#LocalNews
Published - 26 Feb 2022

ပူတာအိုဒေသတိုက်ပွဲများကြောင့် မြစ်ကြီးနား - ဆွမ်ပရာဘွမ် - ပူတာအို ကားလမ်းကို ပိတ်ထားရသည့်အတွက် ကုန်စည်စီးဆင်းမှုအပိုင်းမှာ နှောင့်နှေးကြန့်ကြာမှုတွေရှိနေတယ်လို့ ပူတာအိုမြို့ဒေသခံများထံမှ သိရပါတယ်။

#Yangon_Media_Group

#DailyNews
Published - 26 Feb 2022

၁။ ရန်ကုန်-ဒလ သမ္ဗာန်စီးနှင်းခ မတ်လ ၁ ရက်နေ့တွင် ငွေကျပ် ၃၀၀ ပြောင်းလဲကောက်ခံမည်။

၂။ ပူတာအိုဒေသတိုက်ပွဲများကြောင့် ကုန်စည်စီးဆင်းမှုအပိုင်းမှာ နှောင့်နှေးကြန့်ကြာမှုတွေရှိနေဟုဆို။

၃။ နေ့စဉ်မိုးလေဝသသတင်း။

၄။ ကွန်ဂိုနိုင်ငံအရှေ့ဘက်မှ စစ်ဘေးဒဏ်ခံခဲ့ရသည့်မျောက်ဝံများကို တိရိစ္ဆာန်ကယ်ဆယ်ရေးစင်တာတစ်ခုက စောင့်ရှောက်ကုသပေးလျက်ရှိ.......အစရှိတဲ့သတင်းတွေကိုတင်ဆက်ပေးသွားမှာပဲဖြစ်ပါတယ်။

#Yangon_Media_Group

#LocalNews
Published - 26 Feb 2022

မွန်ပြည်နယ်၊ မော်လမြိုင်မြို့အနီးမှာ တောမီးလောင်မှု နှစ်ကြိမ်ဖြစ်ပွားခဲ့တယ်လို့ သိရပါတယ်။

အဆိုပါ တောမီးလောင်ကျွမ်းမှုဟာ ဖေဖော်ဝါရီလ ၂၅ ရက်နေ့က ဖြစ်ပွားခဲ့ခြင်းဖြစ်ပြီး ပထမဖြစ်စဥ်မှာ ယင်းနေ့ မွန်းလွဲ ၁ နာရီကျော်အချိန်ခန့်မှာ မော်လမြိုင်မြို့၊တောင်ဝိုင်းရပ်၊ တက္ကသိုလ်ကျောင်းဝန်းထဲရှိ ချုံနွယ်ပိတ်ပေါင်းများနှင့် မြက်ခြောက်များ မီးလောင်မှုဖြစ်ပွားခဲ့ခြင်းဖြစ်ပါတယ်။

ဒုတိယဖြစ်စဥ်ကတော့ ယင်းနေ့ နေ့လည် ၃ နာရီခွဲအချိန်ခန့်မှာ မော်လမြိုင်မြို့၊ တောင်ဝိုင်းလေယာဉ်ကွင်းတွင် တောမီးလောင်ကျွမ်းမှုဖြစ်ပွားခဲ့ခြင်း ဖြစ်ပါတယ်။

ယင်း တောမီးလောင်ကျွမ်းမှုကို မော်လမြိုင်မြို့နယ် မီးသတ်ဦးစီးမှူး ဦးစိုးကျော်သူဦးဆောင်၍ မီးသတ်တပ်ဖွဲ့ဝင်များ၊ မောင်ငံမီးသတ်စခန်းနှင့် မြိုင်သာယာမီးသတ်စခန်းမှ တပ်ဖွဲ့ဝင်များက မီးသတ်ယာဉ်(၂)စီး၊ရေဘောက်ဆာ(၁)စီး တို့နှင့်အတူ ဘိုဘိုဝင်း(Rescue)အရေးပေါ်ကယ်ဆယ်ရေးအဖွဲ့ မှ မီးသတ်ယာဉ်(၁)စီး၊ ရေသယ်ယာဉ်(၁)စီး၊ ရာမည
အရေးပေါ်ကယ်ဆယ်ရေးအဖွဲ့မှ ရေသယ်ယာဉ်(၁)စီး၊ မော်လမြိုင်လူမူကယ်ဆယ်ရေးအဖွဲ့မှ ရေသယ်ယာဉ်(၁)စီးနှင့် အေးမြကြည်လင်အရေးပေါ်ကယ်ဆယ်ရေးအဖွဲ့တို့မှ ဝိုင်းဝန်းမီးငြိမ်းသတ်ခဲ့ရတယ်လို့လည်း သိရပါတယ်။

