#LocalNews
Published_30 April 2022

ရှမ်းတိုင်းရင်းသားများ ဒီမိုကရေစီအဖွဲချုပ်(SNLD) ပါတီ၏ ဥက္ကဋ္ဌဟောင်းဖြစ်သူ ဦးခွန်ထွန်းဦးသည် ယနေ့ နေ့လယ်ပိုင်းက ကွယ်လွန်သွားပြီဖြစ်ကြောင်း SNLD ပြောရေးဆိုခွင့်ရှိသူ ဦးစိုင်းလိတ်က ပြောသည်။

“ဥက္ကဌကြီးအိပ်ယာထနောက်ကျလို့ သွားနိုးတာ ပြန်ထမလာဘူးလို့ ပြောပါတယ်။သူရဲ့ ၉ မိုင်က အိမ်မှာပါပဲ။အခြားအစီအစဉ်တွေကိုတော့ မသိရသေးပါဘူး။နိုင်ငံရေးက အနားယူထားတယ်ဆိုပေမယ့်လည်း သူကလမ်းပြတစ်ယောက်ပါပဲ။သူ့ရဲ့ လမ်းညွှန်မှုတွေနဲ့ပဲ ပါတီက ရပ်တည်သွားနေတာပါ။ကြီးမားတဲ့ ဆုံရှုံးမှုပါ” ဟု ဦးစိုင်းလိတ်က ပြောသည်။

ဦးခွန်ထွန်းဦးသည် SNLD ဥက္ကဋ္ဌ တာဝန်ကို နှစ်ပေါင်း ၃၀ ကျော် တာဝန်ထမ်းဆောင်ခဲ့သူ ဖြစ်ပြီး လက်ရှိ ကွယ်လွန်ချိန်တွင် အသက် (၇၉)နှစ်အရွယ်ရှိပြီဖြစ်ကြောင်း သိရသည်။

ymg/mt
#Yangon_Media_Group

#LocalNews
Published - 30 April 2022

တစ်လတာကာလအတွင်း စစ်ဘေးရှောင်ဒုက္ခသည် (၅၈,၀၀၀)ကျော်အထိ တိုးလာပြီး စစ်ကိုင်းတိုင်းနှင့် ကယားပြည်နယ်တို့တွင် စစ်ဘေးရှောင်ဒုက္ခသည်တွေ အများဆုံးရှိနေတယ်လို့ ISP Myanmar ၏ သုတေသနစစ်တမ်းတစ်ရပ်မှာ ဖော်ပြခဲ့ပါတယ်။

တချိန်တည်းမှာပဲ တိုင်းရင်းသားလက်နက်ကိုင်အဖွဲ့တွေ (EAOs) အခြေစိုက်နေကြတဲ့ တိုင်းရင်းသားဒေသများမှာလည်း EAOs တွေနဲ့ တပ်မတော်အကြား တိုက်ပွဲတွေ ဆက်လက် ဖြစ်ပွားနေပြီး EAOs အချို့ကြားမှာလည်း အချင်းချင်း တိုက်ပွဲတွေဖြစ်ပွားနေတာဖြစ်တယ်လို့ သိရပါတယ်။

တဆက်တည်းမှာပဲ ဒေသခံကာကွယ်ရေးနဲ့ တပ်မတော်တို့အကြား အပြန်အလှန် ပစ်ခတ်တိုက်ခိုက်မှုတွေ အရှိန်မြင့်လာသလို တိုက်ပွဲနဲ့ ပဋိပက္ခတွေ အရှိန်မြင့်လာတာနဲ့အမျှ နေရပ်စွန့်ခွာ ထွက်ပြေးတိမ်းရှောင်ရသူတွေလည်း ပိုများလာသဖြင့် လူသားချင်းစာနာထောက်ထားမှုဆိုင်ရာ အကူအညီတွေလည်း အရေးပေါ်လိုအပ်နေတာဖြစ်တယ်လို့ ISP Myanmar က ဆိုပါတယ်။

ဒါ့အပြင် ၂၀၂၁ ခုနှစ်၊ ဖေဖော်ဝါရီ ၁ ရက်ကနေ ၂၀၂၂ ခုနှစ် ဧပြီ ၂၅ ရက် နေ့အထိ နေရာအနှံ့မှာ
ဖြစ်ခဲ့တဲ့ တိုက်ပွဲတွေနဲ့ အပြန်အလှန်ပစ်ခတ်မှုတွေကြောင့် နေရပ်စွန့်ခွာခဲ့ရတဲ့ စစ်ဘေးရှောင် ဒုက္ခသည်အရေအတွက် စုစုပေါင်း ၈၁၀,၈၈၉ ကျော် ရှိလာတယ်လို့လည်း ISP Myanmar က ဖော်ပြပါတယ်။

