#LocalNews
Published -27 Feb 2022

ယနေ့ ဖေဖော်ဝါရီလ ၂၇ ရက်နေ့ နံနက်ပိုင်းတွင် ရခိုင်ပြည်နယ်နံ့သာကျွန်းရဲ့အနောက်မြောက်ဘက် ရေမိုင် ၂၅ မိုင်အကွာ ဘင်္ဂလားပင်လယ်အော်အတွင်းကို တရုတ် အာကာသယာဉ် အစိတ်အပိုင်းတစ်ခု ကျရောက်မှုဖြစ်ပွားခဲ့သည်ဟု သိရပါသည်။

တရုတ်ပြည်သူ့သမ္မတနိုင်ငံ၊ မြို့ပြလေကြောင်း စီမံအုပ်ချုပ်ရေးအဖွဲ့အစည်း (Civil Aviation Administration of China - CAAC) က “အာကာသယာဉ်အစိတ်အပိုင်း (Aerospace Flight) လှုပ်ရှားမှုခန့်မှန်းဒုတိယအကြိမ်အား ၂၀၂၂ ခုနှစ်၊ ဖေဖော်ဝါရီလ (၂၆) ရက်နေ့မှ မတ်လ (၂) ရက်နေ့အတွင်းအစား ဖေဖော်ဝါရီလ (၂၇) ရက်နေ့ နံနက် ၆ နာရီ ၆ မိနစ်မှ နံနက် ၆ နာရီ ၃၅ မိနစ်အချိန်အတွင်းတွင် ဖြစ်နိုင်ခြေရှိကြောင်း၊ သက်ရောက်မည့်ဧရိယာမှာ သံတွဲလေဆိပ်၏ အနောက်တောင်ဘက် ရေမိုင် (၂၂) မိုင်ခန့်၊ မာန်အောင်လေဆိပ်၏ အနောက်တောင်ဘက် ရေမိုင် (၃၁) မိုင်ခန့်နှင့် ပုသိမ်လေဆိပ်၏အနောက်ဘက် ရေမိုင် (၆၃) မိုင်ခန့်အကွာ ဘင်္ဂလား ပင်လယ်အော်အတွင်းသို့ ကျရောက်နိုင်မယ်လို့အကြောင်းကြားခဲ့တယ်လို့ သိရပါတယ်။

အဆိုပါ အာကာသယာဉ်အစိတ်အပိုင်းမှာယနေ့ နံနက်ပိုင်း ၆ နာရီ ၂၅ မိနစ်ခန့်က နံ့သာကျွန်းရဲ့ အနောက်မြောက်ဘက် ရေမိုင် ၂၅ မိုင်အကွာ ဘင်္ဂလားပင်လယ်အော် အတွင်းသို့ကျရောက်ခဲ့ကာ အဆိုပါကျရောက်မှုကြောင့် လူနဲ့အရာဝတ္ထုပစ္စည်းများ ထိခိုက်ပျက်စီးမှုမရှိခဲ့ဘူးလို့ သိရပါတယ်။

ymg/hm
#Yangon_Media_Group

Published 27 February 2022

အမေရိကန်သမ္မတ ဂျိုးဘိုင်ဒင်က သူ့အနေနှင့် ရုရှားတိုက်ခိုက်မှုနှင့်ပတ်သက်ပြီး ရွေးချယ်စရာ နည်းလမ်းနှစ်ခုပဲရှိတယ်။ “ တတိယကမ္ဘာစစ်ကိုစတင်မလား” ဒါမှမဟုတ် ရုရှားကို စီးပွားရေးဒဏ်ခတ်ပိတ်ဆို့မှုနှင့်တိုက်ခိုက်မလားဆိုတာပဲဖြစ်တယ်လို့  အင်တာဗျူးတစ်ခုမှာပြောလိုက်ပါတယ်။ သူက သရုပ်ဆောင်နှင့် ပေါ့တ်ကတ်စ်တင်ဆက်သူ ဘရီယန်တိုင်လာကိုဟင်နှင့် အင်တာဗျူးမှာပြောလိုက်တာဖြစ်ပြီး အဲဒီအင်တာဗျူးကို စနေနေ့က အွန်လိုင်းမှာတင်ခဲ့ပါတယ်။

“ ကြည့်လိုက်ပါ။ရွေးချယ်စရာနည်းလမ်းက(၂)ခု၊ တတိယကမ္ဘာစစ်တစ်ခု ကိုစလိုက်ပြီး ရုရှားနှင့်လက်တွေ့စစ်ဖြစ်မလား။ ဒါမှမဟုတ် နံပါနှစ်ဖြစ်တဲ့ နိုင်ငံတကာဥပဒေကိုဆန့်ကျင်တဲ့နိုင်ငံတစ်နိုင်ငံကို သူအဲသလိုလုပ်တဲ့အတွက် တန်ရာတန်ကြေး ပေးဆပ်ရအောင် အသေအချာလုပ်မလား” လို့ ဘိုင်ဒင်က အဲဒီပေါ့တ်ကတ်စ်မှာ ပြောခဲ့ပါတယ်။

