#LocalNews
Published - 4 April 2022

ရန်ကုန်တိုင်းဒေသကြီး၊ တောင်ပိုင်းခရိုင်၊ ကွမ်းခြံကုန်းမြို့နယ်အတွင်းကျရောက်နေတဲ့ ဧရိယာအကျယ်အဝန်း ၉,၂၇၄ ဒဿမ ၃၈ ဧက ရှိတဲ့နယ်မြေကို အစိမ်းရောင်တံတိုင်း ဒီရေတောကြိုးပြင်ကာကွယ်တောအဖြစ် သတ်မှတ်လိုက်တယ်လို့ သိရပါတယ်။

သယံဇာတနှင့် သဘာဝပတ်ဝန်းကျင်ထိန်းသိမ်းရေးဝန်ကြီးဌာနက ဧပြီ ၁ ရက်နေ့စတင်ပြီး အစိမ်းရောင်တံတိုင်း ဒီရေတောကြိုးပြင်ကာကွယ်တောအဖြစ် သတ်မှတ်လိုက်တာပါ။

ဒီရေတောကြိုးပြင်ကာကွယ်တော သတ်မှတ်ကာကွယ်ထိန်းသိမ်းလိုက်တဲ့အတွက် ဒီရေတောတွေ စနစ်တကျ စီမံအုပ်ချုပ်နိုင်တာ အစိမ်းရောင်သဘာဝတံတိုင်းတစ်ခုအဖြစ် ဒီရေတောများ ပေါ်ထွက်လာတာ သစ်တောပြုန်းတီးမှုထိန်းသိမ်းကာကွယ်နိုင်တာ သစ်တောဖုံးလွှမ်းမှုတွေ တိုးပွါးလာပြီး ဂေဟစနစ်ဝန်ဆောင်မှုတွေတိုးပွါးလာတာနဲ့ ရာသီဥတုသာယာမျှတာတွေ အပြင် သား၊ ငါး၊ ပုစွန်များ ပေါကြွယ်ဝပြီး ဒေသခံပြည်သူတွေအတွက် သစ်၊ ထင်း လိုအပ်ချက်တွေ ဖြည့်ဆည်းပေးနိုင်တာ စတဲ့အကျိုးကျေးဇူးများစွာ ရရှိနိုင်မှာဖြစ်လို့ ဒီရေတောကြိုးပြင်ကာကွယ်တောအဖြစ် သတ်မှတ်ကြေညာလိုက်တာ ဖြစ်ပါတယ်။

အစိမ်းရောင်တံတိုင်းဒီရေတောကြိုးပြင်ကာကွယ်တော ဧရိယာအတွင်း ဒီရေတောအပင် မျိုးစိတ်တွေဖြစ်တဲ့ သမဲ့၊ ကန့်ပလာ၊ ဗြူးခြေထောက်၊ ဗြူးအုပ်ဆောင်း၊ လမု၊ ကနစို၊ ကျနပင် များပေါက်ရောက်ပြီး ငါး၊ ပုစွန်၊ ကဏန်းတို့ပေါက်ဖွါးရာ နေရင်းဒေသများလည်းဖြစ်ပြီး ငှက်ကြီး ဝံဗို၊ ငှက်ကျား၊ မယ်သူတော်၊ ဗျိုင်း စတဲ့ ရေပျော်ငှက်များ ကျက်စားရာဒေသလည်း ဖြစ်ပါတယ်။

အစိမ်းရောင်တံတိုင်းဒီရေတောကြိုးပြင်ကာကွယ်တောကို ဒေသတွင်းရှိ ရေမြေသဘာဝနဲ့ ရာသီဥတုကို မျှတစေဖို့ ဇီဝမျိုးစုံနဲ့ ဂေဟစနစ်ကို ရေရှည်တည်တံ့စေရန်၊ ဒေသစိမ်းလန်း စိုပြည်ရေးနဲ့ သဘာဝပတ်ဝန်းကျင်ကို အထောက်အကူပြုနိုင်ရန်၊ ပင်လယ်ကမ်းရိုးတန်း တလျှောက်တွင်ရှိသော ကျေးရွာများကို လေမုန်တိုင်းတိုက်ခတ်ခြင်း၊ ဒီရေလှိင်းရိုက်ခတ်ခြင်း စတဲ့သဘာဝဘေးအန္တရာယ်များဘေးမှ ဒီရေတောအပင်များနဲ့ တံတိုင်းကြီးတစ်ခုသဖွယ် ကာကွယ်တားဆီးနိုင်ဖို့ ရည်ရွယ်ပါတယ်။

ဒီရေတောနယ်နိမိတ်အတွင်း သစ်တော၊ ရေ၊ မြေ၊ သားငှက်တိရစ္ဆာန်တွေအတွက် ဘေးကင်းလုံခြုံပြီး တည်ငြိမ်သောဂေဟစနစ်ကို ဖြစ်ပေါ်လာစေဖို့နဲ့ ဒေသခံပြည်သူတွေရဲ့ လူမှုစီးပွါးဘဝဖွံ့ဖြိုးတိုးတက်လာနိုင်ဖို့ ရည်ရွယ်ပြီး ဒီရေတောကြိုးပြင်ကာကွယ်တောအဖြစ် သတ်မှတ်လိုက်တာလို့ သိရပါတယ်။

ymg/ei
#Yagon_Media_Group

#DailyNews
Published -4 April 2022

၁။ မြန်မာနိုင်ငံအတွင်း ငါးသလောက်ထိန်းသိမ်းဧရိယာရေပြင် ၆ သိန်းကျော် သတ်မှတ်ထိန်းသိမ်း

၂။ ရွှေလီ-ကျယ်ဂေါင်မြို့များကို ရောဂါကူးစက်မှုအနိမ့်ဆုံးဇုန်အဖြစ် တရုတ်အာဏာပိုင်များသတ်မှတ်

