#Local_News
Published_ 25 April 2022

မေ ၁ ရက်မှစတင်ကာ ဆီကန်မှထုတ်ယူသော စားသုံးဆီများကို သတ်မှတ်ချက်နဲ့ ကိုက်ညီတဲ့ ပေပါ၊ ဘောက်ဆာယာဉ်တွေကိုသာ ဆီထုတ်ယူခွင့်ပေးမယ်လို့ စားသုံးသူရေးရာဦးစီးဌာနက ထုတ်ပြန်ထားပါတယ်။

စားသုံးသူပြည်သူတွေ ဘေးဥပါဒ်အန္တရာယ် ကင်းရှင်းရေးအတွက် ဆီကန်မှ ထုတ်ယူသော စားသုံးဆီများကို Food Grade အဆင့်ရှိ အဝါရောင်ပေပါအသစ်၊ ဒါမှမဟုတ် သန့်စင်ပြီး ပေပါအဟောင်း၊ စားသုံးဆီသီးသန့်သယ်ဆောင်သော ဘောက်ဆာယာဉ်များနှင့် သန့်စင်ပြီး Food Grade Tank များသို့သာ ဆီဖြည့်သွင်းပေးမယ်လို့ ဆိုပါတယ်။

ဆီကန်မှထုတ်ယူတဲ့ စားသုံးဆီများကို သတ်မှတ်ချက်နဲ့မကိုက်ညီတဲ့ ပေပါနဲ့ ဘောက်ဆာယာဉ်တွေကို ဆီဖြည့်သွင်းပေးမှာ မဟုတ်ကြောင်း စားသုံးသူရေးရာ ဦးစီးဌာနရဲ့ ထုတ်ပြန်ချက်မှာ ဖော်ပြထားပါတယ်။

မြန်မာနိုင်ငံ ဆီကုန်သည်နှင့် ဆီလုပ်ငန်းရှင်များအသင်းက စားသုံးသူပြည်သူများ စျေးနှုန်းသက်သာစွာ ဝယ်ယူနိုင်ရေးအတွက် ဆီတစ်ပိသာကို ၅၆၀၀ ကျပ်နှုန်းဖြင့်လိုက်လံ ရောင်းချပေးလျက်ရှိနေပါတယ်။

ymg-mnn
#Yangon_Media_Group

#WorldPolitics
Published 25 April 2022

အမေရိကန်ပြည်ထောင်စုမှ ထိပ်သီးသံတမန်ပုဂ္ဂိုလ်နဲ့ ကာကွယ်ရေးထိပ်သီးအရာရှိတို့ဟာ တနင်္ဂနွေနေ့က ယူကရိန်းနိုင်ငံမြို့တော်ကိဗ်သို့ ရောက်ရှိလာခဲ့ကြောင်း ယူကရိန်းအရာရှိတစ်ဦးက ထုတ်ပြန်ကြေညာလိုက်ပါတယ်။

ဒီမတိုင်ခင်မှာ အခြားသောကမ္ဘာ့ခေါင်းဆောင်တွေကလည်း တိုက်ပွဲဖြစ်ပွားရာမြို့တော်ကို လာရောက်ခဲ့ကြပြီး ယူကရိန်းကို ထောက်ခံအားပေးကြောင်း ပြသခဲ့ကြပါတယ်။

အမေရိကန်နိုင်ငံခြားရေးဝန်ကြီး 'အန်တိုနီဘလင်ကန်' နဲ့ ကာကွယ်ရေးဝန်ကြီး'လွိက်ဂျေအော်စတင်(၃)'တို့ဟာ ယူကရိန်းသမ္မတ'ဗိုလိုဒီမီယာဇယ်လန်စကီ'နဲ့ တွေ့ဆုံခဲ့ကြပြီး ဖေဖော်ဝါရီ ၂၄ ရက်နေ့ရုရှားတို့ စတင်ကျူးကျော်ပြီးနောက်ပိုင်း ယူကရိန်းကိုလာရောက်ခဲ့တဲ့ ပထမဆုံး အမေရိကန်ထိပ်သီးအရာရှိများ ဖြစ်လာကြပါတယ်။

အဆိုပါတွေ့ဆုံမှုကို ယူကရိန်းသမ္မတအကြံပေးအတိုင်ပင်ခံ'အိုလက်ဆေအာစတိုဗစ်ချ်'က ရုရှားရှေ့နေတစ်ဦးနဲ့ နိုင်ငံရေးတက်ကြွလှုပ်ရှားသူတစ်ဦးတိုနဲ့ ယူကျုပေါ်ကနေအင်တာဗျူးပြုလုပ်ရာမှာ အတည်ပြုပြောကြားခဲ့တာဖြစ်ပါတယ်။
"အမေရိကန်ထိပ်သီးအရာရှိတွေ အခုယူကရိန်းကိုရောက်ရှိနေပြီး သမ္မတနဲ့ပြောဆိုနေကြပါတယ်။ သူတိုဘယ်လိုအကူအညီပေးနိုင်တာလဲဆိုတာနဲ့ ပတ်သက်ပြီး တစ်ခုခုဆုံးဖြတ်ချက်ချသွားဖွယ်ရှိပါတယ်" လို့ မစ္စတာ'အာစတိုဗစ်ချ်'က ပြောကြားခဲ့ပါတယ်။

အမေရိကန်အစိုးရဟာ ယူကရိန်းကို စစ်လက်နက်အကူအညီတွေထောက်ပံ့ပေးနေခဲ့ပြီး ရုရှားကိုလည်း နိုင်ငံတကာမှဒဏ်ခတ်ပိတ်ဆို့မှုတွေပြုလုပ်ဖို့ ဦးဆောင်လှုံ့ဆော်ခဲ့ကြပါတယ်။