လွန်ခဲ့တဲ့နှစ်ရက်က ဘိုင်ဒင်ဟာ ရုရှားဘဏ်ပေါင်းစုံ၊လူတစ်ဦးချင်းစီ အများအပြားနှင့် နည်းပညာတင်ပို့မှုတွေကို ဒဏ်ခတ်ပိတ်ဆို့မှုတွေ ချမှတ်ခဲ့ပါတယ်။ သောကြာနေ့မှာ အိမ်ဖြူတော်က ရုရှားသမ္မတဗလက်ဒီမာပူတင်၊နိုင်ငံခြားရေးဝန်ကြီး ဆာဂေးလာဗရော့နှင့် ရုရှား လုံခြုံရေး ကောင်စီအဖွဲ့ဝင်တွေကို ပစ်မှတ်ထားအရေးယူတာကို နောက်တစ်ကျော့ထပ်လုပ်ခဲ့ပါတယ်။

ရုရှားနှင့် ယူကရိန်းအကြား ပဋိပက္ခကို စစ်ရေးအရဝင်စွက်ဖက်တာကို အမေရိကန်က မလုပ်ဘူးလို့ ဘိုင်ဒင်က တောက်လျောက်ပြောဆိုနေခဲ့ပါတယ်။ ဒါပေမယ့် ယူကရိန်းကိုစစ်ရေးအထောက်အပံ့တွေတိုးမြှင့်ပေးလိုက်ပြီး နေတိုးနှင့် အရှေ့ဥရောပကို အမေရိကန်တပ်ထောင်ပေါင်းများစွာ စေလွှတ်ထားပါတယ်။

စစ်ရေးဆောင်ရွက်မှုတွေမစခင်မှာပဲ ယူကရိန်းကိစ္စ ဝင်စွက်ဖက်တဲ့ အခြားနိုင်ငံတွေအနေနှင့် သမိုင်းမှာကြုံဖူးတာထက် ပိုပြီး ကြီးမားတြ့ အကျိုးဆက်တွေရင်ဆိုင်ရလိမ့်မယ်လို့ ပူတင်က သတိပေးခဲ့ပါတယ်။

Source RT/Agencies

#Local_Health
Published_ 27 Feb 2022

နိုင်ငံတော်အနေဖြင့် ကိုဗစ်-၁၉ ကာကွယ်ဆေးများဝယ်ယူရန် အမေရိကန်ဒေါ်လာ ၂၇၆.၆၄ သန်း သုံးစွဲခဲ့ကာ၊ ကာကွယ်ဆေးစုစုပေါင်း ၆၂ သန်း Doses ရရှိပြီးဖြစ်တယ်လို့ သိရပါတယ်။ကိုဗစ်-၁၉ ရောဂါ ကာကွယ်ဆေးများဝယ်ယူမှုတွင် နိုင်ငံတော်အနေနဲ့ အမေရိကန် ဒေါ်လာ ၂၇၆.၆၄ သန်းသုံးစွဲခဲ့ပြီး မိတ်ဆွေနိုင်ငံများက လှူဒါန်းမှုအနေနဲ့ အမေရိကန် ဒေါ်လာ ၁၂၁.၁၂ သန်း လှူဒါန်းခဲ့ပါတယ်။ ကာကွယ်ဆေးဝယ်ယူမှုမှ ၄၅ သန်း Doses၊ လှူဒါန်းမှုမှ ၁၇ သန်း Doses၊ စုစုပေါင်း ၆၂ သန်း Doses ရရှိပြီးဖြစ်တယ်လို့ ဆိုပါတယ်။

လက်ရှိဖြစ်ပွားနေတဲ့ ရောဂါဖြစ်ပွားမှုတွေမှာ ရောဂါကြောင့်သေဆုံးရမှုများကို သုံးသပ်ချက်များအရ ကာကွယ်ဆေး အကြိမ်ပြည့်ထိုးနှံမှုခံယူထားပါက သေဆုံးတဲ့နှုန်း သိသာစွာလျော့ကျသည်ကိုတွေ့ရှိရပြီး၊ ကာကွယ်ဆေးထိုးနှံမှုတွေကို ဆက်လက် အရှိန်အဟုန်မြှင့်တင် ဆောင်ရွက်သွားမှာဖြစ်တယ်လို့ သိရပါတယ်။

