#WorldHealth
Published - 26 March 2022

အမျိုးသားများအသုံးပြုနိုင်မယ့် သန္ဓေတားဆေးဖော်ထုတ်နိုင်ဖို့ နှစ်ပေါင်းများစွာကြိုးပမ်းမျှော်လင့်ထားကြရာ အခုအခါလက်တွေ့ထုတ်လုပ်နိုင်ဖို့ နီးစပ်နေပြီဖြစ်ပါတယ်။ ကိုယ်ဝန်ရရှိနိုင်ချေကို ၉၉ ရာခိုင်နှုန်းလျှော့ချပေးနိုင်ခြင်းဖြင့် အမျိုးသမီးသန္ဓေတားဆေးများကဲ့သို့ ထိရောက်မှုရှိနေမှာဖြစ်ပါတယ်။

YCT529 လို့ခေါ်တဲ့ အဆိုပါတားဆေးဟာ ဟော်မုန်းမပါဝင်တဲ့ဆေးဖြစ်ပြီး ကြွက်များနဲ့စမ်းသပ်ခဲ့ရာမှာ ထင်ရှားတဲ့ဘေးထွက်ဆိုးကျိုးမတွေ့ခဲ့ရပါဘူး။ ကြွက်တွေမှာ တားဆေးအသုံးပြုနေခြင်းကိုရပ်တန့်ပြီးနောက် ၄ ပတ်မှ ၆ ပတ်အတွင်း သန္ဓေအောင်နိုင်ချေပြန်လည်ရရှိလာခဲ့ပါတယ်။

ဒီဆေးဟာ သုတ်ပိုးဖြစ်ပေါ်စေတဲ့ပရိုတိန်းတစ်မျိုးကို တားဆီးပိတ်ပင်ခြင်းဖြင့် သန္ဓေတားခြင်းပြုလုပ်ပေးတာဖြစ်ပါတယ်။ မင်နီဆိုတာတက္ကသိုလ်မှ သုတေသီတွေက ယခုနှစ်နှောင်းပိုင်းမှာ လူသားတွေနဲ့စမ်းသပ်ဖို့ စီစဉ်နေကြပါတယ်။

လွန်ခဲ့တဲ့နှစ်တွေတုန်းက လူသားတွေနဲ့စမ်းသပ်ဖူးတဲ့ဆေးတွေရှိခဲ့ပေမယ့် YCT529 ကတော့ အမျိုးသားသန္ဓေတားဆေးတွေထဲမှာ ရှေ့အရောက်ဆုံးဖြစ်နေပါတယ်လို့ ပရော်ဖက်ဆာ'ဂန်ဒါဂျော့ဂျ်'က ပြောပြပါတယ်။

သိပ္ပံပညာရှင်တွေဟာ ၁၉၅၀ ခုနှစ်တွေကတည်းက သောက်ဆေး၊ ဂျယ်လ်၊ ထိုးဆေးတို့ ဖြင့် အမျိုးသားတွေအတွက် ထိရောက်တဲ့သန္ဓေတားဆေး ထုတ်လုပ်နိုင်ဖို့ ကြိုးပမ်းခဲ့ကြပါတယ်။

အမျိုးသမီးတွေမှာ တားဆေးတွေက တစ်လတစ်ခါမျိုးဥကြွေတာကို တားဆီးခြင်းဖြင့် ကိုယ်ဝန်မရရှိအောင်ပြုလုပ်ပေးပါတယ်။ အမျိုးသားတွေမှာတော့ သုတ်ပိုးတွေနေ့စဉ်သန်းနဲ့ချီပြီးထွက်ရှိနေတာကို တားဆီးရမှာဖြစ်ပါတယ်။

အရင်ကစမ်းသပ်ခဲ့တဲ့အမျိုးသားသန္ဓေတားဆေးတွေဟာ ကျားဟော်မုန်းတက်စတိုစထရုန်းကို တားဆီးပေးပြီး သုတ်ပိုးဆဲလ်တွေထုတ်လုပ်မှုလျော့ကျသွားအောင် ပြုလုပ်ပေးတာဖြစ်ပါတယ်။

