#Local_news
Published_ 22 Feb 2022

တောင်ကိုရီးယားနိုင်ငံ ဆိုလ်းမြို့မှ မြန်မာအပြည်ပြည်ဆိုင်ရာလေကြောင်းလိုင်း (MAI) ကယ်ဆယ်ရေးလေယာဉ်ဖြင့် မြန်မာနိုင်ငံသား ၅၆ ဦးအား ဒီကနေ့ ဖေဖော်ဝါရီ ၂၂ ရက်တွင် ပြန်လည်ပို့ဆောင်ပေးခဲ့ကြောင်း သိရပါတယ်။

ကိုဗစ်-၁၉ ကူးစက်ရောဂါဖြစ်ပွားနေသည့်ကာလအတွင်း မြန်မာနိုင်ငံသို့ ပြန်လည် ထွက်ခွာ/ သွားရောက်ရန် စောင့်ဆိုင်းနေကြသည့် မြန်မာနိုင်ငံသားများနှင့် နိုင်ငံခြားသားများအတွက် မြန်မာသံရုံး၊ ဆိုးလ်မြို့မှ တစ်ပတ်လျှင်တစ်ကြိမ် ကယ်ဆယ်ရေးလေယာဉ် ပျံသန်းပြေးဆွဲနိုင်ရေး စီစဉ်ပေးလျက်ရှိရာတွင် မြန်မာအပြည်ပြည်ဆိုင်ရာ လေကြောင်းလိုင်း (MAI) ဖြင့် (၉၇) ကြိမ်မြောက် ကယ်ဆယ်ရေးလေယာဉ် ပျံသန်းပြေးဆွဲရန် စီစဉ်ပေးခဲ့ခြင်းဖြစ်တယ်လို့ ဆိုပါတယ်။

အဆိုပါလေယာဉ်သည် အင်ချွန်းအပြည်ပြည်ဆိုင်ရာလေဆိပ်မှ ရန်ကုန် အပြည်ပြည်ဆိုင်ရာလေဆိပ်သို့ ဒေသစံတော်ချိန် ၄ နာရီခွဲခန့်တွင် ထွက်ခွာခဲ့ပြီး၊ ဘရာဇီးမှ (၃) ဦး၊ ကနေဒါမှ (၂) ဦး၊ အမေရိကန်ပြည်ထောင်စုမှ (၁၄) ဦး၊ ကိုရီးယား သမ္မတနိုင်ငံမှ မြန်မာနိုင်ငံသား (၃၇) ဦး၊ စုစုပေါင်း (၅၆) ဦးတို့ စီးနင်းလိုက်ပါခဲ့ပါတယ်။

လိုက်ပါမယ့် ခရီးသည်များ လေဆိပ်မှာ အခက်အခဲတစ်စုံတစ်ရာမရှိစေရေးအတွက် မြန်မာသံရုံး၊ ဆိုးလ်မြို့မှ သံရုံးဝန်ထမ်းများက လေဆိပ်သို့သွားရောက်၍ လိုအပ်သည်များ ကူညီဆောင်ရွက်ပေးခဲ့ကြတယ်လို့ ဆိုပါတယ်။

ymg-mnn
#Yangon_Media_Group

#Local_News
Published_ 22 Feb 2022

တိုင်းရင်းဆေးကို အသုံးပြုပြီး ကိုဗစ်-၁၉ ရောဂါကို ကာကွယ်ကုသနိုင်ဖို့အတွက် သုတေသနဆောင်ရွက်ရာမှာ တိုးတက်မှုတွေရရှိနေတယ်လို့ နစကဥက္ကဋ္ဌက ‘မြန်မာနိုင်ငံကျန်းမာရေးဆိုင်ရာ သုတေသနညီလာခံ' အမှာစကားမှာ ထည့်သွင်းပြောကြားခဲ့ပါတယ်။

သုတေသနပြုလုပ်ပြီး တိကျခိုင်မာတဲ့ အချက်အလက်တွေ ထွက်ပေါ်လာခဲ့ရင် တိုင်းရင်းဆေးကိုအသုံးပြုပြီး ကိုဗစ်-၁၉ ရောဂါကို ကာကွယ်ကုသနိုင်မှာဖြစ်ပြီး မိမိတို့ပြည်သူများအတွက် များစွာအကျိုးရှိမှာဖြစ်ပါတယ်လို့ ဗိုလ်ချူပ်မှူးကြီးမင်းအောင်လှိုင်က ပြောကြားခဲ့ပါတယ်။

သုတေသီတွေကိုယ်တိုင်ကလည်း မိမိတို့ သုတေသနရလဒ်တွေရဲ့ အရေးပါပုံကို သေချာစွာ သိရှိနားလည်ပြီး သုတေသနကျင့်ဝတ်တွေကို တိကျစွာ လိုက်နာဆောင်ရွက်ဖို့ လိုအပ်တယ်ဆိုတာကို အမြဲမပြတ် သတိပြုရမှာဖြစ်တယ်လို့ ၎င်းကဆိုပါတယ်။
တိုင်းရင်းဆေးသုတေသနတွေက ပြည်သူတွေ လက်တွေ့အကျိုးရှိစေရေးနှင့် တိုင်းရင်းဆေးဝါးတွေကို နိုင်ငံတာကာ အထိ ထိုးဖောက်ရောက်ရှိရေးအတွက် တိကျခိုင်မာတဲ့ သုတေသနပြုအချက်အလက်တွေ ပိုမိုရရှိဖို့ တိုင်းရင်းဆေးပညာဦးစီးဌာနဟာ တိုင်းရင်းဆေးပညာရှင်တွေနှင့် ပူးပေါင်းဆောင်ရွက်သင့်တယ်လို့လည်း သူကအကြံပြုပါတယ်။

ကိုဗစ်တတိယလှိုင်းကာလမှာ တရုတ်နိုင်ငံနှင့် ထိုင်းနိုင်ငံတို့ကထုတ်လုပ်တဲ့ ယင်းတို့ရဲ့တိုင်းရင်းဆေးတွေဟာ မြန်မာနိုင်ငံဈေးကွက်ထဲကို ရောက်ရှိလာခဲ့ပြီး ရောဂါခံစားရသူတွေ သုံးစွဲခဲ့ကြတာတွေရှိခဲ့ပါတယ်။ဒါပေမယ့် အဲဒီဆေးတွေရဲ့အကျိုးအာနိသင်နှင့် ဘေးထွက်ဆိုးကျိုးများနှင့်ပတ်သက်တဲ့ နောက်ဆက်တွဲ သတင်းအချက်အလက်များကိုတော့ မသိရှိခဲ့ကြရပါဘူး။

