#LocalNews
Published - 12 Feb 2022

မိုးကုတ်မြို့နယ်၊အုန်းကိုင်းရွာသစ်ရှိ လက်လီစက်သုံးဆီ အရောင်းဆိုင် တစ်ဆိုင်မီးလောင်မှုဖြစ်ပွားခဲ့ တယ်လို့ သိရပါတယ်။

ဖေဖော်ဝါရီလ ၁၂ရက်နေ့၊ ၁၂နာရီ ၁၇ မိနစ်အချိန်ခန့်ကမန္တလေးတိုင်းဒေသကြီး၊ မိုးကုတ်မြို့နယ်၊ မိုးကုတ်မြို့အနောက်ပိုင်း၊ အုန်းကိုင်းရွာသစ်တွင် လက်လီစက်သုံးဆီအရောင်းဆိုင် မီးလောင်မှုဖြစ်ပွားကြောင်း သတင်းရရှိသဖြင့် လယ်ဦးနယ်မြေမီးသတ်စခန်းမှ မီးသတ်ယာဉ်(၂)စီး၊ မိုးကုတ်မြို့နယ်အရန်မီးသတ်မှ မီးသတ်ယာဉ်(၃)စီး၊ သန္ဓေမီးသတ်တပ်ဖွဲ့ဝင်များ၊ အရန်မီးသတ်တပ်ဖွဲ့ဝင်များဖြင့် သွားရောက်ငြှိမ်းသတ်ခဲ့ရာ မွန်းလွဲ ၁နာရီ ၅မိနစ် အချိန် မီးငြိမ်းခဲ့တယ်လို့သိရပါတယ်။

မီးလောင်ရသည့် အကြောင်းအရင်းနဲ့ပျက်စီးမှုတန်ဖိုးအား စုံစမ်းဆဲဖြစ်တယ်လို့ မန္တလေးတိုင်းဒေသကြီးမီးသတ်တပ်ဖွဲ့ ကနေသိရပါတယ်။
ymg/hm

 #Yangon_Media_Group

#LocalNews
Published - 12 Feb 2022

ယနေ့ နေ့လယ်က ရန်ကုန် အင်းစိန်အကျဉ်းထောင်ကနေ အကျဉ်းသား ၉၀ကျော်ကို ကနဦးလွှတ်ပေးခဲ့ပါတယ်။

လက်ရှိမှာ ထောင်တွင်းလွှတ်ပေးဖို့ ကျန်နေသူတချို့ရှိတယ်ဆိုတဲ့သတင်းတွေကြောင့် အကျဉ်းထောင်ရှေ့မှာ ဆက်လက်စောင့်ဆိုင်းနေကြသူတွေ ရှိနေကြတာပါ။

ပြည်ထောင်စုနေ့ အထိမ်းအမှတ်အနေနဲ့ နိုင်ငံတော် စီမံအုပ်ချုပ်ရေးကောင်စီက အကျဉ်းသား ၈၁၄ ဦးအား ပြစ်ဒဏ် လွတ်ငြိမ်းခွင့်ပြုကြောင်း ကြေညာခဲ့ပါတယ်။

ပြစ်ဒဏ်များကို ကျခံပြီး ဖြစ်သည့်အပြင် စည်းကမ်းကောင်းမွန်စွာ နေထိုင်ကျသော အကျဉ်းသား ၈၁၄ ဦးကို ရာဇဝတ်ကျင့်ထုံး ဥပဒေပုဒ်မ ၄၀၁(၁) အရ နောက်တစ်ကြိမ် ပြစ်မှုထပ်မံ ကျူးလွန်ပါက ၎င်းပြစ်ဒဏ်အပြင် ယခုကျခံရန် ကျန်ရှိသည့် ပြစ်ဒဏ်ကိုပါ ဆက်လက်ကျခံပါမည်ဟူသော စည်းကမ်း သတ်မှတ်ချက်ဖြင့် ၎င်းတို့ ကျခံရန် ကျန်ရှိသော ပြစ်ဒဏ်များကို လွတ်ငြိမ်းခွင့်ပြုလိုက်တယ်လို့ ဖော်ပြထားတာဖြစ်ပါတယ်။

ymg/ TL

#Yangon_Media_Group

#LocalNews
Published -12 Feb 2022
စစ်ကိုင်းတိပိဋက ဆရာတော်ပျံလွန်တော်မူခြင်းအပေါ် တိပိဋကယောဆရာတော်ကြီးမှ သံဝေဂ သဝဏ်လွှာပေးပို့လိုက်တယ်လို့ သိရပါတယ်။

