#Local_News
Published 10 June 2024

▪️ ရန်ကုန်တိုင်းဒေသကြီး၊ မရမ်းကုန်းခရိုင်၊ မရမ်းကုန်းမြို့နယ်၊ အမှတ်(၈)ရပ်ကွက်၊ ကမ္ဘာအေးဘုရားလမ်းနှင့် အုတ်ပုံဆိပ်လမ်းထောင့်တွင် ယာဉ်တစ်စီးမီးလောင်မှုဖြစ်ပွားကြောင်း မီးသတ်တပ်ဖွဲ့နှင့်ပရဟိတအသင်းထံက သိရသည်။

▪️ ဇွန်လ ၁၀ရက် မွန်းတည့် ၁၂နာရီ ၅၅ မိနစ်အချိန်က ဖြစ်ပွားခဲ့ခြင်းဖြစ်ကာ မြန်မာနိုင်ငံမီးသတ်တပ်ဖွဲ့ဌာနချုပ်မှ မီးငြှိမ်းသတ်ယာဉ်(၂)စီး၊ မရမ်းကုန်းမြို့နယ်မီးသတ်စခန်းမှ မီးငြှိမ်းသတ်ယာဉ်(၁)စီးတို့ဖြင့် ထွက်ခွာငြှိမ်းသတ်ခဲ့ရကြောင်း သိရသည်။

▪️ ထိုသို့မီးငြိမ်းသတ်သောကြောင့် နေ့လည် ၁နာရီဝန်းကျင်တွင် မီးငြှိမ်းသတ်နိုင်ခဲ့ကြောင်း ယာဉ်မောင်းမှာ အနည်းငယ်ဒဏ်ရာရရှိခဲ့ကြောင်း သိရသည်။

▪️ အဆိုပါကားမီးလောင်မှုဖြစ်စဥ်ဖြစ်ပွါးသည့်နေရာသို့ "ရွှေရောင်သမိုင်း"အရေးပေါ်ကယ်ဆယ်ရေးနှင့် လူမှုအထောက်အကူပြုဖွံ့ဖြိုးရေးအသင်းမှ တာဝန်ကျအသင်းဝင်များက လူနာတင်ယာဥ်(၁)စီးတို့ဖြင့် ထွက်ခွာခဲ့ပြီး လက်တွင် အနည်းငယ်ပွန်းပဲ့ရှနာဒဏ်ရာရရှိသည့် ယာဉ်မောင်းအမျိုးသားအား ဆေးထည့်ကူညီပေးခဲ့ကြောင်း သိရသည်။

#YMG/LW #Yangon_Times

#Local_News
Published_10 June 2024

▪️ ယခုအပတ်တွင် ရန်ကုန်အထိုင်ဈေး အခြေခံလက်ကားရည်ညွှန်းဈေးနှုန်းကို စားအုန်းဆီတစ်ပိဿ ၅၃၆၅ ကျပ်ဖြင့်ရောင်းချရန်သတ်မှတ်ထားပြီး ဈေးမြှင့်တင်ရောင်းချခြင်း၊ ဈေးကစားခြင်းများဆောင်ရွက်ပါက ဥပဒေအရ အရေးယူဆောင်ရွက်သွားမည်ဖြစ်ကြောင်းသိရသည်။

▪️ ပြီးခဲ့သည့် အပတ်က စားအုန်းဆီတစ်ပိဿ ၅၃၄၅ကျပ်သတ်မှတ်ခဲ့ပြီး ယခုအပတ်အတွင်း ကမ္ဘာ့စားအုန်းဆီထုတ်လုပ်တင်ပို့သည့် နိုင်ငံများတွင် ဈေးကွက်နှင့် ဈေးနှုန်းဖြစ်ပေါ်မှုများအရ ၂၀၂၄ ခုနှစ် ဇွန် ၁၀ ရက်မှ ဇွန် ၁၆ ရက်အထိ ရန်ကုန်အထိုင်ဈေး အခြေခံလက်ကားရည်ညွှန်းဈေးနှုန်းမှာ စားအုန်းဆီတစ်ပိဿာလျှင် ငွေကျပ် ၅၃၆၅ ကျပ်ဖြစ်ကြောင်းထုတ်ပြန်ကြေညာထားသည်။

▪️ စီးပွားရေးနှင့်ကူးသန်းရောင်းဝယ်ရေးဝန်ကြီးဌာန စားသုံးဆီတင်သွင်းသိုလှောင်ဖြန့်ဖြူးခြင်းလုပ်ငန်း ကြီးကြပ်ရေးကော်မတီအနေဖြင့် စားအုန်းဆီကမ္ဘာ့ဈေးနှုန်းဖြစ်ပေါ်ပြောင်းလဲမှုနှင့်အညီ ပြည်တွင်း၌ ဖြစ်သင့်ဖြစ်ထိုက်သည့် ဈေးနှုန်းများဖြစ်ပေါ်စေရေး ထိန်းကျောင်းဆောင်ရွက်လျက်ရှိပြီး

▪️ စားအုန်းဆီအဓိကထုတ်လုပ် တင်ပို့သည့် မလေးရှားနိုင်ငံတွင် ဖြစ်ပေါ်နေသည့် FOB ဈေးနှုန်းများကို နေ့စဉ်စောင့်ကြည့်ကာ သယ်ယူပို့ဆောင်ခကုန်ကျစရိတ်များ၊ ဘဏ်စရိတ်များ၊ အခွန်အခများထည့်သွင်းတွက်ချက်၍ ပြည်တွင်းဈေးကွက်၌ ရောင်းဝယ်ဖောက်ကားရမည့် အခြေခံလက်ကားရည်ညွှန်းဈေးနှုန်းကို ထုတ်ပြန်ပေးလျက်ရှိကြောင်း၊

▪️ ထို့ပြင် ပြည်တွင်းဈေးကွက်အတွင်း ဈေးနှုန်းမြှင့်တင်ရောင်းချခြင်း၊ ဈေးကစားရန်ရည်ရွယ်ချက်ဖြင့် သိုလှောင်ခြင်းအပါအဝင် မသမာသည့် လုပ်ဆောင်မှုများပြုလုပ်ပါက အရေးကြီးကုန်စည်နှင့် ဝန်ဆောင်မှုဥပဒေအရ အရေးယူဆောင်ရွက်သွားမည်ဖြစ်ကြောင်း အသိပေးထုတ်ပြန်ထားသည်။

▪️ အခြေခံလက်ကားရည်ညွှန်းဈေးနှုန်းများကို စားသုံးသူရေးရာဦးစီးဌာန၏ Website: www.doca.gov.mm၊ Facebook Page နှင့် မြန်မာနိုင်ငံ ဆီကုန်သည်နှင့် ဆီလုပ်ငန်းရှင်များအသင်း၏ Facebook Page တွင် ဝင်ရောက်ကြည့်ရှုနိုင်ကြောင်း သိရသည်။

