Published 25 April 2022

နိုင်ငံပေါင်း ၁၂ နိုင်ငံက ကလေးသူငယ်တွေအကြားမှာ အမျိုးအမည်မသိ စိုးရိမ်ဖွယ်ရာ အသည်းရောင်ရောဂါဖြစ်ပွားနေပြီး အနည်းဆုံး ကလေးတစ်ဦး သေဆုံးသွားတယ်လို့ ကမ္ဘာ့ကျန်းမာရေးအဖွဲ့ကြီးက ပြောပါတယ်။

အနည်းဆုံးကလေးပေါင်း ၁၆၉ ဦးမှာ စိုးရိမ်ဖွယ်အသည်းရောဂါတွေဖြစ်လာပြီး အဲဒီအထဲမှာ ဗြိတိန်နိုင်ငံမှာ ကလေး ၁၁၄ ဦးဖြစ်ပွားနေပါတယ်။ အဲဒီအပြင် အမေရိကန်၊စပိန်၊အစ္စရေး၊ဒိန်းမတ်နှင့် အခြားနိုင်ငံတွေမှာလည်း အလားတူရောဂါတွေ ဖြစ်ပွားနေတာတွေ့ရှိရတယ်လို့ ကမ္ဘာ့ကျန်းမာရေးအဖွဲ့ကြီးက ပြောပါတယ်။

လူနာတွေထဲမှာ တစ်လသားကလေးငယ်ကနေ ၁၆နှစ်အရွယ်အထိ ပါဝင်နေပါတယ်။ အဲဒီအထဲက ကလေး(၁၇)ဦးဟာ အသည်းအစားထိုး ခွဲစိတ်ကုသဖို့လိုအပ်ပါတယ်။

သေဆုံးမှုဖြစ်ခဲ့တဲ့ နိုင်ငံနှင့်ပတ်သက်လို့ အသေးစိတ်ကိုတော့ ကမ္ဘာ့ကျန်းမာရေးအဖွဲ့ကြီးက မထုတ်ပြန်ပါဘူး။

ရောဂါလက္ခဏာတွေထဲမှာ ဝမ်းလျောတာ၊ပျို့အံတာတွေပါဝင်ပြီး အများစုဟာ အဖျားမရှိကြပါဘူး။

အဲဒီရောဂါဖြစ်ပွားသူတွေအားလုံးမှာ ဖြစ်နေကျ အသည်းရောင်ဗိုင်းရပ်စ်(၅)မျိုးကိုလည်း မတွေ့ရှိရပါဘူး။

ရောဂါဖြစ်ပွားမှု ၇၄မှုမှာ အင်ဒီနိုဗိုင်းရပ်စ်တွေ တွေ့ရှိရပြီး အဲဒီအထဲက ၂၀ဦးဟာ ကိုရိုနာဗိုင်းရပ်စ်ကူးစက်ခံထားရပါတယ်။ ၁၉ဦးဟာ ကိုရိုနာဗိုင်းရပ်စ်ရော၊အင်ဒီနိုဗိုင်းရပ်စ်ရောတွေ့ရှိရပါတယ်။

ကူးစက်ခံရသူအများစုဟာ ကိုဗစ်-၁၉ ကာကွယ်ဆေးမထိုးနှံကြရသေးပါဘူး။ အဲဒါကြောင့်လည်း သူတို့ရဲ့ အသည်းရောင် ရောဂါဟာ ကာကွယ်ဆေးရဲ့ ဘေးထွက်ဆိုးကျိုးလို့ သတ်မှတ်လို့မရနိုင်ပါဘူး။

ကမ္ဘာ့ကျန်းမာရေးအဖွဲ့ဟာ အခြေအနေကို အနီးကပ်စောင့်ကြည့်နေပြီး ယူကေရဲ့ ကျန်းမာရေးဌာနှင့်ယင်းရဲ့ မိတ်ဖက် အဖွဲ့အစည်းတွေနှင့် ပူးပေါင်းဆောင်ရွက်နေတယ်လို့ပြောပါတယ်ခင်ဗျာ

Source CMG

Published: 25 April 2022

ရေအားနှင့် ရေပေါ် နေရောင်ခြည်စွမ်းအင်နှစ်မျိုးစပ် ကမ္ဘာ့အကြီးဆုံးထဲက တစ်ခုဖြစ်တဲ့ လျှပ်စစ်ဓာတ်အားပေးစက်ရုံတစ်ရုံကို ထိုင်းနိုင်ငံ အရှေ့မြောက်ပိုင်း ယူဘွန်ရက်ချန်သနီမှာ စတင်လည်ပတ်နေပြီ ဖြစ်ပါတယ်။ ထိုင်းနိုင်ငံက ၂၀၃၇ အရောက်မှာ နိုင်ငံရဲ့ လျှပ်စစ်ဓာတ်အားရဲ့ ၃၅ ရာခိုင်နှုန်းကို ပြန်လည်ပြည့်ဖြိုးမြဲ စွမ်းအင် တွေဖြစ်လာဖို့ ရည်မှန်းထားပါတယ်။