သံဝေဂသဝဏ်လွှာတွင် ကိုရင်ဘဝ၌လည်း အလင်္ကာရဖြင့် ကျော်ခဲ့ ရဟန်းဘဝ၌လည်း ဓမ္မာစရိယ ၃ဘွဲ၊ အဘိဝံသ ၂ ဘွဲတိုဖြင့် ကျော်ခဲ့၊ ရဟန်းကျော်ဘဝ၌လည်း တိပိဋကဓရ တိပိဋကကောဝိဒ၊ တိပိဋက ဓရ ဓမ္မဘဏ္ဍာဂါရိကဘွဲတိုဖြင့် ကြက်သီးထခမန်းလျှမ်းလျှမ်းတောက်ကျော်ခဲ့၊ အရှိန်အဟုန်မပျပ် တက်၍တက်၍ ပဓာနနာယကဂုဏ် ဟောနိုင်ပြောနိုင် ဆုံးမနိုင် သင်ပြပို့ချနိုင်သည့်ဂုဏ် စသည့် သာသနာတော်အတွက် စွမ်း ဆောက်ချက် ဂုဏ်အဖြာဖြာတို့ဖြင့် ကျော်တုန်း ကျော်ဆဲ ကျော်မဆုံးပင် ဖြစ်နေပါကြောင်း၊ နောက်ထပ်စွမ်း ဆောင်ရန် အချိန်အရွယ်များစွာ ကျန်ရှိသေးပါကြောင်း အလွန်နှမျောလှပါ တယ်လို့ မိန့်ကြားဖော်ပြထားပါတယ်။

ဆက်လက်ပြီး" ရုပ်နာမ်ခန္ဓာ၊ ဧည့်သည်ပါ၊ ခုလာ ခုပင် ပြန်သွားကြ၊ ချက်ချင်းလာလိုက်၊ ပြန်သွားလိုက်၊ မော ဟိုက်ပင်ပန်းရ၊ ဝိပဿနာ၊ ပညာအသိ၊ ဧည့်ကြိုဘိ၊ အားဖြည့်စိတ်တင်း ငြိမ်းအေးရ၊ ဧည့်ကြိုပညာ၊ ပေးထားပါ၊ ပညာလက်ဆောင် ကိုယ်စီရ၊ ဖြစ်လာမှာတော့ ပျက်မှာပေါ့တဲ့ မပျက်ရာမှန်၊ မြတ်နိဗ္ဗာန်၊ ဧကန်ရှိသားပဲတဲ့ တိပိဋက နောင်တော်"ဟူ၍ တိပိဋကယောဆရာတော်ကြီးမှ သံဝေဂသဝဏ်လွှာပေးပို့ခဲ့ခြင်း ဖြစ်ပါတယ်။

ဆရာတော်မှာထိုင်းနိုင်ငံ၊ဘန်ကောက် မြို့ Bumrungrad ဆေးရုံကြီးမှာ ရိုးတွင်းချဉ်ဆီအစားထိုးလဲလှယ်ကုသရန် နှင့်သွေးဖြူဥရောဂါတို့အတွက် ဆေးကုသမှုခံယူရင် ယင်းဆေးရုံတွင် ဖေဖော်ဝါရီ ၇ရက်နေ့ မြန်မာစံတော်ချိန် ညနေ ၅နာရီ ၄၉မိနစ်မှာ ဘဝနတ်ထံ ပျံလွန်တော်မူခဲ့ခြင်းဖြစ်ပါတယ်။

ဆရာတော်ကို စစ်ကိုင်းတိုင်းဒေသကြီး ဝက်လက်မြို့နယ်၊ ဆင်နင်းကျေးရွာတွင် ခမည်းတော် ဦးတင်ရ၊မယ်တော် ဒေါ်ညွန့်ခင်တို့မှ ၁၃၃၀ပြည့်နှစ်၊သီတင်းကျွတ်လဆန်း(၈)ရက်၊တနင်္ဂနွေနေ့တွင် ဖွားမြင်တော်မူသော သားရတနာဖြစ်ပြီး ဘဝနတ်ထံပျံလွန်တော်မူစဉ်မှာ သက်တော်(၅၄)နှစ်၊သိက္ခာတော်(၃၄)ဝါရှိပြီဖြစ်ကာ ဖေဖော်ဝါရီလ ၁၃ ရက်နေ့ နေ့လယ် ၁၂ နာရီအချိန်မှာ အန္တိမအဂ္ဂိဈာပနပူဇော်မှာဖြစ်တယ်လို့ သိရပါတယ်။
ygm/hm

#LocalNews
Published -12 Feb 2022
ဖေဖော်ဝါရီ လ ၁၂ရက်နေ့ ယနေ့ မွန်းလွဲ ၁၂နာရီခန့်ကရန်ကုန်မြို့ ၊ အင်းစိန်အကျဉ်းထောင်မှ အကျဉ်းသား ၉၀ ခန့်ဆပြန်လွှတ်ခဲ့တယ်လို့ သိရပါတယ်။

