Published 2 March 2022

နစကက ပြစ်ဒဏ်လွတ်ငြိမ်းခွင့်ဖြင့် ပြန်လွှတ်ပေးခဲ့တဲ့ ရုပ်ရှင်သရုပ်ဆောင် ပြေတီဦးနှင့် အိန္ဒြာကျော်ဇင်တို့ ဇနီးမောင်နှံသူတို့နေထိုင်ရာအိမ်ကိုပြန်ရောက်ရှိနေပြီလို့ သူတို့နှင့် စကားပြောဆိုခဲ့တဲ့ ရုပ်ရှင်လောကမှ အနုပညာရှင်တစ်ဦးကYMG  ကို အတည်ပြုပြောဆိုပါတယ်။

နစကက အနုပညာရှင်တွေဖြစ်ကြတဲ့ ပိုင်တံခွန်၊လူမင်း၊ပြေတီဦး၊အိန္ဒြာကျော်ဇင်တို့ကို သူတို့ကျခံစရာရှိတဲ့ ပြစ်ဒဏ်တွေကို လွတ်ငြိမ်းချမ်းသာခွင့်ပြုလိုက်ပြီး Blogger ဝင်းမင်းသန်းကို သူမကျခံဖို့ရှိတဲ့ ပြစ်ဒဏ်တွေထဲက ရာဇသတ်ကြီးပုဒ်မ၅၀၅-က ဖြင့် ကျခံရန်ရှိတဲ့ ပြစ်ဒဏ်တွေကို လွတ်ငြိမ်းခွင့်ပြုခဲ့ကြောင်းနှင့်ဒါရိုက်တာဝိုင်းကိုတော့ သူ့အပေါ်အရေးယူထားတဲ့ ပြစ်မှုကို ပိတ်သိမ်းပေးခဲ့တယ်လို့ နစကရဲ့ သတင်းထုတ်ပြန်ချက်အရသိရပါတယ်။

#LocalNews
Published - 2 Mar 2022

နေအိမ်တွင်း၌ အိပ်နေသူအား ဓါးဖြင့်ထိုးပြီး လုပ်ကြံသတ်ဖြတ်ခဲ့မှု မုံရွာမြို့မှာဖြစ်ပွားခဲ့တယ်လို့ သိရပါတယ်။

"သူက အိမ်ထဲမှာအိပ်နေတာလို့ပြောတယ်။ သူ့အမျိုးသမီးက ကလေးတွေကို စာသွားသင်တဲ့ အချိန်မှာဖြစ်သွားတာ။ သူတို့အိမ်မှာ ဘယ်သူ့မှမရှိဘူး။ သူ့အမျိုးသမီးက နေ့ခင်းပိုင်းလောက်ကသွားတာလို့ပြောတယ်။ သူကတော့ အိပ်နေရင်း အိမ်မှာကျန်ခဲ့တာလို့ပြောတယ်။ ညနေကျ ကျွန်တော်တို့အဖွဲ့ကို လှမ်းဖုန်းဆက်တော့ ကျွန်တော်တို့ သွားတယ်။ ကျွန်တော်တို့ရောက်တော့ ဓါးနဲ့အထိုးခံထားရတာတွေ့တယ်၊ လည်ပင်းကို တစ်ချက်ထဲထိုးထားတာ။ ကျွန်တော်တို့ရောက်တော့ သူကသေဆုံးနေပြီ။

ဘယ်သူလုပ်သွားမှန်းတော့မသိဘူး။ လူမရှိတဲ့အချိန်မှာ ထိုးသွားတာဆိုတော့ ကျွန်တော်တို့အဖွဲ့က သေဆုံးသူကို မုံရွာဆေးရုံကို ကူညီပို့ဆောင်ပေးခဲ့ပါတယ်။"လို့ မြန်မာနိုင်ငံ လူမှုကယ်ဆယ်ရေးအဖွဲ့ (မုံရွာမြို့)၏ ဥက္ကဌဖြစ်သူ ဦးစိန်ကိုကို က ပြောပြခဲ့ပါတယ်။

အဆိုပါ ဖြစ်စဥ်ဟာ ( မတ်လ ၁ ရက်) နေ့က ဖြစ်ပွားခဲ့ခြင်းဖြစ်ပြီး ဓါးထိုးခံရမှုကြောင့် သေဆုံးခဲ့သူဟာ မုံရွာမြို့တောင်ရပ်ကွက်တွင်နေထိုင်သူ အမျိုးသားတစ်ဦးဖြစ်တယ်လို့ သိရပါတယ်။

