#LocalHealth
Published_ 1 Mar 2022

ကျန်းမာရေးဝန်ကြီးဌာနက သူနာပြုသင်တန်းကျောင်းများမှ သင်တန်းပြီးမြောက် အောင်မြင်ခဲ့သူ သစ်လွင်သူနာပြု ၆၈၄ ဦးအား မနေ့က အလုပ်ခန့်အပ်တာဝန်ပေးအပ် ခဲ့ကြောင်း သိရပါတတယ်။

ထိုကဲ့သို့ပေးအပ်ရာမှာ နေပြည်တော်၊ မုံရွာ၊ လွိင်ကော် သူနာပြုသင်ကျောင်းများမှ သင်တန်း ပြီးမြောက်အောင်မြင်ခဲ့သူ သစ်လွင်သူနာပြု ၆၅ ဦးအား ကျန်းမာရေး ဝန်ကြီးဌာန၊ အစည်းအဝေးခန်းမ နှင့် သူနာပြု/သားဖွားသင်တန်းကျောင်း ၂၂ ကျောင်းမှ သင်တန်းပြီးမြောက် အောင်မြင်ခဲ့သူ သစ်လွင်သူနာပြု ၆၁၉ ဦးအား သက်ဆိုင်ရာ တိုင်းဒေသကြီး/ပြည်နယ်များ၌လည်းကောင်း သစ်လွင်သူနာပြု ခန့်အပ်လွှာများ ပေးအပ်ခဲ့ပြီး၊ စုစုပေါင်း သစ်လွင်သူနာပြု ၆၈၄ ဦး ခန့်အပ်ခဲ့ကြောင်းသိရှိရပါတယ်။

ဒါ့အပြင် မကြာမီသင်တန်းပြီးဆုံးတော့မယ့် သားဖွားဆရာမ ၁၆၅ ဦးကိုလည်း အမြန်ဆုံးအလုပ်ခန့်အပ် တာဝန်ပေးသွားမှာဖြစ်ပြီး ကျန်ရှိနေသေးသော သူနာပြုသားဖွား သင်တန်း၊ ပေါင်းကူးသင်တန်းများကို ဆက်လက်ဖွင့်လှစ်သွားမှာ ဖြစ်တယ်လို့ ကျန်းမာရေး ဝန်ကြီးဌာနက သတင်းထုတ်ပြန်ထားပါတယ်။

ကိုဗစ်-၁၉ ကမ္ဘာ့ကပ်ရောဂါဖြစ်ပွားနေသည့် ကာလဖြစ်သည့်အတွက် ၂၀၂၀ ပြည့်နှစ်၊ ဧပြီလမှစတင်၍ သင်တန်းကျောင်းများ ပိတ်ထားခဲ့ရပြီး ၂၀၂၁ ခုနှစ်၊ အောက်တိုဘာလမှစတင်၍ ကိုဗစ်-၁၉ ကာကွယ်ထိန်းချုပ်ရေး လမ်းညွှန်ချက်များနှင့်အညီ ပြန်လည်ဖွင့်လှစ် နိုင်ခဲ့ကာ သူနာပြုသင်တန်းသား/သူလေးများရဲ့ မဆုတ်မနစ် ဇွဲ၊ လုံလ၊ ဝီရိယနှင့် ကြိုးစားအားထုတ်သင်ယူခဲ့ကြလို့ သူနာပြု-သားဖွားဒီပလိုမာစာမေးပွဲကို အောင်မြင်စွာဆွတ်ခူးနိုင်ကြတဲ့အတွက် ဝမ်းမြောက်ဂုဏ်ယူပါကြောင်း ကျန်းမာရေး ဝန်ကြီး၊ ပါမောက္ခဒေါက်တာသက်ခိုင်ဝင်း ပြောကြားခဲ့ပါတယ်။

ကျန်းမာရေးဝန်ကြီးဌာနအနေနဲ့ ကျန်းမာ ရေးလူ့စွမ်းအားအရင်းအမြစ်များဖြစ်တဲ့ ဆရာဝန်များ၊ သူနာပြုဆရာ/ဆရာမများ၊ သားဖွား ဆရာမများနှင့် ဆေးဘက်ဆိုင်ရာ ပညာရှင်များကို လေ့ကျင့်မွေးထုတ်ပေးလျက်ရှိရာတွင် ပြည်သူလူထုအား အရည်အသွေး ပြည့်ဝသော ကျန်းမာရေးစောင့်ရှောက်မှုပေးနိုင်ရန် နိုင်ငံတော်ရဲ့ လိုအပ်ချက်နှင့်အညီ နှစ်စဉ်လေ့ကျင့်မွေးထုတ်လျက်ရှိကြောင်း သိရပါတယ်။
ymg-mnn
#Yangon_Media_Group