ဓါတ်ပုံ - ဘိုဘိုဝင်းRescueအရေးပေါ်ကယ်ဆယ်ရေးအဖွဲ့ ။

ymg/kg
#Yangon_Media_Group

#LocalNews
Published - 25 Feb 2022

နိုင်ငံတစ်ဝှန်းလုံးရှိ နေအိမ်တွင်သီးသန့်ခွဲခြားနေထိုင်သော ကိုဗစ်-၁၉ ရောဂါပိုးတွေ့လူနာများ(Home Isolation) ကျန်းမာရေးပညာရှင်များကို တိုက်ရိုက်မေးမြန်းနိုင်မည့် ဖုန်းနံပါတ်များ ကျန်းမာရေးဝန်ကြီးဌာနက ကြေညာလိုက်ပါတယ်။

ကိုဗစ်အတည်ပြုလူနာများအနေနဲ့ ရောဂါနဲ့ပတ်သက်ပြီး တာဝန်ကျဆရာဝန်နဲ့ တိုက်ရိုက်ဆက်သွယ်မေးမြန်းတိုင်ပင်နိုင်ရေးအတွက် အထူးကုဆရာဝန်နဲ့ ဆေးပညာရှင်များပါရှိတဲ့အဖွဲ့(Teleconsultation Team)တွေကို ရန်ကုန်တိုင်းဒေသကြီးအတွင်းရှိ ခရိုင်တွေမှာ ဖွဲ့စည်းထားပါတယ်။

အဆိုပါပညာရှင်အဖွဲ့တွေထံ ဆက်သွယ်နိုင်မယ့် ဖုန်းနံပါတ်တွေကို ၂၄ နာရီ ပိတ်ရက်မရှိဆက်သွယ်နိုင်ကြောင်း ကျန်းမာရေးဝန်ကြီးဌာနမှ သတင်းထုတ်ပြန်ထားပါတယ်။

ရန်ကုန်တိုင်းဒေသကြီး ခရိုင် ၄ ခုအတွက် (Teleconsultation Team) ကို ပထမဦးဆုံး ဖွဲ့ခဲ့ပြီးနောက်ပိုင်းမှာ နေပြည်တော်နဲ့ မွန်ပြည်နယ်တို့မှာပါ Teleconsultation Team ကို ဆက်သွယ်နိုင်မယ့် ဖုန်းနံပါတ်တွေကို ထပ်မံ ကြေညာခဲ့ပါတယ်။

ymg/ei
#Yangon_Media_Group

Published 26 February 2022

အမေရိကန်အစိုးရ က ယူကရိန်းသမ္မတ ဗိုလိုဒီမီယာ ဇီလင်စကီးကို တိုးဝင်လာနေတဲ့ ရုရားတပ်တွေဖမ်းမိတာ ဒါမှမဟုတ်အသတ်ခံရမှာ ရှောင်ရှားပြီး  ကိဗ်ကနေထွက်ခွာဖို့အတွက် ကူညီပေးဖို့ အဆင်သင့်ပြင်ဆင်ထားတယ်လို့ အမေရိကန်နှင့် ယူကရိန်းအရာရှိတွေကို ကိုးကားပြီး ဝါရှင်တန်ပို့စ်သတင်းစာကြီးက သတင်းရေးသားလိုက်ပါတယ်။ ယခုအထိတော့ ယူကရိန်းသမ္မတက ထွက်ခွာဖို့ ငြင်းဆန်နေဆဲဖြစ်တယ်လို့လည်း သတင်းကဆိုပါတယ်။

“ ကျွန်တော်တို့ရရှိထားတဲ့သတင်းအချက်အလက်တွေအရ ရန်သူတွေဟာ ကျွန်တော့်ကို ပစ်မှတ်(၁)၊ကျွန်တော့်မိသားစုကို ပစ်မှတ်(၂)အဖြစ်သတ်မှတ်ထားတယ်လို့သိရပါတယ်”လို့ သမ္မတဇီလင်စကီးက နံနက်စောစော မိန့်ခွန်းမှာ ယူကရိန်းပြည်သူတွေကို ပြောကြားထားပါတယ်။ သူတို့ဟာ နိုင်ငံ့ခေါင်းဆောင်ကို ဖျက်ဆီးပစ်ပြီး ယူကရိန်းကို နိုင်ငံရေးအရ ဖျက်ဆီးလိုနေကြတယ်လို့လည်း သူကပြောပါတယ်။

ရက်သတ္တပတ်များစွာမှာ ဇီလင်စကီးဟာ အမေရိကန်အရာရှိတွေထံမှ ဒီသတင်းပေးချက်တွေရရှိနေခဲ့တာဖြစ်ပါတယ်။

