#LocalNews
Published - 17 Feb 2022

ဖေဖော်ဝါရီလ ၃ ရက်နေ့ကတည်းက ဖြစ်ပွားနေတဲ့တိုက်ပွဲတွေကြောင့် ပူတာအိုမြို့နယ်အတွင်းရှိ ကျေးရွာ ၅ ရွာက လူဦးရေ ၆,၀၀၀ ကျော်ဟာ တိုက်ပွဲရှောင်ထွက်ပြေးနေရတယ်လို့ ကုလသမဂ္ဂ လူသားချင်းစာနာမှုဆိုင်ရာ ပေါင်းစပ်ညှိနှိုင်းရေးရုံး(UNOCHA)က
ထုတ်ပြန်လိုက်ပါတယ်။

မြန်မာနိုင်ငံအ ရှေ့မြောက်ပိုင်း၊ ကချင်ပြည်နယ် ဖားကန့်၊ မိုးညင်း၊ ပူတာအို၊ ဆွန်ပရာဘွန်နဲ့ တနိုင်းမြို့နယ်တွေမှာ တပ်မတော်၊ ကချင်လွတ်မြောက်ရေးတပ်မတော်နဲ့ ဒေသခံ ပြည်သူ့ကာကွယ်ရေးတပ်တွေကြားက တိုက်ပွဲတွေ ပြင်းထန်လာပြီး လေကြောင်းမှတိုက်ခိုက်မှုသတင်းတွေကို ကြားသိနေရတယ်လို့ (UNOCHA)က ဆိုပါတယ်။

အဆိုပါတိုက်ပွဲတွေကြောင့် အရပ်သားသေကြေဒဏ်ရာရမှု၊ အိုးအိမ်စွန့်ခွာထွက်ပြေးရမှု၊ အရပ်သားပိုင်ပစ္စည်းများ ဖျက်ဆီးခံရမှုတွေ ဖြစ်ပေါ်ခဲ့ပြီး ဒေသခံမိတ်ဖက်တွေနဲ့ ဘာသာရေးခေါင်းဆောင်တွေရဲ့ အဆိုအရ နေရပ်စွန့်ခွာထွက်ပြေးလာကြသူတွေဟာ မြစ်ကြီးနားနဲ့ ပူတာအိုမြို့တွေမှာ ဆွေမျိုးတွေနဲ့ သွားရောက်နေထိုင်နေကြရသလို အနီးအနားက တောတွေထဲထွက်ပြေးကြရသူတွေလည်း ရှိနေတယ်လို့ (UNOCHA)က ဖော်ပြပါတယ်။

ထို့ကြောင့် ဖေဖေါ်ဝါရီလ ၉ ရက်နေ့အထိ လူသားချင်းစာနာမှု လုပ်ငန်းဆောင်ရွက်သူမိတ်ဖက်တွေဟာ ဒေသခံလူထုအသိုင်းအဝိုင်းက လက်ခံထားသူ ဦးရေ ၁,၀၀၀ အတွက် အစားအစာဝယ်ရန် ငွေကြေး၊ အမိုးအကာ၊ အိုးခွက်ပန်းကန်စတဲ့ အိမ်ထောင်သုံးပစ္စည်း၊ တကိုယ်ရေသုံးပစ္စည်းများ၊ ကိုဗစ်-၁၉ ကာကွယ်ရေးဆိုင်ရာပစ္စည်းများကို ပေးအပ်ခဲ့ပြီးဖြစ် ကြောင်းနှင့် ကျန်ရှိသူများကို ဆက်လက်ပေးအပ်နိုင်ဖို့ ဆက်လက်လုပ်ဆောင်နေတယ်လို့ (UNOCHA)က ဆိုပါတယ်။

ကုလသမဂ္ဂ ဒုက္ခသည်များဆိုင်ရာ မဟာမင်းကြီးရုံး (UNHCR) က ဖေဖေါ်ဝါရီလ ၇ ရက်နေ့မှာ ထုတ်ပြန်တဲ့ ကိန်းဂဏန်းများအရ ၂၀၂၁ ခုနှစ်၊ ဖေဖေါ်ဝါရီလ ၁ ရက်နေ့ကတည်းက ကချင်ပြည်နယ်မှာ နေရပ်စွန့်ခွာလာသူဦးရေ ၈,၆၀၀ ခန့် ရှိနေတယ်လို့ သိရပါတယ်။

ဒါ့အပြင် ၂၀၂၁ ခုနှစ် မတိုင်ခင် ပဋိက္ခတွေကြောင့် ယာယီစခန်းတွေမှာ ဆက်လက်နေထိုင်နေရသူ ၉၆,၅၉၀ လည်း ရှိနေပါသေးတယ်လို့ (UNOCHA)၏ သတင်းထုတ်ပြန်ချက်မှာ ဖော်ပြခဲ့ပါတယ်။

Photo - CJ

ymg/kg
#Yangon_Media_Group

#DailyNews
Published - 17 Feb 2022

၁။ ငါးမဖမ်းရရာသီကို နှစ်စဉ် တစ်လတိုးသတ်မှတ်လာတာကြောင့် ငါးသယံဇာတ တိုးပွားလာသော်လည်း ပြည်ပရေထွက်ပို့ကုန် လျော့ကျလာ။

၂။ စက်သုံးဆီဈေးနှုန်းမြင့်တက်မှုကြောင့် လူနာလမ်းကြောင်းများပို့ဆောင်ရာမှာ အခက်အခဲများကြုံနေရတဲ့ ရန်ကုန်အခြေစိုက် ပရဟိတအသင်းများ 

၃။ နေ့စဉ်မိုးလေဝသသတင်း။

၄။ ဖာရိုးကျွန်းစုတွင် နှစ်စဉ်လင်းပိုင်များ အမဲလိုက်သတ်ဖြတ်ပွဲပြုလုပ်ခြင်းကို အစိုးရကပြန်လည်သုံးသပ်.....အစရှိတဲ့သတင်းတွေကို တင်ဆက်ပေးသွားမှာပဲဖြစ်ပါတယ်။

#Yangon_Media_Group

#LocalNews
Published - 17 Feb 2022

ဒလမြို့နယ်၌ ကိုဗစ်-၁၉ ရောဂါပိုးတွေ့လူနာများထားရှိနိုင်ရေး အသွားအလာကန့်သတ်စောင့်ကြည့်ရေးစင်တာများအား ကြိုတင်ပြင်ဆင်ဆောင်ရွက်ထားတယ်လို့ ဒလမြို့နယ်-ကိုဗစ်-၁၉ သတင်းပြန်ကြားရေးကော်မတီမှ သိရပါတယ်။

