#LocalNews
Published - 21 Feb 2022

အိုမီခရွန်ရောဂါပိုး စတင်တွေ့ရှိခဲ့တဲ့ အိန္ဒိယ-မြန်မာ နယ်စပ်မြို့တစ်မြို့ဖြစ်တဲ့ တမူးမြို့တွင် လက်ရှိအချိန်တွင် ကိုဗစ်အတည်ပြု လူနာ ၅၆ ဦးသာကျန်ရှိတော့တယ်လို့ တမူးမြို့ဒေသခံများထံမှ သိရပါတယ်။

#Yangon_Media_Group

#LocalNews
Published - 21 Feb 2022

YBS ယာဥ်လိုင်းအချို့က ယာဥ်စီးခနှုန်းထားများအား ပြောင်းလဲသတ်မှတ်လိုက်ပြီး ခရီးစဥ်တစ်ကြောင်းလျှင်
ကျပ် ၄၀၀ အထိ ပြောင်းလဲကောက်ခံလာကြတယ်လို့ ရန်ကုန်မြို့ရှိ ခရီးသွားပြည်သူများထံမှ သိရပါတယ်။

ဒါ့အပြင် အဆိုပါ ယာဥ်စီးခနှုန်းထားများကို မနက်ဖြန်( ဖေဖော်ဝါရီလ ၂၂)ရက်နေ့မှစတင်၍ ကောက်ခံသွား
မည်ဟု ယာဥ်လိုင်းအချို့၏ YBS ယာဥ်များပေါ်တွင် အသိပေးကြေညာထားသလို ယာဥ်စီးခနှုန်းထားများ
အနေနဲ့ ခရီးစဥ်တစ်ကြောင်းကို ငွေသားဖြင့်ဆိုပါက ကျပ် ၄၀၀ ကျသင့်မည်ဖြစ်ပြီး YPS ကဒ်ဖြင့် ဆိုပါက (ဒစ်စကောင့် ၁၀ ရာခိုင်နှုန်း)ဖြင့် ၃၆၀ ကျပ် ကျသင့်မှာဖြစ်တယ်လို့ ဆိုပါတယ်။

"တကယ်လို့ YBS ကားခတွေ ၄၀၀ ဖြစ်မယ်ဆိုရင် အသွားအပြန်တင် တစ်နေ့ လမ်းစရိတ်က ၈၀၀ ဖြစ်ပြီ။
ဒါက ကားတစ်ဆင့်ထဲ စီးရတဲ့သူတွေ အတွက်ပါ။တစ်ရက်ကို ကားနှစ်ဆင့် သုံးဆင့်စီးပြီး ရုံးတက်ရတဲ့သူတွေ သွားလာရတဲ့သူတွေဆိုရင် တွေးသာကြည့်ပေတော့ တကယ်အဆင်မပြေပါဘူး။ ယာဥ်စီးခနှုန်းထားက တအားများပါတယ်။ လိုင်းကား တစ်ခါစီးရင် ၄၀၀၊နှစ်ခါစီး ၈၀၀၊ သုံးခါစီး ၁,၂၀၀ ဆို နေ့စဥ်ဆိုရင် အလုပ်သွား၊အလုပ်ပြန်အတွက် တကယ်မလွယ်ပါဘူး။ ကားသုံးဆင့်စီးရတဲ့သူတွေဆိုရင် သွားပြီ။ အခုတောင် လှိုင်သာယာဘက်သွားတဲ့ ကားတွေဆိုရင် ဘယ်စီးစီး ၅၀၀ ဖြစ်နေပြီလို့ ကြားပါတယ်။ ကျွန်တော်တို့ အခုစီးနေတာ ခရီးစဥ်တစ်ကြောင်း ၃၀၀ ပေးရတယ်။ အခု ၄၀၀ တက်မယ်ဆိုတော့ နေ့စဥ်လိုင်းကားစီးဖို့တောင် အဆင်မပြေတဲ့ အနေအထားမှာရှိပါတယ်။"လို့ ရန်ကုန်မြို့ ရှိ ကုမ္ပဏီဝန်ထမ်းတစ်ဦးက YBS ယာဥ်စီးခများ တိုးမြှင့်လာခြင်းအပေါ် ၄င်း၏အမြင်ကို ပြောပြခဲ့ပါတယ်။

ပြည်တွင်းစက်သုံးဆီဈေးအပါအဝင် အခြားယာဉ်အပိုပစ္စည်းဈေးနှုန်း မြင့်တက်လာခြင်း၊ ပြုပြင်ထိန်းသိမ်းမှုစရိတ်များ မြင့်မားလာခြင်းတို့ကြောင့် အများပြည်သူ သယ်ယူပို့ဆောင်ရေးနှုန်းထားများ တိုးမြှင့်ကောက်ခံရန် ယခုဖေဖော်ဝါရီလဆန်းပိုင်းကတည်းက ယာဉ်လိုင်းကုမ္ပဏီများဘက်မှ ပြင်ဆင်လာခဲ့ခြင်းဖြစ်ပါတယ်။

ဒါ့အပြင် YBS ယာဉ်စီးခများကို ငွေကျပ် ၄၀၀ ထက်မပိုသောနှုန်းထား တရားဝင်ကောက်ခံနိုင်ရေး ယာဉ်လိုင်းကုမ္ပဏီများက YRTC ထံသို့ တင်ပြခဲ့ကြောင်း ယခုလဆန်းပိုင်းက သတင်းထွက်ပေါ်ခဲ့တာပါ။

