#WorldPolitics
Published 22 February 2022

ရုရှားထောက်ခံရေးအဖွဲ့တွေချုပ်ကိုင်ထားတဲ့ ယူကရိန်းနိုင်ငံအရှေ့ဘက်ခြမ်းရှိ ဒိုနက်စ်မြို့နဲ့ လူဟန့်စ်မြို့တို့ကို လွတ်လပ်တဲ့နယ်မြေများအဖြစ် ရုရှားသမ္မတ'ဗလက်ဒီမီယာပူတင်'က အသိအမှတ်ပြုပေးလိုက်ပြီဖြစ်ပါတယ်။
အဲဒီနောက်မှာတော့ အဆိုပါယူကရိန်းအရှေ့ဘက်နယ်မြေနှစ်ခုသို့ ရုရှားတပ်ဖွဲ့များ ပြောင်းရွှေ့ဝင်ရောက်လာနိုင်ကြောင်း နောက်ဆုံးရထောက်လှမ်းရေးသတင်းများအရ အမေရိကန်အကြီးတန်းအရာရှိတစ်ဦးက CNN ကို ပြောကြားလိုက်ပါတယ်။

ရုရှားတို့ ကျူးကျော်မှုပြုလုပ်လာနိုင်တဲ့အပေါ် အမေရိကန်ကလည်း ပြင်ဆင်မှုများပြုလုပ်လျက်ရှိပြီး ကုန်းပေါ်ရေပေါ်သင်္ဘောများနဲ့ လေကြောင်းတပ်ဖွဲ့အတွက် လိုအပ်တဲ့ပစ္စည်းများလည်း ပါဝင်ပါတယ်။

'ပူတင်'အသိအမှတ်ပြုပေးလိုက်တဲ့ ယူကရိန်းခွဲထွက်ရေးနယ်မြေနှစ်ခုကို ကုန်သွယ်ရေးဘဏ္ဍာရေးအရေးယူပိတ်ဆို့မှုများချမှတ်ဖို့ သမ္မတ'ဂျိုးဘိုင်ဒန်'က စီစဉ်နေကြောင်း အိမ်ဖြူတော်က တနင်္လာနေ့မှာကြေညာလိုက်ပါတယ်။
ယူကရိန်းခွဲထွက်ရေးနယ်မြေတွေဖြစ်တဲ့ ဒိုနက်စ်ပြည်သူ့သမ္မတနိုင်ငံနဲ့ လူဟန့်စ်ပြည်သူ့သမ္မတနိုင်ငံတို့အပေါ် ရင်းနှီးမြှုပ်နှံမှုအသစ်တွေ ကုန်သွယ်ရေးနဲ့ဘဏ္ဍာရေးကိစ္စတွေမှာ တားမြစ်ပိတ်ပင်သွားဖို့ 'ဘိုင်ဒန်'က လက်မှတ်ရေးထိုးအမိန့်ပေးလိုက်ပါတယ်။

အဆိုပါနယ်မြေနှစ်ခုကို လွတ်လပ်တဲ့နိုင်ငံများအဖြစ် 'ပူတင်'က အသိအမှတ်ပြုလက်မှတ်ရေးထိုးပေးလိုက်ပြီး တနင်္လာနေ့က တီဗီအစီအစဉ်ကနေ အောင်ပွဲခံပုံတွေကို ဖော်ပြခဲ့ပါတယ်။

"ရုရှားတပ်ဖွဲ့တွေ ယူကရိန်းနယ်စပ်ဘက်ကို ပိုမိုနီးကပ်စွာချဉ်းကပ်လာနေပြီး အချိန်မရွေးကျူးကျော်နိုင်လောက်တဲ့အထိ စီစဉ်နေကြတာကို ထောက်လှမ်းရရှိထားပါတယ်" လို့ အမေရိကန်အုပ်ချုပ်ရေးအဖွဲ့မှ အရာရှိတစ်ဦးက ပြောပြလိုက်ပါတယ်။