၂၀၂၀ ပြည့်နှစ် မတ် ၂၃ ရက်နေ့မှာ ကိုဗစ်-၁၉ ရောဂါပိုး မြန်မာနိုင်ငံကို စတင်တွေ့ရှိပြီးချိန်မှစလို့ ဆေးသုတေသနဦးစီးဌာနအနေနဲ့ ဗိုင်းရပ်စ်ပိုးရဲ့ မျိုးရိုးဗီဇ အစီအစဉ်တစ်ခုလုံးကို လေ့လာနိုင်ရေး ကြိုးပမ်းဆောင်ရွက်ခဲ့ကြောင်း သိရပါတယ်။

ymg-mnn
#Yangon_Media_Group

#LocalHealth
Published -22 Feb 2022

ရခိုင်ပြည်နယ်၊ ကျောက်ဖြူမြို့မှ လေယာဉ်စီးနင်းလိုက်ပါမယ့် ခရီးသည်များကို ကိုဗစ် ရောဂါပိုးရှိ/မရှိ R.D.T test kit နဲ့ ဖေဖော်ဝါရီလ ၂၁ ရက်မွန်းလွဲပိုင်းက ခရိုင်ပြည်သူ့ကျန်းမာရေးဦးစီးဌာနရုံးဝင်းတွင်စစ်ဆေးရာ ခရီးသည်လေးဦးတွင် ကိုဗစ်ရောဂါပိုးတွေ့ရှိခဲ့တယ်လို့ သိရပါတယ်။

ဖေဖော်ဝါရီ ၂၁ ရက်နေ့ ယနေ့တွင် ကျောက်ဖြူမြို့မှ လေကြောင်းလိုင်းနဲ့ လိုက်ပါမယ့်ခရီးသည် (၃၈) ဦးအား စစ်ဆေးပေးခြင်းဖြစ်ပြီး ၎င်းတို့အထဲမှ အမျိုးသားနှစ်ဦးနှင့် အမျိုးသမီးနှစ်ဦးတို့မှာ ရောဂါပိုးတွေ့ရှိခဲ့တာကြောင့် ခရိုင်ပြည်သူ့ဆေးရုံကြီးရှိ ပိုးတွေ့လူနာဆောင်သို့ ကြက်ခြေနီတပ်ဖွဲ့ဝင်များမှ လိုက်ပါပို့ဆောင်ပေးခဲ့တယ်လို့ သိရပါတယ်။

ရောဂါပိုးမတွေ့ရှိသူများအား ကိုဗစ်-၁၉ ရောဂါကင်းရှင်းကြောင်း အသိအမှတ်ပြုလက်မှတ်များ ပေးအပ်ခဲ့တယ်လို့ ခရိုင်ပြည်သူ့ကျန်းမာရေးဦးစီးဌာနမှူးရုံးမှ တာဝန်ရှိသူတစ်ဦးက ပြောပါတယ်။

"ယခုရက်ပိုင်းမှာ လေယာဥ်စီးခရီးသည်တွေ ပုံမှန်စစ်ဆေးတာတွေလုပ်နေပါတယ် ပိုးတွေသူတွေကိုတော့ ဆေးရုံတက်ရောက်စေပြီး မတွေ့သူတွေကို ရောဂါကင်းရှင်းကြောင်းလက်မှတ်ထိုးပြီး လေယာဥ်နဲ့ လိုက်ပါခွင့်ပြုပါတယ်"လို့ ခရိုင်ကျန်းမာရေးဦးစီးဌာနက တာဝန်ရှိသူတစ်ဦးက ပြောပါတယ်။

ကျောက်ဖြူမြို့တွင်၂၀၂၁ ခုနှစ်ဇူလိုင်လ ၃ ရက်နေ့မှ ၂၀၂၂ ခုနှစ်ဖေဖော်ဝါရီလ ၂၁ ရက်နေ့အထိ ပိုးတွေ့လူနာ ကျား (၃၆၆) ဦး၊ မ(၂၃၉) ဦး၊ စုစုပေါင်းပိုးတွေ့လူနာ ၆၁၅ ဦးရှိပြီး သေဆုံးသူ ၆၃ ဦးရှိတယ်လို့ သိရပါတယ်။

ကျောက်ဖြူမြို့မှ လေယာဉ်စီးနင်းလိုက်ပါကြမယ့် ခရီးသည်များကို ခရိုင်ပြည်သူ့ကျန်းမာရေးဦးစီးဌာနမှူးရုံးတွင် လေယာဉ်မထွက်မီ တစ်ရက်ကြိုတင်၍ မွန်းလွဲ ၁ နာရီမှ ၃ နာရီအတွင်း ကျန်းမာရေးစစ်ဆေးမှုများကို ပြုလုပ်ပေးနေတာဖြစ်ပါတယ်။

ymg/hm
#Yangon_Media_Group

#LocalNews
Published - 22 Feb 2022

ကချင်ပြည်နယ်၊ ပူတာအိုမြို့တွင် စက်သုံးဆီများပြတ်လပ်နေပြီး ဓါတ်ဆီ တစ်လီတာလျှင် ၈,၀၀၀ မှ ၁၀,၀၀၀ အထိ ပေါက်စျေးရှိနေတယ်လို့ သိရပါတယ်။

အဆိုပါ ပူတာအိုဒေသတွင် စက်သုံးဆီများ ပြတ်လပ်နေမှုကြောင့် ဒေသခံများအခက်ကြုံနေရပြီး လုပ်ငန်းအချို့ကိုလည်း ရပ်ဆိုင်းထားရတယ်လို့ ပူတာအိုမြို့ဒေသခံတွေက ဆိုပါတယ်။

"ကားတွေရပ်နေပြီ ဆိုင်ကယ်တွေရပ်နေပြီ ဓါတ်ဆီမရှိလို့ တော်တော်လေး အခက်အခဲရှိတယ် ဟိုတလောက ဓါတ်ဆီပြတ်တယ်။ အခု နောက်ပိုင်းလမ်းပိတ်တယ်လို့ ကြေညာတော့ ပိုဆိုး၊ပိုကြပ်သွားတာပေါ့၊ စားရေးသောက်ရေးတွေ အတော်လေး အခက်အခဲရှိပါတယ်။

