#WorldHealth
Published - 09 April 2022
ကလေးအများစုဟာ ကျောင်းကိုလမ်းလျှောက်မသွားချင်လို့ အကြောင်းပြချက်မျိုးစုံပေးလေ့ရှိပေမယ့် 'ကာလမ်ကော့တ်နေ'ဆိုတဲ့ကလေးကတော့ တကယ်ကိုလမ်းလျှောက်သွားလို့မရလောက်တဲ့အထိ ကျန်းမာရေးပြဿနာရှိနေပါတယ်။

အက်ဆက်စ်ခရိုင် ဘေဆယ်ဒုံမြို့ရှိ အသက် ၁၄ နှစ်အရွယ်ကလေးဟာ အအေးနဲ့ဓာတ်မတည့်တဲ့ဝေဒနာခံစားနေရပြီး အပူချိန် ၂၄ ဒီဂရီဆဲလ်စီးယပ်စ်အောက်မှာ ၁၅ မိနစ်ထက်ပိုပြီးနေမိပါက အင်ပျဉ်တွေထလာတတ်ပါတယ်။

သူ့မိဘတွေက သူတို့ရဲ့ကလေးဓာတ်မတည့်ခြင်းဖြစ်ပွားမှာစိုးတဲ့အတွက် တစ်နေကုန်နွေးထွေးအောင်ထားပေးရပြီး ကျောင်းကိုလည်းကားမောင်းပို့ပေးပါတယ်။
ကလေးမိဘတွေပြောကြားချက်အရ 'ကာလမ်'ညအိပ်နေရင်း ခြေထောက်ဖြစ်ဖြစ် လက်ဖြစ်ဖြစ် စောင်လွတ်သွားတယ်ဆိုရင်တောင် မျက်နှာ၊ လက်တွေ၊ ခြေထောက်တွေမှာ အင်ပျဉ်တွေထလာပါတယ်။

သူ့တစ်ကိုယ်လုံးကို အအေးဒဏ်မှကာကွယ်နိုင်အောင် အင်္ကျီလက်ရှည်ဘောင်းဘီရှည်တွေ ဝတ်ပေးထားရပြီး သူဝါသနာပါတဲ့ဘောလုံးကိုတောင် ကစားလို့ မရဘဲဖြစ်နေပါတယ်။

အင်ပျဉ်ထပြီးယားယံတာလောက်ကဖြစ်တတ်ပေမယ့် အအေးနဲ့ဓာတ်မတည့်ခြင်းက အသက်အန္တရာယ်ပါထိခိုက်လာနိုင်တဲ့ anaphylaxis ဓာတ်မတည့်ခြင်းမျိုး ဖြစ်ပွားတတ်ပါတယ်။

အဲဒီလိုဓာတ်မတည့်ခြင်းမျိုးက အခုအချိန်မှာမဖြစ်ပေမယ့် အချိန်မရွေးဖြစ်နိုင်တဲ့အန္တရာယ်ရှိနေကြောင်း အမေဖြစ်သူကပြောပြပါတယ်။

မစ္စ'ကော့တ်နေ'က သူ့သားအကြောင်းပြောပြရာမှာ မိုးရေထဲသွားမိလို့ ရေစိုသွားရင် ပိုဆိုးလာတတ်ကြောင်း၊ ကျောင်းသွားရင် တီရှပ်အင်္ကျီလောက်နဲ့ သွားလို့မရကြောင်း၊ အေးနေတဲ့စားပွဲခုံနဲ့ ထိတွေ့နေတယ်ဆိုရင် အင်ပျဉ်ထလာမှာဖြစ်ကြောင်း ပြောပြသွားပါတယ်။

"အအေးနဲ့ဓာတ်မတည့်ခြင်းက 'ကာလမ်'ရဲ့နေ့စဉ်နေထိုင်မှုဘဝကို သက်ရောက်မှုရှိနေပါတယ်။ အပြင်သွားလို့ မရဘူး၊ အားကစားတွေဘာတွေလုပ်လို့ မရဘူး။ အပြင်ထွက်ပြီးဘောလုံးကစားတယ်ဆိုရင် မျက်နှာဖူးရောင်လာပါတယ်။ ခန္ဓာကိုယ်ရဲ့ဘယ်အပိုင်းဖြစ်ဖြစ် အအေးထိတွေ့ပြီဆိုတာနဲ့ အင်ပျဉ်ထလာပါတယ်" လို့ အသက် ၃၈ နှစ်အရွယ်ရှိ မစ္စ'ကာလမ်'ကပြောပြပါတယ်။

