#LocalNews
Published - 24 March 2022

တရုတ်နိုင်ငံ Sonopharm Group နဲ့ ပူးပေါင်းပြီး မြန်မာနိုင်ငံတွင်းမှာ ကိုဗစ်ကာကွယ်ဆေးကို စတင်ထုတ်လုပ်နိုင်ပြီလို့ နစက က ကြေညာထားပါတယ်။

Myancopharm ကိုဗစ်ကာကွယ်ဆေးကို ရန်ကုန်မြို့ လှည်းကူးမြို့နယ်ရှိ ဆေးဝါးစက်ရုံခွဲ(ရွာသာကြီး)မှာ လစဉ် ကာကွယ်ဆေး Doeses တစ်သန်းနှုန်းနဲ့ လစဉ် ထုတ်လုပ်သွားမယ်လို့ နစက အတွင်းရေးမှူး ဒုတိယဗိုလ်ချုပ်ကြီး အောင်လင်းဒွေးက ဆိုပါတယ်။

ဒါ့အပြင် ၂၀၂၂ - ၂၀၂၃ ခု ဘဏ္ဍာနှစ်အတွင်း ကာကွယ်ဆေး Doses ၁၀ သန်း ထုတ်လုပ်သွားမှာ ဖြစ်ပြီး ပြည်သူလူထုထံ ကာကွယ်ဆေးထိုးနှံတဲ့အစီစဉ်မှာ Myancopharm ကို ထည့်သွင်းအသုံးပြုသွားဖို့ စီစဉ်ထားတယ်လို့ မနေ့က ရန်ကုန်မှာကျင်းပတဲ့ Myancopharm ကိုဗစ်ကာကွယ်ဆေး စတင်ထုတ်လုပ်မှုနှင့် မိတ်ဆက်တဲ့အခမ်းအနားမှာ အခုလို ထည့်သွင်းပြောကြားလိုက်တာပါ။

ယခု Myancopharm ကိုဗစ်ကာကွယ်ဆေးထုတ်လုပ်မှုဆိုတာဟာ Sinopharm Group မှ ထုတ်လုပ်တဲ့ ကိုဗစ် ကာကွယ်ဆေးကို Ready to Fill Bulk အနေနဲ့ ဝယ်ယူပြီး ပုလင်းသွင်းဖြည့်တင်းတာ ဖြစ်ပါတယ်။

ပုလင်းသွင်းဖြည့်တင်းပြီး လုပ်ဆောင်တဲ့ နိုင်ငံတွေမှာ အာဆီယံဒေသတွင်းမှာ မြန်မာနိုင်ငံအပါအဝင် ငါးနိုင်ငံဆောင်ရွက်နိုင်ခဲ့ပြီး ကမ္ဘာပေါ်မှာ လေးနိုင်ငံလုပ်ဆောင်နိုင်ခဲ့တယ်လို့ သိရပါတယ်။

ယခု ထုတ်လုပ်ထားတဲ့ Myancopharm ကိုဗစ်ကာကွယ်ဆေးဟာ ဆေးပုလင်း တစ်လုံးကို လူငါးဦးစာ 5 Doeses ဖြစ်ပြီး အပူချိန် ( 2-8 ံC) အတွင်း ထားရှိဖို့လိုအပ်ပြီး ဆေးရဲ့ သက်တမ်းမှာ တစ်နှစ်ဖြစ်ပါတယ်။

“ Sinopharm Group နဲ့ မြန်မာနိုင်ငံရဲ့ Vaccine RTF Bulk ပူးပေါင်းထုတ်လုပ်မှုစက်ရုံဟာ Sinopharm Group က အာရှ-ပစိဖိတ်ဒေသရဲ့ ပထမဆုံး တရားဝင်ထုတ်လုပ်တဲ့ ကိုဗစ် ကာကွယ်ဆေးစက်ရုံဖြစ်ပါတယ်။ တရုတ်နိုင်ငံက မြန်မာနိုင်ငံ မြောက်ပိုင်းသို့ နောက်ထပ် ယွမ် ၁၀ ဒဿမ ၅ သန်း တန်ဖိုးရှိတဲ့ ကပ်ရောဂါတိုက်ဖျက်ရေးပစ္စည်းထောက်ပံ့ပေးပြီး နှစ်ဦးနှစ်ဖက် ထိရောက်စွာ အကောင်အထည်ဖော်နိုင်မယ်လို့ မျှော်လင့်ပါတယ်” လို့ သံအမတ်ကြီး Mr.Chen Hai က ပြောပါတယ်။

မြန်မာနိုင်ငံဆိုင်ရာ တရုတ်သံရုံးနဲ့ ယူနန်ပြည်နယ်အစိုးရက မြန်မာနိုင်ငံကို ကာကွယ်ဆေးထိုးအပ် ၃ သန်း အရေးပေါ်လှူဒါန်းသွားဖို့ စီစဉ်ထားတယ်လို့ သိရပါတယ်။

မြန်မာနိုင်ငံမှာ တရုတ်နိုင်ငံ Sinopharm Groupနဲ့ မြန်မာနိုင်ငံ ပူးပေါင်းပြီး အသည်းရောင်အသားဝါဘီပိုး၊ တုပ်ကွေး ကာကွယ်ဆေးတို့ ထုတ်လုပ်ဖို့ကိုလည်း ဆွေးနွေးနေတယ်လို့ သိရပါတယ်။

ymg/ei
#Yangon_Media_Group

#LocalNews
Published - 24Mar 2022

မတ်လ ၂၃ရက်နေ့ ညပိုင်းက ရန်ကုန်တိုင်းဒေသကြီး ၊လှိုင်သာယာမြို့နယ်တွင် ရာအိမ်မှူးတစ်ဦးက ညမထွက်ရဒေသန္တရအမိန့်ကို လိုက်လံကြေညာပြီး နေအိမ်သို့အပြန်တွင် သေနတ်ဖြင့်ပစ်ခတ်ခံခဲ့ရတယ်လို့ ရန်ကုန်တိုင်းဒေသကြီးရဲတပ်ဖွဲ့က သိရပါတယ်။