#LocalNews
Published - 1 March 2022

သီလဝါစက်မှုဇုန်တွင် တန်ဖိုးမြှင့်ငါးစာထုတ်စက်ရုံတစ်ခုကို အမေရိကန်အခြေစိုက် Scoular က ဖွင့်လှစ်ခဲ့ကြောင်း ယင်း၏ တရားဝင် သတင်းစာမျက်နှာတွင် ထုတ်ပြန်ထားသည်။

"အာရှမှာ နောက်ထပ် ရင်းနှီးမြှုပ်နှံမှုတစ်ခုအနေဖြင့် Scoular ရဲ့ ငါးအသားလုပ်ငန်းကို တိုးချဲ့ရတာ ကျွန်ုပ်တို့ စိတ်လှုပ်ရှားမိပါတယ်၊ အရည်အသွေးရှိတဲ့ ငါးအသားထွက်ပစ္စည်းတွေကို အာရှအစာဈေးကွက်တွေကို အချိန်နှင့်တပြေးညီ တင်ပို့ ပံ့ပိုးပေးဖို့ လုပ်ငန်းမှာအချက်အချာ ကျမှာပါ"ဟုလည်း ထုတ်ပြန်ရေးသားထားရာတွင် ဖော်ပြထားသည်။

သီလဝါစက်မှုဇုန်တွင် လာရောက်ဖွင့်လှစ်ခဲ့သော ငါးစာ တန်ဖိုးမြှင့် ထုတ်လုပ်မယ့် စက်ရုံသစ်ကို ရာခိုင်နှုန်းပြည့် နိုင်ငံခြားရင်းနှီးမြှုပ်နှံမှု အနေဖြင့် Scoular Myanmar Co,. Ltd. က ဆောင်ရွက်နေခြင်းဖြစ်ကြောင်းနှင့် မြန်မာနိုင်ငံ ရင်းနှီးမြှုပ်နှံမှုကော်မရှင် (MIC) ကလည်း ၂၀၂၁ ခုနှစ် ဇန်နဝါရီလအတွင်းက ခွင့်ပြုခဲ့ကြောင်းလည်း သိရသည်။

မြန်မာနိုင်ငံတွင် ဖွင့်လှစ်လိုက်သော အဆိုပါစက်ရုံသစ်က အမေရိကန်အခြေစိုက် Scoular ၏ အာရှဒေသအတွင်း တိုးချဲ့တည်ရှိမှုအဓိက အစိတ်အပိုင်းတစ်ခုဖြစ်ကြောင်းလည်း သိရသည်။

Scoular သည် ရောင်းအားဒေါ်လာ ၆ ဘီလီယံရှိသော နှစ်ပေါင်း ၁၃၀ သက်တမ်းရှိ ကုမ္ပဏီတစ်ခုဖြစ်ကြောင်း၊ ယင်းထုတ်ကုန်များမှာ ဘေးကင်းလုံခြုံ ယုံကြည်စိတ်ချရကြောင်းနှင့် Scoular ၏ ကမ္ဘာလုံးဆိုင်ရာ ရုံးချုပ်မှာ အမေရိကန်၊ Omaha၊ Nebraska တွင် တည်ရှိကြောင်းလည်း သိရသည်။

ymg/mt
photo-Scoular
Yangon_Media_Group

Published 1 March 2022

ရုရှားနှင့်ဆက်လက်ဖြစ်ပွားနေတဲ့ ပဋိပက္ခတွေကြောင့် အခြေအနေတွေ တင်းမာနေတဲ့ အကျိုးဆက်တွေဟာ ယူကရိန်းနယ်စပ် လုဗျူးနယ်စပ်မြို့ကလေးရဲ့ ဒေသခံတော်တော်တော်များများနှင့် တစ်နိုင်ငံလုံးကို ရိုက်ခတ်နေပါတယ်။

လုဗျူးမြို့က ဒေသခံတွေဟာ ဆီရီယယ်လ်တွေ၊ရေနှင့် အခြားအစားအစာတွေ၊ပြီးတော့ အိမ်မွေးတိရိစ္ဆာန်အစားအစာတွေကို စတိုးဆိုင်တွေမှာ ဝယ်ယူနေကြပါတယ်။ သူတို့ဟာ ဆေးဆိုင်တွေမှာလည်း ဆေးတွေ အမျာကြီးကို ဝယ်ယူနေကြပါတယ်။ ဓာတ်ဆီဆိုင်တွေမှာ ဆီလက်ကျန်မရှိသလောက်ဖြစ်နေပြီး အေတီအမ်စက်တွေမှာလည်း ငွေလက်ကျန်မရှိနီးပါးဖြစ်နေပါတယ်။

