အခြားသီးနှံတွေ ဈေးအပြောင်းလဲဖြစ်နေပေမယ့် ကြက်သွန်နီဈေးကွက်မှာတော့ တစ်ပိသာကို ကျပ် ၂၀၀၀ဝန်းကျင် မှာပဲ ဈေးတည်ငြိမ်နေတယ်လို့ ကြက်သွန်ပွဲရုံတွေထံက သိရပါတယ်။
Yangon_Times/LW
#Local_News
#Published_ 14 June 2024
#YMG #Yangon_Times #Yangon_Media_Group

ကျိုက်ထီးရိုး‌ ‌‌တောင်တက်ကားလမ်းမှာ မြေသားကျဆင်းမှုသာရှိတဲ့အတွက် ၂နာရီ ၃နာရီလောက်အတွင်း ဖယ်ရှားရှင်းလင်းနိုင်ခဲ့လို့ အခုချိန်မှာ ကျိုက်ထီးရိုးတောင်တက်ကားလမ်းပြန်ပွင့်သွားပြီး ကားတွေသွားလာနိုင်ပြီ။
Yangon_Times/tthl
#Local_News
#Published_ 14 June 2024
#YMG #Yangon_Times #Yangon_Media_Group

Published 14 June 2024

အိန္ဒိယမှ နာမည်ကျော် မဆလာဟင်းခတ်အမွှေးအကြိုင် အမှတ်တံဆိပ်များဖြစ်တဲ့ MDH နဲ့ ဧဝရတ်(Everest)တို့ရဲ့ ထုတ်ကုန်အချို့ကို စမ်းသပ်ပြီးနောက် စားသုံးရန် ဘေးကင်းစိတ်ချရမှု မရှိဘူးလို့ အိန္ဒိယပြည်နယ် ရာဂျက်စ်ထန်က ဖက်ဒရယ်အစိုးရထံ အသိပေးစာစောင် ပေးပို့ခဲ့ပါတယ်။

ထိုပစ္စည်းတွေဟာ ကျန်းမာရေးအတွက် သန့်ရှင်းမှုမရှိဘူးလို့ စွပ်စွဲချက်တွေ ထွက်ပေါ်ခဲ့ပြီးနောက် ပြည်တွင်းမှာရော ပြည်ပမှာပါ စစ်ဆေးစိစစ်မှုတွေ ပြုလုပ်ခဲ့တာ ဖြစ်ပါတယ်။

ဧပြီလတုန်းက ဟောင်ကောင်မှာ MDH ကထုတ်လုပ်တဲ့ ဟင်းခတ်မှုန့် ၃ မျိုးနဲ့ ဧဝရတ်ကထုတ်တဲ့ ဟင်းခတ်မှုန့် ၁ မျိုးတို့ဟာ ကင်ဆာဖြစ်စေနိုင်တဲ့ ပေါင်းသတ်ဆေး အီသိုင်လင်းအောက်ဆိုဒ် မြင့်မားစွာ ပါဝင်ကြောင်း ထုတ်ဖော်ခဲ့ကာ ရောင်းချခြင်းကို ရပ်ဆိုင်းခဲ့ပြီးနောက်မှာတော့ အိန္ဒိယနဲ့ အခြားဈေးကွက်တွေမှာလည်း သက်ဆိုင်ရာ ကွပ်ကဲရေးအဖွဲ့တွေက စစ်ဆေးလာကြပါတယ်။

စင်္ကာပူမှာလည်း ဧဝရတ်ဟင်းခတ်မှုန့်အရော တစ်မျိုးကို ပြန်သိမ်းဖို့ ညွှန်ကြားခဲ့ကာ နယူးဇီလန်၊ အမေရိကန်၊ ဩစတြေးလျတို့ကလည်း ဒီကိစ္စကို လေ့လာစစ်ဆေးနေပါတယ်။

ဗြိတိန်ကတော့ အိန္ဒိယမှဝင်လာတဲ့ ဟင်းခတ်အမွှေးအကြိုင်အားလုံးကို ဆင့်ကဲထိန်းချုပ်မှုများ ချမှတ်လာပါတယ်။
အိန္ဒိယဟာဆိုရင် ကမ္ဘာပေါ်မှာ ဟင်းခတ်အမွှေးအကြိုင်နဲ့ ပတ်သက်ပြီး တင်ပို့မှု၊ ထုတ်လုပ်မှု၊ သုံးစွဲမှုတို့မှာ အများဆုံးနိုင်ငံ ဖြစ်ပါတယ်။