မြန်မာနိုင်ငံအနေနဲ့ ကာကွယ်ဆေးထိုးနှံမှုမှာ ၄၅ သန်း Doses ထိုးနှံပြီးဖြစ်ကာ ထိုးနှံရမယ့် မြေပြင်ရှိလူဦးရေရဲ့ ၆၀ ရာခိုင်နှုန်းကျော် ထိုးနှံပြီးဖြစ်ကာ၊ ပြည်တွင်းထုတ်လုပ်မှုမှ ရရှိလာမယ့် ကာကွယ်ဆေးတွေကိုလည်း ဆက်လက်အသုံးပြုသွားမှာဖြစ်တယ်လို့ နစကကျန်းမာရေးဝန်ကြီးဒေါက်တာသက်ခိုင်ဝင်းက ပြောထားပါတယ်။

ymg-mnn
#Yangon_Media_Group

#WorldHealth
Published 27 February 2022

အီလိုင်လီလီ(Eli Lily)နဲ့ ဘိုရင်ဂျာအင်ဂယ်ဟိုင်း(Boehringer Ingelheim)တို့မှ ထုတ်လုပ်တဲ့ ဂျာဒီးယန့်စ်(Jardiance)ဆေးဝါးကို နှလုံးရောဂါလူနာအားလုံးမှာ အသက်သေဆုံးမှုနှုန်းနဲ့ ဆေးရုံတက်ကုသခံယူရမှုနှုန်းတို့ကို လျှော့ချဖို့ ဆက်လက်အသုံးပြုရေးအတွက် အမေရိကန်ကျန်းမာရေးတာဝန်ရှိသူတွေက ကြာသပတေးနေ့က အသိအမှတ်ပြုလိုက်ပြီဖြစ်ပါတယ်။

အဆိုပါဆေးကို ဆီးချိုရောဂါဒုတိယအမျိုးအစားအတွက် အသုံးပြုဖို့ FDA က ၂၀၁၄ ခုနှစ်က အသိအမှတ်ပြုပေးခဲ့ပြီးဖြစ်ပါတယ်။

ဘယ်ဘက်သွေးလွှတ်ခန်းက ပုံမှန်အတိုင်းအလုပ်မလုပ်နိုင်ဘဲ နှလုံးညှစ်အားလျော့နည်းလာတဲ့လူနာတွေမှာ အဆိုပါဆေးကို ဆက်လက်အသုံးပြုဖို့ ပြီးခဲ့တဲ့နှစ်က ခွင့်ပြုပေးခဲ့ပါတယ်။

"ဂျာဒီးယန့်စ်ဆေးက နှလုံးရောဂါလူနာတိုင်းမှာ မထိရောက်နိုင်တာမျိုးလည်းဖြစ်နိုင်ပေမယ့် အခုလိုအသိအမှတ်ပြုလိုက်ခြင်းက လူနာတွေအတွက်ရော ကျွန်တော်တို့တွေတွက်ပါ အရေးကြီးတဲ့ခြေလှမ်းဖြစ်နေပါတယ်" လို့ FDA နှလုံးနှင့်ကျောက်ကပ်ဌာနမှ ညွှန်ကြားရေးမှူး'နော်မန်စတော့ဘရစ်ဂျ်'က ပြောပြခဲ့ပါတယ်။

ကြာသပတေးနေ့က တိုးချဲ့အသိအမှတ်ပြုခဲ့တာကြောင့် ဈေးကွက်ကျယ်ပြန့်လာကာ လူနာပေါင်း ၆.၂ သန်းအတွက် ဆေးအလုံအလောက်ထုတ်လုပ်နိုင်တော့မှာဖြစ်ကြောင်း ရောဂါထိန်းချုပ်ကာကွယ်ရေးစင်တာရဲ့ ဖော်ပြချက်အရ သိရှိရပါတယ်။

ဂျာဒီးယန့်စ်ဆေးနဲ့အပြိုင် အက်စ်ထရာဇန်နီကာရဲ့ ဖာဇီဂါ(Farxiga)ဆေးဝါးကလည်း နှလုံးဘယ်ဘက်သွေးလွှတ်ခန်းအားနည်းတဲ့လူနာတွေမှာ အသုံးပြုဖို့ ခွင့်ပြုချက်ရရှိထားပါတယ်။

၂၀၂၁ ခုနှစ် အီလိုင်လီလီက ဂျာဒီးယန့်စ်ဆေးဝါးရောင်းချမှုကနေ ဒေါ်လာ ၁.၅ ဘီလီယံနီးပါးရရှိခဲ့ကာ အက်စ်ထရာဇန်နီကာက ဖာဇီဂါဆေးဝါးရောင်းချမှုကနေ ဒေါ်လာ ၃ ဘီလီယံနီးပါးရရှိခဲ့ပါတယ်။

Source: Reuters.
#Yangon_Media_Group

#LocalNews
Published_ 27 Feb 2022

၂၀၂၂ ခုနှစ် ဇန်နဝါရီလနှင့် ဖေဖော်ဝါရီလတို့တွင် နှစ်စဉ်အစီရင်ခံစာတင်ပြရန် ပျက်ကွက်ခဲ့မှုများဖြင့် မှတ်ပုံတင်စာရင်းမှ ပယ်ဖျက်လိုက်သည့် ကုမ္ပဏီ ၇၀၀ ရှိကြောင်း နစက ရင်းနှီးမြှုပ်နှံမှုနှင့်နိုင်ငံခြားစီးပွားဆက်သွယ်ရေးဝန်ကြီးဌာန ရင်းနှီးမြှုပ်နှံမှုနှင့် ကုမ္ပဏီများ ညွှန်ကြားမှုဦးစီးဌာနရဲ့ ထုတ်ပြန်ချက်များအရ သိရပါတယ်။