ဒါပေမဲ့ တက်စတိုစထရုန်းဟော်မုန်းကိုတားဆီးခြင်းက အမျိုးသားတွေမှာ ကိုယ်အလေးချိန်တက်ခြင်း၊ စိတ်ဓာတ်ကျခြင်း၊ ကိုလက်စထရောတက်ခြင်းများ ဖြစ်ပွားနိုင်ပါတယ်။
ဒီလိုဘေးထွက်ဆိုးကျိုးတွေမဖြစ်ပေါ်စေဖို့ ဟော်မုန်းမပါဝင်တဲ့ အမျိုးသားသန္ဓေတားဆေးကို ထုတ်လုပ်ချင်ခဲ့တာဖြစ်ကြောင်း YCT529 ဆေးထုတ်လုပ်ရေးမှာပါဝင်တဲ့ 'အက်ဘ်ဒူလာအယ်နိုမန်'က ပြောကြားခဲ့ပါတယ်။

အမျိုးသားတွေမှာ ကွန်ဒုံးအသုံးပြုခြင်းနဲ့ သားကြောဖြတ်ခြင်းတို့ ဖြင့်သာ သန္ဓေတားလို့ ရနေတာဖြစ်ပါတယ်။ အမျိုးသမီးတွေအသုံးပြုတဲ့သန္ဓေတားဆေးက ထိရောက်မှုရှိပြီး သုံးစွဲမှုရပ်တန့်လိုက်ရင် ကိုယ်ဝန်ပြန်ရနိုင်ချေရှိနေတာကြောင့် အမျိုးသားတွေအတွက်လည်း ဒီလိုဆေးမျိုးလိုအပ်နေပါတယ်။

ဒီဆေးက တိရိစာ္ဆန်တွေနဲ့စမ်းသပ်ရာမှာ ထိရောက်မှုရှိပေမယ့် လူသားတွေနဲ့စမ်းသပ်ရင် ဘယ်လိုဖြစ်လာမလဲဆိုတာတော့ ခန့်မှန်းရခက်နေပါတယ်လို့ ပရော်ဖက်ဆာ'ဂျော့ဂျ်'ကဆိုပါတယ်။

အမျိုးသားသန္ဓေတားဆေး စမ်းသပ်ထုတ်လုပ်နိုင်ဖို့ အတွက် ရင်းနှီးမြှုပ်နှံမှုတွေ ပိုမိုလိုအပ်နေပါတယ်လို့ ပြောကြားသွားပါတယ်။
Source: DailyMail

#WorldHealth
Published - 26 March 2022
ကိုဗစ်ရောဂါခံစားရဖူးတဲ့အသက်ဆုံးပါးခါနီးလူနာတွေ လှူဒါန်းလိုက်သည့်အတွင်းအင်္ဂါများဟာ အစားထိုးခွဲစိတ်ဖို့ အတွက် ဘေးကင်းစိတ်ချရကြောင်း အမေရိကန်နဲ့ အီတလီမှအစားထိုးခွဲစိတ်ရေးအဖွဲ့ များက နောက်လမှာပြုလုပ်မယ့် အဏုဇီဝနှင့်ကူးစက်ရောဂါဆိုင်ရာ ဥရောပအစည်းအဝေးမှာ တင်ပြသွားဖို့ ရှိနေပါတယ်။

အဖွဲ့နှစ်ဖွဲ့စလုံးက သူတို့ရဲ့စမ်းသပ်လေ့လာချက်တွေကို ထုတ်ဖော်ပြသဖို့မျှော်မှန်းထားကြပါတယ်။ မြောက်ကယ်ရိုလိုင်းနား ဒုခ်ဆေးဘက်ဆိုင်ရာတက္ကသိုလ်မှ ဒေါက်တာ'ကမ်မရွန်ဝုဖ်'နဲ့ ဒေါက်တာ'အမ်မလီအိုင်ချန်ဘာနာ'တို့က အဆုတ်နဲ့အူအင်္ဂါများကိုတော့ အလှူရှင်အနေနဲ့ ကိုရိုနာဗိုင်းရပ်စ်မရှိကြောင်း ရက် ၂၀ ကျော်ကြာပြီးတဲ့အချိန်မှသာ အသုံးပြုသင့်ပြီး အခြားအင်္ဂါများကိုတော့ အလှူရှင်က ကိုဗစ်ရောဂါနဲ့ဆုံးပါးတာမျိုးမဟုတ်ရင် အစားထိုးအသုံးပြုနိုင်သလို သွေးခဲခြင်းဖြစ်စဉ်အမြောက်အများရှိမနေဘူးဆိုရင်လည်း အသုံးပြုနိုင်ပါတယ်လို့ အစည်းအဝေးကြီးကြပ်စီစဉ်သူတွေက ထုတ်ဖော်ပြောဆိုလိုက်ပါတယ်။