အင်ပျဉ်တွေထလာရင် နေမထိထိုင်မသာဖြစ်ရကြောင်း၊ ယားယံသလိုဖြစ်ပြီး ဆူးသလိုလည်းခံစားရကြောင်း 'ကာလမ်'ကရှင်းပြပါတယ်။

'ကာလမ်'အသက် ၄ နှစ်အရွယ်မှာ မင်္ဂလာပွဲတစ်ခုအပြင်ဘက်မှာဆော့ကစားရင်း အအေးနဲ့ဓာတ်မတည့်ခြင်းကို ပထမဆုံးခံစားခဲ့ရတာဖြစ်ပါတယ်။

အပင်တွေ ပန်းပွင့်တွေနဲ့ထိတွေ့လို ဓာတ်မတည့်တာမျိုးဖြစ်တယ်လို့ပဲ ယူဆခဲ့ကြပါတယ်။
အဲဒီနောက် ဓာတ်မတည့်ခြင်းက ဆက်တိုက်ဖြစ်ပေါ်နေခဲ့ပြီး အထူးသဖြင့်ဆောင်းရာသီရောက်လာတဲ့အခါ သိသာလာခဲ့ပါတယ်။

ဆယ်စုနှစ်တစ်ခုလောက်ကြာတဲ့အခါမှာတော့ 'ကာလမ်'ရဲ့အခြေအနေကိုကုသပေးဖို့ တိုင်ပင်လာကြပါတယ်။

အအေးဒဏ်ကိုရှောင်နိုင်ဖို့ ဆရာဝန်တွေက နေထိုင်မှုဘဝပုံစံပြောင်းလဲရန်အကြံပေးခဲ့ပေမယ့် မစ္စ'ကော့တ်နေ'က နိုင်ငံရပ်ခြားသွားပြီး နေထိုင်မှုပုံစံပြောင်းလဲလို့ မဖြစ်ကြောင်း ဆိုခဲ့ပါတယ်။

အအေးနဲ့ဓာတ်မတည့်ခြင်းက ငယ်ရွယ်တဲ့အမျိုးသမီးတွေမှာ ပိုဖြစ်တတ်ပြီး ကုသဖို့ နည်းလမ်းမရှိပါဘူး။ အလိုအလျောက်ပြန်ကောင်းသွားတတ်ပြီး နှစ်ပေါင်းများစွာကြာတဲ့အခါ ဝေဒနာပျောက်ကင်းသွားတတ်ပါတယ်။
Source: DailyMail

#WorldHealth
Published - 09 April 2022

မျက်မှန်ပုံမှန်တပ်ဆင်နေရသူတွေဟာ ကိုဗစ်ရောဂါကူးစက်နိုင်ချေအနည်းငယ်လျော့နည်းပြီး မျက်ကပ်မှန်တပ်ဆင်သူတွေကတော့ ရောဂါကူးစက်မှုကာကွယ်နိုင်စွမ်းထူးခြားလာခြင်းမရှိကြောင်း လေ့လာမှုကြီးတစ်ခုအရသိရှိရပြီး ကိုရိုနာဗိုင်းရပ်စ်ကူးစက်ခြင်းလမ်းကြောင်းမှာ မျက်လုံးရဲ့အရေးပါပုံကိုဖော်ပြလိုက်ပါတယ်။

အင်္ဂလန်နဲ့ဝေးလ်စ်နိုင်ငံတို့ရှိ ဗိုင်းရပ်စ်စောင့်ကြည့်လေ့လာမှုမှာ လူပေါင်း ၁၉,၀၀၀ ကျော်ပါဝင်ခဲ့ပြီး မျက်မှန်တပ်ခြင်းနဲ့ မျက်ကပ်မှန်တပ်ခြင်းတို့ နဲ့ပတ်သက်ပြီး စစ်တမ်းကောက်ယူခဲ့ကြပါတယ်။