ယူကရိန်းရဲ့တောင်းဆိုမှုကြောင့် တနင်္လာနေ့ညမှာ ကုလသမဂ္ဂလုံခြုံရေးကောင်စီအစည်းအဝေးကို အရေးပေါ်ပြုလုပ်ခဲ့ရာ ကုလသမဂ္ဂဆိုင်ရာ အမေရိကန်သံအမတ် 'လင်ဒါသောမတ်စ်ဂရင်းဖီးလ်'ကပြောကြားရာမှာ ယူကရိန်းခွဲထွက်ရေးနယ်မြေနှစ်ခုကို 'ပူတင်'က အသိအမှတ်ပြုလိုက်ခြင်းက ယူကရိန်းကိုကျူးကျော်ဖို့ အကြောင်းပြချက်ဖန်တီးလိုက်တာဖြစ်ပြီး ငြိမ်းချမ်းရေးဖော်ဆောင်ဖို့ဆင်ခြေနဲ့ ရုရှားတပ်ဖွဲ့တွေ ဝင်ရောက်လာခြင်းကလည်း ဆီလျော်ခြင်းမရှိကြောင်း ဆိုခဲ့ပါတယ်။

အမေရိကန်က မှန်းဆထားတဲ့အတိုင်း ရုရှားတို့ဆောင်ရွက်လျက်ရှိပြီး အခုအချိန်မှာ 'ပူတင်'က ရပ်တန့်တော့မှာမဟုတ်ဘူးလို့ ယုံကြည်ထားကြောင်း 'သောမတ်စ်ဂရင်းဖီးလ်'က ပြောကြားခဲ့ပါတယ်။

ရုရှားတို့က နိုင်ငံတကာဥပဒေတွေကို ထင်ထင်ရှားရှားချိုးဖောက်နေတဲ့အတွက် အမေရိကန်က နောက်ထပ်အရေးယူမှုတွေပြုလုပ်သွားမှာဖြစ်ကြောင်း ဆိုပါတယ်။

ငြိမ်းချမ်းရေးဖော်ဆောင်ဖို့ဆိုတဲ့ အကြောင်းပြချက်နဲ့ ယူကရိန်းခွဲထွက်ရေးနယ်မြေသို့ ရုရှားတပ်ဖွဲ့များစေလွှတ်ခြင်းဟာ ယူကရိန်းကိုကျူးကျော်ဖို့ နောက်ထပ်ခြေလှမ်းတစ်ခုဖြစ်တယ်လို့ အမေရိကန်တို့က ယူဆထားပါတယ်။

၂၀၁၄ ခုနှစ် ယူကရိန်းကို ရုရှားတို့ကျူးကျော်လာကတည်းက အဆိုပါနယ်မြေတွေမှာ ရုရှားတပ်ဖွဲ့တွေ အခြေချနေတာဖြစ်ပါတယ်။

"အဆိုပါနယ်မြေတွေမှာ ရုရှားတို့ဘာတွေဆက်လုပ်မလဲဆိုတာကို ဆက်လက်စောင့်ကြည့်သွားမှာဖြစ်ပါတယ်" လို့ အမေရိကန်အရာရှိတစ်ဦးက ဆိုပါတယ်။

"ယူကရိန်းခွဲထွက်ရေးဒေသတွေမှာ ရုရှားတပ်ဖွဲ့တွေရှိနေတာ ၈ နှစ်လောက်ရှိနေပြီဖြစ်ပေမယ့် ရုရှားဘက်က ငြင်းဆိုနေပါတယ်။ အခုတော့ သူတို့ ပေါ်ပေါ်တင်တင်လှုပ်ရှားတော့မှာဖြစ်ပြီး ကျွန်တော်တို့ဘက်ကလည်း ထိုက်သင့်သလိုတုန့်ပြန်ဆောင်ရွက်သွားမှာပါ"