အခု ဓါတ်ဆီပြတ်နေတာက တစ်လ လောက်ရှိပြီ၊ ပူတာအိုမှာ ဓါတ်ဆီ တစ်လီတာဆိုရင် ၈,၀၀၀ ၁၀,၀၀၀ လောက်ရှိတယ်။ ဒါတောင်ဝယ်မရပါဘူး။ လုံးဝ မရောင်းဘူး။ ဓါတ်ဆီကုန်နေတာ ဘာကြောင့်လဲဆိုရင် မြစ်ကြီးနားနဲ့ ပူတာအိုကြားမှာ ဓါတ်ဆီကားလာလို့မရဘူး။ နှစ်ဘက်စလုံးက ပိတ်လိုက်တော့ ဓါတ်ဆီကို တင်တဲ့ကားတွေက လာလို့မရဘူး။ နောက် ပူတာအိုနဲ့ မြစ်ကြီးနားကြားမှာ တိုက်ပွဲတွေဖြစ်နေတာ သူတို့က ဓါတ်ဆီတင်တဲ့ကားကို တားမြစ်တာ၊ လုံးဝ အဝင်မခံတာပေါ့။"လို့ ပူတာအိုမြို့ဒေသခံတစ်ဦးက YMG ကို ပြောပြခဲ့ပါတယ်။

ပူတာအိုမြို့တွင် စက်သုံးဆီများ ပြတ်လပ်နေသည်မှာ တစ်လခန့်ရှိနေပြီး မြို့၏ မည်သည့်နေရာတွင်မှ စက်သုံးဆီကို ဝယ်ယူလို့မရတာဖြစ်တယ်လို့လည်း ဒေသခံတွေက ပြောပါတယ်။

"စက်သုံးဆီက လုံးဝပြတ်နေတယ်။ မြို့မှာလည်း လုံးဝဝယ်မရဘူး၊ တချို့လုပ်ငန်းတွေဆိုရင် ရပ်ထားရတယ်။ စက်သုံးဆီမရှိတော့ ဆိုင်ကယ်ဆီဖြည့်ဖို့ကအစ အတော်လေး အခက်ကြုံနေရပါတယ်။ လမ်းပေါ်မှာဆို ကားတစ်စီးတစ်လေ၊ ဆိုင်ကယ်တစ်စီးတစ်လေလောက်ပဲ တွေ့ရတယ်။"လို့ ၄င်းက ဆက်လက်ပြောပြခဲ့ပါတယ်။

ဒါ့အပြင် ပူတာအိုဒေသမှာ တိုက်ပွဲတွေဖြစ်ပွားနေပြီး လမ်းပန်းဆက်သွယ်ရေး အခြေအနေကလည်း အရင်လို ကောင်းမွန်ခြင်းမရှိသည့်အတွက် စက်သုံးဆီများတင်ပို့ဖို့က အခက်အခဲများရှိနေပြီး အခြားသော ကုန်စည်စီးဆင်းမှု တွေအတွက်လည်း နှောင့်နှေးကြန့်ကြာမှုတွေ ရှိနေတာဖြစ်တယ်လို့ သိရပါတယ်။

ထို့အပြင် ဒီကနေ့မှစတင်ပြီး မြစ်ကြီးနား-ဆွမ်ပရာဘွန်-ပူတာအို ကားလမ်းကိုလည်း နှစ်ဖက်တပ်တွေက စစ်ရေးအ ခြေအနေတွေကြောင့် ပိတ်ထားတယ်လို့လည်း သိရပါတယ်။

Photo - CJ
ymg/kg
#Yangon_Media_Group

#LocalNews
Published - 22 Feb 2022

မော်လမြိုင်ဆေးရုံကြီးမှ ကိုဗစ်အတည်ပြုလူနာ(၄)ဦးဟာ ဒီကနေ့( ဖေဖော်ဝါရီလ ၂၂ )ရက်မှာ သေဆုံးသွားခဲ့တယ်လို့ သိရပါတယ်။

ဒီကနေ့ သေဆုံးသွားသည့် လူနာများသည် မုဒုံမြို့မှ အသက်(၈၈)နှစ်အရွယ် အမျိုးသားလူနာတစ်ဦး၊ ပေါင်မြို့နယ်မှ အသက်(၅၃)နှစ်အရွယ် အမျိုးသားလူနာတစ်ဦး၊ မော်လမြိုင်မြို့မှ အသက်(၅၂)နှစ်အရွယ် အမျိုးသားလူနာတစ်ဦးနှင့် မုတ္တမြို့မှ အသက်(၆၅)နှစ်အရွယ် အမျိုးသမီးလူနာတစ်ဦးတို့ ဖြစ်ကြတယ်လို့ မော်လမြိုင်မြို့ရှိ ဒေသခံလူမှုကူညီ ရေးအသင်းတစ်ခုက ထုတ်ပြန်ထားတာပါ။

ကျန်းမာရေးဝန်ကြီးဌာန၏ ထုတ်ပြန်မှုအရ မွန်ပြည်နယ်အတွင်းမှာ ယခု ဖေဖော်လဝါရီလ ၂၀ ရက်နေ့အထိ ပိုးတွေ့သူလူနာစုစုပေါင်းက (၁၁၉)ဦးအထိရှိ နေတာလည်းဖြစ်ပါတယ်။

ယခုဖေဖော်ဝါရီလ ပထမပတ်ကစလို့ မြန်မာနိုင်ငံအတွင်းမှာ အိုမီခရွန်ကူးစက်ခံရတဲ့ လက္ခဏာရှိသူတွေ အများစု ဖြစ်လာတာကြောင့် ပြည်တွင်းမှာ အိုမီခရွန်ကူးစက်ခံရမှုတွေဟာ အဆမတန်များပြားနေသလို ရောဂါပိုးကလည်း အလျင်အမြန် ကူးစက်ပြန့်နှံ့နေတာဖြစ်ပါတယ်။

မြန်မာတစ်နိုင်ငံလုံးအတိုင်းအတာအရ ကိုဗစ်ရောဂါပိုးတွေ့ရှိမှုရာခိုင်နှုန်းဟာ အရင်လတွေက ၁ ရာခိုင်နှုန်းကျော်ပဲ ရှိခဲ့ရာကနေ အခုဆိုရင် ၁၀ ရာခိုင်နှုန်းကျော်အထိ ပြန်လည်မြင့်တက်လာခဲ့တာလည်းဖြစ်ပါတယ်။