ပါဝင်စမ်းသပ်ခံသူတွေဟာ ၂၀၂၀ ဇွန်လကစတင်ကာ သူတို့ရဲ့ကိုဗစ်ရောဂါကျန်းမာရေးအခြေအနေကို အပတ်စဉ်တင်ပြခဲ့ကြပြီး လူပေါင်း ၁၁,၀၀၀ ကျော်က ကိုရိုနာဗိုင်းရပ်စ်ရှိ/မရှိ လစဉ်သွေးနမူနာများပေးပို့ကာ စမ်းသပ်ခဲ့ကြပါတယ်။

ရောဂါကူးစက်နိုင်တဲ့အခြားအခြေအနေတွေကိုပါ ထည့်သွင်းသုံးသပ်ကြည့်ရာမှာ မျက်မှန်ပုံမှန်တပ်ဆင်နေရသူတွေက မျက်မှန်လုံးဝမတပ်ဆင်ရတဲ့သူတွေထက် ရောဂါကူးစက်နိုင်ချေ ၁၅ ရာခိုင်နှုန်းနည်းပါးကြောင်း သုတေသီတို့ တွေ့ရှိခဲ့ကြပါတယ်။

မျက်မှန်နဲ့နှာခေါင်းစည်းအတူတကွတပ်ဆင်ရလို့ စိတ်အနှောင့်အယှက်ဖြစ်ရသူတွေမှာတော့ ရောဂါကာကွယ်နိုင်စွမ်းအနည်းငယ်နည်းပါးပြီး မျက်ကပ်မှန်တပ်ဆင်သူတွေမှာတော့ ကာကွယ်နိုင်စွမ်းမပေးနိုင်တာကို တွေ့ရှိခဲ့ရကြောင်း တနင်္လာနေ့က medRxiv ဝက်ဘ်ဆိုက်မှာ ဖော်ပြထားပါတယ်။

"မျက်လုံးအကာအကွယ်ပေးနိုင်တဲ့ မျက်မှန်တပ်ဆင်ခြင်းကို ရောဂါကူးစက်မှုကာကွယ်ရေးအစီအစဉ်တွေမှာ အသုံးပြုဖို့ ထည့်သွင်းစဉ်းစားသင့်ပြီး နောင်ပျံ့ ပွားလာနိုင်တဲ့ကပ်ရောဂါကာလနဲ့ ကျန်းမာရေးစောင့်ရှောက်မှုလုပ်ငန်းတို့ လို ဗိုင်းရပ်စ်ထိတွေ့မှုမြင့်မားတဲ့နေရာတွေမှာ မျက်မှန်တပ်ဆင်ခြင်းကအသုံးဝင်လာနိုင်ပါတယ်" လို့ သုတေသီများက ပြောကြားခဲ့ပါတယ်။
Source Reuters

Published 9 April 2022

မြန်မာနိုင်ငံက လက်နက်ကိုင်အဖွဲ့တွေအတွက် မြေပြင်မှဝေဟင်ပစ်ဒုံးကျည်တွေအပါအဝင် အကြီးစားလက်နက်တွေ ဝယ်ယူပြီး ဘိန်းဖြူနှင့် မီသမ်ဖက်တမင်းတို့ကို တရားမဝင်ရောင်းဖို့ကြံစည်ကြတဲ့ ဂျပန်ယာကူဇာလူဆိုးဂိုဏ်းခေါင်းဆောင်တစ်ဦးနှင့် ထိုင်းအမျိုးသား(၃)ဦးတို့ကို အမေရိကန်အာဏာပိုင်တွေက ကြာသပတေးနေ့က ဖမ်းဆီးရရှိလိုက်မိတယ်လို့ SCMP သတင်းစာက ဖော်ပြရေးသားခဲ့ပါတယ်။