၃။ မိုးလေဝသ သတင်း

၄။ အသက်၇၀အရွယ် ပြင်သစ်မတောင်တက်သမားကြီး ဧဝရတ်တောင်ကိုလမ်းကြောင်းအသစ်မှတက်ရောက်၍ စံချိန်တင်နိုင်ရန်ကြိုးစားသွားမည်...အစရှိတဲ့သတင်းတွေကို တင်ဆက်ပေးသွားမှာ ဖြစ်ပါတယ်။

#Yangon_Media_Group

#LocalNews
Published_4 April 2022

ပြည်ပမှဝင်လာသည့် နိုင်ငံခြားငွေများကို တစ်ရက်အတွင်း မြန်မာကျပ်ငွေဖြင့် လဲလှယ်ရောင်းချပေးရမည်ဟု မြန်မာနိုင်ငံတော်ဗဟိုဘဏ်က ဧပြီလ ၃ ရက်က အမိန့်ကြော်ငြာစာ ထုတ်ပြန်လိုက်သည်။

နိုင်ငံခြားသုံးငွေစီမံခန့်ခွဲမှုဥပဒေ ပုဒ်မ ၁၁ ၊ ပုဒ်မ ၁၂ ၊ ပုဒ်မ ၁၃ ပါ သတ်မှတ်ပြဌာန်းချက်များအရ ပြည်တွင်း၌နေထိုင်သူများ၏ ပြည်ပမှ နိုင်ငံခြားသုံးငွေဖြင့်ရရှိသော ဝင်ငွေများကို မြန်မာနိုင်ငံအတွင်း ပြန်လည်ပေးပို့ပြီး နိုင်ငံခြားသုံးငွေများရောင်းဝယ်ဖောက်ကားသည့်လုပ်ငန်း AD လိုင်စင်ရဘဏ်များတွင် နိုင်ငံခြားငွေစာရင်းဖွင့်လှစ်ကာ အလုပ်လုပ်ရက်တစ်ရက်အတွင်း မြန်မာကျပ်ငွေဖြင့် လဲလှယ်ရောင်းချရမည်ဖြစ်ကြောင်း ယင်းတွင် ဖော်ပြထားသည်။

အဆိုပါ အမိန့်ကြော်ငြာစာညွှန်ကြားချက်မှာ ဧပြီလ ၃ ရက်မှ စတင်အကျိုးသက်ရောက်မည် ဖြစ်ပြီး ယင်းရက်မတိုင်မီ ဝင်ရောက်ထားသော နိုင်ငံခြားသုံးငွေကိုလည်း ယခုညွှန်ကြားချက်အတိုင်း ဆောင်ရွက်ရမည်ဖြစ်ကြောင်းနှင့် ကင်းလွတ်ခွင့်ပြုမည့် ကိစ္စရပ်များပေါ်ပေါက်ပါက သီးခြားထုတ်ပြန် ဆောင်ရွက်ပေးမည်ဖြစ်ကြောင်း ယင်းအမိန့်ကြော်ငြာစာညွှန်ကြားချက်တွင် ထည့်သွင်းရေးသားထားသည်။

မြန်မာနိုင်ငံတော်ဗဟိုဘဏ်အနေဖြင့် နိုင်ငံခြားသုံးငွေစီမံခန့်ခွဲမှုဥပဒေ ပုဒ်မ ၄၉ ပုဒ်မခွဲ(ခ)အရ အပ်နှင်းထားသော လုပ်ပိုင်ခွင့်ကိုကျင့်သုံး၍ ဤအမိန့်ကြော်ငြာကို ထုတ်ပြန်ခြင်းဖြစ်ပြီး၂၀၂၁ ခုနှစ် အောက်တိုဘာလ ၃ ရက်တွင် ထုတ်ပြန်ခဲ့သော ပို့ကုန်ရငွေတွေကို ရက် ၃၀ အတွင်း AD လိုင်စင်ရ ဘဏ်များထံ ဈေးကွက်ပေါက်ဈေးအတိုင်း ရောင်းချရမည်ဆိုသည့် ညွှန်ကြားချက်အမိန့်စာကို ပယ်ဖျက်လိုက်ခြင်းဖြစ်ကြောင်းလည်း ဖော်ပြထားသည်။

AD လိုင်စင်ရဘဏ်များအနေဖြင့် ပြည်ပက နိုင်ငံခြားသုံးငွေဖြင့် ဝင်ရောက်သော ကုန်သွယ်မှုမှရငွေ၊ ကုန်သွယ်မှုမဟုတ်သော ရငွေတွေကို မြန်မာကျပ်ငွေအဖြစ် ပြောင်းလဲရာတွင် အမေရိကန်တစ်ဒေါ်လာလျှင် မြန်မာငွေ ၁,၈၅၀ ကျပ်ဖြင့် လဲလှယ်ပေးရမည် ဖြစ်ကြောင်း သိရသည်။

ymg/mt
#Yangon_Media_Group

#Local_News
Published_ 4 April 2022

တောင်ကိုရီးယားနိုင်ငံက ဧပြီ ၄ ရက်တွင် မြန်မာလုပ်သား ၉၈ ဦးအားခေါ်ယူခဲ့ကြောင်း ဆိုလ်းမြို့ရှိ မြန်မာသံရုံးက သတင်းထုတ်ပြန်ထားပါတယ်။

ကိုဗစ်-၁၉ ရောဂါပြန့်ပွားခြင်းကို ကာကွယ်ထိန်းချုပ်နိုင်ရန်အတွက် ၂၀၂၁ ခုနှစ်၊ ဇွန်လ (၁) ရက်နေ့မှစ၍ တောင်ကိုရီးယားနိုင်ငံက ပြည်ဝင်ခွင့်ပိတ်ပင်ထားခဲ့သော်လည်း မြန်မာလုပ်သားများကို ခေါ်ယူနေတာဖြစ်ပါတယ်။