ဒီစီမံကိန်းဟာ ဘန်ကောက်ရဲ့ ကာဘွန်ထုတ်လုပ်မှုလျှော့ချရေး စီမံကိန်းအတွက် အဓိက ခြေလှမ်းအဖြစ် မှတ်ယူရမှာ ဖြစ်ပါတယ်။

ဒီစီံမံကိန်းမှာ အသစ်တည်ဆောက်တဲ့ ရေပေါ်နေရောင်ခြည်စွမ်းအင်ကွင်းတွေနှင့် လက်ရှိရေအားလျှပ်စစ်စက်ရုံကို ပေါင်းစပ် ထားတာပါ။ အဲဒီပြည်နယ်ရဲ့ သီရိဒွန်ဆည်မှာ ဟက်တာ၁၂၀ရှိတဲ့ရေပြင်ပေါ်မှာ ဆိုလာပြားပေါင်း တစ်သောင်း လေးထောင့် လေးရာကျော်တပ်ဆင်ပေးထားပါတယ်။

အဲဒီဆိုလာပြားတွေကို ထိုင်းနိုင်ငံရဲ့ ဘီ ဂရင်း ပါဝါ အများပိုင်ကုမ္ပဏီနှင့် တရုတ်စွမ်းအင် အင်ဂျင်နီယာကော်ပိုရေးရှင်းတို့က ပူးတွဲတည်ဆောက်ပေးခဲ့တာပါ။ အဲဒီနေရောင်ခြည်စွမ်းအင်သုံးစက်ရုံတွေကနေ အမျိုးသား Grid လိုင်းထဲ ၄၅ မဂ္ဂါဝင် ထည့်သွင်းပေးနိုင်ပါလိမ့်မယ်။

တစ်ပြိုင်နက်မှာပဲ အလားတူ စီမံကိန်း ၁၅ခုကို ထိုင်းနိုင်ငံရဲ့ ရေလှောင်ကန်ကြီး(၉)ခုမှာ တည်ဆောက်တော့မှာဖြစ်ပြီး ထိုင်းနိုင်ငံရဲ့ ကာဘွန်ထုတ်လုပ်မှုသုညအဆင့်ရည်မှန်းချက်အတွက် ပိုပြီးနီးစပ်လာနေပါတယ်။

“ ကျွန်တော်တို့ရဲ့ စွမ်းအင်လုံခြုံရေးတိုးမြှင့်ဖို့  ကြီးမားတဲ့ ခြေလှမ်းတစ်ခု လှမ်းလိုက်နိုင်တာကို ဂုဏ်ယူမိပါတယ်။ အနာဂတ်မှာနောင် အနှစ်၂၀မှ ၃၀အတွင်း  ကျွန်တော်တို့ရဲ့ နေရောင်ခြည်စွမ်းအင်စီမံကိန်းတွေကနေ ၅၀၀၀ မဂ္ဂါဝပ်အထိ လျှပ်စစ်ဓာတ်အားတွေ ထုတ်လုပ်နိုင်ပါလိမ့်မယ်။ အဲဒါဆို ရုပ်ကြွင်းလောင်စာအပေါ် ကျွန်တော်တို့မှီခိုနေရတာကို လျှော့ချပေးနိုင်ပါလိမ့်မယ်” လို့ ဆည်ရဲ့လျှပ်စစ်ဓာတ်အားစက်ရုံအကြီးအကဲ ဆန်ဝန်ပရုမ်ဆမ်လီက ပြောပါတယ်။

ထိုင်းနိုင်ငံတလျောက် စွမ်းအင်ကွန်ယက်ဟာ ရုပ်ကြွင်းလောင်စာတွေအပေါ် အလွန်အမင်းမှီခိုနေရတဲ့အတွက်  ကာဘွန် ထုတ်လုပ်မှုလျှော့ချဖို့က ခရီးရှည်ကြီးဖြစ်နေပါတယ်။ ယခုထိုင်းရဲ့လျှပ်စစ်ဓာတ်အားထုတ်လုပ်မှုစုစုပေါင်းရဲ့ ၈၀ ရာခိုင်နှုန်းဟာ ရုပ်ကြွင်းလောင်စာတွေနှင့် ထုတ်လုပ်နေရတာပါ။ပြန်လည်ပြည့်ဖြိုးမြဲစွမ်းအင်ကနေ ထုတ်လုပ်တာ ၁၇ ရာခိုင်နှုန်းပဲရှိပါတယ်။ဒါပေမယ့် ဒီလိုစီမံကိန်းတွေကတော့ ကောင်းတဲ့အလားအလာတွေဖြစ်ပါတယ်။