ပြီးခဲ့တဲ့ တနင်္လာနေ့နှင့် အင်္ဂါနေ့က အမေရိကန်ပြည်ထောင်စု နယူးယောက်မှာ တာကီရှီ အီဘီဆာဝါ၊ ဆွမ်ပက် ရုကရာဆာရန်နီ၊ ဆွမ်ဖွတ်ဆင်ဟာဆီရီနှင့် ဆူကဆန်ဂျူလန်နန်တို့ကို မူးယစ်ဆေးဝါးနှင့် လက်နက် တရားမဝင်ကုန်သွယ်မှု၊ ငွေကြေးခဝါချမှုတွေနှင့်ဖမ်းဆီးခဲ့တာဖြစ်တယ်လို့ အမေရိကန်တရားရေးဝန်ကြီးဌာနက ပြောပါတယ်။

အနည်းဆုံး၂၀၁၉ခုနှစ်ကတည်းကစပြီး ထိုင်းမှာရှိတဲ့ အမေရိကန်မူးယစ်ဆေးဝါးထိန်းချုပ်ရေးဌာနရဲ့ ထောက်လှမ်းရေးတွေရဲ့ စုံစမ်းဖော်ထုတ်မှုတွေအရ အဲဒီသူတွေဟာ မြန်မာနိုင်ငံက ညီညွတ်သော ဝပြည်သွေးစည်းညီညွတ်ရေးတပ် UWSA က ဘိန်းဖြူနှင့် မီသမ်ဖက်တမင်းအမြောက်အများကို လျို့ဝှက်ထောက်လှမ်းရေးတစ်ဦးထံ ရောင်းချဖို့ စီစဉ်ခဲ့တယ်လို့ သတင်းကရေးသားပါတယ်။

အဲဒီအချိန်မှာပဲ အီဘီဆာဝါဟာ အလိုအလျောက်လက်နက်တွေ၊ဒုံးပျံတွေ၊စက်သေနတ်တွေနှင့် မြေပြင်မှဝေဟင်ပစ် ဒုံကျည်တွေကို မြန်မာနိုင်ငံမှ UWSA၊ KNU ၊SSAနှင့် တိုင်းရင်းသားလက်နက်ကိုင်အဖွဲ့တွေ အတွက် ဝယ်ယူဖို့ ကြိုးစားခဲ့တာ ဖြစ်ပါတယ်လို့ သတင်းမှာဖော်ပြထားပါတယ်။

၂၀၂၁ခုနှစ် ဖေဖော်ဝါရီ ၃ရက်မှာ အီဘီဆာဝါနှင့် သူ့မိတ်ဆွေတို့ဟာ ကိုပင်ဟေဂင်ကို သွားခဲ့ပါတယ်။အဲဒီမှာ အမေရိကန်မူးယစ်ထိန်းချုပ်ရေးဌာန DEA လျှို့ဝှက်ထောက်လှမ်းရေးတစ်ဦးနှင့် ဒိန်းမတ်ရဲထောက်လှမ်းရေးအရာရှိနှစ်ဦးတို့က သူတို့ကို စက်သေနတ်တွေနှင့်တင့်ကားဖျက်ဒုံးပျံတွေအပါအဝင် အပြင်ပန်းအားဖြင့်ရောင်းရန်ရှိတဲ့ အမေရိကန်စစ်တပ်လက်နက်တွေပြသခဲ့ပါတယ်။

လေယာဉ်တွေကိုပစ်မှတ်ထားတဲ့ စတင်ဂါဒုံးကျည်တွေရဲ့ဓာတ်ပုံတွေနှင့် ဗွီဒီယိုတွေကိုလည်း သူတို့က အီဘီဆာဝါကို ပြသခဲ့ပါတယ်။

“မစ္စတာအီဘီဆာဝါနှင့် ပူးပေါင်းကြံစည်သူတွေဟာ အကြီးစားလက်နက်တွေကို ဝယ်ယူပြီး တရားမဝင်မူးယစ်ဆေးဝါး အမြောက်အများကို ရောင်းချဖို့  DEA လျို့ဝှက်ထောက်လှမ်းရေးတစ်ဦးနှင့် အရောင်းအဝယ်ပွဲစား လုပ်ခဲ့ကြကြောင်း သူတို့ကို ကျွန်တော်တို့က စွပ်စွဲထားပါတယ်” လို့ တရားရေးဝန်ကြီးဌာနကပြောပါတယ်။