ဒီကနေ့ ရောက်ရှိသူများတွင် Re-entry လုပ်သား ၂၈ ဦး၊ ကုန်ထုတ်လုပ်သားအဖြစ် ဝင်ရောက်လုပ်ကိုင်မည့်လုပ်သားသစ် ၃၆ ဦး၊ ဆောက်လုပ်ရေးလုပ်သားသစ် ၃၄ ဦး၊ စုစုပေါင်း ၉၈ ဦးတို့သည် ရန်ကုန်အပြည်ပြည်ဆိုင်ရာလေဆိပ်မှ အင်ချွန်းအပြည်ပြည် ဆိုင်ရာလေဆိပ်သို့ ရောက်ရှိခဲ့တယ်လို့ တောင်ကိုရီးယားနိုင်ငံဆိုင်ရာ မြန်မာသံရုံးက သတင်းထုတ်ပြန်ထားပါတယ်။

မြန်မာသံရုံး၊ ဆိုးလ်မြို့မှ အလုပ်သမားသံအရာရှိက မြန်မာလုပ်သားများအား ကြိုဆို၍ အလုပ်သမားများ သိရှိလိုက်နာသင့်သည့် အချက်များကိုမှာကြားခဲ့ပြီး လိုအပ်သည်များ ကူညီပံ့ပိုးပေးခဲ့တယ်လို့ သတင်းထုတ်ပြန်ချက်မှာ ဖော်ပြထားပါတယ်။

ymg-mnn
#Yangon_Media_Group

Published 4 April 2022

ထိုင်းနိုင်ငံတွင် ပထမဆုံးတွေ့ရှိသော အိုမီခရွန် XEကိုဗစ်-၁၉ မျိုးဗီဇကွဲနှင့်ပတ်သက်ပြီး ထိတ်ထိတ်ပျာပျာမဖြစ်ကြဖို့ အစိုးရ ပြည်သူ့ကျန်းမာရေးဝန်ကြီးဌာနက ပြောကြားလိုက်ပါတယ်။ ဒါဟာ အရင်သန္ဓေပြောင်းတွေလိုပဲ ရောဂါသစ်တွေထပ်ဖြစ်လိမ့် မယ်လို့ မယုံကြည်ရဘူးလို့လည်း ပြောပါတယ်။

ရာမသီဘိုဒီဆေးရုံက လူနာတစ်ဦးကို XEကူးစက်ခံထားရတာတွေ့ရှိခဲ့ရတာဖြစ်ပြီး  အဲဒီလူနာဟာ ယခု အပြည့်အဝပြန်လည် ကောင်းမွန်သွားပြီလို့ အဲဒီဆေးရုံရဲ့ Centre for Medical Genomics (CMG) ဌာနမှူးက ပြောပါတယ်။

XEဟာ အိုမီခရွန်ကနေထပ်ခွဲလာတဲ့  BA.1 နှင့်  BA.2  တို့ပေါင်းစပ်မိသွားပြီး ထပ်ပေါ်လာတဲ့ မျိုးခွဲဖြစ်ပါတယ်။ XE ကူးစက်ခံရတဲ့ လူနာတစ်ဦးတွေ့ရတဲ့အကြောင်း CMG က စနေနေ့ သတင်းထုတ်ပြန်ပေးခဲ့တာပါ။

ကမ္ဘာ့ကျန်းမာရေးအဖွဲ့ကလည်း  XEအိုမီခရွန် မျိုးခွဲနှင့်ပတ်သက်ပြီး စနေနေ့က  သတိပေးချက်တစ်ရပ်ထုတ်ပြန်ခဲ့ပါတယ်။ ယင်းဟာ လက်ရှိမှာ ကူးစက်မှုအမြန်ဆုံး မျိုးခွဲဖြစ်နေတယ်လို့ ကမ္ဘာ့ကျန်းမာရေးအဖွဲ့ကပြောပါတယ်။

XE ကို ယူကေမှာ ဇန်နဝါရီ၁၉ရက်က ပထမဆုံးတွေ့ရှိခဲ့ရပြီး ယခုထက်ထိကူးစက်မှု ၆၀၀အောက်ပဲရှိသေးတယ်လို့ ကမ္ဘာ့ကျန်းမာရေးအဖွဲ့က ပြောဆိုထားပါတယ်။

ကူးစက်ခံရပြီ့း တစ်ပတ်လောက်ကြာမှ စစ်ဆေးမယ့် ဗိုင်းရပ်စ်နမူနာက ပုံမှန်အားဖြင့် ရရှိလေ့ရှိတာကြောင့် အဖြေသိရတဲ့အချိန်မှာ လူနာအများစုဟာ နေကောင်းသွားကြပြီဖြစ်တယ်လို့ CMG ဌာနမှူး ဝါဆွန်ချန်တရက်တီတာက ပြောပါတယ်။

XEဟာ လက်ရှိကူးစက်မှုအမြန်ဆုံးဖြစ်တဲ့ B.A2 ထက် ကူးစက်မှုနှုန်း ၁၀ရာခိုင်နှုန်းပိုမြန်တယ်လို့ ကမ္ဘာ့ကျန်းမာရေးအဖွဲ့ကပြောထားပါတယ်။

Source BK Post

#LocalNews
Published - 4 April 2022

မြန်မာ- တရုတ်နယ်စပ်ကုန်သွယ်မှုမှာ ယွမ်/ ကျပ် တိုက်ရိုက်အသုံးပြုပေးချေသုံးစွဲခွင့်ကို မြန်မာနိုင်ငံဗဟိုဘဏ်က ဘဏ် လေးဘဏ်ကို ထပ်မံခွင့်ပြုလိုက်တယ်လို့ သိရပါတယ်။