ရာဂျက်စ်ထန်ပြည်နယ်က ဟင်းခတ်မှုန့် အမျိုးအစားပေါင်းများစွာကို စစ်ဆေးခဲ့ရာ ဧဝရတ်ရဲ့ ထုတ်ကုန်တစ်မျိုးနဲ့ MDH မှ ၂ မျိုးတို့ဟာ စိတ်ချရခြင်း မရှိဘူးလို့ တွေ့ရှိခဲ့ကြောင်း အကြီးတန်း ကျန်းမာရေးမှူး ရှုဘရာဆင်းက အိန္ဒိယအစားအစာ ဘေးကင်းရေးနှင့် စံချိန်စံညွှန်းအာဏာပိုင်(FSSAI)သို့ သီးသန့်စာ ပေးပို့ခဲ့ပါတယ်။

MDH နဲ့ ဧဝရတ်တို့က အိန္ဒိယမှ အကျော်ကြားဆုံး ဟင်းခတ်မှုန့်တံဆိပ်တွေထဲမှာ ပါဝင်ပြီး ဥရောပ၊ အာရှ၊ မြောက်အမေရိကတို့မှာလည်း ရောင်းချနေရကာ ယင်းတို့ရဲ့ ထုတ်ကုန်တွေက စားသုံးရန် စိတ်ချရတယ်လို့ ဆိုထားပါတယ်။

အစိုးရရဲ့ တွေ့ရှိချက်နဲ့ ပတ်သက်ပြီး ဧဝရတ်က အီးမေးလ်ဖြင့် ဖြေကြားရာမှာ ထုတ်လုပ်ထုပ်ပိုးမှု လုပ်ငန်းစဥ်များအတွင်း ပေါင်းသတ်ဆေး ထည့်သွင်းခြင်းမရှိဘူးလို့ ဆိုပါတယ်။

ရာဂျက်စ်ထန်ပြည်နယ် အာဏာပိုင်များက ထုတ်ကုန်ဘေးကင်းမှု မရှိဘူးဆိုတဲ့ စွပ်စွဲချက်များဖြင့် ၁၂၀၀၀ ကီလိုဂရမ်ရှိတဲ့ ဟင်းခတ်အမွှေးအကြိုင် အမျိုးမျိုးကို သိမ်းဆည်းခဲ့တယ်လို့ ပြီးခဲ့တဲ့ သီတင်းပတ်က ထုတ်ပြန်ခဲ့ပါတယ်။

အိန္ဒိယရဲ့ ပြည်တွင်းဟင်းခတ်မှုန့် ဈေးကွက်က ၂၀၂၂ မှာ ဒေါ်လာ ၁၀.၄၄ ဘီလီယံ ရှိခဲ့ပါတယ်။
Source: Reuters
#World_News
#Published_ 14 June 2024
#YMG #Yangon_Times #Yangon_Media_Group

Published- 14 June 2024

အာဇာနည်နေ့ ကျင်းပရန်အာဇာနည်ဗိမာန်နှင့်  ဗိုလ်ချုပ်အောင်ဆန်းပြတိုက် ကြိုတင်ပြင်ဆင်မှုများပြုလုပ်နေကြောင်း ရန်ကုန်မြို့တော်စည်ပင်သာယာရေးကော်မတီမှသိရသည်။

(၇၇) နှစ်မြောက် အာဇာနည်နေ့အခမ်းအနား ကျင်းပမည့် ဗဟန်းမြို့နယ်၊ အာဇာနည် ဗိမာန်နှင့် ဗိုလ်ချုပ်ပြတိုက်အားကြိုတင် ပြင်ဆင်နေခြင်းဖြစ်သည်။

ထိုသို့ဆောင်ရွက်ရာတွင် အာဇာနည် ပုဂ္ဂိုလ်ကြီးများကို လာရောက်ဂါရဝပြုကြမည့် ပြည်သူများ ဝင်ထွက် သွားလာမည့် ရွှေတိဂုံစေတီတော် မြောက်ဘက်မုခ်နှင့် M-3 ရှေ့ ဂိတ်တွင် ပြင်ဆင်နေမှုများနှင့် အာဇာနည်ဗိမာန်ပေါ်နှင့် အာဇာနည် ကုန်းအတွင်းရှိ ပတ်ဝန်းကျင် သန့်ရှင်းသပ်ရပ်မှုရှိရေး ပြင်ဆင် ဆောင်ရွက်နေကြောင်းသိရသည်။

ထို့အပြင်  အရေးကြီးပုဂ္ဂိုလ်များ နားနေခန်း ပြင်ဆင်နေမှု၊ မိသားစုတွေ့ဆုံခန်းမတွင် ဗိုလ်ချုပ်အောင်ဆန်းနှင့်တကွ အာဇာနည် ပုဂ္ဂိုလ်ကြီးများ၏ မိသားစုဝင်များကို နိုင်ငံတော်အကြီးအကဲ တွေ့ဆုံမည့်နေရာ ကြိုတင်ပြင်ဆင်နေမှုများနှင့် ပတ်ဝန်းကျင်သန့်ရှင်း သပ်ရပ်မှုရှိရေး ပြင်ဆင်ဆောင်ရွက်နေကြောင်းသိရသည်။