စီအို်အေညွှန်ကြားရေးမှူး ဝီလီယံဂျေဘန်းစ်က ဇန်နဝါရီလတုန်းက ယူကရိန်းကို သွားခဲ့ပြီး ဇီလင်စကီးနှင့်တွေ့ဆုံခဲ့ကာ ရုရှားတွေ သူ့နိုင်ငံကိုခြိမ်းခြောက်မှုကြီးထွားလာနေတာကို ပြောခဲ့ပါတယ်။ အဲဒီအခါ ယူကရိန်းသမ္မတက သူနှင့်သူ့မိသားစုတွေ ပုဂ္ဂိုလ်ရေးအရ အန္တရာယ်ရှိနေသလားလို့ မေးခဲ့ပါတယ်လို့ ဇီလင်စကီးရဲ့ လက်ထောက်တစ်ဦးက ဝါရှင်တန်ပို့စ်ကိုပြောပါတယ်။ ရုရှားတွေက သူ့ကိုသတ်ဖို့ကြိုးစားနေတယ်ဆိုတဲ့အပေါ်မှာတော့ သူက အယုံအကြည်မရှိခဲ့ဘူးလို့လည်း အဆိုပါ လက်ထောက်ကပြောပါတယ်။

ဘန်းက အဲဒီတုန်းက တိကျတဲ့သတင်းအချက်အလက်တွေကိုတော့ မပေးခဲ့ဘဲ ဇီလင်စကီးအနေနှင့် ပုဂ္ဂိုလ်ရေးလုံခြုံမှုကို အရေးတကြီးလုပ်ဆောင်ဖို့လိုတယ်လို့ပဲ ပြောခဲ့တယ်လို့ သူကပြောပါတယ်။

အဲဒီအချက်အပေါ် စီအိုင်အေကို ဝါရှင်တန်ပို့စ်က မေးခဲ့ပေးမယ့် မှတ်ချက်ပေးဖို့စီအိုင်အေက  ငြင်းဆိုခဲ့ပါတယ်။

အမေရိကန်အရာရှိတွေဟာ ဇီလင်စကီးကို လုံခြုံရေးကိစ္စများစွာကို ပြောခဲ့ရာမှာ အဝေးရောက်ယူကရိန်းအစိုးရကိုဆက်ရှိနေဖို့ သမ္မတကို အလုံခြုံဆုံးနေရာကိုထားရှိပေးဖို့လည်းပါဝင်တယ်လို့ ဆိုကြောင်း ဝါရှင်တန်ပို့စ်ကို ကိုးကားပြီး RT သတင်းတစ်ရပ်မှာဖော်ပြထားပါတယ်။

Source:Washington Post/RT

#WorldPolitics
Published 26 February 2022

အခုဖြစ်ပျက်နေတဲ့ စစ်ရေးပဋိပက္ခတွေနဲ့ပတ်သက်ပြီး ရုရှားနှင့် အပစ်အခတ်ရပ်စဲရေး စတင်ညှိနှိုင်းသွားဖို့ ယူကရိန်းသမ္မတ'ဗိုလိုဒီမီယာဇဲလန်စကီ'အသင့်ရှိနေကြောင်း သူ့ရဲ့ပြောရေးဆိုခွင့်ရပုဂ္ဂိုလ်က ပြောကြားလိုက်ပါတယ်။

ဒါ့အပြင် ဆွေးနွေးပွဲကျင်းပသွားမယ့်နေရာနဲ့အချိန်ကို ညှိနှိုင်းဖို့ ယူကရိန်းဘက်က ရုရှားနဲ့ဆက်သွယ်ပြောဆိုနေကြောင်း အခိုင်အမာပြောကြားခဲ့ပါတယ်။

ညှိနှိုင်းချက်တွေဆွေးနွေးဖို့ ကနဦးသဘောတူပြီးတဲ့အချိန်မှာ ယူကရိန်းခေါင်းဆောင်ဘက်က အသံတိတ်နေခဲ့တယ်လို့ ရုရှားတို့က အကြောင်းကြားထားပါတယ်။

"ညှိနှိုင်းဖို့ပျက်ကွက်တယ်ဆိုတဲ့ စွပ်စွဲချက်ကို ကျွန်တော်တို့ချေပသွားမှာပါ" လို့ 'ဇဲလန်စကီ'ရဲ့ပြောရေးဆိုခွင့်ရှိသူ 'ဆာဂျီနိုက်ကီဖိုရော့ဗ်'က စနေနေ့က ဖေ့စ်ဘွတ်မှာရေးသားထားပါတယ်။