ထပ်မံခွင့်ပြုလိုက်တဲ့ ဘဏ် ၄ ဘဏ်မှာ CB Bank PCL၊ ဧရာဝတီဘဏ်၊ ယူအေဘီဘဏ်၊ မြန်မာ့ရှေ့ဆောင်ဘဏ် တို့မှာ ယွမ်/ ကျပ် တိုက်ရိုက်အသုံးပြုမှုကို ထပ်မံခွင့်ပြုလိုက်တယ်လို့နေပြည်တော်မှာ ကျင်းပတဲ့ ယွမ်/ကျပ် တိုက်ရိုက်အသုံးပြုပေးချေသုံးစွဲနိုင်ရေး ညှိနှိုင်းအစည်းအဝေးက သိရပါတယ်။

မြန်မာနိုင်ငံဗဟိုဘဏ်က ယွမ်/ ကျပ် တိုက်ရိုက်အသုံးပြုပြီး ဘဏ်လမ်းကြောင်းအသုံးပြုပေးချေနိုင်ဖို့ Bank of China Hong Kong Limited, Yangon Branch, Industrial and Commercial Bank of China Limited, Yangon Branch ကို အရင်က ခွင့်ပြုခဲ့ပါတယ်။

တရုတ်-မြန်မာ နယ်စပ်ကုန်သွယ်ရေးမြို့တွေမှာ ဘဏ်ခွဲရှိတဲ့ ပုဂ္ဂလိကဘဏ်တွေကို နိုင်ငံခြားသုံးငွေရောင်းဝယ်ဖောက်ကားခွင့် လိုင်စင်ရပုဂ္ဂလိကဘဏ်တွေကို ခွင့်ပြုခဲ့တာဖြစ်တယ်လို့ သိရပါတယ်။

ymg/ei
#Yangon_Media_Group

#WorldTechnology
Published - 04 April 2022

ကမ္ဘာ့အကြီးမားဆုံးခရီးသည်ပို့ ဆောင်ရေးလေကြောင်းလိုင်းက ဟင်းချက်ဆီလောင်စာအသုံးပြုပြီး ပထမဆုံးအကြိမ် ၃ နာရီခရီးကို အောင်မြင်စွာပျံသန်းနိုင်ခဲ့ပါတယ်။ပြီးခဲ့တဲ့အပတ်သောကြာနေ့က Airbus A380 superjumbo လေယာဉ်အမျိုးအစားရဲ့ စမ်းသပ်ပုံစံလေယာဉ်ကို သဘာဝလေယာဉ်လောင်စာ ၂၇ တန်ဖြည့်တင်ပြီး တူးလော့စ်မြို့ ဘလက်ညက်လေဆိပ်မှထွက်ခွာကာ နိုက်စ်မြို့သို့ ဆိုက်ရောက်ခဲ့ပါတယ်။

ဒါဟာ သဘာဝလေယာဉ်လောင်စာဖြင့် ၁၀၀ ရာခိုင်နှုန်းအပြည့်မောင်းနှင်တဲ့ ပထမဆုံး A380 လေယာဉ်အမျိုးအစားဖြစ်ကာ Airbus လေကြောင်းလိုင်းမှ ပြီးခဲ့တဲ့နှစ်အတွင်း တတိယအကြိမ်မြောက် အောင်မြင်စွာစမ်းသပ်မောင်းနှင်နိုင်ခဲ့တာလည်းဖြစ်ပါတယ်။

၂၀၃၀ ခုနှစ်မှာ လေယာဉ်တွေအနေနဲ့ သဘာဝလေယာဉ်လောင်စာ ၁၀ ရာခိုင်နှုန်းအသုံးပြုရမယ်လို ယူကေအစိုးရအဖွဲကသတ်မှတ်ထားပြီး အဆိုပါလေကြောင်းလိုင်းက ၂၀၅၀ ခုနှစ်မှာ ကာဗွန်ထုတ်လွှတ်မှု ပပျောက်အောင်ဆောင်ရွက်ဖို့ ကတိပြုထားပါတယ်။

သဘာဝလေယာဉ်လောင်စာဟာ ကာဗွန်ဒိုင်အောက်ဆိုဒ်ထုတ်လွှတ်မှုကို ၈၀ ရာခိုင်နှုန်းလျှော့ချနိုင်ပြီး စွန့်ပစ်ဆီများ၊ အမှိုက်စွန့်ပစ်ပစ္စည်းများနဲ့ ကုန်ကြမ်းရိတ်သိမ်းပစ္စည်းများမှ ထုတ်လုပ်ထားတာဖြစ်ပါတယ်။

ဂျက်အင်ဂျင်အသစ်တွေက သဘာဝလောင်စာ ၅၀ ရာခိုင်နှုန်းသယ်ဆောင်နိုင်ပြီး ၂၀၂၃ ခုနှစ်မှာ ၁၀၀ ရာခိုင်နှုန်းအသုံးပြုနိုင်မယ့် ထရန့်အင်ဂျင်တွေရရှိနိုင်မှာဖြစ်ကြောင်း ရိုးလ်စ်ရွိက်စ်ကုမ္ပဏီက ပြောကြားလိုက်ပါတယ်။

မတ်လ ၂၅ ရက်နေ့ကစမ်းသပ်မောင်းနှင်ခဲ့တဲ့ A380 စမ်းသပ်လေယာဉ်ရဲ့ ရိုးလ်စ်ရွိက်စ်ထရန့် ၉၀၀ အင်ဂျင်ဟာ သဘာဝလေယာဉ်လောင်စာ ၁၀၀ ရာခိုင်နှုန်းအသုံးပြုထားတာဖြစ်ပါတယ်။

