#LocalNews
Published_8 April 2022

ရခိုင်ပြည်နယ် ၊ အမ်းမြိုန့ယ်၊ကျောက်မြောင်းအုပ်စု၊ ကျောက်မြောင်းကျေးရွာတွင်တွေ့ရှိရသော ဗုဒ္ဓဆင်းတုတော်များနှင့် ငွေဒင်္ဂါးပြား စသည်တို့ကို ရှေးဟောင်းပစ္စည်း ဟုတ်မဟုတ် စစ်ဆေးကြည့်ရှုရန် မြောက်ဦးမြို့ရှိ ရှေးဟောင်းသုတေသနအဖွဲ့ထံ ဖုန်းဖြင့်ဆက်သွယ်၍ အကူအညီတောင်းခံထားကြောင်း သိရသည်။

ပြီးခဲ့သည့် ဧပြီလ ၅ ရက်က အဆိုပါကျေးရွာတွင် ရှေးဟောင်းသမိုင်းဝင်စေတီ ၉ ဆူအား ပြန်လည်ပြုပြင်မွမ်းမံရန်အတွက် ရွာသူသားများမှဆောင်ရွက်ရာတွင် ကျောက်ဖြင့်တည်ထားသော စေတီတော် ၁ ဆူမှ အင်းကွက်ဟုယူဆရသော စာများရေးသားထားသည့် ကျောက်ပြား ၄ ခု၊ ဘုရားဆင်းတုတော် ၁၄ ဆူနှင့် ငွေဒင်္ဂါးပြား ၁၂ ပြားတို့အား တွေ့ရှိခဲ့ရခြင်းဖြစ်သည်။

ယခုအခါ အဆိုပါပစ္စည်းများကို ကျောက်မြောင်းကျေးရွာ ဘုန်းကြီးကျောင်းမှ ဆရာတော် ဦးတေဇနိယက ၎င်းကျောင်း၌ ထိန်းသိမ်းထားရှိကြောင်း သိရသည်။

ymg/mt
#Yangon_Media_Group

#LocalNews
Published - 8 Apr 2022

ဧပြီလ ၅ ရက်နေ့က ထိုင်းနိုင်ငံအတွင်း ယာဥ်တစ်စီးအရှိန်လွန်တိမ်းမှောက်မှုကြောင့် ထိခိုက်ဒဏ်ရာရှိသူ မြန်မာရွေ့ပြောင်းလုပ်သားတွေကို အလုပ်သမားသံအရာရှိက သွားရောက်တွေ့ဆုံခဲ့တယ်လို့ သိရပါတယ်။

ဧပြီလ ၅ ရက်နေ့ နံနက် ၄ နာရီ အချိန်ခန့်တွင် တရားမဝင် မြန်မာရွှေ့ပြောင်းအလုပ်သမားများတင်ဆောင်လာသည့် Pickup အမျိုးအစား မော်တော်ယာဥ်သည် တာ့ခ်ပြည်နယ်၊ ဖိုးဖရခရိုင်၊ ကျောက်ခက်မြို့နယ်၊ ယွတ်ဒွိင်လမ်းမကြီးပေါ်တွင် ယာဥ်စစ်ဆေးရေးအဖွဲ့မှ စစ်ဆေးရန်တားဆီးစဥ် ရပ်တန့်မှုမရှိဘဲ မောင်းနှင်ထွက်ပြေးခဲ့၍ အရှိန်လွန်တိမ်းမှောက်ခဲ့ရာ ယာဥ်ပေါ်ပါသူ မြန်မာ ရွှေ့ပြောင်းအလုပ်သမား ကျား(၅)ဦး၊ မ(၁၃)ဦး၊ စုစုပေါင်း(၁၈)ဦးအနက် ကျား(၁)ဦး၊ မ(၄)ဦး၊ စုစု ပေါင်း(၅)ဦး ထိခိုက်ဒဏ်ရာများရရှိခဲ့တာဖြစ်ပါတယ်။

မဲဆောက်မြို့ အလုပ်သမားသံအရာရှိရုံးမှ အလုပ်သမားသံအရာရှိအနေဖြင့် ဧပြီလ ၇ ရက်နေ့တွင် ဖိုးဖရရဲစခန်းသို့ရောက်ရှိ၍ ခရိုင်ရဲမှူးဖြင့်တွေ့ဆုံကာ အမှုအခြေအနေအားမေးမြန်းပြီး အမှုအမြန်ဆုံးပြီးပြတ်စေရေးနှင့် အလုပ်သမားများအား နေရပ်ပြန်နိုင်ရေးဆောင်ရွက်ပေးရန် ဆွေးနွေးပြောကြားခဲ့ကာ အလုပ်သမားများ ခေတ္တထားရှိသည့်နေရာသို့ သွားရောက်၍ အလုပ်သမားများအား တွေ့ဆုံအားပေးစကား ပြောကြားခဲ့တယ်လို့ သိရပါတယ်။

