#LocalNews
Published - 27 March 2022

ရန်ကုန်တိုင်းဒေသကြီး၊ ဒဂုံဆိပ်ကမ်းမြို့နယ်၊ ယုဇနဥယျာဥ်မြို့တော်ရှိ တိုက်ခန်းစျေးကွက်ဟာ ယခုနှစ်ဆန်းပိုင်းအတွင်းမှာ အရောင်း၊အဝယ်တွေ ပြန်သွက်လာခဲ့ပြီး ယနေ့တွင် တိုက်ခန်းတစ်ခန်းလျှင် ကာလပေါက်စျေးထက် ကျပ် ၁၀ သိန်းမှ သိန်း ၂၀ ကျော်ခန့်အထိ စျေးနှုန်းများလည်း မြင့်တက်လာခဲ့တယ်လို့ အိမ်ခြံမြေအကျိုးဆောင်လုပ်ငန်း လုပ်ကိုင်သူများထံမှသိရပါတယ်။

"အခန်းတွေက အရောင်း၊အဝယ်တွေ ပြန်လိုက်နေတယ်။ အရောင်းအခန်းတွေလည်း အမြဲရှိသလို အဝယ်တွေလည်းလိုက်လာပါတယ်။ အခန်းစျေးတွေတက်တယ်ဆိုတာကလည်း ခေတ်စနစ်အခြေကြောင့်ပေါ့နော်။ လူတွေကလည်း အခုကာလမှာ ငွေကို လက်ထဲ မထားရဲဘူးပေါ့။ တိုက်ခန်းတွေ အိမ်၊ခြံ၊ မြေတွေကို ဝယ်ကြတာများတယ်။ ဒါကြောင့်လည်း အခန်း စျေးတွေ တက်တာပါပါတယ်။ ဒီကာလမှာ အခန်းစျေးက သိန်းဆယ်ဂဏန်းလောက် တက်သွားတာပေါ့။ အရင်က အပေါ်ဆုံးထပ်ဆို ၁၁၀၊ ၁၂၀ လောက်ပဲရှိရာကနေ အခန်းကောင်းရင်ကောင်းသလို ပြင်ဆင်ထားရင်ထားသလို ၁၄၀၊ ၁၆၀ လောက်အထိ စျေးပေါက်နေပါတယ်။"လို့ ဒဂုံဆိပ်ကမ်းမြို့နယ်အတွင်းရှိ အိမ်ခြံမြေအကျိုးဆောင်လုပ်ငန်း လုပ်ကိုင်သူတစ်ဦးက ပြောပြခဲ့ပါတယ်။

ယုဇနဥယျာဥ်မြို့တော်အတွင်းရှိ ယခင်တိုက်ဟောင်းလေးခန်းတွဲ ငါးထပ်တိုက်တွေအပါအဝင် စစ်တောင်းရိပ်မွန်ရှိ သုံးထပ်တိုက်များနှင့် အိုးအိမ်ဌာနမှတည်ဆောက်ခဲ့သည့် အပိုင်း(၁၊၂၊၃) တိုက်သစ်များဘက်တွင် တိုက်ခန်းအရောင်းအဝယ် တွေဟာ ယခုကာလမှာ ပိုမိုဖြစ်နေတာဖြစ်တယ်လို့လည်း ၄င်းတို့က ဆိုပါတယ်။

လက်ရှိ ယုဇနဥယျာဥ်မြို့တော် တိုက်ခန်းပေါက်စျေးဟာ အပေါ်ဆုံးထပ်ဆိုပါက ကျပ်သိန်း ၁၃၀ ၊ တတိယထပ်ဆိုပါက ကျပ်သိန်း ၁၄၀ မှ ၁၅၀ ကြား၊ ပထမထပ်ဆိုပါက ကျပ်သိန်း ၁၈၀ မှ ၁၉၀ ခန့်နှင့် မြေညီထပ်ဆိုပါက ကျပ်သိန်း ၂၀၀ ကျော်မှ ကျပ်သိန်း ၃၀၀ ကျော်အထိ ပေါက်စျေးရှိနေတာဖြစ်တာဖြစ်တယ်လို့ သိရပါတယ်။

ymg/kg
#Yangon_Media_Group

#LocalNews
Published_27 March 2022

(၇၇) နှစ်မြောက်တပ်မတော်နေ့တွင် ဂုဏ်ထူးသက်ရှိထင်ရှားရှိသည့် အနုပညာရှင်များနှင့် ကွယ်လွန်ပြီးဖြစ်သည့် အနုပညာရှင်ကြီးများကို နစက အနေဖြင့် ဂုဏ်ထူးဆောင်ဘွဲ့တံဆိပ် ချီးမြှင့်လိုက်ကြောင်း သိရသည်။

ကွယ်လွန်သွားပြီဖြစ်သော အနုပညာရှင်များဖြစ်ကြသည့် ဗိုလ်ကလေးတင့်အောင်၊ ဂီတလုလင် မောင်ကိုကို၊ ကောလိပ်ဂျင်နေဝင်း၊ ဝင်းဦး၊ ညွန့်ဝင်း တို့နှင့် သက်ရှိထင်ရှားဖြစ်သည့် ဒါရိုက်တာ ဦးကြည်စိုးထွန်း၊ စာရေးဆရာ လေးမြိုင်၊ ဒေါက်တာသော်ကောင်း၊ မောင်ခင်မင်-ဓနုဖြူ၊ ကိုလေး- အင်းဝဂုဏ်ရည်၊ လယ်တွင်းသားစောချစ်၊ တက္ကသိုလ်မြတ်သူ၊ တက္ကသိုလ် မြတ်စိုး၊ တက္ကသိုလ်တင်ခ၊ မောင်ပေါ်ထွန်း၊ မောင်သာနိုး၊ သိန်းသန်းထွန်း၊ ဖိုးကျော့၊ ထွန်းရီ- ရှေးဟောင်းသုတေသီ၊ တင်မောင်မြင့်၊ မစန္ဒာ ထွန်းအောင်ချိန်၊ မောင်မောင်လတ် (နောင်) စသည်တို့ကို အလင်္ကာကျော်စွာဘွဲ့ပေးခဲ့ခြင်း ဖြစ်သည်။