ထို့အပြင် ယင်းကာလမတိုင်ခင်က စစ်ဘေးရှောင်ဒုက္ခသည် ၄၉၇,၂၀၀ ကျော် ရှိနေတာကြောင့် မြန်မာနိုင်ငံမှာ နေရပ်စွန့်ခွာ ထွက်ပြေးတိမ်းရှောင်နေရတဲ့ စစ်ဘေးဒုက္ခသည် ၁,၃၀၈,၀၈၉ ကျော် ရှိလာပြီးဘင်္ဂလားဒေ့ရှ်၊ အိန္ဒိယနဲ့ ထိုင်းနယ်စပ်က ဒုက္ခသည်စခန်းတွေမှာလည်း ဒုက္ခသည် ၁,၀၀၂,၀၀၀ ကျော် ရှိနေတာဖြစ်တယ်လို့ သိရပါတယ်။

EAOs တွေ၊ ဒေသခံကာကွယ်ရေး တပ်ဖွဲ့တွေနဲ့ တပ်မတော်အကြား တိုက်ပွဲပြင်းထန်နေတဲ့ ဒေသတွေမှာ စစ်ဘေးဒုက္ခသည်အရေအတွက် ပိုတိုးလာနေသလို စစ်ကိုင်းတိုင်းမှာ စစ်ဘေး ရှောင်ဒုက္ခသည် အများဆုံးရှိနေပြီး စုစုပေါင်း ၂၄၁,၀၅၀ ကျော် ရှိနေတယ်လို့ ISP Myanmar က ဆိုပါတယ်။

ကယားပြည်နယ်မှာ ၂၀၄,၁၁၅ ကျော်ရှိပြီး ဒုတိယအများဆုံး ဖြစ်ပါတယ်။ ဒါ့အပြင် ၂၀၂၂ ခုနှစ်၊ ဧပြီလ (၂၅ ရက်)အတွင်း တိုးလာတဲ့ စစ်ပြေးဒုက္ခသည်အရေအတွက်က ၅၈,၃၀၀ ကျော်ထက်မနည်း ရှိနေတာဖြစ်တယ်လို့ ISP Myanmar က ဖော်ပြထားပါတယ်။

Photo - CJ

ymg/kg
#Yangon_Media_Group

#LocalNews
Published-30 April 2022

ကိုဗစ်ဖြစ်ပွားမှုတွေလျော့ကျလာတဲ့အတွက် အသွားအလာကန့်သတ်မှု ကွာရန်တင်းဝင်ရောက်ရမယ့်ရက်တွေကို လျှော့ချလိုက်တယ်လို့ ကျန်းမာရေးဝန်ကြီးဌာနက သိရပါတယ်၊၊

ကယ်ဆယ်ရေးလေယာဥ်နဲ့ ပြန်လည်ရောက်ရှိလာသူတွေ၊နယ်စပ်ဝင်ထွက်ပေါက်က ပြန်လည်ရောက်ရှိလာသူတွေထဲက နှစ်ကြိမ်ပြည့်ကိုဗစ်ကာကွယ်ဆေး ထိုးထားသူတွေအနေနဲ့ ယခင်အသွားအလာကန့်သတ်မှု ကွာရန်တင်းရက်(၅)ရက်အစား(၃)ရက်လို့ ပြောင်းလဲသတ်မှတ်လိုက်တာဖြစ်ပါတယ်၊၊

သူတို့ထဲက ကာကွယ်ဆေးအပြည့်မထိုးရသေးတွေကတော့ ယခင်ကွာရန်တင်းရက်(၇)ရက်အစား(၅)ရက်ပဲ ဝင်ရောက်ရတော့မှာဖြစ်တယ်လို့ ကျန်းမာရေးဝန်ကြီးဌာနက ထုတ်ပြန်ထားပါတယ်၊၊

ဒီ့အပြင် ပြည်ပနိုင်ငံတွေမှမြန်မာနိုင်ငံကို နိုင်ငံတကာ ပုံမှန်လေကြောင်းလိုင်းတွေနဲ့ ပြန်လည်ဝင်ရောက်လာမယ့် ခရီးသည်တွေကို သတ်မှတ်ဟိုတယ်မှာ (၂၄)နာရီနေစေပြီး ဓာတ်ခွဲစစ်ဆေးမှုအစား RDT Test Kit နည်းနဲ့ မေလ(၁)ရက်ကစပြီး စစ်ဆေးသွားမှာဖြစ်တယ်လို့ သိရပါတယ်၊၊

ymg/tthl
#Yangon_Media_Group

#Local_News
Published_ 30 April 2022

လျှပ်စစ်နှင့်စွမ်းအင်ဝန်ကြီးဌာန၊ လျှပ်စစ်ဓာတ်အားစီမံရေးဦးစီးဌာနနှင့် Natural Current Energy Hydropower Co., Ltd တို့အကြား သီပေါမြို့နယ် နမ္မတူမြစ်ပေါ်တွင် အကောင်အထည်ဖော်ဆောင်ရွက်မယ့် နမ္မတူ(သီပေါ) ရေအားလျှပ်စစ်စီမံကိန်းဆိုင်ရာ ပဋိညာဉ်စာချုပ်ကို ဧပြီ ၂၉ ရက်က နေပြည်တော်မှာ လက်မှတ်ရေးထိုးခဲ့ကြပါတယ်။

