#LocalNews
Published_10 May 2022

ပို့ကုန်တင်ပို့ခွင့်ပြုထားသော လယ်ယာထွက်ကုန်ပစ္စည်းများတွင် ဆီထွက်သီးနှံ နှမ်းနက်မှအပ မြေပဲနှင့် နှမ်းတင်ပို့မှုကို ခေတ္တဆိုင်းငံ့ထားရန် စီးပွားရေးနှင့် ကူးသန်းရောင်းဝယ်ရေးဝန်ကြီးဌာနက သိရသည်။

"စားသုံးဆီ ပြတ်တောက်မှာစိုးလို့ ဆီထွက်သီးနှံတွေကို ပြည်ပတင်ပို့ခွင့် ခဏရပ်မယ်။ ပြည်တွင်းမှာပဲ စားသုံးသူ ဖူလုံဖို့အတွက် ကြိတ်ခွဲထုတ်လုပ်ဖို့ ဖြစ်ပါတယ်။ ဒါက ယာယီရပ်တာပါ။ နယ်စပ်တွေရော၊ over sea ရော၊ border ရောပေါ့။ အဲဒီကုန်ပစ္စည်းတွေက လိုင်စင်လျှောက်စရာမလိုဘူး။

ဒီအတိုင်း အစစ်ဆေးခံပြီး ၂ ရာခိုင်နှုန်း အခွန်ဆောင်ပြီး ထွက်လို့ရတယ်လေ။ အခုက ကားတွေနဲ့သယ်နေတာတွေကိုလည်း ပြန်လှည့်ခိုင်းထားပါတယ်။ ဒါက လိုအပ်ချက်အရ ဖြစ်ပါတယ်"ဟု စီးပွားရေးနှင့် ကူးသန်းရောင်းဝယ်ရေး ဝန်ကြီးဌာနမှ အရာရှိကြီးတစ်ဦးက YMG ကို ပြောသည်။

စားအုန်းဆီကို အဓိကထုတ်လုပ်တင်ပို့ရောင်းချနေသည့် အင်ဒိုနီးရှားနိုင်ငံ သမ္မတဂျိုကိုဝီဒိုဒို စားအုန်းဆီပြတ်လပ်မှုလျှော့ချရန်၊ ဈေးနှုန်းထိန်းညှိရန် ရည်ရွယ်လျက် စားအုန်းဆီနှင့် ၎င်း၏ ကုန်ကြမ်းများကို ပြည်ပနိုင်ငံများသို့ ဧပြီလ ၂၈ ရက်မှ စတင်၍ တင်ပို့ရောင်းချမှု ယာယီရပ်ဆိုင်းကြောင်း ကြေညာခဲ့သေးသည်။

ymg/mt
#Yangon_Media_Group

#LocalNews
Published -10 May 2022

IGCSE, GED နဲ့ တက္ကသိုလ်၀င်စာမေးပွဲဖြေဆိုထားပြီးဖြစ်တဲ့ ကျောင်းသူကျောင်းသားတွေနဲ့ ဖြေဆိုဖို့ ပြင်ဆင်နေတဲ့ ကျောင်းသူကျောင်းသားတွေအနေနဲ့ အမေရိကန်နိုင်ငံမှာ ပညာသင်ယူဖို့ပညာသင်ဆု (Scholarship) လျှောက်ထားနိုင်တယ်လို့ American University of Yangonမှ သိရပါတယ်၊၊

မြန်မာနိုင်ငံမှာနှစ်နှစ် အမေရိကန်နိုင်ငံမှာနှစ်နှစ် ပညာသင်ယူရမယ့် 2+2 ပရိုဂရမ်မှာ ပညာသင်ယူလိုသော ကျောင်းသား၊ ကျောင်းသူများ online စကော် လာရှစ် စာမေးပွဲများ ဖြေဆိုနိုင်ပြီဖြစ်တယ်လို့ ဆိုပါတယ်၊၊

online စကော်လာရှစ် စာမေးပွဲကတော့ မေလ ၁၂ရက်၊ ၁၉ ရက် နဲ့ ၂၆ ရက်မှာ နံနက်၁၀နာရီမှ ၁၂ နာရီနဲ့ ညနေ ၁ နာရီမှ ၃ နာရီအတွင်းရှိမှာ ဖြစ်ပါတယ်၊၊

merit-based ဖြစ်တဲ့အတွက် ပညာသင်ဆု ဒေါ်လာ ၅၀၀၀ (MMK သိန်း ၈၀) ကို IGCSE, GED နဲ့ တက္ကသိုလ်၀င်စာမေးပွဲဖြေဆိုပြီးတဲ့ ကျောင်းသူ၊ ကျောင်းသားတွေနဲ့ ဖြေဆိုဖို့ ပြင်ဆင်နေတဲ့ ကျောင်းသူ၊ ကျောင်းသားတွေကို ပံ့ပိုးပေးသွားမှာဖြစ်တယ်လို့သိရပါတယ်၊၊