အီတလီနိုင်ငံ အင်ဆူဘရီယာတက္ကသိုလ်မှ ပရော်ဖက်ဆာ'ပေါ်လိုဂရော့စီ'နဲ့အဖွဲ့ဟာ SARS-CoV-2 ဗိုင်းရပ်စ်ရှိနေတဲ့အလှူရှင်များထံမှ အသည်း၊ နှလုံး၊ ကျောက်ကပ်အင်္ဂါများဖြင့် အစားထိုးခွဲစိတ်ခဲ့ကြပါတယ်။

"၂၀၂၂ ခုနှစ်ထဲကိုရောက်လာတဲ့အချိန်မှာ ကိုဗစ်ရောဂါဖြစ်ပွားဖူးတဲ့သူတွေရဲ့ အင်္ဂါအမျိုးမျိုးကို အသုံးပြုရနိုင်တဲ့အခြေအနေတွေ မလွဲမသွေရှိလာမှာပါ" လို့ 'ဂရော့စီ'က ရေးသားဖော်ပြခဲ့ပါတယ်။

ချပြထားတဲ့အချက်အလက်တွေက အားရစရာကောင်းပေမယ့် ဒီလို ကိစ္စတွေမှာ အလှူရှင်တွေရဲ့ ဘေးကင်းစိတ်ချရမှုက အဲဒီလောက်တော့စိတ်ချရခြင်းမရှိပါဘူး။
Source: Reuters

#LocalNews
Published_25 March 2022

Bus ကားမှတ်တိုင်တွေမှာရပ်တဲ့ Taxi တွေနဲ့ Light truck ကားတွေကို ရန်ကုန်တိုင်းဒေသကြီးပုဂ္ဂလိကသယ်ယူပို့ဆောင်ရေးကြီးကြပ်မှုကော်မတီ(YRTC) က အရေးယူဖို့ရှိနေပါတယ်။

#Yangon_Media_Group

Published 25 March 2022

မြောက်ကိုးရီးယားက ကမ္ဘာ့တိုက်ကြီးတစ်ခုမှ တစ်ခုသို့ ပစ်ခတ်နိုင်တဲ့ အကြီးဆုံးဒုံးကျည်ကို မတ်လ၂၄ ရက် စမ်းသပ်ပစ်လွှတ် ခဲ့ပါတယ်။ အဲသလိုပစ်လွှတ်တာကို မြောက်ကိုးရီးယားခေါင်းဆောင် ကင်ဂျုန်းအမ်ကိုယ်တိုင် လာရောက်ကြီးကြပ်တာကို နိုင်ငံပိုင်ရုပ်မြင်သံကြားကနေ စတိုင်အပြည့်နှင့် ရုပ်ရှင်ဆန်ဆန်ထုတ်လွှင့်တင်ဆက်ခဲ့ပါတယ်။

မြောက်ကိုးရီးယားဟာ အမေရိကန်ပြည်ထောင်စုနှင့် ကာလရှည်ထိပ်တိုက်ရင်ဆိုင်ဖို့ အဆင်သင့်ဖြစ်နေတယ်ဆိုတာကို အသေအချာပြသလိုက်တာဖြစ်တယ်လို့ နိုင်ငံပိုင်ရုပ်သံက သတင်းတင်ဆက်ပါတယ်။