နစက လျှပ်စစ်နှင့် စွမ်းအင်ဝန်ကြီးဌာန၊ လျှပ်စစ်ဓာတ်အားစီမံရေးဦးစီးဌာန ညွှန်ကြားရေးမှူးချုပ် ဒေါ်မိမိခိုင်နှင့် Natural Current Energy Hydropower Co., Ltd မှ Managing Director ဦးစိုင်းထွန်းထွန်းဦးတို့က နမ္မတူ(သီပေါ) ရေအားလျှပ်စစ်စီမံကိန်းဆိုင်ရာ ပဋိညာဉ်စာချုပ်ကို လက်မှတ်ရေးထိုးခဲ့ကြတာ ဖြစ်ပါတယ်။

ရေအားလျှပ်စစ်စီမံကိန်းများ၊ နေရောင်ခြည်စွမ်းအင်နှင့် လေစွမ်းအင်သုံး လျှပ်စစ်စီမံကိန်းများ စသည်တို့ကို သန့်ရှင်းသော စွမ်းအင်မူဝါဒများ ချမှတ်ဆောင်ရွက်လျက်ရှိတယ်လို့ လျှပ်စစ်နှင့်စွမ်းအင်ဝန်ကြီးဌာန ပြည်ထောင်စုဝန်ကြီး ဦးအောင်သန်းဦးက အဆိုပါအခမ်းအနားမှာ ပြောကြားခဲ့ပါတယ်။

အဆိုပါ ရေအားလျှပ်စစ်စီမံကိန်းမှာ ရှမ်းပြည်နယ်(မြောက်ပိုင်း)တွင် တည်ရှိ၍ စက်တပ်ဆင်အင်အား ၂၁၀ မဂ္ဂါဝပ်မှ တစ်နှစ်လျှင်ဓာတ်အားယူနစ် ကီလိုဝပ် နာရီ သန်းပေါင်း ၁,၀၀၆ သန်း ထုတ်လုပ်နိုင်မှာ ဖြစ်ပါတယ်။

စီမံကိန်းမှထွက်ရှိလာမယ့် လျှပ်စစ်ဓာတ်အားကို ဓာတ်အားပို့လွှတ်ရေးလိုင်းများ မှတဆင့် ဓာတ်အား သုံးစွဲသူများထံ ပို့ဆောင်ပေးမည်ဖြစ်သဖြင့် အိမ်ထောင်စုများစွာကို လျှပ်စစ် ဓာတ်အား တိုးချဲ့ဖြန့်ဖြူး ပေးနိုင်မည်ဖြစ်၍ National Electrification Plan အရ နိုင်ငံအတွက် ဓာတ်အားလုံလောက်စွာထုတ်လုပ်မှုကို အထောက်အကူရရှိစေမည့်အပြင် စက်မှုလုပ်ငန်းများ ဖွံ့ဖြိုးတိုးတက်မှုကိုလည်း အထောက်အကူပြုစေမှာ ဖြစ်ပါတယ်။

ymg-mnn
#Yangon_Media_Group

#DailyNews
Published -30 April 2022

၁။ အခုရက်ပိုင်းအတွင်း နေကြတ်၊လကြတ်ခြင်းများ ဖြစ်ပေါ်မည်

၂။ ကလေးမြို့တွင် ချင်းစစ်ဘေးရှောင်ပြည်သူ ၂၀၀ ခန့်ခိုလှုံနေကြရပြီး စားနပ်ရိက္ခာလိုအပ်မှုရှိ နေ

၃။ မိုးလေ၀သ သတင်း

၄။ ဘန်ကောက်မြေအောက်လက်ဝှေ့ပွဲ ဘဝအစစ်အမှန်သရုပ်ပြနေ...အစရှိတဲ့သတင်းတွေကို တင်ဆက်ပေးသွားမှာ ဖြစ်ပါတယ်။

#Yangon_Media_Group

#WorldBusiness
Published 30 April 2022

တွစ်တာလုပ်ငန်းစဉ်များအကြောင်းကို အီလွန်မတ်ဝေဖန်ခဲ့တာနဲ့ပတ်သက်ပြီး ဝန်ထမ်းအမြောက်အများ ထွက်ခွာသွားနိုင်တဲ့အခြေအနေနဲ့ ဝန်ထမ်းများမကျေမနပ်ဖြစ်ခြင်းတို့အပေါ် ကုမ္ပဏီစီမံခန့်ခွဲသူများအနေနဲ့ ဘယ်လိုကိုင်တွယ်ဖြေရှင်းရမလဲဆိုတာကို သောကြာနေ့ကကုမ္ပဏီတစ်ခုလုံးအစည်းအဝေးပြုလုပ်ခဲ့ရာ အမှုဆောင်အရာရှိချုပ်'ပါရက်ဂ်အာဂရာဝယ်လ်'အနေနဲ့ ဝန်ထမ်းတွေရဲ့မကျေနပ်မှုကို ဖြေရှင်းဖို့ကြိုးပမ်းခဲ့ရပါတယ်။