ပညာသင်ဆုအစီအစဉ်ကို လျှောက်ထားချင်တယ်ဆိုရင်တော့ https://forms.gle/LkayS17Ffu5wTbxbA မှာစာရင်းပေးသွင်းနိုင်မှာဖြစ်ပါတယ်၊၊

ymg/tthl
#Yangon_Media_Group

#LocalNews
Published - 10 May 2022

ဆိုင်ကယ်စီးလာတဲ့ အမျိုးသမီးနှစ်ဦးကို နောက်ကနေ အုတ်နီခဲဖြင့် ခေါင်းကိုရိုက်ပြီး ပိုက်ဆံအိတ်ကို လုယူသွားခဲ့သည့်ဖြစ်စဥ်တစ်ခု မန္တလေးမြို့မှာ ဖြစ်ပွားခဲ့တယ်လို့ သိရပါတယ်။

အဆိုပါ လုယက်မှုဖြစ်စဥ်ဟာ ယခုမေလ ၅ ရက်နေ့၊ ည ၈ နာရီနဲ့ ၉ နာရီကြားအချိန်တွင် မန္တ လေးမြို့၊ လမ်း(၃၀,၆၀နှင့် ၆၁)လမ်းကြားတွင် ဖြစ်ပွားခဲ့ခြင်းဖြစ်တယ်လို့ ဆိုပါတယ်။

"ညီမဖြစ်သူနဲ့ တူမဖြစ်သူက ဆိုင်ကယ်မောင်းနေချိန်မှာ သူတို့ဆိုင်ကယ်နောက်ကနေ Scoppy အနက်ရောင်နဲ့ လူနှစ်ယောက်က အုတ်နီခဲနဲ့ ခေါင်းကိုရိုက်ပြီး ပိုက်ဆံအိတ်ကိုလုယူသွားခဲ့တာပါ။ ညီမဖြစ်သူကခေါင်း(၅)ချက်ချုပ်ရတယ်။ တူမဖြစ်သူက လက်ကိုခိုင်းမိသွားခဲ့တယ်။ ရွှေဆွဲကြိုးတစ်ကုံး ပန်းပွင့်ပုံဆွဲသီးတစ်ခု ဟန်းချိန်းတစ်ခု Oppo ဖုန်းတစ်လုံး ငွေသားတစ်သိန်းပါသွားခဲ့ပါတယ်။"လို့ လုယက်ခံရသည့် ကာယကံရှင် မိသားစုဝင်တစ်ဦးက ပြောပြခဲ့ပါတယ်။

အဆိုပါ မန္တလေးမြို့တွင် လုယက်မှုများ မကြာခဏဆိုသလို ဖြစ်ပွားနေပြီး တစ်ခါတစ်ရံ လုယက်သူများက လုယက်ယုံတင်မကဘဲ အသက်အန္တရာယ်ပေးသည့် အခြေအနေမှာတောင်ရှိနေသည့်အတွက် မြို့ခံပြည်သူတွေအနေနဲ့ ပြင်ပသို့ သွားလာရာမှာ အချင်းချင်း သတိပေး၍ အထူးဂရုပြုသွားလာနေရတယ်လို့ သိရပါတယ်။

"ကြုံဘူးတယ် လမ်း ၆၀ နဲ့လမ်း ၃၀ ကြားမှာ ကိုယ်တွေတုန်းက အနောက်ကနေလှမ်းလုပြီး ရိုက်တာတောင်မဟုတ်ဘူး အရှေ့တည့်တည့်ကနေ လှမ်းရိုက်ပြီး ပိုက်ဆံအိတ်လှမ်းဆွဲဖြုတ်တာ ကိုယ်လည်း သတိရှိနေတာနဲ့ ဆိုင်ကယ်လက်ကိုင်ခေါက်ပြီး ခေါင်းရှောင်မောင်းတော့ မမီလိုက်ဘူး။ အဲ့နေ့ကနော် လမ်းမှာ လူအရမ်းမရှင်းသေးဘူး။ အနားက ဆိုင်ကယ်တွေလိုက်တော့ အသားကုန်မောင်းပြေးတာ ဖမ်းမမိလိုက်ဘူး"လို့ မန္တလေးမြို့ခံတစ်ဦးက ပြောပြခဲ့ပါတယ်။

ပြီးခဲ့သည့် နှစ်ပိုင်းမှစလို့ မန္တလေးမြို့တွင် လုယက်မှုဖြစ်စဥ်တွေ ပေါများလာခဲ့ခြင်းဖြစ်ပြီး ဆိုင်ကယ်ဖြင့် လုယက်မှု၊ ဓါးခုတ်လုယက်မှုနဲ့ အုပ်စုဖွဲ့ လုယက်မှု ဖြစ်စဥ်တွေ အများအပြား ဖြစ်ပေါ်ခဲ့တာပါ။

ယင်း လုယက်မှုဖြစ်စဥ်တွေကြောင့် အပြင်းအထန် ထိခိုက်ဒဏ်ရာရသူများလည်း ရှိခဲ့သလို သေဆုံးသူများလည်း ရှိခဲ့တာဖြစ်တယ်လို့လည်း မန္တလေးမြို့ဒေသခံများထံမှ သိရပါတယ်။

Photo - CJ

ymg/kg
#Yangon_Media_Group

#LocalNews
Published - 10 May 2022

ရန်ကုန်- မန္တလေး အမြန်လမ်းတွင် ဒီကနေ့ နံနက်ပိုင်းအချိန်က (၆)ဘီးကုန်တင်ယာဥ်တစ်စီး ပလက်လန် တိမ်းမှောက်မှုဖြစ်ပွားခဲ့တယ်လို့ သိရပါတယ်။