“နဂိုကတည်းက ၅၀၀၊ ၁,၀၀၀ ကောက်တဲ့ ယာဉ်လိုင်းတွေကို အရေးယူတယ်။ အရင်ကတည်းက သူ့အပိုင်းလိုက် ၄၀၀ အထိက ခွင့်ပြုပြီးသား။ တိုးခွင့်တော့မပေးဘူး။"ဟု YRTC တွဲဖက်အတွင်းရေးမှူး ဦးလျန်ကျင့်မန်က ပြောပါတယ်။

ထို့အပြင် ရန်ကုန်မြို့တွင် ပြေးဆွဲလျက်ရှိနေသော YBS ယာဉ်စီးခများကို တိုးမြှင့်ကောက်ခံရန် ညွှန်ကြားထားခြင်းမရှိဘူးလို့လည်း ရန်ကုန်တိုင်းဒေသကြီး သယ်ယူပို့ဆောင်ရေး ကြီးကြပ်ကွပ်ကဲမှုကော်မတီ(YRTC)က မကြာသေးမီ ရက်ပိုင်းအတွင်းမှာ ထပ်မံအသိပေးကြေညာထားတာပါ။

လက်ရှိ ရန်ကုန်မြို့တွင် YBS ယာဉ်လိုင်း ၁၁၈ လိုင်း၊ ယာဉ်စီးရေ ၂,၇၅၂ စီးရှိပြီး နေ့စဥ် စီးနင်းသွားလာသူ ခရီးသည်စုစုပေါင်းက ၅၁၄,၉၄၃ ဦးအထိ ရှိတယ်လို့ YRTC ရဲ့ ထုတ်ပြန်ချက်များအရ သိရပါတယ်။

ymg/kg
#Yangon_Media_Group

#LocalNews
Published - 21 Feb 2022

ဖေဖော်ဝါရီလ ၂၁ ရက်နေ့ မွန်းလွဲပိုင်းက ရန်ကုန်တိုင်းဒေသကြီး မရမ်းကုန်မြို့နယ် အင်းစိန်လမ်းမကြီးနဲ့ သမိုင်းဘူတာရုံလမ်းထောင့်တွင် ပေါက်ကွဲမှုဖြစ်ပွားရာ လုံခြုံရေးတပ်ဖွဲ့ဝင် ၃ ဦး ထိခိုက်ဒဏ်ရာရရှိခဲ့တယ်လို့ ရန်ကုန်တိုင်းဒေသကြီး ရဲတပ်ဖွဲ့ကသိရပါတယ်။

ဖြစ်စဥ်မှာ ယနေ့ မွန်းလွဲ ၁ နာရီ ၂၅ မိနစ်အချိန်က မရမ်းကုန်းမြို့နယ်၊ ဘုရင့်နောင်၊ (၂)ရပ်ကွက်၊ ရန်ကုန်-အင်းစိန်လမ်းနှင့် သမိုင်းဘူတာရုံလမ်းထာင့်တွင် ပေါက်ကွဲမှုဖြစ်ပွားကြောင်း သတင်းအရ သွားရောက်စိစစ်ခဲ့ရာ Mark II အဖြူရောင်ယာဉ် (စိစစ်ဆဲ)ပေါ်မှ လက်ပစ်ဗုံးဖြင့် ပစ်ခဲ့တာကြောင့် လမ်းထောင့်၊ City Mart ရှေ့ရှိ ယာဉ်ထိန်း Police Box အနီးသို့ ကျရောက်ပေါက်ကွဲခဲ့တာဖြစ်ပါတယ်။

"ပေါက်ကွဲမှုဖြစ်စဥ်က မှန်ကန်ပါတယ် ယာဥ်တစ်စီးပေါ်က လက်ပစ်ဗုံးနဲ့ပစ်သွားတာပါ။တပ်ဖွဲ့ဝင်အချို့ ထိခိုက်ဒဏ်ရာရှိပါတယ်"လို့ ရဲတပ်ဖွဲ့အရာရှိတစ်ဦးက အတည်ပြုပြောကြားပါတယ်။

အဆိုပါပေါက်ကွဲမှုကြောင့် ယာဉ်ထိန်း Police Box အောက်ခြေကာရံထားတဲ့ သွပ်ပြားများ ကွာကျပျက်ဆီးခဲ့ပြီး ယာဉ်ထိန်း Police Box တွင် တာဝန်ထမ်းဆောင်နေတဲ့ လုံခြုံရေးတပ်ဖွဲ့ဝင်တစ်ဦး ဦးခေါင်းပေါက်ပြဲဒဏ်ရာ၊ ယာဉ်ထိန်းရဲတပ်ဖွဲ့ဝင်တစ်ဦး ပေါက်ပြဲဒဏ်ရာများ(မစိုးရိမ်ရ)၊ ရဲတပ်ဖွဲ့ဝင်တစ်ဦး ဝဲ/ယာ ခြေထောက်တို့တွင် ပေါက်ပြဲဒဏ်ရာများ(မစိုးရိမ်ရ)ရရှိခဲ့တယ်လို့ သိရပါတယ်။

ဒဏ်ရာရရှိသူ တပ်ဖွဲ့ဝင် (၃)ဦးကို ဆေးရုံသို့ပို့ဆောင်ထားပြီး လက်ပစ်ဗုံးနဲ့ပစ်ခတ်တဲ့ Mark II အဖြူရောင်ယာဉ်အား ဖမ်းဆီးရမိရေး ပိတ်ဆို့ဆောင်ရွက်နေတယ်လို့ သိရပါတယ်။

ymg/hm
#Yangon_Media_Group

#DailyNews
Published - 21 Feb 2022

၁။ အိုမီခရွန်ရောဂါပိုး စတင်တွေ့ရှိခဲ့တဲ့ တမူးမြို့တွင် ကိုဗစ်လူနာ ၅၆ ဦးသာကျန်ရှိ

၂။ ရန်ကုန်တိုင်းအတွင်း ကိုဗစ်အတည်ပြုလူနာတွေအနေဖြင့် နေအိမ်ကစတင်ပြီး ဗဟိုအဆင့်အထိ ကုသနိုင်အောင် စီစဉ်ထား