ကိုဗစ်ကြောင့် ဒုက္ခရောက်ကြရတယ်။ ဝင်ငွေတွေကျသွားပြီး ငွေကြေးအကူအညီရဖို့လည်း အတော်ခက်သွားတယ်။ တစ်ရွာလုံးက ဒီဆည်စီမံကိန်းကို ကျေးဇူးတင်ကြပါတယ်။ လူတွေရဲ့ ဘဝတွေသိသိသာသာပြောင်းသွားတာ တွေ့ရတယ်။ ပြည်နယ်မှာ စီးပွာရေးလည်းတိုးတက်လာပါတယ် လို့ ရွာသားတစ်ဦးဖြစ်တဲ့ အိုလန်အင်တီယမ်ကပြောပါတယ်။

Source: CMG

#LocalNews
Published - 25 April 2022

လတ်တလောမှာ ကိုဗစ်လူနာတွေပို့ဆောင်ပေးရမှု မရှိသလောက်နည်းနေပြီး မွေးလူနာနဲ့ အခြား သော ထိခိုက်ဒဏ်ရာရရှိသူတွေကို ပို့ဆောင်ပေးရတာအများဆုံးဖြစ်နေတယ်လို့ ရွှေလောင်းလှေပရဟိတဖောင်ဒေးရှင်း ဥက္ကဌဦးသော်တာထွေးကပြောပါတယ်၊၊

#Yangon_Media_Group

#Local News
Published-25 April 2022

ပုဂံဒေသမှာ ရှေးဟောင်းအဆောက်အအုံများ ပြုပြင်ထိန်းသိမ်းရေးနှင့် မြစ်ရေတိုက်စားမှုကာကွယ်ရေး ဆောင်ရွက်လျက်ရှိတယ်လို့ ရှေးဟောင်းသုတေသနဌာန(ပုဂံဌာနခွဲ)မှသိရပါတယ်၊၊

ရှေးဟောင်းအဆောက်အအုံအမှတ် (၁၅၉၉)ဘုရားတွင် မြောက်ဘက်ရင်ပြင်တံတိုင်း ပဲ့ကျပျက်စီးမှုအား အုတ်စားဖြည့်စီခြင်း၊ရှေးဟောင်းအဆောက်အအုံအမှတ် (၁၀၄၂) ဆင်ကအုတ်တိုက် အနောက်တောင်ထောင့် အထက်ချင်မိတ်တိုးအုတ်စားဖြည့်စီခြင်းလုပ်ငန်းတွေကို ပုဂံဌာနခွဲမှ ညွှန်ကြားရေးမှူး၊ ဒုတိယညွှန်ကြားရေးမှူး၊ လက်ထောက်ညွှန်ကြားရေးမှူးတွေနဲ့ လက်ထောက်‌ အင်ဂျင်နီယာတွေ၊ ဌာနအင်ဂျင်နီယာတွေက ကြည့်ရူစစ်ဆေးခဲ့ပါတယ်၊၊

ဒီ့အပြင် ရေအရင်းအမြစ်နှင့် မြစ်ချောင်းများ ဖွံ့ဖြိုးတိုးတက်ရေးဦးစီးဌာနနှင့် တင်ဒါအောင်မြင်တဲ့ လင်းလက်ပြည့်စုံ‌အောင် ကုမ္ပဏီလီမိတက်မှ ဆောင်ရွက်လျှက်ရှိတဲ့ လောကနန္ဒာ စွယ်တော်မြတ်စေတီတော်နဲ့ လောကနန္ဒာဘေးမဲ့တော ဥယျာဉ်တို့ကို ဧရာဝတီမြစ်ရေတိုက်စားမှုမှ ကာကွယ်ထိန်းသိမ်းနိုင်ရေးအတွက် Bored Pile အခြေပြုမြစ်ကမ်းထိန်း ကျောက်စီနံရံနဲ့ Gabion Box ကျောက်ဖြည့်မြေထိန်း အကာအရံတည်ဆောက်ခြင်းလုပ်ငန်းတွေကိုလည်း ကွင်းဆင်းစစ်ဆေးပြီး လိုအပ်သည်များကို ဖြည့်စွက်မှာကြားခဲ့တယ်လို့ သိရပါတယ်၊၊

ymg/tthl
#Yangon_Media_Group

#Local_News
Published_ 25 April 2022

ရခိုင်ပြည်နယ် မောင်တောမြို့နယ် (၄) မိုင်ရပ်ကွက်၊ UNHCR ရုံး ခြံဝင်းအတွင်း ဒီကနေ့ ၁၀ နာရီ ခွဲခန့်က အမှိုက်မီးရှို့ရာမှ မီးလောင်မှုဖြစ်ပွားခဲ့ကြောင်း သိရပါတယ်။