ဖြစ်စဥ်မှာ မတ်လ ၂၃ရက် ည ၉ နာရီ အချိန်တွင် လှိုင်သာယာ(အရှေ့ပိုင်း)မြို့နယ်၊ ညောင်ကျေးရွာပန်းလှိုင်လမ်းနှင့် ဂေါက်ကွင်းပတ်လမ်းထောင့်နေရာတွင် ရာအိမ်မှူး(၁)ဦး ပစ်ခတ်ခံရမှုဖြစ်ပွားကြောင်း သတင်းအရ လုံခြုံရေးတပ်ဖွဲ့က အဖွဲ့ဖြင့် သွားရောက်စိစစ်ခဲ့ရာ ရာအိမ်မှူး ဦးလှထွန်းနိုင် မင်းကြီးမဟာမင်းခေါင်လမ်း၊ ညောင်ကျေးရွာနေသူထိုင်သူသည် ကျေးရွာအတွင်း ရာဇဝတ်ကျင့်ထုံးပုဒ်မ-၁၄၄ အရ ည ၁၂ နာရီအချိန်မှ နံနက် ၄ နာရီအချိန်အတွင်း ညမထွက်ရ ဒေသန္တရအမိန့်အား အုပ်ချုပ်ရေးအဖွဲ့ဝင်များနှင့် လိုက်လံကြေညာခဲ့ပြီး နေအိမ်သို့အပြန် ဆိုင်ကယ်(စိစစ်ဆဲ)၊ လူ(၂)ဦး စိစစ်ဆဲမှ သေနတ်ဖြင့် ပစ်ခတ်ခဲ့တာလို့ သိရပါတယ်။

"ရာအိမ်မှူးဖြစ်သူက ညမထွက်ရအမိန့်ပြင်ဆင်တာကို လိုက်လံကြေညာပြီး အိမ်အပြန်မှာ ပစ်ခတ်ခံရတာပါ။ထိခိုက်ဒဏ်ရာရရှိတာကြောင့် ဆေးကုသမှုခံယူနေပါတယ်"လို့ ရဲအရာရှိတစ်ဦးကပြောပါတယ်။

ပစ်ခတ်မှုကြောင့် ရာအိမ်မှူး လှထွန်းနိုင်၌ ဝမ်းဗိုက်ထိမှန်ဒဏ်ရာ(၁)ချက်၊ ယာခြေထောက်(ဒူးခေါင်းအောက်) ထိမှန်ဒဏ်ရာ ၁ ချက်(စိုးရိမ်ရ) ရရှိခဲ့ပြီး ပစ်ခတ်မှုဖြစ်ပွားသည့်နေရာမှ NRC LUGER ကျည်ခွံ(၃)ခု တွေ့ရှိခဲ့ပြီး ဒဏ်ရာရရှိသူ လှထွန်းနိုင်အား ဆေးရုံသို့ပို့ဆောင်ကာ ဆေးကုသမှုခံယူစေလျက်ရှိတယ်လို့ သိရပါတယ်။

ymg/hm
#Yangon_Media_Group

#LocalNews
Published -24 Mar 2022

ရခိုင်ပြည်နယ်ရဲ့မြို့တော် စစ်တွေမြို့၊ပြည်တော်သာ (စစ်တွေ) - ရေချမ်းပြင် လမ်းပိုင်းတွင် RBE ရထားပြန်လည်ပြေးဆွဲမှုကို မတ်လ ၂၄ရက်နေ့ ယနေ့မှ စတင်၍ ပြန်လည်ပြေးဆွဲနေပြီဖြစ်ကြောင်း မြန်မာ့မီးရထားမှသိရပါတယ်။

ယနေ့ နံနက်ပိုင်းတွင် ပြန်လည်ပြေးဆွဲခြင်းအခမ်းအနားကို ပြည်တော်သာဘူတာတွင်ကျင်းပခဲ့ပြီးအခမ်းအနားကို ရခိုင်ပြည်နယ်ဝန်ကြီးချုပ် ဒေါက်တာ အောင်ကျော်မင်း၊ ပြည်နယ်ဝန်ကြီးများ၊ ပြည်နယ်ဥပဒေချုပ်၊ အစိုးရအဖွဲ့အတွင်းရေးမှူး၊ စစ်တွေတပ်နယ်မှ တပ်မတော်အရာရှိကြီးများ၊ ဌာန ဆိုင်ရာတာဝန်ရှိသူများ၊ မြန်မာ့မီးရထားမှ အထွေထွေမန်နေဂျာ(အောက်မြန်မာပြည်)နှင့်တာဝန်ရှိ သူများတက်ရောက်ခဲ့တယ်လို့ သိရပါတယ်။

ပြည်တော်သာ(စစ်တွေ)-ရေချမ်းပြင် လမ်းပိုင်းခရီးစဉ်အား ကိုဗစ်-၁၉ ရောဂါဖြစ်ပွားမှုကြောင့် ၂၀၂၀ ခုနှစ် ဧပြီလ ၁၀ ရက်နေ့မှစတင်၍ ရထားပြေးဆွဲရေးလုပ်ငန်းများကို ယာယီရပ်နားခဲ့ပြီး ယခုပြန်လည်ပြေးဆွဲပေးနိုင်ရေးအတွက် သံလမ်းတာဘောင် ရေတိုက်စားမှု ပြုပြင်ထိန်းသိမ်းခြင်း၊ ရာသီဥတုဒဏ်ကြောင့် မြေသားတာဘောင်နိမ့်ဆင်းသည့် ပေ ၄၀ အရှည်ဇောပူဂျာ တံတားအား ဘေလီတံတားထိုးပြုပြင်၍ ရထားပြေးဆွဲနိုင်ရေးဆောင်ရွက်ခဲ့တယ်လို့ သိရပါတယ်။

ပြည်တော်သာ(စစ်တွေ)-ရေချမ်းပြင် လမ်းပိုင်သည် စစ်တွေတက္ကသိုလ်နှင့် နည်းပညာတက္ကသိုလ်များတွင် တက်ရောက်နေကြသော ကျောင်းသား၊ ကျောင်းသူများအဆင်ပြေစေရေး၊ ရေချမ်းပြင်နှင့်စစ်တွေကြားရှိ ကျေးရွာများမှ ပြည်သူများဈေးရောင်းဈေးဝယ် အဆင်ပြေစေရေး၊ ပြည်တော်သာ(စစ်တွေ) မှ ရေချမ်းပြင်ကြားရှိကျေးရွာများသို့ အဆင်ပြေစွာ ခရီးသွားလာနိုင်ရေးတို့အတွက် ရထားအားပြန်လည်ပြေးဆွဲပေးခြင်းဖြစ်ကာ အသွားအပြန်ခရီးအတွက် ယခင်နှုန်းထားအတိုင်း ငွေကျပ် ၃၀၀ ဖြစ်ကြောင်းသိရပါတယ်။