ymg/hm
#Yangon_Media_Group

Published 8 April 2022

DHL အမှတ်တံဆိပ်တပ် ကုန်တင်လေယာဉ်ကြီးတစ်စီးဟာ ကောစတာရီကာ လေဆိပ်ကို

အရေးပေါ်ဆင်းသက်မှုပြုလုပ်စဉ် နှစ်ပိုင်းကျိုးကျသွားပါတယ်။ ဒါပေမယ့် ထိခိုက်ဒဏ်ရာရရှိခြင်းမရှိဘူးလို့ သိရပါတယ်။ 

ကော့စတာရီကာနိုင်ငံ ဆန်ဂျိုဆေးက ဂျူအန်ဆန်တာမာရီယာ နိုင်ငံတကာလေဆိပ်ကို အရေးပေါ်ဆင်းသက်ခဲ့ရင်း လေယာဉ်ကြီးနှစ်ပိုင်းကျိုးသွားတာဖြစ်ပါတယ်။

လေယာဉ်မှူးဟာ စိတ်လှုပ်ရှားတုန်လှုပ်နေပေမယ့် ကျန်တဲ့ ဂွာတီမာလာနိုင်ငံသား လေယာဉ်အမှုထမ်းနှစ်ဦးကတော့ စိတ်တည်ငြိမ်မှုရှိပြီး ကြုံတွေ့ခဲ့သမျှတွေ မှတ်မိနေပါတယ်လို့ ကြက်ခြေနီကယ်ဆယ်ရေးသမား ဂီအီဒို ဗက်ကေးက ပြောပါတယ်။

Source AFP

#LocalNews
Published_8 April 2022

ရုပ်ရှင်သရုပ်ဆောင် အကယ်ဒမီနေတိုး(ခ)နေလင်းအောင်နှင့် မသဲစုမြတ်ရွှေ(ခ)သဲသဲတို့၏ မင်္ဂလာဧည့်ခံပွဲသို့ ကြွရောက်ချီးမြှင့်ကြမည့် မိသားစုမိတ်ဆွေသင်္ဂဟများအနေဖြင့် ပါကင်ပိတ်ထားသည့်လက်ဖွဲများနှင့် ပါဆယ်ဗူးများ လက်မဖွဲ့ကြရန် မေတ္တာရပ်ခံထားကြောင်း သိရသည်။

မင်္ဂလာဧည့်ခံပွဲဖိတ်စာတွင် “ဧည့်သည်တော်များ၏ လုံခြုံရေးနှင့် အန္တရာယ်ကင်းရှင်းစေရန်အတွက် ဖိတ်စာနှင့်တကွ တက်ရောက်ပေးပါရန်နှင့် လက်ဖွဲ့ပစ္စည်းကို ပါကင်ပိတ်ခြင်း၊ ပါဆယ်ဗူးများဖြင့်လက်ဖွဲ့ခြင်းမပြုပါရန် လေးစားစွာ မေတ္တာရပ်ခံအပ်ပါသည်”ဟု ရေးသားထားသည်။

အဆိုပါ မင်္ဂလာဧည့်ခံပွဲကို ရန်ကုန်ရှိ ဟိုတယ်တစ်ခုတွင် ဧပြီလ ၁၀ ရက်တွင် နံနက် ၉ နာရီမှ နံနက် ၁၁ နာရီခွဲထိ ကိုဗစ်စည်းကမ်းနှင့်အညီ ကျင်းပမည်ဖြစ်သည်။

ရုပ်ရှင်သရုပ်ဆောင် အကယ်ဒမီနေတိုး(ခ)နေလင်းအောင်နှင့် မသဲစုမြတ်ရွှေ(ခ)သဲသဲတို့ ပြီးခဲ့သည့် ဖေဖော်ဝါရီလ ၅ ရက်က မင်္ဂလာမော်ကွန်းတင် လက်မှတ်ရေးထိုးခြင်းနှင့် မင်္ဂလာဆွမ်းကျွေးကို နေအိမ်တွင် ပြုလုပ်ခဲ့ခြင်းဖြစ်သည်။

ymg/mt
#Yangon_Media_Group

#WorldPolitics
Published - 08 April 2022

ယူကရိန်းနိုင်ငံအပေါ် လူ့အခွင့်အရေးချိုးဖောက်မှုများနဲ့ အကြမ်းဖက်တိုက်ခိုက်မှုများကျူးလွန်ခဲ့တဲ့ ရုရှားနိုင်ငံကို ကုလသမဂ္ဂလူ့အခွင့်အရေးကောင်စီမှဆိုင်းငံ့ထုတ်ပယ်လိုက်ကြောင်း ကြာသပတေးနေ့က ကုလအထွေထွေညီလာခံမှာ ဆုံးဖြတ်လိုက်ပါတယ်။