"ထောင်ဘူးဝကနေကား ၄ စီး ထွက်သွားတယ်။အယောက် ၉၀ ဝန်းကျင် လွှတ်ပေးတယ်လို့ ကြားတယ်စောင့်နေသူတွေ ဆက်လက်စောင့်နေကြတယ်။လွတ်ငြိမ်းက ပြီးပြီဆိုပြီးလည်း
ပြောနေကြတယ်"လို့ အကျဉ်းထောင်အနီးရောက်ရှိနေသူတစ်ဦးကပြောပါတယ်။

နိုင်ငံတော် စီမံအုပ်ချုပ်ရေးကောင်စီက အကျဉ်းသား ၈၁၄ ဦးအား ပြစ်ဒဏ် လွတ်ငြိမ်းခွင့်ပြုကြောင်း ကြေညာခဲ့ပြီး ပြည်ထောင်စုနေ့ အထိမ်းအမှတ်အားဖြင့် ပြစ်ဒဏ်များကို ကျခံပြီး ဖြစ်သည့်အပြင် စည်းကမ်းကောင်းမွန်စွာ နေထိုင်ကျသော အကျဉ်းသား ၈၁၄ ဦးကို ရာဇဝတ်ကျင့်ထုံး ဥပဒေပုဒ်မ ၄၀၁(၁) အရ နောက်တစ်ကြိမ် ပြစ်မှုထပ်မံ ကျူးလွန်ပါက ၎င်းပြစ်ဒဏ်အပြင် ယခုကျခံရန် ကျန်ရှိသည့် ပြစ်ဒဏ်ကိုပါ ဆက်လက်ကျခံပါမည်ဟူသော စည်းကမ်း သတ်မှတ်ချက်ဖြင့် ၎င်းတို့ ကျခံရန် ကျန်ရှိသော ပြစ်ဒဏ်များကို လွတ်ငြိမ်းခွင့်ပြု လိုက်တယ်လို့ ဖော်ပြထားတာဖြစ်ပါတယ်။

ymg/hm

#Yangon_Media_Group

#WorldPolitics
Published - 12 February 2022
ထိုင်းနိုင်ငံဝန်ကြီးချုပ်ရဲ့ လက်ထောက်တစ်ဦးဖြစ်တဲ့ ဒုဝန်ကြီးဟာ နိုင်ငံတကာလွတ်ငြိမ်းချမ်းသာခွင့်အဖွဲ့ Amnesty International အား နောက်အပတ်မှာ နိုင်ငံတွင်းမှ ထုတ်ပယ်နိုင်ရန် ကြိုးပမ်းလျက်ရှိကြောင်း သောကြာနေ့က ပြောကြားသွားပါတယ်။

ဘုရင်စနစ်ထောက်ခံသူအမာခံတွေက လူ့အခွင့်အရေးလှုပ်ရှားရေးအဖွဲ့ကို နိုင်ငံတော်လုံခြုံရေးအား ထိခိုက်ပျက်ပြားစေကြောင်း စွပ်စွဲပြောကြားထားပါတယ်။

ဝန်ကြီးချုပ်'ပရာယွတ်ချန်အိုချာ'ရုံးရဲ့ ဒုတိယဝန်ကြီးဖြစ်သူ'ဆက်ဆာကောအတ်ထဝေါင်'က ထိုင်းနိုင်ငံအတွင်း Amnesty International အဖွဲ့တည်ရှိနေခြင်းကို ကန့်ကွက်ကြောင်းလျှောက်ထားချက်တွင် လက်မှတ်ရေးထိုးသူ ၁.၂ သန်းရရှိထားပြီဖြစ်ပြီး အမျိုးသားလုံခြုံရေးကောင်စီနဲ့ ပြည်ထဲရေးဝန်ကြီးဌာနတို့ထံ တစ်ပတ်အတွင်း တင်ပြသွားမှာဖြစ်ပါတယ်။

ဘုရင်စနစ်ပြုပြင်ပြောင်းလဲဖို့ လှုံ့ဆော်သူများအား တရားစွဲချက်တင်ထားတာကို ရပ်တန့်ပေးရန် လန်ဒန်အခြေစိုက်Amnesty International က တောင်းဆိုလာကြတာကြောင့် နိုင်ငံအတွင်းမတည်မငြိမ်ဖြစ်လာရကြောင်း တော်ဝင်ဘုရင်စနစ်ထောက်ခံသူအမာခံတွေက စွပ်စွဲထားပါတယ်။