ဒေသခံတွေနှင့်စစ်ဘေးရှောင်တိမ်းလာကြသူတွေရဲ့ ကိုယ်တွေ့ခံစားချက်တွေကို ရုပ်သံတင်ဆက်ထားပါတယ်။

Source CMG

#LocalNews
Published - 1 March 2022
ရန်ကုန်တိုင်းဒေသကြီးအတွင်းပြေးဆွဲနေသော YBSယာဉ်များကို ကတ်စနစ်နဲ့စီးနှင်းနိုင်ဖို့အတွက် YPS ကတ်အရောင်းစင်တာတွေကို ပြန်လည်ဖွင့်လှစ်နေပြီဖြစ်ကြောင်း ရန်ကုန်တိုင်းဒေသကြီး ပုဂ္ဂလိကသယ်ယူပို့ဆောင်ရေးကြီးကြပ်မှုကော်မတီကသိရပါတယ်။

YPS အမှတ်တံဆိပ်ပါသော g&g ဆိုင်များအပြင်YPS ရဲ့ အရောင်းကောင်တာများကို ဆူးလေမှတ်တိုင်၊မြန်မာပလာဇာရှေ့၊ သခင်မြပန်းခြံ(ကမ်းနားလမ်း)၊ယုဇနပလာဇာရှေ့နဲ့စိုက်ပျိုးရေးမှတ်တိုင်အနီးရှိ YPS အရောင်းကောင်တာများတွင် တနင်္လာမှ သောကြာ နံနက် ၈နာရီခွဲ မှ ညနေ ၄နာရီခွဲ အတွင်း၊ စနေနေ့တွင် နံနက် ၈နာရီခွဲမှ နေ့လည် ၁၂နာရီခွဲအတွင်း YPS ကတ်သစ်ဝယ်ယူခြင်း၊ယာဉ်စီးခဖြည့်သွင်းခြင်း၊လက်ကျန်ငွေစစ်ဆေးခြင်း၊YPS ကတ်အခြေအနေစစ်ဆေးခြင်း တို့ကို သတ်မှတ်အချိန်အတွင်းဝန်ဆောင်မှုရယူနိုင်တယ်လို့ သိရပါတယ်။

ရန်ကုန်မြို့အတွင်း ပြေးဆွဲလျက်ရှိတဲ့ YBS ယာဉ်လိုင်းတွေကိုYangon Payment Service(YPS)စနစ်နဲ့ ခရီးအကွာအဝေးအလိုက် ယာဉ်စီးခများ ပိုင်းဖြတ်ကောက်ခံသွားမှာဖြစ်တယ်လို့ YRTC ရဲ့ သတင်းထုတ်ပြန်ချက်အရ သိရပါတယ်။

ပြီးခဲ့တဲ့ ၂၀၂၀ ပြည့်နှစ် ဇူလိုင်လ ၂၁ ရက်နေ့က စပြီးတော့ YBS ခရီးသည်တင်ဘတ်စ်ကားလိုင်းတွေမှာ ငွေပေးချေစနစ်ဖြစ်တဲ့ YPS (Yangon Payment Services) စတင် အသုံးပြုခဲ့ကြတာ ဖြစ်ပေမယ့် တွင်တွင်ကျယ်ကျယ် မဖြစ်သေးတာကြောင့် YRTC အနေနဲ့ ပြီးခဲ့တဲ့ ရက်က Asia Starmar ကုမ္ပဏီ၊ လူထုမိတ်ဆွေယာဉ်လိုင်းအများနှင့်သက်ဆိုင်သောကုမ္ပဏီ ၊ GYCT Public ကုမ္ပဏီ ၊ IGE ကုမ္ပဏီ ၊ uab Bank စတာတွေနဲ့ ဆွေးနွေးခဲ့ကြပါတယ်။

လက်ရှိမှာ YPS ကတ် တပ်ဆင်ထားတဲ့ ယာဉ်လိုင်းကုမ္ပဏီ ၅ ခု ရှိပြီး YPS ကတ်အသုံးပြုနိုင်တဲ့ ယာဉ်စီးရေ ၁၉၀၂ စီးရှိပြီ လို့ YRTC က သိရပါတယ်။

ymg/hm
#Yangon_Media_Group

 #WorldPolitics
Published - 1 March 2022

နယူးယော့ခ်မြို့ရှိ ကုလသမဂ္ဂဆိုင်ရာရုရှားဝန်ထမ်း ၁၂ ဦးအား အမေရိကန်တို့ကနှင်ထုတ်လိုက်ပြီဖြစ်ကြောင်း တနင်္လာနေ့က ကြေညာလိုက်ပါတယ်။ထိုသို့ နှင်ထုတ်လိုက်တဲ့အတွက် အမေရိကန်-ရုရှားသံတမန်ဆက်ဆံရေးကတော့ ပိုမိုဆိုးရွားလာမှာသေချာပါတယ်။
ကုလသမဂ္ဂဆိုင်ရာ ရုရှားသံအမတ်'ဗာဆယ်လီနီဘန်ဇီယာ'က သူ့ကိုနှင်ထုတ်လိုက်ပြီဖြစ်ကြောင်းသိရှိပြီးနောက် တနင်္လာနေ့ကပဲ မီဒီယာရှင်းလင်းပွဲတစ်ခုပြုလုပ်ခဲ့ပါတယ်။

