#Local_News
Published_ 10 Feb 2022

ကရင်ပြည်ပြည်နယ်၏မြို့တော် ဘားအံကို အစိမ်းရောင်မြို့တော်ဖြစ်စေရေး အကောင်အထည်ဖော်ဆောင်ရွက်လျက်ရှိရာ ယမန်နေ့နံနက်ပိုင်းက ဘားအံမြို့ (မော်လမြိုင်) ဘက်ခြမ်း မြို့အဝင်ဖားစည်ကျွဲချိုမုခ်ဦးကို ဖွင့်လှစ်ခဲ့ကြောင်း သိရပါတယ်။

ကရင်ပြည်နယ်မြို့တော် ဘားအံမြို့အား တင့်တယ်ခန့်ညားသော မြို့အဝင်မုခ်ဦးဆိုင်းဘုတ်တစ်ခု တည်ဆောက်နိုင်ရေးအတွက် ကရင်လူမျိုးတို့၏ အမျိုးသားသင်္ကေတ တစ်ခုဖြစ်တဲ့ ဖားစည်နှင့်ကျွဲချိုမုခ်ဦးခုံး ဒီဇိုင်းပုံစံကို အတည်ပြုရွေးချယ်ပြီး တည်ဆောက်ခဲ့တယ်လို့ ဆိုပါတယ်။

အဆိုပါမုခ်ဦးဟာ အလျား ၇၀ ပေ၊ အနံ ၆ ပေ၊ အမြင့် ၂၅ ပေရှိ ဖားစည်ကျွဲချိုမုခ်ဦးခုံးပုံစံဖြစ်ပြီး ၂၀၂၂ ခုနှစ် ဇန်နဝါရီလ ၁ ရက်နေ့တွင် စတင်တည်ဆောက်ခဲ့ကာ ဖေဖော်ဝါရီလ ၇ ရက်နေ့တွင် ပြီးစီးခဲ့တယ်လို့ သိရပါတယ်။
မုခ်ဦးကို ကရင်ပြည်နယ်ဝန်ကြီးချုပ်ဦးစောမြင့်ဦး၊ ပြည်နယ်တရားလွှတ်တော် တရားသူကြီးချုပ်၊ ပြည်နယ်အစိုးရအဖွဲ့ဝင်များနဲ့ တာဝန်ရှိသူများက ဖွင့်လှစ်ပေးခဲ့ကြတယ်လို့ သတင်းထုတ်ပြန်ထားပါတယ်။

ymg-mnn
#Yangon_Media_Group

#LocalHealth
Published - 10 Feb 2022

ကိုဗစ်ရောဂါရဲ့ မျိုးရိုးဗီဇပြောင်း ပိုး အိုမီခရွန်ကူးစက်ခံရမှု နှုန်းမြင့်တက်လာတာကြောင့် ရန်ကုန်တိုင်းဒေသကြီး၊တောင်ဒဂုံမြို့နယ်က အောင်မြင့်မိုရ်ကိုဗစ်ကုသရေးစင်တာကို ဖေဖော်ဝါရီလ ၉ ရက်နေ့တွင်စတင်ဖွင့်လှစ်ခဲ့ပြီး ကိုဗစ်လူနာ ၈၄ ဦးစတင်ခဲ့တယ်လို့ စင်တာမှ သိရပါတယ်။

အဆိုပါစင်တာကို OXYGENDONOURS and VOLUNTEERS မှ ဦးစီးကာကျန်းမာရေးဝန်ထမ်းများ နဲ့ ဗော်လန်တီယာ စုစုပေါင်း ၂၄ ဦး က လုပ်ငန်းတာဝန်များစတင်ထမ်းဆောင်ခဲ့ပြီး ကိုဗစ်လူနာကျား(၃၉) ဦး၊မ(၄၅)ဦး စုစုပေါင်း ၈၄ ဦးစတင်လက်ခံခဲ့တယ်လို့ သိရပါတယ်။

ကိုဗစ်ရောဂါတတိယလှိုင်းအပြီးနောက် ရန်ကုန်မြို့က ကိုဗစ်စင်တာတွေ ယာယီပိတ်သိမ်းခဲ့ပြီး အသင့်အနေအထားနဲ့ ရောဂါကူးစက်မှုကိုစောင့်ကြည့်လျက်ရှိကာ ယခုအခါမှာ ရန်ကုန်တိုင်းဒေသကြီးအတွင်း ကူးစက်မှုတွေရှိလာတာကြောင့် ပြန်လည်ဖွင့်လှစ်ဖို့ ပြင်ဆင်ရတာဖြစ်တယ်လို့ သိရပါတယ်။

ယခုကာလတွင် ရန်ကုန်မြို့ အပါအဝင် မြို့ကြီးအချို့မှာ ကိုဗစ်အစုအပြုံလိုက်ဖြစ်ပွားမှုနဲ့ အိုမီခရွန်ရောဂါပိုး ကူးစက်မှုတွေလည်းရှိနေတဲ့အတွက် ပြည်သူလူထုတွေအနေနဲ့ ကိုဗစ်စည်းကမ်းကို အထူးသတိပြုလိုက်နာကြဖို့နဲ့ ကာကွယ် ဆေးထိုးနှံကြဖို့ကိုလည်း ကျန်းမာရေးပညာရှင်များက တိုက်တွန်းထားပါတယ်။