ဒါကြောင့်လည်း အများပြည်သူအနေနဲ့ ကျန်းမာရေးအသိရှိပြီး သတ်မှတ်စည်းကမ်းတွေကို လိုက်နာကြဖို့ ကျန်းမာရေးဝန်ကြီးဌာနက တိုက်တွန်းနှိုးဆော်ထားပါတယ်။

ထို့အပြင် ကိုဗစ် - ၁၉ ရောဂါ စောင့်ကြပ်ကြည့်ရှုမှုနှင့် ပတ်သက်၍ ဖေဖော်ဝါရီလ ၂၁ ရက်၊ ည ၈ နာရီအချိန်
အထိ နောက်ဆုံးထုတ်ပြန်ထားသော ကိန်းဂဏန်းများအရ စစ်ဆေးသူ ၂၈,၄၈၀ ဦးတွင် ဓါတ်ခွဲအတည်ပြုလူနာ
ပိုးတွေ့သူ စုစုပေါင်းက ၂,၈၉၇ ဦးရှိခဲ့ပြီး ပိုးတွေ့ရာနှုန်းက ၁၀.၁၇ ရာခိုင်နှုန်းရှိခဲ့တာပါ။

ဒါကြောင့် ယနေ့အထိ မြန်မာနိုင်ငံမှာ ပိုးတွေ့သူစုစုပေါင်းက ၅၆၈,၅၆၄ ဦးအထိ ရှိလာခဲ့ပြီဖြစ်ပါတယ်။

ဒါ့အပြင် ယနေ့အထိ ဆေးရုံဆင်းသူရာနှုန်းက ၉၂.၃၂ ရာခိုင်နှုန်းအထိရှိခဲ့ပြီး ဆေးရုံဆင်းသူစုစုပေါင်းက ၅၂၄,၈၈၀ ဦးအထိ ရှိခဲ့တာဖြစ်ပါတယ်။

သေဆုံးမှုကလည်း ယမန် နေ့ ဖေဖော်ဝါရီလ ၂၁ ရက်နေ့တွင် သေဆုံးသူ ၇ ဦးရှိခဲ့သဖြင့် သေဆုံးရာနှုန်း ၃.၄၀ ရာခိုင်နှုန်းနှင့် ယနေ့အထိ သေဆုံးသူစုစုပေါင်း ၁၉,၃၃၈ ဦးရှိခဲ့ပြီဖြစ်တယ်လို့ သိရပါတယ်။

"ပိုးတွေ့နှုန်းလည်း ၁၀ ရာခိုင်နှုန်းကျော်လာပြီ။ သေသူကလဲများလာပြီ။ မိမိ မိသားစုထဲမှာ ကာကွယ်ဆေးလုံးဝမထိုးထားသူများ အသက် ၇၅ နှစ်အထက်ရှိသူများ နောက်ခံရောဂါရှိသူများ အန္တရာယ်အရှိဆုံးဖြစ်ပါတယ်။ ဂရုစိုက်ကြပါ။ အိုမီခရွန်က စိုးရိမ်ဖွယ်ရာ ဗီဇမျိုးကွဲဖြစ်ပါတယ်။ မပေါ့ဆပါနှင့်"လို့ ကျန်းမာရေးပညာရှင် ဒေါက်တာခင်ခင်ကြီးက ၄င်း၏ လူမှုကွန်ရက်ကနေ အသိပေးရေးသားထားပါတယ်။

ymg/kg
#Yangon_Media_Group

#LocalNews
Published -22 Feb 2022

နိုင်ငံရေး အထွေထွေအကျပ်အတည်းဖြေရှင်းနိုင်ဖို့ အားလုံးပါဝင်တဲ့ နိုင်ငံရေးဆွေးနွေးပွဲတွေကနေ ဖက်ဒရယ်ပြည်ထောင်စုတည်ဆောက်ရေးကို ကြိုးပမ်းဆောင်ရွက်သွားမယ်လို့ ငြိမ်းချမ်းရေးလုပ်ငန်းစဉ်ဦးဆောင်အဖွဲ့ (PPST)ရဲ့ခေါင်းဆောင် နိုင်အောင်မင်းကပြောဆိုလိုက်ပါတယ်။

ငြိမ်းချမ်းရေးလုပ်ငန်းစဉ်ဦးဆောင်အဖွဲ့ (PPST) အစည်းအဝေး ဖေဖော်ဝါရီ ၂၂၊ ၂၃ ရက်တို့တွင် Video Conferencing ဖြင့် နှစ်ရက်တာ ကျင်းပနေပြီး ယင်းအစည်းအဝေးတွင် PPST ဦးဆောင်မှုအလုပ်အဖွဲ့ခေါင်းဆောင် နိုင်အောင်မင်းရဲ့ အဖွင့်မိန့်ခွန်းပြောကြားခဲ့ရာ အထက်ပါအတိုင်း ပြောကြားခဲ့တာဖြစ်ပါတယ်။

“ လက်ရှိနိုင်ငံရေး အထွေထွေအကျပ်အတည်း ဖြေရှင်းနိုင်ရေးကို အားလုံးပါဝင်တဲ့ နိုင်ငံရေးဆွေးနွေးပွဲများ ကျင်းပခြင်းမှတဆင့် ဖက်ဒရယ်ပြည်ထောင်စုတည်ဆောက်ရေးကို မိမိတို့ PPST အနေနဲ့ တတ်နိုင်တဲ့နည်းလမ်းများဖြင့် ကြိုးပမ်းဆောင်ရွက်သွားမှာ ဖြစ်ပါတယ်။ နိုင်ငံရေးဆွေးနွေးပွဲ ပုံစံအသစ်ကို ဆွေးနွေးညှိနှိုင်း ချမှတ်သွားမှာဖြစ်ပါတယ်” ဟု နိုင်အောင်မင်းက ပြောကြားပါတယ်။