မူးယစ်ဆေးဝါးတွေဟာ နယူးယောက်မြို့အထိပေးပို့ဖို့ဖြစ်ပြီး လက်နက်တွေကိုတော့ လက်နက်ကိုင် အဖွဲ့တွေဆီ ပို့ပေးရမှာဖြစ်ပါတယ် လို့ ဌာနကဆက်ပြောပါတယ်။

အီဘီဆာဝါဟာ ယာကူဇာနိုင်ငံဖြတ်ကျော် ရာဇဝတ်ဂိုဏ်းတစ်ခုရဲ့ ခေါင်းဆောင်တစ်ဦးဖြစ်တယ်လို့ တရားရေးဝန်ကြီးဌာနက ပြောပါတယ်။

ဂျူလန်နန်ဟာ ထိုင်း-အမေရိကန် နှစ်နိုင်ငံ နိုင်ငံသားခံယူထားသူဖြစ်ပြီး ဆင်ဟာဆီရီနှင့် ရုကရာဆာရန်နီ တို့ဟာ ထိုင်းနိုင်ငံသားတွေဖြစ်ကြပါတယ်။

ဂျူလန်နန်ဟာ ထိုင်းလေတပ်က ဗိုလ်ချူပ်ကြီးဖြစ်ပြီး ရုကရာဆာရန်နီဟာ ထိုင်းစစ်တပ်အငြိမ်းစားအရာရှိကြီးဖြစ်တယ်လို့ စုံးစမ်းစစ်ဆေးမှုတွေပြုလုပ်စဉ်အတွင်း အီဘီဆာဝါက DEA ထောက်လှမ်းရေးကိုပြောခဲ့တယ်လို့ အမှုစွဲချက်အရသိရပါတယ်။

သူတို့သုံးဦးဟာ မြန်မာနိုင်ငံအပြင် သီရိလင်္ကာနိုင်ငံက သူပုန်တွေအတွက်ပါ လက်နက်ဝယ်ယူပေးဖို့ကြိုးစားခဲ့တာဖြစ်တယ်လို့လည်း သတင်းမှာဖော်ပြထားပါတယ်။

နယူးယောက်မှာ ဖမ်းဆီးခံရတဲ့အချိန်မှာ အမေရိကန်ပြည်ထောင်စုထဲ အဲဒီလူ(၄)ဦး ဘယ်လိုရောက်လာသလဲဆိုတဲ့ အချက်ကိုတော့ တရားရေးဝန်ကြီးဌာနက ရှင်းပြမထားပါဘူး။

Source SCMP

#Local_News
Published_ 9 April 2022

တရုတ်-မြန်မာနှစ်နိုင်ငံ စီးပွားရေးစင်္ကြံနှင့် တရုတ်-မြန်မာ-အိန္ဒိယသမုဒ္ဒရာ ပင်လယ်-ကုန်းကြောင်း-ရထားလမ်း ပူးတွဲပို့ဆောင်ရေး လမ်းကြောင်းသစ်အကြောင်းအရာများနှင့်စပ်လျဉ်း၍ ဆွေးနွေးခဲ့ကြောင်းသိရပါတယ်။

တရုတ်-မြန်မာစီးပွားရေးစင်္ကြံ ပို့ဆောင်ရေးပူးပေါင်းဆောင်ရွက်မှု လုပ်ငန်းအဖွဲ့ တတိယအကြိမ်အစည်းအဝေးကို ဧပြီလ ၇ ရက်တွင် အွန်လိုင်းစနစ်ဖြင့် ကျင်းပခဲ့ပါတယ်။