ထိုသို့ ရထားပြေးဆွဲရာတွင် RBE ရထားသည် ပြည်တော်သာဘူတာမှ နံနက် ၇နာရီတွင် ထွက်ခွာ ၍ ရေချမ်းပြင်ဘူတာသို နံနက် ၈ နာရီတွင်လည်းကောင်း၊ ရေချမ်းပြင်ဘူတာမှ နံနက် ၁၀ နာရီတွင် ထွက်ခွာ၍ ပြည်တော်သာဘူတာသို့ နေ့လယ် ၁၁ နာရီတွင်လည်းကောင်း၊ ပြည်တော်သာဘူတာမှ နေ့လယ် ၂ နာရီပြန်လည်ထွက်ခွာ၍ ရေချမ်းပြင်ဘူတာသို့ ညနေ ၃ နာရီတွင်လည်းကောင်း ရေချမ်းပြင် ဘူတာမှ ညနေ ၄ နာရီ ပြန်လည်ထွက်ခွာ၍ ပြည်တော်သာဘူတာသို့ ညနေ ၅ နာရီတွင် လည်းကောင်း အသီးသီးရောက်ရှိမည်ဖြစ်သည်။

ရထားပြေးဆွဲခြင်းကို နေ့စဉ်အစုန်၊ အဆန်လေးခေါက်ပြေးဆွဲပေးသွားမည်ဖြစ်ကြောင်းနှင့် လမ်းတစ်လျှောက်တွင် စစ်တွေဘူတာ၊ စစ်တွေတက္ကသိုလ်ဘူတာ၊ ဒါးပိုင်ဘူတာ၊ ဇောပူဂျာဘူတာ၊ မယ်ဇလီဘူတာနှင့် ရေချမ်းပြင်ဘူတာတို့မှာ ရပ်တန့်ပေးသွားမည်ဖြစ်ကြောင်း မြန်မာ့မီးရထားမှ သိရပါတယ်။

ymg/hm
#Yangon_Media_Group

#WorldPolitics
Published - 24 March 2022

ရုရှားနဲ့ဆက်ဆံရေးမနီးစပ်တဲ့နိုင်ငံတွေအနေနဲ့ ရုရှားမှဓာတ်ငွေ့ဝယ်ယူရာမှာ ရူဘယ်လ်ငွေဖြင့်ပေးချေဖို့အလိုရှိကြောင်း သမ္မတ'ဗလာဒီမီယာပူတင်'က ဗုဒ္ဓဟူးနေ့ကပြောကြားလိုက်ပါတယ်။ အဆိုပါပြောကြားချက်ကြောင့် စွမ်းအင်သုံးစွဲရရှိရေးပိုမိုကျပ်တည်းလာနိုင်ပြီး ဥရောပ ဓာတ်ငွေ့ဈေးနှုန်း အလွန်မတန်မြင့်တက်လာမှာကို စိုးရိမ်နေရပါတယ်။

ဖေဖော်ဝါရီ ၂၄ ရက်နေ့ကစပြီး ယူကရိန်းကိုရုရှားတို့ စတင်ကျူးကျော်ကတည်းက ဥရောပနိုင်ငံတွေနဲ့ အမေရိကန်တို့ က ရုရှားအပေါ်ပြင်းထန်တဲ့ဒဏ်ခတ်ပိတ်ဆို့ မှုတွေ ချမှတ်ခဲ့ပါတယ်။

ဒါပေမဲ့ ဥရောပက စွမ်းအင်ထုတ်လုပ်သုံးစွဲရေးအတွက် ရုရှားထုတ်ဓာတ်ငွေ့တွေကို အလွန်အမင်းမှီခိုအားထားနေရပြီး ရုရှားစွမ်းအင်ကဏ္ဍကိုလည်း ဒဏ်ခတ်ပိတ်ဆို့ သင့်လားဆိုတာကိုတော့ ဥရောပသမဂ္ဂမှ ဝေခွဲမရဖြစ်နေပါတယ်။

ရုရှားဓာတ်ငွေ့ဝယ်ယူချင်ရင် ရူဘယ်လ်ငွေနဲ့ပဲ ပေးချေရပါမယ်လို့ 'ပူတင်'ကပြတ်ပြတ်သားသား ထုတ်ပြန်လိုက်တာပါ။ လက်ရှိစာချုပ်တွေအရ ယူရိုငွေနဲ့ပေးချေဖို့ သဘောတူထားပေမယ့် ထိုအချက်အလက်တွေကို ရုရှားတို့ ကတဖက်သက်ပြောင်းလဲခွင့်ရှိ/မရှိဆိုတာကတော့ မသေချာသေးပါဘူး။

အခုလိုကြေညာလိုက်ပြီးနောက် ရူဘယ်လ်ငွေကြေးတန်ဖိုးမှာ ဒေါ်လာငွေ ၉၅ ဒေါ်လာမြင့်တက်လာခဲ့ပါတယ်။ဒါပေမဲ့ ဒေါ်လာငွေ ၁၀၀ အောက်မှာ ဆက်လက်ရှိနေဆဲဖြစ်ပြီး ၉၇.၇ ဒေါ်လာနဲ့အပြီးသတ်ခဲ့ကာ ဖေဖော်ဝါရီ ၂၄ ရက်နေ့နောက်ပိုင်း ၂၂ ရာခိုင်နှုန်းကျော်အထိ တန်ဖိုးကျဆင်းသွားခဲ့ပါတယ်။

ဗုဒ္ဓဟူးနေ့က ဥရောပအချို့မှ ဓာတ်ငွေ့လက်ကားရောင်းဈေးဟာ ၃၀ ရာခိုင်နှုန်းအထိမြင့်တက်ခဲ့ပြီး ဗြိတိန်နဲ့နယ်သာလန်တို့ မှ ဓာတ်ငွေ့လက်ကားရောင်းဈေးတွေ ခုန်တက်လာခဲ့ပါတယ်။