၃။ မိုးလေဝသ သတင်း

၄။ တရုတ်နိုင်ငံမှ ဂျာမနီနိုင်ငံသို့ ဆက်သွယ်ထားသည့် ပထမဦးဆုံးနှစ်လမ်းသွားကုန်တင်ရထားလမ်း စတင်ပြေးဆွဲ.....အစရှိတဲ့သတင်းတွေကို တင်ဆက်ပေးသွားမှာပဲဖြစ်ပါတယ်။

#Yangon_Media_Group

#LocalNews
Published - 21 Feb 2022

ညောင်သုံးပင်ဆရာတော်ကြီး၏ ကြွင်းကျန်ရုပ်ကလပ်အား မိုးကုတ်မြို့ရှိ ညောင်သုံးပင်သာမဏေကျော်စာသင်တိုက်တွင် အပူဇော်ခံထားရှိတယ်လို့ သိရပါတယ်။

ညောင်သုံးပင်ဆရာတော်ကြီး၏ ကြွင်းကျန်သော ရုပ်ကလပ်ကို MAI စင်းလုံးငှါးလေယာဉ်ဖြင့် ယခု ဖေဖော်ဝါရီလ ၁၇ ရက်နေ့က ထိုင်းနိုင်ငံမှ မြန်မာနိုင်ငံသို့ ပြန်လည်ပင့်ဆောင်ခဲ့ခြင်းဖြစ်ပါတယ်။

ဆရာတော်ကြီး၏ ကြွင်းကျန်သောရုပ်ကလပ်တော်ကို မိုးကုတ်မြို့မှာ ယခုဖေဖော်ဝါရီလ ၂၆ ရက်နေ့အထိ အပူဇော်ခံထားရှိမှာဖြစ်တယ်လို့လည်း သိရပါတယ်။

မိုးကုတ်မြို့၊ ညောင်သုံးပင်သာမဏေကျော်စာသင်တိုက်ဆရာတော် နိုင်ငံတော်သံဃမဟာနာယကအဖွဲ့ (တွဲဖက်အကျိုးတော်ဆောင်) အဂ္ဂမဟာပဏ္ဍိတ အဂ္ဂမဟာဂန္ထဝါစကပဏ္ဍိတ အဂ္ဂမဟာသဒ္ဓမ္မဇောတိကဓဇ ဓမ္မကထိကဗဟုဇနဟိတဓရ ဆရာတော် ဒေါက်တာဘဒ္ဒန္တတေဇောသာရ သက်တော်(၅၉)နှစ်သည် ထိုင်းနိုင်ငံ၊ ဘန်ကောက်မြို့၌ အသဲ ရောဂါကြောင့် ဆေးကုသမှုခံယူနေစဥ် ယခုဖေဖော်ဝါရီလ ၁၄ ရက်၊ နံနက် (၁၂ နာရီ ၅၄ မိနစ်)အချိန်တွင် ဘဝနတ်ထံ
ပျံလွန်တော်မူသွားခဲ့တာဖြစ်ပါတယ်။

ဆရာတော်ကြီး၏ အန္တိမဈပနကို ကျင်းပပူဇော်သွားမည့် အစီစဉ်အသေးစိတ်ကိုလည်း ထပ်မံအသိပေးကြေညာသွားမယ်လို့ ဆရာတော်ကြီး၏ ဒါယိကာ၊ ဒါယိကာမများထံမှ သိရပါတယ်။

ymg/kg
#Yangon_Media_Group

#LocalNews
Published - 21 Feb 2022

ထိုင်းနိုင်ငံ၊ မဟာချိုင်နယ်မြေက ထိုင်းရဲအချို့ မြန်မာရွှေ့ ပြောင်းအလုပ်သမားတွေအပေါ်ဖမ်းဆီး ငွေညှစ်မှုတွေရှိနေပြီး အဆိုပါဖြစ်စဉ် တွေဟာ အခုနောက်ပိုင်းကာလ တွေမှာ ပိုမိုဆိုးရွားလာတယ်လို့ သိရပါတယ်။

မဟာချိုင်သည် မြန်မာရွှေ့ ပြောင်းအလုပ်သမားတွေ အများဆုံးရှိ နေသည့် နေရာလည်းဖြစ်ပြီး ယခုရက်ပိုင်းအတွင်း မြန်မာလုပ်သားတွေ အလုပ်သွားပြန်လမ်းမှာ ထိုင်းပုလိပ်များက စစ်ဆေး ဖမ်းဆီးတာ တွေကို ပြုလုပ် နေခြင်းဖြစ်တယ်လို့လည်း ထိုင်းနိုင်ငံရှိ မြန်မာရွှေ့ ပြောင်း အလုပ်သမားအရေးကူညီ ဆောင်ရွက်ပေးနေသူတွေကဆိုပါတယ်။