Source: CNN
#Yangon_Media_Group

#LocalNews
Published - 22 Feb3022

သီပေါမြို့မှာ လင်မယားချင်းစကားများရာမှ မိန်းမဖြစ်သူက ခင်ပွန်းသည် ယောကျ်ားဖြစ်သူ၏ ငယ်ပါအားဖြတ်ပစ်လိုက်သည့် ဖြစ်စဥ်တစ်ခု ဖေဖော်ဝါရီ ၂၁ ရက်၊(ညပိုင်း)အချိန်က ဖြစ်ပွားခဲ့တယ်လို့ ဒေသခံလူမှုကူညီရေးအသင်းထံမှ သိရပါတယ်။

"ဖြစ်စဥ်အသေးစိတ်ကတော့ ကျွန်တော်တို့လည်း သေချာမသိသေးပါဘူး။ လင်မယားချင်းစကားများရန်ဖြစ်ရာ
ကနေ အခုလိုဖြစ်တယ်လို့ သိရပါတယ်။ မနေ့ညက သီပေါဆေးရုံမှာ သွေးထွက်လွန်နေတဲ့ လူနာရှိတယ်ပေါ့၊ အဲ့ဒါကို သီပေါကနေ လားရှိုးဆေးရုံကို ပို့ဆောင်ပေးဖို့ ဆေးရုံက ဆရာမတွေဖုန်းဆက်လာလို့ ကျွန်တော်တို့အသင်းက သွား ရောက်ကူညီဆောင်ရွက်ပေးခဲ့တာပါ။ လူနာကတော့ သွေးထွက်အတော်လွန်နေတယ်။ ကျွန်တော်တို့အသင်းက လူနာတင်ယာဥ်နဲ့ပဲ လားရှိုးဆေးရုံကို ညတွင်းချင်း ပို့ဆောင်ပေးခဲ့ပါတယ်။ ပြီးတော့မှ အခုလိုဖြစ်စဥ်ဖြစ်ခဲ့မှန်း သိခဲ့ရတာပါ။"လို့ သီပေါလူငယ် လူမှုကူညီရေးအသင်းမှ ကိုတူးလီ က YMG ကို ပြောပြခဲ့ပါတယ်။

အဆိုပါ ငယ်ပါအဖြတ်ခံရသည့် သွေးထွက်လွန်လူနာကို သီပေါလူငယ် လူမှုကူညီရေးအသင်းမှ သီပေါမြို့မှတစ်ဆင့် လားရှိုးပြည့်သူ့ဆေးရုံကြီးသို့ ညတွင်းချင်းကူညီပို့ဆောင် ပေးခဲ့ရတာပါ။

လက်ရှိမှာလည်း လူနာက လားရှိးပြည့်သူ့ဆေးရုံကြီးမှာပဲ ဆေးကုသမှုခံယူနေရတယ်လို့ သိရပါတယ်။

"သူတို့က သီပေါမြို့ဒေသခံတွေပါပဲ။ သီပေါဆေးရုံကို သူတို့ရောက်လာတော့မှ ကျွန်တော်တို့ကသွားခေါ်ပြီး လားရှိုး ဆေးရုံကို ပို့ပေးခဲ့ရတာပါ။ လူနာရဲ့ ကျန်းမာရေးအခြေအနေက တိတိကျကျတော့ ပြောလို့မရဘူး။ သွေးထွက်က တော့လွန်နေတယ်။"လို့ ကိုတူးလီက ဆက်လက်ပြောပြခဲ့ပါတယ်။

ယခုလိုဖြစ်စဥ်ဟာ ကြုံတောင့်ကြုံခဲ ဖြစ်စဥ်တစ်ခုဖြစ်တယ်လို့လည်း လူမှုကွန်ရက်အသုံးပြုသူတွေက မှတ်ချက်ပြုထားကြပါတယ်။

Photo - သီပေါလူငယ် လူမှုကူညီရေးအသင်း။

ymg/kg
#Yangon_Media_Group

#WorldHealth
Published- 22 February 2022
သွေးနီဥများပျက်စီးယိုယွင်းခြင်းကြောင့် သွေးကြောထိခိုက်မှုတွေကို ကိုဗစ်ရောဂါပြင်းထန်စွာခံစားရဖူးသူတွေမှာ တွေ့ရလေ့ရှိကြောင်း ဓာတ်ခွဲခန်းလေ့လာချက်များအရသိရှိရပါတယ်။