အဆိုပါ ကိုဗစ်-၁၉ ရောဂါပိုးတွေ့လူနာများ ထားရှိနိုင်ရေးအတွက် သက်ဆိုင်ရာရပ်ကွက်နှင့် ကျေးရွာအလိုက် ပြည်သူ ၂၀ ဦးမှ ၃၀ ဦးအထိ ဝင်ဆံ့ထားရှိနိုင်သော ဘုန်းတော်ကြီးကျောင်းနှင့် ဓမ္မာရုံတို့တွင် အသွားအလာကန့်သတ်စောင့်ကြည့်ရေးစင်တာများကို ကြိုတင်ပြင်ဆင်ဆောင်ရွက်နေတာဖြစ်ပြီး ကိုဗစ်-၁၉ ရောဂါပိုး ရှိ၊မရှိ စစ်ဆေးနိုင်သည့် Test Center ၃ ခုဖွင့်လှစ်ထားရှိတယ်လို့ ဆိုပါတယ်။

ဒါ့အပြင် Test Center (၃)ခုကိုလည်း ဒလမြို့နယ်အတွင်းရှိ ဒလပြည်သူ့ဆေးရုံ၊ ပျော်ဘွယ်ကြီးတိုက်နယ်ဆေးရုံနဲ့ ရခိုင်ချောင်တိုက်နယ်ဆေးရုံတို့တွင် ဖွင့်လှစ်ပေးထားပြီး ကိုဗစ်စစ်ဆေးခြင်းတွေကို ဒလပြည်သူ့ဆေးရုံ၌ တနင်္လာနေ့မှ သောကြာနေ့အထိလည်းကောင်း၊ ရခိုင်ချောင်တိုက်နယ်ဆေးရုံတွင် အင်္ဂါနေ့နှင့် ကြာသပတေးနေ့တို့တွင်လည်း ကောင်း၊ ပျော်ဘွယ်ကြီးတိုက်နယ်ဆေးရုံတွင် အင်္ဂါနေ့နှင့် ဗုဒ္ဓဟူးနေ့များတွင် စစ်ဆေးနိုင်မှာဖြစ်တယ်လို့လည်း သိရပါတယ်။

လက်ရှိအချိန်ထိ ဒလမြို့နယ်အတွင်းမှာ ကိုဗစ်-၁၉ ရောဂါပိုးတွေ့လူနာစုစုပေါင်း ၈၃ ဦးအထိ ရှိနေပြီး အဆိုပါ ပိုးတွေ့လူနာများအား မြို့နယ်ပြည်သူ့ဆေးရုံတွင် ၁၃ ဦး၊ ရခိုင်ချောင်တိုက်နယ်ဆေးရုံတွင် ၁၀ ဦး၊ သပြေကုန်းကျေးရွာရှိ အနာဂါမ် ဆရာသက်ကြီးတန်ဆောင်တွင် ၂၉ ဦးတို့အား အသွားအလာကန့်သတ်၍ စောင့်ကြပ်ကြည့်ရှုလျက်ရှိနေတာပါ။

ဒါ့အပြင် ကျန်းမာရေးပြန်လည်ကောင်းမွန်၍ ဆေးရုံမှ ဆင်းခွင့်ရသူမှာလည်း ၂၄ ဦးအထိ ရှိလာပြီဖြစ်တယ်လို့ ဒလမြို့နယ်ကိုဗစ်-၁၉ ရောဂါ ကာကွယ်ထိန်းချုပ်ရေးနှင့် အရေးပေါ်တုန့်ပြန်ရေးကော်မတီမှ သိရပါတယ်။

ဓါတ်ပုံ - ဒလမြို့နယ်-ကိုဗစ်-၁၉ သတင်းပြန်ကြားရေးကော်မတီ

ymg/kg
#Yangon_Media_Group

#LocalNews
Published - 17 Feb 2022

ပြည်တွင်းမှာ ကိုဗစ်ရောဂါပိုးကြောင့် ဇန်နဝါရီလ ၂၃ ရက်အထိ သေဆုံးသူ ၁၉,၃၁၀ ဦး သေဆုံးခဲ့ပေမယ့် ဖေဖော်ဝါရီလ ၁၃ ရက်နေ့အထိ သေဆုံးမှုတွေမရှိခဲ့ဘဲ နောက်ပိုင်းမှာ သေဆုံးသူတွေ ပြန်လည်ရှိလာပါတယ်။

အခုဆိုရင် ၃ ရက်ဆက်တိုက် သေဆုံးမှုတွေ ပြန်လည်ဖြစ်ပေါ်လာပြီး ဖေဖော်ဝါရီ ၁၄ ရက်နေ့က ၁ ဦး ၁၅ ရက်နေ့က ၃ ဦးနဲ့ ၁၆ ရက်နေ့က ၄ ဦး ထပ်မံသေဆုံးခဲ့ကာ စုစုပေါင်း သေဆုံးသူ ၁၉,၃၁၈ ဦး သေဆုံးလျက်ရှိတယ်လို့ ကျန်းမာရေးဝန်ကြီးဌာန ထုတ်ပြန်ချက်စာရင်းတွေအရ သိရပါတယ်။

ဒါ့အပြင် ကိုဗစ်အတည်ပြုလူနာသစ်တွေလည်း နေ့စဉ်တိုးမြင့်လာပါတယ်။ ဖေဖော်ဝါရီ ၁၆ ရက်နေ့နဲ့ ၁၅ ရက်နေ့ နှစ်ရက်ဆက်တိုက် တစ်နေ့ကို လူဦးရေ နှစ်ထောင်ကျော်နှုန်းနဲ့တွေ့ရှိခဲ့ပြီး လွန်ခဲ့တဲ့ တစ်ပတ်တိတိမှာလည်း တစ်နေ့ကို လူဦးရေ တစ်ထောင်ကျော်နှုန်းနဲ့ လူနာသစ်တွေ့ရှိမှုတွေ တိုးမြင့်လာတာဖြစ်ပါတယ်။

အခုလက်ရှိ ရောဂါပိုးတွေ့ရှိမှု ရာခိုင်နှုန်းမှာလည်း မူလ ၁ ရာခိုင်နှုန်းကနေ ၈ ဒသမ ၉၈ ရာခိုင်နှုန်းအထိ မြင့်တက်လာတာတွေ့ရပါတယ်။ ဒါ့အပြင် ပြည်တွင်းကိုဗစ်ရောဂါပိုး ကူးစက်ခံသူ ၅၅၃,၅၆၄ ဦးအထိ ရှိနေပြီးဖြစ်ပါတယ်။

မြန်မာနိုင်ငံမှာ ကိုဗစ်ကာကွယ်ဆေး ပထမအကြိမ်ပြည့်ထိုးနှံပြီးသူနဲ့ အကြိမ်ပြည့်ထိုးနှံပြီးသူ လူဦးရေ စုစုပေါင်း ၂၃ ဒသမ ၁၅ သန်း ရှိနေပြီလို့ သိရပါတယ်။

ymg/ei
#Yangon_Media_Group

#LocalNews
Published - 17 Feb 2022

မြန်မာပြည်ငြိမ်းချမ်းရေးအတွက် ဥရောပသမဂ္ဂအဖွဲ့ဝင်နိုင်ငံဖြစ်သည့် စပိန်နိုင်ငံကလည်း ပါဝင်သွားမှာဖြစ်တယ်လို့ သိရပါတယ်။