"ရုရှားသံတမန် ၁၂ ဦးကို မလိုအပ်တော့ဘူးလို့ ကြေညာလိုက်ပြီး မတ်လ ၇ ရက်နေ့မှာ နိုင်ငံမှထွက်ခွာသွားဖို့ အသိပေးထားတဲ့စာတစ်စောင်ကို အမေရိကန်တာဝန်ရှိသူတွေထံမှ ပေးပို့လာပါတယ်။ အမေရိကန်အာဏာပိုင်တွေက ကုလဆိုင်ရာရုရှားဝန်ထမ်းတွေကို နောက်ထပ်တစ်ခါမထီမဲ့မြင်ပြုလိုက်တာပါပဲ။ သူတို့ ထုတ်ပြန်ထားတဲ့ အိမ်ရှင်နိုင်ငံသဘောတူညီချက်ကတိကဝတ်တွေကို ပြင်းပြင်းထန်ထန်ချိုးဖောက်လိုက်တာပါ" လို့ 'နီဘန်ဇီယာ'က ပြောကြားခဲ့ပါတယ်။

ဝါရှင်တန်မြို့ ရုရှားသံရုံးမှ ဒုတိယအဆင့်သံတမန်'ဆာဂျီထရီပယ်ကော့ဗ်'ကို အမေရိကန်မှနှင်ထုတ်ကြောင်း ကြေညာပြီးတစ်ပတ်မပြည့်ခင်မှာပဲ အခုလိုနောက်ထပ်ရုရှားဝန်ထမ်းတွေကို ထပ်မံနှင်ထုတ်လိုက်တာဖြစ်ပါတယ်။

ရုရှားသံတမန်တွေကိုနှင်ထုတ်ရခြင်းက မော်စကိုရှိ အမေရိကန်သံရုံးမှ လက်ထောက်ဦးစီးချုပ်အား ရုရှားတို့ကအကြောင်းမဲ့နှင်ထုတ်လိုက်ခြင်းကြောင့်ဖြစ်တယ်လို့ အမေရိကန်နိုင်ငံခြားရေးဌာနက အကြောင်းပြလိုက်ပါတယ်။

ပြီးခဲ့တဲ့နှစ်ကုန်ပိုင်းလောက်ကလည်း ရုရှားသံတမန် ၂၇ ဦးနဲ့သူတို့ မိသားစုတွေကို အမေရိကန်ကပြည်နှင်ထုတ်ခဲ့ပြီး ဇန်နဝါရီ ၃၀ ရက်နေ့မှာ နိုင်ငံကထွက်ခွာဖို့ အသိပေးခဲ့ပါသေးတယ်။

အဲဒီအချိန်တုန်းက ရုရှားသံရုံးမှာ ဝန်ထမ်းပြတ်လတ်မှုကြုံတွေ့နေရကြောင်း အမေရိကန်မှရုရှားသံအမတ်'အန်နာတိုလီအန်တိုနော့ဗ်'က ပြောကြားခဲ့ပါတယ်။ထိုအချိန်များမတိုင်ခင် အမေရိကန်မှာအလုပ်လုပ်နေတဲ့ ရုရှားသံတမန်အယောက် ၂၀၀ နီးပါးခန့် ရှိခဲ့တာဖြစ်ပါတယ်။

'နီဘန်ဇီယာ'က သတင်းထောက်တွေကိုပြောကြားရာမှာ အမေရိကန်က အခုနောက်ဆုံးနှင်ထုတ်ခံရခြင်းက ဘာအကြောင်းပြချက်ကြောင့်လဲဆိုတာ မသိရှိထားကြောင်း၊ အသိပေးစာကိုလည်း သူကိုယ်တိုင်မဖတ်ကြည့်ရသေးကြောင်း၊ ထွက်ခွာဖို့ အမိန့်ပေးခံရတဲ့သံတမန်တွေက ဘယ်သူတွေလဲဆိုတာလည်း မသိရသေးကြောင်း ပြောဆိုသွားပါတယ်။

အခုနှင်ထုတ်ခံလိုက်ရတဲ့ ရုရှားဝန်ထမ်းတွေဟာ နိုင်ငံတော်လုံခြုံရေးကိုထိပါးစေသော သူလျှိုလုပ်ငန်းများတွင် ပါဝင်ပတ်သက်နေသည်ဟု ကုလဆိုင်ရာအမေရိကန်သံရုံးမှ ပြောရေးဆိုခွင့်ရှိသူတစ်ဦးက ရိုက်တာသတင်းဌာနကို ပြောကြားခဲ့ပါတယ်။