ကိုဗစ်ရောဂါကြောင့် ဆေးရုံတက်ကုသခံယူခဲ့ရသည့်လူနာတွေမှာ သွေးကြောနံရံများရှိ အင်ဒိုသီလီယယ်ဆဲလ်တွေထိခိုက်ခံရကာ သွေးခဲခြင်း၊ အတွင်းအင်္ဂါပျက်စီးခြင်းနဲ့ အခြားပြဿနာများဖြစ်ပေါ်လေ့ရှိပါတယ်။

ကိုဗစ်ရောဂါအလယ်အလတ်မျှ ခံစားရတဲ့လူနာ ၁၇ ဦးနဲ့ ကျန်းမာရေးကောင်းမွန်တဲ့လူ ၂၇ ဦးတို့မှ သွေးနမူနာများဖြင့် လေ့လာချက်အသစ်တွေပြုလုပ်ရာမှာ ကိုရိုနာဗိုင်းရပ်စ်ကူးစက်မှုကြောင့် နှလုံးသွေးကြောနံရံရှိဆဲလ်များ သိသိသာသာထိခိုက်ထားကြောင့် တွေ့ရှိခဲ့ကြပါတယ်။

ကျန်းမာသန်စွမ်းတဲ့လူတွေရဲ့ သွေးနီဥတွေနဲ့နှိုင်းယှဉ်ပါက ကိုဗစ်ရောဂါလူနာတွေမှာ ကောင်းကျိုးပြုနိုက်ထရစ်အောက်ဆိုက်မော်လီကျူးထွက်ရှိမှု နည်းပါးပြီး ထိခိုက်ရောင်ရမ်းမှုကိုဖြစ်စေတဲ့ ဆိုးကျိုးပြုမော်လီကျူးတွေ များနေကြောင်းတွေ့ရှိရတယ်လို့ စတော့ဟုမ်းမြို့ ကယ်ရိုလင်စကာတက္ကသိုလ်မှ ဒေါက်တာ'အယ်လီမာဒီ'က ပြောပြလိုက်ပါတယ်။

ဒါ့အပြင် အခြားအင်ဇိုင်းတစ်မျိုးများပြားလာပြီး ပေါင်းဆုံသွားပါက ရောင်ရမ်းခြင်းဖြစ်စေတဲ့မော်လီကျူးတွေဟာ သွေးကြောနံရံတွေကို ထိခိုက်စေပြီး သွေးကြောတွေပုံမှန်အတိုင်း မတည်ရှိနိုင်တော့ကြောင်း သုတေသီအဖွဲ့က ဆိုပါတယ်။

အင်ဇိုင်းပမာဏကို ပုံမှန်အတိုင်းထိန်းပေးပြီး အန္တရာယ်ပေးနိုင်တဲ့မော်လီကျူးထုတ်လုပ်မှုကို ထိန်းချုပ်ပေးတဲ့ ဆေးဝါးများဖြင့် အဲဒီလိုအခြေအနေကို သက်သာလာအောင်ပြုလုပ်နိုင်ကြောင်း 'မာဒီ'က အသိပေးထားပါတယ်။

ဒီစမ်းသပ်လေ့လာချက်ကို မူလကိုရိုနာဗိုင်းရပ်စ်ဖြင့် စမ်းသပ်ထားတာဖြစ်ပြီး အခြားမျိုးဗီဇကွဲကူးစက်မှုတွေက သွေးနီဥတွေအပေါ် ဘယ်လိုသက်ရောက်သလဲဆိုတာကိုတော့ ရှင်းရှင်းလင်းလင်းမသိရှိရသေးပါဘူး။
Source: Reuters

Published 2 February 2022

ရုရှားသမ္မတပူတင်က ယူကရိန်းခွဲထွက်ရေးဒေသနှစ်ခုကို အသိအမှတ်ပြုလိုက်တဲ့ ဆုံးဖြတ်ချက်ကို အမေရိကန်သမ္မတ ဂျိုးဘိုင်ဒင်က ရှုတ်ချလိုက်ပါတယ်။