ဒါပေမယ့် ဗြိတိန်ဝန်ကြီးချုပ်'ဘိုရစ်ဂျွန်ဆန်'၊ စပိန်နဲ့ ဒိန်းမတ်နိုင်ငံတို့မှ ဝန်ကြီးချုပ်များအပါအဝင် ဥရောပမှအရာရှိများစွာက ယူကရိန်းသို့လာရောက်ခဲ့ကြပြီးနောက် အမေရိကန်ထိပ်သီးအရာရှိတစ်ဦးဦးကို မြို့တော်ကိဗ်သို့စေလွှတ်ပေးဖို့ ဖိအားပေးလာကြပါတယ်။

လာရောက်ဆွေးနွေးမယ့်အကြောင်းကို အမေရိကန်ဘက်မှမကြေညာခဲ့ဘဲ မစ္စတာ'ဇယ်လန်စကီ'ကတော့ ဆွေးနွေးပွဲမှာ လိုအပ်တဲ့စစ်ရေးအကူအညီများအကြောင်း ထည့်သွင်းဆွေးနွေးသွားမယ်လို့ စနေနေ့ကမိန့်ခွန်းပြောကြားခဲ့ပါတယ်။

ပန်တဂွန်နဲ့ အမေရိကန်နိုင်ငံခြားရေးဌာနတို့ကတော့ မှတ်ချက်ပြုပြောကြားခြင်းမရှိခဲ့ပါဘူး။

မစ္စတာ'ဘလင်ကန်'ဟာ ဇန်နဝါရီလလယ်လောက်က ယူကရိန်းသို့လာရောက်ခဲ့ဖူးပြီး နောက်ဆုံးရောက်ရှိခဲ့တဲ့ ရာထူးမြင့်အမေရိကန်ထိပ်သီးအရာရှိဖြစ်ပါတယ်။

ဖေဖော်ဝါရီ ၁၄ ရက်နေ့က ကိဗ်မြို့တော်ရှိ အမေရိကန်သံရုံးပိတ်သိမ်းခဲ့ပြီး သံတမန်တွေလည်း နိုင်ငံကနေထွက်ခွာသွားခဲ့ကြပါတယ်။

နောက် ၁၀ ရက်အကြာမှာတော့ ရုရှားတို့စတင်ကျူးကျော်ခဲ့ကြကာ မြို့တော်ကိုသိမ်းပိုက်ဖို့ကြိုးစားခဲ့ကြပြီး ဒုံးကျည်တွေဗုံးတွေဖြင့် တိုက်ခိုက်ခဲ့ပါတယ်။

ယူကရိန်းတပ်ဖွဲ့တွေနဲ့ ရုရှားတပ်ဖွဲ့တွေတိုက်ခိုက်ခဲ့ကြပြီး ရက်သတ္တပတ်အနည်းငယ်အကြာမှာတော့ ကိဗ်မြို့တော်နားတဝိုက်ကနေ ရုရှားတပ်များဆုတ်ခွာသွားခဲ့ရာ အနောက်နိုင်ငံများမှခေါင်းဆောင်များက ဒီအခွင့်အရေးကိုအသုံးချပြီး မစ္စတာ'ဇယ်လန်စကီ'နဲ့အတူရပ်တည်ကြောင်းဖော်ပြဖို့ လာရောက်ခဲ့ကြပါတယ်။

မတ်လအတွင်း ပိုလန်၊ ချက်ပြည်သူ့သမ္မတနိုင်ငံ၊ ဆလိုဗေးနီးယားနိုင်ငံတို့မှ ဝန်ကြီးချုပ်များ ကိဗ်မြို့တော်သို့ လျှို့ဝှက်စွာလာရောက်ခဲ့ကြပါတယ်။

အဲဒီနောက် ဗြိတိန်၊ လစ်သူရေးနီးယား၊ လတ်ဗီးယား၊ ဆလိုဗက်ကီးယား၊ အက်စ်တိုနီးယား၊ စပိန်၊ ဒိန်းမတ်တို့မှ ခေါင်းဆောင်များနဲ့ ဥရောပကော်မရှင်ဥက္ကဌတို့လည်း ကိဗ်မြို့တော်နဲ့ ဘာခါမြို့များသို့ လာရောက်ခဲ့ကြပါတယ်။

အမေရိကန်သမ္မတ'ဂျိုးဘိုင်ဒန်'က မတ်လ ၂၅ ရက်နေ့က ယူကရိန်းနဲ့ ပိုလန်နယ်စပ်အနီးရှိ မြို့တစ်မြို့သို့ လာရောက်ခဲ့ပေမယ့် ယူကရိန်းနိုင်ငံထဲကိုတော့ မဝင်ရောက်ခဲ့ပါဘူး။

နောက်တစ်နေ့မှာ ပိုလန်နိုင်ငံမြို့တော်ဝါဆောမှာ မိန့်ခွန်းပြောကြားခဲ့ပြီး စစ်ဘေးခိုလှုံသူများကို အားပေးစကားပြောကြားခဲ့ပါတယ်။

အမေရိကန်အထက်ပိုင်းအရာရှိတွေက အီရတ်၊ အာဖဂန်တို့လို စစ်ဖြစ်ပွားရာနေရာတွေကို သွားရောက်ခဲ့တုန်းကလည်း မရောက်ရှိခင်အထိ ကြေညာခြင်းမရှိသလို တစ်ခါတလေဆိုရင် သူတို့ မပြန်မချင်းကြေညာတာမျိုး မပြုလုပ်ခဲ့ကြပါဘူး။

နိုင်ငံ့ခေါင်းဆောင်တွေ လာရောက်ဖို့အတွက် လုံခြုံရေးကိစ္စရပ်များအပြင် လေကြောင်းလမ်းခရီးစိတ်ချရဖို့ ခက်ခက်ခဲခဲစီစဉ်ရလေ့ရှိပါတယ်။