Tesla အမှုဆောင်ချုပ်'အီလွန်မတ်'က တွစ်တာလူမှုကွန်ရက်ကုမ္ပဏီကို ဒေါ်လာ ၄၄ ဘီလီယံဖြင့်ဝယ်ယူဖို့ သဘောတူခဲ့အပြီးမှာ တွစ်တာ app ထဲက အကြောင်းအရာစံသတ်မှတ်ချက်တွေအကြောင်းနဲ့ အချက်အလက်လုံခြုံရေးဆိုင်ရာ ပေါ်လစီမူဝါဒချမှတ်ရေး ထိပ်သီးအမှုဆောင်အရာရှိတစ်ဦးတို့ကို ထပ်ခါထပ်ခါ ဝေဖန်တိုက်ခိုက်ခဲ့ပါတယ်။

အဲဒီလိုဝေဖန်မှုအပြီးမှာ ကုမ္ပဏီအနေနဲ့ အစည်းအဝေးခေါ်ယူပြုလုပ်ခဲ့တာဖြစ်ပါတယ်။

အဆိုပါအစည်းအဝေးပွဲကြီးကို ရိုက်တာသတင်းဌာနကလည်းတက်ရောက်ခဲ့ပြီး အမှုဆောင်အရာရှိများရဲ့ပြောကြားချက်အရ ဝန်ထမ်းအင်အားဆုတ်ယုတ်လာမှုကို ကုမ္ပဏီက နေ့စဉ်အကဲဖြတ်လေ့လာသွားမှာဖြစ်ကြောင်း၊ ဒါပေမဲ့ ကုမ္ပဏီကို'မတ်'ဝယ်ယူခြင်းက ဝန်ထမ်းဆက်လက်ထိန်းသိမ်းရေးကို ဘယ်လိုသက်ရောက်မလဲဆိုတာကိုတော့ ပြောပြလို့မရသေးကြောင်း သိရှိရပါတယ်။

'မတ်က ကုမ္ပဏီဘုတ်အဖွဲ့နဲ့ အမှုဆောင်များရဲ့လစာကို အများအပြားလျှော့ချသွားဖို့ စီစဉ်နေပေမယ့် အတိအကျတော့ မသိရှိရသေးပါဘူး။

'အီလွန်မက်စ်'ကတွစ်တာပိုင်ရှင်အဖြစ် မသတ်မှတ်ရသေးခင်အထိ အလုပ်အကိုင်လျှော့ချဖို့ကိစ္စတွေကို ပြုလုပ်သေးမှာမဟုတ်ဘူးလို့ သတင်းအရင်းအမြစ်တစ်ခုက ဖော်ပြထားပါတယ်။

"ကုမ္ပဏီရှယ်ယာရှင်တွေနဲ့ သစ္စာစောင့်သိရမယ့် အကြောင်းတွေကိုကြားရတာ စိတ်ကုန်လာပါပြီ။ အရောင်းအဝယ်သဘောတူညီမှုအပြီးသတ်ပြီးသွားရင် ဝန်ထမ်းအများအပြားအလုပ်ဆုံးရှုံးရနိုင်တဲ့အခြေအနေကို ဘယ်လိုသဘောရပါသလဲ" လို့ တွစ်တာဝန်ထမ်းတစ်ဦးက အစည်းအဝေးပွဲမှာ အသံကျယ်ကျယ်နဲ့မေးမြန်းခဲ့ပါတယ်။

'အာဂရာဝယ်လ်'က တွစ်တာအနေနဲ့ ဝန်ထမ်းတွေကိုအမြဲတမ်းဂရုစိုက်ပြီး ဆက်လက်ပြီးလည်းအလေးထားသွားမှာဖြစ်တယ်လို့ ဖြေကြားခဲ့ပါတယ်။

"တွစ်တာအဖွဲ့အစည်းကြီးက တစ်ကမ္ဘာလုံးနဲ့ သုံးစွဲသူတွေအပေါ်သက်ရောက်မှုတွေကို ဆက်လက်အလေးထားသွားမှာဖြစ်ပါတယ်"

တွစ်တာကို 'အီလွန်မတ်'ဝယ်ယူဖို့ စိတ်ဝင်စားနေကြောင်း သတင်းမထွက်ခင်ကတည်းက အခြေအနေနဲ့ယှဉ်ရင် ဝန်ထမ်းအင်အားဆုတ်ယုတ်လာမှုပြောင်းလဲသွားခြင်းမရှိဘူးလို့ အမှုဆောင်အရာရှိများကပြောပြပါတယ်။

တွစ်တာမှ ဥပဒေရေးရာထိပ်သီးပုဂ္ဂိုလ်'ဗီဂျာယာဂက်ဒီ'က တွစ်တာမှာလုပ်သက်ရင့်နေသူဖြစ်ပြီး ဆီလီကွန်ဗယ်လီဒေသတဝိုက်မှာ လေးစားခံရသူတစ်ဦးဖြစ်ပါတယ်။

အခုရက်ပိုင်းတွေမှာ 'မက်စ်'က အဆိုပါအမျိုးသမီးကိုပစ်မှတ်ထားကာ တွစ်တာကနေဝေဖန်တိုက်ခိုက်ခဲ့တာဖြစ်ပါတယ်။