“ DNR နှင့် LNR လို့ဆိုကြတဲ့ ယူကရိန်းဒေသတွေရဲ့ လွတ်လပ်ရေးကို အသိအအမှတ်ပြုလိုက်တဲ့အတွက်  ဘိုင်ဒန်က ရုရှား သမ္မတ ဗလက်ဒီမာပူတင်ကို ပြင်းထန်စွာရှုတ်ချတဲ့အကြောင်း ယူကရိန်းသမ္မတ ဗိုလိုဒီမာဇီလင်စကီးနှင့် ဖုန်းပြောဆိုစဉ် ပြောဆိုခဲ့တယ်လို့ အိမ်ဖြူတော်က သတင်းထုတ်ပြန်ပါတယ်။

ဘိုင်ဒန်ဟာ ပြင်သစ်ခေါင်းဆောင် အီမန်နျူယယ်မာခရွန်၊ဂျာမနီခေါင်းဆောင် အိုလက်ရှိုးဇ်တို့နှင့်လည်း နောက်တစ်ဆင့် ဘယ်လိုတုန့်ပြန်ကြဖို့ ဘယ်လိုဆက်ပြီးပူးပေါင်းဆောင်ရွက်ကြမယ်ဆိုတာကို ဆွေးနွေးခဲ့တယ်လို့ နောက်သတင်းထုတ်ပြန်ချက်တစ်ခုမှာ ဖော်ပြထားပါတယ်။

Source Reuters

#WorldHealth
Published - 22 February 2022
ဗိုက်တာမင်-စီ၊ ဗိုက်တာမင်-ဒီနဲ့ ဇင့်တို့လို ဗိုက်တာမင်အားဆေးတွေက ကိုဗစ်ရောဂါကြောင့်အသက်သေဆုံးနိုင်ချေကို မလျှော့ချပေးနိုင်ကြောင်း တိုလီဒိုတက္ကသိုလ်မှ လေ့လာချက်တစ်ခုမှာ တွေ့ရှိခဲ့ကြပါတယ်။

အဆိုပါလေ့လာချက်တွင် ပြည်တွင်းဆေးပညာဦးစီးဌာနမှ ဒေါက်တာ'အာဇီဇူလာဘာရန်'၊ အဆုတ်နဲ့အရေးပေါ်ဌာနမှ ဒေါက်တာ'ရာဂက်အဆာလီ'နဲ့ အခြားသုတေသီများစွာတို့ ပါဝင်ဆောင်ရွက်ခဲ့ကြပြီး Clinical Nutrition ESPEN ဂျာနယ်မှာ ဖော်ပြခဲ့ပါတယ်။

ဒီဖြည့်စွက်စာအားဆေးတွေကို ဗိုင်းရပ်စ်ရောဂါပိုးခုခံနိုင်ဖို့ အတွက် အသုံးပြုလို့ ရပေမယ့် ကိုဗစ်ရောဂါကို ထိရောက်စွာကုသနိုင်တယ်လို့ တော့ အထောက်အထားမတွေ့ရှိသေးပါဘူး။
သုတေသီတွေက ဒီဇင်ဘာ ၅ ရက်နေ့ ၂၀၂၁ အထိ ဆေးကုသမှုအချက်အလက်တွေကို လေ့လာရှာဖွေခဲ့ပြီး အသက်သေဆုံးမှုနှုန်း၊ အသက်ရှူကိရိယာလိုအပ်မှုနှုန်း၊ ဆေးရုံတက်ကုသခံယူမှုကြာချိန်တို့ကို ဆန်းစစ်ခဲ့ကြပါတယ်။

ကိုဗစ်လူနာ ၅,၆၃၃ ဦးမှာ ဇင့်၊ ဗိုက်တာမင်-စီ၊ ဗိုက်တာမင်-ဒီအသုံးပြုမှုတွေနဲ့အတူ စောင့်ရှောက်ကုသခံရမှုတို့ကို သုတေသီတို့က နှိုင်းယှဉ်ခဲ့ ကြပါတယ်။