ထိုင်းလူမျိုးအများစုက ဘုရင်စနစ်ကို ထောက်ခံလေးစားကြသူတွေဖြစ်ပါတယ်။
"လူ့အခွင့်အရေးလှုပ်ရှားရေးအဖွဲ့က နိုင်ငံတော်လုံခြုံရေးကို ဖောက်ဖျက်ဖို့လုပ်နေတာပါ။ ဘုရင်စနစ်ပျက်ပြားအောင် ပြုလုပ်နေတဲ့အဖွဲ့တွေကို ထောက်ခံနေတာပါ။ ဒါဟာ သမာသမတ်မရှိတဲ့အပြင် အစိုးရဆန့်ကျင်ရေးလှုပ်ရှားမှုကို ထောက်ခံအားပေးနေတာဖြစ်ပါတယ်" လို့ 'ဆက်ဆာကော'က ရိုက်တာသတင်းဌာနကို ပြောပြသွားပါတယ်။

Amnesty အဖွဲ့ကို စုံစမ်းစစ်ဆေးဖို့ 'ပရာယွတ်'က နိုဝင်ဘာလက အမိန့်ပေးခဲ့ပြီး ယခုလက်မှတ်ထိုးလျှောက်ထားချက်မှာတော့ မှတ်ချက်ပြုပြောဆိုခြင်းမရှိသေးပါဘူး။
Amnesty အဖွဲ့က သောကြာနေ့က ထုတ်ပြန်ကြေညာထားရာမှာ လူ့အခွင့်အရေးဆိုင်ရာ တာဝန်ဝတ္တရားများကို လေးစားလိုက်နာရန် အစိုးရကို တိုက်တွန်းထားပါတယ်။

"ထိုင်းနိုင်ငံတော်ဝင်အစိုးရအဖွဲ့အနေနဲ့ ပြည်သူ့သဘောထားနဲ့ နိုင်ငံတော်လုံခြုံရေးကို ကာကွယ်ဖို့တာဝန်ရှိတယ်ဆိုတာကို သိရှိနားလည်ထားပြီး နိုင်ငံတကာလူ့အခွင့်အရေးဥပဒေနဲ့အညီ လုပ်ကိုင်ဆောင်ရွက်သွားဖို့ကိုလည်း ဆက်လက်တိုက်တွန်းလိုပါတယ်" လို့ ဖော်ပြထားပါတယ်။

ထိုင်းလူမျိုးအများစုက ဘုရင်စနစ်ကို အထွတ်အမြတ်ထားကြပြီး တော်ဝင်မျိုးနွယ်ကို ဝေဖန်ထိပါးလာပါက ခြိမ်းခြောက်မှုအန္တရာယ်အဖြစ် ယူဆတတ်ကြပါတယ်။

လူငယ်တွေဦးဆောင်ပြီး 'ပရာယွတ်'အစိုးရအဖွဲ့ကို ဆန့်ကျင်ဆန္ဒပြမှုတွေဟာ ၂၀၂၀ အတွင်း အရှိန်မြင့်တက်လာခဲ့ကာ အာဏာပိုင်တွေက လူစုဖြိုခွဲရတဲ့အထိ တော်ဝင်ဆန့်ကျင်ပြောင်းလဲရေးတောင်းဆိုမှုတွေ မြင်တွေ့ခဲ့ရပါတယ်။

နိုင်ငံတော်လုံခြုံရေးထိပါးခြင်းစွပ်စွဲချက်ဖြင့် တက်ကြွလှုပ်ရှားသူ ၁,၇၀၀ ကျော်ကို တရားစွဲဆိုထားပြီး တော်ဝင်မျိုးနွယ်ကို စော်ကားနှောင့်ယှက်ပါက ထောင်ဒဏ် ၁၅ နှစ်ကျခံရမယ့်ဥပဒေနဲ့ ရင်ဆိုင်နေရသူ အနည်းဆုံး ၁၆၉ ဦးပါဝင်နေပါတယ်။

အစိုးရအဖွဲ့က Amnesty အဖွဲ့အားထုတ်ပယ်ရန် ကြိုးပမ်းနေတဲ့အပြင် အကျိုးအမြတ်မယူတဲ့ လူမှုကူညီရေးအဖွဲ့အစည်းတွေကို ထိန်းသိမ်းဖို့ဥပဒေကိုလည်း ထုတ်ပြန်နိုင်ရန် ကြိုးပမ်းလျက်ရှိပါတယ်။

ပြည်တွင်းနဲ့နိုင်ငံတကာမှ အဖွဲ့အစည်း ၁ ထောင်ကျော်ကတော့ ဒီဥပဒေကို ဆန့်ကျင်လိုက်ပြီး လူ့အခွင့်အရေးတွေကိုခြိမ်းခြောက်ရာကျတယ်လို့ ကြေညာလိုက်ပါတယ်။
Source: Reuters