ဂုဏ်ထူးဆောင်ဘွဲ့များကို ချီးမြှင့်ခံရာတွင် လူမှုထူးချွန်တံဆိပ်(ပထမအဆင့်)၊ လူမှုထူးချွန်တံဆိပ်(ဒုတိယအဆင့်)၊ လူမှုထူးချွန်တံဆိပ်(တတိယအဆင့်)ဟူ၍ သတ်မှတ်ထားပြီး လူမှုထူးချွန်တံဆိပ်(ပထမအဆင့်)တွင် ဦးရန်အောင်၊ဦးထွန်းဝေ၊ဦးကျောက်လုံး၊ဦးနေအောင်၊ဦးလွင်မိုး၊ဦးနေတိုး ၊ဒေါ်မိုမိုမြင့်အောင်၊ဒေါ်ချိုပြုံး၊ဒေါ်ဝါဝါဝင်းရွှေ ၊ဒေါ်ခင်သန်းနု၊ဒေါ်ခင်သီတာထွန်း ဒေါ်ထွန်းအိန္ဒြာဗို၊ စသည့်အနုပညာရှင် များ ၊ လူမှုထူးချွန်တံဆိပ်(ဒုတိယအဆင့်)တွင် ဦးရဲအောင်၊ဦးဇော်လင်း၊ဦးကျော်ရဲအောင်၊ဒေါ်မြင့်မြင့်ခိုင် ၊ဒေါ်မြတ်ကေသီအောင်၊ဒေါ်မေသဉ္စာဦး၊ ဒေါ်ခိုင်သင်းကြည် စသည့်အနုပညာရှင်များ၊လူမှုထူးချွန်တံဆိပ်(တတိယအဆင့်)တွင် ဦးခန့်စည်သူ၊ဦးဖိုးသောကြာ၊ဒေါ်စိုးမြတ်သူဇာ၊ဒေါ်စိုးမြတ်နန္ဒာ ၊ယဉ်လတ်၊ ယုန်လေး(အဆိုတော်)စသည့် အနုပညာရှင်များပါဝင်ကြောင်း သိရသည်။

ymg/mt
#Yangon_Media_Group

#LocalNews
Published - 27 March 2022

ရန်ကုန်တိုင်း၏ ဆင် ခြေဖုံး မြိုနယ်/ရပ်ကွက်များတွင် ဆိုင်ကယ်စီးလုယက်မှုတွေကို နေ့စဥ်လိုလို ကြုံ တွေ့ နေရပြီး ယခုကာလမှာ ပြည်သူများအနေနဲ့ ပြင်ပသို့သွားလာရာတွင် အထူးဂရုပြု၍ သွားလာနေရတယ်လို့ သိရပါတယ်။

အဆိုပါ ဆိုင်ကယ်စီးလုယက်မှုဖြစ်စဥ်တွေကို လှိုင်သာယာ အပါအဝင် တောင်ဒဂုံ၊ မြောက်ဒဂုံနှင့် ဒဂုံဆိပ်ကမ်း၊ အရှေ့ဒဂုံ အစရှိသည့် ဆင်ခြေဖုံးမြို့နယ်/ရပ်ကွက်များတွင် ပိုမိုကြုံ တွေ့ နေရတာဖြစ်တယ်လို့လည်း ယင်းမြို့နယ်များတွင် နေထိုင်သူများက ပြောပါတယ်။

ဒါ့အပြင် ဒီကနေ့ မနက်ပိုင်းအချိန်က မြောက်ဒဂုံမြို့နယ်အတွင်းမှာ ဆိုင်ကယ်စီးလုယက်မှုတစ်ခုဖြစ်ပွားပြီး ယင်းဖြစ်စဥ်အား ကိုယ်တိုင်ကြုံ တွေ့ခဲ့သူ မိန်းကလေးငယ်တစ်ဦးက အားလုံးသတိထားနိုင်ဖို့အတွက် သူမကြုံတွေ့ခဲ့ရသည့် လုယက်မှုဖြစ်စဥ်ကို လူမှုကွန်ရက်တွင် ရေးသားမျှဝေခဲ့သည်ကိုလည်း ယခုလို တွေ့ မြင်ခဲ့ရပါတယ်။

"မြောက်ဒဂုံထဲက အမတွေ အပြင်သွားရင် ဂရုစိုက်ကြပါနော်။ ဗန္ဓုလလမ်း(Milky Zone)ဆိုင်အနားမှာ အခုပဲ ဖြစ်သွားတာပါ၊ မနက် ၁၀ ခွဲကျော်ကျော်လောက်က မန္တလေးဈေးကိုသွားပြီးအပြန် စက်ဘီးနင်းနေတုန်း ဆိုင်ကယ်တစ်စီး လူနှစ်ယောက်နဲ့ နောက်ကအတင်း ကပ်လာလို့ ရှေ့ကစက်ဘီးမောင်းတဲ့ကိုယ့်ကောင်လေးကို ဘတ်ထရီအရှိန်လျော့ပေးလိုက် သူတို့ကို အရင်သွားပါစေပြောလိုက်တာကံကောင်းတယ် ပြောရမလားပဲ အရှိန်မရှိပဲ အေးဆေးဖြစ်နေချိန်မို့ လူတွေဘာမှမဖြစ်သွားတာ အတင်းဘေးကို ကပ်ပီး ဆိုင်ကယ် နောက်ကလူက ရှေ့ကစက်ဘီးမောင်းတဲ့သူရဲ့ အကျီအိတ်ပါတယ် ထင်ပြီးဆောင့်ဆွဲပြီး ဆွဲနှိုက်တာရယ် ဘာလုပ်တာလဲ နင်တို့ဆိုပြီး အော်မှဟာ ဘာမှမရှိဘူးတောင်ပြောသွားပီး ဆိုင်ကယ်ကိုအသေမောင်းပြေးသွားတာအရှိန်သာမလျော့ခဲ့ရင် သူတို့ဆွဲတာ လူပါ ဒဏ်ရာရနိုင်တယ်။