မီးလောင်မှုဖြစ်စဉ်မှာ မောင်တောမြို့နယ် (၄) မိုင်ရပ်ကွက်၊ UNHCR ကုလသမဂ္ဂ ဒုက္ခသည်များဆိုင်ရာ မဟာမင်းကြီးရုံး၊ ဌာနေကိုယ်စားလှယ်၏ ကွင်းဆင်းလုပ်ငန်းဆိုင်ရာ ရုံးဝန်းအတွင်း၌ မီးလောင်မှုဖြစ်ပွားနေကြောင်း တာဝန်သိရုံးဝန်ထမ်းတစ်ဦးက ဖုန်းဆက်သတင်းပေးပို့ခဲ့တာဖြစ်ပါတယ်။

ထို့ကြောင့် ခရိုင်မီးသတ်ဦးစီးမှူး လက်ထောက်ညွှန်ကြားရေး ဦးသန့်ဇင်နှင့် တပ်ဖွဲ့ဝင်များ၊ မြို့နယ်မီးသတ် ဦးစီးမှူး ဦးထွန်းရွှေခိုင်နှင့် တပ်ဖွဲ့ဝင်များက မီးငြှိမ်းသတ် ယာဉ် ၂ စီးဖြင့် သွားရောက်မီးငြှိမ်းသတ်ခဲ့ရာ နံနက် ၁၀ နာရီ ၃၅ မိနစ်တွင် မီးငြိမ်းသွားခဲ့ပါတယ်။

မီးလောင်ရသည့် အကြောင်းအရင်းမှာ ရုံးရှိ သန့်ရှင်းရေးဝန်ထမ်းတစ်ဦးက အမှိုက်များကို မီးရှို့ရာမှ ဧည့်ရိပ်သာနှင့်ဂိုဒေါင်ကြား၌ထားရှိသည့် ပလတ်စတစ် ပစ္စည်းတင်ခုံများကို မီးကူးစက်လောင်ကျွမ်းခဲ့ပြီး မီးလောင်မှုကြောင့် ပလတ်စတစ် ပစ္စည်းတင်ခုံ ၁၄ ခု မီးလောင်ဆုံးရှုံးခဲ့ကြောင်း သိရပါတယ်။

မီးလောင်မှုနှင့်ပတ်သက်၍ သန့်ရှင်းရေးဝန်ထမ်းဖြစ်သူ ဦးလှမောင်သိန်းအား မောင်တောမြို့မရဲစခန်းက အမှုဖွင့်အရေးယူ ဆောင်ရွက်လျက်ရှိကြောင်း မြို့နယ်မီးသတ် ဦးစီးဌာနမှ သိရပါတယ်။

ymg-mnn
#Yangon_Media_Group

#LocalNews
Published - 25 April 2022

နိုင်ငံ့လက်ရွေးစင်အားကစားသမားများ ပေါ်ထွက်လာစေရေးကို အထောက်အကူပြုနိုင်ဖို့အတွက် နွေရာသီအခြေခံ အားကစားသင်တန်းများအား ယနေ့ ဧပြီ ၂၅ ရက်မှ စတင်၍ နေပြည်တော် ကောင်စီနယ်မြေတွင် ဖွင့်လှစ်သင်ကြားပေးလျက်ရှိတယ်လို့ သိရပါတယ်။