ဇန်နဝါရီလအတွင်း ပယ်ဖျက်မှုများအနေဖြင့် ဇန်နဝါရီ ၃ ရက်တွင် ကုမ္ပဏီ ၁၀၀ ၊ ဇန်နဝါရီ ၇ ရက်တွင် ကုမ္ပဏီ ၁၀၀၊ ဇန်နဝါရီ ၁၇ ရက်တွင် ကုမ္ပဏီ ၁၀၀၊ ဇန်နဝါရီ ၂၁ ရက်တွင် ကုမ္ပဏီ ၁၀၀ ဖြင့် စုစုပေါင်း ကုမ္ပဏီ ၄၀၀ ဖြစ်ပါတယ်။

ဖေဖော်ဝါရီအတွင်း မှတ်ပုံတင်စာရင်းမှ ပယ်ဖျက်ခံလိုက်ရသည့် ကုမ္ပဏီများမှာ ဖေဖော်ဝါရီ ၁ ရက်တွင် ကုမ္ပဏီ ၁၀၀၊ ဖေဖော်ဝါရီ ၄ ရက်တွင် ကုမ္ပဏီ ၁၀၀၊ ဖေဖော်ဝါရီ ၁၅ ရက်တွင် ကုမ္ပဏီ ၁၀၀ ဖြင့် စုစုပေါင်း ၃၀၀ ရှိပါတယ်။

ဒါ့ကြောင့် ၂၀၂၂ ခုနှစ် နှစ်စမှ ဖေဖော်ဝါရီလ တတိယပတ်အထိ မှတ်ပုံတင်စာရင်းမှ ပယ်ဖျက်ခံရတဲ့ ကုမ္ပဏီပေါင်း ၇၀၀ ရှိလာပါကပြီ။

မြန်မာနိုင်ငံကုမ္ပဏီများ ဥပဒေ ပုဒ်မ ၉၇ အရ နှစ်စဉ်အစီရင်ခံစာတင်ပြရန် ပျက်ကွက်ခဲ့သောကြောင့် မြန်မာနိုင်ငံကုမ္ပဏီများ ဉပဒေပုဒ်မ ၄၃၀ (စ) အရ မှတ်ပုံတင် စာရင်းမှ ပယ်ဖျက်ခြင်းဖြစ်တယ်လို့ ရင်းနှီးမြှုပ်နှံမှုနှင့် နိုင်ငံခြားစီးပွားဆက်သွယ်ရေး ဝန်ကြီးဌာန ရင်းနှီးမြှုပ်နှံမှုနှင့် ကုမ္ပဏီများညွှန်ကြားမှုဦးစီးဌာနက သတင်းထုတ်ပြန် ထားပါတယ်။

ymg-mnn
#Yangon_Media_Group.

#WorldHealth
Published 27 February 2022

အိုမီခရွန်မျိုးဗီဇကွဲရဲ့ မျိုးနွယ်ခွဲ BA.2 ဟာ မူလအိုမီခရွန်ထက် ရောဂါပိုမိုဆိုးရွားနိုင်တာမျိုး ဖြစ်ပေါ်နိုင်ကြောင်း ဓာတ်ခွဲခန်းစမ်းသပ်ချက်တွေနဲ့ တိရိစ္ဆာန်စမ်းသပ်မှုများမှတဆင့် သိရှိရပါတယ်။

အင်္ဂလန်နဲ့ ဒိန်းမတ်တို့ရဲ့ အစောပိုင်းလေ့လာချက်များအရ BA.2 မျိုးနွယ်ခွဲက မူလအိုမီခရွန် BA.1 ထက် ၃၀ ရာခိုင်နှုန်း ပိုမိုကူးစက်မြန်ကြောင်း တွေ့ရှိခဲ့ပြီး အခုအချိန်မှာ ကမ္ဘာတဝန်းကိုဗစ်ကူးစက်မှုအားလုံးရဲ့ ၅ ပုံ ၁ ပုံလောက် BA.2 ကူးစက်ခြင်းခံနေရကြောင်း WHO က ဖော်ပြထားပါတယ်။

ကမ္ဘာအနှံ့မှာ ကိုဗစ်ကူးစက်မှုနှုန်းလျော့နည်းလာပြီဖြစ်ပေမယ့် BA.2 ကူးစက်မှုတွေကတော့ မြင့်တက်နေပါတယ်။
အနည်းဆုံးနိုင်ငံ ၄၃ နိုင်ငံမှာ BA.2 က မူလအိုမီခရွန်ထက် ကူးစက်သူပိုများလာပြီး နောက်ထပ်ကပ်ရောဂါလှိုင်းဖြစ်ပေါ်လာမှာကို စိုးရိမ်နေကြရကြောင်း ဘော့စ်တွန်ရှိ ဗိုင်းရပ်စ်နှင့်ကာကွယ်ဆေးသုတေသနစင်တာမှ ညွှန်ကြားရေးမှူး ဒေါက်တာ'ဒန်ဘရက်ချ်'က ဆိုပါတယ်။