နှင်ထုတ်ခြင်းတွေပြုလုပ်ဖို့ လပေါင်းများစွာစီစဉ်နေခဲ့တာဖြစ်ပြီး ရုရှား-ယူကရိန်းပဋိပက္ခနဲ့ မသက်ဆိုင်ကြောင်း ရှင်းပြသွားပါတယ်။'နီဘန်ဇီယာ'ကတော့ နှင်ထုတ်ခံရတဲ့အတွက်ဝမ်းနည်းမိကြောင်းနဲ့ အမေရိကန်ဟာ အိမ်ရှင်နိုင်ငံရဲ့သဘောတူညီချက်အပေါ် မလေးမစားပြုမူတာဖြစ်တယ်လို့ ပြောကြားခဲ့ပါတယ်။
Source: RT

#WorldHealth
Published - 1 March 2022

အားပြင်းသည့် ကင်ဆာကုသနည်းများက ကိုဗစ်ရောဂါဖြစ်ပွားနေတဲ့ ကင်ဆာရောဂါသည်တွေရဲ့ အသက်သေဆုံးနိုင်ချေကို ပိုမိုဆိုးရွားစေခြင်းမရှိကြောင်း ယူကေမှ ကိုရိုနာဗိုင်းရပ်စ်နှင့်ကင်ဆာစောင့်ကြည့်ရေးအစီအစဉ်ရဲ့ သုတေသနအချက်အလက်များအရ သိရှိရပါတယ်။

ဓာတုဆေးဝါးကုထုံး၊ ကိုယ်ခံအားမြှင့်တင်ခြင်းကုထုံး၊ ဟော်မုန်းကုထုံး ဒါမှမဟုတ် ကင်ဆာဆေးဝါးများဖြင့် ကင်ဆာရောဂါကုသမှုခံယူနေတဲ့ ကိုဗစ်ရောဂါလူနာ ၂,၅၁၅ ဦးကို သုတေသီတို့က လေ့လာခဲ့ကြပါတယ်။

အဆိုပါလူနာတွေထဲက ၃၈ ရာခိုင်နှုန်းဟာ ကိုဗစ်ရောဂါလက္ခဏာစပေါ်ပြီး တစ်ပတ်အတွင်း ကွယ်လွန်ခဲ့ကြပါတယ်။စမ်းသပ်လေ့လာတဲ့လူနာတဝက်ခန့်ဟာ အသက် ၇၂ နှစ်အထက်လူကြီးတွေဖြစ်ပြီး ခြုံငုံကြည့်တဲ့အခါ အဆုတ်ကင်ဆာ သွေးကင်ဆာခံစားရတဲ့လူနာတွေဟာ အသက်သေဆုံးနိုင်ချေများနေပါတယ်။

ဓာတုဆေးဝါးကုထုံးဖြင့် ကိုဗစ်ရောဂါကြောင့်သေဆုံးနိုင်ချေကို မသက်ရောက်စေပေမယ့် ကိုယ်ခံအားမြှင့်တင်ခြင်းကုထုံးကတော့ အသက်ရှင်နိုင်စွမ်းကိုတောင် မြင့်မားစေနိုင်ကြောင်း JAMA Network Open ဂျာနယ်မှာ တနင်္လာနေ့က ဖော်ပြထားပါတယ်။

အစောပိုင်းလေ့လာချက်များအရ ကင်ဆာရောဂါအခံရှိတဲ့ ကိုဗစ်လူနာတွေဟာ အခြေအနေဆိုးရွားလေ့ရှိတယ်လို့ တွေ့ရှိခဲ့ကြပေမယ့် ဒါဟာ ကင်ဆာကုထုံးတွေကြောင့်ဆိုတာထက် အသက်အရွယ်၊ ကျား/မ၊ အခြားရောဂါအခံများနဲ့ ကင်ဆာအမျိုးအစားတို့ အပေါ် ပိုပြီးမူတည်နေနိုင်ကြောင်း သုတေသနအဖွဲ့ က သုံးသပ်သွားပါတယ်။
Source: Reuters

#LocalNews
Published -1 Mar 2022

စစ်ကိုင်းတိုင်းဝန်ကြီးချုပ်ဟောင်း ဒေါက်တာမြင့်နိုင်ကို ဖေဖော်ဝါရီ ၂၈ ရက်နေ့ မနေ့က မုံရွာအကျဥ်းထောင်ရှိ အထူးတရားရုံးမှ ထောင်ဒဏ် ၂၁ နှစ်ချမှတ်လိုက် တယ်လို့ ရှေ့နေအသိုင်းအဝိုင်းကနေသိရပါတယ်။