ဧပြီလအစောပိုင်းမှာ ဗြိတိန်ဝန်ကြီးချုပ်လာရောက်စဉ်ကလည်း ရထားအပါအဝင် ခရီးလမ်းမျိုးစုံနဲ့သွားလာခဲ့ရပါတယ်။

အိမ်ဖြူတော်က သမ္မတ'ဘိုင်ဒန်'ကိုတော့ စေလွှတ်ဖို့ငြင်းဆန်ခဲ့ပြီး အစိုရးအကြီးတန်းအရာရှိတွေကိုပဲ လုံခြုံရေးအနည်းငယ်ဖြင့် စေလွှတ်ခဲ့တာဖြစ်ပါတယ်။

ထိပ်သီးအရာရှိများ မသွားခင်ရက်ပိုင်းက အရှေ့ဘက်ဒေသတွေမှာ ရုရှားထိုးစစ်ဆင်မှုတွေကို ကာကွယ်နိုင်ဖို့ ဒေါ်လာသန်း ၈၀၀ တန် စစ်ရေးလက်နက်အကူအညီများကိုလည်း အမေရိကန်တို့က ယူကရိန်းထံထောက်ပံ့ပေးဖို့ ကြာသပတေးနေ့က အမေရိကန်ကကြေညာခဲ့ပါတယ်။

Source: NY Times
#Yangon_Media_Group

#WorldHealth
Published 25 April 2022

တစ်ခါသုံးကော်ဖီခွက်တွေက သဘာဝပတ်ဝန်းကျင်ကိုထိခိုက်စေနိုင်ပြီး ပါးလွှာတဲ့ပလတ်စတစ်အလွှာလေးတွေက ပြန်လည်အသုံးပြုနိုင်အောင်လုပ်ဖို့ အလွန်ခက်ခဲပါတယ်။

အခုဆိုရင် တစ်ခါသုံးခွက်တွေထဲ သောက်စရာပူပူထည့်သောက်ခြင်းက အဏုမြူပလတ်စတစ်အမှုန်လေးတွေ ထရီလီယံနဲ့ချီပြီး ဝင်ရောက်လာနိုင်တယ်လို့ တွေ့ရှိလာကြပါတယ်။

တစ်ခါသုံးအပူခံခွက်လေးတွေမှာ ပေါ့ပါးသေးငယ်တဲ့ပေါ်လီအီသိုင်လင်း(LDPE)ဖြင့်ဖုံးအုပ်ထားပြီး အရည်လုံအောင်ထိန်းသိမ်းပေးထားတဲ့ ပျော့ပျောင်းနူးညံ့တဲ့ပလတ်စတစ်အလွှာလေးဖြစ်ပါတယ်။

ထိုခွက်တွေထဲကို အပူချိန် ၁၀၀ ဒီဂရီဆဲလ်စီးယပ်စ်ရှိတဲ့ရေထည့်လိုက်တဲ့အချိန်မှာ ရေတစ်လီတာအတွင်း နာနိုအမှုန်လေးတွေထရီလီယံနဲ့ချီပြီး ထွက်လာတာကို တွေ့ရှိခဲ့ကြပါတယ်။

ဒီအမှုန်တွေက လူတွေနဲ့တိရိစ္ဆာန်တွေကို ဘေးအန္တရာယ်ဖြစ်စေလားဆိုတာ မသိရသေးကြောင်း၊ အမှုန်တွေထွက်လာတယ်ဆိုတာကတော့ သေချာနေကြောင်း စံချိန်စံညွှန်းနဲ့နည်းပညာတက္ကသိုလ်(NIST)မှ ဓာတုပညာရှင်'ခရစ္စတိုဖာဇန်မိုက်စတာ'က ပြောပြခဲ့ပါတယ်။

ကော်ဖီခွက်ကထွက်လာတဲ့ နာနိုအမှုန်လေးတွေကိုလေ့လာကြည့်ဖို့အတွက် 'ဇန်မိုက်စတာ'နဲ့သုတေသနအဖွဲ့က ခွက်ထဲကအရည်ကို ရေမှုန်လေးတွေဖြစ်အောင်ဖျန်းပြီး အခြောက်ခံလိုက်ကာ နာနိုအမှုန်တွေကျန်ရစ်ခဲ့အောင် ဖယ်ထားလိုက်ကြပါတယ်။

ရေမှုန်တွေခြောက်သွားတဲ့အခါ နာနိုအမှုန်တွေက အရွယ်အစားအလိုက် စီပြီးတည်ရှိနေပါတယ်။

နာနိုအမှုန်တွေကို အယ်လ်ကိုဟောတစ်မျိုးဖြစ်တဲ့ ဗြူတနောလ်အပူငွေ့ဖြင့် ထိတွေ့စေရာမှာလည်း အခြောက်ခံပြီးနောက် အမှုန်လေးတွေက အရွယ်အစားကြီးလာတာကိုတွေ့ရှိခဲ့ကြပါတယ်။

၂၀၂၀ ခုနှစ်က အိန္ဒိယနည်းပညာတက္ကသိုလ်တစ်ခုမှပြုလုပ်တဲ့ လေ့လာချက်မှာလည်း တစ်ခါသုံးအပူခံခွက်တစ်ခွက်မှာ မိုက်ခရိုပလတ်စတစ် ၂၅,၀၀၀ ခန့်နဲ့ ဇင့်၊ ခဲ၊ ခရိုမီယံဓာတ်များလည်းပါဝင်ကြောင်း တွေ့ရှိခဲ့ကြပါတယ်။

ပြီးခဲ့တဲ့ဆယ်စုနှစ်အတွင်း ဘယ်နေရာကိုပဲကြည့်ကြည့် ပလတ်စတစ်တွေမြင်တွေ့နေရကြောင်း 'ဇန်မိုက်စတာ'က ဆိုပါတယ်။