ငြိမ်းချမ်းရေးလုပ်ငန်းစဉ် ဦးဆောင်အဖွဲ့ (PPST) ရဲ့ နှစ်ရက်တာအစည်းအဝေးမှာ လက်ရှိနိုင်ငံရေး၊ စစ်ရေး၊ ငြိမ်းချမ်းရေးအပါအဝင် အခြားအရေးကြီးတဲ့ ကိစ္စရပ်တွေကို ဆွေးနွေးညှိနှိုင်းပြီး သဘောထား ချမှတ်သွားမည်ဖြစ်ကာ (၇၅)နှစ်ပြည့် စိန်ရတုပြည်ထောင်စုနေ့ အခမ်းအနားအခင်းအကျင်း၊ တပ်မတော်၏ ငြိမ်းချမ်းရေးအကြိုညှိနှိုင်းဆွေးနွေးပွဲ ဖိတ်ကြားခြင်းကိစ္စ၊ ပြည်သူ့ညီလာခံ (People Assembly) အခြေအနေ၊ မကြာမီ ပြည်တွင်းသို့လာရောက်မည့် အာဆီယံအထူးကိုယ်စားလှယ်ရဲ့ ခရီးစဉ်အနေအထားတို့ကို ဆွေးနွေးသွားရန် စီစဉ်ထားပြီး တိကျတဲ့ ရှေ့လုပ်ငန်းစဉ်များကို ချမှတ်သွားမယ်လို့ သိရပါတယ်။

ဒါ့အပြင် PPST ရဲ့စုဖွဲ့မှုအသစ်အခင်းအကျင်းနဲ့ EAO များ၏ ညီလာခံကျင်းပသွားနိုင်ရေးဆွေးနွေးခြင်း၊ PPST ၏ နိုင်ငံရေးဦး တည်ချက် (၇)ရပ်ကို အခြေခံပြီး လမ်းပြမြေပုံ (၇)ဆင့်အတွက် ဆွေးနွေးညှိနှိုင်းနေသည့် PPST အကြံပေး စဝ်ဟန်ယောင်ဟွေ ဦးစီးဆောင်ရွက်ပြုလုပ်နေတဲ့ PPST အလုပ်ရုံဆွေးနွေးပွဲ အခြေအနေကိုလည်း ဆွေးနွေးတင်ပြခြင်းနှင့် အလုပ်ရုံရှေ့လုပ်ငန်းစဉ်အတွက် သဘောထားချမှတ်ခြင်း၊ တိုက်ပွဲများကြောင့် အတိဒုက္ခ အမျိုးမျိုးကြုံတွေ့နေရသည့် ပြည်သူလူထု စစ်ဘေးရှောင်များအတွက် ထိထိရောက်ရောက် ဆက်လက်အကူအညီပေးနိုင်ရေးနှင့် သဘောထားချမှတ်ခြင်းများ ဆောင်ရွက်မယ်လို့ မိန့်ခွန်းမှာ ထည့်သွင်းပြောကြားခဲ့ပါတယ်။

ymg/hm
#Yangon_Media_Group

#DailyNews
Published - 21 Feb 2022

၁။ ပဋိပက္ခဖြစ်ပွားသောဒေသများမှ နေရပ်စွန့်ခွာသူအချို့ ကိုယ့်ဒေသကိုကိုယ် ပြန်မလာနိုင်ကြသေး။

၂။ ရွှေမင်္ဂလာဈေးမှ ဆိုင်ခန်းတစ်ခုမီးလောင်မှုဖြစ်ပြီးနောက် လျှပ်စစ်ပစ္စည်းများသုံးစွဲမှုနှင့်ပတ်သက်၍ သတိပေး။

၃။ နေ့စဉ်မိုးလေဝသသတင်း။

၄။ ကိုဗစ်ကပ်ရောဂါကြောင့် ၂ နှစ်နီးပါး သွားလာခွင့်ပိတ်ပင်ထားရာမှ ဩစတြေးလျနိုင်ငံ ပြန်လည်သွားလာခွင့်ပြုလိုက်ပြီ.....အစရှိတဲ့သတင်းတွေကို တင်ဆက်ပေးသွားမှာပဲဖြစ်ပါတယ်။

#Yangon_Media_Group

#WorldPolitics
Published 22 February 2022

ရုရှားထောက်ခံရေးအဖွဲ့တွေချုပ်ကိုင်ထားတဲ့ ယူကရိန်းနိုင်ငံအရှေ့ဘက်ခြမ်းရှိ ဒိုနက်စ်မြို့နဲ့ လူဟန့်စ်မြို့တို့ကို လွတ်လပ်တဲ့နယ်မြေများအဖြစ် ရုရှားသမ္မတ'ဗလက်ဒီမီယာပူတင်'က အသိအမှတ်ပြုပေးလိုက်ပြီဖြစ်ပါတယ်။
အဲဒီနောက်မှာတော့ အဆိုပါယူကရိန်းအရှေ့ဘက်နယ်မြေနှစ်ခုသို့ ရုရှားတပ်ဖွဲ့များ ပြောင်းရွှေ့ဝင်ရောက်လာနိုင်ကြောင်း နောက်ဆုံးရထောက်လှမ်းရေးသတင်းများအရ အမေရိကန်အကြီးတန်းအရာရှိတစ်ဦးက CNN ကို ပြောကြားလိုက်ပါတယ်။

ရုရှားတို့ ကျူးကျော်မှုပြုလုပ်လာနိုင်တဲ့အပေါ် အမေရိကန်ကလည်း ပြင်ဆင်မှုများပြုလုပ်လျက်ရှိပြီး ကုန်းပေါ်ရေပေါ်သင်္ဘောများနဲ့ လေကြောင်းတပ်ဖွဲ့အတွက် လိုအပ်တဲ့ပစ္စည်းများလည်း ပါဝင်ပါတယ်။

'ပူတင်'အသိအမှတ်ပြုပေးလိုက်တဲ့ ယူကရိန်းခွဲထွက်ရေးနယ်မြေနှစ်ခုကို ကုန်သွယ်ရေးဘဏ္ဍာရေးအရေးယူပိတ်ဆို့မှုများချမှတ်ဖို့ သမ္မတ'ဂျိုးဘိုင်ဒန်'က စီစဉ်နေကြောင်း အိမ်ဖြူတော်က တနင်္လာနေ့မှာကြေညာလိုက်ပါတယ်။
ယူကရိန်းခွဲထွက်ရေးနယ်မြေတွေဖြစ်တဲ့ ဒိုနက်စ်ပြည်သူ့သမ္မတနိုင်ငံနဲ့ လူဟန့်စ်ပြည်သူ့သမ္မတနိုင်ငံတို့အပေါ် ရင်းနှီးမြှုပ်နှံမှုအသစ်တွေ ကုန်သွယ်ရေးနဲ့ဘဏ္ဍာရေးကိစ္စတွေမှာ တားမြစ်ပိတ်ပင်သွားဖို့ 'ဘိုင်ဒန်'က လက်မှတ်ရေးထိုးအမိန့်ပေးလိုက်ပါတယ်။