ဖုန်းတို့ပိုက်ဆံအိတ်တို့ကို ဘယ်တော့မှ အကျီရှေ့အိတ်ကပ်ထဲ မထည့်ထားတာပဲ တော်သေးတယ်၊ မဟုတ်ရင်ပါသွားပြီ။ ကိုယ်ကတော့ လန့်ဖျန့်ပြီးကျန်ခဲ့တာ အခုထိ အသားတွေဆတ်ဆတ်တုန်နေတုန်းပါပဲ။" လို့ သူမက လုယက်ခံခဲ့ရသည့်ဖြစ်စဥ်အပေါ် ၄င်းကြုံ တွေ့ ခဲ့ရသည်များကို အခုလို ပြန်လည်မျှဝေရေးသားခဲ့တာဖြစ်ပါတယ်။

ဒါ့အပြင် ယခုကာလများတွင် ရန်ကုန်မြို့တွင်းမှာ လုယက်မှုဖြစ်စဥ်များ အပါအဝင် မြို့တွင်း မြို့နယ်များတွင် ကားဘက်မှန်ဖြုတ်ယူ ခိုးမှုတွေလည်း အလွန်အမင်းများပြားလာနေတာဖြစ်တယ်လို့လည်း ရန်ကုန်မြို့နေ ဒေသခံပြည်သူများထံမှ သိရပါတယ်။

ဒါကြောင့်မို့ ယခုကာလတွင် ပြင်ပသို့ သွားလာမည်ဆိုပါက အထူးဂရုစိုက် သွားလာကြဖို့ကိုလည်း ပြည်သူအချင်းချင်း သတိပေးမှုတွေကို ပြုလုပ်နေရတယ်လို့ သိရပါတယ်။

ymg/kg
#Yangon_Media_Group

#LocalNews
Published_27 March 2022

ရခိုင်ပြည်နယ်၊ စစ်တွေမြို့ မိဇံရပ်ကွက် ကမ်းနားလမ်းအနီးတွင် အထပ်မြင့်ဈေးတစ်ခု တည်ဆောက်မည်ဖြစ်ကြောင်း ရခိုင်ပြည်နယ်အစိုးရအဖွဲ့မှ သယံဇာတရေးရာဝန်ကြီး ဦးသန်းထွန်း YMG ကို ပြောသည်။

စစ်တွေအမှတ် ၁ ရဲစခန်းဘေးပတ်ပတ်လည်မှ ဖယ်ရှားခံရသည့် ဆိုင်ခန်းများကို ဦးစားပေးနေရာချလိုသောကြောင့် ၄၅ ပေ ၊ ပေ ၃၃ဝ ကျယ်ဝန်းသော မိဇံပန်းခြံအနီး ကမ်းနားလမ်းရှိ မြို့လယ်ချောင်းဘေးတွင် အဆိုပါဈေးကို အမြန်ဆုံးတည်ဆောက်သွားမည်ဖြစ်ကြောင်း ၎င်းကပြောသည်။

"စစ်တွေအမှတ် ၁ ရဲစခန်း ဘေးပတ်ပတ်လည်မှာရှိတဲ့ ဈေးဆိုင်ခန်း ၈၀ လောက်ကို ၂၀၁၉ ခုနှစ်က ဖယ်ရှားခဲ့တာ။ဒါကြောင့် ဆိုင်ခန်းပိုင်ရှင်တွေ အမြန်ဆုံးပြန်ပြီးတော့ ဆိုင်ခန်းတွေမှာ စနစ်တကျရောင်းနိုင်အောင်လို့ တည်ဆောက်ဖို့လုပ်နေတာပါ၊တစ်နှစ်အတွင်း အပြီးဆောက်ဖို့ ရည်မှန်းထားတယ်"ဟု ဦးသန်းထွန်းက ပြောသည်။

အဆိုပါဈေးကို အကျိုးတူတည်ဆောက်ရန် ရခိုင်ပြည်နယ် အစိုးရအနေဖြင့် ၂ဝ၁၉ ခုနှစ်၊ ဇူလိုင်လအတွင်းက တင်ဒေါခေါ်ယူခဲ့ကာ ၂၀၂၀ ပြည့်နှစ်တွင် တည်ဆောက်မည်ဟု ပြောဆိုခဲ့သော်လည်း ယခုတိုင် မတည်ဆောက်နိုင်သေးဘဲ ရှိနေခြင်း ဖြစ်သည်။

Photo Crd - Ko Win Kyaw
ymg/mt
#Yangon_Media_Group

#LocalNews
Published - 27 March 2022

မော်လမြိုင်မြို့၊ ဖက်တန်းရပ်ဈေးဆိုင်တန်းမှာ စွန့်ပစ်ခံခဲ့ရသည့် ကလေးငယ်နှစ်ဦးအား မြဆည်းဆာဂေဟာမှ ရာသက်ပန် မွေးစားစောင့်ရှောက်သွားမှာဖြစ်တယ်လို့ သိရပါတယ်။