စတော့ဟုမ်းကမ္ဘာ့ငြိမ်းချမ်းရေးဆုရှင် - ကမ္ဘာ့ငြိမ်းချမ်းရေးသံတမန်ရဟန်းတော် IBEC ဆရာတော် ဒေါက်တာအရှင်သောဘိတ ဦးဆောင်သောအဖွဲ့သည် မြတ်ဗုဒ္ဓဘာသာအတွက် ဥရောပမှာ Holy Land -Holy City ဟု သတ်မှတ်ထားသော စပိန်နိုင်ငံ၏ ယဉ်ကျေးမှုမြို့တော်မှာ ဗုဒ္ဓလုမ္ဗိနီဥယျာဉ်တော်ကြီးတည်ဆောက်ရေးကိစ္စရပ်တွေနဲ့ ပတ်သက်ပြီး
စပိန်နိုင်ငံ အစိုးရတာဝန်ရှိသူများနှင့် တွေ့ဆုံခဲ့စဥ်မှာ ဗုဒ္ဓလုမ္ဗိနီဥယျာဉ်တော်တည်ဆောက်ခွင့်နှင့် အဆိုပါ
သဘောတူညီမှုကို ရရှိခဲ့ခြင်းဖြစ်ပါတယ်။

ယင်းတွေ့ဆုံဆွေးနွေးမှုကို ယမန်နေ့( ဖေဖော်ဝါရီ ၁၆)ရက်က စပိန်နိုင်ငံရှိ ကပ်ဆီးရပ်မြို့တော်ဝန်ရုံး၌ ပြုလုပ်ခဲ့ခြင်းဖြစ်ပါတယ်။

အဆိုပါတွေ့ဆုံမှုတွင် မြန်မာ-နယ်သာလန်ကိုယ်စားပြု ဗုဒ္ဓဘာသာအဖွဲ့ ဦးဆောင်ဆရာတော်ဒေါက်တာအရှင်သောဘိတ-(IBEC) ဆရာတော်နှင့်အဖွဲ့အား စပိန်နိုင်ငံ၌တည်ဆောက်မည့် Lumbini Garden Project ဥက္ကဋ္ဌ H.E. Jose Manual Vilanova နှင့် ဒါရိုက်တာအဖွဲ့က ရှေးဦးစွာတွေ့ဆုံ၍ ထိုဆွေးနွေးပွဲကို ဒေသစံတော်ချိန် နံနက်(၉)နာရီခွဲမှ (၁၁)နာရီအထိလည်းကောင်း၊ ဆက်လက်ပြီး နေ့လည်(၁၂)နာရီအချိန်တွင် စပိန်နိုင်ငံ Caceres patrimonio De La Humniddad , UNESCO မြို့တော်ဝန် His Excellency Luis Salaya က IBEC ဆရာတော်နှင့်အဖွဲ့အား မြို့တော်ဝန်ရုံးမှာ လက်ခံတွေ့ဆုံကာ ဆွေးနွေးခဲ့ကြခြင်းဖြစ်တယ်လို့ သိရပါတယ်။

အဆိုပါ The Second Birth Place of Lord Buddha Garden Project in Spain စီမံကိန်းသည် အထူးစိတ်ဝင်စားစရာကောင်းသလို မြို့တော်ဝန် His Excellency Luis Salaya နှင့် Lumbini Garden Project အဖွဲ့တို့သည် IBEC ဆရာတော်နှင့်သာသနာပြုအဖွဲ့အား ယဉ်ကျေးမူမြို့တော်အကြောင်းရှင်းပြကာ အပြန်အလှန်မိတ်ဆက်ဆွေးနွေးခဲ့ကြတယ်လို့လည်း ဆိုပါတယ်။

စတော့ဟုမ်းကမ္ဘာ့ငြိမ်းချမ်းရေးဆုရှင် -ကမ္ဘာ့ငြိမ်းချမ်းရေးသံတမန်ရဟန်းတော် IBEC ဆရာတော် ဒေါက်တာအရှင်သောဘိတသည် ဥရောပနိုင်ငံများသို့ ငြိမ်းချမ်ရေးခရီးစဥ်အဖြစ် ကြွချီနေတာလည်း ဖြစ်ပါတယ်။

IBEC ဆရာတော်၏ ဥရောပတိုက်နိုင်ငံများ ငြိမ်းချမ်းရေးခရီးစဥ်ဟာ (၁)လကြာမြင့်မှာဖြစ်တယ်လို့ သိရပါတယ်။

IBEC ဆရာတော်၏ ဥရောပတိုက်နိုင်ငံများ ငြိမ်းချမ်းရေးခရီးစဥ်အတွင်း မြန်မာပြည်ငြိမ်းချမ်းရေးအတွက် အာဆီယံဒေသတွင်းနှင့် ဥရောပသမဂ္ဂအတွင်း အပြုသဘောဆောင်မူပြရုပ်များကိုဆောင်ရွက်ကြရန် ငြိမ်းချမ်းရေးသတင်းစကားများ ပြောကြားမှာဖြစ်တယ်လို့လည်း International Buddhist Education Center(သတင်းထုတ်ပြန်ရေးအဖွဲ့) က သတင်းထုတ်ပြန်ထားပါတယ်။

ဓါတ်ပုံ - International Buddhist Education Center(သတင်းထုတ်ပြန်ရေးအဖွဲ့)

ymg/kg
#Yangon_Media_Group

#LocalNews
Published _17 Feb 2022

ရန်ကုန်ဆိပ်ကမ်းမှတစ်ဆင့် နယ်စပ်ကို ဖြတ်သန်ပြီး တရုတ်နိုင်ငံတောင်ပိုင်းနဲ့ အနောက်ပိုင်းပြည်နယ်တွေဆီကို နိုင်ငံတကာကကုန်ပစ္စည်းတွေ ဆက်လက်ဖြန့်ဖြူးနိုင်ရေးအတွက် ကုန်သွယ်ရေးလမ်းကြောင်းအသစ်ဖောက်လုပ်ဖို့ ဆွေးနွေးမှုပြုလုပ်ခဲ့တယ်လို့ သိရပါတယ်။

ဖေဖော်ဝါရီ ၁၆ ရက်ကပြုလုပ်ခဲ့တဲ့ ရင်းနှီးမြှုပ်နှံမှုနှင့် နိုင်ငံခြားစီးပွားဆက်သွယ်ရေးဝန်ကြီး ဦးအောင်နိုင်ဦးနဲ့ တောင်အာရှအနာဂတ်ရင်းနှီးမြှုပ်နှံမှုအုပ်စု (SAFIG) တို့တွေ့ဆုံမှုအတွင်း အဆိုပါအကြောင်းအရာကို ဆွေးနွေးခဲ့ကြတာဖြစ်ပါတယ်။