ယခုနောက်ဆုံး စမ်းသပ် ပစ်လွှတ်လိုက်တဲ့ ICBM ဒုံးကျည်ဟာ  အမေရိကန်ပြည်မကြီးကို မည်သည့်နေရာကိုမဆို တိုက်ခိုက် နိုင်အောင် ဒီဇိုင်းလုပ်ထားတာလို့ ပြောပါတယ်။

အစိုးရမီဒီယာတွေဟာ  သားရေဂျာကင်အနက်ရောင်နှင့် နေကာမျက်မှန်အမည်းကို ဝတ်ဆင်ထားတဲ့ ကင်မ်ဟာ ဒုံးကျည် အကြီးကြီးတစ်ခုရဲ့ရှေ့က ကတ္တရာလမ်းပေါ် ခြေလှမ်းကျဲကျဲနှင့် ဖြတ်လျှောက်သွားတာကိုရိုက်ကူးထားပါတယ်။ နောက်ပုံတွေ မှာတော့  ယူနီဖောင်းဝတ်စစ်အရာရှိကြီးတွေနှင့်အတူ စမ်းသပ်ထုတ်လွှင့်မှုအပေါ် အောင်ပွဲခံနေတဲ့ လှုပ်ရှားမှုပုံတွေ ဖြစ်ပါ တယ်။

“ ယခုတိုက်ကြီးတစ်ခုနှင့်တစ်ခုအကြားပစ်လွှတ်တဲ့ ဒုံကျည်အသစ်ဟာ  ကျွန်တော်တို့ရဲ့ မဟာဗျူဟာမြောက်တပ်အင်အားရဲ့ ပါဝါကို တကမ္ဘာလုံးက ရှင်းရှင်းလင်းလင်းသတိထားမိစေလိမ့်မယ်” လို့ ကင်မ်က ပြောတယ်လို့ ကိုရီးယားဗဟိုသတင်းဌာနက  သတင်းထုတ်ပြန်ပါတယ်။ အခုဆို မြောက်ကိုးရီးယားဟာ အမေရိကန် နယ်ချဲ့တွေကို ကြာမြင့်စွာ ထိပ်တိုင်ရင်ဆိုင်ဖို့ အဆင် သင့် ရှိနေပြီလို့လည်း ဖြည့်စွက်ပြောပါတယ်။

Source AFP/KCTV

#LocalNews
Published - 25 March 2022

ကချင်ပြည်နယ်၊ မြစ်ကြီးနားမြို့ပေါ်မှာ နေ့စဉ်နဲ့အမျှလုယက်မှုဖြစ်စဉ်တွေ များပြားလာသည့် အတွက် မြို့နေဒေသခံများအနေနဲ့ စိုးရိမ်ထိတ်လန့်နေရတယ်လို့ သိရပါတယ်။

#Yangon_Media_Group

#LocalNews
Published_25 March 2022

ရွှေတိဂုံစေတီတော်ကြီးအားဖူးမျှော်ချိန်ကို မနက်ဖြန် မတ်လ ၂၆ ရက်မှစ၍ နံနက် ၅ နာရီ မှ ည ၇ နာရီထိ တိုးမြှင့်လိုက်ကြောင်း စေတီတော် ဘဏ္ဍာတော်ထိန်းဂေါပကအဖွဲ့က သိရသည်။

၂၀၂၁ ခုနှစ် နှစ်ကုန်ပိုင်းကစ၍ ရွှေတိဂုံစေတီတော်ကြီးအား အများပြည်သူ ဖူးမျှော်နိုင်ရန် နံနက် ၅ နာရီမှ ညနေ ၆ နာရီအထိ ဖွင့်လှစ်ပေးထားကာ စနေ၊ တနင်္ဂနွေနှင့် အများပြည်သူရုံးပိတ်ရက် ရက်များတွင်ည(၇)နာရီအချိန်ထိ ကိုဗစ်စည်းကမ်းများနှင့်အညီ ဖွင့်လှစ်ပေးခဲ့ခြင်း ဖြစ်သည်။

ymg/mt
#Yangon_Media_Group

#LocalNews
Published 25 Mar 2022

ရန်ကုန်တိုင်းဒေသကြီးဒဂုံမြို့သစ် တောင်ပိုင်းမြို့နယ် အမှတ်( ၁၈ )ရပ်ကွက်ရှိ နေအိမ်တစ်အိမ်ကို လုံခြုံရေးတပ်ဖွဲ့ဝင်များက ဝင်ရောက်ရှာဖွေရာ အမျိုးသားတစ်ဦးကို လက်နက်ခဲယမ်းများနှင့်အတူ ဖမ်းမိခဲ့တယ်လို့ ရန်ကုန်တိုင်းဒေသကြီးရဲတပ်ဖွဲ့ကနေ သိရပါတယ်။