ဒီစမ်းသပ်မှုကို TotalEnergies လောင်စာဆီကုမ္ပဏီက နော်မန်ဒီဒေသမှာပြုလုပ်ခဲ့တာဖြစ်ပါတယ်။ ဒါဟာ ၁၂ လအတွင်း Airbus လေကြောင်းလိုင်းမှလေယာဉ်များ သဘာဝလောင်စာ ၁၀၀ ရာခိုင်နှုန်းဖြင့် စမ်းသပ်မောင်းနှင်တဲ့ တတိယမြောက်လေယာဉ်ဖြစ်ပါတယ်။

၂၀၂၁ မတ်လတုန်းက ပထမဆုံးလေယာဉ်အဖြစ် A350 နဲ့စမ်းသပ်ပျံသန်းခဲ့ပြီး ၂၀၁၂ အောက်တိုဘာလမှာ A319neo လေယာဉ်နဲ့စမ်းသပ်ခဲ့ပါတယ်။ သဘာဝလေယာဉ်လောင်စာဖြင့် ကာဗွန်ထုတ်လွှတ်မှု ၆၅ ရာခိုင်နှုန်းလျှော့ချနိုင်မယ်လို့ လေကြောင်းလိုင်းကခန့်မှန်းထားပါတယ်။

ဒါပေမဲ့ သဘာဝလေယာဉ်လောင်စာထုတ်လုပ်မှုက သမားရိုးကျလေယာဉ်လောင်စာထက် ၅ ဆမျှပိုမိုကုန်ကျတာကြောင့် လက်ရှိတစ်ကမ္ဘာလုံးကလေယာဉ်လောင်စာအသုံးပြုမှုမှာ ၁ ရာခိုင်နှုန်းသာရှိပါသေးတယ်။

သဘာဝလောင်စာထုတ်လုပ်ရေးကဏ္ဍကနေ ၂၀၃၀ နှစ်ဝက်လောက်မှာ အလုပ်အကိုင်ပေါင်း ၆,၅၀၀ ဖန်တီးပေးနိုင်မှာဖြစ်ပြီး စီးပွားရေးအရ ယူရိုသန်း ၉၀၀ အကျိုးအမြတ်ရလာနိုင်ကြောင်း ယူကေအစိုးရအဖွဲ့ က ခန့်မှန်းထားပါတယ်။

၂၀၂၅ မှ ၂၀၃၀ ခုနှစ်ဝန်းကျင်အတွင်း လေယာဉ်တွေနဲ့အင်ဂျင်တွေမှာ သုံးစွဲနေကျကျောက်ဖြစ်ရုပ်ကြွင်းလောင်စာတွေ အသုံးမပြုဖို့ အစီအစဉ်တွေ ချမှတ်နေပြီဖြစ်ပါတယ်။
Source: Dailymail 

#WorldPolitics
Published - 04 April 2022
ရုရှားနိုင်ငံမှ သဘာဝဓာတ်ငွေ့ဝယ်ယူခြင်းအတွက် ရုရှားငွေရူဘယ်လ်ဖြင့်ပေးချေဖို့ ရုရှားသမ္မတ'ဗလာဒီမီယာပူတင်'သတ်မှတ်ခဲ့ခြင်းဟာ ရှေ့ပြေးပုံစံတစ်ခုဖြစ်ပြီး အခြားအဓိကတင်ပို့ကုန်များကိုလည်း ရူဘယ်လ်ဖြင့်ပေးချေခိုင်းဖို့ ဆောင်ရွက်သွားမှာဖြစ်ကြောင်း ရုရှားတို့ကသတိပေးလိုက်ပါတယ်။

အနောက်နိုင်ငံက အမေရိကန်ဒေါ်လာတန်ဖိုးကျဆင်းလာခြင်းကို ထိန်းချုပ်နိုင်ဖို့ အတွက် ရုရှားပိုင်စီးပွားရေးအစိတ်အပိုင်းများကို ရပ်ဆိုင်းလိုက်ပါတယ်။

ဖေဖော်ဝါရီ ၂၄ ရက်နေ့က ယူကရိန်းကိုကျူးကျော်ခဲ့တာကြောင့် ရုရှားကို အမေရိကန်နဲ့မဟာမိတ်နိုင်ငံများက စီးပွားရေးဒဏ်ခတ်ပိတ်ဆို့ မှုများ ပြင်းပြင်းထန်ထန်ချမှတ်ခဲ့တာကြောင့် ၁၉၉၁ ခုနှစ် ဆိုဗီယက်ပြည်ထောင်စုပြိုကွဲပြီးနောက်ပိုင်း ရုရှားစီးပွားရေးအဆိုးရွားဆုံးအခြေအနေ ရောက်ရှိနေတာဖြစ်ပါတယ်။

ကျဆင်းလာတဲ့စီးပွားရေးအဖတ်ဆယ်ဖို့ အတွက် 'ပူတင်'က ရုရှားမှဓာတ်ငွေ့များဝယ်ယူမှုအတွက် ရုရှားငွေရူဘယ်လ်ဖြင့်ပေးချေရမယ်လို့ မတ်လ ၂၃ ရက်နေ့က အမိန့်ချလိုက်ပါတယ်။

ဒါပေမဲ့လည်း ဝယ်ယူသူတွေက စာချုပ်ပါငွေကြေးအချက်အလက်အတိုင်း ဆက်လက်ဝယ်ယူနိုင်ပြီး ပေးချေလာတဲ့ငွေတွေကို ရုရှားပိုင် Gazprom ကုမ္ပဏီက ရူဘယ်လ်အဖြစ်ပြောင်းလဲပေးလိုက်တာဖြစ်ပါတယ်။