၄င်းဟာ မကြာသေးမီကာလအတွင်းက စင်ကာပူနိုင်ငံတွင် အလုပ်လုပ်ကိုင်ပြီး ပြန်လာသူတစ်ဦးဖြစ်တယ်လို့လည်း ဒေသခံတွေရဲ့ပြောပြမှုအရ သိရပါတယ်။

ယခုလို မည်သည့်အကြောင်းကြောင့် လုပ်ကြံသတ်ဖြတ်ခဲ့ရသည်ကိုတော့ တိတိကျကျမသိရှိရသေးပါဘူး။

"အချို့ကျတော့လည်း ဒလန်တို့ ဘာတို့ ကြေညာတယ်။ ဒလန်ဖြစ်နေလို့ ဘာလို့ ပေါ့၊ အခုက ဘာမှလည်း မ ကြေညာဘူး၊ မလုပ်ကြဘူး။ အခုလို ဖြစ်သွားတယ်ပေါ့။ သူကလည်း နိုင်ငံခြားက ပြန်လာတာမကြာသေးဘူး။စင်ကာပူဘက်က ပြန်လာတယ်လို့သိရတယ်။"ဟု ဦးစိန်ကိုကို က ဆက်လက်ပြောပြခဲ့ပါတယ်။

ဓါတ်ပုံ - မြန်မာနိုင်ငံ လူမှုကယ်ဆယ်ရေးအဖွဲ့ (မုံရွာမြို့)

ymg/kg
#Yangon_Media_Group

#LocalNews
Published - 2 Mar 2022

ရှမ်းပြည်နယ် ( မြောက်ပိုင်း)၊ ကျောက်မဲမြို့ ၊ နားခေါ်ရွာရှိ ဒက်ပါခမ်းရေတံခွန်အနီးတွင် မြေမြှုပ်မိုင်း ပေါက်ကွဲမှု ကြောင့် ဒေသခံပြည်သူနှစ်ဦး အပြင်းအထန် ဒဏ်ရာရရှိခဲ့တယ်လို့ သိရပါတယ်။

အဆိုပါဖြစ်စဥ်ဟာ ယမန်နေ့( မတ်လ ၁ ရက်) နေ့က ဖြစ်ပွားခဲ့ခြင်းဖြစ်ပါတယ်။

"ရေတံခွန်နားမှာ မိုင်း ၂ ယောက်ထိသွားတယ်။မနေ့က ကျွန်တော်တို့အသင်းက သွားကောက်ရတာပါ။ သူတို့က ငါးရှာသွားကြတယ်လို့ ပြောတယ်။ အဲ့နေရာတွေက ဟိုတလောက တိုက်ပွဲအကြီးအကျယ်ဖြစ်တဲ့နေရာတွေပါ၊ တိုက်ပွဲဖြစ်ခဲ့တဲ့နေရာတွေဆိုတော့ တော်တော်လေး မိုင်းအန္တရာယ်ရှိတာပေါ့။ ဒေသခံတွေအနေနဲ့ တောထဲတောင်ထဲသွားရင် အတော်လေးဂရုစိုက်ရမယ့်အနေအထားပါ။ တိုက်ပွဲတွေဖြစ်ထားတဲ့နေရာက သိတဲ့အတိုင်းပဲလေ၊ တော်တော်လေး ဂရုစိုက်သွားရမှာပေါ့ ။ ပြောရရင် မြေမြှုပ်မိုင်းက အတော်လေးကြောက်နေရတယ်။"လို့ ကျောက်မဲမြို့ ဒေသခံတစ်ဦး က ပြောပြခဲ့ပါတယ်။

အဆိုပါ ဒဏ်ရာရ မိုင်းထိလူနာ(၂)ဦးအား ကျောက်မဲပြည်သူ့ဆေးရုံ(OPT)သို့ ဒေသခံ နမ့်ခုံးရှမ်းများပရဟိတအသင်းမှ ကူညီပို့ဆောင်ပေးခဲ့ရတယ်လို့လည်း သိရပါတယ်။

"တစ်ယောက်ကတော့ ဒဏ်ရာအတော်လေးပြင်းတယ်။ သူ့ခြေထောက်က လုံးဝပြတ်သွားတယ်။ စိုးရိမ်ရတဲ့ အနေအထားပါ။"လို့ ၄င်းက ဆက်လက်ပြောပြခဲ့ပါတယ်။

ရှမ်းပြည်နယ် ( မြောက်ပိုင်း)၊ ကျောက်မဲမြို့အနီးတစ်ဝိုက်တွင် ပြီးခဲ့တဲ့လပိုင်းတွေအတွင်းက တိုင်းရင်းသားလက်နက်ကိုင်အဖွဲ့တွေအကြား ထိတွေ့တိုက်ပွဲများပြင်းထန်စွာဖြစ်ပွားခဲ့တာလည်း ဖြစ်ပါတယ်။