၎င်းအပြင်  ဗဟန်း မြို့နယ်၊ ဗိုလ်ချုပ်အောင်ဆန်း နေအိမ်ပြတိုက်တွင် ဗိုလ်ချုပ် နောက်ဆုံးစီးခဲ့သည့် မော်တော်ကားပြသထားရှိမှု၊ ပြတိုက်ပတ်လမ်း တစ်လျှောက် သန့်ရှင်းသပ်ရပ်မှုရှိရေးဆောင်ရွက်နေမှုများ၊ အပေါ်ထပ် ပြတိုက်အတွင်း ငယ်ဘဝမှ၊ တပ်မတော်ခေါင်းဆောင်၊ နိုင်ငံ့ ခေါင်းဆောင်ဘဝအထိ ပြသထားရှိမှု၊ အပေါ်ထပ်ရှိ အိပ်ခန်း၊ စာဖတ်ခန်း၊ မိသားစု အမှတ်တရဓာတ်ပုံများ၊ ကလေးများ အိပ်ခန်းနှင့် ပြတိုက်အတွင်း ပြသထားရှိမှုများကို  ပြင်ဆင်ဆောင်ရွက်နေ ကြောင်း သိရသည် ။
Yangon_Times/NN
#Local_News
#Published_ 14 June 2024
#YMG #Yangon_Times #Yangon_Media_Group

Published_ 14 June 2024

ဒူဘိုင်းတွင်အခက်အခဲကြုံတွေ့နေရသည့် မြန်မာအမျိုးသမီးတစ်ဦးကိုမြန်မာကောင်စစ်ဝန်ချုပ်ရုံးအနေဖြင့် မြန်မာနိုင်ငံသို့ ပြန်လည်ခေါ်ဆောင်ပေးနိုင်ခဲ့ကြောင်းသိရသည်။

ည(၂)နာရီမှ အိပ်ရပြီး မနက်(၅)နာရီထရ၍အိပ်ရေးမဝသည့်ဒဏ်ကြောင့် ကျန်းမာရေးအခြေအနေမကောင်းဘဲအလုပ်လုပ်ရတာအဆင်မပြေသဖြင့် မြန်မာနိုင်ငံသို့ ပြန်လာနိုင်ရန်ကြိုးပမ်းခဲ့ခြင်းဖြစ်သည်ဟုဆိုသည်။

ယူအေးအီးနိုင်ငံ၊ဒူဘိုင်းတွင် အခက်အခဲကြုံတွေ့နေရသည့် မြန်မာနိုင်ငံသူ မသက်သက်လင်းအား အမိနိုင်ငံသို့ အမြန်ဆုံးပြန်လည်ပို့ဆောင်နိုင်ရန် မြန်မာကောင်စစ်ဝန်ချုပ်ရုံးအနေဖြင့် ယူအေအီးနိုင်ငံ၊ ပြည်ထဲရေးဝန်ကြီးဌာန၊ သက်ဆိုင်ရာပြည်နယ်ရဲတပ်ဖွဲ့နှင့် လူ့စွမ်းအားအရင်းအမြစ်နှင့် နိုင်ငံသားအကျိုးစီးပွားမြှင့်တင်ရေး ဝန်ကြီးဌာနတို့မှ အာဏာပိုင်များနှင့်ညှိနှိုင်း၍ ပြန်လည်ခေါ်ဆောင်နိုင်ခဲ့ရာ မြန်မာနိုင်ငံသူ မသက်သက်လင်းသည် ဇွန်လ ၁၂ ရက်က ဆော်ဒီအာရေဗျနိုင်ငံ ဒူဘိုင်းမြို့မှ ဒေသစံတော်ချိန် မွန်းလွဲ ၂ နာရီတွင် လေကြောင်းခရီးစဉ်ဖြင့် ထွက်ခွာခဲ့ပြီး ရန်ကုန်မြို့သို့ ယမန်နေ့ည ၁၀ နာရီ ၁၅ မိနစ်တွင် ပြန်လည်ရောက်ရှိခဲ့သည်။