ဒါ့အပြင် အိုမီခရွန်ဗီဇပြောင်း ကိုဗစ်-၁၉ ရောဂါပိုး ကူးစက်မှုမှကာကွယ်ရေးအတွက် ကိုဗစ်-၁၉ ရောဂါကာကွယ်ရေး အခြေခံစည်းမျဉ်းစည်းကမ်းများကို တိကျစွာလိုက်နာကြဖို့နဲ့ သံသယရောဂါလက္ခဏာရှိသူများအနေဖြင့် နီးစပ်ရာကျန်းမာရေးဌာနသို့ ချက်ချင်းသတင်းပေးပို့ကြဖို့ ကျန်းမာရေးဝန်ကြီးဌာနက တိုက်တွန်းနှိုးဆော်ထားပါတယ်။

ကျန်းမာရေးဝန်ကြီးဌာန၏ နောက်ဆုံးထုတ်ပြန်ထားတဲ့ အချက်အလက်တွေအရလည်း မြန်မာနိုင်ငံမှာ အိုမီခရွန်ရောဂါပိုးကို နိုင်ငံခြားသားရော၊ မြန်မာနိုင်ငံသားအပါအဝင် စုစုပေါင်း ၃၄၈ ဦးထံမှာ တွေ့ရှိထားတာပါ။

မြန်မာနိုင်ငံတွင် ကိုဗစ်-၁၉ ရောဂါပိုးကူးစက်မှု ပြန်လည်မြင့်တက်နေပြီး ကူးစက်ခံရသူအများဆုံးမှာ ရန်ကုန်တိုင်းဒေသကြီးမှဖြစ်ကြောင်း ကျန်းမာရေးဝန်ကြီးဌာနက ထုတ်ပြန်တဲ့ ဖေဖော်ဝါရီ ၈ ရက်နေ့စာရင်းများအရ မြန်မာတစ်နိုင်ငံလုံးတွင် ကူးစက်သူ ၁,၁၄၅ ဦးရှိခဲ့ပြီး ၇၁၁ ဦးဟာ ရန်ကုန်တိုင်းဒေသကြီးမှဖြစ်ကာ တစ်နိုင်ငံလုံးကူးစက်ခံရသူ အားလုံးရဲ့ ၆၂ ရာခိုင်နှုန်းကျော်ရှိနေပါတယ်။

ဖေဖော်ဝါရီ ၈ ရက်နေ့အထိ လူဦးရေ ၂၂,၅၇၃,၈၀၆ ဦးအား ကိုဗစ်ကာကွယ်ဆေးများထိုးနှံပေးပြီးဖြစ်ကာကျန်းမာရေးဝန်ကြီးဌာနအနေနဲ့ ကိုဗစ်-၁၉ ဗီဇပြောင်းမျိုးကွဲ အိုမီခရွန် နှင့်ပတ်သက်၍ ရောဂါဖြစ်ပွားမှုများကို မျက်ခြေမပြတ်စောင့်ကြပ်ကြည့်ရှုလျက်ရှိတယ်လို့ ဆိုပါတယ်။

ymg/hm
#Yangon_Media_Group

#WorldPolitics
Published - 10 February 2022

ကြာသပတေးနေ့က တိုက်ခိုက်ရေးသမားတွေဟာ လစ်ဗျားဝန်ကြီးချုပ်'အက်ဘ်ဒူဟာမစ်အယ်လ်ဒီဘီဘာ'ရဲ့ကားကို သေနတ်နဲ့ပစ်ခတ်ခဲ့ပေမယ့် ထိခိုက်မှုမရှိခဲ့ဘဲ လွတ်မြောက်သွားခဲ့ကြောင်း ဝန်ကြီးချုပ်နဲ့နီးစပ်သူတစ်ဦးက ပြောကြားခဲ့ပါတယ်။

လစ်ဗျားနိုင်ငံမှာ အစိုးရအုပ်ချုပ်ရေးနဲ့ပတ်သက်ပြီး အဖွဲ့ဂိုဏ်းတွေကြား ပဋိပက္ခတွေပြင်းထန်နေတာဖြစ်ပါတယ်။'ဒီဘီဘာ'အိမ်ပြန်နေစဉ်မှာ လုပ်ကြံသတ်ဖြတ်ဖို့ ကြိုးပမ်းခဲ့တာသေချာကြောင်း၊ တိုက်ခိုက်တဲ့လူတွေက ထွက်ပြေးသွားခဲ့ပြီး ဒီအဖြစ်အပျက်ကိုစုံစမ်းစစ်ဆေးဖို့ မှာကြားထားကြောင်း ဝန်ကြီးချုပ်နဲ့နီးစပ်သူက ပြောခဲ့ပါတယ်။

ရိုက်တာသတင်းဌာနအနေနဲ့ ဒီဖြစ်ရပ်နဲ့ပတ်သက်ပြီး ဓာတ်ပုံအထောက်အထားတွေ မှတ်တမ်းမတင်နိုင်ခဲ့ကြောင်း၊ မျက်မြင်သက်သေတွေနဲ့လည်း မေးမြန်းခြင်းမပြုလုပ်ခဲ့ကြောင်း ဆိုပါတယ်။