ထုတ်ပယ်ခံလိုက်ရတဲ့ရုရှားကလည်း နိုင်ငံ ၄၇ နိုင်ငံပါဝင်တဲ့ ဂျီနီဗာအခြေစိုက်ကုလလူ့အခွင့်အရေးကောင်စီအဖွဲ့ မှ နှုတ်ထွက်ကြောင်း တုန့်ပြန်ကြေညာခဲ့ပါတယ်။
အမေရိကန်ကဦးဆောင်ပြီး ထိုအဆိုပြုချက်ကိုမဲဆန္ဒကောက်ခံခဲ့ရာမှာ ထောက်ခံမဲ ၉၃ မဲ၊ ကန့်ကွက်မဲ ၂၄ မဲနဲ့ မဲမပေးသူ ၅၈ နိုင်ငံရှိခဲ့ပါတယ်။

၁၉၃ နိုင်ငံပါဝင်တဲ့အထွေထွေညီလာခံမှာ မဲမပေးသူတွေကိုဖယ်လိုက်ပါက နိုင်ငံပေါင်း ၃ ပုံ ၂ ပုံလောက်က ရုရှားကိုထုတ်ပယ်ဖို့ ဆန္ဒပြုခဲ့ကြတာဖြစ်ပါတယ်။

မဲခွဲဆုံးဖြတ်အပြီးမှာတော့ ရုရှားမှကုလလက်ထောက်သံအမတ်'ဂျန်နာဒီကုဇ်မင်'က ဒီဆုံးဖြတ်ချက်ဟာ တရားမဝင်ဘဲ နိုင်ငံရေးလှုံ့ဆော်တဲ့ခြေလှမ်းဖြစ်ပြီး ရုရှားကလည်း လူ့အခွင့်အရေးကောင်စီကနေ နှုတ်ထွက်ဖို့ ဆုံးဖြတ်လိုက်ကြောင်း ပြောကြားလိုက်ပါတယ်။

ထို့ နောက် ယူကရိန်းမှ ကုလသံအမတ်'ဆာဂျီကစ္စလစ္စယာ'က "အထုတ်ခံရတဲ့သူက နှုတ်ထွက်မယ်လို့ ကြေညာစရာမလိုပါဘူး" လို့ သတင်းထောက်တွေကို ပြောလိုက်ပါတယ်။
ကြာသပတေးနေ့ကဆုံးဖြတ်ခဲ့တဲ့ အတည်ပြုချက်အရ အထွေထွေညီလာခံက ဆိုင်းငံ့ထုတ်ပယ်ခြင်းကို နောက်ပိုင်းမှာပြန်လည်ပယ်ဖျက်ပေးလို့ ရနိုင်ပေမယ့် ရုရှားကနှုတ်ထွက်လိုက်တဲ့အတွက် အခုအချိန်မှာတော့ ဆုံးဖြတ်ချက်ကိုပြင်ဆင်လို့ မရတော့ပါဘူး။

၂၀၁၈ ခုနှစ်တုန်းက အစ္စရေးလ်မှာပြဿနာဖြစ်ပွားခဲ့တဲ့အမေရိကန်ဟာလည်း ဆိုင်းငံ့ခံလိုက်ရပြီးနောက် ပြန်လည်ပါဝင်ခဲ့ပါတယ်။

ပြီးခဲ့တဲ့နှစ်က အမေရိကန်ကို ကောင်စီကနေပြန်လည်ရွေးချယ်ခဲ့တာကြောင့် ဆိုင်းငံ့ထားဖို့ ဆုံးဖြတ်ချက်တွေက ရှားပါးတဲ့အခြေအနေဖြစ်ပါတယ်။

လစ်ဗျားခေါင်းဆောင်'မူအမ်မာဂဒါဖီ'နဲ့သူ့ရဲ့စစ်တပ်က ဆန္ဒပြသူတွေကိုအကြမ်းဖက်နှိမ်နင်းခဲ့တာကြောင့် ၂၀၁၁ ခုနှစ်မှာ လစ်ဗျားကို ဆိုင်းငံ့ခဲ့ဖူးပါတယ်။