အဆိုပါဗိုက်တာမင်အားဆေးတွေက အသက်သေဆုံးမှုကို ကာကွယ်ပေးနိုင်ခြင်းမရှိပေမယ့် ဆေးရုံတက်ကုသခံယူရချိန်နဲ့ အသက်ရှူကိရိယာလိုအပ်မှုတို့ကိုတော့ လျှော့ချပေးနိုင်ကြောင်း တွေ့ရှိခဲ့ကြပါတယ်။

ဦးဆောင်သုတေသနပြုသူ'ဘာရန်'က "ဇင့်၊ ဗိုက်တာမင်-စီ၊ ဗိုက်တာမင်-ဒီ အားဆေးများအသုံးပြုခြင်းက ကိုဗစ်ရောဂါကိုသက်သာစေတယ်လို့ အထင်အမြင်လွဲနေကြပါတယ်။ တကယ်က အဲဒီလိုမဟုတ်ပါဘူး" လို့ သတိပေးလိုက်ပါတယ်။

ဗိုက်တာမင်တွေနဲ့သတ္တုဓာတ်တွေက အန္တရာယ်ဖြစ်စေတယ်လို့ ဆိုလိုတာမဟုတ်ကြောင်း၊ ဒါပေမဲ့လည်း ကိုဗစ်ရောဂါကြောင့်အသက်သေဆုံးနိုင်ချေကိုတော့ မကာကွယ်နိုင်ကြောင်း သုတေသီတွေက မှတ်ချက်ပြုဖော်ပြထားပါတယ်။
Source: The Jerusalem Post

Published 22 February 2022

ယူကရိန်းသမ္မတ  ဗိုလိုဒီမာ ဇီလင်စကီးက “ကျွန်တော်တို့ ကိုယ့်မြေမှာကိုယ်နေကြတယ်။ဘယ်အရာကိုမှ ဘယ်သူကိုမှ မကြောက်ဘူး” လို့ တုန့်ပြန်ပြောဆိုပါတယ်။  ရုရှားသမ္မတပူတင်က ယူကရိန်းခွဲထွက်ဒေသနှစ်ခုကို လွတ်လပ်တဲ့ နိုင်ငံတွေ အဖြစ် အသိအမှတ်ပြုပြီး အဲဒီဒေသတွေကို ငြိမ်းချမ်းရေးအတွက်တပ်တွေစေလွှတ်ဖို့အမိန့်ပေးပြီးနောက် ယူကရိန်းသမ္မတက ယခုလို ပြောဆို တုန့်ပြန်ခဲ့တာဖြစ်ပါတယ်။

Source AFP

Published 22 February 2022

ရုရှားသမ္မတ ဗလက်ဒီမာပူတင်ဟာ ယူကရိန်းအရှေ့ပိုင်းက ခွဲထွက်ရေးဒေသနှစ်ခုရဲ့ လွတ်လပ်ရေးကို အသိအမှတ်ပြုလိုက်ပြီး အဲဒီနေရာတွေကို ရုရှားတပ်တွေ စေလွှတ်ဖို့ ဖေဖော်ဝါရီ(၂၁)ရက်က အမိန့်ပေးလိုက်ပါတယ်။

အဲဒီအတွက် စစ်ကြီးတစ်ခုဖြစ်လာတော့မယ်လို့ အနောက်နိုင်ငံတွေက ကြောက်ရွံ့နေကြတဲ့ အကျပ်အတည်းကို ပိုပြီးအရှိန်မြင့်သလိုဖြစ်သွားစေပါတယ်။

အဲဒီဒေသနှစ်ခုရဲ့လွတ်လပ်ရေးကိုအသိအမှတ်ပြုကြောင်း အမိန့်ထုတ်ပြန်ပြီးတာနှင့် ပူတင်က ရုရှားကာကွယ်ရေး ဝန်ကြီးဌာနကို အဲဒီဒေသတွေငြိမ်းချမ်းရေးတည်တံ့စေဖိုဆိုပြီး တပ်တွေစေလွှတ်ဖို့ပြောခဲ့ပါတယ်။