ဓာတ်ငွေ့ဝယ်ယူခြင်းအတွက် ရူဘယ်လ်နဲ့ပေးချေခိုင်းတာက ငွေပေးချေမှုကဏ္ဍရဲ့ရှေ့ပြေးပုံစံဖြစ်ကြောင်း၊ အခြားကုန်ပစ္စည်းတင်ပို့မှုတွေမှာလည်း ဒီပုံစံကိုဆက်လက်ကျင့်သုံးသွားမှာဖြစ်ကြောင်း ရုရှားအစိုးရအဖွဲ့မှပြောရေးဆိုခွင့်ရှိသူ'ဒီမစ်ထရီပက်စ်ကော့ဗ်'က ရုရှားရုပ်သံလိုင်းချန်နယ်ဝမ်းကနေ ပြောကြားလိုက်ပါတယ်။

ရုရှားဗဟိုဘဏ်မှအရန်ငွေကြေး ဒေါ်လာ ၃၀၀ ဘီလီယံကို အနောက်နိုင်ငံကရပ်ဆိုင်းပစ်လိုက်တာဟာ အဓမ္မသိမ်းပိုက်လိုက်တာဖြစ်ပြီး ဒီလိုကိစ္စကြောင့် အမေရိကန်ဒေါ်လာနဲ့ ယူရိုငွေတို့ ကို ကမ္ဘာ့အရန်ငွေကြေးအဖြစ် ဆက်လက်မှီခိုခြင်းမပြုလုပ်ဖို့ အကြောင်းဖန်လာခဲ့ပါတယ်။

၁၉၄၄ ခုနှစ်က အနောက်နိုင်ငံကနေ Bretton Woods ငွေကြေးစနစ်ကို အခြေချသတ်မှတ်ခဲ့ပါတယ်။ အဆိုပါ Bretton Woods ငွေကြေးစနစ်မှာ အမေရိကန်ဒေါ်လာကို တစ်ကမ္ဘာလုံးရှိ စံညွှန်းငွေကြေးအတိုင်းအတာအဖြစ်သတ်မှတ်ထားတာဖြစ်ပါတယ်။

ရုရှားတို့က ဒေါ်လာကိုအခြေခံထားတဲ့ဒီငွေကြေးစနစ်ကို အစားထိုးပြောင်းလဲချင်နေခဲ့တာဖြစ်ကြောင်း 'ပက်စ်ကော့ဗ်'ကဆိုပါတယ်။

ရုရှားနိုင်ငံအပေါ် စီးပွားရေးဒဏ်ခတ်ပိတ်ဆို့ခြင်းများက ရုရှားတို့အနေနဲ့ ဒေါ်လာနဲ့ယူရိုငွေတို့ကို ယုံကြည်မှုမရှိတော့ပါဘူး။

ယူကရိန်းကို အထူးစစ်ဆင်ရေးပြုလုပ်ရတဲ့ရည်ရွယ်ချက်က အမေရိကန်တို့က ယူကရိန်းကိုအသုံးချပြီး ရုရှားကိုခြိမ်းခြောက်ဖို့ ကြံရွယ်နေကြောင်း၊ ရုရှားဘာသာစကားပြောဆိုတဲ့သူတွေကို ယူကရိန်းတို့က ညှင်းပန်းနှိပ်စက်နေတာကြောင့် ရုရှားတို့ ကကာကွယ်ပေးရမှာဖြစ်ကြောင်း 'ပူတင်'က အကြောင်းပြလိုက်ပါတယ်။

ယူကရိန်းဘက်ကတော့ ညှင်းပန်းနှိပ်စက်နေတယ်ဆိုတဲ့အချက်ကို ငြင်းဆိုထားပြီး ရုရှားတို့ကအကြောင်းမဲ့တိုက်ခိုက်တာဖြစ်တယ်လို့ တုန့်ပြန်ပြောကြားလိုက်ပါတယ်။

ကမ္ဘာပေါ်မှာ သဘာဝစွမ်းအင်အရင်းအမြစ်အများဆုံးထုတ်လုပ်နေတဲ့ ရုရှားနိုင်ငံကြီးကို အနောက်နိုင်ငံကကျဉ်ဖယ်ဖို့ ပြုလုပ်နေခြင်းဟာ အကျိုးကြောင်းသင့်လျော်ခြင်းမရှိတဲ့အပြင် ဝယ်ယူသုံးစွဲသူတွေအတွက် ဈေးနှုန်းများမြင့်တက်လာနိုင်ပြီး ဥရောပနဲ့အမေရိကန်တို့ ဟာလည်း စီးပွားရေးဆုတ်ယုတ်လာမှာဖြစ်ကြောင်း ရုရှားအရာရှိများက အကြိမ်ကြိမ်သတိပေးထားပါတယ်။

ရုရှားတို့က အမေရိကန်ဒေါ်လာနဲ့ ပတ်သက်ခြင်းမရှိဖို့ အချိန်ကြာမြင့်စွာကြိုးပမ်းနေခဲ့ပေမယ့် ကမ္ဘာ့ဈေးကွက်မှာ ဓာတ်ငွေ့၊ လောင်စာဆီ၊ သတ္တုပစ္စည်းများကို ဒေါ်လာနဲ့သာအရောင်းအဝယ်ပြုလုပ်နေခဲ့ရပါတယ်။

တစ်ကမ္ဘာလုံးကုန်သွယ်ရေးအတိုင်းအတာမှာ ဒေါ်လာက အသုံးအများဆုံးငွေဖြစ်ပြီး သူ့နောက်မှာတော့ ယူရို၊ ယန်း၊ စတာလင်ပေါင်တို့ က အစဉ်လိုက်အသုံးအများဆုံးဖြစ်နေပါတယ်။
Source: Reuters

#WorldHealth
Published - 04 April 2022
ကိုဗစ်ရောဂါဖြစ်ပွားတဲ့လူအများစုဟာ ရောဂါမှပြန်လည်သက်သာလာပြီးနောက်ပိုင်း ကိုဗစ်နောက်ဆက်တွဲလက္ခဏာတွေ ခံစားရလေ့ရှိပါတယ်။