▪️ တိုင်းနှင့်ပြည်နယ်အသီးသီးရှိစားအုန်းဆီဖြန့်ဖြူးသူများအနေဖြင့် အပါတ်စဉ် ရည်ညွှန်းဈေးအပေါ် ဖြစ်သင့် ဖြစ်ထိုက်သည့်သယ်ယူပို့ဆောင်စရိတ်နှင့်အမြတ်(၂)ရာခိုင်နှုန်းသာ ထပ်ဆောင်းရောင်းကြရန်နှင့် ဈေးမကစားကြရန် မြန်မာနိုင်ငံဆီကုန်သည်နှင့်ဆီကုန်သည်များအသင်းမှ အသိပေးချက်ထုတ်ပြန်ထားသည်။

#tthl #Yangon_Times

#Local_News
Published_10 June 2024

▪️ မြန်မာနိုင်ငံအနေဖြင့် ငွေကြေးခဝါချမှုနှင့် အကြမ်းဖက်မှုကိုငွေကြေးထောက်ပံ့မှုတိုက်ဖျက်ရေး (AML/CFT)လုပ်ငန်းများအကောင်အထည်ဖော်ရာတွင် ရလဒ်ကောင်းများရရှိကာ ငွေကြေးဆိုင်ရာ အရေးယူဆောင်ရွက်ရေးအဖွဲ့ (FATF)မှအသိအမှတ်ပြုပြီး နှစ်စဉ်စံနှုန်းသတ်မှတ်ချက်အဆင့်များ တိုးမြှင့်ပေးလျက်ရှိကြောင်း မြန်မာနိုင်ငံတော်ဗဟိုဘဏ်၏ ထုတ်ပြန်ချက်အရ သိရသည်။

▪️ ရလဒ်ကောင်းများအနေဖြင့် ၂၀၂၁ ခုနှစ်တွင် လက်ငင်းရလဒ်(၂)ခုဖြစ်သည့် ငွေရေးကြေးရေး မဟုတ်သော စီးပွားရေးလုပ်ငန်းများနှင့် ကျွမ်းကျင်မှုဆိုင်ရာ အသက်မွေးဝမ်းကျောင်းလုပ်ငန်း များအတွက် ကြီးကြပ်ရေးအာဏာပိုင်များ လုံလောက်စွာခန့်အပ်ခြင်းနှင့် ဘဏ်များအား ကြီးကြပ်စစ်ဆေးခြင်း၊

▪️ ၂၀၂၂ ခုနှစ်တွင် လက်ငင်းရလဒ်(၁)ခုဖြစ်သည့် လူအများအပြားသေကြေစေသည့်လက်နက်များ ပြန့်ပွားရေးကို ငွေကြေးထောက်ပံ့မှုတိုက်ဖျက်ရေး(PFTFS)အတွက် ကြီးကြပ်ရေးအာဏာပိုင်များအား သင်တန်းပေးခြင်း၊

▪️ ၂၀၂၃ ခုနှစ်တွင် လက်ငင်းရလဒ်(၁)ခုဖြစ်သည့် PFTFS အတွက် သတင်းပို့ အဖွဲ့အစည်းများအား အသိပညာပေးခြင်းနှင့် ကြီးကြပ်စစ်ဆေးခြင်းနှင့်

▪️ ၂၀၂၄ ခုနှစ်တွင် လက်ငင်းရလဒ်(၁)ခုဖြစ်သည့် ကျောက်မျက်၊ ရွှေရောင်းဝယ်သူများ၊ အိမ်ခြံမြေကဏ္ဍတို့အား ဆုံးရှုံးနိုင်ခြေအခြေပြု ကြီးကြပ်စစ်ဆေးခြင်းစသည့် စုစုပေါင်းလက်ငင်းရလဒ် (၅)ခုသည် ကြီးမားစွာလိုက်နာဆောင်ရွက်ခြင်းအဆင့်သို့ တိုးမြှင့်ရရှိခဲ့သည်ဟုဆိုသည်။

▪️ ထို့အပြင် APG သို့ တစ်နှစ်လျှင်တစ်ကြိမ် တင်ပြလျက်ရှိသည့် မြန်မာနိုင်ငံ၏ စဉ်ဆက်မပြတ် တိုးတက်မှုအစီရင်ခံစာ၌ AML/CFT ဆိုင်ရာ တိုးတက်ဆောင်ရွက်မှုများ ထည့်သွင်းဖော်ပြပြီး အဆင့်သတ်မှတ်ချက်များ တိုးမြှင့်တောင်းခံခဲ့ရာ စဉ်ဆက်မပြတ် တိုးတက်မှုအစီရင်ခံစာ (၂၀၂၃)အား အာရှ-ပစိဖိတ်ဒေသ ငွေကြေးခဝါချမှုတိုက်ဖျက်ရေးအဖွဲ့(APG) ၏ အကဲဖြတ်ချက်အရ အကြံပြုချက် (၂၅)ချက်အား စံနှုန်းသတ်မှတ်ချက်ကောင်းမွန်သည့် ကြီးမားစွာ လိုက်နာဆောင်ရွက်ခြင်းအဆင့်သို့ တိုးမြှင့်ရရှိပြီးဖြစ်ကြောင်း၊ ဆက်လက်၍လည်း ၂၀၂၄ ခုနှစ်အတွင်း အကြံပြုချက်(၂)ချက်အပေါ် စံနှုန်းသတ်မှတ်ချက် တိုးတက်ကောင်းမွန်ကြောင်း အဆင့်တိုးမြှင့်ရရှိနိုင်ရန် ကြိုးပမ်းဆောင်ရွက်လျက်ရှိကြောင်း ဖော်ပြပါရှိသည်။

▪️ မြန်မာနိုင်ငံသည် ငွေကြေးခဝါချမှုနှင့်အကြမ်းဖက်မှုကို ငွေကြေးထောက်ပံ့မှုတိုက်ဖျက်ရေး (AML/CFT)လုပ်ငန်းများနှင့် လူအများအပြားသေကျေစေသည့် လက်နက်များပြန့်ပွားရေးကို ငွေကြေးထောက်ပံ့မှုတိုက်ဖျက်ရေးလုပ်ငန်းများကို ငွေကြေးဆိုင်ရာအရေးယူဆောင်ရွက်ရေးအဖွဲ့ (FATF)၏ စံသတ်မှတ်ချက်များနှင့် အာရှ-ပစိဖိတ်ဒေသ ငွေကြေးခဝါချမှုတိုက်ဖျက်ရေးအဖွဲ့ (APG)၏ အကြံပြုချက်များအတိုင်း စဉ်ဆက်မပြတ် လိုက်နာအကောင်အထည်ဖော်ဆောင်ရွက်လျက်ရှိကြောင်း၊

▪️ အဆိုပါလုပ်ငန်းများ အကောင်အထည်ဖော်ဆောင်ရွက်မှုဆိုင်ရာ တိုးတက်မှုအစီရင်ခံစာများအား ပြုစုပြီး အာရှ-ပစိဖိတ်ပူးတွဲအဖွဲ့ (Asia Pacific Joint Group-APJG)ထံသို့ လေးလတစ်ကြိမ်ပေးပို့ခြင်း၊ ယင်းအဖွဲ့၏ မျက်နှာချင်းဆိုင်အစည်းအဝေးများသို့ မြန်မာကိုယ်စားလှယ်အဖွဲ့များ တက်ရောက်၍ APJG မှအကဲဖြတ်သူများ၏ အကြံပြုချက်များနှင့်အညီ ရှင်းလင်းဆွေးနွေးမှုများပြုလုပ်ခဲ့ကြောင်း၊