ဝန်ကြီးချုပ်ဟောင်း ဒေါက်တာမြင့်နိုင်ကို မုံရွာအကျဥ်းထောင်ရှိ အထူးတရားရုံး က အဂတိပုဒ်မ ၅၅ နဲ့ အမှု(၇) မှုအတွက် ထောင်ဒဏ် ၂၁ နှစ်ချမှတ်ခဲ့တာဖြစ်တယ်လို့ အမှုတွေကိုလိုက်ပါဆောင်ရွက်ပေးနေတဲ့ တရားလွှတ်တော်ရှေ့နေတစ်ဦးက ပြောပါတယ်။

“၁ မှုကို ၃ နှစ်စီနဲ့ ၇ မှုအတွက် စုစုပေါင်း ၂၁ နှစ်ချလိုက်တာပါ။ အရင်ကလည်း ပုဒ်မ ၅၀၅(ခ)နဲ့ ထောင်ဒဏ် ၂ နှစ်ချထားသေးတယ်” လို့ ရှေ့နေတစ်ဦးကပြောပါတယ်။

၂၀၂၁ ခုနှစ် မေလ ၅ ရက်က ဝန်ကြီးချုပ်ဟောင်း ဒေါက်တာမြင့်နိုင်ကို အဂတိလိုက် စားမှု တိုက်ဖျက်ရေးဥပဒေ ပုဒ်မ ၅၅ ဖြင့် အမှု (၇)မှု၊ ၅၀၅(ခ)အမှု (၁) မှုတို့ကို မုံရွာမြို့မရဲစခန်းမှာ မေ ၅ ရက်တွင် ပထမ သတင်းပေးတိုင်ကြားချက် ဖွင့်လှစ်ကာ တရားစွဲဆိုခဲ့တာဖြစ်ပါတယ်။

အဂတိ လိုက်စားမှုတိုက်ဖျက်ရေးဥပဒေပုဒ်မ ၅၅ နဲ့ အမှုအမှတ် ၁/၂၀၂၁မှ ၇/၂၀၂၁အထိ အမှုတစ်မှုအတွက် အလုပ်နဲ့ ထောင် ဒဏ် ၃နှစ်စီချမှတ်ခဲ့ရာ စုစုပေါင်းအမှု (၇)မှုအတွက် အလုပ်နှင့် ထောင်ဒဏ် ၂၁ နှစ် ချမှတ်ခဲ့သလိုဝန်ကြီးချုပ်ဟောင်း ဒေါက်တာမြင့်နိုင်ကို မုံရွာအကျဉ်းထောင်တွင်း တရားရုံးက ၂၀၂၁ခုနှစ်ကဒီဇင်ဘာ ၂၀ ရက်က ပုဒ်မ ၅၀၅ (ခ) အမှုအတွက် ထောင်ဒဏ် ၂ နှစ် အမိန့်ချခဲ့တာ ကြောင့်စုစုပေါင်း ထောင်ဒဏ် ၂၃ နှစ်ကို ကျခံရမှာဖြစ်ပါတယ်။

ymg/hm
#Yangon_Media_Group

#WorldHealth
Published - 1 March 2022
ကိုဗစ်ရောဂါပြင်းထန်စွာဖြစ်ပွားပြီး ဆေးရုံတက်ကုသခံယူရတဲ့လူနာတွေမှာ ဆီးချိုရောဂါဖြစ်ပေါ်လာတတ်ပေမယ့် အချိန်ကြာလာရင် သွေးတွင်းသကြားဓာတ်ပမာဏ ပုံမှန်ပြန်ဖြစ်သွားတာမျိုးတွေ့ရတတ်ကြောင်း လေ့လာချက်အသစ်မှာ ဖော်ပြထားပါတယ်။

ကိုဗစ်ရောဂါကြောင့် ဆေးရုံတက်ကုသခံယူရပြီး ဆီးချိုလက္ခဏာပေါ်ပေါက်လာတဲ့လူနာ ၅၉၄ ဦးကို သုတေသနပညာရှင်တွေလေ့လာခဲ့ကြရာ အရင်ကဆီးချိုရောဂါမဖြစ်ဖူးတဲ့သူ ၇၈ ဦးပါဝင်လာပါတယ်။

အရင်တည်းက ဆီးချိုရောဂါရှိနေခဲ့သူတွေနဲ့ယှဉ်ရင် လက်ရှိအချိန်မှဆီးချိုလက္ခဏာပေါ်လာတဲ့သူတွေမှာ ကိုဗစ်ရောဂါပြင်းထန်တတ်ပေမယ့် သွေးတွင်းသကြားဓာတ်လွန်ကဲခြင်းကတော့ သိပ်ပြီးဆိုးရွားလေ့မရှိပါဘူး။