အဆိုပါ ကလေးငယ်များဟာ အသက်(၁၁)နှစ်နဲ့ (၂)နှစ်အရွယ် မိန်းကလေးငယ်(၂)ဦးဖြစ်ပြီး စွန့်ပစ်ခံပြီးချိန်တွင် ကလေးငယ်များ ဘေးအန္တရာယ်ကင်းစေဖို့အတွက် မြဆည်းဆာ ဘိုးဘွားရိပ်သာနဲ့ မိဘမဲ့ဂေဟာမှ ခေါ်ယူစောင့်ရှောက်ပေးထားခဲ့ရတာဖြစ်ပါတယ်။

အဲ့ဒီကလေးငယ်(၂)ဦးကို ခေါ်ယူစောင့်ရှောက်ထားပြီးနောက် မြဆည်းဆာဆရာတော်ရဲ့လမ်းညွှန်မှုနဲ့ အကျိုးတော်ဆောင်အဖွဲ့မှ ကလေး(၂)ဦး၏ အခြေအနေနဲ့ပတ်သတ်ပြီး အသေးစိတ်လေ့လာစုံစမ်းခဲ့ကာ စုံစမ်းချက်အရ ကလေးငယ်(၂)ဦးရဲ့ အခြေအနေက သူတို့ဘဝတခုလုံးအတွက် ဘယ်လိုမှ စိတ်ချစရာအနေအထားမရှိသလို လုံခြုံမှုလည်း လုံးဝမရှိသည့်အတွက် မြဆည်းဆာ ဂေဟာဆရာတော်၏ လမ်းညွှန်မှုနှင့်အညီ ယခုလို အပြီးတိုင်မွေးစားစောင့်ရှောက်ဖို့ ဆုံးဖြတ်ခဲ့တာဖြစ်တယ်လို့ သိရပါတယ်။

"သက်ဆိုင်သူမိခင် ပတ်သတ်သူများအားလုံးနဲ့ ဆွေးနွေးပြီးနောက် သမီးငယ်(၂)ဦး၏ ဘဝတစ်ခုလုံး လုံခြုံစိတ်ချစေဖို့ မြဆည်းဆာမှ အပြီးမွေးစားလိုက်ပါပြီ။ သူတို့တွေက မုတ္တမရပ်မှာနေပါတယ်။ မိခင်က စိတ်ကျန်းမာရေးမကောင်းပါ။ ဖခင်ကတော့ ကလေးမိခင်က ရေသန့်ဘူးတွေ ဘာတွေကောက်ပြီးရောင်းစားပါတယ်။ အရက်လဲ သောက်တတ်ပါတယ်။ သွားလေရာ ကလေး(၂)ဦးကို ခေါ်ခေါ်သွားပြီး ကြုံတဲ့နေရာဖြစ်သလို နေထိုင်ကြပါတယ်။
အဲ့ညကလဲ ကလေးနှစ်ဦးကို ဆိုင်ခန်းမှာ ခေတ္တသိပ်ထားခဲ့ပြီး ရေသန့်ဘူးသွားကောက်နေတာ ဖြစ်ပါတယ်။ အချိန်ကြာလို့ကြာသွားမှန်းမသိအောင် ကလေးတွေကိုထားခဲ့သလိုဖြစ်သွားတာပါ။ ကလေးတွေ ကံကောင်းချင်လို့ ကျွန်တော်တိုဆီရောက်လာတယ်လို့ပဲ ဆိုရမှာပါ။"

အဲ့ဒါကတော့ ကလေးငယ်(၂)ဦးအတွက် အကောင်းဆုံးနဲ့ လုံခြုံစိတ်ချရတဲ့နေရာ ရောက်နေပြီ။ ပြန်မလွှတ်တော့ဘဲ ဆက်လက်စောင့်ရှောက်စေချင်ကြတဲ့ စိတ်ဆန္ဒတွေပါပဲ။"လို့ မော်လမြိုင်မြို့ ဒေသခံပရဟိတသမားတစ်ဦးဖြစ်သူ ကိုဇင်မိုးက စွန့်ပစ်ခံကလေးငယ်နှစ်ဦး ဖြစ်စဉ်နဲ့ပတ်သက်ပြီး ရှင်းလင်းပြောပြခဲ့ပါတယ်။

အဆိုပါ ကလေးငယ်နှစ်ဦးဟာ မြဆည်းဆာဂေဟာမှာပင် ကျန်းမာပျော်ရွှင်စွာဖြင့် ရှိနေကြတယ်လို့ ၎င်းက ဆိုပါတယ်။

"ကလေးတွေက သူ့မိခင်နဲ့ရော နောက်ထပ်ကူညီပေးမယ့်အဖွဲ့တွေထံ လုံးဝ(လုံးဝ) ပြန်မလိုက်နိုင်ကြောင်း ခါးခါးသီးသီးငြင်းဆိုပါတယ်။ အခုရောက်ရှိနေတဲ့ ကျွန်တော်တို့ မြဆည်းဆာဂေဟာထံမှာပဲ နေထိုင်ပါရစေဆိုပြီး အကြိမ်ကြိမ်လဲ တောင်းဆိုပါတယ်။
ကျွန်တော်တို့ ဘက်ကလဲ တာဝန်ကျေအောင် သူတို့တွေကို အကြိမ်ကြိမ်မေးမြန်းခေါ် ခိုင်းစေပါတယ်။ ကလေးတွေရဲ့ဆုံးဖြတ်ချက်ကတော့ မြဆည်းဆာမှာပဲ နေပါရစေတဲ့။