"မဟာချိုင်နယ်မြေက ထိုင်းရဲအချို့ကမြန်မာလုပ်သားတွေကို တွေ့တာနဲ့ ငွေထုပ်ကြီး
တွေ့သလိုပဲ။ ပျော်ပျော်ကြီး စစ်ဆေးမေးမြန်း ဖမ်းဆီး ငွေညှစ်တော့တာပါပဲ။ ခုနောက်ပိုင်း ပိုဆိုးလာတယ်။မြန်မာဆိုတာ သိတာနဲ့ အစစ်အဆေး အမေးအမြန်းမရှိ မဟာချိုင် ပုလိပ်ရုံးတန်းခေါ်သွားပြီးလေးထပ်အောက်ထပ် ထောင့်ခန်းမှာ ချောင်ပိတ်ပြီး
ငွေညှစ်တော့တာပဲ။ ခုလိုကာလကြီးမှာ ယခင်က စာရွက်စာတမ်း ပြည့်စုံပါတယ်လို့ လက်မထောင်ခဲ့သူတွေတောင် စာအုပ်တစ်အုပ်နဲ့တင် တိုင်ပတ်နေတဲ့ အချိန်ဆိုတော့ကာ အထောက်အထားပြည့်စုံသူကိုတောင်ရတဲ့နည်းနဲ့ ငွေညှစ်တာ ခုလို သက်တမ်းတိုး
ကာလဆိုတော့ စဉ်းစားသာကြည့်တော့ပေါ့"လို့ မြန်မာ ရွှေ့ ပြောင်း အလုပ်သမား အရေး ကူညီ ဆောင်ရွက်ပေးနေသူ တစ်ဦးကပြောပါတယ်။

" ပြောရရင် နောက်ဆုံးတော့ ပုလိပ်ရှေ့ ခလုပ်တိုက်လဲတဲ့ မြန်မာလုပ်သားတွေပဲ မိအေးနှစ်ခါနာရတဲ့အဖြစ်ပါ။"လို့ ၎င်းကဆက်လက်ပြောပြခဲ့ပါတယ်။

ဒါ့အပြင် ယခုကာလမှာ ထိုင်းနိုင်ငံထဲသို့ တရားမဝင်လမ်းက ဝင်ရောက်လာတဲ့သူ တွေကိုလည်း နေ့စဉ်ဆိုသလို ထိုင်းအာဏာပိုင်တွေကဖမ်းဆီးမှုတွေလည်းရှိနေတာဖြစ်ပါတယ်။

ယခုဖေဖော်ဝါရီလ ၁၉ ရက် နေ့ကလည်း ထိုင်းနိုင်ငံထဲသို့ တရားမဝင်လမ်းက ဝင် ရောက်လာတဲ့ မြန်မာနိုင်ငံ ၂၁၈ ဦးကို ထိုင်းအာဏာပိုင်တွေက ဖမ်းဆီးခဲ့ပါသေးတယ်။

"အားလုံးကို သတိပေးချင်တာက ထိုင်းနိုင်ငံဟာဟိုးယခင်ကလို ခေတ်မကောင်းတော့ပါဘူး
ဆိုတာပါပဲ။"လို့ သူက ထပ်လောင်းပြောပြခဲ့ပါတယ်။

ပုံ - မြန်မာလုပ်သားတွေ အလုပ်သွားပြန်လမ်းမှာထိုင်းပုလိပ်များက ယခုရက်ပိုင်း စစ်ဆေးနေစဉ်။

Photo - ကျော်ရဲအောင်(မဟာချိုင်)

ymg/kg
#Yangon_Media_Group

#LocalHealth
Published -21 Feb 2022

ကိုဗစ်ကူးစက်မှု ပြန်လည်မြင့်တက်လာတာကြောင့် မကွေးတိုင်းဒေသကြီးအတွက် Positive Centre နဲ့ Quarantine Centre တွေ ပြန်လည်ဖွင့်လှစ်နိုင်ရေး ပြင်ဆင်နေပြီလို့ မကွေးတိုင်းဒေသကြီး အစိုးရအဖွဲ့ကနေ သိရပါတယ်။

လက်ရှိတွင် မကွေးမြို့နယ်အတွင်းရှိ ကိုဗစ်-၁၉ ပိုးတွေ့လူနာများနဲ့ ပိုးတွေ့ထိစပ်လူနာများထားရှိနိုင်ရေးအတွက် အစိုးရစက်မှုလက်မှုသိပ္ပံကျောင်း၊ အခြေခံကျန်းမာရေးတက္ကသိုလ်၊ကွန်ပျူတာတက္ကသိုလ်ရှိ အဆောင်များတွင် Positive Centre နှင့် Quarantine Centre များ ဖွင့်လှစ်နိုင်ရေးအတွက် မကွေးမြို့နယ် အထွေထွေအုပ်ချုပ်ရေးဦးစီးဌာနဝန်ထမ်းများ၊ မြို့နယ်မီးသတ်တပ်ဖွဲ့ဝင်များ၊ ရပ်/ ကျေးအုပ်ချုပ်ရေးအဖွဲ့များ ပူးပေါင်းကာ ပြင်ဆင်ဆောင်ရွက်နေတယ်လို့ တိုင်းအစိုးရတာဝန်ရှိသူတစ်ဦးက ပြောပါတယ်။

"ပိုးတွေ့လူနာတွေနဲ့ ထိစပ်လူနာတွေထားရှိဖို့အတွက် ကျောင်းဆောင်တွေမှာ ကွာရန်တင်းစင်တာတွေ ပြင်ဆင်ထားပါတယ်။ကျန်းမာရေးအသိပညာတွေပေးတာကိုလည်း ဆက်တိုက်ဆောင်ရွက်နေတယ်ဗျ"လို့ တိုင်းအစိုးရတာဝန်ရှိသူတစ်ဦးက ပြောပါတယ်။