တွေ့ဆုံဆွေးနွေးရာတွင် ရေထွက်ပစ္စည်း၊ အိမ်ခြံမြေ၊ မြို့ပြအခြေခံအဆောက်အဦး ဖွံ့ဖြိုးတိုးတက်ရေး၊ ခရီးသွားကဏ္ဍဖွံ့ဖြိုးရေး၊ အပြည်ပြည်ဆိုင်ရာ ကုန်သွယ်ရေး၊ အွန်လိုင်းမှတစ်ဆင့် မြန်မာ့ထွက်ကုန်များ ရောင်းချရေးနဲ့ ကျောက် မျက်လုပ်ငန်းများတွင် ရင်းနှီးမြှုပ်နှံမှုများ ဆောင်ရွက်သွားဖို့လည်း ထည့်သွင်းဆွေးနွေးခဲ့ကြတယ်လို့ ဆိုပါတယ်။

ကုန်သွယ်ရေးလမ်းကြောင်းအသစ်ဖောက်လုပ်ဖို့ဆွေးနွေးခဲ့တဲ့ South Asia Future Investment Group (SAFIG) အနေနဲ့ တနင်္သာရီတိုင်းဒေသကြီး၊ မြိတ်ကျွန်းစု ဖွံ့ဖြိုးတိုးတက်ရေး စီမံကိန်းအတွင်းရင်းနှီးမြှုပ်နှံမှုမှာ ပါဝင်မယ့်ကဏ္ဍ၊ ခရီးသွားလုပ်ငန်းတိုးတက်လာဖို့ အကောင်အထည်ဖော်မယ့်လုပ်ငန်းတွေလည်း ပူးပေါင်းဆောင်ရွက်ဖို့ရှိနေကြောင်း သိရပါတယ်။

ymg_mnn
#yangon_media_group

#LocalNews
Published -17 Feb 2022

လက်ရှိ နိုင်ငံအတွင်း ဖြစ်ပေါ်နေသောအခြေအနေကို သက်ဆိုင်ရာ အင်အားစုများအနေနဲ့ စိတ်ရှည်သည်းခံမှု၊ အကြမ်းဖက်မှုများ၊ မဖြစ်ပေါ်လာရေး ညင်သာစွာ ကိုင်တွယ်ဆောင်ရွက်ပေးကြဖို့ မွန်ညီညွတ်ရေးပါတီမှ တိုက်တွန်း လိုက်ပါတယ်။

ဖေဖော်ဝါရီလ ၁၆ ရက်နေ့မှာကျရောက်တဲ့(၇၅)ကြိမ်မြောက် စိန်ရတု မွန်အမျိုးသားနေ့ အခမ်းအနားကိုပေးပို့သော မွန်ညီညွတ်ရေးပါတီရဲ့ သဝဏ်လွှာ ထည့်သွင်းရေးသားတိုက်တွန်းလိုက်တာဖြစ်ပါတယ်။

အဆိုပါသဝဏ်လွှာတွင် လက်ရှိနိုင်ငံအတွင်း ဖြစ်ပေါ်နေသောအခြေအနေကို သက်ဆိုင်ရာအင်အားစုတွေအနေနဲ့ စိတ်ရှည်သည်းခံမှု၊ အကြမ်းဖက်မှုများ၊ မဖြစ်ပေါ်လာရေး ညင်သာစွာ ကိုင်တွယ်ဆောင်ရွက်ပေးကြဖို့နဲ့ နိုင်ငံရေး ပြဿနာကို နိုင်ငံရေးနည်းလမ်းနဲ့ စေ့စပ်ညှိနှိုင်းဆွေးနွေးအဖြေရှာတဲ့နည်းလမ်းဖြင့် ဖက်ဒရယ်ဒီမိုကရေစီ ပြည်ထောင်စု တည်ဆောက်ရေးကို ရှေးရှုလျက် နိုင်ငံဖွံ့ဖြိုးတိုးတက်ရေးအတွက် အဓိကကျသော တိုင်းရင်းသားစည်းလုံးညီညွတ်ရေးနဲ့ပြည်တွင်း ငြိမ်းချမ်းရေးကို အလေးထားပြီး ကြိုးပမ်းဆောင်ရွက်သွားကြဖို့ တိုက်တွန်းထားရေးသားထားပါတယ်။

ဒါ့အပြင်၂၀၂၁ ခုနှစ် ဖေဖော်ဝါရီလ ၁ ရက်နေ့တွင် တပ်မတော်မှ နိုင်ငံတော်အာဏာကို လွှဲပြောင်းရယူခဲ့တဲ့ အခြေအနေအား ပကတိအရှိတရားအပေါ် ဆင်ခြင်သုံးသပ်ကာ မွန်တစ်မျိုးသားလုံးရဲ့အကျိုးစီးပွားအတွက် သိမ်မွေ့ ညင်သာသော တွေ့ဆုံဆွေးနွေးအဖြေရှာတဲ့နည်းလမ်းကို လျှောက်လှမ်းကာ မွန်လူမျိုးတို့သာမက တိုင်းရင်းသားအားလုံး လိုလားနေသော စစ်မှန်တဲ့ ဖက်ဒရယ်ဒီမိုကရေစီပြည်ထောင်စု တန်းတူရရှိရေးနဲ့ ကိုယ်ပိုင်ပြဌာန်းခွင့်ရရှိရေးအတွက် ဆက်လက်ရုန်းကန်ကြိုးစားသွားရမှာဖြစ်တယ်လို့ မွန်ညီညွတ်ရေးပါတီရဲ့ သဝဏ်လွှာတွင်ဖော်ပြရေးသားထားပါတယ်။

ymg/hm
#Yangon_Media_Group

#LocalNews
Published- 17 Feb 2022

ဖေဖေည်ဝါရီလ ၁၆ ရက်နေ့က ကမ္ဘောဒီးယားနိုင်ငံ၊ ဖနောင်ပင်မြို့၌ ကျင်းပပြုလုပ်ခဲ့တဲ့ အာဆီယံအဆင့်မြင့်အရာရှိကြီးများ အစည်းအဝေးကို နစက နိုင်ငံခြားရေးဝန်ကြီးဌာန၊ အမြဲတမ်းအတွင်းဝန် ဦးချမ်းအေးက Video conference ဖြင့် တက်ရောက်ခဲ့တယ်လို့ သိရပါတယ်။

အဆိုပါအစည်းအဝေးအား ကမ္ဘောဒီးယားအဆင့်မြင့်အရာရှိကြီး H.E. EAT Sophea က အစည်းအဝေးသဘာပတိအဖြစ် ဆောင်ရွက်ကျင်းပခဲ့ခြင်းဖြစ်ပြီး အာဆီယံနိုင်ငံများမှ အဆင့်မြင့် အရာရှိကြီးများနဲ့အာဆီယံအတွင်းရေးမှူးချုပ်ရုံးရဲ့ အာဆီယံနိုင်ငံရေးနဲ့ လုံခြုံရေးအသိုက်အဝန်းဆိုင်ရာ ဒုတိယအတွင်းရေးမှူးချုပ် တက်ရောက်ခဲ့တယ်လို့ သိရပါတယ်။