အဆိုပါ ယာဥ်တိမ်းမှောက်မှုဟာ ရန်ကုန်-မန္တလေး အမြန်လမ်းမကြီး၊ မိုင်တိုင်အမှတ်(၃၃၄/၂)နှင့် (၃၃၄/၃)ကြားတွင် ဖြစ်ပွားခဲ့ခြင်း ဖြစ်ပါတယ်။

ယာဉ်တိမ်းမှောက်မှုဖြစ်ပွားရာသို့ ပြင်စည်အမြန်လမ်းမီးသတ်စခန်းမှ သန္ဓေမီးသတ်တပ်ဖွဲ့ဝင်များက သက်ဆိုင်ရာအဖွဲ့အစည်းများနှင့် ပူးပေါင်းကာ ကယ်ဆယ်လုပ်ငန်းများ သွားရောက်ကူညီဆောင်ရွက်ပေးခဲ့ရတာပါ။

ယခုယာဉ်တိမ်းမှောက်မှုကြောင့် လူထိခိုက်ဒဏ်ရာရရှိမှုတော့ မရှိဘူးလို့ မီးသတ်တပ်ဖွဲ့က ထုတ်ပြန်ထားပါတယ်။

ဓါတ်ပုံ - အမြန်လမ်းရဲတပ်ဖွဲ့

ymg/kg
#Yangon_Media_Group

#DailyNews
Published - 10 May 2022

၁။ ပုဂံဒေသမှာ မိုးမယိုအောင် အမြန်ဆုံးပြုပြင်ထိန်းသိမ်းရမည့် စေတီပုထိုးစုစုပေါင်း (၆၀)ဆူရှိ/ (၃၀)ဆူ ပြုပြင်ပြီးဖြစ်။

၂။ တားမြစ် အသင့်စားကြက်အူချောင်းစားမိရာမှ လူ ၅၀ ဝန်းကျင် အစာအဆိပ်သင့်မှုဖြစ်ပွား။

၃။ နေ့စဉ်မိုးလေဝသသတင်း။

၄။ ကိုဗစ်ကပ်ရောဂါနှင့် ယူကရိန်း-ရုရှားစစ်ပွဲကြောင့် ထိုင်းနိုင်ငံမှသစ်ခွပန်းလုပ်ငန်းများ အထိနာ ...အစရှိတဲ့သတင်းတွေကို တင်ဆက်ပေးသွားမှာ ဖြစ်ပါတယ်။

#Yangon_Media_Group

#LocalNews
Published_10 May 2022

ရခိုင်ပြည်နယ် စစ်တွေမြို့တွင် ယာဉ်မတော်တဆမှုကြောင့် အမျိုးသားနှစ်ဦး သေဆုံးသွားကြောင်း သိရသည်။

မေလ ၉ ရက် ည ၁၁ နာရီကျော်အချိန်က စစ်တွေမြို့ ပြည်တော်သာရပ်ကွက် မူလွန် အ.မ.က (၁၅)ရှေ့တွင်စစ်တွေမြို့ယာဉ်တစ်စီး အရှိန်မထိန်းနိုင်ဘဲ ပလပ်ဖောင်းအောက်လမ်းဘေးသို့ ထိုးကျသွားခဲ့ပြီး ပြင်းထန်ဒဏ်ရာများရရှိခဲ့ကာ သေဆုံးသွားခြင်းဖြစ်ကြောင်း၊ သေဆုံးသွားသူနှစ်ဦး၏ ရုပ်အလောင်းများကို စစ်တွေဆေးရုံကြီးရင်ခွဲရုံသို့ ပို့ဆောင်ထားကြောင်း ရွှေရောင်မေတ္တာဖောင်ဒေးရှင်းက သိရသည်။

"သူတို့ကို ဆေးရုံကိုယူတယ်။ တစ်ယောက်က လမ်းမှာဆုံးတယ်။ နောက်တစ်ယောက်က ဆေးရုံရောက်ပြီးမှ ဆုံးတာ။ တစ်ယောက်က ရန်ကုန်မှာနေတဲ့ စစ်တွေဇာတိ ရခိုင်တိုင်းရင်းသားပါ။နောက်တစ်ယောက်ကတော့ စစ်တွေကပဲ။ လမ်းဟောင်းနဲ့ လမ်းသစ်ကို ဆက်ထားတဲ့လမ်းဆုံ နားလေးဆိုတော့ ဂုံးတက်တစ်ခုရှိတယ်။ အဲဒီနားမှာ ဖြစ်သွာတာ "ဟု ဖောင်ဒေးရှင်းတာဝန်ရှိသူက ပြောသည်။