Photo - CJ

ymg/kg
#Yangon_Media_Group

#WorldHealth
Published- 02 March 2022

အမေရိကန်မှာ နှာခေါင်းစည်းတပ်ဆင်ခြင်း၊ ခပ်ခွာခွာနေထိုင်ခြင်းစတဲ့ ကိုရိုနာဗိုင်းရပ်စ်ထိန်းချုပ်ကန့်သတ်ချက်တွေကို သိပ်ပြီးမလိုအပ်တော့ကြောင်း အမေရိကန်ရောဂါထိန်းချုပ်ကာကွယ်ရေးစင်တာ (CDC)က ဖေဖော်ဝါရီ ၂၅ ရက်နေ့က စည်းမျဉ်းတွေပြောင်းလဲသတ်မှတ်ခဲ့ပါတယ်။

အလားတူ ပြည်နယ်အများစုမှာလည်း ရောဂါကာကွယ်ရေးလုပ်ဆောင်မှုတွေ ဖြေလျှော့ဖို့ စီစဉ်လာကြတာဖြစ်ပါတယ်။ဒါပေမဲ့ တိုင်းပြည်မျှော်လင့်ချက်တိုးတက်လာရေးနဲ့ ပုံမှန်အတိုင်းပြန်လည်နေထိုင်နိုင်ဖို့ အလျင်လိုနေမှုက အမေရိကန်ပြည်သူ့ကျန်းမာရေးကျွမ်းကျင်သူတွေ စိုးရိမ်နေရတဲ့ကိစ္စဖြစ်ကာ အိုမီခရွန်ကူးစက်မှုပြီးဆုံးခြင်းကို ကပ်ရောဂါကြီးအဆုံးသတ်ခြင်းမျိုး ယူဆလို့ မရနိုင်ကြောင်း သတိပေးလိုက်ပါတယ်။

"အခြေအနေတွေက တိုးတက်လာနေပေမယ့် လက်လွတ်စပယ်နေထိုင်လို့ တော့ မဖြစ်သေးပါဘူး" လို့ ဂျော့ဂျ်ဝါရှင်တန်တက္ကသိုလ်မှ ဒေါက်တာ'လင်းအာရ်ဂိုးလ်မန်း'က ဆိုပါတယ်။

မျိုးဗီဇကွဲအသစ်တွေ ပေါ်ထွက်နိုင်ဆဲဖြစ်ပြီး နိုင်ငံရဲ့ကျန်းမာရေးစောင့်ရှောက်မှုစနစ်က နောက်ထပ်ကူးစက်မှုတွေအတွက် အဆင်သင့်ရှိမနေဘဲ CDC ရဲ့လမ်းညွှန်ချက်အသစ်တွေက ကပ်ရောဂါအခြေအနေနဲ့ လမ်းလွဲသွားနိုင်ပါတယ်လို့ ဒေါက်တာ'ဂိုးလ်မန်း'က ထောက်ပြထားပါတယ်။

ပြီးခဲ့တဲ့ ၁၄ ရက်အတွင်း အမေရိကန်မှာ နေ့စဉ်ကိုရိုနာဗိုင်းရပ်စ်ကူးစက်မှုနှုန်း ၆၃ ရာခိုင်နှုန်းကျဆင်းခဲ့ကာ ဆေးရုံတက်ကုသခံယူရမှုနဲ့ အသက်သေဆုံးမှုတို့မှာလည်း ကျဆင်းလာခဲ့ကြောင်း နယူးယော့ခ်တိုင်းမ်စ်မှ ဖော်ပြထားပါတယ်။

CDC ရဲ့လမ်းညွှန်ချက်ပြောင်းလဲမှုတွေကြောင့် အမေရိကန်နိုင်ငံသား ၇၀ ရာခိုင်နှုန်းလောက်က နှာခေါင်းစည်းတပ်ဆင်ခြင်းတွေ၊ ခပ်ခွာခွာနေထိုင်ခြင်းတွေ၊ လူစုလူဝေးရှောင်ကြဉ်ခြင်းတွေ မပြုလုပ်တော့ဘဲနေသွားနိုင်တယ်လို့ ယူဆလို့ရပါတယ်။

CDC ရဲ့လမ်းညွှန်ချက်အသစ်တွေက သင့်တော်မှုရှိပေမယ့် ဖြစ်မလာသေးတဲ့ကပ်ရောဂါအခြေအနေတွေကို ထည့်သွင်းတွက်ချက်ထားခြင်းမရှိဘူးလို့ ကျွမ်းကျင်ပညာရှင်အများအပြားက စိုးရိမ်ပူပန်နေကြပါတယ်။

