Published 3 March 2022

ဖေဖော်ဝါရီ(၂၇)ရက်မှာ အဆုံးသတ်တဲ့ ပြီးခဲ့တဲ့ရက်သတ္တပတ်အတွင်း ကမ္ဘာလုံးဆိုင်ရာ ကိုဗစ်-၁၉ ကူးစက်မှုဟာ ၁၆ရာခိုင်နှုန်း ကျဆင်းသွားပြီး သေဆုံးနှုန်းဟာလည်း ၁၀ရာခိုင်နှုန်းကျဆင်းသွားတယ်လို့ ကမ္ဘာ့ကျန်းမာရေးအဖွဲ့က အပတ်စဉ် အစီရင်ခံစာမှာ ဖော်ပြထားပါတယ်။

ဖေဖော်ဝါရီ(၂၁)ရက်မှ (၂၇)ရက်အထိ တစ်ပတ်တာအတွင်း ကမ္ဘာ့ကျန်းမာရေးအဖွဲ့ရဲ့ ဒေသကြီး(၆)ခုအတွင်း ကူးစက်မှု အသစ် ဆယ်သန်းကျော်နှင့် သေဆုံးမှုအသစ် ခြောက်သောင်းကျော်ရှိခဲ့ပါတယ်

အဲဒီအထဲမှာ ပစိဖိတ်အနောက်ပိုင်းဒေသတစ်ခုတည်းသာ ကူးစက်မှုမြင့်မားခဲ့ပြီး ၃၂ရာခိုင်နှုန်းတက်ခဲ့တာပါ။ မြေထဲပင်လယ် အရှေ့ပိုင်းဒေသမှာတော့ ကူးစက်မှုတွေက ၃၄ရာခိုင်နှုန်းအထိကျဆင်းခဲ့ရာ ဒေသကြီး(၆)ခုမှာ ကူးစက်မှုအကျဆင်းဆုံး ဒေသဖြစ်ပါတယ်။

ပစိတ်ဖိတ်အနောက်ပိုင်းဒေသဟာ သေဆုံးနှုန်းလည်း ၂၂ရာခိုင်နှုန်းအထိတက်ခဲ့ပြီး အရှေ့ပိုင်းမြေထဲပင်လယ်ဒေသကတော့  သေဆုံးနှုန်း(၄)ရာခိုင်နှုန်းတက်ခဲ့ပါတယ်။တစ်ပတ်အတွင်း ထပ်မံသေဆုံမှုအသစ်တွေဟာ အာဖရိက၊အရှေ့တောင်အာရှ၊ဥရောပနှင့် အမေရိကားဒေသတွေမှာ ကျဆင်းလာခဲ့တာဖြစ်ပါတယ်

Source: CMG

#LocalNews
Published - 3 March 2022

ကချင်ပြည်နယ် ဖားကန့်မြို့နယ်အတွင်း နိုင်ငံတော်စီမံအုပ်ချုပ်ရေးကောင်စီအနေနဲ့ ကျောက်တူးခွင့်တွေကို ပိတ်ထားတဲ့ကြားက မြေစာပုံပြိုကျခဲ့တာကြောင့် လူအသေအပျောက်ရှိခဲ့တယ်လို့ ဒေသခံတွေက ပြောပြခဲ့ပါတယ်။

#Yangon_Media_Group

#LocalNews
Published _ 3 March 2022

ယာဉ်မောင်းတွေမှာ ကိုဗစ်ပိုးတွေ့လို့ဆိုတဲ့အကြောင်းပြချက်နဲ့ တရုတ် - မြန်မာ နယ်စပ်ဂိတ်တွေအားလုံး ပြန်ပိတ်သွားပြီလို့ စီးပွားရေးနဲ့ ကူးသန်းရောင်းဝယ်ရေးဝန်ကြီးဌာန အဆင့်မြင့်အရာရှိတစ်ယောက်က YMG ကို ပြောပါတယ်။

#Yangon_Media_Group

#LocalNews
Published- 3 Mar 2022

ပြည်တွင်းက ဆီစားသုံးမှုမှာအခြေခံလူတန်းစားတွေအားထားစားသုံးနေရတဲ့ စားအုန်းဆီစျေးနှုန်းမှာ မတ်လ ၃ ရက်နေ့ စျေးကွက်ပေါက်စျေးတွင် တစ်ပိသာကျပ် ၇,၅၀၀ ထိမြင့်တက်လာတာကြောင့် စားသုံးသူများအခက်တွေ့လာရတယ်လို့သိရပါတယ်။