ဖေဖော်ဝါရီလ ၂၁ ရက် ယနေ့မှာလည်း တောင်တွင်းကြီးမြို့နယ်အတွင်း ကိုဗစ်-၁၉ ရောဂါဖြစ်ပွားတဲ့ လူနာများအား ထားရှိနိုင်ရေး positive center ပရပ်ကြယ်တိုက်နယ် ဆေးရုံကိုလည်း ပြင်ဆင်ဆောင်ရွက်နေတယ်လို့ သိရပါတယ်။

ဖေဖော်ဝါရီလ၂၀ ရက်နေ့အတွက် COVID-19 ရောဂါ စောင့်ကြပ်ကြည့်ရှုမှု အခြေအနေထုတ်ပြန်ချက်အရ COVID-19 ဓာတ်ခွဲအတည်ပြုလူနာ (၃,၀၅၀) ဦး တွေရှိခဲ့ပြီး မကွေးတိုင်းဒေသကြီးအတွင်း ပိုးတွေ့လူနာ ၁၆၁ ဦး တွေ့ရှိခဲ့တာဖြစ်ပါတယ်။

ymg/hm
#Yangon_Media_Group

#WorldPolitics
Published - 21 February 2022

ယူကရိန်းအရေးကိစ္စနဲ့ပတ်သက်ပြီး ထိပ်သီးအစည်းအဝေးပွဲပြုလုပ်ဖို့ အမေရိကန်သမ္မတ'ဂျိုးဘိုင်ဒန်'နဲ့ ရုရှားသမ္မတ'ဗလက်ဒီမီယာပူတင်'တို့ ကြိုတင်သဘောတူညီထားပြီလို့ အမေရိကန်နဲ့ ပြင်သစ်နိုင်ငံတို့မှခေါင်းဆောင်များက ဖော်ပြခဲ့ကြပါတယ်။

ဒီဆွေးနွေးပွဲဟာ လတ်တလောဆယ်စုနှစ်များအတွင်း ဥရောပမှအန္တရာယ်အကြီးမားဆုံးပဋိပက္ခကြီးတစ်ခုကို ဖြေရှင်းနိုင်ဖို့ နည်းလမ်းဖြစ်လာနိုင်ပါတယ်။
ပြင်သစ်သမ္မတ'အီမန်နျူယယ်မက်ခရွန်'က ဥရောပမှာ လုံခြုံရေးနဲ့ ဗျူဟာမြောက်တည်ငြိမ်အေးချမ်းရေး ရရှိရန်ရည်ရွယ်ချက်ဖြင့် အဆိုပါခေါင်းဆောင်နှစ်ဦးကို ထိပ်သီးအစည်းအဝေးတက်ရောက်ရန် ဖိတ်ခေါခဲ့ကြောင်း တနင်္လာနေ့က ပြောကြားခဲ့ပါတယ်။

ရုရှားဘက်က ကျူးကျော်မှုမပြုလုပ်မှသာ 'ဘိုင်ဒန်'က တွေ့ဆုံဆွေးနွေးဖို့လက်ခံသွားမှာဖြစ်ကြောင်း အိမ်ဖြူတော်မှ ထုတ်ပြန်ကြေညာခဲ့ပါတယ်။
"သံတမန်ရေးအရဖြေရှင်းဖို့ ဆိုရင် အမြဲတမ်းအဆင်သင့်ပါပဲ။ ရုရှားတို့ ကစစ်ရေးလမ်းကြောင်းကို ရွေးချယ်မယ်ဆိုရင်လည်း လျင်မြန်ထိရောက်စွာ ဒဏ်ခတ်အရေးယူသွားဖို့ ပြင်ဆင်ထားပါတယ်" လို့အိမ်ဖြူတော်မှ မီဒီယာရှင်းလင်းပွဲတာဝန်ခံ 'ယန်းဆာကီ'က ပြောဆိုလိုက်ပါတယ်။

ထိပ်သီးအစည်းအဝေးပွဲနဲ့ပတ်သက်ပြီး ရုရှားဘက်က ချက်ခြင်းတုန့်ပြန်ဖြေကြားခြင်း မရှိသေးပါဘူး။အစည်းအဝေးပွဲပြုလုပ်ဖို့ 'မက်ခရွန်'၊ 'ဘိုင်ဒန်'၊ 'ပူတင်'၊ ဗြိတိန်ဝန်ကြီးချုပ် 'ဘိုရစ်ဂျွန်ဆန်'တို့ တယ်လီဖုန်းဖြင့် အကြိမ်ရေများစွာဆက်သွယ်ပြောဆိုခဲ့ကြပေမယ့် အကြောင်းအရာအတိအကျကိုတော့ ရှင်းရှင်းလင်းလင်း မသိရှိရသေးပါဘူး။

ဖေဖော်ဝါရီ ၂၄ ရက်နေ့တွင် အမေရိကန်နိုင်ငံခြားရေးဝန်ကြီး 'အန်တိုနီဘလင်ကန်'နဲ့ ရုရှားနိုင်ငံခြားရေးဝန်ကြီး 'ဆာဂျီလက်ဗ်ရော့ဗ်'တို့ တွေ့ဆုံဆွေးနွေးသွားကြရင်း ထိပ်သီးအစည်းအဝေးပွဲအတွက် အကြောင်းအရာများကို အကောင်အထည်ဖော်သွားမှာဖြစ်ကြောင်း ပြင်သစ်အစိုးရရုံးနဲ့ အိမ်ဖြူတော်တို့က ပြောကြားခဲ့ပါတယ်။