ဝန်ထမ်းတွေက 'မတ်'ရဲ့အပြုအမူကြောင့် တွစ်တာလုပ်ငန်းကြီးမတည်မငြိမ်ဖြစ်မှာကို စိုးရိမ်နေကြပြီး နောက်အပတ်အတွင်း နယူးယော့ခ်မြို့မှာကြော်ငြာကိစ္စပြုလုပ်ဖို့ရှိနေရာ စီးပွားရေးထိခိုက်လာမှာကို စိုးရိမ်နေကြပါတယ်။

အမှုဆောင်မဟုတ်တဲ့ဝန်ထမ်းတွေအတွက် လျော်ကြေးကိုလည်း ကန့်သတ်ထားတာကိုသတိထားမိကြောင်း ဝန်ထမ်းတစ်ဦးက ရိုက်တာကိုပြောပြခဲ့ပါတယ်။

အစည်းအဝေးပွဲအတွင်း 'အာဂရာဝယ်လ်'က ခေါင်းဆောင်အသစ်လက်ထက်မှာ အပြောင်းအလဲဖြစ်ဖို့ မျှော်လင့်ထားသင့်ကြောင်း၊ လာမယ့်နှစ်တွေမှာ ကုမ္ပဏီကပိုမိုကောင်းမွန်လာနိုင်ကြောင်း ဝန်ထမ်းတွေကိုအကြံပြုခဲ့ပါတယ်။

Source: Reuter
#Yangon_Media_Group

#Local_News
Published_ 30 April 2022

မြန်မာလုပ်သား ၁၂၈ ဦးသည် အလုပ်လုပ်ကိုင်ရန် ဧပြီ ၂၈ ရက်က တောင်ကိုရီးယားနိုင်ငံသို့ ရောက်ရှိလာကြောင်း ဆိုးလ်မြို့ရှိ မြန်မာသံရုံးက သတင်းထုတ်ပြန်ထားပါတယ်။

ရောက်ရှိလာသူများတွင် Re-entry လုပ်သား ၄၅ ဦး၊ ကုန်ထုတ်လုပ်သားအဖြစ် အသစ်ဝင်ရောက် လုပ်ကိုင်မည့် လုပ်သားသစ် ၇၂ ဦးနှင့် ဆောက်လုပ်ရေးလုပ်သားသစ် ၁၁ ဦး၊ စုစုပေါင်း ၁၂၈ ဦး ဖြစ်ပါတယ်။

ဧပြီလအတွင်း တောင်ကိုရီးယားက မြန်မာလုပ်သား ၃၁၀ ကျော်ပြီး၊ ဧပြီ ၄ ရက်က ၉၈ ဦး၊ ၁၂ ရက်က ၉၁ ဦး နှင့် ဧပြီ ၂၈ ရက်တွင် ၁၂၈ ဦး ခေါ်ယူခဲ့တာဖြစ်ပါတယ်။

တောင်ကိုရီးယားအစိုးရက ၎င်းတို့နိုင်ငံအတွင်း ကိုဗစ်-၁၉ ကူးစက်ရောဂါပြန့်ပွားခြင်းကို ကာကွယ်ထိန်းချုပ်နိုင်ရန်အတွက် ၂၀၂၀ ပြည့်နှစ်၊ ဇွန် ၁ ရက်မှစ၍ ပြည်ဝင်ခွင့် ပိတ်ပင်ထားခဲ့ပြီးနောက်ပိုင်း မြန်မာနိုင်ငံမှလုပ်သားများ ပြန်လည်ခေါ်ယူနေတာဖြစ်ပါ တယ်။

ymg-mnn
#Yangon_Media_Group.

#WorldHealth
Published 30 April 2022

အက်စ်ပရင်ဆေးကို နေ့စဉ်သောက်သုံးနေရတဲ့ အသက် ၆၀ အထက်လူကြီးတွေကို ဆရာဝန်တွေက သတိပေးလိုက်ပါတယ်။

နှလုံးရောဂါနဲ့ နှလုံးသွေးကြောပိတ်ခြင်းအန္တရာယ်ကို ကာကွယ်ဖို့ အက်စ်ပရင်ကို နေ့စဉ်သောက်ကြတာက ထုံးတမ်းတစ်ခုလိုဖြစ်နေပါပြီ။

ဒါပေမဲ့ အမေရိကန်မှ ထိပ်သီးဆေးပညာရှင်အဖွဲ့က အက်စ်ပရင်သောက်လေ့ရှိတဲ့အကျင့်ကို ပြင်ဆင်ဖို့ အကြံပြုနေကြပါတယ်။

အက်စ်ပရင်က ခန္ဓာကိုယ်တွင်းသွေးကြောပေါက်ခြင်းဖြစ်နိုင်ကြောင်း သတိပေးလိုက်ပါတယ်။
နှလုံးရောဂါမျိုးရိုးလိုက်တဲ့ အသက် ၄၀ မှ ၅၉ နှစ်ကြားလူမျိုးတွေသာ အက်စ်ပရင်ကိုနေ့စဉ်သောက်သုံးသင့်ကြောင်း အမေရိကန်ရောဂါတိုက်ဖျက်ကာကွယ်ရေးအဖွဲ့(USPSTF)က ဆိုပါတယ်။