▪️ သို့ပါ၍ မြန်မာနိုင်ငံ၏ AML/CFT ဆိုင်ရာ ကြိုးပမ်းအကောင်အထည်ဖော်ဆောင်ရွက်မှုများအပေါ် FATF နှင့် APG တို့က အသိအမှတ်ပြုပြီး နှစ်စဉ်စံနှုန်းသတ်မှတ်ချက်အဆင့်များ တိုးမြှင့်ပေးလျက်ရှိပါကြောင်း အများပြည်သူသိရှိစေရန် သတင်းထုတ်ပြန်အပ်ကြောင်းလည်း ဗဟိုဘဏ်၏ထုတ်ပြန်ချက်၌ ဖော်ပြပါရှိကြောင်း သိရသည်။

#tthl #Yangon_Times

#Local_News
Published-10 June 2024

▪️ ပဲခူးမြစ်အတွင်း(သန်လျင်တံတား-၃) တံတားအားလတ်တလောတွင် အခမဲ့ဖြတ်သန်းခွင့်ပြုထားပြီး မေလတတိယအပတ်မှသာစတင်၍မော်တော်ယာဉ် အမျိုးအစားအလိုက်ကောက်ခံသွားမည်ဖြစ်ကြောင်း ဆောက်လုပ်ရေးဝန်ကြီးဌာနမှ သိရသည်။

▪️ အဆိုပါ ပဲခူးမြစ်အတွင်း(သန်လျင်တံတား-၃)အသုံးပြုခအား တံတားစတင် ဖွင့်လှစ်ခဲ့သည့် ဇွန် ၈ ရက်မှ စတင်၍ ဇွန်  ၁၅ရက်အထိ အခမဲ့ဖြတ်သန်းခွင့်ပေးသွားမည်ဖြစ်ကြောင်း သိရသည်။

▪️ ဇွန် ၁၆ရက်နေ့မှစတင်၍ တံတားဖြတ်သန်းခများကို အိမ်စီးကား၊ ခရီးသည်တင်ကား၊ကုန်တင်ကားစသဖြင့် မော်တော်ယာဉ်အမျိုးအစားအလိုက် ကောက်ခံသွားမည်ဖြစ်ကြောင်း သိရသည်။

▪️ ထိုသို့ကောက်ခံရာတွင် အိမ်စီးကားသုံးတန်အောက် ယာဉ်များဖြစ်သည့် Land Cruiser ၊Wish၊ Alphard ၊ Double Cab ၊ Super Custom စသည့် ယာဉ်+ကုန် အပါအဝင် သုံးတန်အောက်ယာဥ်များမှာ ပေ၈၀၀၀အထက် ကောက်ခံနှုန်း ကျပ်၅၀၀ ၊ ခရီးသည်တင်ယာဉ်ငယ်များဖြစ်သည့် ဟိုင်းလတ်၊လိုက်ထရပ်၊ဒိုင်နာ၊ကင်တာစသည့် ယာဉ်+ ကုန်၆တန် ယာဉ်များမှာ ပေ ၈၀၀၀ အထက်ကောက်ခံနှုန်း ကျပ်၁၀၀၀၊ ခရီးသည်တင်ယာဉ်လတ်များဖြစ်သည့် Minibus ၊ BM နှင့်ခရီးသည်တင်ယာဉ်ကြီး များဖြစ်သည့် ဟီးနိုး ၊ဟွန်ဒိုင်းစသည့် ယာဉ်+ကုန် ၂၁ တန်ယာဉ်များမှာပေ၈၀၀၀အထက် ကောက်ခံနှုန်း ကျပ်၂၀၀၀ အဖြစ်သတ်မှတ်ထားကြောင်း သိရသည်။

▪️ ကုန်တင်ကားငယ် ၊၆ဘီး၊၈ဘီးကုန်တင်ယာဉ်စသည့် ယာဉ်+ကုန် ၂၁ တန်ယာဉ်များမှာ ပေ၈၀၀၀အထက် ကောက်ခံနှုန်း ကျပ်၄၀၀၀နှင့် တန်ပိုဒဏ်ကြေး ၁၂,၀၀၀  အဖြစ်သတ်မှတ်ထားကြောင်း သိရသည်။

▪️ ထို့အပြင် ကုန်တင်ကားကြီး၊ ၁၀ဘီး၊ ၁၂ဘီး၊ ၁၄ဘီး၊ တွဲကားကုန်တင်ယာဉ်စသည့် ယာဉ်+ကုန် ၃၄ တန်ယာဉ်များမှာ ပေ ၈၀၀၀အထက် ကောက်ခံနှုန်း ကျပ်၁၂,၀၀၀နှင့် တန်ပိုဒဏ်ကြေး ၂၂,၀၀၀  အဖြစ်သတ်မှတ်ထားကြောင်းသိရသည်။

▪️ ကုန်တင်တွဲကား ၁၈ဘီး၊၂၂ဘီး၊တွဲကား ၊ ယာဉ်+ကုန် ၅၀ဒဿမ၅ တန်ယာဉ်များမှာ ပေ ၈၀၀၀ အထက် ကောက်ခံနှုန်း ကျပ်၂၂,၀၀၀နှင့် တန်ပိုဒဏ်ကြေး ၆၆,၀၀၀  အဖြစ်သတ်မှတ်ထားကြောင်း သိရသည်။

▪️ ထို့အပြင် ကုန်တင်တွဲကား(ခါလီ ) ကုန်မပါရှိပါက ပေ ၈၀၀၀အထက် ကောက်ခံနှုန်းမှာ  ကျပ် ၄,၀၀၀ အဖြစ်သတ်မှတ်ထားကြောင်းသိရသည်။

▪️ အဆိုပါ ပဲခူးမြစ်ကူးတံတား(သန်လျင်တံတား-၃) ဖွင့်ပွဲအခမ်းအနားကို ဇွန်၈ရက်နံနက်ပိုင်းတွင် နိုင်ငံတော်စီမံအုပ်ချုပ်ရေးကောင်စီဥက္ကဌ ဗိုလ်ချုပ်မှူးကြီး မင်းအောင်လှိုင်တက်ရောက်၍ ဖွင့်လှစ်ပေးခဲ့ခြင်းဖြစ်သည်။