ရုရှားတို့နဲ့ဆွေးနွေးရာမှာ အစ္စရေးလ်ကို ကြားနေဖျန်ဖြေသူအဖြစ် ဆောင်ရွက်ပေးဖို့ 'ဇဲလန်စကီ'နဲ့ အစိုးရအဖွဲ့က တောင်းဆိုခဲ့ကြောင်းလည်း ယူကရိန်းဘက်ကအတည်ပြုထားပါတယ်။

ဒီအကြောင်းနဲ့ပတ်သက်ပြီး အစ္စရေးနိုင်ငံဆိုင်ရာ ယူကရိန်းသံအမတ်'ယက်ဗ်ဟန်ကော်ညီချက်'က New York Times သတင်းဌာနကိုပြောကြားရာမှာ အစ္စရေးလ်က တုန့်ပြန်ဖြေကြားခြင်းမရှိသေးကြောင်း၊ မကူညီဘူးလို့ ဆိုလိုတာမဟုတ်ကြောင်း၊ ဒီပွဲမှာ သူတို့ကဘယ်နေရာက ပါဝင်ရမလဲဆိုတာကို မှန်းဆနေတာဖြစ်နိုင်ကြောင်း၊ ယူကရိန်းရော ရုရှားနဲ့ပါ ဆက်ဆံရေးအဆင်ပြေတဲ့ တစ်ခုတည်းသောဒီမိုကရက်တစ်နိုင်ငံက အစ္စရေးလ်သာဖြစ်တယ်လို့ ယုံကြည်ထားကြောင်း ရှင်းပြသွားပါတယ်။

ဒီမတိုင်ခင်နေ့တုန်းက သောကြာနေ့မှာ ဆွေးနွေးညှိနှိုူင်းဖို့ကိစ္စကို ယူကရိန်းဘက်က ငြင်းဆိုလိုက်ကြောင်း၊ ဆွေးနွေးဖို့ကိစ္စကို စနေနေ့ရောက်တဲ့အထိရွှေ့ဆိုင်းဖို့ ယူကရိန်းကအကြံပြုခဲ့ကြောင်း ရုရှားနိုင်ငံခြားဝန်ကြီးဌာနမှ ပြောရေးဆိုခွင့်ရှိသူ'မာရီယာဇာခါရိုဗာ'က ပြောဆိုခဲ့ပါတယ်။

ရုရှားတို့က ဆွေးနွေးပွဲပြုလုပ်မယ့်နေရာကို ဘီလာရုစ်မြို့တော်မင့်စ်က်မှာပြုလုပ်ဖို့ အကြံပြုခဲ့ပေမယ့် 'ဇဲလန်စကီ'က ပိုလန်မြို့တော်ဝါဆောမှာ ပြုလုပ်ဖို့ပြောခဲ့ပြီးနောက် အသံတိတ်နေခဲ့တယ်လို့ ရုရှားစစ်အစိုးရအဖွဲ့မှပြောရေးဆိုခွင့်ရှိသူ 'ဒီမစ်ထရီပက်စ်ကော့ဗ်'က သောကြာနေ့အစောပိုင်းက ဆိုပါတယ်။

ယူကရိန်းတို့ရဲ့ အမျိုးသားရေးဝါဒကိုလည်းစွပ်စွဲလိုက်ကာ လူနေအရပ်တွေမှာ ဒုံးကျည်လက်နက်တွေတပ်ဆင်ထားခြင်းက အရပ်သားထိခိုက်မှုတွေရှိလာနိုင်တယ်လို့ သတိပေးခဲ့ပါတယ်။

သောကြာနေ့အစောပိုင်းက ယူကရိန်းသမ္မတ နိုင်ငံတော်မိန့်ခွန်းပြောကြားရာမှာ ယူကရိန်းတို့ကြားနေရေးကိစ္စနဲ့ပတ်သက်ပြီး ရုရှားနဲ့တွေ့ဆုံဆွေးနွေးဖို့ ကြောက်ရွံ့နေမှာမဟုတ်ကြောင်း၊ သို့ပေမယ့် ပြင်ပအဖွဲ့အစည်းတစ်ခုမှ လုံခြုံရေးအာမခံချက်အလိုရှိကြောင်း၊ နေတိုး(NATO)တပ်ဖွဲ့တွေနဲ့ ဥရောပခေါင်းဆောင်တွေကလည်း ယူကရိန်းကိုစွန့်ခွာသွားကြပြီး တစ်ယောက်တည်းခုခံနေရကြောင်း ပြောကြားသွားပါတယ်။

ယူကရိန်းအုပ်ချုပ်မှုအောက်မှခွဲထွက်လာပြီး လွတ်လပ်တဲ့နယ်မြေများအဖြစ် အသိအမှတ်ပြုခြင်းခံထားရတဲ့ ဒိုနက်စ်ပြည်သူ့သမ္မတနိုင်ငံနဲ့ လူဟန့်စ်ပြည်သူ့သမ္မတနိုင်ငံတို့က ရုရှားသမ္မတ'ပူတင်'ထံ စစ်ရေးအကူအညီတောင်းခံခဲ့ပါတယ်။