ဖြစ်စဥ်မှာ ယနေ့ မတ်လ ၂၅ ရက်နေ့ နံနက် ၁၁ နာရီကျော်အချိန်ခန့်က ဒဂုံမြို့သစ်တောင်ပိုင်းမြို့နယ် ၁၈ ရပ်ကွက် သုခရတနာလမ်း အိမ်အမှတ် ၁၀၃၁(က) နေအိမ်အား လုံခြုံရေးတပ်ဖွဲ့ဝင်များမှ ဝင်ရောက်ရှာဖွေရာ အမျိုးသား(၁)ဦးအားလက်နက်များ၊ ကျည်များ၊ လက်ပစ်ဗုံးများ၊ လက်လုပ်ဗုံး၊ လျှစနက်တံများ၊ ပြောက်ကျားအင်္ကျီများ၊ ယမ်းများနဲ့အတူ နေအိမ်အတွင်းမှာ ဖမ်းဆီးရမိတာဖြစ်တယ်လို့ သိရပါတယ်။

"လက်နက်တွေနဲ့အတူ ဖမ်းဆီးရမိတဲ့သတင်းက သတင်းမှန်ပါတယ်။ဥပဒေအရအရေးယူဖို့ဆောင်ရွက်နေပါတယ်"လို့ ရဲအရာရှိတစ်ဦးကပြောပါတယ်။

အဆိုပါနေအိမ်အား လုံခြုံရေးတပ်ဖွဲ့ဝင်များက ချိတ်ပိတ်သိမ်းဆည်းသွားတယ်လို့ အဆိုပါရပ်ကွက်နေထိုင်သူတစ်ဦးကပြောပါတယ်။

ymg/hm
#Yangon_Media_Group

#LocalNews
Published - 25 March 2022

သင့်တော်တဲ့ ငွေကြေးပမာဏနဲ့ လိုအပ်သူများကို အာဟာရဒါနပြုချင်သူများအတွက် “လှူရအောင်” အစီအစဉ်က ဝန်ဆောင်မှုတွေပေးနေတယ်လို့ သိရပါတယ်။

#Yangon_Media_Group

#DailyNews
Published - 25 Mar 2022

၁။ မြစ်ကြီးနားမြို့ပေါ်တွင် လုယက်မှုဖြစ်စဥ်တွေများပြားလာပြီး ဒေသခံများ စိုးရိမ်ထိတ်လန့် နေရ။

၂။ ကားမှတ်တိုင်များတွင် ရပ်သည့် Taxi နှင့် Light truck များကို အရေးယူရန်စီစဉ်။

၃။ နေ့စဉ်မိုးလေဝသသတင်း။

၄။ အစ်မဖြစ်သူ၏ စံချိန်ကိုချိုးဖျက်ပြီး အသက်အငယ်ဆုံး တစ်ကိုယ်တော်ကမ္ဘာပတ်ပျံသန်းသူဖြစ်လာရန် ရည်ရွယ်ထားသည့်ဆယ်ကျော်သက်လေယာဉ်မှူး......အစရှိတဲ့သတင်းတွေကို တင်ဆက်ပေးသွားမှာပဲဖြစ်ပါတယ်။

#Yangon_Media_Group

#LocalNews
Published - 25 March 2022

သင်္ကြန်ရုံးပိတ်ရက်ကာလအတွင်း YBS ယာဉ်လိုင်းများ ပြေးဆွဲသွားဖို့စီစဉ်နေတယ်လို့ ရန်ကုန်တိုင်းဒေသကြီး ပုဂ္ဂလိကသယ်ယူပို့ဆောင်ရေး ကြီးကြပ်မှုကော်မတီ (YRTC)က ကြေညာထားပါတယ်။