▪️ ပဲခူးမြစ်အတွင်း(သန်လျင်တံတား-၃)အား ဖွင့်ပွဲအခမ်းအနား ပြီးဆုံးချိန်မှစတင်၍ မော်တော်ယာဉ်များဖြတ်သန်းသွားလာခွင့်ပေးခဲ့ရာ သန်လျင်မြို့သို့ အသွားအပြန်ပြုလုပ်လျှက်ရှိသည့် မော်တော်ယာဉ်များသည် အဆိုပါ တံတားအသစ်ကြီးပေါ်မှ စည်ကားများပြားစွာဖြင့် ဖြတ်သန်း မောင်းနှင်လျက်ရှိပြီး စတင်ဖွင့်လှစ်သည့်နေ့တွင် ကားအစီးရေ၁၂၉၈၈ စီးဖြတ်သန်းမောင်းနှင်ခဲ့ပြီး ယနေ့နံနက်ပိုင်း ကားအစီးရေ ၄၂၀၀ စီးကျော် ဖြတ်သန်းမောင်းနှင်ခဲ့ကြောင်း သိရသည်။

▪️ ယခုကဲ့သို့ ပဲခူးမြစ်အတွင်း(သန်လျင်တံတား-၃) တံတားသစ်ကြီးကို တည်ဆောက်ဖွင့်လှစ်နိုင်ခဲ့ခြင်းကြောင့် သန်လျင်တံတား-၁ တွင်ဖြစ်ပေါ်လျက်ရှိသည့် ယာဉ်ကြောပိတ်ဆို့မှုများအား ဖြေရှင်းပေးနိုင်မည်ဖြစ်ကြောင်း သိရသည်။

#YMG/NN #Yangon_Times

#Local_News
Published-10 June 2024

▪️ (၅၂)ကြိမ်မြောက် အောင်ဘာလေထီဆုထုတ်ယူရန် ကျန်ရှိသည့် ဆုမဲလက်မှတ်များအား လာမည့်ဇွန်လ ၂၈ ရက်အထိ ရန်ကုန်မြို့နှင့်  မန္တလေးမြို့ရှိ အောင်ဘာလေ သိန်းဆုဌာနခွဲရုံးများတွင် တင်ပြကာ ဆုငွေများကို တောင်းခံနိုင်ကြောင်း စီမံကိန်းနှင့်ဘဏ္ဍာရေးဝန်ကြီးဌာန၊ ပြည်တွင်းအခွန်များဦးစီးဌာန၏ ထုတ်ပြန်ကြေညာချက်အရ သိရသည်။

▪️ ပြီးခဲ့သည့် ၂၀၂၃ ခုနှစ်၊ ဇူလိုင် ၁ ရက်တွင်  ဖွင့်လှစ်ခဲ့သည့် (၅၂)ကြိမ်မြောက် ကျပ် ၁,၀၀၀ တန် အောင်ဘာ လေသိန်းဆုဖွင့်ပွဲ၌  ဆုမဲပေါင်း တစ်သိန်းသုံးသောင်းကျော် ခွဲဝေချီးမြှင့်ခဲ့ရာ ဆုမဲတစ်သောင်းလေးထောင်နီးပါးကို ထုတ်ယူရန် တောင်းခံခြင်း မရှိသေး‌ကြောင်း သိရသည်။

▪️ အဆိုပါ (၅၂)ကြိမ်မြောက်အောင်ဘာလေထီသိန်းဆုထီဖွင့်ပွဲ၌  ကျပ်သိန်း ၅၀၀ တစ်ဆု၊ ကျပ်သိန်း ၂၀၀ နှစ်ဆု အပါအဝင် ဆုမဲပေါင်း တစ်သောင်းလေးထောင်နီးပါး လာရောက်ထုတ်ယူခြင်းမရှိပါက  အခွန်ဘဏ္ဍာအဖြစ် သိမ်းယူသွားမည်ဖြစ်‌ကြောင်း သိရသည်။

▪️ ဆုမဲလက်မှတ်များအား လာမည့်  ဇွန်လ ၂၈ ရက်အထိ ရန်ကုန်မြို့နှင့်  မန္တလေးမြို့ရှိ အောင်ဘာလေသိန်းဆုဌာနခွဲရုံးများတွင်  တင်ပြကာ ဆုငွေများကို တောင်းခံနိုင်ကြောင်းသိရသည်။

▪️ အဆိုပါရက်အထိ လာရောက်ထုတ်ယူခြင်းမရှိပါက  အခွန်ဘဏ္ဍာအဖြစ် သိမ်းယူသွားမည်ဖြစ်ကြောင်း  ထုတ်ပြန်ထား‌‌ကြောင်း သိရသည်။

#YMG/NN #Yangon_Times

#Local_News
Published 10 June 2024

▪️ ပြည်ပသို့လုပ်သားစေလွှတ်သည့် လိုင်စင်ရအေဂျင်စီများ အနေဖြင့် ပေးသွင်းရမည့် အခွန်များ မပေးသွင်းပါက အခွန်မပေးသွင်းမခြင်း လုပ်သားစေလွှတ်မှုဆိုင်းငံ့ထားမည်ဖြစ်ကြောင်း အလုပ်သမားဝန်ကြီးဌာနမှ သိရသည်။

▪️၂၀၂၂-၂၀၂၃ဘဏ္ဍာနှစ်အတွက် အခွန်ပေးသွင်းရန် ကျန် ရှိသည့် အေဂျင်စီ ၁၂ခုရှိ ကြောင်း သိရသည်။

▪️ "၂၀၂၂-၂၀၂၃ နှစ်အတွက် အခွန်ပေးသွင်းဖို့ ကျန်တဲ့အေဂျင်စီ ၁၂ခုရှိတယ် သူတို့ကို သတိပေးစာထုတ်ခဲ့ပြီးပြီ အခွန်ပေးသွင်းဖို့ကျန်တဲ့ အေဂျင်စီတွေကို လုပ်သားစေလွှတ်တာ အခွန်မပေးသွင်းမခြင်း ရပ်ဆိုင်းထားမယ်"ဟု အလုပ်သမားဝန်ကြီးဌာနမှ တာဝန်ရှိသူကပြောသည်။

▪️ ထို့ပြင် ၂၀၂၃- ၂၀၂၄ဘဏ္ဍာနှစ်အတွက် အေဂျင်စီများ ပေးသွင်းရမည့်အခွန်ငွေများနှင့် ပက်သက်၍ ဝန်ကြီးဌာနမှ စိစစ်လျက်ရှိကြောင်း သိရသည်။

"၂၀၂၃- ၂၀၂၄ဘဏ္ဍာနှစ်က မတ်လကမှ ပြီးတာဆိုတော့ အခုစာရင်းတွေ စိစစ်နေတယ် ဒီဟာနဲ့ ပတ်သက်လို့က နိုင်ငံအလိုက် သတ်မှတ်ထားတဲ့ ဝန်ဆောင်ခ နှုန်းထားရယ် မလေး ထိုင်းစတဲ့ နိုင်ငံအလိုက်ထွက်ခွာတဲ့ သူအရေအတွက်အလိုက် အခွန်ပေးသွင်းရတာပါ"ဟု အလုပ်သမားဝန်ကြီးဌာနမှ တာဝန်ရှိသူကပြောသည်။