မြန်မာနိုင်ငံသူ မသက်သက်လင်းသည် အာရပ်စော်ဘွားများ ပြည်ထောင်စု၊ အဘူဒါဘီမြို့တွင် အလုပ်လုပ်ကိုင်စဉ် ကျန်းမာရေးအခြေအနေကြောင့် မြန်မာနိုင်ငံသို့ ပြန်လိုကြောင်း အေဂျင်စီရုံးသို့ ပြောကြားရာ အိမ်ရှင်က နိုင်ငံကူးလက်မှတ်ကုန်ကျစရိတ်၊ လေယာဉ်လက်မှတ်ခ၊ ယူအေအီးနိုင်ငံသို့ ရောက်ရှိချိန်သွားလာစရိတ်၊ အလုပ်မရမီစားသောက်စရိတ်များ ပါဝင်သည့် ယူအေအီးဒါဟမ်း ၂၃၀၀၀ (အမေရိကန်ဒေါ်လာ ၆၅၀၀) အကုန်အကျခံပြီး အေဂျင်စီရုံး၌ ပေးချေခေါ်ယူခဲ့ရခြင်းဖြစ်၍ ထိုငွေကို အိမ်ရှင်ထံပေးချေပြီးမှသာ ပြန်ခွင့်ပြုနိုင်မည်ဖြစ်ကြောင်း၊ 

မြန်မာနိုင်ငံမှပို့ဆောင်ခဲ့သော မြန်မာအေးဂျင့်ကို အသိပေးရာတွင်လည်း ဆောင်ရွက်ပေးနိုင်မှုမရှိခဲ့ကြောင်းသိရပြီး မြန်မာကောင်စစ်ဝန်ချုပ်ရုံးမှ အဆိုပါကိစ္စနှင့်စပ်လျဉ်း၍ ယူအေအီးနိုင်ငံခြားရေးဝန်ကြီးဌာနနှင့် ညှိုနှိုင်းဆောင်ရွက်ခဲ့ပြီး အသွား/ အပြန် လေယာဉ်လက်မှတ်ခ မြန်မာငွေ ကျပ် ၃၃ သိန်း ကျခံစေ၍ မြန်မာနိုင်ငံသို့ ပြန်လည်ထွက်ခွာခွင့်ရရှိခဲ့ရာ ယမန်နေ့ညပိုင်းက ရန်ကုန်မြို့သို့ ပြန်လည်ရောက်ရှိခဲ့ခြင်းဖြစ်သည်။

ဆော်ဒီအာရေဗျနိုင်ငံ၊ အဘူဒါဘီမြို့တွင် အခက် အခဲကြုံတွေ့ခဲ့ရမှုနှင့် စပ်လျဉ်း၍ မသက်သက်လင်းက “ကျွန်မက ဧရာဝတီတိုင်းဒေသကြီး ပုသိမ်ချောင်းမြို့နယ် လက်ပံကျေးရွာမှာ နေပါတယ်။ ဒူဘိုင်းကို ၂၀၂၃ ခုနှစ်၊ ဇွန်လမှာ သွားရောက်ခဲ့ပါတယ်။

မြန်မာနိုင်ငံမှာ ပုဂ္ဂလိကဆေးရုံမှာ အလုပ်လုပ်ရင်းဝင်ငွေအဆင်မပြေတာနဲ့ သူငယ်ချင်းတစ်ယောက်ရဲ့အကူအညီနဲ့ ဒူဘိုင်းမြို့ကို သွားပြီး အလုပ်လုပ်ခဲ့ပါတယ်။ အိမ်ရှင်နဲ့အဆင်ပြေပေမယ့် အိပ်ချိန်မလုံလောက်ပါဘူး။ ည ၂ နာရီခွဲမှာအိပ်ရပြီး မနက် ၅ နာရီထရပါတယ်။ လုပ်ခလစာရပေမယ့် အိပ်ရေးမဝတဲ့ဒဏ်ကြောင့် အလုပ်လုပ်ရတာအဆင်မပြေကြောင်းနဲ့ နှစ်ပတ်မှာတစ်ကြိမ် ဖုန်းသုံးခွင့်ရချိန်မှာ အိမ်ကိုလှမ်းပြီး ပြောတော့ လူကုန်တားအဖွဲ့ကို အိမ်မှမိဘများက အကူအညီတောင်းခံခဲ့ပါတယ်။