စစ်ဘေးဒဏ်ခံနေရသူတွေနဲ့ အသက်ရှင်ကျန်ရစ်နေသူတွေကို လစ်လျူရှုထားမှာမဟုတ်ဘူးလို့ ကုလသမဂ္ဂကရှင်းရှင်းလင်းလင်းအသိပေးလိုက်တဲ့သဘောဖြစ်ကြောင်း ကုလဆိုင်ရာအမေရိကန်သံအမတ်'လင်ဒါသောမတ်စ်ဂရင်းဖီးလ်'က ပြောကြားလိုက်ပါတယ်။

"လူ့အခွင့်အရေးကို ပြင်းပြင်းထန်ထန်ချိုးဖောက်နေတဲ့သူအတွက် ကုလလူ့အခွင့်အရေးကောင်စီမှာ နေရာပေးသွားမှာမဟုတ်ပါဘူး" လို့ မိန့်ခွန်းပြောကြားသွားပါတယ်။
ဒါဟာ ကုလကနေ အရေးကြီးတဲ့နိုင်ငံရေးကိစ္စဆုံးဖြတ်ချက်ကို ချမှတ်ခဲ့တာဖြစ်ပြီး စုံစမ်းစစ်ဆေးရေးတွေလည်း ပြုလုပ်သွားနိုင်ပါတယ်။

ယူကရိန်းနိုင်ငံအတွင်း စစ်ရာဇဝတ်မှုတွေအပါအဝင် လူ့အခွင့်အရေးချိုးဖောက်ခဲ့မှုတွေကို ပြီးခဲ့တဲ့လကစပြီး စုံစမ်းစစ်ဆေးနေကြပါတယ်။

ကြာသပတေးနေ့ကချမှတ်လိုက်တဲ့ အစည်းအဝေးအဆိုပြုချက်ဟာ ဖေဖော်ဝါရီ ၂၄ ရက်နေ့ကနေ ရုရှားတို့ ကျူးကျော်ပြီးတဲ့နောက်ပိုင်း အထွေထွေညီလာခံမှ တတိယအကြိမ်မြောက်ပြုလုပ်ခဲ့တာဖြစ်ပါတယ်။

ပြီးခဲ့တဲ့နှစ်ကြိမ်တုန်းက ရုရှားကိုရှုတ်ချဖို့ အထွေထွေညီလာခံမှာ မဲခွဲဆုံးဖြတ်ကြရာမှာ ၁၄၁ နိုင်ငံပါဝင်ခဲ့ပြီး ထောက်ခံမဲ ၁၄၀ မဲရရှိခဲ့ပါတယ်။

တရုတ်နိုင်ငံကပြီးခဲ့တဲ့အထွေထွေညီလာခံနှစ်ကြိမ်တုန်းက မဲမပေးဖို့ ဆုံးဖြတ်ခဲ့ပြီး အခုတကြိမ်မှာတော့ ကန့်ကွက်မဲပေးခဲ့ပါတယ်။

"အထွေထွေညီလာခံမှာ အခုလိုအလျင်စလိုဆုံးဖြတ်လိုက်တာဟာ အဖွဲ့ ဝင်နိုင်ငံတွေကြား သွေးကွဲလာနိုင်ပါတယ်။ မီးတောက်ထဲကို လောင်စာထည့်လိုက်သလိုပါပဲ" လို့ တရုတ်မှ ကုလသံအမတ်'ဂျောင်ကျန်'က မဲမပေးခင်မှာပြောကြားလိုက်ပါတယ်။

ထောက်ခံမဲပေးတဲ့နိုင်ငံတွေနဲ့ မဲမပေးတဲ့နိုင်ငံတွေကို ရုရှားနဲ့ဆက်ဆံရေးအဆင်မပြေတဲ့နိုင်ငံများအဖြစ် သတ်မှတ်သွားမယ်လို့ ရုရှားကသတိပေးလိုက်ပါတယ်။
Source: Reuters

#WorldHealth
Published - 08 April 2022

အင်းဆက်တွေမှာပါလာတတ်တဲ့ ရောဂါပိုးမွှားတွေဟာ အန္တရာယ်များတဲ့ဗိုင်းရပ်စ်တွေဖြစ်ပြီး နောက်ထပ်ကပ်ရောဂါတစ်ခုဖြစ်ပေါ်လာနိုင်ကြောင်း ကမ္ဘာ့ကျန်းမာရေးအဖွဲ့အစည်း WHO က သတိပေးလိုက်ပါတယ်။

အာဘိုဗိုင်းရပ်စ်အမျိုးအစားတွေဖြစ်တဲ့ ဇီကာဗိုင်းရပ်စ်၊ အသားဝါရောဂါဗိုင်းရပ်စ်၊ ချီကန်ဂူညာဗိုင်းရပ်စ်၊ သွေးလွန်တုပ်ကွေးဗိုင်းရပ်စ်တို့ဟာ ခြင်၊ မှက်စတဲ့ အင်းဆက်ပိုးမွှားတွေကနေတဆင့် ကူးစက်နိုင်ပါတယ်။