ဝန်ကြီးချုပ်'ဒီဘီဘာ'က သူ့နေရာမှာအစားထိုးဖို့ အရှေ့ပိုင်းအခြေစိုက်ပါလီမန်ရဲ့မဲဆန္ဒကို ဥပက္ခာပြုသွားမယ်လို့ ကြာသပတေးနေ့နှောင်းပိုင်းမှာ ပြောကြားခဲ့ရာ 'ဒီဘီဘာ'ကိုလုပ်ကြံသတ်ဖြတ်ရန် ကြိုးပမ်းမှုက လစ်ဗျားနိုင်ငံရဲ့ပဋိပက္ခတွေကို ပိုဆိုးရွားလာစေနိုင်တယ်လို့ ယူဆလို့ရပါတယ်။

ပြီးခဲ့တဲ့သီတင်းပတ်တွေမှာ လက်နက်ကိုင်တပ်ဖွဲ့တွေက တိုက်ခိုက်ရေးသမားတွေနဲ့ လက်နက်ကိရိယာတွေ စုဆောင်းနေကြတာကြောင့် တိုက်ပွဲဖြစ်လာမှာကို စိုးရိမ်လာရပါတယ်။

၂၀၁၁ ခုနှစ်က နေတိုး(NATO)တပ်ဖွဲ့အကူအညီနဲ့ 'ဂဒါဖီ'ကို ပုန်ကန်တော်လှန်ခဲ့ပြီးကတည်းက လစ်ဗျားမှာ မတည်မငြိမ်ဖြစ်နေခဲ့ရကာ ၂၀၁၄ ခုနှစ်မှာ အရှေ့ပိုင်းနဲ့ အနောက်ပိုင်းအဖွဲ့ဆိုပြီး ဂိုဏ်းကွဲသွားခဲ့ပါတယ်။

ကုလသမဂ္ဂမှထောက်ခံမှုနဲ့အတူ တိုင်းပြည်အတွင်းပြိုကွဲမှုတွေကို စည်းလုံးညီညွတ်စေရန်ရည်ရွယ်ချက်နဲ့ 'ဒီဘီဘာ'ကို အမျိုးသားစည်းလုံးညီညွတ်ရေးအစိုးရအဖွဲ့ရဲ့ ခေါင်းဆောင်အဖြစ် မတ်လကခန့်အပ်ခဲ့ပြီး တည်ငြိမ်အေးချမ်းရေးဆောင်ရွက်ချက် တစ်စိတ်တစ်ပိုင်းအနေနဲ့ ဒီဇင်ဘာလရွေးကောက်ပွဲကို ကြီးကြပ်ဆောင်ရွက်ရတာဖြစ်ပါတယ်။

အုပ်ချုပ်ရေးစည်းမျဉ်းဥပဒေတွေကြား အငြင်းပွားမှုများရှိခဲ့ကာ ရွေးကောက်ပွဲလုပ်ငန်းစဉ် ပြိုလဲပျက်စီးပြီးနောက် အတိုက်အခံပြိုင်ဘက်အဖွဲ့တွေက ရာထူးနေရာရဖို့ အကြိတ်အနယ်ဝင်ရောက်လာခဲ့ပါတယ်။

ပြည်တွင်းစစ်အတွင်း အရှေ့ပိုင်းအဖွဲ့တွေကို အများစုထောက်ခံကူညီခဲ့တဲ့ ပါလီမန်လွှတ်တော်က အမျိုးသားစည်းလုံးညီညွတ်ရေးအစိုးရကို အသိအမှတ်မပြုကြောင်း၊ ဝန်ကြီးချုပ်အသစ်ခန့်အပ်ပြီး အစိုးရအသစ်ကိုဖွဲ့စည်းဖို့ ကြာသပတေးနေ့မှာ မဲဆန္ဒကောက်ခံသွားမှာဖြစ်ကြောင်း ကြေညာလိုက်ပါတယ်။

'ဒီဘီဘာ'က ယခုအပတ်အတွင်း မိန့်ခွန်းပြောကြားခဲ့ရာမှာ ရွေးကောက်ပွဲပြုလုပ်ပြီးမှာ အာဏာလွှဲပေးမှာဖြစ်ကြောင်း ပြောကြားခဲ့ပြီး ကုလမှလစ်ဗျားအကြံပေးပုဂ္ဂိုလ်နဲ့ အနောက်နိုင်ငံတွေကတော့ အမျိုးသားစည်းလုံးညီညွတ်ရေးအစိုးရကို ဆက်လက်အသိအမှတ်ပြုကြောင်း ထုတ်ပြန်ခဲ့ပါတယ်။

ပါလီမန်နဲ့ အခြားနိုင်ငံရေးအဖွဲ့အစည်းက နိုင်ငံရဲ့ယာယီဖွဲ့စည်းပုံအခြေခံဥပဒေကို ပြင်ဆင်လိုက်ပြီး ယခုနှစ်အတွင်း ဘာရွေးကောက်ပွဲမှမပြုလုပ်ဘူးလို့ ပြောကြားခဲ့ရာ မဲဆန္ဒပေးဖို့စာရင်းပေးထားတဲ့ လစ်ဗျားပြည်သူတွေအတွက် စိတ်ပျက်စရာဖြစ်ခဲ့ရပါတယ်။