ဒူဘိုင်းမြို့က မြန်မာကောင်စစ်ဝန်ချုပ်ရုံးက အကူအညီပေးခဲ့တဲ့အတွက် မြန်မာပြည်ကို ပြန်လာခွင့်ရခဲ့တာပါ။ ယဉ်ကျေးမှု၊ ဘာသာစကားနဲ့ စားသောက်မှုပုံစံမတူတဲ့အတွက်လည်း အခက်အခဲများစွာရှိခဲ့ပါတယ်။ အဲဒီကိုသွားမယ်လို့ ပြင်ဆင်နေသူတွေရှိရင်လည်း မသွားစေလိုပါဘူး။ ရောက်ရှိနေသူတွေ အဆင်ပြေရဲ့လားလို့လည်း မြန်မာပြည်က မိဘဆွေမျိုးများက လှမ်းပြီးမေးမြန်းသင့်ပါတယ်။ အဲဒီကိုသွားမယ်ဆိုရင် ငွေတစ်ခုတည်းနဲ့ မက်လုံးပေးတာကို မယုံကြည်ဘဲ လေ့လာစုံစမ်းပြီးမှ သွားသင့်ပါတယ်။ အခက်အခဲတွေအများကြီး စောင့်ကြိုနေလို့ပါ။

အခုလိုမြန်မာနိုင်ငံသားတစ်ဦး ဒုက္ခရောက်နေချိန်မှာ အစစအရာရာကူညီဖြေရှင်းပေးပြီး လေဆိပ်ကနေ အမိနိုင်ငံကိုပြန်ရောက်တဲ့အထိ အကူအညီပေးခဲ့တဲ့ ဝန်ထမ်းအားလုံးကို ကျေးဇူးတင်ပါတယ်။ အထူးသဖြင့် မြန်မာကောင်စစ်ဝန်ရုံးချုပ်က လူကြီးမင်းများအားလုံးကို အထူးပဲကျေးဇူးတင်ပါတယ်”ဟု ပြောကြားခဲ့သည်။

ယူအေအီးနိုင်ငံတွင် အခက်အခဲများ ကြုံတွေ့နေရသည့် မြန်မာနိုင်ငံသားများ အမိနိုင်ငံသို့ ပြန်လည်ထွက်ခွာနိုင်ရန် မြန်မာကောင်စစ်ဝန်ချုပ်ရုံးက ကူညီဆောင်ရွက်ပေးလျက်ရှိပြီး ထိုနိုင်ငံတွင် အလုပ်လုပ်ကိုင်စဉ် အလုပ်ရှင်နှင့်အဆင် မပြေမှုဖြစ်ပေါ်ပါက မြန်မာပွဲစားများက တာဝန်ယူဖြေရှင်းပေးမှုမရှိသည့်အပြင် ဒူဘိုင်းအေဂျင်စီရုံးနှင့် အလုပ်ရှင်တို့က နိုင်ငံကူးလက်မှတ်များကို သိမ်းဆည်းထားခြင်း၊ ပွဲစားများက အေဂျင်စီရုံးအဆင့်ဆင့်ထံ လက်လွှဲအသုံးချမှုတို့ကို ကြုံတွေ့နေရကြောင်း သိရ၍ သတိပြုကြရန်လည်း ထုတ်ပြန်ချက်၌ ဖော်ပြထားသည်။
Yangon_Times/tthl
#Local_News
#Published_ 14 June 2024
#YMG #Yangon_Times #Yangon_Media_Group

Published-14 June 2024

ယခု ဘဏ္ဍာနှစ်စဖြစ်သည့် နှစ်လဝာာအတွင်းပြည်ပနိုင်ငံများ သို့ ရေထွက်ကုန်ပစ္စည်းတင်ပို့မှုမှ ကန်ဒေါ်လာ သန်း၅၀ကျော်ရရှိထားပြီး ပြီးခဲ့သည့်နှစ်ကာလတူကထက် ပိုမိုရရှိခဲ့ကြောင်း ငါးလုပ်ငန်းဦးစီးဌာနမှသိရသည်။

ပြည်ပသို့ ငါးမျိုးစုံတင်ပို့မှုအနေဖြင့် ယခုဘဏ္ဍာနှစ် ဧပြီလ ၁ ရက်မှ မေလ ၃၁ ရက်အထိ နှစ်လတာ ကာလအတွင်း  ငါးမျိုးစုံ မက်ထရစ်တန်ချိန် လေးသောင်းကျော် တင်ပို့နိုင်ခဲ့ကာ ကန်ဒေါ်လာ၅၁သန်းကျော်ရရှိထား ခြင်းကြောင်းသိရသည်။

ပြီးခဲ့သည့်ဘဏ္ဍာနှစ်ကာလတူက ပြည်ပသို့ ငါးမျိုးစုံတင်ပို့ရာတွင် မက်ထရစ်တန်ချိန် ၁၉၅,၉၃ ဒသမ ၇၃ တန် တင်ပို့ခဲ့ပြီး အမေရိကန်ဒေါ်လာ ၂၆ ဒသမ ၉၄၆ သန်းရရှိခဲ့ခြင်းဖြစ်သည်။