ဒီအင်းဆက်ပိုးမွှားတွေဟာ နောက်ထပ်ကပ်ရောဂါဖြစ်ပွားလာနိုင်တဲ့ အဓိကအကြောင်းအရင်းတွေဖြစ်ပြီး သူတို့ရှင်သန်ရာ အပူပိုင်းဒေသတွေနဲ့ အပူလျော့ပိုင်းဒေသတွေက လူပေါင်း ၄ ဘီလီယံနီးပါးမှာ ကူးစက်ပျံ့ပွားနိုင်တာဖြစ်ပါတယ်။

ကိုဗစ်ရောဂါထပ်မံကူးစက်ပျံ့ပွားလာမှာကိုလည်း ကျွမ်းကျင်သူများက ကြိုတင်ကာကွယ်ဖို့ပြင်ဆင်နေကြပါတယ်။ ကိုဗစ်ကပ်ရောဂါပျံ့ပွားခြင်းဟာ အချိန် ၂ နှစ်ကျော်လာပြီဖြစ်ပေမယ့် တကယ်ပြင်းထန်တဲ့ရောဂါပျံ့ပွားမှုတွေနဲ့ သက်ရောက်မှုတွေကိုတော့ ထိရောက်စွာပြင်ဆင်ကာကွယ်နိုင်ခြင်းမရှိသေးကြောင်း WHO မှ ကူးစက်ရောဂါအန္တရာယ်ကြိုတင်ပြင်ဆင်ရေးအဖွဲ့ မှ ညွှန်ကြားရေးမှူး ဒေါက်တာ'ဆဲလ်ဗီဘရီယန်း'က ကြာသပတေးနေ့က ပြောကြားလိုက်ပါတယ်။

"၂၀၀၃ ခုနှစ်မှာ ဆားစ်ရောဂါနဲ့ ၂၀၀၉ ခုနှစ်မှာ အအေးမိတုပ်ကွေးကပ်ရောဂါတွေဖြစ်ပွားခဲ့ပြီးပါပြီ။ ဒါပေမဲ့ကျွန်မတို့ ပြင်ဆင်ကာကွယ်မှုတွေက လိုအပ်ချက်တွေရှိနေဆဲပါပဲ" လို့ ပြောကြားခဲ့ပါတယ်။

အာဘိုဗိုင်းရပ်စ်အသစ်တစ်မျိုးကြောင့် နောက်ထပ်ကပ်ရောဂါတစ်ခုဖြစ်ပွားလာနိုင်ချေ အလွန်များပြီး တကယ်ဖြစ်လာနိုင်တဲ့ အထောက်အထားတွေမြင်တွေ့နေရကြောင်း ပြောပြပါတယ်။

အာဘိုဗိုင်းရပ်စ်တွေဟာ ပျံ့ပွားလွယ်ပြီး လက်ရှိမှာလည်း အပူပိုင်းဒေသနဲ့ အပူလျော့ပိုင်းဒေသတွေမှာ ပြည်သူတွေရဲ့ကျန်းမာရေးကို ခြိမ်းခြောက်လျက်ရှိပါတယ်။

၂၀၀၀ ခုနှစ်တွေမှာ အသားဝါရောဂါကူးစက်မှုအဖြစ်များခဲ့ပြီး ၂၀၁၆ နောက်ပိုင်းမှာတော့ နိုင်ငံပေါင်း ၈၉ နိုင်ငံကျော်မှာ ဇီကာဗိုင်းရပ်စ်ပျံ့ပွားခဲ့ပါတယ်။

သွေးလွန်တုပ်ကွေးရောဂါကြောင့် နိုင်ငံပေါင်း ၁၃၀ ကျော်မှာ နှစ်စဉ်နှစ်တိုင်း လူပေါင်း ၃၉၀ သန်းလောက် ကူးစက်ခံနေရပါတယ်။

အသားဝါရောဂါအတွက် ကာကွယ်ဆေးရှိပေမယ့် ကျန်တဲ့ရောဂါတွေအတွက် အထိရောက်ဆုံးကာကွယ်မှုကတော့ ခြင်ကိုက်မခံရအောင်နေဖို့ ဖြစ်ကြောင်း WHO က အကြံပြုထားပါတယ်။
Source: DailyMail