"အန်တာတိကရေခဲကန်တွေက နှင်းတွေကိုလေ့လာကြည့်တဲ့အခါ ၁၀၀ နာနိုမီတာထက်ပိုကြီးတဲ့ ပလတ်စတစ်အမှုန်တွေတွေ့ရှိရတာကြောင့် ဒီအရွယ်အစားက သက်ရှိဆဲလ်တွေထဲ မဝင်ရောက်နိုင်လောက်ပါဘူး" လို့ ဆိုပါတယ်။

Source: DailyMail
#Yangon_Media_Group

#LocalNews
Published - 25 April 2022

ဒီကနေ့ ဧပြီ ၂၅ ရက်၊ နံနက်အစောပိုင်းအချိန်က ပြင်ဦးလွင်-မန္တလေးအဆင်းလမ်းတွင် ၂၂ ဘီးယာဥ်တစ်စီး တိမ်းမှောက်မှုဖြစ်ပွားခဲ့ပြီး လူတစ်ဦးသေဆုံးကာ နှစ်ဦး ထိခိုက်ဒဏ်ရာရခဲ့တယ်လို့ သိရပါတယ်။

ဖြစ်စဥ်မှာ မန္တလေးတိုင်းဒေသကြီး၊ ပြင်ဦးလွင်မြို့နယ်၊ ပြင်ဦးလွင်- မန္တလေးအဆင်းလမ်း၊ မိုင်တိုင်အမှတ်(၂၅)မိုင်နှင့် (၂၄/၇)ဖာလုံကြားတွင် လားရှိုးမှ မန္တလေးသို့ ပြောင်းအိပ်များတင်ဆောင်လာသော HOWO (၂၂)ဘီးယာဉ်သည် ဘရိတ်ပေါက်၍ အရှိန်မထိန်းနိုင်ဘဲ လမ်း၏ ညာဘက်ခြမ်းရှိ ထင်းများတင်ဆောင်လာသော ကားအင်ဂျင်တပ် ထော်လာဂျီယာဉ်အား ဝင်ရောက်တိုက်မိမှု ဖြစ်ပွားခဲ့ပြီး တိမ်းမှောက်ခဲ့တာဖြစ်ပါတယ်။

အဆိုပါ ယာဥ်တိမ်းမှောက်မှုဖြစ်ပွားရာသို့ ပြင်ဦးလွင်ခရိုင်မီးသတ်စခန်းမှ ရှာဖွေကယ်ဆယ်ရေးယာဉ်(၁)စီး၊ ပြင်ဦးလွင်မြို့နယ်မီးသတ်စခန်းမှ မီးငြှိမ်းသတ်ယာဉ်(၁)စီး၊ ရတနာပုံမြို့သစ်နယ်မြေမီးသတ်စခန်းမှ မီးငြှိမ်းသတ်ယာဉ်(၁)စီးတို့ဖြင့် ရှာဖွေကယ်ဆယ်ရေးလုပ်ငန်းများကို သွားရောက် ဆောင်ရွက်ခဲ့ရတယ်လို့ သိရပါတယ်။

ယင်း ယာဉ်တိုက်မှုကြောင့် အမျိုးသား(၂)ဦး ထိခိုက်ဒဏ်ရာ(မစိုးရိမ်ရ)ရခဲ့ကာ အမျိုးသား(၁)ဦး
သေဆုံးခဲ့ရပြီး ပြင်ဦးလွင်နာရေးကူညီမှုအသင်းယာဉ်ဖြင့် ပြင်ဦးလွင် ပြည်သူ့ဆေးရုံကြီးသို့ ကူညီပို့ဆောင်ပေးခဲ့တယ်လို့ မီးသတ်တပ်ဖွဲ့က သတင်းထုတ်ပြန်ခဲ့ပါတယ်။

Photo - MFSD

ymg/kg
#Yangon_Media_Group

#WorldHealth
Published 25 April 2022

စိတ်ကျရောဂါပျောက်ဆေးသုံးစွဲသူတွေဟာ ဆေးမသုံးစွဲတဲ့စိတ်ကျဝေဒနာရှင်တွေထက် ပိုပြီးသက်သာတာမျိုးမတွေ့ရကြောင်း လက်ရှိလေ့လာချက်ကြီးတစ်ခုမှာ ဖော်ပြထားပါတယ်။

အမေရိကန်မှာ လွန်ခဲ့တဲ့ ၁၀ နှစ်အတွင်း စိတ်ဓာတ်ကျဝေဒနာခံစားနေရသူ ၁၇.၅ သန်းကိုလေ့လာခဲ့ကြပြီး စိတ်ကျရောဂါပျောက်ဆေးသုံးစွဲသူအရေအတွက်တဝက်နဲ့ ဆေးမသုံးစွဲသူအရေအတွက်တဝက် ပါဝင်ခဲ့ပါတယ်။

အဆိုပါနှစ်ဖွဲစလုံးဟာ ဆေးသုံးစွဲသည်ဖြစ်စေ မသုံးစွဲသည်ဖြစ်စေ စိတ်ကျန်းမာရေးအခြေအနေအနည်းငယ်တိုးတက်ခဲ့ကြောင်း တွေ့ရှိခဲ့ကြပါတယ်။

စိတ်ဓာတ်ကျဝေဒနာရှင်တွေအနေနဲ့ စိတ်ကျရောဂါပျောက်ဆေးသုံးစွဲတဲ့အခါ ကျန်းမာရေးအခြေအနေပေါ် သက်ရောက်မှုကိုသိရှိနိုင်ရန် ကာလရှည်စောင့်ကြည့်လေ့လာဖို့ ဆော်ဒီအာရေဗျနိုင်ငံ ကင်းဆော့ဒ်တက္ကသိုလ်မှ သုတေသီများကအကြံပြုလိုက်ပါတယ်။