ထိုသို့ အခွန်ပေးသွားရာတွင် အေဂျင်စီများ အနေဖြင့် စာရင်းများ လိမ်လည်တင်ပြမှုများ ပြုလုပ်ခြင်းများ မလုပ်ရန်နှင့် စိစစ်တွေ့ရှိပါက အရေးယူမှုများ လုပ်သွားမည်ဖြစ်ကြောင်း အလုပ်သမားဝန်ကြီးဌာနမှ သိရသည်။

#YMG/LW #Yangon_Times

#World_News
Published 10 June 2024

▪️ တောင်ကိုရီးယားဘက်မှ နယ်စပ်နားမှာ လော်စပီကာများဖြင့် အသံလွှင့်ဝါဒဖြန့်ခြင်း၊ လက်ကမ်းစာစောင် ဖြန့်ကျဲခြင်းများ ဆက်လက်ပြုလုပ်နေပါက နောက်ထပ်တုန့်ပြန်မှုတစ်မျိုး ဆောင်ရွက်ရလိမ့်မယ်လို့ မြောက်ကိုရီးယား ခေါင်းဆောင် ကင်မ်ဂျုံအန်းရဲ့ ညီမဖြစ်သူ ကင်မ်ယိုဂျုံက တနင်္ဂနွေနေ့မှာ သတိပေးလိုက်ကြောင်း မြောက်ကိုရီးယား KCNA သတင်းဌာနမှ ဖော်ပြလိုက်ပါတယ်။

▪️ တောင်ကိုရီးယားဟာ တနင်္ဂနွေနေ့က မြောက်ကိုရီးယားဘက်သို့ ဦးတည်ကာ လော်စပီကာများဖြင့် အသံလွှင့်ခြင်းကို ပြန်လည်စတင် ပြုလုပ်ခဲ့တယ်လို့ စစ်တပ်က ပြောပါတယ်။

▪️ ဒီမတိုင်ခင်မှာ မြောက်ကိုရီးယားဘက်က အမှိုက်သရိုက်များ ချိတ်ဆွဲထားတဲ့ ပူစီဖောင်းများ တောင်ကိုရီးယားဘက်သို့ လွှတ်နေခြင်းကို ရပ်တန့်ရန် သတိပေးခဲ့ပါသေးတယ်။

▪️ ဒါဟာ အလွန်အန္တရာယ်များတဲ့ အခြေအနေ အစပျိုးလာတာ ဖြစ်တယ်လို့ အာဏာရ အလုပ်သမားပါတီရဲ့ လက်ထောက်ညွှန်ကြားရေးမှူးလည်း ဖြစ်သူ ကင်မ်ယိုဂျုံက ပြောသွားပါတယ်။

▪️ စနေနေ့က မြောက်ကိုရီးယားဘက်ကနေ အမှိုက်များချိတ်ဆွဲထားတဲ့ ပူစီဖောင်း ၃၃၀ ခန့်ကို စတင်လွှတ်ခဲ့ရာ ပူစီဖောင်း ၈၀ လောက် နယ်စပ်ကျော်လာပြီး ကျခဲ့တယ်လို့ တောင်ကိုရီးယားစစ်တပ်က ပြောကြားခဲ့ပြီး စိတ်ဓာတ်စစ်ဆင်ရေးအနေဖြင့် အသံလွှင့်စည်းရုံးခြင်းများ ပြန်လည်ပြုလုပ်လာတာ ဖြစ်ပါတယ်။

▪️ မေလတုန်းက တောင်ကိုရီးယားဘက်ကနေ ဝါဒဖြန့်ချိရေး လှုပ်ရှားမှုအဖြစ် မြောက်ကိုရီးယား ဆန့်ကျင်ရေး လက်ကမ်းစာစောင်များကို ဖြန့်ကျဲခဲ့ရာမှာ မြောက်က လက်စားချေတဲ့အနေနဲ့ အမှိုက်များ ချိတ်ဆွဲထားတဲ့ ပူစီဖောင်းများကို တောင်ဘက်သို့ လွှတ်တင်ခဲ့ပါတယ်။

▪️ လက်ကမ်းစာစောင်ဖြန့်ခြင်းနဲ့ လော်စပီကာ အသံလွှင့်ခြင်းတို့ကို မြောက်ကိုရီးယားက အပြင်းထန်ဆုံး တုန့်ပြန်ခဲ့ပြီး လော်စပီကာတွေကို သေနတ်နဲ့ပစ်တာမျိုး ရှိခဲ့ပါတယ်။

▪️ ၂၀၁၈ ခုနှစ် ကိုရီးယားနှစ်ဖက်ခေါင်းဆောင်များ သဘောတူလက်မှတ်ရေးထိုးချက်အရ တောင်ကိုရီးယားက အသံလွှင့်ဝါဒဖြန့်ခြင်းကို ရပ်ဆိုင်းခဲ့ပေမယ့် မြောက်ကိုရီးယားက လက်နက်များ အရှိန်မြှင့် ထုတ်လုပ်နေတာကြောင့် နှစ်နိုင်ငံကြား တင်းမာမှု မြင့်တက်လာခဲ့ပါတယ်။

▪️ တောင်ကိုရီးယားဘက်က အသံလွှင့်ရာမှာ ဒီမိုကရက်တစ်၊ အရင်းရှင်စနစ်နဲ့ ပတ်သက်လို့ ကမ္ဘာ့ရေးရာ သတင်းတွေ၊ အချက်အလက်တွေ အကြောင်းကို နာမည်ကျော် ကေပေါ့သီချင်းများနဲ့ ရောနှောထားတာတွေ ပါဝင်ပါတယ်။

▪️ လွှင့်လိုက်တဲ့အသံက မြောက်ကိုရီးယားဘက် ၂၀ ကီလိုမီတာကျော်အထိ ရောက်ရှိမယ်လို့ ယူဆရပါတယ်။

#Source: Reuters

#Local_News
Published_10 June 2024

▪️ လျှပ်စစ်ဓာတ်အားပို့လွှတ်ရေးနှင့် ကွပ်ကဲရေးဦးစီးဌာန၊ 230 kV လှိုင်သာယာပင်မဓာတ်အားခွဲရုံ၏ ဓာတ်လွှတ်ပစ္စည်းများချို့ယွင်းမှု ဖြစ်ပေါ်‌နေ၍ မြို့နယ်(၄)ခု၌ယာယီဓာတ်အားပြတ်တောက်နိုင်သည်ဟု ရန်ကုန်လျှပ်စစ်ဓာတ်အားပေးရေးကော်ပိုရေးရှင်း (YESC)က ဇွန်လ (၁၀)ရက်၌ ထုတ်ပြန်လိုက်သည်။

▪️ 230 kV လှိုင်သာယာပင်မဓာတ်အားခွဲရုံတွင် ဇွန်လ(၁၀) ရက်နေ့၊ (၀၇:၃၅) နာရီအချိန်ခန့်တွင် 33kV  လှိုင်သာယာ  - နဝဒေး ဓာတ်အားလိုင်းအပြစ်ဖြစ်ပေါ်မှုကြောင့် ဓာတ်အားခွဲရုံ၏ ဓာတ်လွှတ်ပစ္စည်းများချို့ယွင်းမှုဖြစ်ပေါ်ခဲ့သည် ဟုဆိုသည်။