အစည်းအဝေးမှာ အာဆီယံအသိုက်အဝန်းထူထောင်ခြင်း၊ အရှေ့တောင်အာရှချစ်ကြည်ရေးနဲ့ ပူးပေါင်ဆောင်ရွက်ရေးစာချုပ်သို့ဝင်ရောက်မယ့် အာဆီယံပြင်ပနိုင်ငံများဆိုင်ရာကိစ္စ၊ အာဆီယံ ဆွေးနွေးဖက်ဆက်ဆံရေး၊ (၁၁)ကြိမ်မြောက် အာဆီယံပင်လယ်ရေကြောင်းဖိုရမ်နဲ့ (၉)ကြိမ် မြောက်အာဆီယံ ပင်လယ်ရေကြောင်းတိုးချဲ့ဖိုရမ်တွင် ဆုံးဖြတ်ခဲ့သည်များကို ဆက်လက်အကောင်အထည်ဖော်ရေးနဲ့ အာဆီယံနှင့် လက်တင်အမေရိကနှင့် ကာရေဘီယံဒေသ နျူကလီးယားလက်နက်တားမြစ်ရေး အေဂျင်စီတို့အကြား နားလည်မှုစာချွန်လွှာရေးထိုး၍ ပူးပေါင်းဆောင်ရွက်ရန် အဆိုပြုချက်တို့နဲ့ပက်သက်ကာ အမြင်ချင်းဖလှယ်ဆွေးနွေးမှုများ ပြုလုပ်ခဲ့တာဖြစ်ပါတယ်။

အစည်းအဝေးတွင် မြန်မာအဆင့်မြင့်အရာရှိကြီး၊ နိုင်ငံခြားရေးဝန်ကြီးဌာန၊ အမြဲတမ်းအတွင်းဝန် ဦးချမ်းအေးက ၂၀၂၂ ခုနှစ်၊ အာဆီယံဥက္ကဌအဖြစ် တာဝန်ယူဆောင်ရွက်လျက်ရှိသည့် ကမ္ဘောဒီးယားနိုင်ငံရဲ့ ဦးစားပေးလုပ်ငန်းများအပေါ် ထောက်ခံကြိုဆိုကြောင်း၊ မြန်မာနိုင်ငံအနေနဲ့ အာဆီယံ၏ အသိုက်အဝန်းထူထောင်ခြင်းအပါအဝင် အဆီယံ၏ ပြင်ပဆက်ဆံရေး တိုးမြှင့်မှုဆိုင်ရာလုပ်ငန်းများ၌ အာဆီယံနှင့် နီးကပ်စွာ ပူးပေါင်းဆောင်ရွက်သွားမယ်လို့ ပြောဆိုခဲ့ပါတယ်။

ထို့အပြင် အမြဲတမ်းအတွင်းဝန်က အာဆီယံအဖွဲ့အနေနဲ့ မြန်မာနိုင်ငံကိစ္စ ဆွေးနွေးရာမှာ အာဆီယံရဲ့ ပဋိဉာဉ်စာတမ်းပါ ပြဋ္ဌာန်းချက်များ၊အခြေခံမူများနှင့်အညီ ဆောင်ရွက်ရန်ကိစ္စ၊ မြန်မာနိုင်ငံအတွင်း ဖြစ်ပေါ်တိုးတက်မှု အခြေအနေများနဲ့မြန်မာနိုင်ငံရဲ့ရပ်တည်ချက် သဘောထားများကို ရှင်းလင်းပြောကြားခဲ့တယ်လို့ သိရပါတယ်။

ymg/hm
#Yangon_Media_Group

#WorldPolitics
Published - 17 February 2022
ယူကရိန်းနယ်စပ်အနီးရှိ ရုရှားစစ်တပ်အင်အား ထပ်မံတိုးချဲ့လာကြောင်း အနောက်နိုင်ငံတွေက ဗုဒ္ဓဟူးနေ့က သတိပေးလိုက်သလို ရုရှားတို့ နောက်ဆုတ်ဖို့ အရိပ်အယောင်မတွေ့ရတဲ့အပြင် အဓိကစစ်ရေးမြေပြင်နေရာတွေကို တိုက်ခိုက်သိမ်းပိုက်နိုင်လောက်တဲ့ စစ်တပ်အင်အားနဲ့ ချီတက်လှုပ်ရှားလာတာကိုတွေ့ရကြောင်း အက်စ်တိုးနီးယားနိုင်ငံကလည်း ပြောကြားလိုက်ပါတယ်။

သံချပ်ကာယာဉ်တွေ၊ ရဟတ်ယာဉ်တွေ၊ ယာယီဆေးကုသဆောင်တွေကိုတွေ့ရှိထားကြောင်းလည်း ဗြိတိန်ထောက်လှမ်းရေးနဲ့ ကာကွယ်ရေးဦးစီးချုပ်က မှတ်ချက်ပြုထားပါတယ်။
ယခုရက်ပိုင်းတွေမှာ နောက်ထပ်တပ်ဖွဲ့ အင်အား ၇,၀၀၀ ခန့် နယ်စပ်ကိုထပ်မံရောက်ရှိလာကြသလို ဗုဒ္ဓဟူးနေ့ကလည်း ရောက်လာကြသေးကြောင်း အမေရိကန်သမ္မတ'ဂျိုးဘိုင်ဒန်'ရဲ့အစိုးရအဖွဲ့ က ပြောကြားခဲ့ပါတယ်။

ကမ္ဘာ့အင်အားကြီးနိုင်ငံတွေအနေနဲ့ ပြီးခဲ့တဲ့ဆယ်စုနှစ်တွေအတွင်း အကြီးမားဆုံးပဋိပက္ခဖြစ်ပွားမှုမှာ ထိပ်တိုက်တွေ့ဆုံနေကြတာဖြစ်ပါတယ်။စစ်အေးကာလအလွန် ဩဇာလွှမ်းမိုးနိုင်ရေးနဲ့ စွမ်းအင်ထောက်ပံ့ရေးကိစ္စတွေမှာ အတိုက်အခံဖြစ်နေကြတဲ့အပြင် ယူကရိန်းအနေနဲ့ နေတိုး(NATO)အဖွဲ့ ထဲ ဘယ်တော့မှဝင်ရောက်ခြင်းမပြုဖို့ ရုရှားကအလိုရှိနေပါတယ်။

အနောက်နိုင်ငံတွေက ထိပ်တိုက်တွေ့ဆုံနေမှုကို ဖြေလျှော့ချဖို့ ကြိုးစားတဲ့အနေနဲ့ လက်နက်အင်အားထိန်းချုပ်ခြင်းနဲ့ နိုင်ငံဆက်ဆံရေးအကြား ယုံကြည်မှုတည်ဆောက်နေပေမယ့် အချိန်မရွေးတိုက်ပွဲဖြစ်လာနိုင်တာကြောင့် ယူကရိန်းမှာရှိတဲ့ အနောက်နိုင်ငံသားတွေကို ယူကရိန်းမှထွက်ခွာဖို့ မှာကြားထားပါတယ်။

ရုရှားတို့ က ကျူးကျော်ဖို့ အစီအစဉ်မရှိဘူးလို့ ကြေညာထားပေမယ့် စစ်အင်အားတိုးချဲ့နေတဲ့အပြင် တပ်ဆုတ်တာမျိုးလည်းမတွေ့ရကြောင်း အမေရိကန်နိုင်ငံခြားရေးဝန်ကြီး 'အန်တိုနီဘလင်ကန်'က MSNBC နဲ့အင်တာဗျူးမှာ ပြောကြားခဲ့ပါတယ်။