အမျိုးသားကျန်းမာရေးဝန်ဆောင်မှုအဖွဲ့အစည်း (NHS)မှ ဆရာဝန်များက စိတ်ကျရောဂါပျောက်ဆေးတွေဟာ ဘေးထွက်ဆိုးကျိုးတွေဖြစ်ပေါ်စေနိုင်တဲ့အတွက် ဆေးညွှန်းပေးလေ့မရှိတော့ပါဘူး။

အခုဆိုရင် သာမန်စိတ်ကျရောဂါဝေဒနာရှင်များအတွက် ဆေးအသုံးမပြုခင် တိုင်ပင်ဆွေးနွေးကုသဖို့ အကြံပေးနေကြပါတယ်။

အခြားလေ့လာချက်တွေမှာတော့ ဆေးသုံးစွဲခြင်းက ကျန်းမာရေးအခြေအနေတိုးတက်လာစေကြောင်း ချေပပြောဆိုနေကြပါတယ်။

၂၀၁၇ မှ ၂၀၁၈ အတွင်း အင်္ဂလန်ရှိ အရွယ်ရောက်ပြီးသားလူဦးရေ ၁၇ ရာခိုင်နှုန်းဟာ စိတ်ကျရောဂါပျောက်ဆေး သုံးစွဲနေရပါတယ်။

အသုံးအများဆုံးဆေးတွေကတော့ citalopram, sertraline, fluoxetine အမျိုးအစားတွေဖြစ်ပြီး Celexa, Zoloft, Prozac အမှတ်တံဆိပ်တွေဖြစ်ပါတယ်။

၂၀၁၅ မှ ၂၀၁၈ အတွင်း အမေရိကန်မှာ အသက် ၁၈ နှစ်အထက်လူဦးရေ ၁၃.၂ ရာခိုင်နှုန်းဟာ ဆေးပုံမှန်သုံးစွဲနေခဲ့ကြောင်း ရောဂါထိန်းချုပ်ကာကွယ်ရေးစင်တာ (CDC)က ဖော်ပြထားပါတယ်။

Source: DailyMail.
#Yangon_Media_Group

Published 24 April 2022
ကုလသမဂ္ဂအကြီးအကဲ ကိဗ်ကိုမကြာမီလာမယ့်ခရီးဟာ ယူကရိန်းအတွက် ပိုမိုအားကောင်းတဲ့ ထောက်ခံမှုတွေ ယူဆောင် လာလိမ့်မယ်လို့ သူမျှော်လင့်တယ်လို့ ယူကရိန်းသမ္မတ ဗိုလိုဒီမာ ဇီလင်စကီးက ပြောပါတယ်။

ယူကရိန်းနိုင်ငံ၊ကိဗ်မြို့တော်ရဲ့မြေအောက်ဘူတာရုံတစ်ခု မှာ စနေနေ့ကပြုလုပ်ခဲ့တဲ့ နိုင်ငံတကာမီဒီယာများနှင့်တွေ့ဆုံပွဲမှာ သူက အဲသလိုပြောကြားခဲ့တာပါ။

ကုလသမဂ္ဂအထွေထွေအတွင်းရေးမှူးချုပ်ဟာ ရုရှားသမ္မတဗလက်ဒီမာပူတင်နှင့် ယူကရိန်းသမ္မတ ဗိုလိုဒီမာဇီလင်စကီးတို့ကို ဧပြီ ၂၆ရက်နှင့် ၂၈ ရက်တို့မှာ သွားရောက်တွေ့ဆုံဖို့ စီစဉ်ထားတာဖြစ်ပါတယ်။

Source CMG

 Published 24 April 2022

တောင်ကိုးရီးယားနိုင်ငံ ဆိုးလ်မြို့တော်မှာ နှစ်စဉ်ကျင်းပတဲ့ ဒေါင်လိုက်မာရသွန်အပြေးပြိုင်ပွဲကို ဧပြီ၂၃ ရက်က ကျင်းပခဲ့ရာမှာ လူပေါင်း ၇၀၀ ကျော်ပါဝင်ယှဉ်ပြိုင်ခဲ့ကြပါတယ်။

ဆိုးလ်မြို့မှာရှိတဲ့ အမြင့်ဆုံးမိုးမျှော်အဆောက်အဦကြီးမှာ ကျင်းပတဲ့ ဒေါင်လိုက် မာရသွန်ပွဲမှာ ပြိုင်ပွဲဝင် မာရသွန် အပြေးသမား ၇၅၀ဦးဟာ ၅၅၅ မီတာမြင့်ပြီး အထပ်ပေါင်း၁၂၃ထပ်ရှိတဲ့ Lotte ကမ္ဘာ့မျှော်စင်ကြီးရဲ့ လှေကားထစ်ပေါင်း ၂၉၁၇ထစ်ကို တက်ပြီး အပြေးပြိုင်ခဲ့ကြပါတယ်။

ကပ်ဘေးတွေရှိနေလင့်ကစား ဒီပွဲဟာ တကမ္ဘာလုံးက ပြည်သူတွေရဲ့ မျှော်လင့်ချက်တွေကို ယူဆောင်ပေးနိုင်လိမ့်မယ်လို့ ပွဲစီစဉ်သူတွေက မျှော်လင့်ထားပါတယ်။

“ကျွန်မအားကစားလုပ်ရတာသဘောကျတယ်။ဒီလိုစိတ်လှုပ်ရှားစရာကောင်းပြီး ကြည်နူးစရာ အငွေ့အသက်တွေနှင့် အတွေ့အကြုံရယူလိုပါတယ်။ အဲဒါကြောင့်ဝင်ပြိုင်တာပါ” လို့ မာရသွန်ပြိုင်ပွဲဝင်တစ်ဦးကပြောပါတယ်။ သူဟာ ဘော်စတွန် မာရသွန်မှာ ပြိုင်ပွဲဝင်ခဲ့သူပါ။