#WorldHealth
Published -12 February 2022

မိုဒါနာကုမ္ပဏီမှထုတ်တဲ့ လက်ရှိကိုဗစ်အားမြှင့်ကာကွယ်ဆေးနဲ့ အိုမီခရွန်သီးသန့်အားမြှင့်ကာကွယ်ဆေးတို့ကို မျောက်သတ္တဝါတွေမှာ နှိုင်းယှဉ်စမ်းသပ်ကြည့်ရာ ရောဂါကာကွယ်နိုင်စွမ်းက သိသိသာသာခြားနားခြင်းမရှိတာကြောင့် အိုမီခရွန်သီးသန့်အားမြှင့်ကာကွယ်ဆေး ထုတ်လုပ်ရန်မလိုအပ်နိုင်ကြောင်း အမေရိကန်အစိုးရသုတေသီတွေက သောကြာနေ့က တင်ပြလိုက်ပါတယ်။

မိုဒါနာကာကွယ်ဆေး ၂ ကြိမ်ထိုးထားတဲ့ မျောက်တွေနဲ့စမ်းသပ်လေ့လာကြရာ တစ်ဖွဲ့ကို နောက် ၉ လအကြာမှာ ပုံမှန်မိုဒါနာအားမြှင့်ကာကွယ်ဆေးထိုးနှံပေးခဲ့ပြီး အခြားတစ်ဖွဲ့ကို အိုမီခရွန်မျိုးဗီဇကွဲသီးသန့် အားမြှင့်ကာကွယ်ဆေး ထိုးနှံပေးခဲ့ပါတယ်။

သုတေသနပညာရှင်တွေက တိရိစ္ဆာန်တွေကို ဗိုင်းရပ်စ်နဲ့ထိတွေ့စေပြီး ကိုယ်ခံအားတုန့်ပြန်မှုအမျိုးမျိုးကို စမ်းသပ်ခဲ့ကြပါတယ်။အဆိုပါအားမြှင့်ကာကွယ်ဆေး ၂ မျိုးစလုံးဟာ အိုမီခရွန်အပါအဝင် မျိုးဗီဇကွဲအားလုံးကို တုန့်ပြန်ခုခံပေးမယ့် ပဋိပစ္စည်း antibody ထွက်ရှိမှုကို သိသိသာသာမြှင့်တင်ပေးနိုင်တယ်လို့ bioRxiv ဝက်ဘ်ဆိုက်မှာ ဖော်ပြထားပါတယ်။

မိုဒါနာကုမ္ပဏီနဲ့ ဘိုင်အိုတက်ခ်ကုမ္ပဏီတိုက အိုမီခရွန်သီးသန့်အားမြှင့်ကာကွယ်ဆေးကို လူသားတွေနဲ့စမ်းသပ်နေပြီဖြစ်ပါတယ်။အဆိုပါတွေ့ရှိချက်တွေကြောင့် အိုမီခရွန်သီးသန့်ကာကွယ်ဆေး ပြောင်းလဲထုတ်လုပ်ဖို့ မလိုအပ်တော့ကြောင်း၊ အရင်ကာကွယ်ဆေးတွေနဲ့ အိုမီခရွန်သီးသန့်ကာကွယ်ဆေးတွေက မျိုးဗီဇကွဲအမျိုးမျိုးကို သိရှိမှတ်မိပြီး ခုခံပေးနိုင်ကြောင်း အမျိုးသားကူးစက်ရောဂါဌာနမှ ကာကွယ်ဆေးသုတေသီ 'ဒန်နီယယ်ဒိုအက်ခ်'က ပြောပြလိုက်ပါတယ်။

စမ်းသပ်လေ့လာချက်ရလာဒ်တွေက မိုဒါနာအားမြှင့်ကာကွယ်ဆေးကို ဘီတာမျိုးဗီဇကွဲကို ပစ်မှတ်ထားစမ်းသပ်တုန်းကအတိုင်း တူညီကြောင်း ဝေးလ်ကော်နယ်ဆေးပညာကောလိပ်မှ အဏုဇီဝနဲ့ရောဂါခုခံအားပရော်ဖက်ဆာ ဒေါက်တာ'ဂျွန်မိုး'က ဆိုပါတယ်။

မျောက်တွေနဲ့စမ်းသပ်ရာမှာ အားသာချက်တစ်ခုက တိရိစ္ဆာန်တွေကို ကာကွယ်ဆေးတွေထိုးပေးပြီး ဗိုင်းရပ်စ်နဲ့ထိတွေ့စေကာ တုန့်ပြန်လာတဲ့ခုခံအားကို လေ့လာလို့ရတာပဲဖြစ်ပါတယ်။
အဆိုပါစမ်းသပ်မှုမျိုးကို လူသားတွေမှာတော့ စမ်းသပ်လို့မဖြစ်သေးပါဘူး။
Source: Reuters