ယူကရိန်းနယ်စပ်အနီးတွင် ရုရှားတပ်ဖွဲ့များအင်အားတိုးချဲ့လာခြင်းကြောင့် တင်းမာမှုများရှိလာခဲ့ပြီးနောက် အခုလိုအစည်းအဝေးပွဲပြုလုပ်ဖို့ စီစဉ်လာကြတာဖြစ်ပါတယ်။
ပြီးခဲ့တဲ့နှစ်နှောင်းပိုင်းကတည်းက ယူကရိန်းနယ်စပ်အနီးမှာ ရုရှားတပ်ဖွဲ့အများအပြား ဖြန့်ကျက်ထားရှိနေတာကြောင့် ကျူးကျော်ဖို့ပြင်ဆင်နေတာဖြစ်နိုင်ကြောင်း အနောက်နိုင်ငံတွေက စိုးရိမ်နေခဲ့ပါတယ်။

ဘီလာရုစ်နိုင်ငံတွင်းမှာလည်း ရုရှားစစ်ရေးလေ့ကျင့်မှုတွေ ဆောင်ရွက်နေတယ်လို့ ဘီလာရုစ်ကာကွယ်ရေးဝန်ကြီးဌာနက ကြေညာထားတဲ့အပြင် ယူကရိန်းအနီးမှာ ရုရှားဘက်က သံချပ်ကာယာဉ်တွေ၊ စစ်သည်တွေ ထပ်မံရောက်ရှိလာတာကို အမေရိကန်အခြေစိုက်မက်ဆာဂြိုဟ်တုကုမ္ပဏီရဲ့ ဂြိုဟ်တုပုံရိပ်များမှတဆင့် မြင်တွေ့ခဲ့ရပါတယ်။

ဒီလိုစစ်ရေးလေ့ကျင့်မှုတွေ တိုးချဲ့ပြုလုပ်လာတာက ရုရှားတို့ကျူးကျော်တော့မယ့်အရိပ်အယောင်ဖြစ်ကြောင်း 'အန်တိုနီဘလင်ကန်'က သတိပေးထားပြီး ရုရှားတို့ကတော့ ကျူးကျော်ဖို့အစီအစဉ်မရှိဘူးလို့ ထပ်ခါထပ်ခါငြင်းဆိုထားပါတယ်။

"တကယ့်စစ်ပွဲဖြစ်မလာခင်အထိတော့ ရသမျှအခွင့်အရေးတိုင်း အချိန်မိနစ်တိုင်းကိုအသုံးချပြီး သမ္မတ'ပူတင်'နဲ့ သံတမန်ရေးဆွေးနွေးသွားနိုင်ဖို့ ကြိုးပမ်းသွားမှာပါ" လို့ 'ဘလင်ကန်'က ဆိုပါတယ်။

ယူကရိန်းအစိုးရအဖွဲ့တွေနဲ့ ရုရှားကျောထောက်နောက်ခံပြု ယူကရိန်းခွဲထွက်ရေးသမားတွေကြား ပစ်ခတ်မှုတွေ အဖြစ်များလျက်ရှိနေပါတယ်။
ယူကရိန်းအရှေ့ဘက်ရှိ ခွဲထွက်ရေးအဖွဲ့များကြီးစိုးရာ ဒိုနက်စ်မြို့လယ်မှာ ပေါက်ကွဲမှုဖြစ်ပွားခဲ့ပြီး တနင်္လာနေ့အထိ တိုက်ခိုက်မှုဖြစ်ပွားတဲ့အသံတွေ ဆက်တိုက်ကြားနေရတာဖြစ်ပါတယ်။

ယူကရိန်းအစိုးရတပ်ဖွဲ့တွေရဲ့ပစ်ခတ်မှုကြောင့် အရပ်သားနှစ်ဦးသေဆုံးခဲ့ကြောင်း ယူကရိန်းအရှေ့ဘက်ရှိ ရုရှားထောက်ခံခွဲထွက်ရေးသမားတွေက တနင်္လာနေ့က စွပ်စွဲပြောကြားလိုက်ကြောင်း ရုရှားနိုင်ငံပိုင် RIA သတင်းဌာနက ဖော်ပြလိုက်ပါတယ်။

ယူကရိန်းအစိုးရအဖွဲ့ရဲ့တုန့်ပြန်ချက်မှာတော့ ရုရှားထောက်ခံရေးသမားတွေက ယူကရိန်းအရှေ့ဘက်ရှိ သူတို့လူမျိုးတွေကိုပြန်သတ်ပြီး အစိုးရအဖွဲ့အပေါ် အပြစ်လွှဲချဖို့ ကြိုးပမ်းနေတာဖြစ်တယ်လို စွပ်စွဲလိုက်ပါတယ်။
"မကြာခင် ဥရောပမှာ စစ်ဘေးကပ်ဆိုက်တော့မယ်ထင်ပါတယ်" လို ချက်ပြည်သူ့သမ္မတနိုင်ငံမှ ဝန်ကြီးချုပ်'ပီတာဖီယာလာ'က တီဗီအင်တာဗျူးတစ်ခုမှာ မှတ်ချက်ပြုခဲ့ပါတယ်။
Source: Reuters. 