ယူကရိန်းနယ်စပ်အနားမှာ ရုရှားစစ်အင်အား ၁၇၀,၀၀၀ ခန့် ရှိနေပြီးသားအပြင် နောက်ထပ်တိုက်ခိုက်ရေးတပ်ဖွဲ့ ၁၀ ဖွဲ့ လောက် ရွေ့လျားလာနေတာကို အက်စ်တိုးနီးယားထောက်လှမ်းရေးက တွေ့ရှိခဲ့ကြောင်း အက်စ်တိုနီးယားနိုင်ငံခြားထောက်လှမ်းရေးက ပြောကြားလိုက်ပါတယ်။

တိုက်ခိုက်မှုဖြစ်ပွားလာပါက အဓိကစစ်မြေပြင်နေရာတွေကို သိမ်းပိုက်ပြီး ဒုံးကျည်တိုက်ခိုက်မှုတွေ ပါဝင်လာနိုင်ပါတယ်။ရုရှားတို့ ယူကရိန်းကိုသိမ်းပိုက်နိုင်ခဲ့ပါက လာမယ့်နှစ်တွေမှာ ဘောလ်တစ်ဒေသတွေကိုလည်း ဖိအားပေးလာနိုင်မှာဖြစ်ပြီး 'ပူတင်'က စစ်ရေးခြိမ်းခြောက်မှုတွေနဲ့ အသုံးချလာနိုင်ပါတယ်။

ယူကရိန်းနယ်စပ်အနီးရှိ တောင်ပိုင်းနဲ့ အနောက်ပိုင်းစစ်ရေးဒေသတွေမှာ စစ်ရေးလေ့ကျင့်မှုတွေပြုလုပ်ပြီးနောက် ရုရှားတပ်ဖွဲ့ တွေ တပ်ဆုတ်လာပြီဖြစ်ကြောင်း ရုရှားကာကွယ်ရေးဝန်ကြီးဌာနက ဆိုခဲ့ပြီး အိုင်ယာလန်နိုင်ငံဆိုင်ရာ ရုရှားသံအမတ်ကလည်း ရုရှားတပ်ဖွဲ့တွေဟာ ၃ - ၄ ပတ်အတွင်း အခြေချရာနေရာကို ပြန်ရောက်ရှိမှာဖြစ်ကြောင်း ခုခံပြောကြားခဲ့ပါတယ်။

ထွက်ပေါ်လာတဲ့ဗီဒီယိုတစ်ခုမှာ တင့်ကားတွေ၊ ခြေလျင်တိုက်ခိုက်ရေးယာဉ်တွေ၊ အမြောက်တပ်တွေဟာ ခရိုင်မီယာကျွန်းဆွယ်ကနေ ထွက်ခွာလာတာကို မြင်တွေ့ရပါတယ်။
နေတိုးအဖွဲ့ မှတပ်မှူးတွေက တိုက်ခိုက်ရေးအစီအစဉ်တွေ ရေးဆွဲနေပြီး ဘူလ်ဂေးရီးယား၊ ရိုမေးနီးယား၊ ဟန်ဂေရီ၊ ဆလိုဗေးကီးယားနိုင်ငံတို့မှာ တပ်ဖွဲ့ တွေနေရာချထားနိုင်ကြောင်း သံတမန်တွေက ဆိုပါတယ်။

ပိုလန်နဲ့ ဘောလ်တစ်ဒေသနိုင်ငံတွေမှာ အနောက်နိုင်ငံတပ်ဖွဲ့အချို့ ရောက်ရှိနှင့်ပြီးသားဖြစ်နေပြီး နောက်ထပ်စစ်သည်တွေ ရှေ့တန်းသို့တက်ရောက်နိုင်ရန်အတွက် အချိန်ဆွဲပေးထားဖို့ ရည်ရွယ်ထားတာဖြစ်ပါတယ်။

ဗြိတိန်တို့ကလည်း အက်စ်တိုးနီးယားနိုင်ငံမှာ သူတို့ရဲ့တပ်ဖွဲ့အင်အားကို နှစ်ဆတိုးချဲ့လိုက်ပြီး ရုရှားနယ်စပ်နဲ့ထိစပ်ရာ ဘောလ်တစ်ဒေသတွေထံသို့ တင့်ကားတွေ၊ သံချပ်ကာတိုက်ခိုက်ရေးယာဉ်တွေ စေလွှတ်ထားပါတယ်။
Source: Reuters

#Local_News
Published_17 Feb 2022

မျိုးကောင်း၊ မျိုးသန့်၊ မျိုးစေ့များ ထုတ်လုပ်အသုံးပြုခြင်းများနှင့် သက်ဆိုင်သည့် ဗဟုသုတများကို လေ့လာနိုင်မည့် မျိုးစေ့ပြပွဲ ၂၀၂၂ (Seed Fair 2022) ကို ဖေဖော်ဝါရီလ တတိယပတ်အတွင်း နေပြည်တော်ရှိ ပျဉ်းမနား စိုက်ပျိုးရေး သိပ္ပံကျောင်းဝန်းအတွင်း၌ ကျင်းပသွားမှာဖြစ်ကြောင်း သိရပါတယ်။

မျိုးကောင်းမျိုးသန့် မျိုးစေ့ထုတ်လုပ်သုံးစွဲမှု ဖွံ့ဖြိုးတိုးတက်လာစေရန်နှင့် လယ်ယာကဏ္ဍတွင် မျိုးကောင်းမျိုးသန့် မျိုးစေ့များ အသုံးပြုစိုက်ပျိုးခြင်းဖြင့် ထုတ်လုပ်မှုမြင့်မားပြီး နိုင်ငံတော်၏ လူမှုစီးပွားဘဝဖွံ့ဖြိုးမှုကို အထောက်အကူဖြစ်စေရန် ရည်ရွယ်၍ ကျင်းပခြင်းဖြစ်တယ်လို့ ဆိုပါတယ်။

အဆိုပါပြပွဲတွင် စိုက်ပျိုးရေး၊ မွေးမြူရေးနှင့် ဆည်မြောင်းဝန်ကြီးဌာနအောက်ရှိ ဦးစီးဌာနများရှိ သုတေသနခြံများ၊ မျိုးသန့်မျိုးပွားခြံများမှ ထုတ်လုပ်ထားသော ဆန်စပါး၊ ပဲမျိုးစုံ၊ ဆီထွက်သီးနှံနှင့် ဟင်းသီးဟင်းရွက် သစ်သီးဝလံ မျိုးစေ့ပျိုးပင်ပြခန်း ပြကွက်များ နှင့် စိုက်ခင်းများ၊ ပုဂ္ဂလိကပြခန်းများ ခင်းကျင်းပြသထားမှာဖြစ်တယ်လို့ သိရပါတယ်။