 
▪️ သို့ဖြစ်ပါ၍ အဆိုပါဓာတ်အားခွဲရုံပြန်လည်ထိန်းသိမ်းပြုပြင်နေစဉ်ကာလအတွင်း လှိုင်သာယာ (အရှေ့ပိုင်း)မြို့နယ်၊ လှိုင်သာယာ(အနောက်ပိုင်း)မြို့နယ်၊ ရွှေလင်ပန်းမြို့၊ မရမ်းကုန်းမြို့နယ်၊ ကမာရွတ်မြို့နယ်နှင့် လှိုင်မြို့နယ်များ၏ ရပ်ကွက်နေရာများတွင် ဓာတ်အားပြတ်တောက်နေမည် ဖြစ်ပါကြောင်းနှင့် ပုံမှန်ဓာတ်အားပြန်လည်ပေးနိုင်ရေးအတွက် အချိန်နှင့်တစ်ပြေးညီကြိုးပမ်းဆောင်ရွက်လျှက်ရှိပါကြောင်း မိဘပြည်သူများထံသို့ လေးစားစွာ အသိပေးပန်ကြားအပ်ကြောင်း ထုတ်ပြန်ချက်၌ ဖော်ပြထားသည်။

#tthl #Yangon_Times

#Local_News
Published_ 10 June 2024

▪️ အာဖရိက၊ ကာရေဘီယံနှင့် ပစိဖိတ်နိုင်ငံများ (OACPS) အဖွဲ့ဝင်နိုင်ငံများတွင် စားနပ်ရိက္ခာဖူလုံရေးအတွက် မြန်မာနိုင်ငံနှင့် ပူးပေါင်းဆောင်ရွက်နိုင်မည့် အလားအလာများကို ရှာဖွေဖော်ထုတ်နိုင်ရေး ဆွေးနွေးခဲ့ကြောင်း သိရပါတယ်။

▪️ ဘရပ်ဆဲလ်မြို့ရှိ မြန်မာသံအမတ်ကြီး ဦးစိုးလင်းဟန်သည် အာဖရိက၊ ကာရေဘီယံ နှင့် ပစိဖိတ်နိုင်ငံများအဖွဲ့(OACPS) အတွင်းရေးမှူးချုပ် အင်ဂိုလာနိုင်ငံခြားရေး ဝန်ကြီးဟောင်း Mr. Georges Rebelo Pinto Chikoti ကို ဇွန် ၅ ရက်တွင် ဘရပ်ဆဲလ်မြို့ရှိ OACPS အတွင်းရေးမှူးချုပ်ရုံး၌ တွေ့ဆုံစဉ် ဆွေးနွေးခဲ့တာ ဖြစ်ပါတယ်။

▪️ ထိုသို့တွေ့ဆုံစဉ် အတွင်းရေးမှူးချုပ်က OACPS အဖွဲ့၏သမိုင်းနှင့် လှုပ်ရှားဆောင်ရွက်မှုများ၊ ဥရောပသမဂ္ဂအပြင် အခြားနိုင်ငံတကာမိတ်ဖက်များ အထူးသဖြင့် အာရှဒေသရှိနိုင်ငံများနှင့် ထိတွေ့ဆက်ဆံမှုချဲ့ထွင်သွားရန် ကြိုးပမ်းနေမှုများအကြောင်း ပြောကြားခဲ့ပါတယ်။

▪️ မြန်မာသံအမတ်ကြီးက မြန်မာနိုင်ငံရှိ အဓိကစီးပွားရေးအခွင့်အလမ်းများ၊ မြန်မာနိုင်ငံတွင် ဥရောပသမဂ္ဂ၏ စီးပွားရေးလုပ်ငန်းများ ရင်းနှီးမြှုပ်နှံ၍ လုပ်ငန်းဆောင်ရွက်နေသည့် အခြေအနေများကို ရှင်းလင်းပြောကြားခဲ့ပါတယ်။

▪️ ထို့အတူ မြန်မာသံအမတ်ကြီးနှင့် အတွင်းရေးမှူးချုပ်တို့သည် ဘရပ်ဆဲလ်မြို့ရှိ အာဆီယံသံရုံးများနှင့် OACPS အတွင်းရေးမှူးချုပ်ရုံးတို့အကြား ထိတွေ့ဆက်ဆံမှု တိုးမြှင့်သွားရေးကိုလည်း ဆွေးနွေးခဲ့ကြောင်း သတင်းရရှိပါတယ်။

#Ymg_mnn #Yangon_Media_Group

#World_Health
Published10 June 2024

▪️ ရယ်မောခြင်းက အကောင်းဆုံးဆေးတစ်ခွက် ဆိုပေမယ့် အသက် ၅၃ နှစ်အရွယ် အမျိုးသားတစ်ဦးကတော့ ဆေးရုံရောက်ခဲ့ရပါတယ်။

▪️ မစ္စတာ ရှရမ်လို့ အမည်လွှဲပြောင်းဖော်ပြထားတဲ့ လူနာဟာလက်ဖက်ရည်သောက်ပြီး ဟာသအစီအစဥ်တစ်ခု ကြည့်နေရင်း အချိန်မိနစ်များကြာတဲ့အထိ ရယ်မောနေခဲ့ရာ မေ့လဲသွားခဲ့တယ်လို့ အာရုံကြောဆရာဝန် ဆုဒီယာကူမာက X ဆိုရှယ်မီဒီယာမှာ ဖော်ပြခဲ့ပါတယ်။

▪️ ဆေးရုံသို့ အားချင်းပို့ဆောင်ရာမှာ ဆရာဝန်တွေက ဒါဟာ အရယ်လွန်ခြင်း အခြေအနေ ဖြစ်တယ်လို့ ဆိုပါတယ်။

▪️ မစ္စတာ ရှရမ် ဆေးရုံတက်ကုသပြီး မိနစ်အနည်းငယ်အကြာမှာ သတိပြန်ရလာခဲ့ပြီး ဖြစ်ခဲ့တာတွေကို မမှတ်မိဘူးလို့ ဆိုပါတယ်။

▪️ ဒီလိုရှားပါး အခြေအနေက အရယ်လွန်ခြင်း၊ ကြာရှည်စွာ မတ်တပ်ရပ်ခြင်း၊ အလွန်အမင်း အားစိုက်ထုတ်ခြင်းတို့ ပြုလုပ်တဲ့အခါ ဖြစ်ပေါ်တတ်တယ်လို့ ဒေါက်တာကူမာက ပြောပြပါတယ်။

▪️ ဦးနှောက်သို့ သွေးစီးဆင်းမှု‌လျော့နည်းတာမျိုး မဖြစ်စေဖို့ ရေဓာတ်ဖြည့်ပေးရန်၊ မူးဝေတဲ့အခါ လဲလျောင်းနေဖို့ လူနာကို ညွှန်ကြားခဲ့ပါတယ်။