ယခုဘဏ္ဍာနှစ် ၂၀၂၄-၂၀၂၅ ဘဏ္ဍာနှစ်ဧပြီနှင့်မေလအတွင်းပြည်ပနိုင်ငံများသို့‌ ရေထွက်ကုန်များတင်ပို့ရာတွင် ပင်လယ် ရေ ကြောင်း ကုန်သွယ်မှုမှ မက်ထရစ် တန်ချိန် ၂၃,၆၈၇ ဒသမ ၁၄၉ တန် တင်ပို့ခဲ့ပြီး အမေရိကန်ဒေါ်လာ ၃၃ ဒသမ ၄၅ သန်း၊ နယ်စပ်ကုန်သွယ်မှုမှ မက်ထရစ် တန်ချိန် ၂၄,ဝ၃၂ ဒသမ ၃၇၄ တန် တင်ပို့ခဲ့ပြီး အမေရိကန်ဒေါ်လာ ၁၈ ဒသမ ၁၅၁ သန်းရရှိခဲ့သည့်အတွက် စုစုပေါင်း မက်ထရစ်တန်ချိန် ၄၇,၇၁၉ ဒသမ ၅၂၃ တန်တင်ပို့နိုင်ခဲ့ပြီး အမေရိကန်ဒေါ်လာ ၅၁ ဒသမ ၆ဝ၁ သန်းရရှိခဲ့ ကြောင်းသိရသည် ။

  မြန်မာနိုင်ငံမှ ငါး/ပုစွန်အပါအဝင် ရေထွက်ကုန်များကို ပြည်ပနိုင်ငံများဖြစ်တဲ့ တရုတ်နိုင်ငံ၊ ထိုင်းနိုင်ငံ၊ ဘင်္ဂလားဒေ့ရှ်နိုင်ငံ၊ ဂျပန်နိုင်ငံ စသည့် နိုင်ငံပေါင်း ၄ဝ ကျော်သို့ တင်ပို့
နေခြင်းဖြစ်ကြောင်းသိရသည်။
Yangon_Times/NN
#Local_News
#Published_ 14 June 2024
#YMG #Yangon_Times #Yangon_Media_Group

Published-14 June 2024

  တရုတ်နိုင်ငံမှထုတ်လုပ်ထားသည့် လျှပ်စစ်သုံးမော်တော်ယာဉ်များရန်ကုန်ဆိပ်ကမ်းသို့ယမန်‌ နေ့ကရောက်ရှိခဲ့ရာလုပ်ထုံးလုပ်နည်းနှင့်အညီ ထုတ်ယူ ခွင့်ပြုခဲ့စီးပွား‌ ရေးနှင့်ကူးသန်းရောင်းဝယ်ရေးဝန်ကြီးဌာနမှသိရသည်။

အမျိုးသားအဆင့် လျှပ်စစ်သုံးယာဉ်နှင့် ဆက်စပ်လုပ်ငန်းများ ဖွံ့ဖြိုးတိုးတက်ရေးဦးဆောင် ကော်မတီ၏ ခွင့်ပြုချက်ဖြင့် Earth Renewable Energy Co., Ltd. မှ တင်သွင်းလာသော တရုတ်နိုင်ငံ ထုတ် Wuling Bingo အမျိုးအစား လျှပ်စစ်သုံးမော်တော်ယာဉ်များနှင့် BYD Dolphin အမျိုးအစား လျှပ်စစ်သုံးယာဉ်များ၊ N.P.K Motors Co., Ltd. မှ တင်သွင်းလာခြင်းဖြစ်ကြောင်းသိရသည်။

ထိုသို့တင်သွင်းရာတွင်  တရုတ်နိုင်ငံထုတ် Leapmotor T03 (Luxury) အမျိုးအစား လျှပ်စစ်သုံးမော်တော်ယာဉ်များနှင့် Midmay Group Co., Ltd. မှ တင်သွင်း လာသော တရုတ်နိုင်ငံထုတ် Faw Toyota bZ4X အမျိုးအစား လျှပ်စစ်သုံးမော်တော်ယာဉ်များဖြစ်ကြောင်းသိရသည်။

အဆိုပါ လျှပ်စစ်သုံးမော်တော်ယာဉ်များ ရန်ကုန်ဆိပ်ကမ်းသို့ ရောက်ရှိလာ သောကြောင့် ဇွန်  ၁၃ ရက်နေ့တွင် လုပ်ထုံးလုပ်နည်းနှင့်အညီ ထုတ်ယူ ခွင့်ပြုခဲ့ကြောင်း သိရသည်။
Yangon_Times/NN
#Local_News
#Published_ 14 June 2024
#YMG #Yangon_Times #Yangon_Media_Group