အမေရိကန်ဆေးဘက်ဆိုင်ရာအဖွဲ့ အစည်းမှ ဥက္ကဌဖြစ်သူ ဒေါက်တာ'ဂျရဲအီးဟာမွန်'က လမ်းညွှန်ချက်အသစ်နဲ့ပတ်သက်ပြီး တုန့်ပြန်ပြောကြားရာမှာ သူကတော့ လူများရာနေရာတွေမှာ နှာခေါင်းစည်းတပ်ဆင်သွားဦးမှာဖြစ်ကြောင်း၊ အမေရိကန်နိုင်ငံသားအားလုံးကိုလည်း သူ့လိုမျိုးနေထိုင်ဖို့ တိုက်တွန်းကြောင်း ပြောဆိုသွားပါတယ်။

အမေရိကန်ပြည်နယ်များဖြစ်တဲ့ အီလီနွိက်စ်၊ ကွန်နက်တီကတ်၊ နယူးယော့ခ်တိုအပါအဝင် ပြည်နယ်အများအပြားမှာ နှာခေါင်းစည်းမဖြစ်မနေတပ်ဆင်ခြင်းကို အဆုံးသတ်ဖယ်ရှားဖို့ ပြုလုပ်နေကြပြီဖြစ်ပါတယ်။

ကိုလိုရာဒိုပြည်နယ်မှ အုပ်ရေးမှူး'ဂျဲရတ်ပေါလစ်'က "ဗိုင်းရပ်စ်က ရှိနေဆဲဖြစ်ပြီး တသက်လုံးရှိနေတာလဲ ဖြစ်ချင်ဖြစ်နိုင်ပါတယ်။ ဒါပေမဲ့ ကိုဗစ်ကာကွယ်ဆေးအပြည့်ထိုးထားတဲ့ ကိုလိုရာဒိုကပြည်သူတွေအနေနဲ့ ရောဂါကိုကြောက်စရာမလိုဘဲ လွတ်လွတ်လပ်လပ်နေထိုင်နိုင်တဲ့ အနေအထားဖြစ်သင့်နေပါပြီ" လို့ ပြောကြားသွားပါတယ်။
Source: The Straits Times

#LocalNews
Published - 2 March 2022

ပြေတီဦး၊ အိန္ဒြာကျော်ဇင်၊ လူမင်း၊ ပိုင်တံခွန်၊ ဒါရိုက်တာဝိုင်းနှင့် မဝင်းမင်းသန်း တို့ ၆ ဦးနှင့် မလေးရှားနိုင်ငံသားတစ်ဦးတို့ကို ယနေ့ မတ်လ ၂ ရက်တွင် ပြန်လွှတ်မည်ဖြစ်ကြောင်း ပြန်ကြားရေးဝန်ကြီးဌာန ဒုဝန်ကြီး ဗိုလ်ချုပ်ဇော်မင်းထွန်းကပြောသည်။

"ပုဒ်မ ၅၀၅-က နဲ့ထောင်ဒဏ်သုံးနှစ်စီ ချမှတ်ခံထားရတဲ့ အကယ်ဒမီ ပြေတီဦး၊ အိန္ဒြာကျော်ဇင်၊ သရုပ်ဆောင်လူမင်း၊ ပိုင်တံခွန်၊ မဝင်းမင်းသန်းနဲ့ မကြာသေးခင်က ဖမ်းဆီးခံထားရတဲ့ ဒါရိုက်တာဝိုင်း စုစုပေါင်း ၆ ယောက်ကို လွှတ်မယ်။ခံဝန်နဲ့ပေါ့။နောက်ပြီးတော့ မလေးရှားနိုင်ငံသားတစ်ယောက်လည်း ပါမယ်"ဟု ဗိုလ်ချုပ်ဇော်မင်းထွန်းက YMG ကို ပြောသည်။

ယင်းတို့အား မည်သည့် အထိမ်းအမှတ်အဖြစ် လွတ်ငြိမ်းပေးသည်ကို မသိရသော်လည်း ယနေ့ မတ်လ ၂ ရက် မှာ တောင်သူလယ်သမားနေ့ ဖြစ်ကြောင်း သိရသည်။

ymg/mt
Yangon_Media_Group

#Local_News
Published_2 Mar 2022

ရန်ကုန်တိုင်းဒေသကြီး၊ မင်္ဂလာတောင်ညွန့်မြို့နယ်အတွင်း ဓာတ်အားပို့လွှတ်ပေးထားသော 66kV သာကေတ-သီတာ(၂) ဓာတ်အားလိုင်း၏ Under Ground Cable ဓာတ်ကြိုးအား မသမာသူများက ယမန်နေ့ညပိုင်းတွင် ဖြတ်တောက်ခိုးယူရန် လုပ်ဆောင်ခဲ့ကြောင်း သိရပါတယ်။