▪️ အလွန်အမင်း ရယ်မောတဲ့အခါ ဦးနှောက်သို့ သွေးရောက်ရှိမှု ရုတ်တရက်လျော့နည်းသွားပြီး ခဏတာသတိလစ်သွားတတ်ပါတယ်။

▪️ ဒီလိုအခြေအနေက သိပ်ပြီးဖြစ်လေ့မရှိဘဲ နှလုံးရောဂါအခံနဲ့ အာရုံကြောပြဿနာ ရှိသူတွေမှာတော့ ဖြစ်တတ်ပါတယ်။

▪️ မူးဝေ ခေါင်းကိုက်တာမျိုး ခံစားရပြီးနောက် သတိလစ်သွားတတ်ပါတယ်။

▪️ ရယ်‌မော‌‌ရင်း‌ ဒီလိုလက္ခဏာတွေကို သတိထားမိတယ်ဆိုရင် ဆက်မရယ်တော့ဘဲ လဲလျောင်းကာ ခြေထောက်တွေကို မြှောက်ပြီး အသက်ပြင်းပြင်း ရှူသင့်ပါတယ်။

#Source: India Today

#World_Health
Published 10 June 2024

▪️ လေယာဥ်ဖြင့်ခရီးရှည် သွားနေစဥ် အယ်ကိုဟောသောက်တဲ့သူတွေမှာ နှလုံးကျန်းမာရေးအန္တရာယ် ရှိတယ်လို့ သုတေသီများ တွေ့ရှိပြီးနောက် လေယာဥ်စီးနေစဥ် အယ်ကိုဟောကို ကန့်သတ်ဖို့ တောင်းဆိုလာကြပါတယ်။

▪️ အယ်ကိုဟော သောက်သုံးခြင်းနဲ့ လေယာဥ်သွားနေတဲ့ အမြင့်ပေရှိ ဖိအားတို့ ပေါင်းစပ်တဲ့အခါ တရေးအိပ်နေတဲ့ ခရီးသည်တွေရဲ့ နှလုံးကို ဆိုးကျိုးဖြစ်စေတယ်လို့ လေ့လာချက်မှာ ဖော်ပြထားပါတယ်။

▪️ ငယ်ရွယ်ကျန်းမာတဲ့ သူတွေမှာပင် သွေးထဲက အောက်ဆီဂျင်နည်းစေကာ နှလုံးခုန်နှုန်းမြန်စေတယ်လို့ ဂျာမနီမှ သုတေသီများ ဆိုပါတယ်။

▪️ အသက်ကြီးပြီး ကျန်းမာရေးပြဿနာများ ရှိပြီးသားသူတွေမှာတော့ အရေးပေါ်အခြေအနေအထိ ဖြစ်နိုင်ပါတယ်။

▪️ အသက် ၁၈ နှစ်မှ ၄၀ အတွင်း လူ ၄၈ ဦးကို စမ်းသပ်ခဲ့ကြပါတယ်။

▪️ လူတစ်ဝက်ကို သာမန်ဖိအားရှိတဲ့ ဓာတ်ခွဲခန်းထဲမှာ အိပ်စေပြီး နောက်တဝက်ကိုတော့ လေယာဥ်ပျံသန်းစဥ် အမြင့်ပေမှာရှိတဲ့ ဖိအားအတိုင်း ဖန်တီးထားတဲ့ အခန်းထဲမှာ အိပ်စေခဲ့ပါတယ်။

▪️ တစ်ညကိုတော့ ဒီအတိုင်းအိပ်စေပြီး နောက်တစ်ညကိုတော့ အယ်ကိုဟော သောက်ပြီးမှ အိပ်စေပါတယ်။

▪️ အသင့်အတင့် အယ်ကိုဟော သောက်သုံးခြင်းနဲ့ လေယာဥ်စီးနေစဥ် အချိန်တို့ဟာ နှလုံးခုန်နှုန်းမြန်စေပြီး သွေးတွင်းအောက်ဆီဂျင် နည်းပါးနေပါတယ်။

▪️ အဆိုပါ ၂ ချက်စလုံးကို ပေါင်းစပ်သွားတဲ့အခါ သက်ရောက်မှုတွေက ပိုမိုမြင့်မားလာပါတယ်။

▪️ နှလုံးသွေးကြောစနစ်ကို ဖိအားသက်ရောက်စေပြီး နှလုံးနဲ့ အဆုတ်ရောဂါလက္ခဏာ ရှိသူတွေမှာ ပိုမိုဆိုးရွားလာနိုင်ဖွယ် ရှိတယ်လို့ ဖော်ပြထားပါတယ်။

▪️ အသက်ရှူလမ်းကြောင်းဆိုင်ရာ ပြဿနာရှိသူတွေမှာ လေယာဥ်မစီးခင် ၁၂ နာရီအလိုနဲ့ စီးနေစဥ်အချိန်တို့မှာ အရက်ရှောင်ရှားသင့်တယ်လို့ အကြံပြုထားပါတယ်။

▪️ ဒီကျန်းမာရေး ပြဿနာများနဲ့ ပတ်သက်ပြီး ခရီးသည်များနဲ့ လေယာဥ်ဝန်ထမ်းများကို အသိပေးသင့်တယ်လို့ ဆိုပါတယ်။

#Source: New York Post

၉ ဇွန် ၂၀၂၄

မြန်မာနိုင်ငံမှာ ထိုင်းကွန်ဒိုဝယ်ယူမှုတွေအပေါ် ဖမ်းဆီးအရေးယူနေတဲ့ အတွက် ထိုင်းနိုင်ငမှာ ယခုနှစ်ဒုတိယနှင့် တတိယ လေးလပတ်ကာလတွေမှာ ကွန်ဒိုအဝယ်သိသိသာသာကျဆင်းသွားလိမ့်မယ်လို့ ထိုင်း ကွန်ဒိုမီနီယမ်အသင်းကပြောကြောင်း ဘန်ကောက်ပို့စ်သတင်းအရသိရပါတယ်။

မြန်မာအစိုးရရဲ့ဖမ်းဆီးအရေးယူမှုတွေကြောင့် ဧပြီလနှင့်မေလတွေမှာ ဘတ်ငွေ တစ်ဘီလျံကျော်တန်ကွန်ဒိုတွေတွေ မြန်မာနိုင်ငံက ဝယ်လက်တွေဝယ်ကြတာ ပိတ်သွားတယ်လို့  အဲဒီအသင်းဥက္ကဋ္ဌ ပရာဆတ်တရက်ဒူလာယာဆာတစ်က ပြောပါ  တယ်။

“ ထိုင်းကွန်ဒိုတွေဝယ်ကြတဲ့ နိုင်ငံခြားဝယ်လက်တွေကြားထဲမှာ မြန်မာဟာ ထွန်းသစ်စဈေးကွက်တစ်ခုဖြစ်နေတဲ့အတွက် အဲဒီနှိမ်နှင်းအရေးယူမှုတွေကြောင့် မြန်မာတွေ ဝယ်ဖို့ခက်ခဲသွားလိမ့်မယ်။ ဒုတိယနှင့်တတိယလေးလပတ်မှာ ကွန်ဒိုအရောင်း အပေါ် သိသိသာသာ အကျိုးဆက်ဖြစ်မှာ အသေအချာပဲ” လို့သူကပြောပါတယ်။