ယူကရိန်းရဲ့ စစ်တပ်အင်အားကိုဖြိုခွင်းပြီး ရန်လိုတိုက်ခိုက်မှုတွေကနေ ပြည်သူတွေကိုကာကွယ်ပေးရန် အကြောင်းပြချက်နဲ့ ကြာသပတေးနေ့နံနက်အစောပိုင်းမှာ ရုရှားတို့က ဒွန်ဘက်စ်ဒေသသို့ အထူးစစ်ဆင်ရေးဆောင်ရွက်ချက်ဖြင့် ကျူးကျော်တိုက်ခိုက်လာပါတယ်။

စစ်ဆင်ရေးပစ်မှတ်အတိအကျအတိုင်း ယူကရိန်းနိုင်ငံရှိ စစ်ရေးအချက်အခြာနေရာတွေကို ဖြိုခွင်းခဲ့ပြီးနောက် ရုရှားတပ်တွေက အဓိကမြို့ကြီးများသို့ ဆက်လက်ချီတက်လာခဲ့ကာ မြို့တော်ကိဗ်နဲ့ နီးစပ်လာနေပြီဖြစ်ပါတယ်။

ဒီကျူးကျော်မှုကိုတုန့်ပြန်တဲ့အနေနဲ့ အနောက်နိုင်ငံတွေက ရုရှားစီးပွားရေးအဖွဲ့အစည်းတွေ၊ အကြီးတန်းအရာရှိတွေ၊ ဥပဒေလွှတ်တော်အမတ်တွေ၊ မီဒီယာအဖွဲ့အစည်းတွေကိုပစ်မှတ်ထားကာ ပြင်းထန်တဲ့ပိတ်ဆို့မှုတွေ ဆက်တိုက်ချမှတ်ခဲ့တဲ့အပြင် ရုရှားသမ္မတ'ပူတင်'နဲ့ နိုင်ငံခြားရေးဝန်ကြီး'ဆာဂျီလက်ဗ်ရော့ဗ်'တို့ကိုလည်း ဒဏ်ခတ်ပိတ်ဆိုမှုတွေပြုလုပ်ခဲ့ပါတယ်။

Source: RT
#Yangon_Media_Group

#WorldHealth
Published - 26 February 2022

အိုမီခရွန်မျိုးဗီဇကွဲဗိုင်းရပ်စ် အများဆုံးကူးစက်ခံနေရတဲ့နိုင်ငံတွေထဲက တစ်နိုင်ငံဖြစ်တဲ့ဒိန်းမတ်နိုင်ငံရှိလူအချို့မှာ အဆိုပါမျိုးဗီဇကွဲနှစ်ခါပြန်ကူးစက်နေတာကို ရှားရှားပါးပါးမြင်တွေ့နေရကြောင်း လေ့လာချက်တစ်ခုမှာဖော်ပြထားပါတယ်။

ကိုရိုနာဗိုင်းရပ်စ်တွေ့ရှိခဲ့တဲ့လူပေါင်း ၁.၈ သန်းကို စမ်းသပ်စစ်ဆေးခဲ့ရာမှာ ၄၇ ဦးက ရက်ပေါင်း ၂၀ မှ ၆၀ ရက်ခြားပြီး အိုမီခရွန်မျိုးဗီဇကွဲ BA.1 နဲ့ သူ့ရဲ့မျိုးနွယ်ခွဲ BA.2 နှစ်မျိုးစလုံးကူးစက်ခံခဲ့ရတာကို တွေ့ရှိခဲ့ကြောင်း ဒိန်းမတ်ကူးစက်ရောဂါတက္ကသိုလ်မှ အင်္ဂါနေ့က ပြောကြားလိုက်ပါတယ်။

မျိုးဗီဇကွဲနှစ်မျိုးစလုံးကူးစက်ခံခဲ့ရတဲ့သူတွေဟာ ငယ်ရွယ်ပြီး ကိုဗစ်ကာကွယ်ဆေးမထိုးရသေးတဲ့လူတွေဖြစ်ကာ ရောဂါအပျော့စားမျှသာ ခံစားခဲ့ရတာဖြစ်ပါတယ်။အခြားလူ ၂၀ ဦးကတော့ အိုမီခရွန်မျိုးဗီဇကွဲတစ်မျိုးတည်းကိုပဲ နှစ်ခါပြန်ကူးစက်ခံခဲ့ရပါတယ်။