ကိုဗစ်ရောဂါဖြစ်ပွားခြင်းကနေ ဆီးချိုလက္ခဏာပေါ်လာတဲ့သူ ၄၀ ရာခိုင်နှုန်းက ဆေးရုံဆင်းပြီးတစ်နှစ်ခန့်ကြာတဲ့အခါ သွေးတွင်းသကြားဓာတ်ပမာဏက ပုံမှန်ပြန်ရောက်သွားကြောင်း သုတေသီတွေက ဆီးချိုရောဂါဆိုင်ရာဂျာနယ်မှာ ဖော်ပြခဲ့ကြပါတယ်။

"ကိုဗစ်ရောဂါရဲ့ ပြင်းထန်တဲ့သက်ရောက်မှုကြောင့် ဆီးချိုလက္ခဏာပေါ်ပေါက်လာခြင်းက ခဏတာအခြေအနေပြောင်းလဲတာမျိုး ဖြစ်နိုင်ပါတယ်" လို့ ဘော့စ်တွန်ရှိ မာဆာချူဆက်စ်အထွေထွေဆေးရုံမှ ဒေါက်တာ'ဆာရာခရွမ်မာ'က ရေးသားဖော်ပြထားပါတယ်။

"အင်ဆူလင်ချို့တဲ့ခြင်းကနေ ဆီးချိုရောဂါပေါ်လာတတ်ပေမယ့် အမြဲတမ်းဖြစ်သွားတာမျိုးမဟုတ်ပါဘူး။ ဆေးကုသခံယူခြင်း ဒါမှမဟုတ် အင်ဆူလင်ပေးခြင်းတို့ဖြင့် ဆီးချိုလက္ခဏာသက်သာစေပါတယ်။ ဒါ့အပြင် ဆီးချိုလက္ခဏာတွေ ဘယ်အချိန်လောက်ကျရင် သက်သာသွားသလဲဆိုတာကို ဆရာဝန်တွေအနေနဲ့ အနီးကပ်‌စောင့်ကြည့်နေဖို့လိုပါတယ်" လို့ 'ခရွမ်မာ'က ရှင်းလင်းပြထားပါတယ်။
Source: Reuters

#LocalNews
Published_ 1 March 2022
တပ်မတော်၏ စစ်ရေးဆိုင်ရာလှုပ်ရှားမှုများကို ၂၀၂၂ ခုနှစ် မတ်လ ၁ ရက်မှ ဒီဇင်ဘာလ ၃၁ ရက်အထိ ထပ်မံတိုးမြှင့်ရပ်စဲလိုက်ကြောင်း တပ်မတော်ကာကွယ်ရေး ဦးစီးချုပ်ရုံးက ကြေညာချက်ထုတ်ပြန်လိုက်ပါတယ်။

အဆိုပါထုတ်ပြန်ချက်တွင် တစ်နိုင်ငံလုံး ထာဝရငြိမ်းချမ်းရေးရရှိစေရေး၊ ငြိမ်းချမ်းရေး လုပ်ငန်းစဉ်များကို တိုးမြှင့်ဆောင်ရွက်နိုင်ရေး ရည်ရွယ်၍လည်းကောင်း၊ မြန်မာနိုင်ငံတစ်ဝန်းလုံး၌ ကိုဗစ်-၁၉ ရောဂါ ကာကွယ်၊ ထိန်းချုပ်၊ ကုသရေး လုပ်ငန်းစဉ်များကို ထိထိရောက်ရောက် ဆောင်ရွက်နိုင်ရေး ရည်ရွယ်၍လည်းကောင်း မြန်မာ နိုင်ငံတစ်ဝန်းလုံး၌ နိုင်ငံတော်ကာကွယ်ရေးနှင့် အုပ်ချုပ်မှုဆိုင်ရာကိစ္စရပ်များအပြင် နိုင်ငံတော်အစိုးရ၏ လုံခြုံရေးနှင့် အုပ်ချုပ်ရေး ယန္တရားများအား နှောင့်ယှက်ထိပါး တိုက်ခိုက်ချိန်မှအပ တပ်မတော်၏ စစ်ရေးဆိုင်ရာလှုပ်ရှားမှုများကို ၂၀၂၂ ခုနှစ်၊ မတ်လ ၁ ရက်မှ ဒီဇင်ဘာ ၃၁ ရက်နေ့အထိ ထပ်မံတိုးမြှင့် ရပ်စဲလိုက်ကြောင်း ဖော်ပြထားပါတယ်။