ဥရောပနိုင်ငံတွေရဲ့ ဓာတ်ငွေ့သုံးစွဲမှု ၄၀ ရာခိုင်နှုန်းလောက်က ရုရှားဓာတ်ငွေ့တွေဖြစ်ပါတယ်။ ယခုနှစ်အတွင်း ရုရှားမှတင်ပို့ လာတဲ့ဓာတ်ငွေ့ဈေးနှုန်းဟာ ဥရောပမှာ တစ်နေ့အတွင်း ယူရိုသန်း ၂၀၀ မှ သန်း ၈၀၀ ကြားအတက်အကျရှိနေခဲ့ပါတယ်။

"စာချုပ်ပါအချက်အလက်တွေအတိုင်း ပုံသေဈေးနှုန်းပုံသေပမာဏအတိုင်း သဘာဝဓာတ်ငွေ့များဆက်လက်ထောက်ပံ့သွားမှာပါ။ ပေးချေရမယ့်ငွေကြေးသာ ပြောင်းလဲမှာဖြစ်ပြီး ရုရှားငွေကြေးရူဘယ်လ်ကို ပြောင်းလဲသွားမှာဖြစ်ပါတယ်" လို့ အစိုးရဝန်ကြီးများအွန်လိုင်းအစည်းအဝေးပွဲမှာ 'ပူတင်'ကပြောကြားခဲ့ပါတယ်။

ရုရှားဓာတ်ငွေ့တွေကို အခြားနိုင်ငံမှဝယ်ယူသူတွေရှိလာတာကြောင့် 'ပူတင်'က စာချုပ်ပါအချက်အလက်တွေကို ချိုးဖောက်ချင်နေတာဖြစ်ကြောင်း ဂျာမနီစီးပွားရေးဝန်ကြီး'ရောဘတ်ဟာဘက်'က တုန့်ပြန်လိုက်ပါတယ်။

ပိုလန်အစိုးရအရာရှိတစ်ဦးက "လက်ရှိစာချုပ်ပါ ငွေပေးချေမှုပုံစုံကိုပြောင်းလဲတာက သဘောတူညီမှုချိုးဖောက်ရာကျပါတယ်။ ယခုနှစ်ကုန် Gazprom ဓာတ်ငွေ့ကုမ္ပဏီနဲ့ စာချုပ်သက်တမ်းကုန်ဆုံးတဲ့အခါ နောက်ထပ်စာချုပ်အသစ်ချုပ်ဆိုဖို့ ဆန္ဒမရှိတော့ပါဘူး" လို့ ပြောကြားလိုက်ပါတယ်။

နယ်သာလန်ဓာတ်ငွေ့ဖြန့်ဖြူးရေး Eneco က သူတို့ ဝယ်ယူတဲ့ဓာတ်ငွေ့ ၁၅ ရာခိုင်နှုန်းခန့်ကို ရုရှားဓာတ်ငွေ့ထုတ်လုပ်ရေးကုမ္ပဏီကြီး Gazprom မှ ဝယ်ယူထားတာဖြစ်ပြီး ယူရိုငွေနဲ့ပေးချေဖို့ နှစ်ရှည်စာချုပ်ချုပ်ဆိုထားပါတယ်။

Gazprom ကုမ္ပဏီက ဥရောပကို သူတို့ ရဲ့ဓာတ်ငွေ့ရောင်းချရာမှာ ရောင်းချမှု ၅၈ ရာခိုင်နှုန်းကို ယူရိုငွေ၊ ၃၉ ရာခိုင်နှုန်းကို အမေရိကန်ဒေါ်လာ၊ ၃ ရာခိုင်နှုန်းကို စတာလင်ပေါင်ဖြင့် ရောင်းချပေးနေခဲ့ပါတယ်။

"ပြဿနာအခက်အခဲတွေကြားထဲ ဖြစ်ပေါ်လာနိုင်တာတွေအားလုံးကို မျှော်လင့်ထားပါတယ်။ လက်ရှိစာချုပ်တွေအရ ငွေကြေးပြောင်းလဲပေးချေဖို့က သိပ်ပြဿနာမရှိပါဘူး" လို့ ဘူလ်ဂေရီးယားနိုင်ငံမှ စွမ်းအင်ဝန်ကြီး'အလက်ဇန်ဒါနီကိုလော့ဗ်'က ဆိုဖီယာမြို့ မှာသတင်းထောက်တွေကို ပြောကြားခဲ့ပါတယ်။

ရူဘယ်လ်ငွေကြေးလိုအပ်လာနိုင်တဲ့ ဥရောပမှဝယ်သူများနဲ့ဘဏ်များအတွက် ရုရှားဗဟိုဘဏ်ကနေ နိုင်ငံခြားငွေလဲလှယ်ရေးဈေးကွက်တွေကို ထောက်ပံ့သွားမှာဖြစ်ကြောင်း သိရှိရပါတယ်။
Source: Reuters

 #WorldHealth
Published - 24 March 2022

SK Bioscience ကုမ္ပဏီမှ စမ်းသပ်ထုတ်လုပ်လျက်ရှိတဲ့ ကိုဗစ်အားမြှင့်ကာကွယ်ဆေး(booster)ကို မျောက်တွေနဲ့စမ်းသပ်ခဲ့ရာမှာ အိုမီခရွန်မျိုးဗီဇကွဲကို တာရှည်ကာကွယ်နိုင်စွမ်းရှိကြောင်း တွေ့ရှိခဲ့ပါတယ်။

မျောက်တွေကို ကနဦးကာကွယ်ဆေးနှစ်ကြိမ်ထိုးပေးပြီး ၆ လသို့မဟုတ် ၁၂ ကြာတဲ့အခါ အားမြှင့်ကာကွယ်ဆေးထိုးပေးခဲ့ပါတယ်။ ထို့နောက် အားမြှင့်ကာကွယ်ဆေးပါထိုးနှံထားတဲ့မျောက်တွေဆီက သွေးနမူနာယူပြီးစစ်ဆေးကြည့်ရာ မူလကိုရိုနာဗိုင်းရပ်စ်နဲ့ အလွန်ကူးစက်မြန်အိုမီခရွန်မျိုးဗီဇကွဲတိုကိုကာကွယ်ပေးနိုင်တဲ့ ပဋိပစ္စည်း(antibody)ပမာဏ သိသိသာသာများနေတာကိုတွေ့ရှိခဲ့ကြောင်း bioRxiv ဝက်ဘ်ဆိုက်မှာ တနင်္ဂနွေနေ့ကဖော်ပြခဲ့ပါတယ်။