#WorldHealth
Published - 21 February 2022
ကိုဗစ်ရောဂါကူးစက်ခံရပြီး ပြန်လည်သက်သာလာတဲ့သူတွေမှာ စိတ်ကျန်းမာရေးထိခိုက်မှုအမျိုးမျိုး ဖြစ်လာနိုင်ချေများနေပြီး စိတ်ပူပန်ခြင်း၊ စိတ်ဓာတ်ကျခြင်း၊ ဆေးစွဲခြင်း၊ အသိဉာဏ်ချို့ယွင်းခြင်းတို့ ဖြစ်ပေါ်နိုင်ကြောင်း လေ့လာမှုကြီးတစ်ခုမှာ တွေ့ရှိခဲ့ရာ ကြာသပတေးနေ့က ဖော်ပြခဲ့ကြပါတယ်။

"ကပ်ရောဂါတွေကြောင့် အမေရိကန်ရှိလူတွေ စိတ်ကျန်းမာရေးချိုယွင်းမှု ကြုံတွေ့ရနိုင်တယ်ဆိုတာကို သိထားပါတယ်။ ဒါပေမဲ့ ကိုဗစ်ကြောင့် ဘယ်လောက်အထိ ဆိုးဆိုးရွားရွားဖြစ်နိုင်သလဲဆိုတာကိုတော့ သေချာမသိရသေးပါဘူး" လို့ ဝါရှင်တန်တက္ကသိုလ်မှ သုတေသနဦးစီးချုပ် ဒေါက်တာ'ဇီယက်အယ်အာလီ'က ပြောပြသွားပါတယ်။

'အယ်အာလီ'နဲ့အဖွဲ့က ၂၀၂၀ မတ်လမှ ၂၀၂၁ ဇန်နဝါရီလအတွင်း ကိုဗစ်ကူးစက်ခဲ့တဲ့ လူနာပေါင်း ၁ သိန်းခွဲကို လေ့လာရှာဖွေခဲ့ကြပြီး နောက်တစ်နှစ်ကြာတဲ့အထိ စောင့်ကြည့်ခဲ့ကြပါတယ်။

အဆိုပါလူနာတွေနဲ့ ကိုဗစ်ကူးစက်ခြင်းမခံရသော်လည်း ကပ်ရောဂါကြောင့် လော့ဒေါင်းချခင်း၊ စာသင်ကြားရမှုမရှိခြင်း၊ အထီးကျန်ခြင်း၊ အလုပ်လက်မဲ့ဖြစ်ခြင်း၊ မိတ်ဆွေအပေါင်းအသင်းများနဲ့ဝေးကွာခြင်း စတဲ့ အခြေအနေတွေကို ခံစားခဲ့ရတဲ့ လူပေါင်း ၅ သန်းကျော်နဲ့ နှိုင်းယှဉ်ခဲ့ကြပါတယ်။

ကိုဗစ်ရောဂါကူးစက်ခဲ့တဲ့လူတွေမှာ စိတ်ကျန်းမာရေးအခြေအနေအမျိုးမျိုး ဖြစ်နိုင်ချေများကြောင်း၊ အများစုက ဆေးရုံတက်ကုသခြင်းမခံခဲ့ရပေမယ့်လည်း အိမ်မှာတင် ရောဂါအပျော့စားခံစားရာကနေ သက်သာလာတဲ့သူတွေဖြစ်ကြောင်း 'အာလီ'က ဆိုပါတယ်။

စိတ်ပူပန်ခြင်းဝေဒနာခံစားရသူ ၃၅ ရာခိုင်နှုန်း၊ စိတ်ဓာတ်ကျဝေဒနာခံစားရသူ ၃၉ ရာခိုင်နှုန်း၊ စိတ်ဖိစီးမှုနဲ့ပတ်သက်တဲ့အခြေအနေခံစားရသူ ၃၈ ရာခိုင်နှုန်း၊ အိပ်မပျော်ခြင်းဝေဒနာခံစားရသူ ၄၁ ရာခိုင်နှုန်း၊ ဆေးစွဲခြင်းခံစားရနိုင်ချေ ၇၆ ရာခိုင်နှုန်းနဲ့ အသိဉာဏ်ချို့ယွင်းခြင်းဖြစ်နိုင်ချေ ၈၀ ရာခိုင်နှုန်းတို့ ရှိကြောင်း ဖော်ပြထားပါတယ်။

လေ့လာမှုပြုလုပ်ခဲ့တဲ့ လူနာတွေရဲ့ပျမ်းမျှအသက်က ၆၁ နှစ်ရှိပြီး ၉၀ ရာခိုင်နှုန်းက အမျိုးသားတွေဖြစ်ပေမယ့် နောက်ဆုံးခြုံကြည့်တဲ့အခါမှာတော့ အသက်အရွယ်ပေါင်းစုံမှာ ဖြစ်ပွားနိုင်ပြီး အမျိုးသမီးတွေမှာလည်း ဖြစ်နိုင်ချေရှိပါတယ်။

ကပ်ရောဂါမဖြစ်ခင်အချိန်ကာလတွေမှာ အမေရိကန်နိုင်ငံအတွင်း ဆေးခြောက်သုံးစွဲမှုတွေကို ထိန်းချုပ်ထားခဲ့တာကြောင့် ဆေးလွန်ပြီးသေဆုံးမှုတွေ အဖြစ်နည်းလာခဲ့ပေမယ့် အခုကပ်ရောဂါကာလမှာတော့ ဒီပြဿနာတွေ ပြန်အဖြစ်များလာပြီဖြစ်ပါတယ်။

စိတ်ဓာတ်ကျဝေဒနာခံစားရမှုနဲ့ မိမိကိုယ်ကိုအဆုံးစီရင်ချင်တဲ့စိတ်အခြေအနေတွေကိုလည်း ထိန်းချုပ်နိုင်ဖို့ သတိထားသွားရပါမယ်။
Source: St. Louis Post-Dispatch 

#WorldHealth
Published - 21 February 2022

လေ့လာတွေ့ရှိချက်အသစ်အရ 'မ'ဟော်မုန်းတစ်ခုဖြစ်တဲ့ အီစထရိုဂျင်ဟာ ကိုဗစ်ရောဂါကြောင့်အသက်သေဆုံးမှုကို ကာကွယ်ပေးနိုင်သလားဆိုတဲ့ သံသယတွေဖြစ်ပေါ်လာစေပါတယ်။