တရုတ်ရဲ့ကွန်ဒိုအဝယ်တွေကျဆင်းလာနေတဲ့အချိန်မှာ တိုးတက်လာနေတဲ့မြန်မာတွေရဲ့ ကွန်ဒိုဝယ်ယူမှု  အရေအတွက်   နှင့်တန်ဖိုးကို ကျွန်တော်တို့လျစ်လျူရှုလို့ကိုမရဘူး လို့လည်း သူကဆက်ပြောပါတယ်။

မြန်မာနိုင်ငံသားတွေဟာ ထိုင်းကွန်ဒိုတွေကို ၂၀၂၂ခုနှစ်ကစတင်ဝယ်ယူလာကြတာဖြစ်ပြီး ထိပ်တန်း၁၀နိုင်ငံအပြင်ဘက် ကနေ ထိပ်တန်းငါးနိုင်ငံစာရင်းထဲ ဝင်လာတာဖြစ်တယ်လို့ ထိုင်းနိုင်ငံအိမ်ခြေံမြေသတင်းအချက်အလက်စင်တာမှ သိရပါ တယ်။

၂၀၂၂ခုနှစ်မှာ မြန်မာဟာ ကွန်ဒိုဝယ်ယူမှု အရေအတွက်အရ အဆင့် (၆)နှင့် တန်ဖိုးအရ အဆင့်(၃)ရခဲ့ပါတယ်။ စုစုပေါင်း တန်ဖိုး ၂.၅၅ ဘီလျံဘတ်ရှိတဲ့ ကွန်ဒိုပေါင်း ၃၄၉ ခန်း ဝယ်ခဲ့ကြပါတယ်။ ၂၀၂၃မှာ မြန်မာဟာ အဆင့်(၄)ရောက်လာပြီး စုစုပေါင်း တန်ဖိုး ၃.၇ ဘီလျံဘတ်ငွေရှိတဲ့ ကွန်ဒိုပေါင်း ၅၆၄ ခန်းဝယ်ခဲ့ကြပါတယ်။

ယခုနှစ်မှာ မြန်မာဈေးကွက်ဟာ ဆက်လက်တိုးတက်လာခဲ့ပြီး ပထမလေးလပတ်မှာ အဆင့် (၂) ရောက်လာပါတယ်။ တန်ဖိုး ၂.၂ ဘီလျံဘတ်ငွေရှိတဲ့ ကွန်ဒိုပေါင်း ၃၉၂ခန်းဝယ်ခဲ့ကြပါတယ်လို့ သတင်းမှာဖော်ပြထားပါတယ်။

၂၀၂၂-၂၀၂၃မှာ မြန်မာတွေကွန်ဒိုဝယ်ကြတာဟာ နိုင်ငံခြားသားစုစုပေါင်းဝယ်ကြတာရဲ့ ၃ရာခိုင်နှုန်းနှင့် ၄ရာခိုင်နှုန်း အကြားသာရှိခဲ့ရာမှ အရေအတွက်အရေ ၁၀ရာခိုင်နှုန်းနှင့် တန်ဖိုးအရ ၁၂ ရာခိုင်နှုန်းအထိ အချိုးအစားမြင့်တက်ခဲ့ပါတယ်။

“ မြန်မာနိုင်ငံကအဝယ်တွေဟာ ၂၀၂၁ ခုနှစ် နိုင်ငံရေးပြဿနာတွေစကတည်းက တိုးလာခဲ့တာပါ။ မကြာသေးခင်က တောင်  မြန်မာတွေရဲ့ ကွန်ဒိုအဝယ်ဟာ စုစုပေါင်းရဲ့ တစ်ဝက်ရှိတယ်လို့ အချို့ ဆောက်လုပ်ရေးကုမ္ပဏီတွေကပြောကြတယ်” လို့ အိမ်ခြံမြေသတင်းအချက်အလက်စင်တာ ခေတ္တ ညွှန်ချုပ် ဗီချိုင်း ဗီရက်ကာပန်က ပြောပါတယ်။

မြန်မာတွေအကြိုက်အတွေ့ဆုံးက မဟာဘန်ကောက်ဧရိယာဖြစ်ပြီး တစ်နှစ်တစ်နှစ်မှာ မြန်မာတွေကို ကွန်ဒိုရောင်းရတာ မြင့်တက်လာပြီး ၂၀၂၄ ပထမလေးလပတ်မှာ တန်ဖိုး ၂.၁ဘီလျံဘတ်ရှိတဲ့ အခန်းပေါင်း ၃၆၆ ခန်းရောင်းရပြီး အရေအတွက် အားဖြင့် ၄၄၆ ရာခိုင်နှုန်းနှင့် တန်ဖိုးအားဖြင့် ၃၃၃ ရာခိုင်နှုန်းမြင့်တက်ခဲ့တာဖြစ်ပါတယ်။

“ မြန်မာဝယ်လက်တွေကို ပစ်မှတ်ထားနေတဲ့ ကွန်ဒိုရောင်းကုမ္ပဏီတွေဟာ ထိုင်းနိုင်ငံမှာ အိမ်အရောင်းပြပွဲတွေဘက် အာရုံစူးစိုက်သင့်တယ်” လို့ မစ္စတာ ပရာဆတ်ကပြောပါတယ်။ “ သူတို့ဟာ နိုင်ငံခြားငွေအလွှဲအပြောင်းကို အချိန်ယူလုပ်  ကြရတော့ မှာမို့ အသင့်နေကွန်ဒိုတွေထက် ကြိုပွိုင့်တွေဘက် ပြောင်းသွားလိမ့်မယ်” လို့ သူကပြောပါတယ်။

“ ထိုင်းကွန်ဒိုတွေကို ဝယ်ယူရာမှာ ငွေအပြည့် မထုတ်ယူရသေးတဲ့ ကြိုပွိုင့်ဝယ်ထားသူတွေနှင့် ဝယ်လက်အသစ်တွေကို အကျိုးသက်ရောက်မှုရှိလိမ့်မယ်”လို့ မစ္စတာဒီအင်န်အေအိမ်ခြံမြေကုမ္ပဏီအကြံပေး နှင့် မန်နေးဂျင်းဒါရိုက်တာ  ဆူရာချက် ကွန်ချိက ပြောပါတယ်။

အဲဒီလိုဝယ်ထားသူတွေဟာ ပိုက်ဆံပြန်ထုတ်ဖို့ အခြားနည်းလမ်း သို့မဟုတ် လမ်းကြောင်းရှာထားဖို့လိုတယ်။ဒီလိုမလုပ် နိုင်ရင် ပြန်ညှိနှိုင်းရတာတွေနှင့် လိုအပ်ရင် ဖျက်သိမ်းရတာတွေအထိရှိလာနိုင်တယ်” လို့ မစ္စတာ ဆူရာချက်က ဆက်ပြောပါတယ်။

Source BKK Post