သူတို့ရဲ့ ခန္ဓာကိုယ်ခုခံအားဒုတိယအဆင့်ဟာလည်း ပိုမိုအားကောင်းလာပြီး တာရှည်ခံတာကိုတွေ့ရှိခဲ့ကြပါတယ်။ GBP510 လိုခေါ်တဲ့ကာကွယ်ဆေးဟာ ကိုရိုနာဗိုင်းရပ်စ်မျက်နှာပြင်ပေါ်က စပိုက်ခ်ပရိုတိန်းရဲ့အဓိကအစိတ်အပိုင်းတွေကို ပွားယူပို့ဆောင်ပေးခြင်းဖြင့် ခန္ဓာကိုယ်ခုခံအားစနစ်ကိုလှုံ့ ဆော်ပေးတာဖြစ်ပါတယ်။

ပရိုတိန်းအစိတ်အပိုင်းခွဲလေးတွေကို နာနိုအမှုန်တွေမှာကပ်တွယ်ကာ ဗိုင်းရပ်စ်ပုံစံလိုဖြစ်အောင် ဖန်တီးလိုက်ပါတယ်။ ဒီအစိတ်အပိုင်းတွေမှာ ခန္ဓာကိုယ်ခုခံအားစနစ်ကိုမြှင့်တင်ပေးတဲ့ GSK ကုမ္ပဏီမှ အားမြှင့်ပစ္စည်းတစ်မျိုးဖြင့် ဖြည့်စွက်ဖန်တီးထားပါတယ်။

"မူလကာကွယ်ဆေးနှစ်ကြိမ်ထိုးပြီး တစ်နှစ်အကြာ အားမြှင့်ကာကွယ်ဆေး(Booster)နဲ့ အားမြှင့်ပစ္စည်းပါထိုးနှံလိုက်တဲ့အခါ ပဋိပစ္စည်းတုန့်ပြန်မှုအလွန်တာရှည်ခံပြီး အိုမီခရွန်ကူးစက်မှုကိုကာကွယ်ပေးပါတယ်" လို့ ကယ်လီဖိုးနီးယားရှိ စတန်းဖိုဒ်တက္ကသိုလ်မှ 'ဘာလီပူလန်ဒရန်'က ပြောပြပါတယ်။ GBP510 ကာကွယ်ဆေးကို လူသားတွေမှာစမ်းသပ်ဖို့ ပြင်ဆင်နေကြပြီဖြစ်ပါတယ်။
Source: Reuters

#LocalNews
Published_24 March 2022

ရန်ကုန်တိုင်းဒေသကြီး အစိုးရအဖွဲ့၏ စီးပွားရေးရာဝန်ကြီး ၊ ယခင်က မြန်မာနိုင်ငံဆန်ကုန်သည်ကြီးများအသင်း ဥက္ကဌဖြစ်ခဲ့သူ ဦးအောင်သန်းဦး နှင့် ရန်ကုန်မြို့တော် စည်ပင်သာယာရေးကော်မတီ (YCDC) ဥက္ကဌ မြို့တော်ဝန် ၊ ရန်ကုန်တိုင်း စည်ပင်သာယာရေးဝန်ကြီး ဦးဗိုလ်ဌေးတို့ နှစ်ဦးကို ခေါ်ယူမေးမြန်းနေခြင်းသာဖြစ်ကြောင်း ပြန်ကြားရေးဝန်ကြီးဌာန ဒုဝန်ကြီး ဗိုလ်ချုပ် ဇော်မင်းထွန်းက YGM ကို ပြောသည်။

ပြည်ထဲရေးဝန်ကြီးဟောင်း ဒုတိယဗိုလ်ချုပ်ကြီးကျော်ဆွေ ၊ ပြန်ကြားရေးဝန်ကြီးဟောင်း ဦးရဲထွဋ် ၊ သူရ ဦးရွှေမန်း၏ သား ဦးတိုးနိုင်မန်း တို့လည်း အဖမ်းခံရကြောင်း လူမှုကွန်ရက်တွင် သတင်းများ ထွက်ပေါ်နေသည်မှာလည်း မဟုတ်ကြောင်းနှင့် ပြည်ထဲရေးဝန်ကြီးဟောင်း ဒုတိယဗိုလ်ချုပ်ကြီးကျော်ဆွေမှာ လာမည့် မတ်လ ၂၇ ရက်တွင် ကျရောက်မည့် တပ်မတော်နေ့အခမ်းအနားတက်ရောက်ရန် နေပြည်တော်သို့ ရောက်ရှိနေခြင်းသာဖြစ်ကြောင်း ၎င်းကပြောသည်။

"ဦးအောင်သန်းဦးနဲ့ မြို့တော်ဝန်ကို ဖမ်းဆီးထိန်းသိမ်းထားတာတော့ မဟုတ်ဘူး။ ခေါ်ယူမေးမြန်းလျက်ရှိတယ်၊ မေးမြန်းစရာတွေရှိတာတွေကို ခေါ်ယူမေးမြန်းလျက်ရှိပါတယ်။ ကျွန်တော်တို့ အကြောင်းစုံပြောနိုင်တဲ့အချိန်မှာ ပြန်ပြီးတော့ပြောပေးပါမယ်။

အခုကတော့ ဒီကနေ့ အွန်လိုင်းပေါ် ပြန့်နေတာက ဦးကျော်ဆွေတို့ ဦးတိုးနိုင်မန်းတို့ ဦးရဲထွဋ်တို့ ကိစ္စတွေက မဟုတ်ပါဘူး။

ဗိုလ်ချုပ်ကြီး ကျော်ဆွေကတော့ နေပြည်တော်မှာ တပ်မတော်နေ့ အခမ်းအနားတက်ဖို့ ရောက်ရှိလျက်ရှိပါတယ်၊ ကျွန်တော်သိသလောက်ကတော့ ဦးတိုးနိုင်မန်းကတော့ မြန်မာပြည်မှာတောင် မရှိဘူးနဲ့တူတယ်။ နောက်ပြီးကျတော့ ဦးရဲထွဋ်ကိစ္စကလည်း မဟုတ်ပါဘူးဗျာ့"ဟု ဗိုလ်ချုပ် ဇော်မင်းထွန်းက ပြောသည်။