BA.1 လိုပဲ BA.2 မျိုးနွယ်ခွဲဟာလည်း ကာကွယ်ဆေးမှရရှိတဲ့ရောဂါခုခံအားကို ခံနိုင်ရည်ရှိတယ်လို့ သိရှိထားပေမယ့် အားမြှင့်ကာကွယ်ဆေး(booster)ထိုးနှံခြင်းဖြင့် ရရှိထားတဲ့ခုခံနိုင်စွမ်းနဲ့ ကိုဗစ်ကုသရေးဆေးတွေကတော့ ထိရောက်စွာကာကွယ်ပေးနိုင်ဆဲဖြစ်ပါတယ်။

BA.2 က အခုအချိန်မှာ ပိုမိုလွှမ်းမိုးနေပြီဖြစ်ပေမယ့် ဆေးရုံတက်ကုသခံယူရမှုနှုန်းနဲ့ အသက်သေဆုံးမှုနှုန်းကတော့ များလာဖွယ်မရှိဘူးလို့ ကနေဒါရှိ ကာကွယ်ဆေးနှင့်ကူးစက်ရောဂါအဖွဲ့အစည်းမှ အိန်ဂျလာရက်စ်မူဆန်က လေ့လာတွေ့ရှိထားပါတယ်။

အမေရိကန်၊ အင်္ဂလန်၊ ဒိန်းမတ်တိုလိုနိုင်ငံတွေမှာ BA.1 ကူးစက်မှုမြင့်မားနေချိန်မှာပဲ BA.2 ကလည်း အရှိန်မြင့်ကူးစက်နေပြီဖြစ်ပါတယ်။

"BA.1 ကူးစက်မှုအမြင့်ဆုံးအချိန်တုန်းက ကိုဗစ်ကာကွယ်ဆေးထိုးထားတဲ့သူတွေ၊ အားမြှင့်ကာကွယ်ဆေးထိုးထားတဲ့သူတွေ၊ အိုမီခရွန်ကူးစက်ခံရသူတွေရှိခဲ့ပါတယ်။ အခုဆိုရင် လူအများစုက ရောဂါခုခံပေးတဲ့ပဋိပစ္စည်းပမာဏ များလာပြီဖြစ်ကာ ရောဂါကူးစက်မှုတွေကို ခံနိုင်ရည်ရှိလာမှာဖြစ်ပါတယ်" လို့ ရက်စ်မူဆန်က ဆိုပါတယ်။

ဒီလေ့လာတွေ့ရှိချက်တွေဟာ ပြင်ပကျွမ်းကျင်သူတွေမှ သုံးသပ်ပြီးစီးခြင်းမရှိသေးဘဲ အွန်လိုင်းသုတေသနအချက်အလက်တစ်ခုမှာ စာကြမ်းတင်ပြထားတာဖြစ်ပါတယ်။

Source: CNN.
#Yangon_Media_Group

#LocalNews
Published - 27 Feb 2022

ကချင်ပြည်နယ်၊ မြစ်ကြီးနားမြို့နယ်တွင် ဖေဖော်ဝါရီ ၂၃ ရက်က ကျပ်သိန်း ၇၀၀ ကျော်တန်းဖိုးရှိမူးယစ်ဆေးဝါးများ ဖမ်းဆီးရမိခဲ့တယ်လို့ မူးယစ်ဆေးဝါးတားဆီးနှိမ်နှင်းရေးရဲတပ်ဖွဲ့က သိရပါတယ်။

ဖေဖော်ဝါရီလ ၂၃ ရက်နေ့က မူးယစ်ဆေးဝါးတားဆီးနှိမ်နင်းရေးရဲတပ်ဖွဲ့မှ တပ်ဖွဲ့၀င်များပါ၀င်သော ပူးပေါင်းအဖွဲ့သည် သတင်းအရ သက်သေများနှင့်အတူ မြစ်ကြီးနားမြို့၊ (၂၁)မိုင်ပူးပေါင်းစစ်ဆေးရေးစခန်းတွင် မြစ်ကြီးနားမြို့ဘက်မှ မိုးကောင်းမြို့ဘက်သို့ ထွယ်နော် မောင်းနှင်ပြီး ဘရန်တောင်၊ စင်းယူတူးရိန် နှင့် လဖိုင်ဂမ်အောင် တို့လိုက်ပါလာသည့် LAND CRUISER အမျိုးအစား မော်တော်ယာဉ်အား ရပ်တန့်စစ်ဆေးရှာဖွေရာမော်တော်ယာဉ်ပေါ်မှ ဆပ်ပြာခွက်များဖြင့်ထည့်ထားသည့် ဘိန်းဖြူအလေးချိန် ၂.၃၂ ကီလို(ကာလပေါက်စျေးတန်ဖိုးငွေကျပ်သိန်း ၅၈၀)နှင့် လက်ကိုင်ဖုန်း ၃ လုံးတို့အား တွေ့ရှိသိမ်းဆည်းရမိခဲ့တယ်လို့ သိရပါတယ်။