#WorldHealth
Published- 08 April 2022

ဖိုင်ဇာ-ဘိုင်အိုတက်ခ်ရဲ့ ကိုဗစ်ကာကွယ်ဆေးစတုတ္ထအကြိမ်ထိုးနှံခြင်းဖြင့် သက်ကြီးရွယ်အိုတွေမှာ ကိုဗစ်ရောဂါကူးစက်မှုနှုန်းကိုကာကွယ်နိုင်ပေမယ့် ကာကွယ်နိုင်စွမ်းအာနိသင်က အချိန်တိုအတွင်းလျော့နည်းလာနိုင်ကြောင်း အစ္စရေးလ်မှာစမ်းသပ်တွေ့ရှိထားပါတယ်။

အားမြှင့်ကာကွယ်ဆေး booster ဒုတိယအကြိမ်ထိုးပြီး ၄ ပတ်အကြာမှာ ကာကွယ်နိုင်စွမ်းလျော့နည်းလာကြောင်း အစ္စရေးလ်သုတေသီတို့က နယူးအင်္ဂလန်ဆေးပညာဂျာနယ်မှာ အင်္ဂါနေ့ကဖော်ပြခဲ့ပါတယ်။

ရောဂါပြင်းထန်စွာဖြစ်ပွားနိုင်မှုနှုန်းကို ကာကွယ်နိုင်စွမ်းကတော့ အားမြှင့်ကာကွယ်ဆေးဒုတိယအကြိမ်ထိုးပြီး ၆ ပတ်အတွင်း ကျဆင်းသွားခြင်းမရှိပေမယ့် ဘယ်လောက်ကြာကြာတာရှည်ခံလဲဆိုတာကိုတော့ ထပ်မံလေ့လာသွားရဦးမှာဖြစ်ပါတယ်။

အိုမီခရွန်မျိုးဗီဇကွဲကူးစက်မှုလွှမ်းမိုးချိန် ဇန်နဝါရီ ၁၀ ရက်နေ့မှ မတ်လ ၂ ရက်နေ့အတွင်း အစ္စရေးလ်ကျန်းမာရေးဝန်ကြီးဌာနရဲ့မှတ်တမ်းများထဲမှ အသက် ၆၀ အထက်လူပေါင်း ၁.၃ သန်းကိုလေ့လာခဲ့ကြပါတယ်။

အိုမီခရွန်မျိုးနွယ်ခွဲ BA.2 ကူးစက်မှုကာလအတွင်း အမေရိကန်က အသက် ၅၀ နဲ့အထက်လူကြီးတွေမှာ အားမြှင့်ကာကွယ်ဆေးဒုတိယအကြိမ်ထိုးဖို့ ခွင့်ပြုလိုက်ပြီးနောက် အမေရိကန်အစားအစာနဲ့ဆေးဝါးကွပ်ကဲရေး(FDA)အဖွဲ့ က အားမြှင့်ကာကွယ်ဆေးထိုးနှံဖို့လိုအပ်ခြင်းရှိ/မရှိ ဗုဒ္ဓဟူးနေ့ကဆွေးနွေးခဲ့ကြပါတယ်။

ဥရောပကျန်းမာရေးဝန်ကြီးများကလည်း အသက် ၆၀ အထက်လူကြီးတွေမှာ စတုတ္ထအကြိမ်ကာကွယ်ဆေးထိုးဖို့ ဥရောပနိုင်ငံများမှအစိုးရတွေကို တိုက်တွန်းထားပါတယ်။
အာရှဒေသမှာ တောင်ကိုရီးယားနိုင်ငံက ဖေဖော်ဝါရီလအတွင်း ကိုဗစ်ကာကွယ်ဆေးစတုတ္ထအကြိမ်စတင်ထိုးနှံခဲ့ပြီး စင်ကာပူကလည်း အသက် ၈၀ နဲ့အထက်သက်ကြီးရွယ်အိုတွေမှာ အားမြှင့်ကာကွယ်ဆေးဒုတိယအကြိမ်ထိုးနှံဖို့ စီစဉ်ထားကြောင်း ပြောကြားခဲ့ပါတယ်။

ပြီးခဲ့တဲ့လက အစ္စရေးလ်မှသုံးသပ်ပြထားတဲ့လေ့လာချက်အရ ဖိုင်ဇာ-ဘိုင်အိုတက်ခ်အားမြှင့်ကာကွယ်ဆေးဒုတိယအကြိမ်ထိုးနှံထားတဲ့ လူကြီးတွေမှာ အားမြှင့်ကာကွယ်ဆေးတစ်ကြိမ်တည်းထိုးနှံထားတဲ့သူတွေထက် အသက်သေဆုံးမှုနှုန်းကို ၇၈ ရာခိုင်နှုန်းလျှော့ချပေးနိုင်ကြောင်း ဖော်ပြထားပါတယ်။

အစ္စရေးလ်မှာ ဇန်နဝါရီလက ဒုတိယအကြိမ်အားမြှင့်ကာကွယ်ဆေးတွေ စတင်ထိုးနှံပေးနေပြီဖြစ်ပါတယ်။
Source: Reuters