ရန်ကုန် စီးပွားရေးဝန်ကြီးနှင့် မြို့တော်ဝန်တို့ကို မည်သည့်အကြောင်းကြောင့် ခေါ်ယူမေးမြန်းနေသည်ကို တိတိကျကျ မသိရသော်လည်း မြေလွတ်မြေရိုင်း လျှောက်ထားကြသည့်ကိစ္စနှင့် ပတ်သက်နေကြောင်း သတင်းများထွက်ပေါ်နေသည်။

ymg/mt
#Yangon_Media_Group

#WorldHealth
Published - 24 March 2022
ကိုရိုနာဗိုင်းရပ်စ်ကူးစက်ခြင်းမခံရတဲ့သူတွေထက်စာရင် ကိုဗစ်ရောဂါဖြစ်ပွားခဲ့တဲ့သူတွေဟာ တစ်နှစ်အတွင်း ဆီးချိုရောဂါဒုတိယအမျိုးအစားဖြစ်ပွားလာနိုင်ချေများကြောင်း လူနာမှတ်တမ်းလေ့လာချက်များကို တနင်္လာနေ့ကဖော်ပြခဲ့ပါတယ်။

ကိုဗစ်ရောဂါပြင်းထန်ခြင်းမရှိခဲ့တဲ့သူတွေမှာတောင် ဆီးချိုရောဂါဖြစ်လာနိုင်ချေရှိနေပြီး ကိုဗစ်ရောဂါလက္ခဏာပြင်းထန်စွာခံစားခဲ့ရသူများကတော့ ဆီးချိုရောဂါစတင်ဖြစ်ပွားလာနိုင်ချေပိုများခဲ့ပါတယ်။

စစ်မှုထမ်းဟောင်းဦးစီးဌာနမှ ကိုရိုနာဗိုင်းရပ်စ်ကူးစက်ခဲ့တဲ့ လူနာ ၁၈၁,၀၀၀ ကျော်ကို ၂၀၂၀ မတ်လ ၁ ရက်နေ့မှ ၂၀၂၁ စက်တင်ဘာလ ၃၀ ရက်နေ့အတွင်း မှတ်တမ်းအချက်အလက်များလေ့လာခဲ့ကြပါတယ်။

ဖြစ်ပွားရတဲ့အကြောင်းရင်းနဲ့ သက်ရောက်မှုကို သက်သေမပြနိုင်ပေမယ့် ဒီရောဂါနှစ်ခုကြားဆက်စပ်မှုရှိတာကိုတော့ တွေ့ရှိခဲ့ကြပါတယ်။ ကိုရိုနာဗိုင်းရပ်စ်ကူးစက်ခံရတဲ့ လူနာ ၄၆ ရာခိုင်နှုန်းဟာ ဆီးချိုရောဂါဒုတိယအမျိုးအစား စတင်ဖြစ်ပွားခြင်း ဒါမှမဟုတ် သွေးတွင်းသကြားဓာတ်ထိန်းသိမ်းဖို့ ကုသခြင်းများခံယူရတတ်ပါတယ်။

ဒီလေ့လာတွေ့ရှိမှုကို Lancet Diabetes & Endocrinology ဆေးပညာဂျာနယ်မှာ တနင်္လာနေ့ကဖော်ပြခဲ့ပါတယ်။ ဆီးချိုရောဂါဒုတိယအမျိုးအစားဆိုတာက သွေးတွင်းသကြားဓာတ်ကိုထိန်းညှိပေးတဲ့ အင်ဆူလင်ဟော်မုန်း မလုံမလောက်ဖြစ်တာကြောင့် သကြားဓာတ်ပမာဏမြင့်တက်လာတာဖြစ်ပါတယ်။

ဆီးချိုရောဂါဒုတိယအမျိုးအစားက ကျောက်ကပ်၊ အာရုံကြော၊ သွေးကြော၊ နှလုံးတို့ကို ထိခိုက်တတ်ပါတယ်။

ကပ်ရောဂါကာလအတွင်း ကိုဗစ်ရောဂါကူးစက်ခံရသူတွေထဲက လူပေါင်း ၄၇၁ သန်းလောက် ဆီးချိုရောဂါခံစားရနိုင်ချေရှိနေကာ အမေရိကန်မှာ သန်းပေါင်း ၈၀ နီးပါးလောက်ရှိနေပြီး အထူးသဖြင့် ကိုဗစ်နောက်ဆက်တွဲလက္ခဏာများခံစားရသူတွေဖြစ်ပါတယ်။

ကိုဗစ်ရောဂါဖြစ်ဖူးတယ်ဆိုရင် ကိုယ့်ရဲ့သွေးတွင်းသကြားဓာတ်ကို သတိထားစောင့်ကြည့်သင့်ကြောင်း စိန့်လူးဝစ်ကျန်းမာရေးစောင့်ရှောက်မှုစင်တာမှ သုတေသနဖွံ့ဖြိုးတိုးတက်ရေးအကြီးအကဲ'ဇိုင်ယက်အယ်လ်အလီ'က ပြောကြားလိုက်ပါတယ်။

စစ်မှုထမ်းဟောင်းဌာနမှကိုဗစ်လူနာများဟာ သာမန်ထက်အသက်အရွယ်ကြီးသူတွေများပြီး လူဖြူများနဲ့ အမျိုးသားအရေအတွက်ပိုများပါတယ်။ ဒါပေမဲ့ဒီလေ့လာမှုမှာ လူအများအပြားပါဝင်တဲ့အတွက် တွေ့ရှိချက်တွေကယုံကြည်ရတဲ့အနေအထားဖြစ်ကြောင်း 'အယ်လ်အလီ'ကဆိုပါတယ်။

ဆီးချိုဖြစ်ပေါ်လာနိုင်တဲ့သူတွေထဲမှာ လူပေါင်းစုံပါဝင်နိုင်ပြီး အမျိုးသမီးများ၊ လူနည်းစုများ၊ အသက်ငယ်သူများ၊ ခန္ဓာကိုယ်အချိုးအစားမျိုးစုံတို့မှာလည်း ဖြစ်ပွားနိုင်ပါတယ်။
ဆီးချိုရောဂါပေါ်လာတဲ့သူတွေထဲမှာမှ ဒုတိယအမျိုးအစားဖြစ်ပွားသူ ၉၉ ရာခိုင်နှုန်းအထိရှိနေပါတယ်။
Source: The Washington Post.