ထပ်မံစစ်ဆေးဖော်ထုတ်ချက်အရ ယင်းနေ့ ညနေ ၄ နာရီခွဲတွင် မြစ်ကြီးနားမြို့၊နယ်မြေ(၁၁)၊တပ်ကုန်း(ထွယ်ဆန်)ရပ်ကွက်ရှိ ဘရန်တောင် ငှားရမ်းနေထိုင်သည့် နေအိမ်အား ၀င်ရောက်ရှာဖွေရာ နေအိမ်အတွင်းရှိ ဆောင်းဘောက်များအတွင်းမှ ဘိန်းဖြူအလေးချိန် ၀.၉၃ ကီလို (ကာလပေါက်စျေးတန်ဖိုးငွေကျပ် ၂၃၂.၅ သိန်း)၊ စိတ်ကြွရူးသွပ်ဆေးပြား ၉၀၀ ပြား(ကာလပေါက်စျေး တန်ဖိုးငွေကျပ် ၁၈ သိန်း)နှင့် မြန်မာငွေကျပ် သိန်း ၃၀ တို့အား ထပ်မံတွေ့ရှိသိမ်းဆည်းရမိခဲ့တယ်လို့ သိရပါတယ်။

မူးယစ်ဆေးဝါးဖမ်းဆီးရမိမှုမှ ထွယ်နော်(၂၂)နှစ်၊ ဘရန်တောင်(၃၄)နှစ်၊ စင်းယူတူးရိန်(၂၉)နှစ် နှင့် လဖိုင်ဂမ်အောင်(၃၂)နှစ်တို့အား သက်ဆိုင်ရာရဲစခန်းများတွင် မူးယစ်ဆေးဝါးနှင့် စိတ်ကိုပြောင်းလဲစေသောဆေးဝါးများဆိုင်ရာဥပဒေအရ အမှုဖွင့်အရေးယူထားရှိပြီး ကွင်းဆက်များ ဖော်ထုတ်လျက်ရှိတယ်လို့ သိရပါတယ်။

ymg/hm
#Yangon_Media_Group

Published 27 February 2022

ပူတင် စမတ်ဖြစ်နေတာကပြဿနာမဟုတ်ဘူး လို့ အမေရိကန်သမ္မတဟောင်း ဒေါ်နယ်ထရမ့်က ပြောကြားလိုက်ပါတယ်။ သူက ဖလော်ရီဒါပြည်နယ် အော်လန်ဒိုမှာကျင်းပတဲ့ ကွန်ဆာဗေးတစ်နိုင်ငံရေးလှုပ်ရှားမှုကွန်ဖရင့်မှာ ပြောကြားတဲ့ မိန့်ခွန်းထဲ ထည့်သွင်းပြောကြားလိုက်တာပါ။ “ ပြဿနာအစစ်က ကျွန်တော်တို့ခေါင်းဆောင်တွေ(နေတိုးခေါင်းဆောင်)ဟာ လူပေါတွေ ဖြစ်လို့ပဲ “ လို့ သူကပြောပါတယ်။ နေတိုးခေါင်းဆောင်တွေဆီက အရေးယူဒဏ်ခတ်မှုရဲ့ အနည်းဆုံးအကျိုးဆက်တစ်ခုတည်းနှင့် တစ်နိုင်ငံလုံးသိမ်းယူနိုင်တယ်လို့ ပူတင်က ထင်ကိုထင်လိမ့်မယ်” လို့ သူကပြောပါတယ်။

Source AFP

#LocalNews
Published -27 Feb 2022

သျှမ်းပြည်ညီညွတ်ရေးကောင်စီ (CSSU) ရဲ့လုပ်ငန်းစဉ်များ ခေတ္တဆိုင်းငံ့ထားရန် အချက် ၄ ချက်ပါ သဘောထားထုတ်ပြန်ချက်ကို သျှမ်းပြည်ပြန်လည်ထူထောင်ရေးကောင်စီ (RCSS) မှ ယနေ့ထုတ်ပြန်လိုက်ပါတယ်။

၂၀၁၁ ခုနှစ်၊ ဒီဇင်ဘာ ၂ ရက်နေ့က RCSS နဲ့ အစိုးရတို့အကြား နှစ်ဖက်အပစ်ရပ်သဘောတူစာချုပ်ချုပ်ဆိုနိုင်ခဲ့ပြီး သက်ဆိုင်ရာ အဖွဲ့အစည်းတွေနဲ့ နိုင်ငံရေးပြသာနာကို နိုင်ငံရေးနည်းအရ ဖြေရှင်းခွင့်ရရှိရန်အတွက် ၂၀၁၃ ခုနှစ်၊ အောက်တိုဘာ ၁၇ ရက်နေ့က သျှမ်းပြည်ညီညွှတ်ရေးကော်မတီ (Committee for Shan State Unity - CSSU) ကို ဖွဲ့စည်းခဲ့တာဖြစ်တယ်လို့ သိရပါတယ်။