'ဒီဘီဘာ'ရဲ့စည်းလုံးညီညွတ်ရေးအစိုးရအုပ်ချုပ်မှုမတိုင်ခင်က လစ်ဗျားနိုင်ငံကို မြို့အသီးသီးကနေ အပြိုင်အုပ်ချုပ်ဖို့ကြိုးပမ်းခဲ့တဲ့အခြေအနေ ဖြစ်ပေါ်ခဲ့ရာ ဝန်ကြီးချုပ်အသစ်ခန့်အပ်လိုက်ပါက အဆိုပါအခြေအနေသို ပြန်လည်ရောက်ရှိသွားနိုင်ပါတယ်။

ဒါပေမဲ့လည်း ချက်ချင်းကြီးတော့ ပြည်တွင်းစစ်အသွင်ဖြစ်လာဦးမှာ မဟုတ်ကြောင်း သုံးသပ်ခဲ့ကြပါတယ်။
Source: Reuters

#WorldHealth
Published - 10 February 2022

ကိုယ်ဝန်ဆောင်ချိန်နှောင်းပိုင်းတွင် ကိုဗစ်ရောဂါကူးစက်ခြင်းက သားဖွားခြင်းမှာ နောက်ဆက်တွဲပြဿနာတွေ ဖြစ်နိုင်ချေများကြောင်း တွေ့ရှိချက်အသစ်တစ်ခုမှာ ဖော်ပြထားပါတယ်။

ကိုဗစ်ကာကွယ်ဆေးတွေ မရရှိခင် ကလေးမွေးဖွားခဲ့တဲ့ ကိုယ်ဝန်ဆောင်အမျိုးသမီး ၁၄,၁၀၄ ယောက်ကို လေ့လာကြည့်ရာ မမွေးခင် ၆ ပတ်အတွင်း ကိုဗစ်ကူးစက်ထားတဲ့အမျိုးသမီးတွေနဲ့ မွေးဖွားစဉ် ကိုဗစ်ကူးစက်ခဲ့ပြီး ရောဂါပြင်းထန်သူ ၅၈၆ ယောက်တို့ဟာ ဗိုက်ခွဲမွေးဖွားရခြင်း၊ သက်တမ်းမစေ့ခင်မွေးဖွားခြင်း၊ မွေးဖွားနေစဉ်သေဆုံးခြင်း၊ သွေးပေါင်ချိန်တက်ခြင်း၊ သွေးထွက်များခြင်း၊ အခြားရောဂါပိုးကူးစက်ခြင်းတို့မှ အပြင်းအထန်ဖျားနာခြင်းတို့ကို ပိုမိုကြုံတွေ့ရနိုင်ပါတယ်။

ဒီပြဿနာတွေဖြစ်ပေါ်နိုင်တဲ့နှုန်းက ကိုဗစ်မကူးစက်တဲ့ကိုယ်ဝန်ဆောင်တွေမှာ ၉.၂ ရာခိုင်နှုန်းရှိကာ လတ်တလောကိုဗစ်ပြင်းထန်စွာဖြစ်ပွားတဲ့ ကိုယ်ဝန်ဆောင်တွေမှာ ၂၆.၁ ရာခိုင်နှုန်းရှိပါတယ်။

အခြားဘေးထွက်ဆိုးကျိုးတွေကိုပါ ထည့်သွင်းစဉ်းစားကြည့်ပါက အဆိုပါနောက်ဆက်တွဲဆိုးကျိုးတွေထဲက အနည်းဆုံးတစ်ခုလောက်အထိ ခံစားရနိုင်ချေက ကိုဗစ်ပြင်းထန်စွာခံစားရတဲ့ ကိုယ်ဝန်ဆောင်တွေမှာ ၂ ဆပိုများပြားပါတယ်။

ဒါ့အပြင် ကိုဗစ်ရောဂါပြင်းထန်တဲ့ကိုယ်ဝန်ဆောင်တွေမှာ ကိုယ်ဝန်ပျက်ကျခြင်းနဲ့ မွေးဖွားပြီးခါစမှာ ကလေးအသက်သေဆုံးခြင်းတို ဖြစ်တတ်ပါတယ်။ကိုဗစ်ရောဂါအပျော့စားနဲ့ ရောဂါလက္ခဏာမပေါ်တဲ့သူတွေကတော့ အဆိုပါနောက်ဆက်တွဲဆိုးကျိုးတွေ မဖြစ်တတ်ပါဘူး။

ဒီအချက်အလက်တွေအားလုံးဟာ ဒယ်လ်တာနဲ့ အိုမီခရွန်မျိုးဗီဇကွဲတွေ မပေါ်ခင်က လေ့လာထားတာဖြစ်ပြီး ကိုဗစ်ကာကွယ်ဆေးလည်း မထိုးရသေးတဲ့အချိန်ဖြစ်တာကြောင့် လက်ရှိအခြေအနေတွေအရတော့ ဘယ်လိုပြောင်းလဲသွားမလဲဆိုတာ ခန့်မှန်းလို့မရသေးပါဘူး။

ကိုယ်ဝန်ဆောင်အရွယ်အမျိုးသမီးတွေနဲ့ ကိုယ်ဝန်လွယ်ထားရတဲ့အမျိုးသမီးတွေမှာ ကိုဗစ်ကာကွယ်ဆေးဖို့နဲ့ ကိုဗစ်ရောဂါနဲ့ပတ်သက်ပြီး သတိပြုဆောင်ရွက်သွားဖို့ ကလေးကျန်းမာရေးနဲ့ဖွံ့ဖြိုးရေးအဖွဲ့မှ ဒေါက်တာ'ဒိုင်ယာနာဘီယန်ချီ'က အလေးထားပြောကြားလိုက်ပါတယ်။
Source: Reuters