ဒိုနက်စ်ရဲ့မြို့တစ်လျောက် ကြီးမားတဲ့စစ်ယန္တယားတွေ ပုံမှန်မဟုတ် ဦးတည်ရွေ့လျားနေတာကို ရိုက်တာရဲ့မျက်မြင်သက်သေတစ်ဦးက မြင်တွေ့ပါတယ်။

ရုရှားက လွတ်လပ်သော အဖွဲ့အစည်းနှစ်ခုအဖြစ် အသိအမှတ်ပြုလိုက်တဲ့ ဒေသတွေဟာ သူတို့ကိုယ်သူတို့ ပြည်သူ့ သမ္မတနိုင်ငံတွေအဖြစ်ကြေညာထားတဲ့ ဒိုညက်စ်ပြည်သူ့သမ္မတနိုင်ငံနှင့် လူဟန့်စ်ပြည်သူ့သမ္မတနိုင်ငံဆိုတဲ့ ခွဲထွက်ရေး ဒေသနှစ်ခုပဲဖြစ်ပါတယ်။

ကုလသမဂ္ဂလုံခြုံရေးကောင်စီအစည်းအဝေးကို ညတွင်းချင်းခေါ်ထားပါတယ်။

Source Reuters

#WorldTrade
Published 21 February 2022

တရုတ်နိုင်ငံအရှေ့ပိုင်း ရှန်ဒုံဒေသရှိ ချင်ဒေါင်ဆိပ်ကမ်းမြို့မှ ဂျာမနီနိုင်ငံမန်ဟိုင်းမြို့သို့ ဆက်သွယ်ထားသည့် ပထမဦးဆုံး တရုတ်-ဥရောပ နှစ်လမ်းသွားကုန်တင်ရထားလမ်းကြီးမှာ သောကြာနေ့က စတင်ပြေးဆွဲနေပြီဖြစ်ပါတယ်။

#Yangon_Media_Group

Published 21 February 2022

ယူကရိန်းအရေးကိစ္စ တင်းမာမှုတွေ အရှိန်တက်နေတာကြောင့် ကမ္ဘာလုံးဆိုင်ရာဈေးကွက်တွေမှာ လူသုံးကုန်ပစ္စည်းတွေနှင့် စတော့ဈေးကွက်တွေအပေါ် သက်ရောက်မှုတွေရှိနေတယ်လို့ ကျွမ်းကျင်သူတစ်ဦးက CGTN သတင်းဌာနကို မကြာသေးခင်က ပြောပါတယ်။

ဂျုံကစလို့ လောင်စာဆီဈေးနှုန်းတွေအထိ ပြီးတော့ အချို့သော စတော့ဈေးတွေဟာ ထိခိုက်မှုတွေရှိလာနေတယ်လို့ တရုတ်နိုင်င်ငံ ဟန်ဆင်းဘဏ်ရဲ့ စီးပွားရေးပညာရှင်ချုပ် ဝမ်ဒန်း ပြောပါတယ်။

Source CGTN

Published 21 February 2022

မြန်မာနိုင်ငံအပေါ် လူမျိုးတုံးစေတဲ့ရာဇဝတ်မှုတွေကျူးလွန်ခဲ့တယ်လို့ ဂမ်ဘီယာနိုင်ငံက အပြည်ပြည်ဆိုင်ရာတရားရုံးက ICJ တရားစီရင်ပေးဖို့ ဦးတိုက်လျှောက်ထားခဲ့တဲ့အပေါ် ဒုတိယအကြိမ်ကြားနားမှုကို ယနေ့ ဖေဖော်ဝါရီ(၂၁)ရက်မှာ စတင်ခဲ့ပါတယ်။မြန်မာနိုင်ငံ နစက အပြည်ပြည်ဆိုင်ရာပူးပေါင်းဆောင်ရွက်ရေးပြည်ထောင်စုဝန်ကြီး ဦးကိုကိုလှိုင်က နယ်သာလန်နိုင်ငံ သည်ဟိတ်မြို့က ICJ တရားရုံးမှာ ကနဦးကန့်ကွက်မှုပြုလုပ်ခဲ့ပါတယ်။ကြားနာမှုကို ဆက်လက်ဆောင်ရွက်နေဆဲဖြစ်ပြီး ကုလရုပ်သံကနေ တိုက်ရိုက်ထုတ်လွှင့်နေပါတယ်။