အဲဒီတော့ ကလေးတွေရဲ့ ဦးလေးဆိုသူနဲ့ ပတ်သတ်တဲ့ဆွေမျိုးတွေ ကူညီမယ့်အဖွဲ့တွေကို ကျွန်တော်တို့ ထပ်မံဆွေးနွေးပြီးနောက် ကလေးမလေး (၂)ဦးကို ဆရာတော်ရဲ့လမ်းညွှန်မှုနဲ့အတူ ကျွန်တော်တို့ မြဆည်းဆာမှ တသက်လုံး တာဝန်ယူမွေးစားလိုက်ပြီးဖြစ်ကြောင်း အသိပေးအပ်ပါတယ်။ ကလေးတွေအတွက် စိုးရိမ်နေကြသူတွေလည်း ဝမ်းသာပျော်ရွှင်သွားကြလိမ့်မယ်ထင်ပါတယ်။"လို့ ကိုဇင်မိုးက ၎င်း၏ လူမှုကွန်ရက်မှာ ရေးသားခဲ့တာဖြစ်ပါတယ်။

Photo - Zin Moe(FB)

ymg/kg
#Yangon_Media_Group

#LocalNews
Published - 27 March 2022

ပုဂံဒေသသို့ လာရောက်ကြမည့် ခရီးသွားများအနေနဲ့ ကိုဗစ်ကာကွယ်ဆေးထိုးပြီးသားလက်မှတ်ကို ယူဆောင်လာရမည်ဖြစ်ပြီး အဆိုပါလက်မှတ်ပါမှသာ ဝင်ရောက်
ခွင့်ပြုမှာဖြစ်တယ်လို့ သိရပါတယ်။

"ပုဂံအဝင်မှာကာကွယ်ဆေး လက်မှတ်ပါမပါစစ်ပါတယ်။ ပါခဲ့ရင်တောင် ၂ ကြိမ်ထိုးပြီး တတိယအကြိမ်ထိုးဖို့ လိုပြီဆိုရင် ထိုးဖို့ပြောပါတယ် ။ တစ်ခါတည်း မြို့အဝင်ကတည်းက တန်းထိုးပေးနေပါတယ်။"လို့ ပုဂံဒေသခံတစ်ဦးက ပြောပါတယ်။

လက်ရှိကာလမှာ ပုဂံဒေသသို့ ပြည်တွင်းခရီးသွားဝင်ရောက်မှုတွေ များပြားနေတာဖြစ်တယ်လို့လည်း သိရပါတယ်။

"ဧည့်သည်က ပြန်ဝင်နေပါပြီ။ အခုလို ရုံးပိတ်ရက်တွေဆို ဧည့်သည်ဝင်ရောက်မှုများပါတယ်။ ရှေ့လမှာလည်း သင်္ကြန်ရုံးပိတ်ရက်ကာလရှိနေတော့ ပုဂံဘက်ကို ဧည့်သည်တွေအဝင်များမယ်လို့ ခန့်မှန်းထားပါတယ်။"လို့ ပုဂံဒေသ ဧည့်လမ်းညွှန်တစ်ဦးက YMG ကို ပြောပြခဲ့ပါတယ်။

ခရီးသွားများအတွက် ပုဂံဒေသရှိ ဘုရားစေတီပုထိုးများကို ပုံမှန်တိုင်းဖွင့်လှစ်ပေးထားပြီး ဘုရားဖူးများတည်းခိုနားနေနိုင်ရန်အတွက် ဟိုတယ်၊မိုတယ်များကိုလည်း ယခုကာလတွင် ပုံမှန်အတိုင်း ဖွင့်လှစ်ပေးထားတယ်လို့ သိရပါတယ်။

ကိုဗစ် ၁၉ ရောဂါဖြစ်ပွားမှုတွေလျော့ကျလာခဲ့ပြီး ပြီးခဲ့တဲ့ နှစ်လယ်ပိုင်းမှစလို့ ကမ်းခြေ ဒေသနှင့် ပုဂံဒေသသို့ ပြည်တွင်းခရီးသွားတွေကို ပြန်လည်ဝင်ရောက်ခွင့်ပြုခဲ့တာလည်း ဖြစ်ပါတယ်။

ymg/kg
#Yangon_Media_Group

#Local_News
Published_ 27 March 2022

၂၀၂၂ ခုနှစ် ဇန်နဝါရီ၊ ဖေဖော်ဝါရီနှင့် မတ်လတို့တွင် နှစ်စဉ်အစီရင်ခံစာတင်ပြရန် ပျက်ကွက်ခဲ့မှုများဖြင့် မှတ်ပုံတင်စာရင်းမှ ပယ်ဖျက်လိုက်သည့် ကုမ္ပဏီပေါင်း ၁၂၀၀ အထိ ရှိလာကြောင်း နစက ရင်းနှီးမြှုပ်နှံမှုနှင့်နိုင်ငံခြားစီးပွားဆက်သွယ်ရေးဝန်ကြီးဌာန ရင်းနှီးမြှုပ်နှံမှုနှင့် ကုမ္ပဏီများ ညွှန်ကြားမှုဦးစီးဌာနရဲ့ ထုတ်ပြန်ချက်များအရ သိရပါတယ်။

ဇန်နဝါရီလအတွင်း ပယ်ဖျက်မှုများအနေဖြင့် ဇန်နဝါရီ ၃ ရက်တွင် ကုမ္ပဏီ ၁၀၀ ၊ ဇန်နဝါရီ ၇ ရက်တွင် ကုမ္ပဏီ ၁၀၀၊ ဇန်နဝါရီ ၁၇ ရက်တွင် ကုမ္ပဏီ ၁၀၀၊ ဇန်နဝါရီ ၂၁ ရက်တွင် ကုမ္ပဏီ ၁၀၀ ဖြင့် စုစုပေါင်း ကုမ္ပဏီ ၄၀၀ ဖြစ်ပါတယ်။