ရခိုင်ပြည်နယ်တွင် ၂၀၂၁ ခုနှစ်အတွင်း ယာဉ်မတော်တဆဖြစ်ပွားမှုကြောင့် သေဆုံးသူပေါင်း ၁၂၃ ဦး၊ ဒဏ်ရာရရှိသူပေါင်း ၂၈၇ ဦး ရှိခဲ့ကြောင်း ပြည်နယ်ယာဉ်ထိန်းရဲတပ်ဖွဲ့စာရင်းများတွင် ဖော်ပြထားသည်။

ymg/mt
#Yangon_media_Group

#LocalNews
Published - 10 May 2022

အမြန်လမ်းမကြီးတွင် လမ်းဖြတ်ကူးသည့် ဆိုင်ကယ်အား ခရီးသည်တင် Express ယာဥ်တစ်စီးက ဝင်ရောက်တိုက်မိမှုဖြစ်ပွားပြီး တစ်ဦးသေဆုံးကာ တစ်ဦးထိခိုက်ဒဏ်ရာရခဲ့တဲ့ ဖြစ်စဥ်တစ်ခု မေ ၉ ရက်၊ ညပိုင်းအချိန်က ဖြစ်ပွားခဲ့တယ်လို့ သိရပါတယ်။

အဆိုပါ ဖြစ်စဥ်ဟာ ရန်ကုန်-မန္တလေးအမြန်လမ်းမကြီး၊ မိုင်တိုင်အမှတ် (၆၃/၁-၂)ဖာလုံကြားတွင် ဖြစ်ပွားခဲ့ခြင်းဖြစ်ပါတယ်။

ဖြစ်စဥ်မှာ ရန်ကုန်မှ မန္တလေးဘက်သို့ မောင်းနှင်လာသော ခရီးသည်တင်ယာဉ်သည် ရှေ့မှ လမ်းဖြတ်ကူးလာသည့် ဆိုင်ကယ်အား ဝင်ရောက်တိုက်မိမှု ဖြစ်ပွားခဲ့ခြင်းဖြစ်တယ်လို့ ဆိုပါတယ်။

အဆိုပါ ယာဥ်တိုက်မှုဖြစ်ပွားရာသို ဥသျှစ်ကုန်းအမြန်လမ်းမီးသတ်စခန်းမှ တပ်ဖွဲ့ဝင်များက ဥသျှစ်ကုန်းအမြန်လမ်းရဲစခန်းမှ တပ်ဖွဲ့ဝင်များနှင့်အတူ ကူညီကယ်ဆယ်ရေးလုပ်ငန်းများကို ဆောင်ရွက်ပေးခဲ့ရတာ ဖြစ်ပါတယ်။

ယင်းဖြစ်စဥ်ကြောင့် ဆိုင်ကယ်ပေါ်ပါ အမျိုးသား(၂)ဦးအနက်မှ ဆိုင်ကယ်ယာဉ် မောင်းထိခိုက်ဒဏ်ရာ(မစိုးရိမ်ရ)နှင့် နောက်မှလိုက်ပါလာသူ (သေဆုံး)တို့အား တပ်ဖွဲ့ပိုင်ယာဉ်ဖြင့် မြို့ချောင်းတိုက်နယ်ဆေးရုံသို့ ပိုဆောင်ကူညီပေးခဲ့ကြောင်း အမြန်လမ်း မီးသတ်တပ်ဖွဲ့က သတင်းထုတ်ပြန်ထားပါတယ်။

ဓါတ်ပုံ - အမြန်လမ်း မီးသတ်တပ်ဖွဲ့

ymg/kg
#Yangon_Media_Group

#LocalNews
Published -10 May 2022

မုန်တိုင်းအာဆင်နီအရှိန်ကြောင့်ဒေသအချို့မှာ မိုးသည်းထန်ကာလေပြင်းတိုက်တဲ့အတွက် ပဲခူးတိုင်း၊ မန္တလေးတိုင်းနဲ့ စစ်ကိုင်းတိုင်းဒေသတွေမှာ သစ်ပင်တွေလဲကျကာ လမ်းပိတ်ဆို့တာ၊ နေအိမ်တွေအပေါ် သစ်ပင်တွေလဲကျတာတွေ ဖြစ်ပွားခဲ့တယ်လို့ သိရပါတယ်၊၊

မေလ(၁၀)ရက် နံနက်ပိုင်းမှာပဲခူးတိုင်းဒေသကြီး၊ ပေါင်းတည်မြို့၊ မင်းကွက်(၃)ရပ်ကွက်၊ ရန်ကုန်-ပြည်ကားလမ်း၊ မိုင်တိုင်အမှတ်(၁၄၄)မှာ မိုးသည်းထန်စွာသွန်းပြီး သစ်ပင်လဲကျကာ လမ်းပိတ်ဆို့မှု ဖြစ်ပွားခဲ့ပါတယ်၊၊

မေလ(၉)ရက်နေ့မှာလည်း မန္တလေးတိုင်းဒေသကြီး၊ ညောင်ဦးမြို့၊ အမှတ်(၆)ရပ်ကွက်၊ အောင်မြေသာရပ်၊ ခုတင် ၂၀၀ ဆံ့ ညောင်ဦးခရိုင် ပြည်သူ့ဆေးရုံဝန်းအတွင်းမှာ နေအိမ်ပေါ်သို့ သစ်ပင်လဲကျမှု ဖြစ်ပွားခဲ့ပါတယ်၊၊