YBS ယာဉ်လိုင်းများအား သင်္ကြန်ရုံးပိတ်ရက်ကာလအတွင်း ပုံမှန်ထွက်ရှိတဲ့ယာဉ်လိုင်းနဲ့ ယာဉ်စီးရေအတိုင်းပြေးဆွဲဖို့နဲ့ အခက်အခဲရှိပါက ယာဉ်လိုင်းတစ်လိုင်းရှိ ယာဉ်အင်အားရဲ့ (၃) ပုံ (၁) ပုံထက်လျော့နည်းမှုမရှိစေဘဲ ပြေးဆွဲသွားဖို့ ညွှန်ကြားထားတယ်လို့ သိရပါတယ်။

ဒါ့အပြင် ယာဉ်စီးခကို သတ်မှတ်ယာဉ်စီးခထက် ပိုမကောက်ခံဖို့ကိုလည်း ယာဉ်လိုင်းကုမ္ပဏီများအား အသိပေးအကြောင်းကြားထားတယ်လို့ သိရပါတယ်။

အခုလက်ရှိ ရန်ကုန်တိုင်းတွင် ယခင်က ည ၈ နာရီအထိသာ ပြေးဆွဲခဲ့တဲ့ YBS ယာဉ်လိုင်းများကို ည (၁၀) နာရီအထိ တိုးချဲ့ပြေးဆွဲသွားမယ်လို့ ကြေညာထားပါတယ်။

ရန်ကုန်မှာ ညမထွက်ရအမိန့်ကို ယခင် ၁၀ နာရီကနေ အခု ည (၁၂) နာရီမှ နံနက် (၄) နာရီအထိ‌ ပြောင်းလဲပြင်ဆင်သတ်မှတ်လိုက်တဲ့အတွက် YBS ယာဉ်လိုင်းများ ညအချိန်ပြေးဆွဲချိန် ပြောင်းလဲသွားမယ်လို့ သိရပါတယ်။

ymg/ei
#Yangon_Media_Group

#WorldPolitics
Published - 25 March 2022

အမေရိကန်သမ္မတဟောင်း'ဒေါ်နယ်ထရမ့်'က ၂၀၁၆ အမေရိကန်သမ္မတရွေးကောက်ပွဲမှာ ပြိုင်ဘက်တွေဖြစ်ခဲ့တဲ့ 'ဟီလာရီကလင်တန်'နဲ့ အခြားဒီမိုကရက်တစ်နိုင်ငံရေးသမားများစွာကို ကြာသပတေးနေ့က တရားစွဲဆိုလိုက်ပါတယ်။

ရုရှားကို ထရမ့်သွားရောက်စည်းရုံးခဲ့တာကိုအကြောင်းပြပြီး ရွေးကောက်ပွဲမှာ နိုင်ငံရေးသမားတွေ လိမ်လည်ကြံစည်မှုတွေပြုလုပ်ခဲ့ကြတယ်လို့ 'ထရမ့်'ကစွပ်စွဲလိုက်တာဖြစ်ပါတယ်။

ထိုတရားစွဲဆိုချက်ထဲမှာ 'ထရမ့်'သမ္မတဖြစ်စဉ်ပထမဆုံးလေးနှစ်အတွင်း ထပ်ခါထပ်ခါထုတ်ပြန်ခဲ့တဲ့မကျေနပ်ချက်တွေ တသီတတန်းကြီးပါဝင်နေပါတယ်။

ဒါ့အပြင် ၂၀၂၀ ရွေးကောက်ပွဲမှာ ဒီမိုကရက်တစ်သမ္မတ'ဂျိုးဘိုင်ဒန်'ကိုအရေးနိမ့်ခဲ့ရာမှာလည်း လိမ်လည်ကြံစည်မှုကြီးကြောင့်လို့ အခိုင်အမာဆိုထားပါတယ်။