ဖေဖော်ဝါရီလအတွင်း မှတ်ပုံတင်စာရင်းမှ ပယ်ဖျက်ခံလိုက်ရသည့် ကုမ္ပဏီများမှာ ဖေဖော်ဝါရီ ၁ ရက်တွင် ကုမ္ပဏီ ၁၀၀၊ ဖေဖော်ဝါရီ ၄ ရက်တွင် ကုမ္ပဏီ ၁၀၀၊ ဖေဖော်ဝါရီ ၁၅ ရက်တွင် ကုမ္ပဏီ ၁၀၀၊ ဖေဖော်ဝါရီ ၁၈ ရက်တွင် ကုမ္ပဏီ ၁၀၀ ဖြင့် စုစုပေါင်း ၄၀၀ ရှိပါတယ်။

မတ်လအတွင်း မှတ်ပုံတင်စာရင်းမှ ပယ်ဖျက်ခံလိုက်ရသည့် ကုမ္ပဏီများမှာ မတ် ၁ ရက်တွင် ကုမ္ပဏီ ၁၀၀၊ မတ် ၄ ရက်တွင် ကုမ္ပဏီ ၁၀၀၊ မတ် ၁၅ ရက်တွင် ကုမ္ပဏီ ၁၀၀၊ မတ် ၂၁ ရက်တွင် ကုမ္ပဏီ ၁၀၀ ဖြင့် စုစုပေါင်း ၄၀၀ ရှိပါတယ်။

ဒါ့ကြောင့် ၂၀၂၂ ခုနှစ် နှစ်စမှ မတ်လအထိ မှတ်ပုံတင်စာရင်းမှ ပယ်ဖျက်ခံရတဲ့ ကုမ္ပဏီပေါင်း ၁၂၀၀ အထိရှိလာပါပြီ။

မြန်မာနိုင်ငံကုမ္ပဏီများဥပဒေ ပုဒ်မ ၉၇ အရ နှစ်စဉ်အစီရင်ခံစာတင်ပြရန် ပျက်ကွက်ခဲ့သောကြောင့် မြန်မာနိုင်ငံကုမ္ပဏီများ ဉပဒေပုဒ်မ ၄၃၀ (စ) အရ မှတ်ပုံတင်စာရင်းမှ ပယ်ဖျက်ခြင်းဖြစ်တယ်လို့ ရင်းနှီးမြှုပ်နှံမှုနှင့် နိုင်ငံခြားစီးပွားဆက်သွယ်ရေး ဝန်ကြီးဌာန ရင်းနှီးမြှုပ်နှံမှုနှင့် ကုမ္ပဏီများ ညွှန်ကြားမှုဦးစီးဌာနက သတင်းထုတ်ပြန်ထားပါတယ်။

ymg-mnn
#Yangon_Media_Group

#WorldHealth
Published - 27 March 2022
ခန္ဓာကိုယ်အစိတ်အပိုင်းနေရာအနှံသို့ ပျံ့နှံ့ သွားနိုင်တဲ့ ဆီးကျိတ်ကင်ဆာရောဂါခံစားနေရတဲ့လူနာတွေမှာ နိုဗာတစ်(Novartis)ကုမ္ပဏီရဲ့ ကုသနည်းကိုအသုံးပြုဖို့ အမေရိကန်အစားအစာနဲ့ဆေးဝါးကွပ်ကဲရေး(FDA)အဖွဲ့ က အသိအမှတ်ပြုလိုက်ပြီဖြစ်ကြောင်း ဗုဒ္ဓဟူးနေ့ကကြေညာလိုက်ပါတယ်။

နိုဗာတစ်ရဲ့ ပလူဗစ်တို(Pluvicto)ကုသနည်းဟာ အရွယ်ရောက်ပြီးအမျိုးသားတွေမှာ ရေဒီယိုသတ္တိကြွနည်းပညာဖြင့်ပစ်မှတ်ထားကုသတာဖြစ်ပြီး အခြားကင်ဆာကုသနည်းများပြုလုပ်ထားပြီးသား လူနာတွေမှာ အသုံးပြုလေ့ရှိပါတယ်။

၂၀၁၈ ခုနှစ်က အင်ဒိုဆိုက်(Endocyte)ကင်ဆာ ဆေးထုတ်လုပ်ရေးကုမ္ပဏီမှ ဒေါ်လာ ၂.၁ ဘီလီယံဖိုးဝယ်ယူခဲ့စဉ်က အစိတ်အပိုင်းတစ်ခုအနေနဲ့ ဆီးကျိတ်ကင်ဆာကုသနည်းကို ဝယ်ယူရရှိခဲ့တာဖြစ်ပါတယ်။

ပလူဗစ်တိုကုသနည်းဟာ ပစ်မှတ်ထားနိုင်တဲ့လိုင်ဂန်(ligand)မော်လီကျူးနဲ့ ကင်ဆာဆဲလ်တွေကိုသတ်ပစ်နိုင်တဲ့ ရေဒီယိုသတ္တိကြွအမှုန်လေးတွေကို ပေါင်းစပ်ထားပြီး အလွန်တိကျပြတ်သားစွာပစ်မှတ်ထားကုသပေးနိုင်ကြောင်း နိုဗာတစ်ကုမ္ပဏီကပြောကြားခဲ့ပါတယ်။

ပလူဗစ်တိုကုသနည်းကို ဈေးကွက်ထဲဖြန့်ချိကြော်ငြာရန် အသိအမှတ်ပြုခွင့်ရဖို့ ဥရောပဆေးဝါးအေဂျင်စီနဲ့ အခြားကျန်းမာရေးအာဏာပိုင်များထံ တင်ပြထားပါတယ်။

ဆီးကျိတ်ကင်ဆာကနေ အခြားအစိတ်အပိုင်းများကိုပျံ့နှံ့ရာမှာ အစောပိုင်းကုသနိုင်ဖို့ ပလူဗစ်တို နောက်ပိုင်းအဆင့်စမ်းသပ်လေ့လာမှုနှစ်ခုကိုလည်း ဆောင်ရွက်နေပြီဖြစ်တယ်လို့ နိုဗာတစ်မှပြောကြားသွားပါတယ်။
Source: Reuters