ပြိုင်ပွဲဝင်ကြသူတွေထဲမှာ ကြေးစားအားကစားသမားတွေနှင့် အပျော်တမ်းအပြေးသမားတွေ အသက်ကြီးရင့်သူတွေမှ ကလေးငယ်တွေအထိ အစုံပါဝင်ကြပါတယ်။ ကိုဗစ်-၁၉ကန့်သတ်ချက်ကြောင့် သူတို့ကို အုပ်စုတွေခွဲပြီး အသုတ်လိုက် ခွဲပြီး အဆောက်အဦထဲဝင်ကြရပါတယ်။

အပန်းဖြေဖို့အတွက်၁၀၂ထပ်မှာ ကစားသမားတွေ ရေငတ်ပြေသောက်ဖို့ အားဖြည့်အချိုရည်တွေထားပေးထားပါတယ်။

ဆိုးလ်မြို့ ဆောင်ပါဂူခရိုင်ရဲ့ မာရသွန်အသင်းဝင် ပြိုင်ပွဲဝင်တစ်ဦးက ၁၂၃ထပ်မှာ  နာရီဝက်ထက်လျော့ပြီး ပန်းဝင်ခဲ့ပါတယ်။

“ပြေးရတာ ကျွန်တော်သိပ်သဘောကျတယ်။ အဲဒါကြောင့် ဒီနေ့ သိပ်စိတ်မပူမိပါဘူး။ကျွန်တော်မျှော်လင့်ထားတာထက်တောင် ပျော်စရာကောင်းသေးတယ်။ နောက်နှစ်ထပ်လုပ်ရင် ကျွန်တော်သေချာပေါက်ထပ်လာဦးမယ်” လို့ သူကပြောပါတယ်။ နောက်တစ်ခါဆိုရင် မိနစ်၂၀နှင့်ပန်းဝင်အောင်လုပ်မယ်လို့လည်း သူကပြောပါတယ်။

Source CMG

#Local_news
Published_ 24 April 2022

၂၀၂၁-၂၀၂၂ ပညာသင်နှစ် အခြေခံပညာကျောင်းများရဲ့ စာမေးပွဲများ အောင်စာရင်းကို ဒီကနေ့ ဧပြီ ၂၄ ရက်မှာ သက်ဆိုင်ရာစာစစ်ဌာနများမှာ တစ်နိုင်ငံလုံးအတိုင်းအတာအနေနဲ့ ထုတ်ပြန်ကြေညာထားကြောင်း သိရပါတယ်။

အခြေခံပညာမူလတန်းအဆင့်၊ အလယ်တန်းအဆင့် နှင့် အထက်တန်းအဆင့် (နဝမတန်း)အထိ ကျောင်းတွင်းစစ်အတန်းပြီးမြောက်မှု စစ်ဆေးခြင်းစာမေးပွဲများကို ပြီးခဲ့တဲ့ မတ် ၁၇ ရက်မှ ၂၃ ရက်အထိ တိုင်းဒေသကြီးများနှင့် ပြည်နယ်များတွင် ကျင်းပခဲ့တာဖြစ်ပါတယ်။

ဧပြီ ၂၄ ရက်နေ့ ဒီကနေ့ မနက်ပိုင်းမှာ အခြေခံပညာကျောင်းများမှ ကျောင်းသား၊ ကျောင်းသူများနှင့် ကျောင်းသားမိဘများ အောင်စာရင်းလာရောက်ကြည့်ရှုခဲ့ကြပါတယ်။

၂၀၂၂-၂၀၂၃ ပညာသင်နှစ် အခြေခံပညာကျောင်းများကို လာမယ့် ဇွန် ၁ ရက် ဗုဒ္ဓဟူးနေ့မှာ စတင်ဖွင့်လှစ်သွားမှာဖြစ်ပြီး ကျောင်းအပ်လက်ခံခြင်းကို မေ ၂၅ ရက်မှ ၃၁ ရက်အထိ ဆောင်ရွက်ပေးသွားမှာဖြစ်တယ်လို့ သိရပါတယ်။

ymg-mnn
#Yangon_Media_Group

#LocalNews
Published - 24 April 2022

ကြက်အစာစျေးနှုန်းမြင့်မားလာမှုကြောင့် ကြက်ဥစျေးနှုန်းများလည်း မြင့်တက်လာပြီး စျေးကွက်အတွင်း ကြက်ဥတစ်လုံးလျှင် ကျပ် ၂၀၀ အထိ ပေါက်စျေးရှိနေတယ်လို့ သိရပါတယ်။

"သူက ဒိုင်ကနေယူရတဲ့စျေးကိုက တက်တာပေါ့။ တစ်လုံးကို ဒိုင်စျေးတင် ၁၅၀ ၊ ၁၆၀ ယူရတယ် အဲ့တော့ ကားခနဲ့ ဘာနဲ့ဆိုရင် ၂၀၀ လောက်နဲ့မှ ပြန်မရောင်းရင် မကိုက်ဘူးလေ။ အခုဆို တစ်ထောင်ဖိုးဆို ၅ လုံးပဲရတော့မယ့် သဘောပေါ့။ ဘဲဥ ဆိုရင် ၂၅၀ ၊ ၃၀၀ လောက် ရောင်းမှကိုက်တယ်။ ကြက်အစာစျေးတက်လို့ ကြက်ဥစျေးတက်တယ်လို့ ပြောတယ်။ တချို့ နေရာတွေမှာဆိုလဲ ကုန်ပစ္စည်းတွေ ပြတ်နေတာရှိတယ်။ ကြက်ဥတစ်လုံး ၂၀၀ ဆို တော့လဲ စားသုံးသူ ဝယ်တဲ့သူတွေက ဝယ်ရမှာ နည်းနည်းတွန့်တာပေါ့။"လို့ ကြက်ဥ လက်လီ/လက်ကား ရောင်းချသူတစ်ဦးက ပြောပြခဲ့ပါတယ်။