#LocalNews
Published - 12 Feb 2022

ရန်ကုန်မြိုအပါအဝင် ရန်ကုန် ပြည်တွင်းက ဒေသတချို့မှာ ဒီကနေ့ ဖေဖော်ဝါရီ ၁၂ ရက်နေ့ နံနက်ပိုင်းက မိုဘိုင်းအင်တာနက် ပြတ်တောက်မှုတွေ ဖြစ်ခဲ့ပါတယ်။

မိုဘိုင်းအင်တာနက်ပြတ်တောက်နေတဲ့အထဲမှာ အော်ရီဒူး၊ တယ်လီနော၊ MPT စတဲ့ ဖုန်းလိုင်းတွေ ပြတ်တောက်ခဲ့တာပါ။

သို့ပေမယ့် အခုလက်ရှိထိ မိုဘိုင်းအင်တာနက်ဒေတာတွေ ပြန်လည်အသုံးပြုလို့ ရတဲ့မြို့နယ်တွေရှိသလို၊ မရသေးတဲ့ မြို့နယ်တွေလည်း ရှိပြီး အိမ်သုံး wifi တွေသာ အသုံးပြုလို့ ရနေတယ်လို့ သိရပါတယ်။

“ ကျွန်တော် မနက် ၅ နာရီလောက်က သုံးကြည့်တာ သုံးလို့မရပါဘူး။ ၈ နာရီခွဲလောက်ကျတော့ ပြန်သုံးလို ရနေတယ်” လို့ လှိုင်သာယာမှာနေထိုင်တဲ့ တယ်လီနော် ဖုန်းလိုင်းကို အသုံးပြုသူတစ်ဦးက YMG ကို ပြောပါတယ်။

မိုဘိုင်းအင်တာနက်လိုင်းတွေကို မနေ့ညပိုင်းက ဒီကနေ့ မနက် ၄ နာရီကနေ ညနေ ၃ နာရီအထိ ညွှန်ကြားအရ အင်တာနက်ပြတ်တောက်မယ်လို့ အော်ပရေတာတချို့ ကြေညာချက်အရဆိုပြီး လူမှုကွန်ရက်မှာ တွေ့ခဲ့ရပါတယ်။

ymg/ei

#Yangon_Media_Group

Published 12 Feb 2022

လေကြောင်းတိုက်ခိုက်မှုဖြစ်နိုင်ချေအပါအဝင် ရုရှားရဲ့ကျူးကျော်မှုကို ရှောင်လွှားနိုင်ဖို့ အမေရိကန်နှင့် သူ့ရဲ့မဟာမိတ်တွေက သူတို့ရဲ့ နိုင်ငံသားတွေကို ယူကရိန်းကနေ ယခုချက်ခြင်းထွက်ခွာကြရန် တိုက်တွန်းလိုက်ပါတယ်။ ရုရှားရဲ့ကျူးကျော်မှုဟာ အချိန်မရွေးဖြစ်လာနိုင်တယ်လို့ ဝါရှင်တန်က သောကြာနေ့တုန်းကပြောကြားထားပါတယ်။

အနောက်နိုင်ငံတွေဟာ သူတို့ရဲ့ ရန်မူတဲ့လုပ်ရပ်တွေကို အာရုံပြောင်းချင်လို့ အလိမ်အညာ သတင်းတွေဖြန့်နေတယ်လို့ မော်စကိုက စွပ်စွဲလိုက်ပါတယ်။

ရုရှားက အီးယူနှင့်နေတိုးတို့ရဲ့ ပူးတွဲ သံတမန်ရေးတုန့်ပြန်မှုတွေကို ပယ်ချလိုက်ပြီး စစ်အေးတိုက်ပွဲလွန်ဥရောပအပေါ် ပိုပြီးဩဇာရှိအောင်အလုအယက်ကြိုးပမ်းနေချိန်မှာ တိုက်ခိုက်မှုတွေဟာ ချက်ခြင်းလက်ငင်းဖြစ်လာနိုင်တယ်ဆိုပြီး အမေရိကန်နှင့် ဥရောပနိုင်ငံတွေက သတိပေးမှုထပ်မံတိုးမြှင့်လိုက်တာဖြစ်ပါတယ်။

ရုရှားဟာ ယူကရိန်းယ်စပ်ကို တပ်ဖွဲ့ဝင်တစ်သိန်းကျော်ချထားပေမယ့် ကျူးကျော်မယ့်အစီအစဉ်ရှိတယ်ဆိုတဲ့အပေါ် ၎င်းက ငြင်းဆိုထားပါတယ်။

ရုရှားဟာ ဖေဖော်ဝါရီ(၂၀)ရက် ဆောင်းရာသီအိုလံပစ်မတိုင်ခင် ကျူးကျော်ပြီး မြို့တော်ကိဗစ်နှင့်အခြားမြို့တွေကို သိမ်းပိုက်နိုင်တယ်လို့ အမေရိကန်အရာရှိတွေကပြောနေပါတယ်။