#WorldHealth
Published - 10 February 2022

တရုတ်နိုင်ငံကဲ့သို့ ကိုဗစ်ရောဂါစည်းကမ်းတင်းကျပ်ထားတဲ့နေရာတွေမှာ ပုံမှန်အတိုင်းသွားလာလှုပ်ရှားခွင့်ပြုလိုက်ပါက တစ်နှစ်အတွင်း သေဆုံးသူ ၂ သန်းခန့်ရှိလာနိုင်ကြောင်း၊ ဗိုင်းရပ်စ်ကိုထိန်းချုပ်ရာမှာ အရေးကြီးတာက ရောဂါကူးစက်မှုကို ထိရောက်စွာကာကွယ်ပေးနိုင်တဲ့ ကိုဗစ်ကာကွယ်ဆေးတွေထုတ်လုပ်ဖို့ဖြစ်ကြောင်း တရုတ်သုတေသီများက ပြောပြခဲ့ပါတယ်။

ဆောင်းရာသီအိုလံပစ်ပြိုင်ပွဲကို ဘေကျင်းမှာလက်ခံကျင်းပမှာဖြစ်တာကြောင့် လတ်တလောမှာ တရုတ်နိုင်ငံရဲ့ ကိုဗစ်ကန့်သတ်ချက်စည်းကမ်းတွေကို စောင့်ကြည့်လေ့လာနေကြပါတယ်။

ရောဂါကူးစက်မှုအန္တရာယ်က များလွန်းပြီး အစုလိုက်အပြုံလိုက်ကူးစက်မှုတွေဖြစ်လာရင် ကျန်းမာရေးစနစ်ကို ဖိအားတွေကျရောက်လာမှာဖြစ်တဲ့အတွက် ထိန်းချုပ်ကန့်သတ်ချက်တွေကို ကြပ်ကြပ်မတ်မတ်ပြုလုပ်ဖို့ တရုတ်သိပ္ပံပညာရှင်တွေနဲ့ ပြည်သူ့ကျန်းမာရေးဆရာဝန်တွေက ထပ်ခါထပ်ခါ မှာကြားနေကြပါတယ်။

သုတေသီတို့က ချီလီနိုင်ငံမှာ ကိုရိုနာဗက်ကာကွယ်ဆေးအသုံးပြုခြင်းနဲ့ ဗြိတိန်မှာ ဖိုင်ဇာနဲ့ အက်စ်ထရာဇန်နီကာ ကာကွယ်ဆေးအသုံးပြုခြင်း ဖြစ်ရပ်တွေမှာ ကိုဗစ်ကာကွယ်ဆေးတွေရဲ့ အနိမ့်ဆုံးကာကွယ်နိုင်စွမ်းကို လေ့လာတွက်ချက်ခဲ့ကြပါတယ်။

ကာကွယ်ဆေးရဲ့ ကိုဗစ်ရောဂါလက္ခဏာဖြစ်ပေါ်လာမှု အနိမ့်ဆုံးကာကွယ်နိုင်စွမ်းက ၆၈.၃ ရာခိုင်နှုန်းဖြစ်ကာ လက်ရှိကာကွယ်ဆေးတွေရဲ့ အသက်သေဆုံးမှုကို အနိမ့်ဆုံးကာကွယ်နိုင်စွမ်းက ၈၆ ရာခိုင်နှုန်းဖြစ်ပါတယ်။

ကူးစက်မှုကာကွယ်နိုင်စွမ်းကို ဗြိတိန်နိုင်ငံရဲ့ အချက်အလက်တွေအပေါ် အခြေခံကာတွက်ချက်ထားတာဖြစ်ပြီး ရောဂါလက္ခဏာပေါ်လာမှုနဲ့ သေဆုံးမှုကာကွယ်နိုင်စွမ်းကိုတော့ ချီလီနိုင်ငံမှာအသုံးပြုတဲ့ ကိုရိုနာဗက်ကာကွယ်ဆေးအပေါ် အခြေခံထားတာဖြစ်ပါတယ်။

တစ်ကမ္ဘာလုံးအတိုင်းအတာမှာ ကိုဗစ်ကာကွယ်ဆေးထိုးနှံပြီးစီးမှု ၉၅ ရာခိုင်နှုန်းရှိရင်တောင် ၂၀၁၉ ခုနှစ်ကလို ပုံမှန်အတိုင်းသွားလာလှုပ်ရှားခွင့်ပြုလိုက်ပါက ကိုဗစ်ရောဂါစည်းကမ်းတင်းကျပ်ထားတဲ့နေရာတွေမှာလည်း တစ်နှစ်အတွင်းကူးစက်မှု ၂၃၄ သန်းကျော်ဖြစ်ပွားနိုင်ကာ ရောဂါဖြစ်ပွားမှု ၆၄ သန်းနဲ့ အသက်သေဆုံးသူ ၂ သန်းခန့်ရှိနိုင်ကြောင်း သုတေသီတို့က ခန့်မှန်းလိုက်ပါတယ်။