ပြပွဲရက်များအတွင်း စကားဝိုင်းဆွေးနွေးပွဲများကိုလည်း ထည့်သွင်းစီစဉ်ပေးသွားမည်ဖြစ်ရာ အနယ်နယ်အရပ်ရပ်မှ လာရောက်လေ့လာကြမည့် လယ်ယာကဏ္ဍကို စိတ်ဝင်စားသူများအနေဖြင့် မျိုးကောင်းမျိုးသန့်မျိုးစေ့များ ထုတ်လုပ်အသုံးပြုခြင်းများနှင့်သက်ဆိုင်သည့် ဗဟုသုတများကို စုံလင်စွာလေ့လာနိုင်မှာဖြစ်ပါတယ်။

ymg-mnn
#Yangon_Media_Group

#WorldHealth
Published - 17 February 2022
ကိုဗစ်နောက်ဆက်တွဲရောဂါလက္ခဏာတွေ ခံစားရတဲ့အကြောင်းအရင်းကို လေ့လာကြည့်ကြရာ ကိုရိုနာဗိုင်းရပ်စ်စတင်ကူးစက်ခံရစဉ် ခန္ဓာကိုယ်ထဲရှိ အရေးကြီးဆုံးအာရုံကြောနာ့ဗ်တွေထဲကတစ်ခုဖြစ်တဲ့ Vagus Nerve ထိခိုက်သွားတာကြောင့်ဖြစ်နိုင်ကြောင်း ယူဆထားကြပါတယ်။

Vagus nerve ဟာ အာရုံကြောနာ့ဗ်တွေထဲမှာ နံပါတ်(၁၀)မြောက်နာ့ဗ်ကြောဖြစ်ပြီး အရှုပ်ထွေးဆုံးနဲ့အရှည်လျားဆုံး အာရုံကြောဖြစ်ပါတယ်။သူဟာ ဦးနှောက်ကနေ မျက်နှာ ရင်ဘတ်နဲ့ ဝမ်းဗိုက်အထိ တည်ရှိနေပါတယ်။

ဦးနှောက်နဲ့ အစာအိမ်အူလမ်းကြောင်းကြား အဓိကချိတ်ဆက်ပေးထားပြီး အတွင်းအင်္ဂါတွေရဲ့ အခြေအနေကို ဦးနှောက်ဆီ သတင်းပြန်ပို့ ပေးပါတယ်။Vagus nerve ဟာ အစာအိမ်အူလမ်းကြောင်းစနစ်အတွက် အရေးကြီးတဲ့အပြင် ပါးစပ်ကနေ အစာအိမ်အထိ အစာသွားရာလမ်းကြောင်းနဲ့ အူလမ်းကြောင်းတလျှောက် ပို့ဆောင်ခြင်းကိုလည်း ထိန်းချုပ်ပေးပါတယ်။

နှလုံးခုန်နှုန်း၊ ချွေးထွက်ခြင်း၊ ပါးစပ်ရှိကြွက်သားလှုပ်ရှားမှု စတဲ့ဖြစ်စဉ်တွေမှာလည်း ပါဝင်ထိန်းချုပ်နေပါတယ်။လေ့လာစမ်းသပ်ချက်တွေအရ SARS-CoV-2 ကြောင့် Vagus nerve ထိခိုက်ခြင်း (VND) ဖြစ်ပွားရခြင်းတွင် ကိုဗစ်နောက်ဆက်တွဲရောဂါလက္ခဏာအများအပြား ပါဝင်နေပါတယ်။

အသံနေအသံထားမမှန်ခြင်း၊ အစာရေမြိုချရခက်ခဲခြင်း၊ မူးဝေခြင်း၊ နှလုံးခုန်မြန်ခြင်း၊ သွေးပေါင်ချိန်ကျခြင်း၊ အစာခြေစနစ်ထိခိုက်ခြင်းတို့ ဖြစ်နိုင်ပါတယ်။
ကိုဗစ်နောက်ဆက်တွဲရောဂါလက္ခဏာခံစားရပါက ခန္ဓာကိုယ်ထဲရှိ အင်္ဂါအားလုံးနီးပါး ထိခိုက်နိုင်တဲ့အပြင် စိတ်ကျန်းမာရေးအခြေအနေနဲ့ အာရုံကြောစနစ်တွေကိုပါ ထိခိုက်နိုင်ပါတယ်။

အဖြစ်အများဆုံး နောက်ဆက်တွဲလက္ခဏာတွေမှာ နွမ်းနယ်ခြင်း၊ ခေါင်းကိုက်ခြင်း၊ အသက်ရှူကြပ်ခြင်း၊ အနံ့အရသာပျောက်ခြင်း၊ ကြွက်သားအားနည်းခြင်းတို့ ပါဝင်ပါတယ်။

ဒီဖြစ်စဉ်တွေကိုပိုမိုသိရဖို့ အတွက် ကိုဗစ်နောက်ဆက်တွဲခံစားရတဲ့သူတွေမှာ vagus nerve စမ်းသပ်ချက်တွေ ပြုလုပ်ခဲ့ကြပါတယ်။အဖြစ်အများဆုံး vagus nerve ထိခိုက်မှုများထဲတွင် ဝမ်းလျှောခြင်းဝေဒနာခံစားရသူ ၇၃ ရာခိုင်နှုန်း၊ နှလုံးခုန်မြန်ခြင်း ၅၉ ရာခိုင်နှုန်း၊ မူးဝေခြင်း အစာမြိုရခက်ခဲခြင်း အသံပျက်ခြင်းတို့ က ၄၅ ရာခိုင်နှုန်း၊ သွေးပေါင်ချိန်ကျခြင်းက ၁၄ ရာခိုင်နှုန်းအသီးသီး တွေ့ရှိခဲ့ပါတယ်။

အချို့ လူနာတွေမှာ အစာခြေစနစ်အတွင်း ပြောင်းလဲမှုများတွေ့ရပြီး အစာရေမြိုချရခက်ခဲခြင်းတွေ ကြုံတွေ့ကြရပါတယ်။
Source: The Jerusalem Post 

#WorldHealth
Published - 17 February 2022

လတ်တလောမှာ အိုမီခရွန်မျိုးဗီဇကွဲကူးစက်မှု လျော့ကျလာတဲ့အချိန်ကျမှ အိုမီခရွန်မျိုးဗီဇကွဲကို ကာကွယ်နိုင်မယ့်ကိုဗစ်ကာကွယ်ဆေးတွေကို သိပ္ပံပညာရှင်တွေက အသည်းအသန်ကြိုးစားစမ်းသပ်နေကြပါတယ်။နောက်ထပ်ထုတ်လုပ်နေတဲ့ ကာကွယ်ဆေးတွေရဲ့ ထိရောက်နိုင်စွမ်းကို သိရှိတဲ့အချိန်မှာ အိုမီခရွန်ကူးစက်မှုအမြင့်ဆုံးကာလကို ကျော်လွန်နေလောက်ပြီဖြစ်ပါတယ်။