Published 14 June 2024

XPrize အဖွဲ့အစည်း တည်ထောင်သူ အသက် ၆၃ နှစ်ရှိ မီလျံနာ ပီတာဒိုင်းမန်းဒစ်က အိပ်စက်ခြင်းဟာ အလုံးစုံကျန်းမာရေးအတွက် မရှိမဖြစ် လိုအပ်တယ်လို့ ယုံကြည်ထားပါတယ်။

ယင်းက ညဘက် ကောင်းစွာအိပ်စက်နိုင်မယ့် အချက်များကို မျှဝေသွားပါတယ်။

ပထမအချက်က Oura လက်စွပ် ဝတ်ဆင်သင့်တယ်လို့ ဆိုပါတယ်။

ဒေါ်လာ ၃၀၀ တန် ထိုလက်စွပ်ဟာ ဝတ်ဆင်သူတွေရဲ့ လှုပ်ရှားမှုတွေ၊ အပူချိန်၊ နှလုံးခုန်နှုန်းတို့ကို တစ်နေ့တာလုံး တွက်ချက်ပေးနေသလို ဘယ်လောက် ကောင်းကောင်းအိပ်ရသလဲဆိုတာ စောင့်ကြည့်ပေးပါတယ်။

ဒုတိယအချက်က အိပ်စက်ဖို့အတွက် အကောင်းဆုံး အခြေအနေ ဖန်တီးခြင်းပါ။

အိပ်ခန်းကို အေးမြအောင် ထိန်းသိမ်းခြင်းက ကောင်းစွာ အိပ်စက်နိုင်စေမှာ ဖြစ်ပါတယ်။

ဒေါ်လာ ၂၅၅၀ တန် အိပ်ရာက ညဘက်မှာ အပူချိန် အေးမြစေပြီး မနက်ထတဲ့အချိန်မှာ နွေးထွေးစေပါတယ်။

တတိယအချက်က မျက်လုံးအကာ ဝတ်ဆင်ပြီး အိပ်စက်ခြင်းပါ။

ဒိုင်းမန်းဒစ်ကတော့ ၃၅ ဒေါ်လာတန် Manta မျက်လုံးအကာကို ဝတ်ဆင်ပါတယ်။

ထိုပစ္စည်းက ဝင်လာသမျှ အလင်းအားလုံးကို ပိတ်ပင်ပေးပါတယ်။

စတုတ္ထအချက်က သွားဖုံးကာ တပ်ဆင်ပြီး အိပ်စက်ခြင်းပါ။

ထိုကိရိယာက မေးရိုးကိုအနည်းငယ် ပင့်တင်ပေးထားပြီး အသက်ရှူလေဝင်ပေါက်ကို ဟပေးထားတာကြောင့် ဟောက်ခြင်းကို ကာကွယ်ပေးပါတယ်။

နောက်ဆုံးအချက်က အိပ်ချိန်ပုံမှန်အတိုင်း သတ်မှတ်ဖို့ပါ။

ညစဉ် အိပ်ရာကို စောစောဖြင့် ပုံမှန်အတိုင်း အိပ်စက်ပေးပါက အကောင်းမွန်ဆုံး အိပ်ချိန်ရရှိစေမှာ ဖြစ်ပါတယ်။
Source: New York Post
#World_Health
#Published_ 14 June 2024
#YMG #Yangon_Times #Yangon_Media_Group

တရုတ်ပြည်မှ ကုန်တင်ကားတွေမှာ အလိုအလျောက် မောင်းနှင်စနစ်များ တပ်ဆင်လာရာ ထရပ်ကားယာဥ်မောင်းများနဲ့ လုပ်ငန်းမှလူများအတွက် အကျိုးကျေးဇူးများစွာ ရှိလာပြီး လောင်စာဆီ သက်သာခြင်း၊ လမ်းပန်းအန္တရာယ် ကင်းရှင်းရေး၊ ဝင်ငွေအခွင့်အလမ်း တိုးတက်ရေးတို့မှာ အကျိုးရှိလာပါတယ်။
#Asia_Technology
#Published_ 13 June 2024
#YMG #Yangon_Times #Yangon_Media_Group

#Daily_News
Published_ 13 June 2024

၁။ မိုးရာသီခရီးစဉ်အဖြစ် လမ်းပန်းဆက်သွယ်ရေးကောင်းသည့် လှည်းကူးရှိ လယ်‌တောအိမ် Farm များသို့ လည်ပတ်နိုင်

၂။ နာနတ်သီး လက်လီဈေးကောင်းသော်လည်း တောင်သူများ ဈေးမရဖြစ်နေ

၃။ ဂျင်းနု ဥမပေါ်ချိန် ရောက်ရှိလာသောကြောင့် ဂျင်းအခက်ဈေး တစ်ပိသာ ၈၀၀၀ကျပ် ဝန်းကျင်မှာသာ ရှိနေ