အစည်းအဝေးကို တရုတ်နိုင်ငံ ပို့ဆောင်ရေးဝန်ကြီးဌာန နိုင်ငံတကာပူးပေါင်း ဆောင်ရွက်ရေးဌာန ဒုတိယညွှန်ကြားရေးမှူးချုပ် Ms. Li Guanyu နှင့် မြန်မာနိုင်ငံ ပို့ဆောင်ရေးနှင့်ဆက်သွယ်ရေးဝန်ကြီးဌာန အမြဲတမ်းအတွင်းဝန် ဦးဝင်းခန့်တို ဦးဆောင်တက်ရောက်ခဲ့ကြပါတယ်။

နှစ်နိုင်ငံ စီးပွားရေးစင်္ကြံကနဦး ပြီးစီးသည့်စီမံကိန်းစာရင်းများပါ ကားလမ်းမကြီး၊ ရထားလမ်း၊ ဆိပ်ကမ်းစီမံကိန်းနှင့် တရုတ်-မြန်မာ အပြည်ပြည်ဆိုင်ရာ ပို့ဆောင်ရေး ပူးပေါင်းဆောင်ရွက်မှု နားလည်မှုစာချွန်လွှာ၊ ရေကြောင်းပညာရေးနှင့် လေ့ကျင့်ရေး စသည့်အကြောင်းအရာများနှင့်စပ်လျဉ်း၍ အမြင်ချင်းဖလှယ်ခဲ့ကြပါတယ်။

ယခင်အကြိမ် လုပ်ငန်းအဖွဲ့အစည်းအဝေးပြီးနောက် ရရှိထားသော တိုးတက်မှုများကို အသိအမှတ်ပြုကာ နောက်တစ်ဆင့်လုပ်ငန်းအတွက် အခြေခံချမှတ်ပေးခဲ့သဖြင့် နှစ်နိုင်ငံပို့ဆောင်ရေးကဏ္ဍပူးပေါင်းဆောင်ရွက်မှု မြှင့်တင်ရေးအတွက် သဘောတူညီချက်များ ရရှိခဲ့ကြပါတယ်။

ပို့ဆောင်ရေးပူးပေါင်းဆောင်ရွက်မှုများကို ရလဒ်ကောင်းများရရှိရန် ဆက်လက်ဖော်ဆောင်ကာ ဖွံ့ဖြိုးတိုးတက်မှုအစီအစဉ်အား နှစ်နိုင်ငံဆက်လက်ဆွေးနွေးသွားမှာဖြစ်ကြောင်း သိရပါတယ်။

ymg-mnn
#Yangon_Media_Group

#WorldNews
Published 08 April 2022

ပြီးခဲ့တဲ့ ဗုဒ္ဓဟူးနေ့က ကိုလံဘီယာနိုင်ငံ မြို့တော်ဘိုဂိုတာမှာ ထောင်ပေါင်းများစွာသော ဆိုင်ကယ်မောင်းနှင်သူတွေ ဆန္ဒပြခဲ့ကြပြီး ယာဉ်ကြောပိတ်ဆို့မှုများ ဖြစ်ပွားခဲ့ပါတယ်။

#Yangon_Media_Group

#LocalNews
Published - 8 April 2022

အိန္ဒိယ - မြန်မာနယ်စပ်မြို့ဖြစ်သည့် တမူးမြို့တွင် ရပ်/ ကျေးအုပ်ချုပ်ရေးမှူး ၃၀ နီးပါးခန့်ဟာလက်နက်ကိုင်အဖွဲ့များ၏ လုပ်ကြံသတ်ဖြတ်ခြင်းကို ခံခဲ့ရတယ်လို့ တမူးမြို့ဒေသခံများထံမှ သိရပါတယ်။

#Yangon_Media_Group

#LocalNews
Published - 8 April 2022

နိုင်ငံခြားသား ပြည်ပဧည့်သည်အဝင်နည်းပါးမှုကြောင့် ပုဂံဒေသရှိ ယွန်းထည်လုပ်ငန်းများကို ယနေ့အချိန်အထိ ပြန်လည်လုပ်ကိုင်နိုင်ခြင်းမရှိသေးဘူးလို့ ပုဂံဒေသခံများထံမှ သိရပါတယ်။