အသက် ၇၅ နှစ်ကျော်တဲ့လူကြီးတွေမှာတော့ ဆေးရဲ့အာနိသင်အကျိုးက အနည်းငယ်သာသက်ရောက်နိုင်တာမို့လို့ မသောက်သုံးသင့်တော့ပါဘူး။

ကိုယ်တွင်းသွေးစိမ့်ထွက်ခြင်းက အသက်ကြီးလာတာနဲ့အမျှ ဖြစ်နိုင်ချေများလာတာကြောင့် အသက်ကြီးသူတွေမှာ အက်စ်ပရင်ရဲ့သက်ရောက်မှုက ဆိုးကျိုးသာပိုမိုဖြစ်ပေါ်စေနိုင်ပါတယ်။
ဒီလိုညွှန်ကြားချက်က အခုမှအက်စ်ပရင်စတင်သုံးစွဲသူတွေအတွက်သာ ရည်ညွှန်းတာဖြစ်ပါတယ်။

သုံးစွဲနေကျသူတွေကတော့ ဆရာဝန်များနဲ့မတိုင်ပင်ဘဲ သုံးစွဲခြင်းကိုမရပ်တန့်သင့်ပါဘူး။
၂၀၁၉ ခုနှစ်က ယူကေလေ့လာမှုတစ်ခုမှာ အက်စ်ပရင်က ကိုယ်တွင်းသွေးကြောပေါက်ခြင်းအန္တရာယ် ၅၀ ရာခိုင်နှုန်းနီးပါးပိုများစေကြောင်း တွေ့ရှိခဲ့ကြပါတယ်။

အက်စ်ပရင်သုံးစွဲသူတွေမှာ နှလုံးသွေးကြောဆိုင်ရာပြဿနာတွေကိုလျှော့ချပေးနိုင်ပေမယ့်လည်း သွေးယိုစိမ့်ခြင်းအန္တရာယ်ကလည်း အလားတူဖြစ်နိုင်ချေရှိနေပါတယ်။

အက်စ်ပရင်သုံးစွဲဖို့ကို လူနာနဲ့ဆရာဝန်ဆွေးနွေးတိုင်ပင်သင့်ပြီး သွေးယိုစိမ့်နိုင်တဲ့အန္တရာယ်နဲ့ ချိန်ညှိပြီးဆုံးဖြတ်ရမှာ ဖြစ်ပါတယ်။

အနာသက်သာစေတဲ့ဆေးလည်းဖြစ်တဲ့ အက်စ်ပရင်ဟာ ရင်သားကင်ဆာ၊ အူမကြီးကင်ဆာ၊ ဆီးကျိတ်ကင်ဆာ၊ အစာအိမ်ကင်ဆာဖြစ်နိုင်ချေတွေကိုလည်း လျှော့ချပေးနိုင်တယ်လို့ ယူဆထားကြပါတယ်။

Source: New York Post.
#Yangon_Media_Group

#Local_News
Published_ 30 April 2022

မြန်မာ-တရုတ် နှစ်နိုင်ငံဗဟိုအစိုးရများအကြား တောမီးအန္တရာယ်ဆိုင်ရာ ပူးတွဲကာကွယ်ရေးယန္တရားတစ်ရပ် ထူထောင်နိုင်ရန်နှင့် နှစ်နိုင်ငံနယ်စပ်ဒေသ တောမီးအန္တရာယ် တားဆီးထိန်းချုပ်ရေး လုပ်ငန်းနယ်ပယ်တွင် ပူးပေါင်းဆောင်ရွက်မှုကို မြှင့်တင်ခြင်းဖြင့် တောမီးများလောင်ကျွမ်းမှုကြောင့် ဖြစ်ပေါ်နိုင်သည့် ဆုံးရှုံးမှုများကို ထိရောက်စွာ ကာကွယ်သွားမယ်လို့ သိရပါတယ်။

မြန်မာ-တရုတ် နှစ်နိုင်ငံဗဟိုအစိုးရများအကြား တောမီးအန္တရာယ်ဆိုင်ရာ ပူးတွဲကာကွယ်ရေး လုပ်ငန်းကော်မတီ ပထမအကြိမ် ညှိနှိုင်းအစည်းအဝေးကို ဧပြီ ၂၉ နံနက်ပိုင်းတွင် ပတ်ဝန်းကျင်ထိန်းသိမ်းရေးဦးစီးဌာန၊ ရုံးအမှတ် ၅၈ ၌ ကျင်းပခဲ့ပါတယ်။