66kV သာကေတ-သီတာ(၂)ဓာတ်အားလိုင်းသည် ယမန်နေ့ မတ်လ ၁ ရက်နေ့ ည ၉ နာရီ ခွဲအချိန်ခန့်တွင် မြေအောက်ဓာတ်ကြိုးအပြစ်ဖြစ်ပွားခဲ့ပြီး မင်္ဂလာတောင်ညွန့်မြို့နယ်အတွင်းရှိနေရာများ လျှပ်စစ်ဓာတ်အား ပြတ်တောက်ခဲ့ပါတယ်။

မသမာသူများက ဖြတ်တောက်ခိုးယူရန်လုပ်ဆောင်ခဲ့၍ ပျက်စီးချို့ယွင်းသွားသော မြေအောက်ဓာတ်ကြိုးနေရာအား ရန်ကုန်လျှပ်စစ်ဓာတ်အားပေးရေးကော်ပိုရေးကော်ပိုရေးရှင်း၊ မြေအောက်ဓာတ်ကြိုးဌာနနှင့် မင်္ဂလာတောင်ညွန့်မြို့နယ် လျှပ်စစ်ရုံးဝန်ထမ်းများမှ အချိန်နှင့်တစ်ပြေးညီ ပြုပြင်ဆောင်ရွက်လျက်ရှိကြောင်း ရန်ကုန်လျှပ်စစ်ဓာတ်အားပေးရေးကော်ပိုရေးရှင်းက သတင်းထုတ်ပြန်ထားပါတယ်။

အဆိုပါဖြစ်စဥ်ကြောင့် အရေးကြီးနေရာများ လျှပ်စစ်ဓာတ်အားပြတ်တောက်မှုမရှိစေရန် စီစဉ်ဆောင်ရွက်လျက်ရှိပါကြောင်း အသိပေးကြေညာထားပါတယ်။

ymg_mnn
#Yangon_Media_Group

#Local_News
Published_ 1 Mar 2022

ရန်ကုန်တိုင်းဒေသကြီးအစိုးရအဖွဲ့၊ လျှပ်စစ်နှင့်စက်မှုလက်မှုဝန်ကြီးဌာန၊ လမ်းပန်းဆက်သွယ်ရေးဝန်ကြီးဌာနနှင့် ဆောက်လုပ်ရေးဝန်ကြီးဌာန ဝန်ကြီးဟောင်း ဒေါ်နီလာကျော်ကို အမှု ၁၆ မှု အတွက် အလုပ်နှင့်ထောင်ဒဏ် ၁၆ နှစ် ကျခံစေရန် အမိန့်ချမှတ်လိုက်ကြောင်း သိရပါတယ်။

ဒေါ်နီလာကျော်ကို အဂတိလိုက်စားမှုကျူးလွန်ကြောင်း တိုင်ကြားခြင်းနှင့်စပ်လျဉ်း၍ အဂတိလိုက်စားမှုတိုက်ဖျက်ရေးကော်မရှင်က စုံစမ်းစစ်ဆေးရေးအဖွဲ့ ဖွဲ့စည်းစစ်ဆေးခဲ့ပြီး စစ်ဆေးတွေ့ရှိချက်အရ ရန်ကုန်တိုင်းဒေသကြီးအစိုးရအဖွဲ့ ဝန်ကြီးဟောင်း ဒေါ်နီလာကျော်သည် နိုင်ငံရေးရာထူးလက်ရှိဖြစ်ခဲ့စဉ် Quality Controller Company ရွေးချယ်ရေးအဖွဲ့၌ ဥက္ကဋ္ဌအဖြစ် တာဝန်ထမ်းဆောင်စဉ်ကာလအတွင်း ၎င်း၏ လုပ်ပိုင်ခွင့်ကိုအသုံးချ၍ ၎င်းနှင့် ခင်မင်ရင်းနှီးသည့် ကုမ္ပဏီကို Quality Controller Company အဖြစ် အသိအမှတ်ပြုလွှာ ထုတ်ပေးခြင်းနှင့် အရည်အသွေးစစ်ဆေးရေးလုပ်ငန်းဆောင်ရွက်နိုင်ရန် လုပ်ငန်းချထားပေးခြင်းတို့ကိုဆောင်ရွက်ခဲ့ကြောင်း သတင်းထုတ်ပြန်ချက်မှာ ဖော်ပြထားပါတယ်။