အိုမီခရွန်ရဲ့ BA.2 မျိုးနွယ်ခွဲ ကူးစက်မှုအများဆုံးဖြစ်ခဲ့တဲ့နှစ်စပိုင်းတုန်းက လူဦးရေ ၅.၈ သန်းရှိတဲ့ဒိန်းမတ်နိုင်ငံမှာ လူပေါင်း ၂.၆ သန်းကူးစက်မှုဖြစ်ပွားခဲ့ပါတယ်။နိုင်ငံအတွင်း ကိုဗစ်ကန့်သတ်ပိတ်ပင်ချက်တွေကို ဖြေလျှော့လိုက်ပြီဖြစ်ပြီး ကိုဗစ်ရောဂါက လူမှုနေထိုင်မှုမှာ အနှောင့်အယှက်မဖြစ်စေတော့ဘူးလို့ ဖေဖော်ဝါရီ ၁ ရက်နေ့မှာ ကြေညာခဲ့ပါတယ်။
Source: Bloomberg 

#Sport
Published - 26 Feb 2022

ONE FULL CIRCLE ပြိုင်ပွဲမှာအောင်လအန်ဆန်းနှင့် ရုရှားနိုင်ငံသား ဗစ်တာလီဗစ်ဒက်ရှ်တို့ မနေ့ညနေပိုင်းမှာ စင်ကာပူနိုင်ငံ၌ ယှဉ်ပြိုင်ထိုးသတ်ခဲ့ရာ ငါးမိနစ်သုံးချီအပြည့်ထိုးသတ်ခဲ့ပြီးနောက် အဆုံးအဖြတ်အရ ဗစ်ဒက်ရှ်ကအနိုင်ရရှိသွားခဲ့ပါတယ်။

အဆိုပါပွဲရှုံးနိမ့်မှုနဲ့ပတ်သတ်ပြီး အောင်လအန်ဆန်းက"ချစ်ရပါသော မြန်မာ ပရိသတ်များ ခင်ဗျာ ဒီနေ့ပွဲအတွက် ကျွန်တော်အကောင်းဆုံး ပြင်ဆင် ကြိုးစားခဲ့ပါတယ်။ သို့ပေမယ့် ကျွန်တော် ကြိုးစားခဲ့သလို မဖြစ်ခဲ့တဲ့ အတွက် ပရိသတ်များကို စိတ်မကောင်းဖြစ်စေခဲ့တဲ့ အတွက် များစွာ စိတ်မကောင်းဖြစ်ရပါတယ်။ နောက် များ အတွက် ကျွန်တော် အကောင်းဆုံးကြိုးစား ပြင်ဆင်သွားပါမယ်လို့ ဂတိပေးရင်း ချစ်တဲ့ မြန်မာပြည်ကြီးနဲ့ ပြည်သူပြည်သားများအတွက် အမြဲဆုတောင်းပေးလျက်ပါခင်ဗျာ ။"လို့ လူမှုကွန်ယက်မှာရေးသားခဲ့ပါတယ်

မနေ့ကပွဲစဉ်ဟာ ပရိတ်သတ်တွေအပြန်အလှန်ထိုးသတ်မယ်လို့ခန့်မှန်းထားသော်လည်း ပြိုင်ပွဲပုံစံက ထင်သလိုဖြစ်မလာပဲရုရှားနိုင်ငံသားအနေနဲ့ အောင်လအန်ဆန်းကို အရင်တွေ့ဆုံခဲ့တဲ့ပွဲတွေကို ရင်ဆိုင်ထိုးသတ်တာတွေမလုပ်တော့ပဲ သုံးချီလုံးချုပ်ကွက်ရရေးကိုသာကြိုးပမ်းခဲ့ကာ ဗစ်ဒက်ရှက်က အနိုင်ယူခဲ့ပါတယ်။

ပွဲကိုတော့ One Championship က စီစဉ်တာဖြစ်ပြီး စင်ကာပူ နိုင်ငံမှာ ပြုလုပ်ခြင်းဖြစ်ကာ ၎င်းတို့ပွဲစဉ်အပါအဝင် တွဲဆိုင်း ၁၂ ဆိုင်း ပါဝင်ကာ ပွဲစဉ်တွေမှာ ကမ္ဘာ့ချန်ပီယံလုပွဲ ၂ ပွဲ ပါဝင်ပြီး မစ်ဒယ်ဝိတ်တန်း ကမ္ဘာ့ချန်ပီယံလုပွဲမှာ လက်ရှိချန်ပီယံ နယ်သာလန်နိုင်ငံသား ဒီရစ်ဒါနှင့် စိန်ခေါ်သူ ကာဂျစ္စတန် နိုင်ငံသား အဘာဆော့ဗ်တို့ ထိုးသတ်ကာ ဒီရစ်တာကပဲဟအနိုင်ယူကာ ချန်ပီယံခါးပတ်ကိုကာကွယ်နိုင်ခဲ့ပါတယ်။