"လူတစ်စုအားကစားမှ ပြည်သူတရပ်လုံးပါဝင်သော လူထုအားကစား ဖြစ်ပေါ်လာစေရေးတို့အပြင် အားကစားဆောင်ရွက်ခြင်းဖြင့် လူငယ်များ၏ ကျန်းမာကြံ့ခိုင်ရေး၊ ပညာရေး၊ လူမှုရေး၊ စွမ်းရည်၊ လူ့ကျင့်ဝတ်ဘက်စုံဖွံ့ဖြိုး တိုးတက်လာစေဖို့နဲ့ အားကစားဆောင်ရွက်ခြင်းဖြင့် မျိုးချစ်စိတ်ဓာတ်ရှင်သန် ထက်မြက်လာစေဖို့ ဖြစ်ပါတယ်။ ဒီသင်တန်းများက အစပြုပြီး အနာဂတ်ကို ပိုမိုကောင်းမွန်အောင် ဦးဆောင်ပေးနိုင်တဲ့အကျင့်စာရိတ္တကောင်းတဲ့ လူငယ်များ၊ အချိန်လေးစားသည့် လူငယ်များ၊ စည်းကမ်းလိုက်နာသည့် လူငယ်များ၊ သန့်ရှင်းမျှတသည့် စိတ်ရှိသော လူငယ်များဖြစ်အောင် ပြုစုပျိုးထောင်သွားမှာဖြစ်ပါတယ်။"လို့ အားကစားနှင့်လူငယ်ရေးရာဝန်ကြီးဌာန ပြည်ထောင်စုဝန်ကြီး ဦးမင်းသိန်းဇံက ဒီကနေ့ ပြုလုပ်တဲ့ ဖွင့်ပွဲအခမ်းအနားမှာ ပြောကြားခဲ့ပါတယ်။

အဆိုပါ သင်တန်းများကို အားကစားနှင့်လူငယ်ရေးရာဝန်ကြီးဌာနမှ ကြီးမှူးဖွင့်လှစ်ခဲ့ခြင်းဖြစ်ပြီး နွေရာသီအခြေခံ အားကစားသင်တန်းများ ဖွင့်ပွဲအခမ်းအနားကို ယနေ့ နံနက်(၉)နာရီက နေပြည် တော်ရှိ ဝဏ္ဏသိဒ္ဓိအားကစားရုံ(B)မှာ ကျင်းပပြုလုပ်ခဲ့တာဖြစ်ပါတယ်။

ဒါ့အပြင် လူငယ်လူရွယ်များ နွေရာသီအားလပ်ရက်တွင် အချိန်များကိုအကျိုးရှိစွာ အသုံးပြုတတ်စေရန်၊ အားကစားနည်းအလိုက် နည်းစနစ်မှန်ကန်စွာ သိရှိတတ်ကျွမ်းလာစေရန်၊ ထူးချွန်သော မျိုးဆက်သစ် အားကစားသမားများ ပေါ်ထွက်လာစေရန်၊ နိုင်ငံတော်မှ အားထားရသည့် မျိုးဆက်သစ်အားကစား မောင်မယ်များ ပေါ်ထွက်လာစေရန်ရည်ရွယ်၍ ယခုကဲ့သို့ နွေရာသီအခြေခံ အားကစားသင်တန်းများကို ဖွင့်လှစ်ရခြင်းဖြစ်တယ်လို့ သိရပါတယ်။

နွေရာသီအခြေခံ အားကစားသင်တန်းများကို နေပြည်တော်ရှိ မြို့နယ်(၈)မြို့နယ်တွင် ဖွင့်လှစ်သွားမည်ဖြစ်ပြီး ဘောလုံး၊ ဘော်လီဘော၊ ရိုးရာခြင်း၊ မြန်မာ့သိုင်း၊ ပိုက်ကျော်ခြင်း၊ အေရိုးဗစ်၊ လက်ဝှေ့၊ ကြက်တောင်၊ တိုက်ကွမ်ဒို၊ ခရစ်ကတ်၊ ဖူဆယ်၊ တင်းနစ်၊ ပြေးခုန်ပစ် စသည့်အားကစားနည်း(၁၃)နည်းတို့ကို တစ်မြို့နယ်တွင် အားကစား နည်း(၇)နည်းဖြင့် သင်ကြားပို့ချသွားမှာဖြစ်တယ်လို့ ဆိုပါတယ်။

ထို့အပြင် သင်တန်းကာလမှာလည်း ယနေ့ ဧပြီလ(၂၅)ရက်နေ့မှ မေလ (၁၄)ရက်နေ့အထိ(၂၀)ရက်ကြာ သင်ကြားပို့ချသွားမှာဖြစ်တယ်လို့ သိရပါတယ်။

ymg/kg
#Yangon_Media_Group

#LocalNews
Published - 25 April 2022

အခုရက်ပိုင်းအတွင်းနေ့အပူချိန်တွေမြင့်မားနေပြီး ခရမ်းလွန်ရောင်ခြည်ကျရောက်မှုတွေ များနေတဲ့အတွက် ပြည်သူအများ သတိပြုကာကွယ်ကြဖို့လိုအပ်တယ်လို့ မိုးလေဝသနှင့် ဇလဗေဒညွှန်ကြားမှုဦးစီးဌာန၊ညွှန်ကြားရေးမှူးဦးလှထွန်းက သတိပေးပြောကြားလိုက်ပါတယ်၊၊