"တရားခံတွေက ရီပတ်ဘလစ်ကန်ပြိုင်ဘက်ဒေါ်နယ်ဂျေထရမ့်ဟာ ရန်ဘက်နိုင်ငံတစ်ခုနဲ့ပူးပေါင်းကြံစည်ခဲ့တယ်ဆိုတဲ့ မဟုတ်မမှန်သတင်းတွေကို မသမာတဲ့နည်းနဲ့ပူးပေါင်းလုပ်ကြံခဲ့ပါတယ်" လို့ သမ္မတဟောင်းက ၁၀၈ မျက်နှာပါတဲ့ အမှုစွပ်စွဲချက်ကြီးကို ဖလော်ရီဒါရှိ ဖက်ဒရယ်တရားရုံးမှာ လျှောက်တင်ခဲ့တာဖြစ်ပါတယ်။

သူတစ်ပါးအားထိခိုက်နစ်နာစေတဲ့ သတင်းမှားတွေကိုပူးပေါင်းကြံစည်ခြင်းနဲ့ မသမာမှုပြုလုပ်ခြင်းဆိုတဲ့အကြောင်းအရာတွေနဲ့ အဓိကတရားစွဲဆိုထားတာပါ။

ကလင်တန်ရဲ့ကိုယ်စားလှယ်တစ်ဦးကတော့ ဒီကိစ္စကိုမှတ်ချက်ပြုဖို့ ငြင်းဆန်သွားပါတယ်။
တရားစွဲဆိုမှုမှာ လျော်ကြေးနဲ့နစ်နာကြေးတွေတောင်းဆိုဖို့ ပါဝင်နေပါတယ်။

'ထရမ့်'က တရားရုံးကဆုံးဖြတ်တဲ့ကုန်ကျစရိတ်အတိုင်း ပေးဆောင်ရဖို့ရှိနေပြီး ဒေါ်လာ ၂၄ သန်းကျော်ကုန်ကျနိုင်တဲ့အပြင် တရားခုခံရေးစရိတ်၊ တရားဝင်အခကြေးစရိတ်၊ ဆက်စပ်ကုန်ကျစရိတ်များလည်း ပါဝင်လာနိုင်ပါတယ်။

မသမာမှုကိစ္စများကိုကိုင်တွယ်ရာမှာကျွမ်းကျင်တဲ့ ရှေ့နေ'ဂျက်ဖ်ဂရဲလ်'က 'ထရမ့်'အနေနဲ့ အချိန်အကြာကြီးနေမှ မသမာမှုကိုတိုင်ကြားတာဖြစ်လောက်တယ်လို့ ဆိုပါတယ်။
အရပ်ဘက်မသမာမှုတိုင်ကြားခြင်းတွေကို အချိန် ၄ နှစ်အတွင်းကိုင်တွယ်ဆုံးဖြတ်ခွင့်ရှိပါတယ်။

ဒါပေမဲ့ အဲဒီ ၄ နှစ်ဆိုတဲ့သက်တမ်းက ဘယ်အချိန်ကစပြီးသတ်မှတ်သလဲဆိုတာကတော့ အငြင်းပွားမှုရှိနေဆဲဖြစ်ပါတယ်။

တရားစွဲဆိုခံရသူတွေကတော့ တရားခုခံပိုင်ခွင့်အမျိုးမျိုးဖြင့် ပြန်လည်ချေပနိုင်ပေမယ့် အချိန်ကြာမြင့်စွာတရားစွဲဆိုပြီးမှသာ ဒီလိုခုခံချေပလေ့ရှိကြောင်း 'ဂရဲလ်'ကဆိုပါတယ်။
'ထရမ့်'တရားစွဲဆိုတဲ့သူတွေထဲမှာ ဗြိတိန်ထောက်လှမ်းရေးအရာရှိဟောင်း'ခရစ္စတိုဖာစတီးလ်'လည်း ပါဝင်နေပါတယ်။

၂၀၁၆ ခုနှစ်နိုဝင်ဘာလရွေးကောက်ပွဲမတိုင်ခင် 'စတီးလ်'ရေးသားဖော်ပြခဲ့တဲ့စာရွက်စာတမ်းဖော်ပြချက်ထဲမှာ 'ထရမ့်'ရဲ့ ရီပတ်ဘလစ်ကန်စည်းရုံးရေးအကြံပေးတွေနဲ့ ရုရှားတို့ဟာ ကလင်တန်ကိုအနိုင်ရဖို့ နောက်ကွယ်ကနေပူးပေါင်းကြံစည်ခဲ့ကြကြောင်း စွပ်စွဲရေးသားခဲ့ပါတယ်။