အဆိုပါဆောင်ရွက်မှုများအတွက် ၂၀၁၇ ခုနှစ် မတ်လမှ ၂၀၂၁ ခုနှစ် ဇန်နဝါရီလအထိ လုပ်ငန်းစုစုပေါင်း ၁,၅၇၇ ခုမှ အရည်အသွေးစစ်ဆေးခအဖြစ် ဝင်ငွေ ကျပ်သိန်း ၁၆,၆၀၀ ကျော်ကိုရရှိစေခဲ့ပြီး အဆိုပါကုမ္ပဏီထံမှ ငွေကျပ် ၉၁၈.၂၄ သိန်းကို ၎င်းကိုယ်တိုင် လက်ခံရယူခဲ့ခြင်း၊ ငွေကျပ် ၅၉၅.၃၆ သိန်းကို ၎င်း၏အိမ်အကူမှတစ်ဆင့် လက်ခံရယူခဲ့ခြင်း၊ ငွေကျပ် ၂,၁၃၀ သိန်းကို ၎င်းကိုယ်စား ပုဂ္ဂိုလ်တစ်ဦးထံသို, သွားရောက်အကြွေးဆပ်စေခြင်းဖြင့် စုစုပေါင်းငွေကျပ် ၃၆၄၃.၆၀ သိန်းကို လက်ခံရယူခဲ့ခြင်းတို့ကြောင့် တရာစွဲဆိုခဲ့ကြောင်းသိရပါတယ်။

ဝန်ကြီးဟောင်း ဒေါ်နီလာကျော်အား အဂတိလိုက်စားမှုတိုက်ဖျက်ရေး ဥပဒေပုဒ်မ ၅၅ အရ ရန်ကုန်တိုင်းဒေသကြီးတရားလွှတ်တော်တွင် ၂၀၂၁ ခုနှစ် မေလ ၇ ရက်နေ့၌ တရားစွဲဆိုတင်ပို့ခဲ့ရာ ရာဇဝတ်ကြီးမှု အမှတ် ၈/၂၀၂၁ မှ ၂၃/၂၀၂၁ အထိ အမှု ၁၆ မှုဖြင့် လက်ခံစစ်ဆေးခဲ့ခြင်းဖြစ်ကြောင်း သိရပါတယ်။

၎င်းအမှုများအပေါ် ပြစ်မှုထင်ရှားသဖြင့် ရန်ကုန်တိုင်းဒေသကြီး တရားလွှတ်တော် က ၂၀၂၂ ခုနှစ်၊ ဖေဖော်ဝါရီလ ၂၈ ရက်နေ့တွင် ဝန်ကြီးဟောင်း ဒေါ်နီလာကျော်အား ရာဇဝတ်ကြီးမှုအမှတ် ၈/၂၀၂၁ မှ ၁၀/၂၀၂၁ အထိ ၃ မှုအတွက် တစ်ပေါင်းတည်း အလုပ်နှင့် ထောင်ဒဏ် ၄ နှစ်၊ ရာဇဝတ်ကြီးမှုအမှတ် ၁၁/၂၀၂၁ မှ ၁၃/၂၀၂၁ အထိ ၃ မှုအတွက် တစ်ပေါင်းတည်း အလုပ်နှင့်ထောင်ဒဏ် ၄ နှစ်၊ ရာဇဝတ်ကြီးမှုအမှတ် ၁၄/၂၀၂၁ မှ ၁၉/၂၀၂၁ အထိ ၆ မှုအတွက် တစ်ပေါင်းတည်း အလုပ်နှင့်ထောင်ဒဏ် ၄ နှစ်၊ ရာဇဝတ်ကြီးမှုအမှတ် ၂၀/၂၀၂၁ မှ ၂၃/၂၀၂၁ အထိ ၄ မှုအတွက် တစ်ပေါင်းတည်း အလုပ်နှင့်ထောင်ဒဏ် ၄ နှစ်၊ စုစုပေါင်း အမှု ၁၆ မှု အတွက် အလုပ်နှင့်ထောင်ဒဏ် ၁၆ နှစ် ကျခံစေရန် အမိန့်ချမှတ်ခဲ့ပါတယ်။

ymg-mnn
#Yangon_Media_Group

#WorldHealth
Published - 02 March 2022
ကိုရိုနာဗိုင်းရပ်စ်စမ်းသပ်စစ်ဆေးတဲ့ပစ္စည်းတွေဟာ ဈေးကြီးပြီး အရွယ်အစားနေရာယူလေ့ရှိပါတယ်။အခုစမ်းသပ်နေတဲ့လေဆာစမ်းသပ်ပစ္စည်းဟာဆိုရင် ကုန်ကျစရိတ်မများဘဲ ကျစ်ကျစ်လစ်လစ်ရှိတဲ့အပြင် တံတွေးထဲရှိကိုရိုနာဗိုင်းရပ်စ်တွေကို PCR test တွေကဲ့သို့ အဖြေတိတိကျကျနှင့် rapid antigen test တွေလို မြန်မြန်ဆန်ဆန်ရှာဖွေတွေ့ရှိနိုင်မှာဖြစ်ကြောင်း စပိန်သုတေသီများက ပြောကြားလိုက်ပါတယ်။