ကာကွယ်ဆေးကိုထုတ်လုပ်ရာမှာ ရောဂါကူးစက်မှုကို ထိရောက်စွာကာကွယ်နိုင်တဲ့ဆေးမျိုး တီထွင်နိုင်ဖို့ နည်းလမ်းရှာရမှာဖြစ်တယ်လို့ ဆိုပါတယ်။

ပုံမှန်သွားလာခွင့်ပြုပြီးနောက်ပိုင်းအထိ ကိုဗစ်ရောဂါဖြစ်ပွားမှုကို လျှော့ချနိုင်ဖို့ဆိုရင် ရောဂါကူးစက်မှုကို ကာကွယ်နိုင်စွမ်းက ၄၀ ရာခိုင်နှုန်းများလာဖိုလိုအပ်ပြီး ရောဂါလက္ခဏာပေါ်မှုကို ကာကွယ်နိုင်စွမ်းက ၉၀ ရာခိုင်နှုန်း များလာဖိုလိုအပ်ပါတယ်။

တရုတ်နိုင်ငံဟာ ကိုဗစ်စည်းကမ်းတင်းကျပ်ထားတဲ့ တစ်ခုတည်းသော စီးပွားရေးအင်အားကြီးနိုင်ငံကြီးဖြစ်ကာ စီးပွားရေးတိုးတက်မှုကို ထိခိုက်လာနိုင်တယ်လို့ သတိပေးထားကြပါတယ်။

"အရင်ကတော့ ကိုဗစ်ရောဂါကို ကာကွယ်ဆေးနဲ့ ထိန်းချုပ်လို့ရမယ်လို့ထင်ခဲ့ပေမယ့် အခုတော့ တင်းကျပ်တဲ့ကန့်သတ်ချက်တွေနဲ့သာ ထိန်းချုပ်နိုင်မှာဖြစ်ပါတယ်" လို့ ကူးစက်ရောဂါပညာရှင်ကြီး 'ဝူကျွန်ယူ'က တနင်္ဂနွေနေ့က ပြောကြားလိုက်ပါတယ်။
Source: The Jerusalem Post

#Local_Health
Published_ 10 Feb 2022

မြန်မာနိုင်ငံတွင် ကိုဗစ်-၁၉ ရောဂါပိုးကူးစက်မှု ဖေဖော်ဝါရီလဆန်းမှစတင်ကာ ပြန်လည် မြင့်တက်နေပြီး ကူးစက်ခံရသူ၏ ထက်ဝက်ကျော်မှာ ရန်ကုန်တိုင်းဒေသကြီးမှ ဖြစ်ကြောင်း ကျန်းမာရေးဝန်ကြီးဌာနက ထုတ်ပြန်တဲ့ စာရင်းများအရသိရပါတယ်။

ဖေဖော်ဝါရီ ၈ ရက်နေ့စာရင်းများအရ မြန်မာတစ်နိုင်ငံလုံးတွင် ကူးစက်သူ ၁,၁၄၅ ဦးရှိခဲ့ပြီး ၇၁၁ ဦးဟာ ရန်ကုန်တိုင်းဒေသကြီးမှဖြစ်ပါတယ်။ တစ်နိုင်ငံလုံး ကူးစက်ခံရသူ အားလုံးရဲ့ ၆၂ ရာခိုင်နှုန်းကျော်ရှိနေပါတယ်။

ရန်ကုန်ရဲ့နောက် ကူးစက်ခံရသူများတဲ့ တိုင်းဒေသကြီးနဲ့ ပြည်နယ်တွေက ဧရာတီတိုင်းဒေကြီးမှာ ၇၅ ဦးရှိပြီး၊ ကချင်ပြည်နယ်ကတော့ ၅၄ ဦးရှိပါတယ်။

ဖေဖော်ဝါရီ ၉ ရက် (ယနေ့) အထိ ဓာတ်ခွဲအတည်ပြုလူနာ စုစုပေါင်း ၅၄၀,၅၉၇ ဦး ရှိပြီး သေဆုံးသူစုစုပေါင်း ၁၉,၃၁၀ ဦးရှိတယ်လို့ ကျန်းမာရေးဝန်ကြီးဌာနရဲ့ ထုတ်ပြန်ချက် မှာဖော်ပြထားပါတယ်။ ဖေဖော်ဝါရီ ၈ ရက်နေ့အထိ လူဦးရေ ၂၂,၅၇၃,၈၀၆ ဦးအား ကိုဗစ်ကာကွယ်ဆေးများထိုးနှံပေးပြီးဖြစ်ပါတယ်။

ကျန်းမာရေးဝန်ကြီးဌာနအနေနဲ့ ကိုဗစ်-၁၉ ဗီဇပြောင်းမျိုးကွဲ အိုမီခရွန် နှင့်ပတ်သက်၍ ရောဂါဖြစ်ပွားမှုများကို မျက်ခြေမပြတ်စောင့်ကြပ်ကြည့်ရှုလျက်ရှိတယ်လို့ ဆိုပါတယ်။

ymg-mnn
#Yangon_Media_Group

Published 10 Feb 2022

မကွေးတိုင်းဒေသကြီးတွင်  စိုက်ပျိုးရေးလုပ်ငန်းများဖွံ့ဖြိုးတိုးတက်စေရန်ရည်ရွယ်ပြီး တောင်သူလယ်သမားများကို တောင်သူသမဝါယမအသင်းများဖွဲ့စည်းဆောင်ရွက်မယ်လို့ နစကဥက္ကဋ္ဌရဲ့ မကွေးတိုင်းဒေသကြီးအတွင်း စိုက်ပျိုးရေးတောင်သူတွေနှင့်တွေ့ဆုံပွဲကနေ သိရှိရပါတယ်။