မီးယပ်သွေးဆုံးပြီးသားဖြစ်ပြီး အီစထရိုဂျင်ပမာဏကျဆင်းနေတဲ့ အမျိုးသမီးကိုဗစ်လူနာ ၁၄,၆၈၅ ယောက်ကို ဆွီဒင်မှသုတေသီတို့ က လေ့လာခဲ့ကြပါတယ်။ထိုအမျိုးသမီးတွေထဲမှ ၁၇ ရာခိုင်နှုန်းဟာ မီးယပ်သွေးဆုံးဝေဒနာသက်သာစေဖို့အတွက် အီစထရိုဂျင်ဖြည့်စွက်အားဆေးတွေ သောက်သုံးနေကြသူတွေဖြစ်ပါတယ်။

အခြားရောဂါအခြေအနေတွေနဲ့ပါ တွက်ချက်လေ့လာလိုက်တဲ့အခါ အီစထရိုဂျင်အားဆေးသောက်သုံးနေသူတွေက မသောက်သုံးတဲ့သူတွေထက် ကိုဗစ်ရောဂါကြောင့်အသက်သေဆုံးမှုနှုန်းကို ၅၃ ရာခိုင်နှုန်းလျှော့ချပေးနိုင်ကြောင်း တွေ့ရှိခဲ့ကြပါတယ်။

ဒီလိုစူးစမ်းလေ့လာမှုတွေမှာ အီစထရိုဂျင်ပမာဏမြင့်မားခြင်းက ရောဂါကာကွယ်နိုင်တယ်ဆိုတဲ့ အထောက်အထားတော့ မပြနိုင်ပါဘူး။ဒါ့အပြင် ကိုဗစ်ကာကွယ်ဆေးတွေမရရှိခင်က အမျိုးသမီးတွေမှာ ရောဂါကူးစက်ခဲ့ကြောင်း အူမေယာတက္ကသိုလ်မှ ဒေါက်တာ'မာလင်ဆန်း'က ပြောကြားခဲ့ပါတယ်။

"ကိုဗစ်ကာကွယ်ဆေးထိုးနှံခြင်းက ကိုဗစ်ကြောင့်အသက်သေဆုံးမှုကို ကာကွယ်နိုင်တယ်လို့ ထင်ထင်ရှားရှားပြသနေပေမယ့် အီစထရိုဂျင်ဟော်မုန်းကို ထည့်သွင်းစဉ်းစားရာမှာတော့ ခန့်မှန်းလို့ မရနိုင်ပါဘူး" လို့ 'မာလင်ဆန်း'က ဆိုပါတယ်။

အီစထရိုဂျင်က ဆေးရုံတက်ကုသခံယူနေရတဲ့ ကိုဗစ်လူနာတွေကို ကာကွယ်ပေးတယ်ဆိုတဲ့ ယူဆချက်အား တူလိန်းတက္ကသိုလ်မှာ အပြင်းအထန်စမ်းသပ်စစ်ဆေးနေပြီဖြစ်ပါတယ်။
Source: Re 

Published 20 February 2022

သမ္မတဟောင်းဒေါ်နယ်ထရမ့်ရဲ့ ဆိုရှယ်မီဒီယာပလက်ဖောင်းအသစ်တစ်ခုဖြစ်တဲ့ Truth Social ဟာ ဖေဖော်ဝါရီ(၂၁)ရက် တနင်္လာနေ့(မနက်ဖန်)မှာ အက်ပဲလ်ရဲ့ စတိုးကနေ စတင်လွှင့်တင်တော့မယ်လို့ ရိုက်တာကရေးသားပါတယ်။

ရိုက်တာက တွေမြင်ခဲ့ရတဲ့ အမှုဆောင်အရာရှိတစ်ဦးစမ်းသပ်အသုံးပြုနေတဲ့ အဲဒီအက်ပလီကေးရှင်းမှာ တင်ထားတဲ့ ပို့စ်တစ်ခုအရ သိရတာလို့ သတင်းကရေးသားပါတယ်။

သောကြာနေ့က စမ်းသပ်အသုံးပြုသူတွေထဲက ဘီလီဘီလ်လို့ဖော်ပြထားတဲ့ Truth Social ကွန်ယက်ရဲ့ ထုတ်ကုန်အရာရှိချုပ်က ဖိတ်ခေါ်ပြီးစမ်းသပ်အသုံးပြုခွင့်ရတဲ့သူတွေရဲ့ မေးခွန်းတွေကို သူ့ရဲ့ တရားဝင်အကောင့်ကနေ ပြန်လည်ဖြေကြားခဲ့ပါတယ်။တစ်ဦးက ဒီအက်ပလီကေးရှင်းကို ဘယ်တော့စသုံးနိုင်မလဲလို့မေးတဲ့အခါ “ ကျွန်တော်တို့ ဖေဖော်ဝါရီ၂၁ရက် တနင်္လာနေ့မှာ စတင်အသုံးပြုနိုင်ဖို့ လက်ရှိမှာ စီစဉ်ထားပါတယ်” လို့ သူကပြန်ဖြေထားပါတယ်။

ရိုက်တာက screenshots မှာ မြင်ခဲ့ရတဲ့ မှာ အက်ပလီကေးရှင်းရဲ့ဗားရှင်းဟာ အဆင့်(၁၀)ဖြစ်နေပြီး ဒါဟာ အများပြည်သူသုံးနိုင်တဲ့အဆင့် လို့ ဆိုပါတယ်။ဗုဒ္ဓဟူးနေ့ညအထိ ဗားရှင်းက (၉)အထိပဲရှိသေးတာဖြစ်ပါတယ်။

 Source Reuters