မေလ(၉)ရက်မှာပဲ စစ်ကိုင်းတိုင်းဒေသကြီး၊ စစ်ကိုင်းမြို့နယ်၊ သောတပန်ရပ်ကွက်၊ တောင်ရိုးလမ်း(သီတဂူလမ်း)၊ မြစင်္ကြာကျောင်းတိုက်ဝန်းအတွင်းရှိ သစ်ပင်လဲကျပြီး လမ်းပိတ်ဆို့မှုဖြစ်ပွားခဲ့ပါတယ်၊၊

သစ်ပင်တွေလဲကျနေတာတွေကို သက်ဆိုင်ရာ မြို့နယ်မီးသတ်စခန်းမှ သန္ဓေမီးသတ်တပ်ဖွဲ့ဝင်တွေ၊ အရန်မီးသတ်တပ်ဖွဲ့ဝင်တွေနဲ့ လူမှုကူညီရေးအဖွဲ့တွေက ရှင်းလင်းရေးလုပ်ငန်းတွေ ဆောင်ရွက်ခဲ့တယ်လို့ သိရပါတယ်၊၊

ယခုကာလဟာ မုတ်သုန်အဝင်ကာလဖြစ်သလို ကပ္ပလီပင်လယ်ပြင်မှာဖြစ်ပေါ်နေတဲ့ မုန်တိုင်းငယ်အာစင်နီကြောင့် မြန်မာနိုင်ငံရဲ့အချို့ဒေသတွေမှာ မိုးသည်းထန်တာ၊ လေပြင်းတိုက်ခတ်တာတွေ ဖြစ်ပေါ်မယ်လို့ မိုးလေဝသနှင့်ဇလဗေဒညွှန်ကြားမှုဦးစီးဌာနက သတိပေးထားပြီးလတ်တလောမှာလည်း မိုးသည်းထန်တာ၊ လေပြင်းတိုက်ခတ်တာတွေ ဖြစ်ပွားနေတာဖြစ်ပါတယ်၊၊

ymg/tthl
#Yangon_Media_Group

#WorldPolitics
Published 10 May 2022

နှစ် ၃၀ ကျော်ကြာ စောင့်ဆိုင်းခဲ့ရပြီးနောက်ဆုံးမှာတော့ မစ္စတာ'ဖာဒီနန်မားကိုစ်ဂျူနီယာ'ဟာ ဖိလစ်ပိုင်နိုင်ငံရဲ့ ၁၇ ယောက်မြောက်သမ္မတဖြစ်လာခဲ့ပါပြီ။

မေလ ၁၀ ရက်နေ့အင်္ဂါနေ့ နံနက်ပိုင်းမှာ အာဏာရှင်ဟောင်းရဲ့သားဖြစ်သူ အသက် ၆၄ နှစ်ရှိ'မားကိုစ်'ဟာ တရားဝင်မဲအရေအတွက်အားလုံးရဲ့ ၉၄ ရာခိုင်နှုန်းဖြင့် မဲစုစုပေါင်း သန်း ၃၀ နီးပါးအထိရရှိခဲ့ပြီး အများဆန္ဒအရေအတွက်အဖြစ် သတ်မှတ်ထားတဲ့ ၂၇.၅ သန်းကိုကျော်ဖြတ်နိုင်ခဲ့တာဖြစ်ပါတယ်။

တနင်္လာနေ့က သမ္မတရွေးကောက်ပွဲမဲပေးခြင်းကို ပိတ်သိမ်းခဲ့ပြီးနောက် မဲအရေအတွက် ၆၇ သန်းရှိတဲ့ထဲက ၄၅ သန်းနီးပါးရေတွက်ပြီးချိန်မှာ 'ဖာဒီနန်မားကိုစ်ဂျူနီယာ'က အနီးကပ်ဆုံးပြိုင်ဘက်ဖြစ်တဲ့ လက်ရှိဒုသမ္မတ'လန်နီရိုဘရီဒို'ကို ၁၃.၃ သန်းဖြင့် အသာရနေခဲ့ပါတယ်။

နောက်ဆုံးအနေနဲ့ မစ္စတာ'မားကိုစ်'က မဲပေါင်း ၂၇ သန်းနဲ့ ၃၂ သန်းကြားရနိုင်ဖွယ်ရှိပြီး မစ္စ'ရိုဘရီဒို'ကတော့ ၁၅ သန်းအများဆုံးသာရနိုင်တယ်လို့ ခန့်မှန်းခဲ့ကြပါတယ်။

အနားယူတော့မယ့် သမ္မတ'ရိုဒရီဂိုဒူတာတေ'ရဲ့သမီးဖြစ်ပြီး မစ္စတာ'မားကိုစ်ဂျူနီယာ'နဲ့အတူ ပါဝင်ယှဉ်ပြိုင်တဲ့ အသက် ၄၃ နှစ်ရှိ မစ္စ'ဆာရာဒူတာတေကာပီယို'က ဒုသမ္မတဖြစ်လာမှာ ဖြစ်ပြီး ဒုတိယနေရာက လွှတ်တော်အမတ်'ကီကိုပန်ဂီလီနန်'ထက် မဲအရေအတွက် ၁၈ သန်းပိုများခဲ့ပါတယ်။