အဲဒီသမဝါယအသင်းတွေကနေ လယ်ယာသုံးစက်ကိရိယာတွေကို အရစ်ကျစနစ်ဖြင့် ရောင်းချပေးဖို့ စီစဉ်နေတယ်လို့လည်း နစကရဲ့သတင်းထုတ်ပြန်ချက်အရသိရပါတယ်။

စိုက်ပျိုးထုတ်လုပ်ရာတွင် ရေရရှိရေးမြစ်ရေတင်စီမံကိန်းတွေမှာ နေရောင်ခြည်စွမ်းအင်သုံး လျှပ်စစ်ဓာတ်အားအသုံပြုဖို့ကိုလည်း ဗိုလ်ချူပ်မှူးကြီးမင်းအောင်လှိုင်က မှာကြားခဲ့ပါတယ်။

မကွေးတိုင်းဒေသကြိးအတွင်းမှာ တစ်နှစ်ပတ်လုံးရဲ့ ပျှမ်းမျှမိုးရွာရက်မှာ ရက်ပေါင်း၇၀သာရှိတဲ့အတွက် နေရောင်ခြည်စွမ်းအင်သုံး လျှပ်စစ်ဓာတ်အား ထုတ်လုပ်ဆောင်ရွက်လို့ရကြောင်း၊ အဲဒီအပြင် မကွေးတိုင်းဒေသကြီးအတွင်းမှာ ဧရာဝတီမြစ်ရေထိန်း၍ရသည့်နေရာတွေရှိနေပြီး အဲဒီနေရာတွေမှာ တမံနိမ့်Low head Dam တွေတည်ဆောက်ခြင်းဖြင့် သွားလာမှုမပြတ်စေဘဲ တစ်နှစ်ပတ်လုံး ရေအားလျှပ်စစ်ထုတ်လုပ်နိုင်ကြောင်းလည်း သူက ဆက်လက်ပြောကြားခဲ့ပါတယ်။

တိုင်းဒေသကြီးအတွင်းမှာ မွေးမြူရေးလုပ်ငန်းတွေလည်းဆောင်ရွက်နေတဲ့အတွက် မွေးမြူရေးလုပ်ငန်းတွေက ထွက်ရှိတဲ့ နွားချေး၊ကျွဲချေးနှင့်ကြက်ချေးတွေကို ဇီဝမြေဩဇာအဖြစ် စိုက်ပျိုးရေးလုပ်ငန်းတွေမှာ အသုံးချနိုင်ဖို့ အပြန်အလှန်အားဖြင့် စိုက်ပျိုးရေးကထွက်ရှိတဲ့ အခြေခံကုန်ကြမ်းတွေဖြစ်တဲ့ နှံစားပြောင်းနှင့်ကောက်ရိုးတွေကို တိရိစ္ဆာန်အစားအစာများအဖြစ် ပြန်လည်အသုံးချနိုင်တယ်လို့လည်း နစကဥက္ကဋ္ဌကပြောပါတယ်။

မကွေးတိုင်းဒေသကြီးမှ လယ်စိုက်ဧကပေါင်းခြောက်သိန်းကျော်နှင့် အခြားစိုက်ပျိုးဧကပေါင်း၂ဒသမ၂သန်းကျော်ရှိတယ်လို့ သိရှိရပါတယ်။ အဓိကအားဖြင့် ပဲ၊နှမ်း၊ဝါနှင့် ကြက်သွန်တွေကိုစိုက်ပျိုးကြပါတယ်။ အဲဒီအပြင်မွေးမြူရေးအပိုင်းမှာ နွားအကောင်ရေ၁ဒသမ၃သန်းကျော်၊ ကျွဲအကောင်ရေ ၃သောင်း၈ထောင်ကျော်၊အသားစား ကြက်၁ဒသမ၆သန်း၊ ဥစားကြက် ၂သိန်းကျော်၊ဒေသကြက်၃သန်း၃သိန်းကျော်ရှိတယ်လို့လည်း သိရှိရပါတယ်။

အဆိုပါတွေ့ဆုံပွဲကို နှမ်း၊မြေပဲ၊ပဲစင်းငုံ၊ဝါနှင့်ကြက်သွန်စိုက်တောင်သူတွေတက်ရောက်ခဲ့ကြတယ်လို့ သတင်းထုတ်ပြန်ချက်မှာဖော်ပြထားပါတယ်။

#Published- 9 feb 2022
ဖေဖော်ဝါရီလ ၉ရက် ယနေ့ ညနေ ၆နာရီ၁၅မိနစ်အချိန်ခန့်ကမကွေးတိုင်းဒေသကြီး၊မကွေးမြို့နယ်၊မကွေး-ကံပြားလမ်းမကြီးဘေးတွင် ဆီဆိုင်မီးလောင်မှုဖြစ်ပွား​ခဲ့တယ်လို့သိရပါတယ်။