အဆိုပါနယ်မြေနှစ်ခုကို လွတ်လပ်တဲ့နိုင်ငံများအဖြစ် 'ပူတင်'က အသိအမှတ်ပြုလက်မှတ်ရေးထိုးပေးလိုက်ပြီး တနင်္လာနေ့က တီဗီအစီအစဉ်ကနေ အောင်ပွဲခံပုံတွေကို ဖော်ပြခဲ့ပါတယ်။

"ရုရှားတပ်ဖွဲ့တွေ ယူကရိန်းနယ်စပ်ဘက်ကို ပိုမိုနီးကပ်စွာချဉ်းကပ်လာနေပြီး အချိန်မရွေးကျူးကျော်နိုင်လောက်တဲ့အထိ စီစဉ်နေကြတာကို ထောက်လှမ်းရရှိထားပါတယ်" လို့ အမေရိကန်အုပ်ချုပ်ရေးအဖွဲ့မှ အရာရှိတစ်ဦးက ပြောပြလိုက်ပါတယ်။

ယူကရိန်းရဲ့တောင်းဆိုမှုကြောင့် တနင်္လာနေ့ညမှာ ကုလသမဂ္ဂလုံခြုံရေးကောင်စီအစည်းအဝေးကို အရေးပေါ်ပြုလုပ်ခဲ့ရာ ကုလသမဂ္ဂဆိုင်ရာ အမေရိကန်သံအမတ် 'လင်ဒါသောမတ်စ်ဂရင်းဖီးလ်'ကပြောကြားရာမှာ ယူကရိန်းခွဲထွက်ရေးနယ်မြေနှစ်ခုကို 'ပူတင်'က အသိအမှတ်ပြုလိုက်ခြင်းက ယူကရိန်းကိုကျူးကျော်ဖို့ အကြောင်းပြချက်ဖန်တီးလိုက်တာဖြစ်ပြီး ငြိမ်းချမ်းရေးဖော်ဆောင်ဖို့ဆင်ခြေနဲ့ ရုရှားတပ်ဖွဲ့တွေ ဝင်ရောက်လာခြင်းကလည်း ဆီလျော်ခြင်းမရှိကြောင်း ဆိုခဲ့ပါတယ်။

အမေရိကန်က မှန်းဆထားတဲ့အတိုင်း ရုရှားတို့ဆောင်ရွက်လျက်ရှိပြီး အခုအချိန်မှာ 'ပူတင်'က ရပ်တန့်တော့မှာမဟုတ်ဘူးလို့ ယုံကြည်ထားကြောင်း 'သောမတ်စ်ဂရင်းဖီးလ်'က ပြောကြားခဲ့ပါတယ်။

ရုရှားတို့က နိုင်ငံတကာဥပဒေတွေကို ထင်ထင်ရှားရှားချိုးဖောက်နေတဲ့အတွက် အမေရိကန်က နောက်ထပ်အရေးယူမှုတွေပြုလုပ်သွားမှာဖြစ်ကြောင်း ဆိုပါတယ်။

ငြိမ်းချမ်းရေးဖော်ဆောင်ဖို့ဆိုတဲ့ အကြောင်းပြချက်နဲ့ ယူကရိန်းခွဲထွက်ရေးနယ်မြေသို့ ရုရှားတပ်ဖွဲ့များစေလွှတ်ခြင်းဟာ ယူကရိန်းကိုကျူးကျော်ဖို့ နောက်ထပ်ခြေလှမ်းတစ်ခုဖြစ်တယ်လို့ အမေရိကန်တို့က ယူဆထားပါတယ်။

၂၀၁၄ ခုနှစ် ယူကရိန်းကို ရုရှားတို့ကျူးကျော်လာကတည်းက အဆိုပါနယ်မြေတွေမှာ ရုရှားတပ်ဖွဲ့တွေ အခြေချနေတာဖြစ်ပါတယ်။

"အဆိုပါနယ်မြေတွေမှာ ရုရှားတို့ဘာတွေဆက်လုပ်မလဲဆိုတာကို ဆက်လက်စောင့်ကြည့်သွားမှာဖြစ်ပါတယ်" လို့ အမေရိကန်အရာရှိတစ်ဦးက ဆိုပါတယ်။

"ယူကရိန်းခွဲထွက်ရေးဒေသတွေမှာ ရုရှားတပ်ဖွဲ့တွေရှိနေတာ ၈ နှစ်လောက်ရှိနေပြီဖြစ်ပေမယ့် ရုရှားဘက်က ငြင်းဆိုနေပါတယ်။ အခုတော့ သူတို့ ပေါ်ပေါ်တင်တင်လှုပ်ရှားတော့မှာဖြစ်ပြီး ကျွန်တော်တို့ဘက်ကလည်း ထိုက်သင့်သလိုတုန့်ပြန်ဆောင်ရွက်သွားမှာပါ"

Source: CNN
#Yangon_Media_Group

#LocalNews
Published - 22 Feb3022

သီပေါမြို့မှာ လင်မယားချင်းစကားများရာမှ မိန်းမဖြစ်သူက ခင်ပွန်းသည် ယောကျ်ားဖြစ်သူ၏ ငယ်ပါအားဖြတ်ပစ်လိုက်သည့် ဖြစ်စဥ်တစ်ခု ဖေဖော်ဝါရီ ၂၁ ရက်၊(ညပိုင်း)အချိန်က ဖြစ်ပွားခဲ့တယ်လို့ ဒေသခံလူမှုကူညီရေးအသင်းထံမှ သိရပါတယ်။