နှာခေါင်းစည်းမဖြစ်မနေတပ်ဆင်ခြင်းစည်းကမ်းတွေ ဖြေလျှော့ပြီး ပုံမှန်အတိုင်းနေထိုင်သွားဖို့ စီစဉ်နေလောက်ကြပြီဖြစ်ပါတယ်။မျိုးဗီဇကွဲအသစ်တစ်ခုပေါ်ပေါက်လာတိုင်း ကာကွယ်ဆေးအသစ်တစ်မျိုး ဖန်တီးထုတ်လုပ်မယ့်အစား လက်ရှိကိုရိုနာဗိုင်းရပ်စ်တွေနဲ့ နောင်ထွက်ပေါ်နိုင်မယ့်မျိုးဗီဇကွဲအားလုံးကို ကာကွယ်ပေးနိုင်မယ့် ကိုဗစ်ကာကွယ်ဆေးတစ်မျိုးတည်းကို ထုတ်လုပ်နိုင်ရင် အခြေအနေတွေ တမျိုးဖြစ်သွားနိုင်ပါတယ်။

မျိုးဗီဇကွဲအသစ်တွေ ပေါ်ပေါက်လာတဲ့အခါ ဆေးဝါးထုတ်လုပ်ရေးကုမ္ပဏီတွေက လိုက်ပြီးကာကွယ်ဆေးတွေထုတ်လုပ်နေပေမယ့် ဒါဟာရေတိုအတွက်သာ အဆင်ပြေပြီး ရေရှည်မှာအသုံးမဝင်နိုင်ကြောင်း မြောက်ကယ်ရိုလိုင်းနားတက္ကသိုလ်မှ ခန္ဓာကိုယ်ခုခံအားဆိုင်ရာပညာရှင် 'ဒေးဗစ်မာတီနက်ဇ်'က ပြောလိုက်ပါတယ်။

ဒါကြောင့် လက်ရှိ SARS-CoV-2 ဗိုင်းရပ်စ်တွေသာမက နောင်ထွက်ပေါ်လာနိုင်တဲ့မျိုးဗီဇကွဲတွေကိုပါ ကာကွယ်ခုခံပေးနိုင်မယ့် ကိုဗစ်ကာကွယ်ဆေးတွေကို စမ်းသပ်တီထွင်နေကြပါတယ်။

တကယ်တမ်းမှာလည်း မျိုးဗီဇကွဲအားလုံးကို ကာကွယ်ပေးနိုင်မယ့် စွယ်စုံရကိုဗစ်ကာကွယ်ဆေး လိုအပ်နေတာဖြစ်ပြီး နောင်လာမယ့်နှစ်တွေမှာ တိရိစာ္ဆန်တွေကနေ လူသားတွေဆီကူးစက်နိုင်တဲ့ အမည်မသိကိုရိုနာဗိုင်းရပ်စ်တွေကိုပါ ကာကွယ်ပေးနိုင်ဖို့ လိုအပ်နေပါတယ်။

မျိုးဗီဇကွဲအများအပြားကို ကာကွယ်နိုင်ပြီး တာရှည်ခုခံအားပေးနိုင်မယ့် ကာကွယ်ဆေးကိုဖော်ထုတ်ဖို့ က သိပ္ပံနည်းအရ လိုအပ်ချက်များစွာရှိနေတာကြောင့် စိတ်ရှည်ရှည်ထားဖို့လိုအပ်ကြောင်း အိမ်ဖြူတော်မှ ဆေးပညာအကြံပေးဦးစီးချုပ် 'အန်သိုနီဖော့ချီ'က တိုက်တွန်းလိုက်ပါတယ်။

ပန်ဆယ်ဗေးနီးယားပဲရယ်မန်ဆေးပညာတက္ကသိုလ်မှ ကာကွယ်ဆေးထုတ်လုပ်သူ 'ဒရူးဝိုက်စ်မန်'က မျိုးဗီဇကွဲအသစ်တွေ အမြဲတမ်းပေါ်ထွက်နေတာကြောင့် အဲဒီနောက်ကိုလိုက်ပြီး ကာကွယ်ဆေးတွေထုတ်နေတာကို စိုးရိမ်လာကြောင်း၊ ၆ လကြာတိုင်း မျိုးဗီဇကွဲအသစ်ပေါ်ပေါက်လေ့ရှိကြောင်း၊ တစ်ကမ္ဘာလုံးကာကွယ်ဆေးမထိုးနိုင်သေးသရွေ့ အသစ်တွေထွက်ပေါ်နေမှာဖြစ်ကြောင်း ပြောကြားသွားပါတယ်။

ဒုခ်ဆေးပညာတက္ကသိုလ်မှ ကာကွယ်ဆေးကျွမ်းကျင်ပညာရှင် 'ဘာတန်ဟိန်းစ်'နဲ့အဖွဲ့ က မျိုးဗီဇကွဲအားလုံးကို ရပ်တန့်နိုင်မယ့်နည်းလမ်းကို ရှာဖွေနေကြပါတယ်။
မျက်နှာပြင်ပေါ်မှာ စပိုက်ခ်ပရိုတိန်းအစိတ်အပိုင်းလေးပါဝင်တဲ့ နာနိုအမှုန်လေးဖြင့်ပြုလုပ်ထားသော ကာကွယ်ဆေးတစ်မျိုးကို တီထွင်နေကြပါတယ်။

တိရိစာ္ဆန်တွေနဲ့စမ်းသပ်ရာမှာတော့ ထိုကာကွယ်ဆေးက မျိုးဗီဇကွဲအမျိုးမျိုး၊ နဂိုမူလ SARS ဗိုင်းရပ်စ်၊ လင်းနိုကိုရိုနာဗိုင်းရပ်စ်တို့ ကို ကာကွယ်ပေးနိုင်တဲ့ ခုခံအားကိုထုတ်လုပ်ပေးနိုင်ပါတယ်။

ယခုနှစ်အတွင်း လူသားတွေနဲ့စမ်းသပ်သွားနိုင်ဖို့ 'ဘာတန်ဟိန်းစ်'က မျှော်လင့်ထားပါတယ်။စွယ်စုံရကိုဗစ်ကာကွယ်ဆေး အစောတလျင်ရရှိဖို့ တောင်းဆိုနေကြပေမယ့် အရင်ကာကွယ်ဆေးတွေထုတ်လုပ်ရတာထက် အများကြီးပိုပြီးခက်ခဲနိုင်တယ်လို့ သတိပေးထားပါတယ်။

"တုပ်ကွေးဗိုင်းရပ်စ်တွေကို လေ့လာလာတာ နှစ်ပေါင်း ၇၀ ကျော်လာပါပြီ။ စွယ်စုံရတုပ်ကွေးကာကွယ်ဆေး ထုတ်လုပ်နိုင်ဖိုကြိုးစားနေပေမယ့် အခုထိ မလုပ်နိုင်သေးပါဘူး။ ဒါပေမဲ့ ကိုရိုနာဗိုင်းရပ်စ်ကိုလည်း ကြိုးစားကြည့်ရမှာပါပဲ" လို့ ဝစ္စကွန်ဆင်တက္ကသိုလ်မှ 'ယိုရှီဟီရိုကာဝါအိုကာ'က ပြောပြခဲ့ပါတယ်။
Source: The Washington Post