#LocalNews
Published - 8 Apr 2022
အမရပူရမြို့နယ်တွင် ငွေကျပ် ၁ ဒသမ ၃၅ ဘီလီယံတန်ဖိုးရှိ မူးယစ်ဆေးဝါးများ ဖမ်းဆီးရမိခဲ့တယ်လို့ မူးယစ်ဆေးဝါးတားဆီးနှိမ်နှင်းရေးရဲတပ်ဖွဲ့ ကသိရပါတယ်။

မူးယစ်ဆေးဝါးတားဆီးနှိမ်နင်းရေးရဲတပ်ဖွဲ့ မှ တပ်ဖွဲ့ဝင်များပါဝင်သော ပူးပေါင်းအဖွဲ့သည် ဧပြီလ ၄ ရက်နေ့ ညနေ ၆ နာရီအချိန် အမရပူရမြို့ နယ်၊ ရန်ကုန်-မန္တလေးသွားကားလမ်း၊ မိုင်တိုင်အမှတ်(၄၂၃/၁)နှင့် (၄၂၃/၂) ကြားတွင် မိတ္ထီလာမှ မန္တလေးဘက်သို့ စိုင်းခမ်းခိုင် မောင်းနှင်ပြီး စိုင်းယီဆန် နှင့် လင်းဇော်ဦး တို့လိုက်ပါ လာသည့် TOYOTA ALPHARD မော်တော်ယာဉ်ကို သတင်းအရရှာဖွေရာ ယာဉ်ပေါ်မှ ဒေသကာလတန်ဖိုး ငွေကျပ် ၁ ဒသမ ၃၅ ဘီလီယံ တန်ဖိုးရှိ စိတ်ကြွရူးသွပ်ဆေးပြား ၈ သိန်းနှင့် ကတ်တမင်း ၅ ကီလိုတို့ အား သိမ်းဆည်းရမိခဲ့တယ်လို့ သိရပါတယ်။

စစ်ဆေးဖော်ထုတ်ချက်အရ သိမ်းဆည်းရမိမူးယစ်ဆေးဝါးများအား ရှမ်းပြည်နယ် (တောင်ပိုင်း)မှ မန္တလေးတိုင်းဒေသကြီးသို့ သယ်ဆောင်ခြင်းဖြစ်ကြောင်း သိရှိရသဖြင့် ၎င်းတို့အား ဥပဒေအရအရေးယူထားရှိပြီး ကွင်းဆက်ပြစ်မှုကျူးလွန်သူများအား ဆက်လက်စစ်ဆေးဖော်ထုတ်လျက်ရှိတယ်လို့ သိရပါတယ်။

ymg/hm
#Yangon_Media_Group

#Local_News
Published_ 8 April 2022

ရှမ်းပြည်နယ်(အရှေ့ပိုင်း)၊ ကျိုင်းတုံမြို့၏ အနောက်မြောက်ဘက် ၁၇ မိုင်ခန့်အကွာ ဝမ်တာပုံကျေးရွာ အထက်ဘက် နမ့်လွေမြစ်ပေါ်တွင် Gravity Dam တည်ဆောက်မည့် ဝမ်တာပုံ ရေအားလျှပ်စစ်စီမံကိန်းသည် စက်တပ်ဆင်အင်အား ၁၇၆ မဂ္ဂါဝပ်ကို ထုတ်လုပ် ပေးနိုင်မှာဖြစ်ကြောင်း သိရပါတယ်။

အဆိုပါ စီမံကိန်းမှထွက်ရှိလာမည့် လျှပ်စစ်ဓာတ်အားများ နိုင်ငံတော် ဓာတ်အားစနစ်သို့ချိတ်ဆက်၍ ပိုလွှတ်ဖြန့်ဖြူး ပေးနိုင်သည်အထိ အဆင့်ဆင့် ဆက်လက်စူးစမ်းလေ့လာ ဆောင်ရွက်သွားမှာ ဖြစ်တယ်လို့ ဆိုပါတယ်။

လက်ရှိရေအားလျှပ်စစ်စက်ရုံများရှိ ရေလှောင်ကန်များတွင်လာမည့် မိုးရာသီအမီ ရေလုံလောက်သည့်အထိ ဝန်အားလျော့ချထိန်းသိမ်း၍ ပြည်သူများကို အလှည့်ကျ အချိန်ပိုင်းစနစ်ဖြင့် ဓာတ်အားဖြန့်ဖြူးပေးနေရခြင်းအား နေရောင်ခြည် စွမ်းအင်၊ လေစွမ်းအင်၊ သဘာဝဓာတ်ငွေ့နှင့် ရေအားလျှပ်စစ်စက်ရုံများမှ နည်းလမ်းပေါင်းစုံဖြင့် ထုတ်လုပ်ရရှိရေး ကြိုးပမ်းဆောင်ရွက်နေကြောင်း သိရပါတယ်။