ဒီလက္ခဏာဝေဒနာတွေဟာ အချိန်ကြာလာတာနဲ့အမျှ သက်သာသွားတတ်ပေမယ့် ဆိုးရွားတဲ့ဝေဒနာတွေဆက်လက်ခံစားနေရပါက ကျွမ်းကျင်သူများနဲ့ တိုင်ပင်ကုသသင့်ကြောင်း အကြံပြုထားကြပါတယ်။

ကိုဗစ်နောက်ဆက်တွဲလက္ခဏာဖြစ်ပွားရခြင်းရဲ့ အဓိကအကြောင်းအရင်းက ကိုဗစ်ရောဂါပြင်းထန်စွာခံစားခဲ့ရတာကြောင့်ဖြစ်ကြောင်း စင်ကာပူနိုင်ငံ အမျိုးသားကူးစက်ရောဂါစင်တာမှ ဒေါက်တာ'ဘာနာဘီယန်း'က ပြောကြားလိုက်ပါတယ်။

"အရေးကြီးဆုံးကတော့ ကာကွယ်ဆေးတွေ အားမြှင့်ကာကွယ်ဆေး(booster)တွေထိုးပြီး ကာကွယ်ဖို့ပါပဲ" လို့ ဆိုပါတယ်။ သူ့ရဲ့ပြောဆိုချက်ကို မောင့်အယ်လီဇဘက်ဆေးရုံရှိ နှလုံးနှင့်သွေးကြောဌာနမှ နှလုံးအထူးကုဆရာဝန်'အက်ဂါတေ'ကလည်း ထောက်ခံလိုက်ပါတယ်။

ကိုဗစ်နောက်ဆက်တွဲလက္ခဏာဖြစ်ပွားရခြင်း အကြောင်းအရင်းတွေထဲမှာ ရောဂါပြင်းထန်စွာခံစားခဲ့ရခြင်းအပြင် ကူးစက်စဉ်က ဗိုင်းရပ်စ်ပမာဏများပြားခြင်း၊ ဆီးချိုရောဂါအခံရှိခြင်း၊ ခုခံအားစနစ်မှအလိုအလျောက်ထွက်ရှိလာတဲ့ autoantibody များရှိခြင်း၊ ရေယုန်ဖြစ်ပွားနိုင်တဲ့ Epstein-Barr ဗိုင်းရပ်စ်ပြန်လည်ပွားများလာခြင်း တို့ကြောင်းလည်း ဖြစ်နိုင်ပါတယ်။

ကိုဗစ်ကာကွယ်ဆေးထိုးထားပေမယ့်လည်း နောက်ဆက်တွဲလက္ခဏာပေါ်ပေါက်ရခြင်းအကြောင်းကိုတော့ သေချာမသိရှိသေးပေမယ့် မျိုးရိုးဗီဇပေါင်းစပ်သွားခြင်း၊ ရောဂါကာကွယ်ရေးပိုးမွှားများနဲ့ ပတ်ဝန်းကျင်သက်ရောက်မှုတို့ကြောင့် ဖြစ်တတ်ပါတယ်လို့ ဒေါက်တာ'ယန်း'ကရှင်းပြထားပါတယ်။

ကိုဗစ်နောက်ဆက်တွဲဝေဒနာခံစားရသူအများစုဟာ ရောဂါကူးစက်ခံရပြီး ၄ ပတ်အတွင်း ပြန်လည်သက်သာသွားတတ်ကြပါတယ်။ အချို့လူတွေမှာ ၄ ပတ်မှ ၁၂ ပတ်အတွင်းကြာတတ်ပြီး လူအနည်းစုမှာဆိုရင် ဒီထက်မကကြာမြင့်စွာ ခံစားရတတ်ပါတယ်။

အိုမီခရွန်ကူးစက်မှုကာလအတွင်း နောက်ဆက်တွဲလက္ခဏာခံစားရသူအချိုးအစားနည်းသွားမယ်လို့ ဒေါက်တာ'ယန်'ကခန့်မှန်းလိုက်ပါတယ်။ ဘာကြောင့်လဲဆိုတော့ ဒီကာလမှာ ကာကွယ်ဆေးထိုးပြီးမှ ရောဂါကူးစက်ကြသူတွေများပြီး အိုမီခရွန်ကိုယ်တိုင်ကလည်း ရောဂါဆိုးရွားမှုနည်းပါးတာကြောင့်ဖြစ်ပါတယ်။

ဒါပေမဲ့လည်း လူနာတွေအနေနဲ့ ရင်ဘတ်အောင့်ခြင်း၊ အသက်ရှူကြပ်ခြင်း၊ အဖျားတာရှည်ခြင်းတို့ ကြုံတွေ့လာပြီဆိုရင်တော့ ဆေးကုသမှုခံယူသင့်ပါတယ်။
"ကိုဗစ်နောက်ဆက်တွဲလက္ခဏာတွေက သိပ်မသိသာတာကြောင့် ကိုယ့်ဘာသာကိုယ်ဂရုစိုက်လို့ရပါတယ်။ ဒါပေမဲ့အကယ်၍များ ဒီဝေဒနာတွေက ပုံမှန်နေ့စဉ်လှုပ်ရှားသွားလာမှုကို ထိခိုက်လာတာမျိုး၊ သက်သာခြင်းမရှိတာမျိုး၊ စိုးရိမ်ပူပန်နေရတာမျိုး ဖြစ်လာပြီဆိုရင်တော့ ဆရာဝန်တွေနဲ့ ဆွေးနွေးတိုင်ပင်သင့်ပါတယ်" လို့ 'ယန်း'က အကြံပြုလိုက်ပါတယ်။