#WorldHealth
Published - 27 March 2022
နောက်လာမယ့် ၂ နှစ်အတွင်း အိုမီခရွန်ထက်ပိုမိုဆိုးရွားနိုင်တဲ့ ကိုဗစ်မျိုးဗီဇကွဲအသစ်တစ်မျိုး ပေါ်ထွက်လာနိုင်ချေများကြောင်း အင်္ဂလန်ဆေးဘက်ဆိုင်ရာအရာရှိချုပ်'ဆာခရစ္စဝစ်တီ'က သတိပေးလိုက်ပါတယ်။

ကပ်ရောဂါနောက်တစ်ဆင့်အကြောင်း သုံးသပ်ပြောဆိုခဲ့ရာမှာ လော့ဒေါင်းချခြင်းတွေ ထပ်မံပြုလုပ်ရဖွယ်ရှိနေပါတယ်လို့ ပြောဆိုလိုက်ပါတယ်။

ပြည်သူ့ကျန်းမာရေးကွန်ဖရင့်မှာ 'ဆာခရစ္စ'ကပြောကြားရာမှာ ဗိုင်းရပ်စ်ကထပ်မံထွက်ပေါ်လာဖွယ်ရှိကြောင်း၊ တုပ်ကွေးရောဂါနဲ့ သေဆုံးမှုနှုန်းအတူတူနီးပါးဖြစ်နေပြီး လက်ကျန်ဘဝတလျှောက်လုံး ဒီဗိုင်းရပ်စ်ရှိနေမှာဖြစ်ကြောင်း ဆိုပါတယ်။

ဒီထက်ပိုပြီးအန္တရာယ်များတဲ့ မျိုးဗီဇကွဲပေါ်ပေါက်လာရင် လူမှုနေထိုင်ရေးဘဝတွေကိုပါထိခိုက်လာနိုင်ပါတယ်။ လက်ရှိမျိုးဗီဇကွဲက အသေးအဖွဲမျှသာဖြစ်ပြီး နောက်ထပ်ပေါ်ထွက်လာနိုင်တဲ့မျိုးဗီဇကွဲက အိုမီခရွန်ထက် ပိုမိုဆိုးရွားလာနိုင်ပါတယ်။

ဒါပေမဲ့ အခြားပညာရှင်တွေကတော့ ကပ်ရောဂါအဆိုးရွားဆုံးနေ့ရက်တွေ ကုန်ဆုံးသွားပြီဖြစ်ပြီး အချိန်ကြာလာတာနဲ့အမျှ အအေးမိဖျားနာဗိုင်းရပ်စ်အဖြစ် ကူးပြောင်းလာပြီလို့ ယူဆထားကြပါတယ်။

နိုဝင်ဘာလမှာ စတင်ပျံ့ပွားခဲ့တဲ့အိုမီခရွန်ဟာ ကပ်ရောဂါကာလအတွင်း ကူးစက်မှုအများဆုံးဖြစ်ပွားခဲ့ပါတယ်။ ဗြိတိန်ဝန်ကြီးချုပ်'ဘိုရစ်ဂျွန်ဆန်'က အရန်အစီအစဉ်ကိုစတင်နေပြီဖြစ်ပြီး နေအိမ်မှအလုပ်လုပ်ခြင်း၊ လူအများကြား နှာခေါင်းစည်းတပ်ဆင်ခြင်း၊ အားမြှင့်ကာကွယ်ဆေးထိုးနှံခြင်း အစီအစဉ်တွေပါဝင်ပါတယ်။

ရောဂါခုခံအားတွေမြင့်မားနေပြီဖြစ်ပြီး ရောဂါမပြင်းထန်တဲ့မျိုးဗီဇကွဲကြောင့် ဗိုင်းရပ်စ်ကိုထိရောက်စွာကာကွယ်ထားနိုင်ပြီဖြစ်ပါတယ်။ ကိုဗစ်ကပ်ရောဂါက ဒေသတွင်းကူးစက်မှုရောဂါအဖြစ် ဘယ်အချိန်သတ်မှတ်လို့ရမှာလဲ မေးရာမှာတော့ ဗိုင်းရပ်စ်က တဖြည်းဖြည်းနဲ့ကူးစက်မှုနှုန်းနည်းလာမှာဖြစ်ကြောင်း 'ဆာခရစ္စ'က ဖြေကြားခဲ့ပါတယ်။

ယူကေမှာ နောက် ၂ နှစ် ၃ နှစ်အတွင်း မျိုးဗီဇကွဲအသစ်တွေကြောင့် ကူးစက်မှုလှိုင်းတွေ ရံဖန်ရံခါဖြစ်ပေါ်လာနိုင်ကြောင်းလည်း ပြောပြသွားပါတယ်။ ယူကေရှိ ကလေးတွေ၊ လူကြီးတွေမှာ ကာကွယ်ဆေးထိုးနှံမှုနှုန်းမြင့်မားနေပြီး ရောဂါကူးစက်မှု မှရတဲ့ခုခံအားတွေကြောင့် ခန္ဓာကိုယ်ခုခံအားမြင့်မားလျက်ရှိပါတယ်။

နောက်ထပ်ထွက်ပေါ်နိုင်တဲ့မျိုးဗီဇကွဲက လူ ၃ ယောက်မှာ ၁ ယောက်သေဆုံးမှုနှုန်းအထိ ရှိလာနိုင်တယ်လို့လည်း ဆိုနေကြပါတယ်။ ဗိုင်းရပ်စ်က တဖြည်းဖြည်းပျောက်ကွယ်သွားမယ်ဆိုတာ မယုံကြည်ထားကြောင်း အီဒင်ဘာ့ဂ်တက္ကသိုလ်မှ ပြည်သူ့ကျန်းမာရေးပညာရှင် ပရော်ဖက်ဆာ'ဒက်ဗီဆရီဒါ'က အစည်းအဝေးပွဲမှာ ပြောကြားခဲ့ပါတယ်။
Source: DailyMail