ymg/hm

#Yangon_Media_Group

#WorldHealth
Published - 26 February 2022

ဥရောပမှဆေးဝါးထုတ်လုပ်ရေးကုမ္ပဏီတွေဖြစ်တဲ့ Sanofi နဲ့ GSK ကုမ္ပဏီတို့ စမ်းသပ်ထုတ်လုပ်နေတဲ့ ဗစ်ပရက်ဗ်တင်(Vidprevtyn) ကိုဗစ်ကာကွယ်ဆေးအသစ်ဟာ နောက်ပိုင်းအဆင့်လက်တွေ့စမ်းသပ်ချက်များအရ ကိုဗစ်ရောဂါပြင်းထန်စွာခံစားရခြင်းကို ထိထိရောက်ရောက်ကာကွယ်နိုင်မှာဖြစ်ကြောင်း ကြေညာလိုက်ပါတယ်။

အဆိုပါကုမ္ပဏီတွေက သူတို့ ရဲ့ကာကွယ်ဆေးအသစ်ကို အမေရိကန်နဲ့ ဥရောပတို့ မှာထိုးနှံခွင့်ရရှိရန် အာဏာပိုင်များထံမှခွင့်ပြုချက်တောင်းခံသွားဖို့ စီစဉ်နေကြပါတယ်။ဗစ်ပရက်ဗ်တင်ဟာ ပရိုတိန်းအခြေပြုကာကွယ်ဆေးဖြစ်ကာ ခန္ဓာကိုယ်ခုခံအားစနစ်ကနေ SARS-CoV-2 ဗိုင်းရပ်စ်ကိုတိုက်ထုတ်ဖို့ ပရိုတိန်းအစိတ်အပိုင်းလေးတွေ အသုံးပြုထားတာဖြစ်ပါတယ်။

mRNA နဲ့ adenovirus vector ကာကွယ်ဆေးတွေထက် ပိုမိုရိုးရှင်းတဲ့ကာကွယ်ဆေးအမျိုးအစားဖြစ်ပါတယ်။
ဒီကာကွယ်ဆေးတွေကို သာမန်ရေခဲသေတ္တာအပူချိန်မှာ ထိန်းသိမ်းထားနိုင်တာကြောင့် အချို့အခက်အခဲရှိတဲ့နေရာတွေအတွက် ပိုမိုလွယ်ကူစေမှာဖြစ်ပါတယ်။

ပိုမိုရိုးရှင်းတဲ့နည်းပညာကို အသုံးပြုထားတာဖြစ်တဲ့အတွက် အခြားကိုဗစ်ကာကွယ်ဆေးနဲ့အဆင်မပြေတဲ့သူတွေအနေနဲ့ ဒီကာကွယ်ဆေးအမျိုးအစားကို ရွေးချယ်နိုင်မှာဖြစ်ပါတယ်။

ဗစ်ပရက်ဗ်တင်ကာကွယ်ဆေးနှစ်ကြိမ်ကို ၃ ပတ်ခြားပြီးထိုးနှံရမှာဖြစ်ပါတယ်။
တတိယအဆင့်စမ်းသပ်မှုအတွက် အမေရိကန်၊ အာရှ၊ အာဖရိက၊ လက်တင်အမေရိကတို့ မှ လူပေါင်း ၁ သောင်းကျော်စာရင်းသွင်းခဲ့ပါတယ်။ဒါ့အပြင် တတိယအကြိမ်ထိုးနှံမှုအဖြစ် အားမြှင့်ကာကွယ်ဆေး(booster)စမ်းသပ်ဖို့ကိုလည်း ဆန်းစစ်လေ့လာနေပြီ ဖြစ်ပါတယ်။

SARS-CoV-2 ဗိုင်းရပ်စ်ကိုခုခံနိုင်မယ့် ပဋိပစ္စည်း(antibody)မရှိသေးတဲ့ လူတွေကို ဗစ်ပရက်ဗ်တင်ကာကွယ်ဆေး နှစ်ကြိမ်ထိုးနှံခဲ့ပြီးနောက် လေ့လာခဲ့ကြရာမှာ ကိုဗစ်ရောဂါလက္ခဏာဖြစ်ပေါ်မှုကို ၅၈ ရာခိုင်နှုန်း၊ ကိုဗစ်ရောဂါအလယ်အလတ်မှ ပြင်းထန်အဆင့်အထိဖြစ်ပွားနိုင်ချေကို ၇၅ ရာခိုင်နှုန်း၊ ဆေးရုံတက်ကုသခံယူရနိုင်ချေကို ၁၀၀ ရာခိုင်နှုန်း အသီးသီးကာကွယ်နိုင်ကြောင်း တွေ့ရှိရပါတယ်။