မီးလောင်မှုသတင်းအရမကွေးတိုင်းဒေသကြီးမီးသတ်ဦးစီးမှူးရုံးမှ မီးသတ်ယာဉ်(၂)စီး၊ မကွေးခရိုင်/မြို့နယ်မီးသတ်စခန်းမှ မီးသတ်ယာဉ်(၇)စီး၊ မင်းဘူးမြို့နယ် မီးသတ်စခန်းမှ မီးသတ်ယာဉ် (၂)စီး၊ ထောက်ရှာပင် နယ်မြေမီးသတ်စခန်းမှ မီးသတ်ယာဉ် (၁)စီး၊ ရွှေရောင်တော် သီးသန့်မီးသတ်စခန်းမှ မီးငြှိမ်းသတ်ယာဉ် (၁)စီး၊ အောင်မြေရတနာ ပရဟိတအသင်းမှ မီးသတ်ယာဉ် (၂)စီး၊ ဗဒင်ပုဂ္ဂလိကမှ ရေသယ်ယာဉ် (၁)စီး၊ တို့ဖြင့် ထွက်ခွာငြှိမ်းသတ်ခဲ့တယ်လို့သိရပါတယ်။

မီးလောင်မှုဖြစ်စဥ်မှာ မီးလောင်ကျွမ်းမှုများပြားခဲ့တာကြောင့်အနီးပတ်ဝန်းကျင်နေထိုင်သူများ အရေးပေါ်ရွေ့ပြောင်းခဲ့ရပြီး
၇နာရီ ၁၀မိနစ်အချိန်တွင်မီးထိန်းနိုင်ခဲ့ကာ ၇နာရီ မိနစ်၅၀ခန့်တွင်မီးငြိမ်းသွားမီးလောင်မှုအကြောင်းကိုစုံစမ်းနေဆဲဖြစ်တယ်မကွေးတိုင်းဒေသကြီးမီးသတ်တပ်ဖွဲ့ကသိရပါတယ်။
ymg/hm

#WorldInnovation
Published 09 February 2022

အကြွေးပြန်မဆပ်နိုင်တာကြောင့် အကျဉ်းထောင်များအတွင်း ကျရောက်နေခဲ့ရတဲ့ အကျဉ်းသားများကို လွတ်မြောက်စေရန်ရည်ရွယ်ချက်နဲ့ ရန်ပုံငွေတွေရရှိအောင် အီရန်အကျဉ်းသားဟောင်းနှစ်ဦးဟာ အကျဉ်းထောင်စားသောက်ဆိုင်တစ်ခု ဖွင့်လှစ်ခဲ့ပါတယ်။

#Yangon_Media_Group

#LocalNews
Published - 9 Feb 2022

စီးပွားရေးကို မြှင့်တင်ဖို့နဲ့ ပြည်တွင်းငွေပေးချေမှုကို ပံ့ပိုးပေးနိုင်ဖို့ရည်ရွယ်ထားတဲ့ ကိုယ်ပိုင်ဒစ်ဂျစ်တယ်ငွေကြေးကိစ္စ နဲ့ အွန်လိုင်းက ထီရောင်းမယ့်ကိစ္စတွေကို လုပ်နေတယ်လို့ ပြန်ကြားရေးဝန်ကြီးဌာန ဒုဝန်ကြီး ဗိုလ်ချုပ်ဇော်မင်းထွန်းက YMG ကို ပြောပါတယ်။

#Yangon_Media_Group

Published: 9 Feb 2022

ဖိလစ်ပိုင်မှာ သမ္မတရွေးကောက်ပွဲမဲဆွယ်စည်းရုံးမှုတွေ ဖေဖော်ဝါရီ၈ရက် အင်္ဂါနေ့က စတင်ခဲ့ပါတယ်။ မေ၉ရက်နေ့မှာ ကျင်းပမယ့် နောက်ထပ်ခြောက်နှစ်သက်တမ်းအတွက် သမ္မတအသစ် ရွေးကောက်ပွဲမတိုင်ခင် (၃)လ မတိုင်ခင် စတင်ခဲ့တာဖြစ်ပါတယ်။

သမ္မတလောင်း၁၀ဦးနှင့် ဒုတိယသမ္မတလောင်း(၉)ဦးတို့ ယှဉ်ပြိုင်ကြမှာဖြစ်ပါတယ်။ စစ်တမ်းကောက်ယူမှုများအရ  ယခင်သမ္မတဟောင်း ဖာဒီနန်မားကို့စ်ရဲ့ သား အသက် ၆၄နှစ်အရွယ် မာဒီနန်မားကို့စ်ဂျုနီယာဟာ လူကြိုက်အများဆုံး ဖြစ်နေပါတယ်။

Source: CCTV Plus

#LocalNews
Published - 9 Feb 2022

မြန်မာနိုင်ငံ မီးသတ်တပ်ဖွဲ့အနေနဲ့ နှစ်ပေါင်း ၁၁ဝ ကျော်သက်တမ်းရှိတဲ့ ရှေးဟောင်း သမိုင်းဝင် မီးသတ်ယာဉ်တွေနဲ့ မီးသတ်ပစ္စည်းကိရိယာတွေကို ရန်ကုန်တိုင်းဒေသကြီး မရမ်းကုန်းမြို့နယ်၊ အုတ်ပုံဆိပ်လမ်းမှာရှိတဲ့ မီးသတ်ဌာနချုပ်မှာ ပြတိုက်ဖွင့်လှစ်ပြီး ပြသသွားမှာ ဖြစ်ပါတယ်။

#Yangon_Media_Group