ဖေဖော်ဝါရီလ ပထမအပတ်မှာ စားအုန်းဆီ တစ်ပိဿာ ၅,၀၀၀ ကျပ် ဈေးရှိခဲ့သော်လည်း တတိယအပတ်မှာတော့ စားအုန်းဆီ တစ်ပိဿာ ၅,၄၅၀ ကျပ်ထိ ဈေးတက်လာခဲ့ကာ ဖေဖော်ဝါရီလကုန်နဲ့ မတ်လဆန်းပိုင်းမှာတော့ ငွေကျပ် ၇,၅၀၀ထိ မြင့်တက်လာတာဖြစ်ပါတယ်။

ယခင်က ပြည်တွင်းစားသုံးသူတွေအနေနဲ့ ပြည်ပကတင်သွင်းရောင်းချတဲ့ ဟင်းသီးဟင်းရွက်ဆီကို စားသုံးခဲ့ကြသော်လည်း ယခုအခါစျေးနှုန်းမြင့်တက်လာမှုကြောင့် စားအုန်းဆီကို ပြန်လည်စားသုံးလာကြတာကြောင့် ဝယ်လိုအားများနေပြီး တဖက်မှာလည်း သယ်ယူပို့ဆောင်စရိတ်ကြောင့် လက်လီလက်ကားစျေးကွက်မှာလည်း မြင့်တက်လာနေတယ်လို့သိရပါတယ်။

"စားအုန်းဆီဈေးကတော့ ဆက်တိုက်တက်တယ်။ စားအုန်းဆီဈေး ဝယ်လိုအားများပြီး ဈေးလည်းတက်နေတယ် အဓိကက သယ်ယူပို့ဆောင်ခ စရိတ်ပေါ့။ ကားခတွေ သယ်ယူပို့ဆောင်ခတွေဈေး‌တက်တော့ အကုန်လိုက်တက်ကုန်တယ်" လို့ အခြေခံစားသောက်ကုန်ရောင်းချသူတစ်ဦးက ပြောပါတယ်။

"အရင်ကတော့ မေဇင်တို့ဘာတို့ဝယ်စားတာပဲ နောက်ပိုင်းတော့ သက်သာတဲ့စာအုန်းဆီကိုပဲ ဝယ်သုံးနေရတာလေ အကုန်လုံးကတော့စျေးတက်နေတာပဲ ကိုယ့်ဝင်ငွေနဲ့သင့်တော်တာလေးတွေ ဝယ်စားနေကြတာပဲ"လို့ အိမ်ရှင်မတစ်ဦးကပြောပါတယ်။

၂၀၂၂ ခုနှစ်ဇန်နဝါရီလလယ်ကစတင်ပြီး အခြေခံစားသောက်ကုန်တွေဖြစ်တဲ့ ဆန် နဲ့ ဆီ ဈေးနှုန်းတွေ မြင့်တက်လာနေသလို အခြေခံလူတန်းစားမိသာစုတွေရဲ့ ဝင်ငွေအလုပ်အကိုင် လျော့နည်းလာတာကြောင့် ပြည်သူတွေရဲ့ စားဝတ်နေရေး အခက်အခဲပြသာနာနဲ့ ရင်ဆိုင်နေရတာ ဖြစ်ပါတယ်။

ymg/hm
#Yangon_Media_Group

#Local_News
Published_ 3 Mar 2022

ရုရှား-ယူကရိန်းအရေးကြောင့် ကမ္ဘာ့ရေနံစိမ်းဈေးဟာ တစ်ပေပါကို အမေရိကန် ဒေါ်လာ ၁၁၀ ကျော် အထိစံချိန်တင်မြင့်တက်လာသလို ပြည်တွင်းစက်သုံးဆီဈေးလည်း ဒီကနေ့မတ်လ ၃ ရက် ရန်ကုန်မြို့မှာ တစ်လီတာကို ၁,၉၀၀ ကျော်အထိ ခုန်တက်သွားပါတယ်။

မနေ့က မတ်လ ၂ ရက် ရန်ကုန်မြို့မှာ အောက်တိန်း ၉၅ တစ်လီတာကို ၁,၈၃၅ ကျပ်ဝန်းကျင်သာရှိနေရာမှ ဒီကနေ့မတ်လ ၃ ရက်မှာ ၁,၉၆၅ ကျပ် ဝန်းကျင်အထိ မြင့်တက်သွားပါတယ်။

