀ဝ-ကျော်ခန့် ရေးသားခဲ့ပြီး မြန်မာ့အသံ ယဉ်ကျေးမှု အနုပညာ အစီအစဉ်မှလည်း အသံလွှင့်ခဲ့သည်။
၁၉၆၉-ခုနှစ်တွင် ယဉ်ကျေးမှုဌာနသို့ ပြောင်းရွှေ့တာဝန်ထမ်းဆောင်ခဲ့သည်။ နာဂတောင်တန်းနှင့် ပြည်နယ်များသို့ အကြိမ်ကြိမ်ကွင်းဆင်းလေ့လာခဲ့သည်။ ၁၉၇၃-ခုနှစ်တွင် စာပေဗိမာန် စာမူပြိုင်ပွဲ၌ 'အခြေခံ ရှေးဟောင်းသုတေသနပညာ' စာမူဖြင့် သုတပဒေသာ(ဝိဇ္ဇာ)ဆုကို လည်းကောင်း ရရှိခဲ့သည်။ ၁၉၇၅ ခုနှစ်တွင် 'တက္ကသိုလ် ဘယ်မှာရှိတယ်' စာမူဖြင့် ဝတ္ထုရှည်ဆုကို လည်းကောင်း ရရှိခဲ့သည်။ ၁၉၇၇ ခုနှစ်တွင် 'နောက်အော်နာဂ' စာအုပ်ဖြင့် အမျိုးသား စာပေဆုကို ထပ်မံရရှိခဲ့သည်။
၁၉၇၉ ခုနှစ်တွင် 'ခရီးကြမ်း ဓလေ့ဆန်းဆန်း' စာမူဖြင့် စာပေဗိမာန် စာပဒေသာဆုနှင့် ၁၉၉၅ ခုနှစ်တွင် 'အိုးခြမ်းပဲ့များ သက်သေထား' စာမူဖြင့် ပခုက္ကူ ဦးအုန်းဖေ စာပေ ဝတ္ထုရှည်များဆက်လက်ရှိသည်။ ထို့ပြင် ၂၀၀၁ ခုနှစ်တွင် 'အခြေခံ ပြတိုက်ပညာ' စာအုပ်ကို ပြုစု ထုတ်ဝေခဲ့သည်။ ဆရာ မနုဿကျော်ဝင်းသည် လုံးချင်း ၆ အုပ် ရေးသားခဲ့ရာ ၅ အုပ် ဆုရခဲ့သည်။ ၁၉၉၅ ခုနှစ်တွင် ပခုက္ကူ ဦးအုန်းဖေ စာပေဆု ပြိုင်ပွဲ၌ ဝတ္ထုရှည် ပထမဆုရရှိခဲ့သည်။
#Yangon_Media_Group
Page 1535 of 1617