၂၀၂၀ ခုနှစ်က အမေရိကန်လွှတ်တော်ကော်မတီမှထုတ်ပြန်ခဲ့ရာမှာ ရုရှားတို့က ရီပတ်ဘလစ်ကန်နိုင်ငံရေးလှုပ်ရှားသူ'ပေါလ်မန်နာဖော့'နဲ့ WiKiLeaks ဝက်ဘ်ဆိုက်တို့ ကိုအသုံးချပြီး ၂၀၁၆ ရွေးကောက်ပွဲမှာ 'ထရမ့်'အနိုင်ရအောင် ကူညီပေးခဲ့ကြတယ်လို့ ဖော်ပြခဲ့ကြပါတယ်။
ရွေးကောက်ပွဲကိစ္စမှာ ရုရှားတို့ကပါဝင်ပတ်သက်ခဲ့တယ်ဆိုတဲ့သတင်းကို ရုရှားတို့ကငြင်းဆိုခဲ့ပါတယ်။

FBI ညွှန်ကြားရေးမှူးဟောင်း'ရောဘတ်မူလာ'က "ထရမ့်သမ္မတဖြစ်ရင် သူတို့ အတွက်အကျိုးရှိမယ်ဆိုတာကို ရုရှားတို့ ရိပ်မိခဲ့ပြီး ထရမ့်အနိုင်ရရှိအောင် လုပ်ပေးခဲ့ပါတယ်။ စည်းရုံးရေးအဖွဲ့ ကလည်း ရုရှားတို့ ကနေတဆင့် အချက်အလက်တွေရရှိပြီး ရွေးကောက်ပွဲမှာအနိုင်ရဖို့ မျှော်လင့်ခဲ့ကြတာဖြစ်ပါလိမ့်မယ်" လို့ သတင်းပို့ တင်ပြခဲ့ပါတယ်။
Source: Reuters

#LocalNews
Published - 25 March 2022

ဒီကနေ့ မတ်လ ၂၅ ရက်၊ မွန်းလွဲပိုင်းအချိန်က ရန်ကုန်တိုင်း၊ မရမ်းကုန်းမြို့နယ်၊ (၅)ရပ်ကွက်၊
အုတ်ပုံဆိပ်လမ်းတွင် ယာဉ်တိုက်မှုဖြစ်ပွားခဲ့ပြီး ယာဥ်မောင်းဖြစ်သူ ထိခိုက်ဒဏ်ရာရခဲ့သည့် ဖြစ်စဥ်တစ်ခု ဖြစ်ပွားခဲ့တယ်လို့ သိရပါတယ်။

"ယာဥ်မောင်းက ခါးပတ်ပတ်ထားပါတယ်။ ဒါပေမယ့် သူ့ခါးပတ်ကြိုးက လျော့လွန်းနေတော့ ခေါင်းထိသွားတာပေါ့။ ဒဏ်ရာက မစိုးရိမ်ရပါဘူး။"လို့ နယ်မြေခံလူမှုကယ်ဆယ်ရေးအဖွဲ့ မှ တာဝန်ရှိသူတစ်ဦးက ပြောပါတယ်။

အဆိုပါ ယာဥ်တိုက်မှုဖြစ်စဥ်အား မြန်မာနိုင်ငံမီးသတ်တပ်ဖွဲ့ဌာနချုပ် EMS တပ်ဖွဲ့ဝင်များမှ သူနာတင်ယာဉ်(၁)စီးဖြင့် ထွက်ခွာ၍ ထိခိုက်ဒဏ်ရာ(မစိုးရိမ်ရ) ရရှိသူ ယာဉ်မောင်းအား ရှေးဦးသူနာပြုစုနည်းများဖြင့် ကုသပေးခဲ့တယ်လို့လည်း မီးသတ်တပ်ဖွဲ့က သတင်းထုတ်ပြန်ထားပါတယ်။

Photo - MFSD

ymg/kg
#Yangon_Media_Group