"ဖြစ်စဥ်အသေးစိတ်ကတော့ ကျွန်တော်တို့လည်း သေချာမသိသေးပါဘူး။ လင်မယားချင်းစကားများရန်ဖြစ်ရာ
ကနေ အခုလိုဖြစ်တယ်လို့ သိရပါတယ်။ မနေ့ညက သီပေါဆေးရုံမှာ သွေးထွက်လွန်နေတဲ့ လူနာရှိတယ်ပေါ့၊ အဲ့ဒါကို သီပေါကနေ လားရှိုးဆေးရုံကို ပို့ဆောင်ပေးဖို့ ဆေးရုံက ဆရာမတွေဖုန်းဆက်လာလို့ ကျွန်တော်တို့အသင်းက သွား ရောက်ကူညီဆောင်ရွက်ပေးခဲ့တာပါ။ လူနာကတော့ သွေးထွက်အတော်လွန်နေတယ်။ ကျွန်တော်တို့အသင်းက လူနာတင်ယာဥ်နဲ့ပဲ လားရှိုးဆေးရုံကို ညတွင်းချင်း ပို့ဆောင်ပေးခဲ့ပါတယ်။ ပြီးတော့မှ အခုလိုဖြစ်စဥ်ဖြစ်ခဲ့မှန်း သိခဲ့ရတာပါ။"လို့ သီပေါလူငယ် လူမှုကူညီရေးအသင်းမှ ကိုတူးလီ က YMG ကို ပြောပြခဲ့ပါတယ်။

အဆိုပါ ငယ်ပါအဖြတ်ခံရသည့် သွေးထွက်လွန်လူနာကို သီပေါလူငယ် လူမှုကူညီရေးအသင်းမှ သီပေါမြို့မှတစ်ဆင့် လားရှိုးပြည့်သူ့ဆေးရုံကြီးသို့ ညတွင်းချင်းကူညီပို့ဆောင် ပေးခဲ့ရတာပါ။

လက်ရှိမှာလည်း လူနာက လားရှိးပြည့်သူ့ဆေးရုံကြီးမှာပဲ ဆေးကုသမှုခံယူနေရတယ်လို့ သိရပါတယ်။

"သူတို့က သီပေါမြို့ဒေသခံတွေပါပဲ။ သီပေါဆေးရုံကို သူတို့ရောက်လာတော့မှ ကျွန်တော်တို့ကသွားခေါ်ပြီး လားရှိုး ဆေးရုံကို ပို့ပေးခဲ့ရတာပါ။ လူနာရဲ့ ကျန်းမာရေးအခြေအနေက တိတိကျကျတော့ ပြောလို့မရဘူး။ သွေးထွက်က တော့လွန်နေတယ်။"လို့ ကိုတူးလီက ဆက်လက်ပြောပြခဲ့ပါတယ်။

ယခုလိုဖြစ်စဥ်ဟာ ကြုံတောင့်ကြုံခဲ ဖြစ်စဥ်တစ်ခုဖြစ်တယ်လို့လည်း လူမှုကွန်ရက်အသုံးပြုသူတွေက မှတ်ချက်ပြုထားကြပါတယ်။

Photo - သီပေါလူငယ် လူမှုကူညီရေးအသင်း။

ymg/kg
#Yangon_Media_Group

#WorldHealth
Published- 22 February 2022
သွေးနီဥများပျက်စီးယိုယွင်းခြင်းကြောင့် သွေးကြောထိခိုက်မှုတွေကို ကိုဗစ်ရောဂါပြင်းထန်စွာခံစားရဖူးသူတွေမှာ တွေ့ရလေ့ရှိကြောင်း ဓာတ်ခွဲခန်းလေ့လာချက်များအရသိရှိရပါတယ်။

ကိုဗစ်ရောဂါကြောင့် ဆေးရုံတက်ကုသခံယူခဲ့ရသည့်လူနာတွေမှာ သွေးကြောနံရံများရှိ အင်ဒိုသီလီယယ်ဆဲလ်တွေထိခိုက်ခံရကာ သွေးခဲခြင်း၊ အတွင်းအင်္ဂါပျက်စီးခြင်းနဲ့ အခြားပြဿနာများဖြစ်ပေါ်လေ့ရှိပါတယ်။

ကိုဗစ်ရောဂါအလယ်အလတ်မျှ ခံစားရတဲ့လူနာ ၁၇ ဦးနဲ့ ကျန်းမာရေးကောင်းမွန်တဲ့လူ ၂၇ ဦးတို့မှ သွေးနမူနာများဖြင့် လေ့လာချက်အသစ်တွေပြုလုပ်ရာမှာ ကိုရိုနာဗိုင်းရပ်စ်ကူးစက်မှုကြောင့် နှလုံးသွေးကြောနံရံရှိဆဲလ်များ သိသိသာသာထိခိုက်ထားကြောင့် တွေ့ရှိခဲ့ကြပါတယ်။

ကျန်းမာသန်စွမ်းတဲ့လူတွေရဲ့ သွေးနီဥတွေနဲ့နှိုင်းယှဉ်ပါက ကိုဗစ်ရောဂါလူနာတွေမှာ ကောင်းကျိုးပြုနိုက်ထရစ်အောက်ဆိုက်မော်လီကျူးထွက်ရှိမှု နည်းပါးပြီး ထိခိုက်ရောင်ရမ်းမှုကိုဖြစ်စေတဲ့ ဆိုးကျိုးပြုမော်လီကျူးတွေ များနေကြောင်းတွေ့ရှိရတယ်လို့ စတော့ဟုမ်းမြို့ ကယ်ရိုလင်စကာတက္ကသိုလ်မှ ဒေါက်တာ'အယ်လီမာဒီ'က ပြောပြလိုက်ပါတယ်။

ဒါ့အပြင် အခြားအင်ဇိုင်းတစ်မျိုးများပြားလာပြီး ပေါင်းဆုံသွားပါက ရောင်ရမ်းခြင်းဖြစ်စေတဲ့မော်လီကျူးတွေဟာ သွေးကြောနံရံတွေကို ထိခိုက်စေပြီး သွေးကြောတွေပုံမှန်အတိုင်း မတည်ရှိနိုင်တော့ကြောင်း သုတေသီအဖွဲ့က ဆိုပါတယ်။

အင်ဇိုင်းပမာဏကို ပုံမှန်အတိုင်းထိန်းပေးပြီး အန္တရာယ်ပေးနိုင်တဲ့မော်လီကျူးထုတ်လုပ်မှုကို ထိန်းချုပ်ပေးတဲ့ ဆေးဝါးများဖြင့် အဲဒီလိုအခြေအနေကို သက်သာလာအောင်ပြုလုပ်နိုင်ကြောင်း 'မာဒီ'က အသိပေးထားပါတယ်။