လျှပ်စစ်နှင့်စွမ်းအင်ဝန်ကြီးဌာန ပြည်ထောင်စုဝန်ကြီး ဦးအောင်သန်းဦးသည် ကျိုင်းတုံမြို့၏ အနောက်မြောက်ဘက် ၁၇ မိုင်ခန့်အကွာ ဝမ်တာပုံကျေးရွာ အထက်ဘက် နမ့်လွေမြစ်ပေါ်တွင် တည်ဆောက်ရန်လျာထားဆောင်ရွက်မည့် ဝမ်တာပုံရေအားလျှပ်စစ် စီမံကိန်းကို သွားရောက်ကြည့်ရှု စစ်ဆေးခဲ့ပါတယ်။

စီမံကိန်းပြီးစီးသွားပါက စက်တပ်ဆင်အင်အား ၈၈ မဂ္ဂါဝပ်ရှိ ဓာတ်အားပေးစက် ၂ လုံးဖြင့် ၁၇၆ မဂ္ဂါဝပ်၊ စုစုပေါင်း နှစ်စဉ်ပျမ်းမျှလျှပ်စစ် ဓာတ်အား ကီလိုဝပ်နာရီ သန်းပေါင်း ၈၀၂ သန်းခန့် ထုတ်လုပ်နိုင်မှာဖြစ်ကြောင်း သတင်းရရှိပါတယ်။

ymg-mnn
#Yangon_Media_Group

#WorldLiterature
Published 07 April 2022

'ချားလ်စ်ဒါဝင်း' ရေးသားပြုစုခဲ့တဲ့ မှတ်စုစာအုပ် ၂ အုပ်ဖြစ်တဲ့ သတ္တဝါဆင့်ကဲပြောင်းလဲခြင်းအကြောင်းနဲ့ပတ်သက်ပြီး သူ့ရဲ့ရှေ့ဆောင်စိတ်ကူးစိတ်သန်းများဖော်ပြထားတဲ့ မှတ်စုစာအုပ်နဲ့ သူ့ရဲ့နာမည်ကျော် ဘဝရှင်သန်ခြင်းပုံကြမ်းမှတ်စုစာအုပ်တိုဟာ နှစ်ပေါင်း ၂၁ တိုင်အောင်ပျောက်ဆုံးနေခဲ့ရာမှ အမည်မသိသူတစ်ဦးက လာရောက်ပြန်ပေးအပ်ခဲ့ကြောင်း ကိမ်းဘရစ်ချ်တက္ကသိုလ်စာကြည့်တိုက်က အင်္ဂါနေ့ကပြောကြားခဲ့ပါတယ်။

#Yangon_Media_Group

Published 7 April 2022

နေတိုးအဖွဲ့ဝင်နိုင်ငံတွေအနေနှင့် ယူကရိန်းကို ရုရှားကိုတိုက်ခိုက်ရာမှာ လိုအပ်တဲ့ လက်နက်တွေအားလုံးပေးဖို့ ယူကရိန်း နိင်ငံခြားရေးဝန်ကြီး ဒီမီထရိုကူလီဘာက ဧပြီ(၇)ရက်က တောင်းဆိုလိုက်ပါတယ်။

နေတိုးနိုင်ငံခြားရေးဝန်ကြီးတွေနှင့် ဘရပ်ဆဲလ်မှာ မတွေ့ခင်မှာ ကူလီဘာက သတင်းထောက်တွေနှင့်တွေ့ဆုံရာမှာ သူက သူလိုချင်တာသုံးမျိုးပဲရှိတယ်။ အဲဒါက လက်နက်၊လက်နက်၊လက်နက်ပဲဖြစ်တယ်လို့ ပြောခဲ့ပါတယ်။

Source AFP

#LocalNews
Published - 7 April 2022

မြန်မာနိုင်ငံနဲ့ တရုတ်နိုင်ငံအကြား လယ်ယာထွက်ကုန်တွေကို တရားဝင်တင်ပို့နိုင်ဖို့ အပင်၊ တိရစ္ဆာန်ကျန်းမာရေးဆိုင်ရာ ပိုးမွှားကင်းစင်ရေး (SPS) သဘောတူစာချုပ်ကို တရုတ်နိုင်ငံနဲ့ လက်မှတ်ရေးထိုးနိုင်ခဲ့တယ်လို့ သိရပါတယ်။

#Yangon_Media_Group