တပ်မတော်အနေဖြင့် ပြည်သူလူထုတစ်ရပ်လုံး လိုလားတောင့်တနေသည့် ငြိမ်းချမ်းရေးပန်းတိုင်ကို ဆွေးနွေးညှိနှိုင်းအဖြေရှာခြင်းဟူသည့် ဒီမိုကရေစီ ကျင့်စဉ်နှင့်အညီ လျှောက်လှမ်းကြရမည်ဖြစ်ပါသဖြင့် တိုင်းရင်းသား လက်နက်ကိုင် အဖွဲ့အစည်းများနှင့် သက်ဆိုင်သူများ အားလုံးအနေဖြင့် ငြိမ်းချမ်းရေးလုပ်ငန်းစဉ်များကို လက်တွေ့ကျကျ တိုးမြှင့်အကောင် အထည်ဖော် ဆောင်ရွက်နိုင်ရေး ကိုယ်စွမ်း၊ ဉာဏ်စွမ်းရှိသမျှပါဝင်ဆောင်ရွက်နိုင်ကြပါရန် မေတ္တာရပ်ခံထားပါတယ်။

တပ်မတော်အနေဖြင့် ၂၀၁၈ ခုနှစ် ဒီဇင်ဘာလ ၂၁ ရက်မှစ၍ ၂၀၂၂ ခုနှစ် ဖေဖော်ဝါရီလ ၂၈ ရက်နေ့အထိ ပစ်ခတ်တိုက်ခိုက်မှုရပ်စဲရေးအတွက် ထုတ်ပြန်မှုပေါင်း အကြိမ် ၂၀ ပြုလုပ်ပေးခဲ့ပြီး ပစ်ခတ်တိုက်ခိုက်မှုရပ်စဲပေးခဲ့ကြောင်း သိရပါတယ်။ နစက အနေဖြင့် ငြိမ်းချမ်းရေးနှင့်ပတ်သက်၍ NCA အတိုင်း အလေးထား အကောင်အထည်ဖော် ဆောင်ရွက်လျက်ရှိတယ်လို ကြေညာချက်မှာဖော်ပြထားပါတယ်။

ymg-mnn
#Yangon_Media_Group

#LocalNews
Published -1 Mar 2022
ရန်ကုန်တိုင်းဒေသကြီးအတွင်း ယနေ့ နံနက်အစောပိုင်းက မြို့နယ်နှစ်ခုတွင်မီးလောင်မှုနှစ်ကြိမ်ဖြစ်ပွားခဲ့တယ်လို့ သိရပါတယ်။

ဖြစ်စဉ်များမှာ မတ်လ ၁ရက်နေ့၊ နံနက် ၅နာရီ ၅၀ မိနစ်အချိန်ခန့်၊ ရန်ကုန်တိုင်းဒေသကြီး၊ ရွှေပြည်သာမြို့နယ်၊ အမှတ်(၆/၁၂)ရပ်ကွက်၊ ရွှေညာမောင်လမ်းတွင် မီးလောင်မှုဖြစ်ပွားကြောင်း သတင်းရရှိသဖြင့် Level 1ယာဉ်အုပ်စု ထွက်ခွာငြိမ်းသက်ခဲ့ရာ နံနက် ၆နာရီကျော်ခန့်တွင်မီးငြိမ်းသွားခဲ့ပါတယ်။

ထိုအပြင် ယနေ့နံနက် ၆နာရီအချိန်ခန့်ကလည်းရန်ကုန်တိုင်းဒေသကြီး၊ လှိုင်သာယာမြို့နယ်၊ ငွေပင်လယ်စက်မှုဇုန်၊ ဆိပ်ကမ်းသာလမ်းတွင် မီးလောင်မှုဖြစ်ပွားကြောင်း သတင်းရရှိသဖြင့် Level 1ယာဉ်အုပ်စု ၊ Level 2 ယာဉ်အုပ်စု ထွက်ခွာငြိမ်းသက်ခဲ့ရာ ၆နာရီ ၄၅မိနစ် အချိန်မှာ မီးငြိမ်းသွားခဲ့ပါတယ်။

ဖေဖော်ဝါရီလ ၂၈ရက်နေ့ကလည်း ရန်ကုန်တိုင်းဒေသကြီးအတွင်း ၈ကြိမ်ထက်မနည်းမီးလောင်မှုဖြစ်ပွားခဲ့ပါတယ်။

ymg/hm
#Yangon_Media_Group

Published 28 February 2022

ရုရှားဟာ ရန်လိုမှုကို စတင်ခဲ့တာမဟုတ်ဘဲ ရန်လိုမှုတွေကို အဆုံးသတ်နေတာသာဖြစ်တယ်လို့ ရုရှားကာကွယ်ရေးဝန်ကြီးဌာနရဲ့ ပြောရေးဆိုခွင့်ရသူ အီဂို ကိုနာရှန်ကိုက ဖေဖော်ဝါရီ(၂၈)ရက် တနင်္လာနေ့က ပြောလိုက်ပါတယ်။

Source AFP