၄။ တရုတ်နိုင်ငံတွင် အလိုအလျောက်မောင်းစနစ် ကုန်တင်ကားများ အသုံးပြု ... အစရှိတဲ့ သတင်းတွေကို တင်ဆက်ပေးသွားမှာ ဖြစ်ပါတယ်။

#YMG #Daily_News #Yangon_Times #Yangon_Media_Group #TV Yangon Times

Published-13 June 2024

ယခု၂၀၂၄ ခုနှစ် ငါးလတာ အတွင်း ပြည်ပခရီးသွားတစ်သိန်းကျော် ဝင်ရောက်ထားပြီး တရုတ်နှင့်
ထိုင်းနိုင်ငံများမှ အများဆုံးလာရောက်ထားကြောင်း ဟိုတယ်နှင့်ခရီးသွားညွှန်ကြားမှုဦးစီးဌာနမှ  သိရသည် ။

အဆိုပါ ခရီးသွားဧည့်သည်များသည်ရန်ကုန်အပြည်ပြည်ဆိုင်ရာလေဆိပ်မှ ဝင်ရောက်ခဲ့ခြင်းဖြစ်ပြီး  နိုင်ငံခြားသားခရီးသည် ဝင်ရောက်မှုအနေဖြင့်  Business Visa၊ Tourist Visa များနှင့်  ဝင်ရောက်မှုမှာ အများဆုံး ဖြစ်ကြောင်း သိရသည်။

ပြီးခဲ့သည့်  ၂၀၂၃ ခုနှစ် အလားတူကာလနှင့်  နှိုင်းယှဉ်ပါက ခရီးသည်တစ်ထောင်နီးပါး ပိုမိုဝင်ရောက်ခဲ့ပြီး ယခုနှစ်အတွင်းလာရောက်လည်ပတ်ကြသူများသည် ကမ်းခြေဒေသများကို သွားရောက်လည်ပတ်မှုနည်းပါးပြီး ရန်ကုန်မြို့တွင်း ခရီးစဉ်၊ ပဲခူးမြို့ ခရီးစဉ်၊ ပုဂံခရီးစဉ်များကို သွားရောက်လည်ပတ်မှုများပြားခဲ့ကြောင်း သိရသည်။
Yangon_Times/NN
#Local_News
#Published_ 13 June 2024
#YMG #Yangon_Times #Yangon_Media_Group

13 June 2024

၂၀၂၅ အာရှယူ-၁၇ ခြေစစ်ပွဲမြန်မာယူ-၁၆ အသင်းအုပ်စု (I) တွင်အိမ်ရှင်ဗီယက်နမ်ဖြင့် တစ်အုပ်စုထဲကျရောက်လျက်ရှိကြောင်း မြန်မာနိုင်ငံ ဘောလုံးအဖွဲ့ချုပ်မှသိရသည်။

အာရှယူ-၁၇ ခြေစစ်ပွဲကို  ၂၀၂၄ ခုနှစ် အောက်တို ဘာ  ၁၉ မှ ၂၇ ရက်အတွင်း ကျင်းပရန် စီစဉ်ထားပြီး ခြေစစ်ပွဲ အုပ်စု (I) ကို အိမ်ရှင်အဖြစ် ဗီယက်နမ်နိုင်ငံက လက်ခံကျင်းပမည်ဖြစ်သည်။

ခြေစစ်ပွဲကို အုပ်စု (၁၀) စုခွဲ၍ ကျင်းပမည်ဖြစ်ပြီး အုပ်စု ပထမရရှိသည့် ၁၀ သင်း၊ အကောင်းဆုံး အုပ်စုဒုတိယရသည့် (၅) သင်းတို့ ခြေစစ်ပွဲ အောင်မြင်မည်ဖြစ်ကာ နောက်ဆုံးအဆင့်ပြိုင်ပွဲကို ဆော်ဒီအာရေဗျ နိုင်ငံက အိမ်ရှင်အဖြစ် လက်ခံကျင်းပမည်ဖြစ်သည်။

မြန်မာ့လက်ရွေးစင် ယူ-၁၆ အသင်းသည်  အုပ်စုပွဲစဉ်များအတွက် ယှဉ်ပြိုင်ရာတွင် ၂၀၂၅ အာရှယူ- ၁၇ ခြေစစ်ပွဲ အုပ်စု (I) တွင် ယီမင်၊ ဗီယက်နမ်၊ ကာဂျစ္စတန်အသင်းတို့နှင့်အတူ ကျရောက်လျက်ရှိသည်ဟုဆိုသည်။
Yangon_Times/tthl
#Local_News
#Published_ 13 June 2024
#YMG #Yangon_Times #Yangon_Media_Group