ဒီပစ္စည်းမှာပါဝင်တဲ့ flow cytometry နည်းပညာဟာ လေဆာကိုအသုံးပြုပြီး ဖန်ပြွန်လေးထဲမှာ ဆဲလ်တွေနဲ့အမှုန်လေးတွေကို စီတန်းတွက်ချက်ပေးတာဖြစ်ပါတယ်။
စမ်းသပ်ခံသူရဲ့တံတွေးကို အဏုမြူရောင်ခြယ်ပဋိပစ္စည်းတွေပါဝင်တဲ့အရည်နဲ့ ရောစပ်ကာ ကိုရိုနာဗိုင်းရပ်စ်အမှုန်တွေပါလာရင် သွားရောက်ချိတ်တွယ်လိုက်တာဖြစ်ပါတယ်။

မိနစ် ၂၀ ကြာပြီးနောက် ဖန်ပြွန်ထဲအရည်ဖြတ်သန်းတဲ့အခါ လေဆာဖြင့် အဏုမြူရောင်ခြယ်ပစ္စည်းတွေကိုရှာဖွေပြီး ဗိုင်းရပ်စ်ပါလာက တွေ့ရှိနိုင်မှာဖြစ်တယ်လို့ သုတေသီတွေက အင်္ဂါနေ့က Biomedical Optics Express မှာ ရှင်းပြထားပါတယ်။

SARS-CoV-2 ဗိုင်းရပ်စ်ကူးစက်ခံထားရတဲ့လူ ၃၄ ဦးနဲ့ ကူးစက်ခြင်းမခံရတဲ့လူ ၂၀ ဦးတိုရဲ့ တံတွေးနမူနာယူပြီးစမ်းသပ်ခဲ့ကြရာမှာ ဗိုင်းရပ်စ်ရှာဖွေ့တွေ့ရှိမှုက ၉၁.၂ ရာခိုင်နှုန်းတိကျမှုရှိခဲ့ပြီး ဗိုင်းရပ်စ်ပိုးမရှိကြောင်းပြသရာမှာ ၉၀ ရာခိုင်နှုန်းတိကျမှုရှိခဲ့ပါတယ်။

ဒါ့အပြင် ဗိုင်းရပ်စ်ပမာဏအလွန်နည်းပါးတဲ့အနေအထားမျိုးတွေမှာလည်း ဗိုင်းရပ်စ်ကိုတွေ့ရှိနိုင်ပါတယ်။"စမ်းသပ်ချက်ရလာဒ်တွေအရ တံတွေးနမူနာနဲ့အသုံးပြုရတဲ့ ကျွန်တော်တိုပစ္စည်းဟာ လျင်မြန်တယ်၊ သယ်ဆောင်ရလွယ်ကူတယ်၊ အသုံးပြုရလွယ်ကူတယ်၊ တစ်နေ့ကို အကြိမ်ပေါင်း ၂၀၀၀ လောက်ပြုလုပ်လို့ ရနိုင်ပါတယ်" လို့ သုတေသီတွေက ရှင်းပြထားပါတယ်။

"သင့်တော်တဲ့ပဋိပစ္စည်းတွေအသုံးပြုပါက အခြားဗိုင်းရပ်တွေဖြစ်တဲ့ တုပ်ကွေးဗိုင်းရပ်စ်တွေအပြင် လီဂျင်နယ်လာနဲ့ အီးကိုလိုင်တိုလို ပိုးမွှားတွေကိုပါ ရှာဖွေတွေ့ရှိနိုင်ပါတယ်" လို့ ဘာစီလိုနာရှိ အလင်းလှိုင်း သိပ္ပံပညာတက္ကသိုလ်မှ ပူးတွဲစာတမ်းပြုစုသူ 'အယ်ဝယ်လီနာဝါ့ဂျ်စ်'က ဖော်ပြထားပါတယ်။
Source: Reuters