#Yangon_Media_Group

#LocalNews
#Published - 23 Apr 2022

တပ်မတော်ကာကွယ်ရေးဦးစီးချုပ် ရဲ့ ငြိမ်းချမ်းရေးဖိတ်ခေါ်မှုက လက်ရှိနိုင်ငံတော်မှာဖြစ်ပေါ်နေတဲ့အကြပ်အတည်းတွေကို ဖြေရှင်းဖိုအတွက် လမ်းစတစ်ခုအဖြစ်အသုံးချသင့်တယ်လို ပြည်သူ့ပါတီဥက္ကဌဦးကိုကိုကြီးကပြောပါတယ်။

#Yangon_Media_Group

#DailyNews
Published -25 April 2022

၁။ ငြိမ်းချမ်းရေးဖိတ်ခေါ်မှုကို နိုင်ငံရေးအကြပ်အတည်းဖြေရှင်းရေးလမ်းစအဖြစ် အသုံးချသင့်ဟုဦးကိုကိုကြီးပြောကြား

၂။ ကင်ဆာဖြစ်နိုင်သည့် ခရမ်းလွန်ရောင်ခြည်ကျရောက်မှုများနေ၍ သတိပြုကာကွယ်ရန်လိုနေ

၃။ မိုးလေဝသ သတင်း

၄။ အမေရိကန်ကျူးကျော်မှုအတွင်း အလုယက်ခံခဲ့ရာမှ ပြန်လည်ရရှိခဲ့သော အီရတ်ပန်းချီပန်းပုလက်ရာများ ဘဂ္ဂဒက်တွင်ပြသ...အစရှိတဲ့သတင်းတွေကို တင်ဆက်ပေးသွားမှာ ဖြစ်ပါတယ်။

#Yangon_Media_Group

#LocalNews
Published - 25 April 2022

မော်လမြိုင်မြို့တွင် ဆိုင်ကယ်တက္ကစီဌားစီးပြီး ဆိုင်ကယ်သမားကို ရာဘာခြံထဲ၌ ရိုက်သတ်ကာ အဆိုပါ ဆိုင်ကယ်အား လုယူထွက်ပြေးသည့်ဖြစ်စဥ်တစ်ခု ဒီကနေ့ ဧပြီ ၂၅ ရက်၊ နံနက်ပိုင်းအချိန်က ဖြစ်ပွားခဲ့တယ်လို့ သိရပါတယ်။

ဖြစ်စဥ်မှာ ယနေ့ နံနက် ၉ နာရီ မိနစ် ၅၀ အချိန်ခန့်က မော်လမြိုင်မြို့၊ မင်းရွာကျေးရွာ၊ အားကစားသိပ္ပံရှေ့ ရာဘာခြံထဲတွင် ဆိုင်ကယ် တက္ကစီသမားတစ်ဦး သေဆုံးနေကြောင်းရပ်ကွက် နေပြည်သူက သတင်းပေးပို့မှုအရ ဒေသခံလူမှုကယ်ဆယ်ရေးအဖွဲ့ဖြစ်တဲ့ ဘိုဘိုဝင်း (Rescue) အရေးပေါ်ကယ်ဆယ်ရေးအဖွဲ့ နှင့် သက်ဆိုင်ရာတာဝန်ရှိသူများ သွားရောက်စစ်ဆေးခဲ့ ရတာဖြစ်ပါတယ်။

ထိုသို့ စစ်ဆေးခဲ့ရာတွင် ဆိုင်ကယ်တက္ကစီဌားစီးပြီး ဆိုင်ကယ်သမားကို ရိုက်သတ်၊ဆိုင်ကယ်နှင့်ဖုန်းလုပြေးသွား‌သည့် ‌ပုံစံဖြစ်နေသဖြင့် သေဆုံးသူအား လိုအပ်သည့်များကို စစ်ဆေးဆောင်ရွက်ခဲ့ပြီး မော်လမြိုင်ဆေးရုံကြီး OPD မှတစ်ဆင့်ရင်ခွဲရုံသို့ ကူညီပို့ဆောင်ပေးခဲ့ရတယ်လို့ ဘိုဘိုဝင်း (Rescue)အဖွဲ့က သတင်းထုတ်ပြန်ခဲ့တာဖြစ်ပါတယ်။