#LocalNews
Published- 24 Mar 2022
သထုံမြို့နယ်တွင် မြန်မာ-ထိုင်းနယ်စပ်ကိုပို့ ဆောင်မယ့်ငွေကျပ် ၃၀ ဘီလီယံတန်ဖိုးရှိ အိုက်စ်(မက်သ်အဖက်တမင်း)များ ဖမ်းဆီးရမိခဲ့တယ်လို့ မူးယစ်းဆေးဝါးတားဆီးနှိမ်နှင်းရေးရဲတပ်ဖွဲ့ ကသိရပါတယ်။

မူးယစ်ဆေးဝါးတားဆီးနှိမ်နင်းရေးရဲတပ်ဖွဲ့ မှ တပ်ဖွဲ့ ဝင်များပါဝင်သော ပူးပေါင်းအဖွဲ့ သည် မတ်လ ၁၇ ရက်နေ့ မွန်းလွဲ ၁၂ နာရီခွဲအချိန် မွန်ပြည်နယ်၊ သထုံမြို့နယ်၊ ရန်ကုန်-မော်လမြိုင်သွားကားလမ်း၊ မိုင်တိုင်အမှတ်(၁၄၅/ ၆) အနီးတွင် ပဲခူးမှ မော်လမြိုင်ဘက်သို့ ရဲဝင်းအောင် (၃၀)နှစ် မောင်းနှင်ပြီး အောင်ဇေဦး(ခ)ကိုဦး(၂၃)နှစ် လိုက်ပါလာသည့် ၂၂ ဘီးတွဲယာဉ်နှင့် တာဝန်ခံသယ်ဆောင်သူ ဇော်ဇော်(၃၉)နှစ် မောင်းနှင်လာသည့် SUZUKI SWIFT မော်တော်ယာဉ် ၂ စီးတို့ အား သတင်းအရရှာဖွေရာ ၂၂ ဘီး တွဲယာဉ်ပေါ်မှ ဒေသကာလတန်ဖိုးငွေကျပ် ၃၀ ဘီလီယံ တန်ဖိုးရှိ အိုက်စ်(မက်သ်အဖက်တမင်း) ၁,၂၀၀ ကီလို သိမ်းဆည်းရမိခဲ့တယ်လို့သိရပါတယ်။

စစ်ဆေးဖော် ထုတ်ချက်များအရ သိမ်းဆည်းရမိ အိုက်စ်(မက်သ်အဖက်တမင်း)များအား ရှမ်းပြည်နယ်(မြောက်ပိုင်း)မှ ကရင်ပြည်နယ်၊ မြဝတီ-ထိုင်း နယ်စပ်သို့ သယ်ဆောင်ခြင်းဖြစ်ကြောင်း သိရှိရသဖြင့် ၎င်းတို့ ၃ ဦးအား ဥပဒေအရ အရေးယူထားရှိပြီး ကွင်းဆက် ပြစ်မှုကျူးလွန်သူ များအား ဆက်လက်စစ်ဆေးဖော်ထုတ်လျက်ရှိတယ်လို့ သိရပါတယ်။

ymg/hm
#Yangon_Media_Group

 #LocalNews
Published_ 24 March 2022
ရုပ်ရှင်ရုံများ ၂၀၂၂ ခုနှစ်၊ ဧပြီ (၁၇) ရက်နေ့ (မြန်မာနှစ်ဆန်း ၁ ရက်နေ့) တွင် ပြန်လည်ဖွင့်လှစ် ပြသသွားမည်ဖြစ်ကြောင်း နစကရဲ့ ပြန်ကြားရေးဝန်ကြီးဌာနက အသိပေး ကြေညာထားပါတယ်။

ကိုဗစ်-၁၉ ရောဂါသည် ကမ္ဘာအနှံ့ ကူးစက်ပြန့်ပွားနိုင်သည့် ကမ္ဘာ့ကပ်ရောဂါဖြစ် ကြောင်း ၂၀၂၀ ပြည့်နှစ် မတ်လ ၁၁ ရက်တွင် ကမ္ဘာ့ကျန်းမာရေးအဖွဲ့(WHO)က သတ်မှတ် ကြေညာခဲ့တဲ့အတွက် COVID-19 ကူးစက်ပြန့်ပွားမှုသည် လူစုလူဝေးများ မှတစ်ဆင့် လျင်မြန်စွာ ဖြစ်ပေါ်နိုင်သောကြောင့် ပြည်သူများ၏ ကျန်းမာရေးကို အလေးပေး ရှေးရှု သောအားဖြင့် တိုင်းဒေသကြီး၊ ပြည်နယ်များရှိ ရုပ်ရှင်ရုံများတွင် ရုပ်ရှင်ပြသခြင်းများအား ၂၀၂၀ ပြည့်နှစ်၊ မတ်လ (၁၆) ရက်နေ့မှ စတင်၍ ရပ်ဆိုင်းထားခဲ့ခြင်း ဖြစ်ပါတယ်။

ကျန်းမာရေးဝန်ကြီးဌာနမှ ကိုဗစ်-၁၉ ရောဂါကာကွယ် တားဆီးရေးဆိုင်ရာ အစီအမံ များနှင့်အညီ “ရုပ်ရှင်ပြသရာတွင်လိုက်နာဆောင်ရွက်ရမည့် စံပြုသတ်မှတ် ချက်နှင့်အညီ လိုက်နာကျင့်သုံး ဆောင်ရွက်ပြီး ပထမအဆင့်ပြသရန် လျာထားသည့် ရုပ်ရှင်ရုံ ၆၀ ခန့်ကို ၂၀၂၂ ခုနှစ်၊ ဧပြီလ (၁၇) ရက်နေ့ (မြန်မာနှစ်ဆန်း ၁ ရက်နေ့) တွင် ပြန်လည်ဖွင့်လှစ် ပြသသွားမည်ဖြစ်ကြောင်း ပြန်ကြားရေးဝန်ကြီးဌာနက ကြေညာထားပါတယ်။

ယခုအခါ ကိုဗစ်-၁၉ ရောဂါဖြစ်ပွားမှု အခြေအနေများအပေါ် သုံးသပ်ချက်များအရ ကိုဗစ်-၁၉ ရောဂါဓာတ်ခွဲအတည်ပြုလူနာသစ်တွေ့ရှိမှု၊ ပိုးတွေ့မှုနှုန်းနှင့် သေဆုံးမှုနှုန်း တို့မှာ သိသာစွာ ကျဆင်းလာကြောင်း တွေ့ရှိရပါတယ်။
#ymg_mnn
Yangon_Media_Group