Published 1 March 2022

ယူကရိန်းနိုင်ငံ ကိဗ်မြို့တော်က ကိဗ်မျှော်စင်ကြီးကို ရုရှားတပ်တွေတိုက်ခိုက်တဲ့အတွက် အဲဒီမှာ ပေါက်ကွဲမှုကြီး အနည်းဆုံးနှစ်ခုဖြစ်ပွားခဲ့တယ်လို့သိရပါတယ်။ အဲဒီတိုက်ခိုက်မှုကို  ဆိုရှယ်မီဒီယာမှာတင်တဲ့ ဗွီဒီယိုတွေမှာတွေ့ရပါတယ်။ အဲဒါကြောင့် ရုပ်မြင်သံကြားလိုင်းတော်တော်များများ ထုတ်လွှင့်မှုတွေရပ်ဆိုင်းသွားရပါတယ်။

ယူကရိန်းရဲ့အရေပေါ်ဌာနက အဲဒီပေါက်ကွဲမှုကြောင့် အနည်းဆုံးလူ(၅)ဦး သေဆုံးပြီး (၅)ဦးခန့်ဒဏ်ရာရခဲ့တယ်လို့‌ ပြောပါတယ်။ဒါပေမယ့် အဲဒီအထဲမှာ ရုပ်သံဝန်ထမ်းတစ်ဦးတစ်ယောက်မျှ မပါဝင်ဘူးလို့ ယူကရိန်းယဉ်ကျေးမှုဝန်ကြီးဌာနက ပြောပါတယ်။

အဲဒီကိဗ်မျှော်စင်ကြီးဟာ ရုပ်မြင်သံကြားထုတ်လွှင့်ဖို့လုပ်ထားပြီး အများပြည်သူတွေကိုဖွင့်လှစ်ပြသခြင်းမရှိပါဘူး။ ကိဗ်မျှော်စင်ဟာ ကမ္ဘာပေါ်မှာ သတ္တုနှင့်တည်ဆောက်ထားပြီး သီးခြားရပ်တည်နေတဲ့ မျှော်စင်တွေထဲမှာ  အမြင့်ဆုံးဖြစ်ပါတယ်။ မျှော်စင်ကို သံမဏိပိုက်တွေနှင့် အဓိကထားတည်ဆောက်ထားပါတယ်။ခြေလေးချောင်းထေက် အပေါ်မှာမျှော်စင်တည်ဆောက်ထားတာဖြစ်ပြီး အမြင့်၁၂၆၃ ပေရှိတယ်လို့သိရပါတယ်။

Video ကြည့်ရန်>>

https://t.me/yangonmediagroup/5596

Source: Agencies

Published 01 March 2022

ယူကရိန်းသမ္မတ ဗိုလိုဒီမိုင်ယာဇီလန်စကီးက ဥရောပသမဂ္ဂနှင့် ဥရောပနိင်ငံတွေ  ယူကရိန်းနှင့်အတူရှိကြကြောင်း သက်သေပြကြဖို့ ရုပ်သံဗွီဒီယို တိုက်ရိုက်ထုတ်လွှင့်တောင်းဆိုလိုက်ပါတယ်။

ခင်ဗျားတို့မရှိရင် ယူကရိန်းဟာ အထီးကျန်ဖြစ်တော့မယ်၊အဲဒါကြောင့်ကျွန်တော်တို့နှင့်အတူရှိကြောင်း၊ကျွန်တော်တို့ချည်းပဲ ခင်ဗျားတို့ ပေးမသွားဘူးဆိုတာ သက်သေပြကြပါလို့ ဇီလန်စကီးက တိုက်တွန်းနှိုးဆော်ခဲ့ပါတယ်။

Source AFP

Published 01 March 2022

အီရန်ရဲ့ ခေါင်းဆောင်ကြီး အယာတိုလာ အလီခါမေနီက ယူကရိန်းစစ်ပွဲကို ရပ်တန့်ဖို့ တောင်းဆိုလိုက်ပြီး  ယူကရိန်းဟာ အမေရိကန်ပြည်ထောင်စုမူဝါဒတွေရဲ့ သားကောင်ဖြစ်သွားရရှာတယ်လို့ ဝါရှင်တန်ကို အပြစ်တင်လိုက်ပါတယ်။  အမေရိကန် နှင့် ဥရောပနိုင်ငံတွေကို ထောက်ခံတဲ့နိုင်ငံတွေအားလုံး ယနေ့ယူကရိန်းအခြေအနေနှင့် ပြီးခဲ့တဲ့ အာဖဂန်နစ္စတန် အခြေအနေ တွေကနေ သင်ခန်းစာယူကြဖို့လည်း သူကဝေဖန်တိုက်တွန်းလိုက်ပါတယ်။

Source AFP