ယခင်က ငွေကျပ် ၁၀၀၀ ဖိုး ဝယ်ယူပါက ကြက်ဥ ၇ လုံးအထိ ရရှိသော်လည်း ယခုအခါတွင် ၅ လုံးမှ ၆ လုံးခန့်သာ ရရှိတော့ကြောင်း စားသုံးသူများက ပြောပါတယ်။

"ကြက်ဥစျေးက အသားစျေးနီးပါးလောက်ကို ဖြစ်နေတာ။ တစ်လုံး ၁၅၀ လောက်ဆို ဝယ်စားနိုင်သေးတယ်။ အခုက ကြက်ဥတစ်လုံး ၂၀၀ ဆိုတော့ မိသားစုများရင် ဝယ်စားရတာလည်း သိပ်မကိုက်တော့ဘူး လေ။"လို့ ဒဂုံဆိပ်ကမ်းမြို့နယ်အတွင်းမှာ နေထိုင်သူတစ်ဦးက ဆိုပါတယ်။

ယခင်က ကြက်ဥတစ်လုံးလျှင် ၁၅၀ ၊ ၁၆၀ ဝန်းကျင်သာရှိခဲ့ရာမှ ယခုအခါတွင် ကြက်ဥတစ်လုံး ကျပ် ၂၀၀ အထိ စျေးနှုန်းမြင့်တက်လာခဲ့တာလည်း ဖြစ်ပါတယ်။

ymg/kg
#Yangon_Media_Group

#LocalNews
Published_24 April 2022

စစ်ကိုင်းတိုင်းဒေသကြီး၊ မုံရွာမြို့နယ်၊ မုံရွာ-ရေဦးကားလမ်း ဖန်းခါးကျင်းကျေးရွာအနီးတွင် ဖွင့်လှစ်ထားသော BOC စက်သုံးဆီအရောင်းဆိုင်မှ ငွေကြေးများကို လုယက်ယူဆောင်၍ ဆိုင်ရှိပစ္စည်းများကို ဖျက်ဆီးမှုတစ်ခုဖြစ်ပွားခဲ့ကြောင်း သိရသည်။

ဧပြီလ ၂၃ ရက် ညနေ ၆ နာရီခန့်အချိန်က လူအင်အား ၁၅ ဦးခန့်ပါ ဆိုင်ကယ် ၇ စီးဖြင့် လက်လုပ်သေနတ်များကိုင်ဆောင်ရောက်ရှိလာသူများက အရောင်းဝန်ထမ်းများအား ဖမ်းဆီး၍ စက်သုံးဆီရောင်းရငွေ ငွေကျပ် ၁၀ သိန်းကို လုယက်ယူဆောင်ကာ Cannon အမျိုးအစား Printer ၁ လုံး ၊ 5 kg မီးသတ် ဆေးဘူး ၂ ဘူး ၊ ဝန်ထမ်းများပိုင် ဖုန်း ၃ လုံးတို့ကို ယူဆောင်သည့်အပြင် ဆီပန့် ၄ လုံး ဒီဂျစ်တယ်ဒိုင်ခွက် ၄ ခု ၊ ပြတင်းပေါက်မှန် ၁၀ ချပ် ၊ ကောင်တာစားပွဲ ၁ လုံး၊ Acer အမျိုးအစားကွန်ပျူတာ ၂ လုံး ၊ ရေခဲသေတ္တာ ၁ လုံး ၊ ရေအေးစက် ၂ လုံးတို့ကို ရိုက်ချိုးဖျက်ဆီးသွားကြောင်းလည်း သိရသည်။

ယခုအခါ အဆိုပါ လုပ်ရပ်ကျူးလွန်သူများအား သက်ဆိုင်ရာက အမြန်ဖမ်းဆီးနိုင်ရေး လုပ်ဆောင်နေကြကြောင်းလည်း သိရသည်။

ymg/mt
#Yangon_Media_group

Published 24 April 2022

တရုတ်နိုင်ငံက ရထားနှစ်စီးကို စမ်းသပ်မောင်းနှင်ပြပြီး ကမ္ဘာ့အမြန်ဆုံးရထား စံချိန်သစ်ထပ်ချိုးလိုက်ပါတယ်။ တရုတ်နိုင်ငံအလယ်ပိုင်း  ဟင်နန်းပြည်နယ်မှာ  မတူတဲ့ရထားလမ်းနှစ်ခုမှာ ရထားနှစ်စီးမောင်းနှင်စမ်းသပ်ခဲ့တာဖြစ်တယ်လို့ တရုတ်နိုင်ငံတော်ရထားအုပ်စုကုမ္ပဏီလိမိတက်က ပြောပါတယ်။

ရထားနှစ်စီးဟာ ဟင်နန်ပြည်နယ် ရွှန်းရှင်းခရိုင်ထဲက လဟာပြင်ရထာလိုင်းပိုင်းမှာ ကြာသပတေးန့ မွန်းလွဲ ၁၂နာရီ ၅၃ မိနစ်မှာ တစ်စီးနှင့် တစ်စီးဖြတ်သန်းကြပါတယ်။အဲဒီအချိန်မှာ ရထားတစ်စီးစီဟာ အမြန်နှုန်း တစ်နာရီကို ၄၃၅ကီလိုမီတာ နှင့် ပြေးလွှားခဲ့တာကို ရထားမှာတပ်ဆင်ထားတဲ့ အမြန်နှုန်းပြကိရိယာအရသိရပါတယ်။ တစ်စီးနှင့်တစ်စီးဖြတ်သန်းချိန်ဟာ ၀.၈၆ စက္ကန့်သာ ကြာညောင်းခဲ့ပါတယ်။