Published 23 March 2022

တနင်္လာနေ့ မွန်းလွဲပိုင်းက ပျက်ကျခဲ့တဲ့ တရုတ်အရှေ့ပိုင်းလေကြောင်းပိုင် ဘိုအင်း၇၃၇-၈၀၀ ရဲ့ သေတ္တာနက်တွေထဲက တစ်လုံးကို မတ်လ(၂၃)ရက်  ဗုဒ္ဓဟူးနေ့က ရှာတွေ့ပြီလို့ တရုတ်အရာရှိတွေက ပြောပါတယ်။

အဲဒါကြောင့် နှစ်များစွာအတွင်း တရုတ်နိုင်ငဲရဲ့ ကြေကွဲစရာအကောင်းဆုံး လေကြောင်းလေယာဉ်ပျက်ကျမှုဖြစ်ရတဲ့အကြောင်းရင်းကိုသိရဖို့ နီးစပ်လာပြီ ဖြစ်ပါတယ်။

တရုတ်အရှေ့ပိုင်းလေကြောင်လိုင်း ခရီးစဉ်အမှတ် MU5735ဟာ ကူမင်းလေဆိပ်ကနေ ခရီးသည် (၁၂၃) ဦး၊ လေယာဉ်အမှုထမ်း(၉)ဦးတို့ကို တင်ဆောင်ပျံသန်းရင်း ကွမ်ရှီကျန်း ကိုယ်ပိုင်အုပ်ချုပ်ခွင့်ရဒေသရဲ့ တန်ကျန်းစီရင်စုမှာ တနင်္လာနေ့ မွန်းလွဲပိုင်းက  ပျက်ကျခဲ့တာပါ။

လေယာဉ်ကို ၂၀၁၅ခုနှစ် ဇွန်၂၂ရက်မှာ စတင်ပျံသန်းဖို့ ပေးပို့ခဲ့တာဖြစ်တယ်လို့ အရာရှိတွေက သတင်းစာရှင်းလင်းပွဲမှာ ပြောပါတယ်။ လေကြောင်းပျံသန်းရေးစည်းမျည်းတွေကို တင်းကြပ်စွာလိုက်နာပြီး နည်းပညာပိုင်းလုပ်ဆောင်မှုတွေလည်း ပုံမှန်ကောင်းမွန်တာတွေ့ရတယ်လို့ ပြောပါတယ်။ လေယာဉ်မှူး(၃)ဦးစလုံးဟာ အရည်အချင်းကောင်းစွာပြည့်မီသူတွေ ဖြစ်တယ်။ အတွေအကြုံလည်းများပြီး ကျန်းမာရေးကောင်းသူတွေဖြစ်တယ်လို့ အရာရှိတွေကပြောပါတယ်။

Source CMG

#LocalNews
Published - 23 Mar 2022

၂၀၂၂ ခုနှစ် မတ်လ ၂၂ ရက်နေ့ ညပိုင်းက မြန်မာနိုင်ငံလူမှုကယ်ဆယ်ရေးအဖွဲ့(မုံရွာ)ရဲ့ လူနာတင်ယာဥ်တစ်စီးမှာ လူနာသွားရောက်ခေါ်ဆောင်စဥ် လမ်းမှာ မိုင်းဆွဲတိုက်ခိုက်ခံခဲ့ရလို့ သိရပါတယ်။

#Yangon_Media_Group

Published 23 March 2022

ထိုင်ဝမ်ကျွန်း၊ တိုင်တွန်ခရိုင်ရေပြင်မှာ မတ်၂၃ရက် ဗုဒ္ဓဟူးနေ့ နံနက်(၁)နာရီ(၄၁)မိနစ်ခန့်က အင်အား ၆.၆အဆင့်ရှိ ငလျင်တစ်ခု  လှုပ်ရှားသွားပါတယ်။

ငလျင်ဗဟိုချက်ဟာ မြေပြင်အောက် အနက်၂၀ကီလိုမီတာအကွာနှင့် မြောက်လတ္တီကျူ၂၃.၄၅ဒီဂရီနှင့် အရှေ့လောင်ဂျီတွတ် ၁၂၁.၅၅ ဒီဂရီနေရာကနေ လှုပ်ရှားသွားတာဖြစ်ပါတယ်လို့ တရုတ်မြေငလျင်ကွန်ယက်စင်တာက ပြောပါတယ်။

ထိုင်ဝမ် အရှေ့ပိုင်းမှာ ဆက်တိုင်လှုပ်ရှားခဲ့တဲ့ ငလျင်တွေရဲ့လှုပ်ရှားမှုကို ထိုင်ဝမ်တစ်ကျွန်းလုံးခံစားရတယ်လို့ ထိုင်ဝမ် မိုးဇလ ဌာနကပြောပါတယ်။

လူတစ်ဦးဒဏ်ရာအနည်းငယ်ရပြီး ငလျင်ဒဏ်ခံရတဲ့ နေရာအတော်များများမှာ လျှပ်စစ်မီးပြတ်တောက်မှုတွေဖြစ်ခဲ့တယ်။ ပြီးတော့ ဟောလျန်ခရိုင်က တံတာတစ်စီးလည်းကျိုးသွားတယ်လို့ ဒေသခံ မီးသတ်ဌာနက သိရပါတယ်။

ငလျင်ကြီးလှုပ်ရှားပြီးနောက် နောက်ထပ် ၆.၁အဆင့်ရှိငလျင်နှင့်  အဆင့်၅ ကျော်ကျော်ရှိတဲ့ ငလျင်ငါးခုထပ်မံလှုပ်ရှားသွား တယ်လို့လည်း ထိုင်ဝမ်မိုးဇလဌာနကပြောပါတယ်။

ဒီနှစ်အတွင်းမှာ ယခုငလျင်ဟာ အပြင်းထန်ဆုံးဖြစ်ပြီး ဆက်လှုပ်တဲ့ငလျင်တွေဟာ ငလျင်ကြီးရဲ့လှုပ်ခတ်မှုကြောင့် ပေါ်ပေါက်တဲ့ ငလျင်တွေဖြစ်နိုင်တယ်လို့ ဌာနက ပြောပါတယ်။

Source Xinhua/CMG