#Yangon_Media_Group

Published 8 April 2022

ဆိုးရွားလာနေတဲ့ ငွေကြေးဖောင်းပွမှု၊ ငွေကြေးမူဝါဒများ လျော့တိလျော့လျဲဖြစ်မှုများနှင့် နိုင်ငံရေးသမားများက နိုင်ငံရေး အမြတ်ထုတ်နေကြမှုတွေကြောင့် အမေရိကန်နိုင်ငံသားတွေ အထူးသဖြင့် ဆင်းရဲသားတွေရဲ့ အသားတင်ဝင်ငွေတွေ လျော့ကျနေရပါတယ်။

ငွေကြေးဖောင်းပွမှုဟာ ချမ်းသာသူတွေထက် ဝင်ငွေနည်းပါးတဲ့သူတွေကို ပိုပြီးထိခိုက်နစ်နာနေရတာဖြစ်ပါတယ်။

Source CMG

#LocalNews
Published - 8 April 2022

ဆီထွက်သီးနှံနေကြာကို တစ်နိုင်ငံလုံးအတိုင်းအတာအနေနဲ့ ဧက ၁၅ သိန်း တိုးချဲ့စိုက်ပျိုးဖို့ ဝန်ကြီးဌာနအနေနဲ့ စီစဉ်နေပါတယ်။

#Yangon_Media_Group

#LocalNews
Published - 8 April 2022

အများပြည်သူတွေ ဖူးမြော်ကြည်ညိုနိုင်ရန်အတွက် သင်္ကြန်ပွဲတော်ရက်များအတွင်း ရွှေတိဂုံ စေတီတော်ကြီးကို မနက် ၅ နာရီမှ ည ၈ နာရီ အထိ(ပိတ်ရက်မရှိ)ဖွင့်လှစ်ပေးထားမှာဖြစ်တယ်လို့ သိရပါတယ်။

" စေတီတော်ကြီးကို သင်္ကြန်တွင်းကာလမှာ ပိတ်ရက်မရှိ ဖွင့်လှစ်ပေးထားမှာဖြစ်ပါတယ်။ ပုံမှန်အတိုင်း နံနက် ၅ နာရီက နေ ည ၈ နာရီအထိ အများပြည်သူတွေ ဖူးမြော်ကြည်ညိုနိုင်ဖို့ ဖွင့်လှစ် ပေးထားမှာဖြစ်ပါတယ်။နှစ်ဆန်းတစ်ရက်နေ့ကျရင်တော့ စေတီတော်ကြီးရဲ့ သြဝါဒစရိယဆရာ တော်ကြီးများရဲ့ လမ်းညွှန်မှုတွေနဲ့အညီ ပုံမှန်လုပ်နေကျဖြစ်တဲ့ နှစ်ဦးတရားပွဲအလှူတွေရှိပါမယ်။ နှစ်ဆန်းတစ်ရက်နေ့မှာ စတုဒီသာ လာရောက်လှူဒါန်းလိုတဲ့ အလှူရှင်တွေကိုလည်း စေတီတော်ကြီးရဲ့ ပုရဝုဏ်အတွင်းမှာ လှူဒါန်းနိုင်ဖို့ စီစဥ်ပေးထားပါတယ်။ မည်သူမဆိုလည်း စတုဒီသာတွေလာရောက်လှူဒါန်းလို့ရပါတယ်။"လို့ ရွှေတိဂုံစေတီတော် ဂေါပကအဖွဲ့မှ တာဝန်ရှိသူတစ်ဦးက YMG ကို ပြောပြခဲ့ပါတယ်။

ရွှေတိဂုံစေတီတော်မြတ်ကြီးအား ဘုရားဖူးအများ ပြည်သူများ စိတ်အေးချမ်းသာစွာ ဖူးမြော်ကြည်ညိုနိုင်စေရေး နံနက် ၅ နာရီမှ ည ၈ နာရီအချိန်အထိ အချိန်ကို တိုးမြှင့်ဖွင့်လှစ်ပေးထားတာဖြစ်တယ်လို့လည်း သိရပါတယ်။