ဒါ့အပြင်ဒေါက်တာ'တေ'ကလည်း နောက်ဆက်တွဲလက္ခဏာတာရှည်နေတဲ့သူတွေ၊ ပိုဆိုးရွားလာတဲ့သူတွေ၊ နေထိုင်မှုပုံစံကို ထိခိုက်လာတဲ့သူတွေ၊ ပြင်းထန်တဲ့လေ့ကျင့်ခန်းပြုလုပ်ဖို့စီစဉ်ရင်း ရင်ဘတ်အောင့်ခြင်း အသက်ရှူကြပ်ခြင်း နှလုံးခုန်မြန်ခြင်း ခေါင်းကိုက်ခဲခြင်းတို့ခံစားရသူတွေအနေနဲ့ ဆေးကုသခံယူဖို့ တိုင်ပင်သင့်ကြောင်း ပြောကြားလိုက်ပါတယ်။
Source: The Straits Times 

#TV Yangon Times Matters အစီအစဉ်
Published - 3 April 2022

အစီအစဉ်တင်ဆက်သူ ဆရာဟိန်းလတ် က တက္ကသိုလ်သီချင်းတွေနှင့်အတူ ကျော်ကြားခဲ့တဲ့ အဆိုတော် အောင်နိုင်(ခရမ်းပြာ) နဲ့ အတူ "တက္ကသိုလ်သီချင်းများ" ဆိုတဲ့ ခေါင်းစဉ်အောက်မှာ တက္ကသိုလ် သီချင်းတွေရေးဖွဲသီဆိုခဲ့ကြတဲ့ လွမ်းမောဖွယ်အတိတ်အတွေ့အကြုံတွေကို ပြောဆိုခဲ့ကြတာတွေဖြစ်ပါတယ်

#Yangon_Media_Group

Published 3 April 2022

ကာဇက်စတန်သမ္မတနှင့် အဆင့်မြင့်အရာရှိကြီးတွေကို တိုက်ခိုက်ဖို့ ကြံစည်နေတဲ့ နိုင်ငံခြားသူလျှိုတစ်ဦးကို ယင်းရဲ့ လုံခြုံရေးတပ်ဖွဲ့တွေက ဖမ်းဆီးရမိခဲ့တယ်လို့   ဧပြီ၃ ရက် တနင်္ဂနွေနေ့ကပြောပါတယ်။

“နိုင်ငံခြားသူလျှိုတစ်ဦးဖြစ်တဲ့ ကာဇက်နိုင်ငံသားတစ်ဦးကို နူလ်ဆူလ်တန်မြို့တော်မှာ တန်ပြန်ထောက်လှမ်းရေးအဖွဲ့က မတ်၂၅ရက်က ဖမ်းဆီးရမိခဲ့ပါတယ်” လို့ အမျိုးသားလုံခြုံရေးကောင်စီက သတင်းထုတ်ပြန်ပါတယ်။

အဲဒီသူဟာ ကာဇက်စတန်သမ္မတနှင့် အဆင့်မြင့်အရာရှိတော်တော်များများနှင့်အတူ အထူးတပ်ဖွဲ့နှင့် လုံခြုံရေးတပ်ဖွဲ့တွေကို  တိုက်ခိုက်ဖို့ ကြံစည်ခဲ့တယ်လို့ သတင်းထုတ်ပြန်ချက်မှာဖော်ပြထားပါတယ်။

သူ့အိမ်ကိုရှာဖွေစဉ် နိုင်ငံခြားတိုင်းပြည်လုပ်သေနတ်၊မူးယစ်ဆေးဝါးတွေနှင့် ငွေစက္ကူအများအပြား တွေ့ရှိသိမ်းဆည်းရမိခဲ့ ပါတယ်။ သူ့ကို ဖမ်းဆီးမိပြီးနောက် အကြမ်းဖက်မှုစုံစမ်းစစ်ဆေးမှုစတင်စဉ်မှာ သူက ဝန်ခံခဲ့တယ်လို့ သတင်းထုတ်ပြန်ချက်က ဆိုပါတယ်။

ကာဇက်စတန်ဟာ ဆိုဗီယက်သမ္မတနိုင်ငံဟောင်းတစ်ခုဖြစ်ပြီး အလယ်အာရှမှာ အချမ်းသာဆုံးနိုင်ငံဖြစ်ပါတယ်။ ဇန်နဝါရီ လဆန်းပိုင်းက လောင်စာဆီဈေးတက်မှုကြောင့် ငြိမ်းချမ်းစွာဆန္ဒပြနေတုန်း အကြမ်းဖက်မှုတွေဖြစ်ပြီး သွေးထွက်သံယိုမှု နှင့် လုယက်မှုတွေဖြစ်ခဲ့ရပါတယ်။

အဲဒီအကြမ်းဖက်မှုကို အကြမ်းဖက်အုပ်စုတွေရဲ့လက်ချက်လို့ ကာဇက်စတန်ကပြောပြီး နိုင်ငံခြားမီဒီယာတွေရဲ့ သတင်းဖော်ပြချက်တွေကို ဝေဖန်ခဲ့ပါတယ်။

Source AFP

#TV Yangon Times Matters အစီအစဉ်
Published - 3 April 2022

အစီအစဉ်တင်ဆက်သူ ဆရာဟိန်းလတ် က တက္ကသိုလ်သီချင်းတွေနှင့်အတူ ကျော်ကြားခဲ့တဲ့ အဆိုတော် အောင်နိုင်(ခရမ်းပြာ) နဲ့ အတူ "တက္ကသိုလ်သီချင်းများ" ဆိုတဲ့ ခေါင်းစဉ်အောက်မှာ တက္ကသိုလ် သီချင်းတွေရေးဖွဲသီဆိုခဲ့ကြတဲ့ လွမ်းမောဖွယ်အတိတ်အတွေ့အကြုံတွေကို ပြောဆိုခဲ့ကြတာတွေဖြစ်ပါတယ်

#Yangon_Media_Group