တနင်္လာနေ့ညကရလာဒ်တွေဟာ မျှော်မှန်းထားတဲ့အတိုင်း မစ္စတာ'မားကိုစ်ဂျူနီယာ'နဲ့ မစ္စ'ဒူတာတေကာပီယို'တို့ အပြတ်အသတ်အနိုင် ရခဲ့တာဖြစ်ပါတယ်။

ညသန်းခေါင်မတိုင်ခင် ရုပ်မြင်သံကြားကနေ ပြောကြားရာ မစ္စတာ'မားကိုစ်ဂျူနီယာ'က သူ့ကိုထောက်ခံမဲပေးသူများကို ကျေးဇူးတင်ရှိကြောင်း ပြောသွားပါတယ်။

"ဒီလိုအောင်မြင်မှုကြီးက တစ်ဦးတစ်ယောက်တည်းနဲ့ မဆိုင်ပါဘူး၊ နည်းလမ်းပေါင်းစုံဘက်ပေါင်းစုံကနေ ကူညီပေးခဲ့တဲ့သူအားလုံးကို ကျေးဇူးတင်ပါတယ်" လို့ ပြောကြားလိုက်ပါတယ်။

မနီလာမြို့အရှေ့ဘက်ရှိ စည်းရုံးရေးအဖွဲ့ချုပ်ဌာနမှာ ထောက်ခံအားပေးသူတွေနဲ့အတူ အောင်ပွဲခံပျော်ပါးနေခဲ့ကြပြီး အာဏာရှင်ဟောင်းလက်ထက်က ဝါဒဖြန့်စစ်ချီသီချင်းကို သီဆိုနေခဲ့ကြပါတယ်။

မဲဆန္ဒရှင်များစွာဟာ စတင်မဲပေးချိန် နံနက် ၆ နာရီမတိုင်ခင်ကတည်းက မဲဆန္ဒနယ်များသို့ စုဝေးရောက်ရှိနေခဲ့ကြပါတယ်။

မစ္စတာ'မားကိုစ်ဂျူနီယာ'က မစ္စတာ'ဒူတာတေ'ရဲ့လမ်းစဉ်များအတိုင်း မူးယစ်ဆေးဝါးတိုက်ဖျက်ရေးနဲ့ တရုတ်နဲ့ပြန်လည်သင့်မြတ်ရေးတို့ကို ဆက်လက်လုပ်‌ဆောင်သွားမယ်လို့ မဲဆွယ်ခဲ့တာပါ။

သူ့ကိုဝေဖန်တဲ့ဘက်ကတော့ အဖေဖြစ်သူအာဏာရှင်ဟောင်းလက်ထက် အစုလိုက်အပြုံလိုက်သတ်ဖြတ်ခဲ့တာတွေကို‌ ထောက်ပြခဲ့ကြပြီး ဒီလိုအာဏာရှင်မိသားစုလက်ထဲ အာဏာပြန်ရောက်တော့မှာဖြစ်တယ်လို့ ဆိုနေကြပါတယ်။

Source: The Straits Times
#Yangon_Media_Group

#LocalNews
Published_10 May 2022

မြန်မာ့ထိပ်သီးစီးပွားရေးလုပ်ငန်းရှင် ဦးအောင်ကိုဝင်း၏ သမီးဖြစ်သူ KBZ ဘဏ် ဒုတိယအမှုဆောင်အရာရှိချုပ်လည်းဖြစ် ကမ္ဘောဇဘဏ်အုပ်စု အမှုဆောင်ဒါရိုက်တာလည်းဖြစ်သော ဒေါ်နန်းလိုင်ခမ်း အဖမ်းခံရသည်ဆိုခြင်းမှာမဟုတ်ကြောင်း ပြန်ကြားရေးဝန်ကြီးဌာန ဒုဝန်ကြီး ဗိုလ်ချုပ်ဇော်မင်းထွန်းက YMG ကို ပြောသည်။

"အဲဒီသတင်းက မဟုတ်ဘူး။အခု ပြည်တွင်းမှာတောင် မရှိဘူး။ပြည်ပမှာပါတဲ့၊အဖမ်းခံရတယ်ဆိုတာ မဟုတ်ပါဘူးဗျ"ဟု ယင်းက ပြောသည်။

လူမှုကွန်ရက်သတင်းများတွင် ဒေါ်နန်းလိုင်ခမ်းအား ရန်ကုန်အပြည်ပြည်ဆိုင်ရာလေဆိပ်တွင် မေလ ၉ ရက်က ခေါ်ယူစစ်ဆေးခဲ့ကြောင်းရေးသားမှုများရှိခဲ့သည်။

လေဆိပ်နှင့် နီးစပ်သော သတင်းရင်းမြစ်တစ်ဦးက ယင်းသို့ခေါ်ယူမေးမြန်းသည်ဆိုခြင်းမှာ ပြည်ပခရီးသွားရောက်ရန် လေဆိပ်သို့လာရောက်စဉ် အချက်အလက်အချို့ကျန်နေခြင်း၊လေယာဉ်လက်မှတ်ကိစ္စအကြောင်းအရာများကြောင့်သာဖြစ်ကြောင်း ပြောသည်။

ymg/mt
#Yangon_Media_Group

#Health_Technology
Published 10 May 2022

ဝင်လာတဲ့ပုံရိပ်များကို ဦးနှောက်သို့ ကြိုးမဲ့ပေးပို့နိုင်မယ့် ကင်မရာပါပြီးသားဖြစ်တဲ့ နည်းပညာမြင့်မျက်မှန်ကို သုတေသနပညာရှင်များ စမ်းသပ်တီထွင်လျက်ရှိပါတယ်။