"စမ်းသပ်မှုအချက်အလက်တွေက အားရစရာကောင်းပါတယ်။ မျိုးဗီဇကွဲများစွာပေါ်ပေါက်နေတဲ့ကာလအတွင်း အခြားဘယ်ကာကွယ်ဆေးကမှ ကမ္ဘာ့အတိုင်းအတာနဲ့ တတိယအဆင့်စမ်းသပ်မှုကို မလုပ်နိုင်ခဲ့ပါဘူး။ အခုရရှိထားတဲ့ကာကွယ်နိုင်စွမ်းတွေက အသိအမှတ်ပြုလက်မှတ်ရရှိထားတဲ့ကာကွယ်ဆေးတွေနဲ့ ဆင်တူနေပါတယ်" လို့ Sanofi မှ အမှုဆောင်ဒုဥက္ကဌ'သောမတ်စ်ထရီယမ့်'က ပြောကြားလိုက်ပါတယ်။

ဗစ်ပရက်ဗ်တင်ကာကွယ်ဆေးတစ်မျိုးတည်းနဲ့လည်း ထိရောက်စွာကာကွယ်နိုင်သလို ဖိုင်ဇာ၊ မိုဒါနာ၊ အက်စ်ထရာဇန်နီကာ၊ ဂျွန်ဆန်အန်ဂျွန်ဆန် ကာကွယ်ဆေးထိုးထားတဲ့သူတွေမှာလည်း ဗစ်ပရက်ဗ်တင်ကို အားမြှင့်ကာကွယ်ဆေးအဖြစ်အသုံးပြုပါက ပဋိပစ္စည်းခုခံနိုင်စွမ်း ၁၈ ဆ မှ အဆ ၃၀ အထိမြင့်တက်လာကြောင်း ဖော်ပြထားပါတယ်။
ဗစ်ပရက်ဗ်တင်ကာကွယ်ဆေးပေါင်း သန်း ၁၀၀ ကိုထုတ်လုပ်ထားပြီးဖြစ်ပြီး နောက်ထပ်ဆေးပေါင်းသန်း ၄၀၀ အထိထုတ်လုပ်သွားဖို့ ရည်ရွယ်နေကြပါတယ်။
Source: CNN 

Published 25 February 2022

တရုတ်သမ္မတ ရှီကျင့်ဖျင်နှင့် ရုရှားသမ္မတဗလက်ဒီမီယာပူတင်တို့ဟာ ယူကရိန်းအကျပ်အတည်းနှင့်ပတ်သက်လို့ ဖေဖော်ဝါရီ(၂၅)ရက် သောကြာနေ့မွန်းလွဲပိုင်းမှာ တယ်လီဖုန်းဆက်သွယ်ပြောဆိုခဲ့ကြပါတယ်။

ရုရှားရဲ့သမ္မတပူတင်က အမေရိကန်နှင့်နေတိုးအဖွဲ့ဟာ ရုရှားရဲ့ တရားဝင် လုံခြုံရေးရာစိတ်ပူပန်မှုကိုမျက်ကွက်ပြုပြီး ရုရှားရဲ့ မဟာဗျူဟာမျဉ်းနီကို စိန်ခေါ်ခဲ့တယ်လို့ပြောလိုက်ပြီး ယူကရိန်းနှင့်အဆင့်မြင့်အပိုင်းဆွေးနွေးဖို့ဆန္ဒရှိတယ်လို့ပြောပါတယ်။ တရုတ်သမ္မတရှီကလည်း ရုရှားရဲ့ စေ့စပ်ဆွေးနွေးမှုက တစ်ဆင့်ဖြေရှင်းမယ်ဆိုတာကို ထောက်ခံတယ်လို့ပြန်လည်ဆွေးနွေးခဲ့ပါတယ်။

Source CMG

Published 25 February 2022

ရုရှားကျူးကျော်တိုက်ခိုက်မှုအပေါ်  ဥရောပသမဂ္ဂ၏ တုန့်ပြန်မှုဟာ သိပ်ပြီးနှေးကွေးလွန်းတယ်လို့ ယူကရိန်းသမ္မတ ဗိုလိုဒီမီယာဇီလင်စကီး က ဖေဖော်ဝါရီ ၂၅ရက်က ဝေဖန်ပြောကြားလိုက်ပါတယ်။ လက်စားချေတုန့်ပြန်မယ့်အစီအစဉ်တွေဟာ အဆင်သင့်ရှိနေရမယ်လို့သူကတောင်းဆိုလိုက်ပါတယ်။

Source AFP