ထုတ်ပြန်ချက်မှာ အလှည့်ကျခေါင်းဆောင်ခြင်းစနစ်ကျင့်သုံးရန် သဘောတူညီမှုရရှိခဲ့သော်လည်း အခြေအနေနဲ့ကိုက်ညီမှုရှိသော်လည်း အခြားတစ်ဖက်တွင် သက်ဆိုင်ရာအစုအဖွဲ့အတွက် နိုင်ငံရေးအကျိုးအမြတ် ရယူနိုင်တဲ့အခွင့်အလမ်းများဖြစ်စေတာကြောင့် ထိရောက်မှုမရှိခဲ့ဘူးလို့ ဖော်ပြထားပါတယ်။

ဒါ့အပြင် ပါတီနှစ်ပါတီအကြား ညိနှိုင်းဆောင်ရွက်မှုများ မလုပ်ဆောင်နိုင်ခဲ့ခြင်း၊ သျှမ်းလက်နက်ကိုင်တပ်နှစ်တပ် အကြား ၂၀၁၈ နှစ်ကုန်ပိုင်းမှစပြီး ၂၀၂၀ အထိ ဖြစ်ပွားခဲ့သည့် နှစ်ဘက်တပ်ထိတွေ့မှုများကို CSSU မှ မဖြေရှင်းနိုင်ခဲတဲ့အပြင် ၂၀၂၁ - ၂၀၂၂ ခုနှစ် အထိ တိုက်ပွဲများစဉ်ဆက်မပြတ် ပြင်းထန်ကျယ်ပြန့်လာခြင်းကြောင့် အရပ်သား ပြည်သူများ ထိခိုက်နစ်နာ၊ စစ်ဘေးရှောင်၊ အတိဒုက္ခရောက်စေခြင်းတို့ ဖြစ်ပွားခဲ့တယ်လို့ဆိုပါတယ်။

ဆက်လက်ပြီး CSSU ရဲ့ရည်မှန်းချက်ဖြစ်တဲ့ သျှမ်းတိုင်းရင်းသားများအကြား ညီညွှတ်ရေးမှသည် သျှမ်းပြည်တိုင်းရင်းသားများအားလုံး ညီညွှတ်ရေးသို့ ဦးတည်ရန်အတွက် တိုးတက်မှု မရှိသလောက် နည်းပါးတဲ့အပြင် သျှမ်းပြည်အတွက် ရှင်းလင်းတိကျတဲ့ နိုင်ငံရေးရည်မှန်းချက်များ မချမှတ်နိုင်ခဲ့ခြင်းနဲ့ ကော်မတီအတွင်း အဖွဲ့ဝင်များ ကိုယ်စားပြုပါဝင်မှုနဲ့ အတွင်းရေးမှူးအဖွဲ့ ကိုယ်စားပြုပါဝင်မှုတို့မှာ အဖွဲ့ဝင်ဖြစ်တည်မှုအပေါ်တွင် အခြေမခံခြင်း စတဲ့အချက်အလက်များကြောင့် CSSU လုပ်ငန်းစဉ်များ ယာယီဆိုင်းငံ့ရန် RCSS ရဲ့ထုတ်ပြန်ကြေညာချက်မှာ ရေးသားဖော်ပြထားပါတယ်။

ymg/hm
#Yangon_Media_Group

#LocalNews
Published-27 Feb 2022

ရန်ကုန်မြို့အတွင်းပြေးဆွဲလျက်ရှိတဲ့ YBS ယာဉ်လိုင်းတွေကို Yangon Payment Service(YPS)စနစ်နဲ့ ခရီးအကွာအဝေးအလိုက် ယာဉ်စီးခများ ပိုင်းဖြတ်ကောက်ခံသွားမှာဖြစ်တယ်လို့ YRTC ရဲ့ သတင်းထုတ်ပြန်ချက်အရ သိရပါတယ်။

လတ်တလောမှာYBS ယာဉ်လိုင်းတွေကို ပုံသေယာဉ်စီးခတိုးမြှင့်ကောက်ခံဖို့ တရားဝင်ခွင့်ပြုထားတာမရှိသေးပဲ YPS ကတ်စနစ်ကိုအသုံးပြုပြီး ခရီးအကွာအဝေးအလိုက် ကောက်ခံတဲ့စနစ်ကို ဆောင်ရွက်မယ်လို့ YRTC မှ တွဲဖက်အတွင်းရေးမှူး ဦးလျန်ကျင့်မန်က ပြောပါတယ်။