အစည်းအဝေးတွင် မြန်မာနှင့်တရုတ် နှစ်နိုင်ငံနယ်စပ်အကြား မီးလောင်ကွက်များ ပျံ့နှံမှု၊ နယ်စပ်ဖြတ်ကျော် မီးခိုးမြူငွေ့ညစ်ညမ်းမှုဆိုင်ရာ လုပ်ငန်းစီမံချက်ရေးဆွဲဆောင်ရွက်မှု၊ ဘက်စုံပါဝင်သော အမျိုးသားအဆင့် မီးစီမံအုပ်ချုပ်မှုဆိုင်ရာ မဟာဗျူဟာလုပ်ငန်းအစီအစဉ် ရေးဆွဲဆောင်ရွက်မှု၊ နယ်စပ်ဖြတ်ကျော် မီးခိုးမြူငွေ့ဆိုင်ရာ အာဆီယံ သဘောတူညီချက်အပေါ် ပူးပေါင်းဆောင်ရွက်မှုများကို ဆွေးနွေးခဲ့ကြပါတယ်။

ရွှေ့ပြောင်းတောင်ယာ စိုက်ပျိုးခြင်းကြောင့် တောမီးလောင်ကျွမ်းခြင်းကို ကာကွယ်နိုင်ရေးအတွက် ကုန်းမြင့်လယ်ယာစိုက်ပျိုးခြင်းစနစ် တိုးမြှင့်ဆောင်ရွက်မှု၊ တောမီးလောင်ကျွမ်းမှုအန္တရာယ် လျှော့ချရေးနှင့်စပ်လျဉ်း၍ နိုင်ငံတကာနှင့်ဒေသတွင်းပူးပေါင်းဆောင်ရွက်ရေး တိုးမြှင့်မှုတို့ကို ဆွေးနွေးကြပါတယ်။

နယ်စပ်ဖြတ်ကျော် မီးခိုးမြူငွေ့ညစ်ညမ်းမှု လေ့လာဆန်းစစ်ခြင်းနှင့် ထိန်းချုပ်ခြင်းဆိုင်ရာလုပ်ငန်းများ တိုးမြှင့်ဆောင်ရွက်ရေး၊ တောမီးကြိုတင်ကာကွယ်ရေးနှင့် ကြိုတင်သတိပေးရေး၊ တောမီးလောင်ကျွမ်းမှု လျော့ချရေး၊ တောမီးလောင်ကျွမ်းမှုကြောင့် ဖြစ်ပေါ် လာသော ပျက်စီးဆုံးရှုံးမှုများကို ပြန်လည်ထူထောင်ရေးလုပ်ငန်းများ ဆောင်ရွက်ရေးနှင့် နှစ်နိုင်ငံနယ်စပ်ဒေသအပါအဝင် နိုင်ငံအတွင်းတောမီးကာကွယ်ရေးဆိုင်ရာ ဘက်စုံပါဝင်သော အမျိုးသားအဆင့်လုပ်ငန်းအစီအစဉ်ကို ဆက်လက်ရေးဆွဲ အကောင်အထည်ဖော်ဆောင်ရွက်ရေးနဲ့ပတ်သက်တဲ့ ရှေ့ဆက်ဆောင်ရွက်မယ့် လုပ်ငန်းစဉ်များ ချမှတ်ခဲ့ကြောင်း သတင်းရရှိပါတယ်။

ymg-mnn
#Yangon_Media_Group

#WorldHealth
Published 30 April 2022

ကိုဗစ်ကပ်ရောဂါကာလအတွင်း အိပ်ရေးဝအောင်မအိပ်တဲ့သူတွေဟာ စိတ်ဓာတ်ကျခြင်း၊ စိုးရိမ်ပူပန်ခြင်း၊ အားအင်ကုန်ခမ်းခြင်းများ ခံစားရနိုင်ကြောင်း တွေ့ရှိချက်အသစ်မှာ ဖော်ပြထားပါတယ်။

တစ်ညကို အိပ်ချိန် ၆ နာရီမပြည့်တဲ့သူတွေဟာ ပုံမှန်အိပ်ရေးဝအောင်အိပ်သူတွေထက် ဒီလိုလက္ခဏာတွေ ပေါ်ပေါက်လာဖို့ ၇၅ ရာခိုင်နှုန်းပိုများပါတယ်။

လူလတ်ပိုင်းအရွယ်တွေက တစ်ညကို ၇ - ၉ နာရီကြား အိပ်စက်ဖို့လိုအပ်ပြီး အိပ်ချိန်နည်းပါးပါက စဉ်းစားတွေးခေါ်နိုင်စွမ်းလျော့နည်းလာနိုင်ကြောင်း လမ်းညွှန်ထားပါတယ်။

အမေရိကန်မှ လူဦးရေ ၃ ပုံ ၁ ပုံခန့်ဟာ ညဘက်အိပ်ရေးဝဖို့ ခက်ခဲနေကြောင်းသိရပါတယ်။
ကိုဗစ်လော့ဒေါင်းကာလတုန်းက အိမ်မှာပဲအချိန်ကုန်ကြရတာကြောင့် အိပ်ရေးမဝတာမျိုးအဖြစ်နည်းသွားခဲ့ပေမယ့် အခုအခါ ပြန်လည်ဆိုးရွားလာဖွယ်ရှိနေပါတယ်။

အလုပ်ကိစ္စနဲ့ မိသားစုကိစ္စများတွင် စိတ်ဖိစီးမှုများဖြစ်လာရသလို အခြားနေထိုင်မှုစရိုက်များကြောင့်လည်း ဖြစ်ပေါ်နိုင်ပါတယ်။