#LocalNews
Published -27 Mar 2022

မင်္ဂလာဒုံမြို့နယ်တွင် ငွေကျပ် ၁ ဒသမ ၅၈ ဘီလီယံတန်ဖိုးရှိ စိတ်ကြွရူးသွပ်ဆေးပြားများ ဖမ်းဆီးရမိခဲ့တယ်လို့ မူးယစ်ဆေးဝါးတာဆီးနှိမ်နှင်းရေးရဲတပ်ဖွဲ့က သိရပါတယ်။

မူးယစ်ဆေးဝါးတားဆီးနှိမ်နင်းရေးရဲတပ်ဖွဲ့မှ တပ်ဖွဲ့ဝင်များပါဝင်သော ပူးပေါင်းအဖွဲ့သည် မတ်လ ၂၅ ရက်နေ့ ညနေ ၃ နာရီအချိန် ရန်ကုန်တိုင်းဒေသကြီး၊ မင်္ဂလာဒုံမြို့နယ်၊ ပုလဲ(၂)ရပ်ကွက်၊ ဂန္ဓမာလမ်းတွင် နီလင်းအောင်(ခ) မွန်လေး မောင်းနှင်ပြီး ခိုင်မိုးလင်း(ခ)ကိုခိုင် လိုက်ပါလာသည့် Nissan AD Van ယာဉ်အား သတင်းအရရှာဖွေရာ ယာဉ်ပေါ်မှ စိတ်ကြွရူးသွပ်ဆေးပြား ၄ သိန်း သိမ်းဆည်းရမိခဲ့တယ်လို့ သိရပါတယ်။

စစ်ဆေးဖော်ထုတ်ချက်အရ မင်္ဂလာဒုံမြို့နယ်၊ ပုလဲ(၁)ရပ်ကွက်၊ ခိုင်ရွှေဝါလမ်း၊ အိမ်အမှတ်(၃၁၉)နေ သိမ်းဆည်းရမိ စိတ်ကြွရူးသွပ်ဆေးပြားများပိုင်ရှင် အားလို(ခ)အိုက်စိုင်း ၏နေအိမ်ကို ဆက်လက်ရှာဖွေရာ ပြည့်စုံအောင်၊ ဇော်မျိုးနိုင်(ခ)ဇေရဲ(ခ) ကုလား နှင့် မယုဝတီအောင် တို့အား စိတ်ကြွရူးသွပ်ဆေးပြား ၁၁ ဒသမ ၈ သိန်းနှင့်အတူ ထပ်မံဖမ်းဆီးရမိခဲ့သဖြင့် ဒေသကာလတန်ဖိုးငွေကျပ် ၁ ဒသမ ၅၈ ဘီလီယံ တန်ဖိုးရှိ စုစုပေါင်းစိတ်ကြွရူးသွပ်ဆေးပြား ၁၅ ဒသမ ၈ သိန်း သိမ်းဆည်းရမိခဲ့၍ ၎င်းတို့အား ဥပဒေအရ အရေးယူထားရှိပြီး ကွင်းဆက်ပြစ်မှုကျူးလွန်သူများအား ဆက်လက်စစ်ဆေးဖော်ထုတ်လျက်ရှိ တယ်လို့ သိရပါတယ်။

ymg/hm
#Yangon_Media_Group

#WorldAgriculture
Published 26 March 2022

ရုရှား-ယူကရိန်းစစ်ရေးပဋိပက္ခများနဲ့ အနောက်နိုင်ငံတွေရဲ့ ဒဏ်ခတ်ပိတ်ဆို့မှုအကျိုးဆက်တွေကြောင့် ထိုင်းနိုင်ငံမှာ ဓာတုဓာတ်မြေဩဇာဈေးနှုန်းဆက်လက်မြင့်တက်လျက်ရှိပြီး နိုင်ငံရဲ့စိုက်ပျိုးရေးလည်ပတ်မှုကဏ္ဍကို ထိခိုက်လျက်ရှိပါတယ်။

#Yangon_Media_Group

#HealthMatter
Published - 26 March 2022

၁။ ဧပြီ(၇)ရက်မှာ ကျရောက်မယ့် ကမ္ဘာ့ကျန်းမာရေးနေ့ရဲ့ ဆောင်ပုဒ်
Our Planet, Our Health ကျွန်ုပ်တို့မြေကမ္ဘာ / ကျွန်ုပ်တို့ကျန်းမာရေး ရဲ့ အဓိပ္ပါယ်??

၂။ ကမ္ဘာကြီးတစ်ခုလုံးမှာ ပြည်သူ့ကျန်းမာရေး Public Health ဟာ စိန်ခေါ်မှုတွေနဲ့ ကြုံတွေ့နေရတဲ့အပေါ် ??

၃။ စိတ္တသုခ၊ ကာယသုခနှစ်ဖြာပေါင်းမှ ပြည့်စုံတဲ့ကျန်းမာမှုလို့ ထင်ပါတယ်။ မျက်မှောက်ကမ္ဘာကြီးမှာ စိတ္တသုခတွေက ယိုယွင်းကျဆင်းလာနေတယ်ဆိုရင် မှန်မလား?? ဆိုတဲ့ အကြောင်းအရာတွေ နဲ့ပတ်သက်ပြီး ကျန်းမာရေးပညာပေးပညာရှင် ဆရာကြီး ဒေါက်တာခင်မောင်လွင်က ဆွေးနွေးပြောဆိုထားပါတယ်။

#Yangon_Media_Group