အဆိုပါပစ္စည်းဟာ မျက်မမြင်အများစုမှာ မျက်လုံးနဲ့ဦးနှောက်ကြားထဲက ထိခိုက်ပျက်စီးနေပြီဖြစ်တဲ့ အာရုံကြောတွေကိုဖြတ်ကျော်ပြီး ပုံရိပ်များကို ဦးနှောက်သို့တိုက်ရိုက်ပေးပိုပေးမှာဖြစ်ပါတယ်။

နယ်သာလန်မှ ပညာရှင်များအဖွဲ့က ဒီပစ္စည်းကို အိုင်ဟိုဗန်မြို့မှာစမ်းသပ်နေတာဖြစ်ပြီး ကလေးဘဝတည်းက အမြင်အာရုံဆုံးရှုံးခဲ့တဲ့ အမေရိကန်တေးဂီတရှင် သူရဲကောင်း'စတီဗီဝမ်းဒါး'ကလည်း ထောက်ခံအားပေးနေပါတယ်။

ဆေးပညာတိုးတက်လာခြင်းနဲ့အတူ ပြီးခဲ့တဲ့ဆယ်စုနှစ်အတွင်း အမြင်အာရုံပြန်မရနိုင်တော့တဲ့မျက်မမြင်ဝေဒနာရှင်များအတွက် ကုထုံးများနဲ့ ပစ္စည်းများကို စမ်းသပ်ထုတ်လုပ်နေခဲ့တာဖြစ်ပါတယ်။

လက်ရှိစမ်းသပ်နေတဲ့အထဲမှာ ယူကေနဲ့အမေရိကန်တို့မှာ စမ်းသပ်နေတဲ့ မျက်လုံးတုကုသနည်းတွေနဲ့ မျိုးရိုးလိုက်အမြင်အာရုံ မရရှိခြင်းကို ကုသပေးမယ့် CRISPR မျိုးရိုးဗီဇကုသ ပစ္စည်းစမ်းသပ် နည်းတို့ပါဝင်ပါတယ်။

အခုနောက်ဆုံးထုတ်လုပ်နေတဲ့ မျက်မှန်တွေဟာ ပုံရိပ်တွေကို ဦးနှောက်သို့ပိုပေးနိုင်တဲ့ စက်ပစ္စည်း တွေပါဝင်ပါတယ်။

မျက်မှန်မှာပါဝင်တဲ့ ကင်မရာကနေ ခလုတ်နှိပ်လိုက်ပါက ပုံရိပ်ကားချပ်အတိုင်းရရှိလာမှာ ဖြစ်ပါတယ်။

အဆိုပါပုံရိပ်တွေက မျက်မမြင်ပုဂ္ဂိုလ်ရဲ့ ဦးနှောက်ထဲရှိအမြင်အာရုံလှုံ့ဆော်ပေးတဲ့ visual cortex အစိတ်အပိုင်းပေါ်မှာ တပ်ဆင်ထားတဲ့ ဆားကစ်ပြားလေးဆီသို့ ကြိုးမဲ့စနစ်ဖြင့် ရောက်ရှိလာမှာဖြစ်ပြီး ဝိုင်ဖိုင်နဲ့ ဘလူးတုသ်နည်းပညာများကဲ့သို့ ရေဒီယိုလှိုင်းများဖြင့် ပေါင်းစပ်အသုံးချထားတာဖြစ်ပါတယ်။

ပုံမှန်ဆိုရင် အဆိုပါဦးနှောက်အစိတ်အပိုင်းက မျက်လုံးထဲဝင်လာတဲ့အကြောင်းအရာကို ပုံရိပ်အဖြစ်သိရှိအောင် ကူးပြောင်းပေးတာဖြစ်ပြီး သုတေသီတွေက ထိုနည်းလမ်းအတိုင်း လျှပ်ကူးပစ္စည်းလေးတွေကို အသုံးပြုကာ ဦးနှောက်ဆဲလ်တွေကို လှုံ့ဆော်ပေးတာဖြစ်ပါတယ်။

သိပ္ပံပညာရှင်တွေက ဒီပစ္စည်းကို လူသားတွေနဲ့မစမ်းသပ်ရသေးပေမယ့် မျောက်တွေနဲ့စမ်းသပ်ရာမှာတော့ အောင်မြင်မှုရခဲ့တယ်လို့ ဆိုရမှာဖြစ်ပါတယ်။

အရင်ကစမ်းသပ်ခဲ့တဲ့မျက်မှန်တွေဟာ ရောဂါပိုးကူးစက်ခြင်းဖြစ်နိုင်တဲ့ အန္တရာယ်မျိုးရှိနေပြီး ယခုကြိုးမဲ့စနစ်နဲ့ထုတ်လုပ်တဲ့ ပစ္စည်းကတော့ ဒီလိုပြဿနာတွေကိုကျော်လွှားနိုင်မယ်လို့ ယုံကြည်နေကြပါတယ်။