ယခုအမြန်နှုန်းဟာ ဧပြီ၁၂ရက်မှာ တရုတ်နိုင်ငံကပဲ စ့ချိန်တင်ထားတဲ့ တစ်နာရီ ၄၀၃ ကီလိုမီတာ အမြန်နှုန်းကို ကျော်လွန် စံချိန်ချိုးခဲ့တာဖြစ်ပါတယ်။ ဟင်နန်းပြည်နယ် ကျိုင်းကျိုးမြို့နှင့် အနောက်တောင်ပိုင်း ချုံချိုင်းမြူနီစပါယ်ဒေသတွေကနေ မောင်းနှင်ခဲ့ကြပါတယ်။

“ တရုတ်က လွတ်လပ်စွာ တီထွင်ထားတဲ့ နည်းပညာသစ်(၉)ခုကို  ဒီရထားတွေနှင့် စမ်းသပ်မောင်းနှင်ရာမှာ အသုံးပြုခဲ့ပါတယ်။ သူတို့ရဲ့ စမ်းသပ်မှုအတွင်း အလုံးစုံစွမ်းရည်ဟာ ကမ္ဘာ့ဦးဆောင်အဆင့်ကို ရောက်ရှိပါတယ်။ တရုတ်နိုင်ငံမှာ နည်းပညာကွာဟမှုတော်တော်များများကို ဖြည့်ဆည်းပေးနိုင်ပါတယ်” လို့ တရုတ်နိုင်ငံ ရထားသိပ္ပံအကယ်ဒမီရဲ့ ဒုတိယဥက္ကဋ္ဌချိုင်းကျုံးက ပြောပါတယ်။

Source CMG

#World_Record_China_Train_Speed

#China_State_Railway_Group_Set_World_Record

#China_Train_Technology

#LocalNews
Published - 24 April 2022

မြန်မာ့ နယ်စပ်ကုန်သွယ်ရေးမှာ တရုတ်နဲ့ နယ်စပ်ကုန်သွယ်ရေးက ပမာဏအများဆုံးအနေနဲ့ ရပ်တည်ခဲ့ရာကနေ ၂၀၂၁ - ၂၀၂၂ မီနီဘတ်ဂျက်ကာလမှာတော့ မြန်မာ-ထိုင်း နယ်စပ်ကုန်သွယ်ရေးက တဟုန်ထိုးမြင့်တက်ခဲ့တယ်လို့ ISP Myanmar ၏ သုတေသန စစ်တမ်းတွင် ဖော်ပြခဲ့ပါတယ်။

မီနီဘတ်ဂျက်ကာလအကုန်မှာ ထိုင်းနဲ့ နယ်စပ်ကုန်သွယ်ရေးကို ကာလတူနှိုင်းယှဉ်ရင် ယခင်ဘဏ္ဍာနှစ်ကထက် အမေရိကန်ဒေါ်လာသန်း ၆၄၀ ကျော်တက်လာခဲ့တာဖြစ်ပြီး မြန်မာ-ထိုင်း နယ်စပ်ကုန်သွယ်မှုဟာ ယခင်ဘဏ္ဍာနှစ်မှာ စုစုပေါင်း နယ်စပ်ကုန်သွယ်မှုရဲ့ ၃၄ ရာခိုင်နှုန်းကနေ ၇၅ ရာခိုင်နှုန်းကျော် ဖြစ်လာခဲ့တယ်လို့ ဆိုပါတယ်။

မြန်မာ-ထိုင်းကုန်သွယ်မှုမှာ အဓိက ကုန်သွယ်ဂိတ်ဖြစ်တဲ့ မြဝတီမှာ အမေရိကန်ဒေါ်လာသန်း ၆၀၀ နီးပါး၊ နဘုလယ်/ ထီးခီးမှာ အမေရိကန်ဒေါ်လာသန်း ၁၈၀ ကျော်၊ မောတောင်မှာ အမေရိကန်ဒေါ်လာ သုံးသိန်းနီးပါး မြင့်တက်ခဲ့ခြင်းဖြစ်ကြောင်း ISP Myanmar က
ဖော်ပြပါတယ်။

သို့သော်လည်း မီနီဘတ်ဂျက်ကာလအတွင်း မြန်မာ့နယ်စပ်ကုန်သွယ်ရေးမှာ ပို့ကုန်ရော သွင်းကုန်ပါ ကျဆင်းခဲ့သလို မြန်မာ့နယ်စပ်ကုန်သွယ်မှုစုစုပေါင်းတန်ဖိုးကို အရင်ဘဏ္ဍာနှစ်နဲ့ ကာလတူနှိုင်းယှဥ်ရင် အမေရိကန်ဒေါ်လာ ၂ ဒသမ ၂၆ ဘီလီယံ လျော့ကျခဲ့ကာ တရုတ်နယ်စပ်ကုန်သွယ်မှုမှာတော့ ကာလတူနှိုင်းယှဉ်ရင် အမေရိကန်ဒေါ်လာ ၂ ဒသမ ၄ ဘီလီယံ ကျဆင်းခဲ့တယ်လို့လည်း ISP Myanmar က ဆိုပါတယ်။

၂၀၂၁ ခုနှစ်၊ အောက်တိုဘာလအတွင်းမှာဆိုရင် ဗဟိုဘဏ်က ပို့ကုန်တင်သွင်းသူတွေအနေနဲ့ နိုင်ငံခြားငွေနဲ့ ရရှိတဲ့ ဝင်ငွေတွေကို ရက် ၃၀ အတွင်း နိုင်ငံခြားသုံးငွေရောင်းဝယ်ဖောက်ကားတဲ့ လိုင်စင်ရဘဏ်တွေကိုသာ ဈေးကွက်ပေါက်ဈေးနဲ့ မပျက်မကွက် ရောင်းချရမယ်လို့လည်း ထုတ်ပြန်ထားတာဖြစ်ပါတယ်။

ymg/kg
#Yangon_Media_Group