သေဆုံးသွားသည့် ဆိုင်ကယ်တက္ကစီမောင်းနှင်သူမှာ မော်လမြိုင်မြို့၊ တောင်ရှမ်းစုရပ်နေ ထော့မယ်ပါတက္ကစီဆိုင်ကယ်ယာဥ်မောင်း မောင်ကျော်ထူးဖြစ်ပြီး ၄င်းသည် ကလေးတစ်ယောက်ဖခင်ဖြစ်တယ်လို့ ကြားသိရကြောင်း ဒေသခံလူမှုကယ်ဆယ်ရေးအဖွဲ့က ပြောပါတယ်။

Photo - ဘိုဘိုဝင်း (Rescue)

ymg/kg
#Yangon_Media_Group

Published 25 April 2022

ယူကရိန်းသမ္မတ ဗိုလိုဒီမာဇီလင်စကီးဟာ ယူကရိန်းနိုင်ငံ ကိဗ်မြို့တော်မှာ အမေရိကန်နိုင်ငံခြားရေးဝန်ကြီး အန်တိုနီ ဘလင်ကန်နှင့် ကာကွယ်ရေးဝန်ကြီး လွိုက်အော်စတင်တို့ကို ဧပြီ(၂၄)ရက် တနင်္ဂနွေနေ့က တွေ့ဆုံခဲ့ပါတယ်။

ဒါဟာ ဖေဖော်ဝါရီလကုန်ပိုင်း ရုရှားတို့ကျူုးကျော်မှုစတင်ကတည်းက ယူကရိန်းကိုလာရောက်တဲ့ ပထမဆုံးသော အမေရိကန်အစိုးရ အဆင့်မြင့်အရာရှိကြီးတွေဖြစ်ပါတယ်။

သူတို့က ခရီးစဉ်အတွင်းမှာ ယူကရိန်းကို စစ်ရေးအကူအညီအဖြစ် ဒေါ်လာသန်း၇၀၀ ပေးအပ်မယ်လို့ အမေရိကန်ဝန်ကြီး နှစ်ဦးကကြေညာသွားပါတယ်။

Source AFP

#LocalNews
Published - 25 April 2022

ရန်ကုန်မြို့၏ လူစည်ကားရာနေရာများတွင် လောင်းကစားဝိုင်းဆန်ဆန်ပြုလုပ်၍ အုပ်စုဖွဲ့ပြီး
မသိနားမလည်သူများကို အကြောင်ရိုက်ကာ လိမ်လည်မှုကျုးလွန်လုယက်သူတွေ ရှိနေတယ်လို့ မြို့ခံများထံမှ သိရပါတယ်။

ပြီးခဲ့တဲ့ရက်ပိုင်းအတွင်းက ရန်ကုန်မြို့ရဲ့ လူစည်ကားရာနေရာတစ်ခုဖြစ်တဲ့ တာမွေမြို့နယ် အတွင်းရှိ ယုဇနပလာဇာရှေ့တွင် လူ (၈)ယောက်ခန့်ပါ အဖွဲ့တစ်ဖွဲ့က လောင်းကစားဝိုင်းဆန်ဆန်ပြုလုပ်၍ ဘေးမှရပ်ကြည့်နေသည့် ကောင်လေးတစ်ဦးထံမှ ဖုန်းကိုလုယူ၍ အဆိုပါဖုန်းပိုင်ရှင်ကောင်လေးအား အုပ်စုဖြင့် ဝိုင်းဝန်းထိုးကြိတ်ရိုက်နှက်မှုတွေရှိခဲ့ကြောင်း ယင်း
ဖြစ်စဥ်ကို မျက်မြင်တွေ့ခဲ့ရသူတစ်ဦးက ယခုလို ပြောပြထားခဲ့တာပါ။

"နေ့လည် ၃ နာရီလောက်က ယုဇနပလာဇာရှေ့ ကားမှတ်တိုင်နားမှာ ဖြစ်သွားတာပါ။ ကားမှတ်တိုင်နားမှာ လောင်းကစားဝိုင်း တစ်ခုလုပ်ပြီး မှတ်တိုင်မှာရှိတဲ့သူတွေကို ပစ်မှတ်ထားတယ်။ သူတို့ လူချည်းပဲ(၈)ယောက်လောက်ရှိမယ်ထင်တယ်။ အဲ့ဒီမှတ်တိုင်မှာ သူတို့ကစားနေတဲ့ဝိုင်းကို ကြည့်တဲ့လူငယ်ကောင်လေးကို ပထမဦးဆုံး ပိုက်ဆံ ငါးသောင်းထိုးပေးပြီး လောင်းကစားဝိုင်းထဲမှာ သွားပေးခိုင်းတယ်။