ကောင်းစွာအိပ်ပျော်နိုင်စေဖို့ နေထိုင်မှုအကျင့်များပြောင်းလဲပစ်ပြီး အိပ်ခန်းပြင်ဆင်သင့်ကြောင်း ဆရာဝန်များက အကြံပြုထားပါတယ်။

လူပေါင်း ၅,၀၀၀ ရဲ့အိပ်စက်ခြင်းပုံစံကိုလေ့လာကြရာမှာ တစ်ညကိုအိပ်ချိန် ၆ နာရီအောက်သာရှိတဲ့ လူ ၁၈၀ ဟာ စိတ်ဓာတ်ကျခြင်းနဲ့ စိုးရိမ်ပူပန်ခြင်းခံစားရသူ ၂၄ ရာခိုင်နှုန်းရှိပြီး အားအင်ကုန်ခမ်းခြင်းခံစားရသူ ၃၆ ရာခိုင်နှုန်းရှိနေပါတယ်။

ကိုဗစ်ကာလအတွင်း ပျမ်းမျှခြင်းအားဖြင့် ၁၈ မိနစ်နောက်ကျကာအိပ်ရာဝင်ကြပြီး ၃၆ မိနစ်နောက်ကျပြီး အိပ်ရာထကြကြောင်း တွေ့ရှိထားပါတယ်။

အိပ်စက်ဖို့အကြောင်းကို အဓိကထားပြီး အိပ်ချိန်စနစ်တကျစီစဉ်မယ်ဆိုရင် ဒီလိုဝေဒနာတွေကိုကာကွယ်နိုင်မယ်လို့ အကြံပြုထားပါတယ်။

Source: DailyMail
#Yangon_Media_Group

#Local_News
Published_ 30 April 2022

မလေးရှားနိုင်ငံ၌ အကြောင်းအမျိုးမျိုးဖြင့် ပြစ်ဒဏ်ကျခံပြီးဖြစ်ကာ ထိန်းသိမ်းရေးစခန်းများ၌ ရောက်ရှိနေတဲ့ မြန်မာနိုင်ငံသား ၆၄ ဦးအား ဧပြီ ၂၈ ရက်က ပြန်လည်ပို့ဆောင်ပေးခဲ့ကြောင်း ကွာလာလမ်ပူမြို့ရှိ မြန်မာသံရုံးက သတင်းထုတ်ပြန်ထားပါတယ်။

မြန်မာနိုင်ငံသို့ ပြန်လည်ပို့ဆောင်ရာတွင် အပြည်ပြည်ဆိုင်ရာ မြန်မာ့လေကြောင်း လိုင်း (MAI) ကယ်ဆယ်ရေးလေယာဥ်ဖြင့် ပြန်လည်ပို့ဆောင်ပေးခဲ့ခြင်းဖြစ်ပါတယ်။

ပြန်လည်ပို့ဆောင်ခြင်းမပြုမီ မြန်မာသံရုံးမှတာဝန်ရှိသူများက ထိန်းသိမ်းရေးစခန်းများသို့ သွားရောက်တွေ့ဆုံခဲ့တယ်လို့ ဆိုပါတယ်။

ထို့နောက် မြန်မာနိုင်ငံသားများအား အမြန်ဆုံးပြန်နိုင်ရန် မလေးရှားနိုင်ငံမှ တာဝန်ရှိသူများနှင့် ညှိနှိုင်းဆောင်ရွက်ပေးခဲ့တယ်လို့ သံရုံးရဲ့ထုတ်ပြန်ချက်မှာ ဖော်ပြထားပါတယ်။

ymg-mnn
#Yangon_Media_Group.

Published 29 April 2022

ရောဘတ်ဒီနဲရိုးဟာ ဧပြီ၂၈ရက် ကြာသပတေးနေ့က လာဗီးဂက်စ်မှာကျင်းပတဲ့ ရုပ်ရှင်ရုံပိုင်ရှင်များရဲ့ နှစ်ပတ်လည်ညီလာခံကို  စုဝေးရောက်ရှိလာကြတဲ့ ရုံပိုင်ရှင်တွေကို ပြသတဲ့ ရုပ်ရှင်အထူးပွဲရဲ့ လိုင်းရင်းဂိတ် ကော်ဇော်နီလမ်းမှာ လျှောက်လှမ်းခဲ့ပါတယ်။ ဒီနဲရိုးဟာ "About my Father" ဇာတ်မြူးကားထဲမှာ လူရွှင်တော် ဆီဘက်ရှန် မန်နစ်ကာလ်ကို ရဲ့ တကယ့်ဘဝကို သရုပ်ဆောင်ခဲ့ပါတယ်။ ပါဝင်သရုပ်ဆောင်သူတွေတော်တော်များများဟာ အီတလီ-အမေရိကန်တွေဖြစ်လို့ ရိုက်ကွင်းမှာ လူတိုင်း တစ်ဦးနှင့်တစ်ဦးသိကြပြီး နားလည်မှုရှိကြတယ်လို့ ရောဘတ်ဒီနဲရိုးက ပြောပါတယ်။

Source AFP