ယူကရိန်းမှာ အမေရိကန်နိုင်ငံသားတွေက သူတို့ဆက်နေရင် အမေရိကန်စစ်တပ်ကကယ်ထုတ်မှာပဲဆိုပြီး မျှော်လင့်မထားဖို့နှင့် ၄၈နာရီအတွင်း ယူကရိန်းကထွက်ခွာဖို့ အမေရိကန်အမျိုးသားလုံခြုံရေးအကြံပေး ဂျိတ်ခ်ဆူလီဗန်က ပြောပါတယ်။

“ ရုရှားတွေအရှိန်မြှင့်နေတဲ့ လက္ခဏာတွေ ကျွန်တော်တို့မြင်နေရတယ်။ အဲဒီအထဲမှာ ယူကရိန်းနယ်စပ်ကို တပ်အင်အား အသစ်တွေထပ်ရောက်လာတာလဲပါဝင်တယ်။ အခုဆို ကျူးကျော်မှုဟာ အချိန်မရွေးဖြစ်လာနိုင်တဲ့အနေအထား ကျရောက်နေတယ်” လို့ သူက သတင်းထောက်တွေကိုပြောပါတယ်။

“ရုရှားက ယူကရိန်းကိုတိုက်မယ်ဆိုရင် ကောင်းကင်ကဗုံးကြဲတာရယ်၊ဒုံးကျည်နှင့်တိုက်တာရယ်နှင့်စတင်ဖို့များတယ်။ အဲဒီလိုလုပ်ရင် ဘယ်နိုင်ငံသားပဲဖြစ်ဖြစ် အရပ်သားတွေ အသတ်ခံရနိုင်တယ်” လို့ သူကဆက်ပြောပါတယ်။

ဩစတေလျနှင့် နယူးဇီလန်တို့ဟာ ဗြိတိန်။ဂျပန်၊လတ်ဗီးယား၊နော်ဝေး၊နယ်သာလန်တို့နှင့်အတူ  သူတို့နိုင်ငံသားတွေ ယူကရိန်းက မြန်နိုင်သမျှ အမြန်ဆုံး ထွက်ခွာဖို့ နှိုးဆော်တဲ့ နောက်ဆုံးနှစ်နိုင်ငံဖြစ်ပါတယ်။ အစ္စရေးကလည်း သူ့သံရုံးဝန်ထမ်းတွေရဲ့မိသားစုတွေကို ကယ်ထုတ်မှုတွေစတင်နေပြီလို့ပြောပါတယ်။

Source Reuters

#WorldHealth
Published - 12 February 2022
အစ္စရေးလ်ကျန်းမာရေးဝန်ကြီးဌာနက ကိုဗစ်ကာကွယ်ဆေးတတိယအကြိမ်ထိုးနှံခြင်းရဲ့ ဘေးထွက်ဆိုးကျိုးတွေကို လေ့လာကြည့်ရာမှာ အစ္စရေးလ်မှအမျိုးသမီး ၁၀ ရာခိုင်နှုန်းခန့်ဟာ ကိုဗစ်အားမြှင့်ကာကွယ်ဆေး booster ထိုးနှံပြီးနောက် ရာသီစက်ဝန်းမူမှန်ခြင်းမျိုး ခံစားခဲ့ရကြောင်း ဗုဒ္ဓဟူးနေ့က ဖော်ပြလိုက်ပါတယ်။

ဖိုင်ဇာအားမြှင့်ကာကွယ်ဆေးထိုးပြီး ၂၁ ရက်မှ ရက် ၃၀ အတွင်း ဖြစ်ပေါ်လာနိုင်တဲ့ လက္ခဏာတွေကို ကျန်းမာရေးဝန်ကြီးဌာနက စစ်ဆေးလေ့လာခဲ့တာဖြစ်ပါတယ်။

အလတ်ပိုင်းအမျိုးသမီးတွေနဲ့ ငယ်ရွယ်သူတွေမှာ အားမြှင့်ကာကွယ်ဆေးထိုးနှံခြင်းရဲ့ ဘေးထွက်ဆိုးကျိုးတွေ ပိုပြီးခံစားရနိုင်ကြောင်း လေ့လာချက်မှာ တွေ့ရှိရပါတယ်။

လေ့လာချက်အရ အဖြစ်အများဆုံးဘေးထွက်ဆိုးကျိုးက ရာသီလာချိန်မမှန်ခြင်းဖြစ်တတ်ကာ အသက် ၅၄ နှစ်အတွင်း အမျိုးသမီး ၁၀ ရာခိုင်နှုန်းက အဆိုပါလက္ခဏာမျိုးခံစားခဲ့ရကြောင်း တွေ့ရှိရပါတယ်။