YBS ယာဉ်တွေမှာ ယာဉ်စီးခကို YPS ကတ်နဲ့ အသုံးပြုတဲ့စနစ် ပိုပြီး တွင်ကျယ်လာဖို့ရန်ကုန်တိုင်းဒေသကြီး ပုဂ္ဂလိက သယ်ယူပို့ဆောင်ရေးကြီးကြပ်မှုကော်မတီ - YRTC က လုပ်ဆောင်နေပြီး အဆိုပါကတ်စနစ်အကောင်အထည်ဖော်ပါက ကတ်စနစ်ဆောင်ရွက်ပေးတဲ့ကုမ္ပဏီ၊YRTCနဲ့ ဘဏ်တို့ကို ဝန်ဆောင်ခတွေ ပေးသွင်းရမှာဖြစ်တာကြောင့် ခရီးစဥ်အစအဆုံးကို ငွေကျပ် ၄၀၀ ထက်မပိုသောနှုန်းထားသတ်မှတ်ကာ ပိုင်းဖြတ်စနစ်နဲ့ကောက်ခံစေချင်တယ်လို့ ယာဥ်လိုင်းကုမ္ပဏီတွေကပြောဆိုထားပါတယ်။

YPS ကတ်စနစ်အရ ခရီးစဉ်မိုင် အကွာအဝေးအလိုက် ယာဉ်စီးခများ ပိုင်းဖြတ်နိုင်ရေးအတွက် ယာဉ်လိုင်းကုမ္ပဏီများနဲ့ Asia Starmar Intelligient ကုမ္ပဏီတို့ ညှိနှိုင်းဆောင်ရွက်နေဆဲဖြစ်တယ်လို့ ဆိုပါတယ်။

ပြီးခဲ့တဲ့ ၂၀၂၀ ပြည့်နှစ် ဇူလိုင်လ ၂၁ ရက်နေ့ကစပြီးတော့ YBS ခရီးသည်တင်ဘတ်စ်ကားလိုင်းတွေမှာ ငွေပေးချေစနစ်ဖြစ်တဲ့ YPS (Yangon Payment Services) စတင် အသုံးပြုခဲ့ကြတာဖြစ်ပေမယ့် တွင်တွင်ကျယ်ကျယ် မဖြစ်သေးတာကြောင့် YRTC အနေနဲ့ ပြီးခဲ့တဲ့ ရက်က Asia Starmar ကုမ္ပဏီ၊ လူထုမိတ်ဆွေယာဉ်လိုင်းအများနှင့် သက်ဆိုင်သောကုမ္ပဏီ ၊ GYCT Public ကုမ္ပဏီ ၊ IGE ကုမ္ပဏီ ၊ UAB Bank စတာတွေနဲ့ ဆွေးနွေးနေကြပါတယ်။

လက်ရှိမှာ YPS ကတ် တပ်ဆင်ထားတဲ့ ယာဉ်လိုင်းကုမ္ပဏီ ၅ ခုရှိပြီး YPS ကတ်အသုံးပြုနိုင်တဲ့ ယာဉ်စီးရေ ၁,၉၀၂ စီးရှိပြီလို့ YRTC က သိရပါတယ်။

ymg/hm
#Yangon_Media_Group

#WorldWildlife
Published 26 February 2022

ကွန်ဂိုနိုင်ငံအရှေ့ဘက်ရှိ တောရိုင်းတိရိစ္ဆာန်ဘေးမဲ့တောကြီးဟာ မျိုးသုဉ်းပျောက်ကွယ်မည့် အန္တရာယ်ကြုံနေရတဲ့ မျောက်ဝံများအတွက် ခိုလှုံရာနေရာဖြစ်နေပါတယ်။

#Yangon_Media_Group

Published 26 February 2022

ရုရှားနှင့်ယူကရိန်းနိုင်ငံအကြားဖြစ်ပွားနေတဲ့ တင်းမာမှုတွေကြောင့် ကမ္ဘာ့ဈေးကွက်မှာ အလျူမီနီယမ်ရဲ့ဈေးဟာ စံချိန်တင် မြင့်တက်သွားရပါတယ်။ သတ္တုတွေထုတ်လုပ်ဖို့ အဓိက စွမ်းအင်ထုတ်လုပ်နေတဲ့ရုရှားအပေါ် ဒဏ်ခတ်ပိတ်ဆို့မှုတွေကြောင့် စွမ်းအင်ပြတ်တောက်မှုတွေဖြစ်လာမှာကို စိုးရိမ်ပူပန်လာကြတာဖြစ်ပါတယ်။

လန်ဒန်သတ္တုဈေးကွက်မှာ အလျူမီနီယမ်ရဲ့ဈေးနှုန်းဟာ တစ်တန်ကို အမေရိကန်ဒေါ်လာ ၃၄၄၉ဒေါ်လာအထိ ၄.၈ ရာခိုင်နှုန်း မြင့်တက်သွားပါတယ်။ ဒီဈေးနှုန်းဟာ ၂၀၀၈ခုနှစ်တုန်းက စံချိန်တင်ခဲ့တဲ့ ဈေးနှုန်းကိုကျော်ဖြတ်မြင့်တက်သွားတာပါ။

Source CMG