Published 21 February 2022

အီရန်စစ်တပ် တိုက်လေယာဉ်တစ်စီးဟာ တနင်္လာနေ့က အနောက်မြောက်ပိုင်းက တာဘရစ်ဇ်မြို့ လူနေရပ်ကွက်တစ်ခုအပေါ် ပျက်ကျခဲ့တဲ့အတွက် လေယာဉ်အမှုထမ်းနှစ်ဦးအပါအဝင် လူ(၃)ဦးသေဆုံးခဲ့ရပါတယ်လို့ နိုင်ငံပိုင် ရုပ်သံက သတင်းထုတ်လွှင့်ပါတယ်။

 လေယာဉ်ဟာ ကျောင်းတစ်ကျောင်းအတွင်း ထိုးဆင်းပျက်ကျသွားတာဖြစ်ပြီး ရပ်ကွက်ထဲက လူတစ်ဦးသေဆုံးခဲ့ရတယ်လို့ ပြည်တွင်းလခြမ်းနီအဖွဲ့ခေါင်းဆောင်ကပြောပါတယ်။

ကျောင်းဟာ ကိုဗစ်ကပ်ဘေးကြောင့် ပိတ်ထားတာဖြစ်တယ်လို့ ဒေသခံအရာရှိတစ်ဦးဖြစ်တဲ့ မိုဟာမက်ဘက်ဂါဟိုနာဗာက နိုင်ငံပိုင်ရုပ်မြင်သံကြားကိုပြောပါတယ်။

လေယာဉ်ဟာ F-5အမျိုးအစားတိုက်လေယာဉ်တစ်စီးဖြစ်ပြီး မနက်(၉)နာရီခန့်မှာ မိုနာဂျမ်က တာဘရစ်ရပ်ကွက်အလယ်ကို ထိုးဆင်းပျက်ကျခဲ့တာဖြစ်တယ်လို့ သူကဆက်ပြောပါတယ်။

ပျက်ကျမှုနှင့်ပတ်သက်လို့ စုံစမ်းစစ်ဆေးမှုတွေလုပ်နေပြီလို နိုင်ငံပိုင်ရုပ်သံကပြောပါတယ်။

အီရန်လေတပ်မှာ အများစုက ရုရှားရဲ့လေယာဉ်တွေဖြစ်ပြီး တရုတ်လေယာဉ်တွေလည်းရှိပါတယ်။

အဲဒီအထဲမှာ ၁၉၇၉ အစ္စလမ်မစ်တော်လှန်ရေးမတိုင်ခင်ကတည်းကရှိခဲ့တဲ့အမေရိကန်လုပ် F-4 နှင့် F-5 တိုက်လေယာဉ် အချို့တော့ဆက်လက်ရှိနေတာဖြစ်ပါတယ်ခင်ဗျာ/ရှင်

Source AFP

#LocalNews
Published - 21 Feb 2022

ရန်ကုန်တိုင်းဒေသကြီးအတွင်း ခရိုင်အလိုက် ကိုဗစ်-၁၉ အရေးပေါ်တုန့်ပြန်ရေးအဖွဲ့တွေကို ဖွဲ့စည်းထားပြီးသက်ဆိုင်ရာခရိုင်အလိုက် ဆက်သွယ်ရမယ့် ဖုန်းနံပါတ်တွေကိုလည်း ကျန်းမာရေးဝန်ကြီးဌာနက ကြေညာထားပါတယ်။

#Yangon_Media_Group