အဆိုပါ မျက်မှန်တပ်ဆင်ဖို့အတွက် ဘယ်လောက်ကုန်ကျမလဲဆိုတာ ဖော်ပြခြင်းမရှိသေးပေမယ့် ဆားကစ်ပြားလေး ခွဲစိတ်တပ်ဆင်ခထည့်မတွက်ရင်တောင် အမေရိကန်မှာဒေါ်လာ ၁၁၀,၀၀၀ ခန့်ကုန်ကျနိုင်ပါတယ်။

မျက်လုံးကိုဖြတ်ကျော်ပြီး ဦးနှောက်ကိုတိုက်ရိုက်ပေးပိုမယ့်နည်းပညာဟာ အမြင်အာရုံဆုံးရှုံးသူအများစု ခံစားနေရတဲ့ပြဿနာကို ဖြေရှင်းပေးနိုင်မှာဖြစ်တယ်လို့ အိုင်ဟိုဗန်နည်းပညာတက္ကသိုလ်မှသုတေသီ'အဒီဒါယိုအိုမီဆာကင်'က ပြောကြားလိုက်ပါတယ်။

ဆားကစ်ပြားပစ္စည်းလေးကို လည်ပင်းအနောက်ဘက်အရေပြားအောက်မှာ ထားရှိမှာဖြစ်ပါတယ်။

အရင်ကဆားကစ်ပြားကို တပ်ဆင်ရာမှာ လျှပ်စစ်ကဦးခေါင်းကနေဖြတ်ပြီး အကြောဆွဲတာမျိုးဖြစ်ပေါ်တတ်ပါတယ်။

တိကျပြတ်သားတဲ့ပုံရိပ်ရဖို့ လျှပ်ကူးပစ္စည်းများများ အသုံးပြုဖို့လိုအပ်ကြောင်း မစ္စတာ'အိုမီဆာကင်'ကဆိုပါတယ်။ မျက်မမြင်များအတွက်ထုတ်လုပ်ခဲ့တဲ့ပစ္စည်းအများအပြားရှိခဲ့ပေမယ့် အောင်မြင်မှုမရခဲ့ပါဘူး။

'စတီဗီဝမ်းဒါး'က နယ်သာလန်မှ Envision မှထုတ်လုပ်တဲ့မျက်မှန်ကို မတ်လအတွင်းအမေရိကန်နည်းပညာပြပွဲမှာ စမ်းသပ်ခဲ့ပြီးနောက် သဘောကျလျက်ရှိနေပါတယ်။

Source: DailyMail.
#Yangon_Media_Group

#LocalNews
Published_10 May 2022

အထောက်အထားမဲ့ မြန်မာနိုင်ငံသားများ တင်ဆောင်လာသော မော်တော်ယာဉ်တစ်စီး ထိုင်းနိုင်ငံအတွင်းတိမ်းမှောက်၍ တစ်ဦးသေပြီး ၈ ဦးဒဏ်ရာရခဲ့ကြောင်း သိရသည်။

ယာဉ်ပေါ်တွင် အထောက်အထားမဲ့ မြန်မာနိုင်ငံသား၂၁ ဦး လိုက်ပါလာခြင်းဖြစ်ပြီး မေလ ၉ ရက် က ထိုင်းနိုင်ငံ တာခ်ခရိုင် နယ်စပ် မဲ့လမတ်မြိုနယ်အတွင်း တိမ်းမှောက်မှုဖြစ်ပွားခဲ့ခြင်း ဖြစ် ကြောင်း သိရသည်။

"ကားပေါ်မှာ အမျိုးသား ၁၂ ယောက်၊ အမျိုးသမီးက ၉ ယောက်ပါတယ်လို့ ကြားတယ်။ ကားက ချောက်ထဲကို ထိုးကျသွားတာ။ ကားအမျိုးအစားက ပစ်ကပ်ထရပ်ကား Isuzu အမျိုးအစားလို့သိရတယ်။ ဒဏ်ရာရသူတွေကလည်း ပြင်းထန်တာကြောင့် မဲ့လမတ်ဆေးရုံကို ပို့ထားတယ်တဲ့"ဟု ထိုင်းနိုင်ငံရောက် မြန်မာနိုင်ငံသားတစ်ဦးက ပြောသည်။

ထိုင်းနိုင်ငံသို့ တရားမဝင်လမ်းကြောင်းမှ သွားရောက်သည့်မြန်မာရွှေ့ပြောင်းအလုပ်သမားတင်ဆောင်သောယာဉ်များ တိမ်းမှောက်ခြင်း၊ အဖမ်းဆီးခံရခြင်းနှင့် အခြားဘေးအန္တရာယ်များ ကြုံတွေ့ခြင်းများ မကြာခဏဖြစ်ပေါ်လေ့ရှိနေသည့်အတွက် မြန်မာရွှေ့ပြောင်းအလုပ်သမားများအနေဖြင့် တရားမဝင်လမ်းကြောင်းမှ မလာရောက်ကြရန်လည်း ရွှေ့ပြောင်းလုပ်သားများ အရေးလုပ်ကိုင်နေသူများက တိုက်တွန်းနေကြသည်။

ymg/mt
#Yangon_Media_Group