ဒီစမ်းသပ်လေ့လာချက်ကို မူလကိုရိုနာဗိုင်းရပ်စ်ဖြင့် စမ်းသပ်ထားတာဖြစ်ပြီး အခြားမျိုးဗီဇကွဲကူးစက်မှုတွေက သွေးနီဥတွေအပေါ် ဘယ်လိုသက်ရောက်သလဲဆိုတာကိုတော့ ရှင်းရှင်းလင်းလင်းမသိရှိရသေးပါဘူး။
Source: Reuters

Published 2 February 2022

ရုရှားသမ္မတပူတင်က ယူကရိန်းခွဲထွက်ရေးဒေသနှစ်ခုကို အသိအမှတ်ပြုလိုက်တဲ့ ဆုံးဖြတ်ချက်ကို အမေရိကန်သမ္မတ ဂျိုးဘိုင်ဒင်က ရှုတ်ချလိုက်ပါတယ်။

“ DNR နှင့် LNR လို့ဆိုကြတဲ့ ယူကရိန်းဒေသတွေရဲ့ လွတ်လပ်ရေးကို အသိအအမှတ်ပြုလိုက်တဲ့အတွက်  ဘိုင်ဒန်က ရုရှား သမ္မတ ဗလက်ဒီမာပူတင်ကို ပြင်းထန်စွာရှုတ်ချတဲ့အကြောင်း ယူကရိန်းသမ္မတ ဗိုလိုဒီမာဇီလင်စကီးနှင့် ဖုန်းပြောဆိုစဉ် ပြောဆိုခဲ့တယ်လို့ အိမ်ဖြူတော်က သတင်းထုတ်ပြန်ပါတယ်။

ဘိုင်ဒန်ဟာ ပြင်သစ်ခေါင်းဆောင် အီမန်နျူယယ်မာခရွန်၊ဂျာမနီခေါင်းဆောင် အိုလက်ရှိုးဇ်တို့နှင့်လည်း နောက်တစ်ဆင့် ဘယ်လိုတုန့်ပြန်ကြဖို့ ဘယ်လိုဆက်ပြီးပူးပေါင်းဆောင်ရွက်ကြမယ်ဆိုတာကို ဆွေးနွေးခဲ့တယ်လို့ နောက်သတင်းထုတ်ပြန်ချက်တစ်ခုမှာ ဖော်ပြထားပါတယ်။

Source Reuters

#WorldHealth
Published - 22 February 2022
ဗိုက်တာမင်-စီ၊ ဗိုက်တာမင်-ဒီနဲ့ ဇင့်တို့လို ဗိုက်တာမင်အားဆေးတွေက ကိုဗစ်ရောဂါကြောင့်အသက်သေဆုံးနိုင်ချေကို မလျှော့ချပေးနိုင်ကြောင်း တိုလီဒိုတက္ကသိုလ်မှ လေ့လာချက်တစ်ခုမှာ တွေ့ရှိခဲ့ကြပါတယ်။

အဆိုပါလေ့လာချက်တွင် ပြည်တွင်းဆေးပညာဦးစီးဌာနမှ ဒေါက်တာ'အာဇီဇူလာဘာရန်'၊ အဆုတ်နဲ့အရေးပေါ်ဌာနမှ ဒေါက်တာ'ရာဂက်အဆာလီ'နဲ့ အခြားသုတေသီများစွာတို့ ပါဝင်ဆောင်ရွက်ခဲ့ကြပြီး Clinical Nutrition ESPEN ဂျာနယ်မှာ ဖော်ပြခဲ့ပါတယ်။

ဒီဖြည့်စွက်စာအားဆေးတွေကို ဗိုင်းရပ်စ်ရောဂါပိုးခုခံနိုင်ဖို့ အတွက် အသုံးပြုလို့ ရပေမယ့် ကိုဗစ်ရောဂါကို ထိရောက်စွာကုသနိုင်တယ်လို့ တော့ အထောက်အထားမတွေ့ရှိသေးပါဘူး။
သုတေသီတွေက ဒီဇင်ဘာ ၅ ရက်နေ့ ၂၀၂၁ အထိ ဆေးကုသမှုအချက်အလက်တွေကို လေ့လာရှာဖွေခဲ့ပြီး အသက်သေဆုံးမှုနှုန်း၊ အသက်ရှူကိရိယာလိုအပ်မှုနှုန်း၊ ဆေးရုံတက်ကုသခံယူမှုကြာချိန်တို့ကို ဆန်းစစ်ခဲ့ကြပါတယ်။

ကိုဗစ်လူနာ ၅,၆၃၃ ဦးမှာ ဇင့်၊ ဗိုက်တာမင်-စီ၊ ဗိုက်တာမင်-ဒီအသုံးပြုမှုတွေနဲ့အတူ စောင့်ရှောက်ကုသခံရမှုတို့ကို သုတေသီတို့က နှိုင်းယှဉ်ခဲ့ ကြပါတယ်။

အဆိုပါဗိုက်တာမင်အားဆေးတွေက အသက်သေဆုံးမှုကို ကာကွယ်ပေးနိုင်ခြင်းမရှိပေမယ့် ဆေးရုံတက်ကုသခံယူရချိန်နဲ့ အသက်ရှူကိရိယာလိုအပ်မှုတို့ကိုတော့ လျှော့ချပေးနိုင်ကြောင်း တွေ့ရှိခဲ့ကြပါတယ်။

ဦးဆောင်သုတေသနပြုသူ'ဘာရန်'က "ဇင့်၊ ဗိုက်တာမင်-စီ၊ ဗိုက်တာမင်-ဒီ အားဆေးများအသုံးပြုခြင်းက ကိုဗစ်ရောဂါကိုသက်သာစေတယ်လို့ အထင်အမြင်လွဲနေကြပါတယ်။ တကယ်က အဲဒီလိုမဟုတ်ပါဘူး" လို့ သတိပေးလိုက်ပါတယ်။

ဗိုက်တာမင်တွေနဲ့သတ္တုဓာတ်တွေက အန္တရာယ်ဖြစ်စေတယ်လို့ ဆိုလိုတာမဟုတ်ကြောင်း၊ ဒါပေမဲ့လည်း ကိုဗစ်ရောဂါကြောင့်အသက်သေဆုံးနိုင်ချေကိုတော့ မကာကွယ်နိုင်ကြောင်း သုတေသီတွေက မှတ်ချက်ပြုဖော်ပြထားပါတယ်။
Source: The Jerusalem Post