ဓါတ်ပုံ - Shwedagon Pagoda(Page)

ymg/kg
#Yangon_Media_Group

#DailyNews
Published -8 April 2022

၁။ ပုဂံဒေသရှိ ယွန်းထည်လုပ်ငန်းများ ပြန်လည် လည်ပတ်နိုင်ခြင်းမရှိသေးဟုဆို။

၂။ တမူးမြို့တွင် ရပ်/ ကျေး အုပ်ချုပ်ရေးမှူး ၃၀ နီးပါး လက်နက်ကိုင်အဖွဲ့များ၏ လုပ်ကြံသတ်ဖြတ်ခြင်းကို ခံခဲ့ရ။

၃။ နေ့စဉ်မိုးလေဝသသတင်း။

၄။ အကြမ်းဖက်မှုများကာကွယ်နိုင်ရန် ဆိုင်ကယ်စီးနင်းမှုစည်းကမ်းကန့်သတ်ချက်အသစ်များအပေါ် ကိုလံဘီယာတွင် ဆိုင်ကယ်သမားများ ယာဉ်ကြောပိတ်ဆို့ဆန္ဒပြ...အစရှိတဲ့သတင်းတွေကို တင်ဆက်ပေးသွားမှာ ဖြစ်ပါတယ်။

#Yangon_Media_Group

#Local_Nes 
Published_ 8 April 2022

ယူနီဆက်နဲ့ မိတ်ဖက်အဖွဲ့အစည်းများက မတ်လအတွင်းမှာ ရခိုင်ပြည်နယ်၊ ကချင်ပြည်နယ်၊ ရှမ်းပြည်နယ်၊ ကရင်ပြည်နယ်နဲ့ ရန်ကုန်တိုင်းဒေသကြီးတို့ရှိ လူဦးရေ ၂၃,၀၀၀ ကျော်ကို အခြေခံကျန်းမာရေးစောင့်ရှောက်မှုများ ပံ့ပိုးပေးခဲ့ကြောင်း သိရပါတယ်။

မြန်မာနိုင်ငံရှိ ကလေးငယ်များစွာမှာ အာဟာရချို့တဲ့မှုကို တွေ့ကြုံခံစားနေကြရပြီး အခုအခါ မိသားစုများအနေနဲ့ မိမိတို့သားသမီးတွေကို အာဟာရပြည့်ဝတဲ့ အစားအစာတွေ ကျွေးမွေးနိုင်ဖို့ ခက်ခဲလာတယ်လို့ ဆိုပါတယ်။

ယူနီဆက်အနေဖြင့် အားနည်းထိခိုက်လွယ်တဲ့ ရပ်ရွာအသိုက်အဝန်းများအတွက် အာဟာရစီမံချက်များ တိုးချဲ့ပံ့ပိုးပေးနိုင်ဖို့ ဒေသခံမိတ်ဖက်အဖွဲ့အစည်းများနဲ့ ပူးပေါင်းဆောင်ရွက်နေကြောင်း သိရပါတယ်။

မြန်မာနိုင်ငံရှိ ကလေးငယ်ဦးရေ ငါးသန်းကျော်မှာ လူသားချင်းစာနာထောက်ထားမှု အကူအညီများ လိုအပ်နေပါတယ်။ ယူနီဆက်အနေနဲ့ လက်တွေ့လိုအပ်နေတဲ့နေရာတွေက အားနည်းထိခိုက်လွယ်တဲ့ ကလေးငယ်များနဲ့ မိသားစုများကို ထောက်ပံ့ကူညီပေးလျှက်ရှိပါတယ်။

မြန်မာနိုင်ငံရှိ ကလေးငယ်များနဲ့ အခြားထိခိုက်လွယ်သူများအတွက် အရေးပေါ် အာဟာရ၊ ကျန်းမာရေး၊ ရေ ၊ပတ်ဝန်းကျင်နဲ့ တစ်ကိုယ်ရေသန့်ရှင်းရေး၊ ပညာရေးနဲ့ ကလေးသူငယ်ကာကွယ်ရေးအကူအညီတွေပေးနိုင်ဖို့ ဆောင်ရွက်နေတယ်လို့ ယူနီဆက်ရဲ့ ထုတ်ပြန်ချက်မှာ ဖော်ပြထားပါတယ်။

ymg-mnn
#Yangon_Media_Group