အဲ့ဒီကောင်လေးက မယူဘူး အတင်းငြင်းတာကို အမျိုးမျိုးပြောပြီး သွားပေးခိုင်းတယ်။ အဲ့ဒီကောင်လေးသွားပေးတော့ အနီအစိမ်းအကွက်မှာ ချပေးလိုက်တာနဲ့ မင်းပေါက်ပြီဆိုပြီးနောက်ထပ် ၅ သောင်းထပ်ထုတ်ပေးတယ်။ ဘေးနားက သူ့လူတွေကလည်း လုံးဝရှုပ်ယှက်ခက်သွားအောင် ဗြာများပြီး အာရုံနောက်သွားအောင်ကိုလုပ်တာ ခဏချင်းဘဲ မင်းဖုန်းပေး ဘာညာဆိုပြီး အတင်းတောင်းယူ Lock တွေဘာတွေတောင် ဖွင့်ခိုင်းတာ အဲ့ဒီအခါမှ ကောင်လေးက ကျနော့် ဖုန်း ကျနော့်ဖုန်းပြန်ပေးဆိုပြီးတောင်းတာ ဖုန်းမပေးတဲ့အပြင် မျက်နှာကိုဖြတ်ရိုက်ပြီးကန်ကျောက်တာတွေတောင်လုပ်တာ။ လူမြင်ကွင်းကြီးမှာနော်။ ပြီးတော့ သူတို့အဖွဲ့က ဖုန်းကိုလုပြီး တက္ကစီနဲ့ပြေးဖို့လုပ်တယ်။" လို့ အဆိုပါ ဖြစ်စဥ်အား တွေ့မြင်ခဲ့သူတစ်ဦးက ပြောပြခဲ့ပါတယ်။

အဆိုပါ လုယက်မှုဗီဒီယိုကိုလည်း ရန်ကုန်မြို့နေလူထု သတိထားဂရုပြုရန်အတွက် လူမှုကွန်ရက် ပေါ်တွင် ပြန်လည်မျှဝေပေးခဲ့ပြီး ကြည့်ရှုသူအများအပြားရှိခဲ့သလို မှတ်ချက်ပေးသူတွေလည်း အများအပြားရှိခဲ့ကြတာပါ။

"ဒီလောက်လူစည်ကားပြီး လူအများကြီးရှိတဲ့နေရာမှာဖြစ်တာတောင် အဲ့ဒီ အကိုက Video ရိုက်ပေးလို့ ဒီသတင်း ဒီအခြေအနေကို သိရတာ။ မဟုတ်ရင် ဒီအဖြစ်အပျက်ကို ဘယ်သူမှ သိမှာတောင်မဟုတ်ဘူး။

အဲဒီနားက ဝင်မပါကြတဲ့အပြင် ပုံတောင် ရိုက်ပေးမယ့်သူမရှိဘူးဗျာ့။ အလုခံရတဲ့ဖုန်းက iphone ထင်တယ်။ဖုန်းတင်မကဘူး၊ လွယ်ထားတဲ့ အိတ်လည်း ကြိုးပျက် ပိုက်ဆံတွေပါ လုသွားတာ။ အော်ပြီး အကူအညီတောင်းပေမယ့် ကူညီမယ့်သူ တစ်ယောက်မှ မရှိပါဘူး။

ကိုယ်ဖြစ်ကိုယ်ခံဆိုတဲ့ ပုံစံကြီး အခြေအနေကြီးကို ရောက်နေပြီ။ လူအစည်အကားဆုံးအချိန် လူအစည်အကားဆုံး နေရာတစ်ခုမှာ အဲ့လိုလုပ်တာဆိုတော့ ဘယ်လောက်တောင်အခြေအနေဆိုးနေပြီလဲ မပြောတတ်တော့အောင်ပါပဲ။"လို့ ၄င်းက ဆက်လက်ပြောပြခဲ့ပါတယ်။

ဒါ့အပြင် ရန်ကုန်မြို့၏ ဆင်ခြေဖုံးမြို့နယ်များတွင် လုယက်မှုဖြစ်စဥ် အချို့ရှိနေပြီး ရန်ကုန်မြို့တွင်း မြို့နယ်များမှာလည်း ကားဘက်မှန် ဖြုတ်ယူခိုးယူသည့်ဖြစ်စဥ်များ ရှိနေတာဖြစ်ပါတယ်။

ဒါကြောင့် ပြည်သူများအနေနဲ့ ဂရုတစိုက် သွားလာနေထိုင်ကြဖို့ကိုလည်း ပြည်သူအချင်းချင်း အသိပေးနှိုးဆော်မှုတွေကို ပြုလုပ်ထားတာဖြစ်ပါတယ်။

ymg/kg
#Yangon_Media_Group