ဘေးထွက်ဆိုးကျိုးလက္ခဏာအများစုက အပျော့စားမျှသာဖြစ်ပြီး အလွန်ဆုံး ၃ ရက်ကျော်တဲ့အခါ လက္ခဏာပျောက်ကင်းသွားကြောင်း ဖော်ပြထားပါတယ်။ဒါ့အပြင် အာရုံကြောတုန့်ပြန်မှုနဲ့ ဓာတ်မတည့်ခြင်းဖြစ်စဉ်တွေဟာလည်း အရင်ကိုဗစ်ကာကွယ်ဆေးတွေထက်စာရင် အဖြစ်နည်းသွားပြီး ၄ ရာခိုင်နှုန်းခန့်မှာသာ တွေ့ရှိရပါတယ်။

အဆိုပါဓာတ်မတည့်ခြင်းတွေ ခံစားခဲ့ရတဲ့လူအနည်းစုဟာလည်း ကာကွယ်ဆေးထိုးပြီး အချိန်ကာလအတော်ကြာတော့မှ ခံစားရတာဖြစ်ပါတယ်။ယေဘုယျခြုံကြည့်ရင်တော့ အရင်ကာကွယ်ဆေးထိုးခြင်းအကြိမ်ကထက်စာရင် ခံစားရတဲ့ဘေးထွက်ဆိုးကျိုးအများစုဟာ ပြင်းထန်ခြင်းလျော့နည်းလာတာကို တွေ့ရပါတယ်။

အစ္စရေးလ်မှလေ့လာချက်ပြုလုပ်ရာမှာ အသက် ၁၈ နှစ်အထက် လူပေါင်း ၂,၀၄၉ ဦးပါဝင်ကာ အမျိုးသား ၅၁ ရာခိုင်နှုန်းနဲ့ အမျိုးသမီး ၄၉ ရာခိုင်နှုန်းရှိခဲ့ပါတယ်။

အသက် ၁၈-၃၉၊ အသက် ၄၀-၅၉၊ အသက် ၆၀ အထက်ဆိုပြီး အသက်အရွယ်အပိုင်းအခြား ၃ မျိုးတိုရဲ့ ဘေးထွက်ဆိုးကျိုးခံစားရမှုကို ကျန်းမာရေးဝန်ကြီးဌာနက လေ့လာစစ်ဆေးခဲ့ခြင်းဖြစ်ပါတယ်။
Source: The Jerusalem Post. 

#Local_Health
Published_ 11 Feb 2022

ရန်ကုန်ပြည်သူ့ဆေးရုံကြီး နှလုံးဆေးကုဌာနမှ အထူးကုဆရာဝန်ကြီးများ ကိုယ်တိုင် ကိုဗစ်ရောဂါခံစားနေရပါသဖြင့် နှလုံးဆေးကုပြင်ပလူနာဌာနအား ခေတ္တ ပိတ်ထားမည် ဖြစ်ကြောင်း ရန်ကုန်ပြည်သူ့ဆေးရုံကြီး၏ Facebook စာမျက်နှာမှ အသိပေးကြေညာထားပါတယ်။

နှလုံးဆေးကုပြင်ပလူနာဌာနကို ဖေဖော်ဝါရီ ၁၄ ရက်နေ့မှ ၁၈ ရက်နေ့ အထိ ခေတ္တ ပိတ်ထားမည်ဖြစ်ပြီး ဖေဖော်ဝါရီ ၂၁ ရက်နေ့မှစ၍ ပုံမှန်အတိုင်း ပြန်လည်ဖွင့်လှစ်မည်ဖြစ်ကြောင်း ထုတ်ပြန်ချက်မှာ ဖော်ပြထားပါတယ်။
ဆေးရုံကြီး၏ အရေးပေါ်လူနာများနှင့် အခြားအထူးကုပြင်ပလူနာများအား ပုံမှန်အတိုင်း ဖွင့်လှစ်ကုသပေးမည်ဖြစ်ပြီး အရေးပေါ်နှလုံးလူနာများအား ပုံမှန်အတိုင်း ဆေးရုံတင်ကုသမှုပေးမည်ဖြစ်ကြောင်း သိရပါတယ်။

ဖေဖော်ဝါရီ ၁၁ ရက် ဒီကနေ့ည သတင်းထုတ်ပြန်ချက်အရ ကိုဗစ် ၁၉ ရောဂါပိုးတွေ့ရှိသူ ၁,၆၀၇ ဦးရှိပြီး ပိုးတွေ့ရာနှုန်း ၆ ဒဿမ ၅ အထိပြန်လည်မြင့်တက်လာပါတယ်။

Photo CRD
ymg-mnn
#Yangon_Media_Group