ရန်ကုန်မြို့မှာ မနေ့က အောက်တိန်း ၉၂ တစ်လီတာကို ၁,၇၈၀ ကျပ်ဝန်းကျင်ကနေ ဒီကနေ့မှာ ၁,၉၁၀ ကျပ်ဝန်းကျင်၊ ရိုးရိုးဒီဇယ်တစ်လီတာကို မနေ့က ၁,၇၆၅ ကျပ် ဝန်းကျင်ကနေ ဒီကနေ့မှာ ၁,၉၂၅ ကျပ်ဝန်းကျင်နဲ့ ပရီမီယံဒီဇယ်တစ်လီတာကို မနေ့က ၁,၇၇၅ ကျပ်ဝန်းကျင်ကနေ ဒီကနေ့မှာ ၁,၉၃၅ ကျပ်ဝန်းကျင်အထိ အသီးသီးမြင့်တက်သွားပါတယ်။

အခြားသောနယ်မြို့တွေမှာတော့ စက်သုံးဆီဈေးနှုန်းတွေဟာ တစ်လီတာကို ကျပ် ၂,၀၀၀ ကျော်အထိ မြင့်တက်နေတယ်လို့ သိရပါတယ်။

ဒီကနေ့ မတ်လ ၃ ရက်မှာ ကမ္ဘာ့ရေနံစိမ်းတစ်ပေပါကို ဒေါ်လာ ၁၁၀ ကျော်အထိမြင့်တက်နေပြီး ကမ္ဘာ့ဈေးကွက်မှာ စံချိန်တင်အမြင့်ဆုံးရောက်ရှိခဲ့တာလည်း ဖြစ်ပါတယ်။

ရုရှား-ယူကရိန်းအခြေအနေကြောင့် ပြည်တွင်းမှာသာမက အိမ်နီးချင်းနိုင်ငံများနဲ့ အခြားနိုင်ငံတွေမှာလည်း စက်သုံးဆီဈေးအပြင် ကုန်ဈေးနှုန်းတွေလည်း လိုက်ပါမြင့်တက်နေပါတယ်။

ymg_mnn
#Yangon_Media_Group

#LocalNews
Published - 3 March 2022

ဒေါ်အောင်ဆန်းစုကြည်၏ သက်တော်စောင့်ချယ်ရီထက်အတွက် ထွက်ဆိုကြမည့်သက်သေများ ယနေ့ မတ်လ ၃ ရက်တွင်လည်း မလာရောက်ကြသည့်အတွက် စစ်ဆေးမှုမပြုလုပ်ခဲ့ရကြောင်း ယင်း၏ ရှေ့နေက YMG ကို ပြောသည်။

"ချယ်ရီထက်ဘက်က သက်သေထွက်မယ့်သူတွေ ဒီနေ့လည်းမလာကြဘူး။ဒါကြောင့် နောက်တစ်ပတ်ကို ချိန်းဆိုလိုက်ပါတယ်။ဘာကြောင့်မလာကြတယ်ဆိုတာတော့ မသိဘူး" ဟု ရှေ့နေက ဆိုသည်။

လက်ရှိတွင် ရဲစည်းကမ်းထိန်းသိမ်းရေး ဥပဒေဖြင့် ထောင်သုံးနှစ်ချမှတ်ခံထားရသော ချယ်ရီထက်ဘက်က သက်သေထွက်ဆိုရန် လူလေးဦး စာရင်းပေးထားခြင်း ဖြစ်သည်။

ပြီးခဲ့သည့် ဖေဖော်ဝါရီလ ၁၇ ရက်ရုံးချိန်းတွင် ချယ်ရီထက်က မိမိအနေဖြင့် ပြစ်မှုမြောက်စေသည့်ကိစ္စများ မလုပ်ခဲ့ကြောင်း သူ့ကိုစွဲဆိုထားသော ဆူပူစေရန်လှုံ့ဆော်မှု ရာဇသတ်ကြီးဥပဒေပုဒ်မ ၅၀၅-က နှင့် ပတ်သက်၍ တရားခွင်တွင် ပြောဆိုခဲ့သည်။

ချယ်ရီထက်ကို ၂၀၂၂ ခုနှစ် ဇန်နဝါရီလ ၁၃ ရက်က ပုဒ်မ ၅၀၅ (က) အမှုအတွက် အပြစ်ရှိကြောင်း စွဲချက်တင်ခဲ့ခြင်းဖြစ်သည်။

၂၀၂၁ ခုနှစ် ဇွန်လအတွင်း NLD ပါတီ၏ ဘီးလင်းမြို့နယ် လွှတ်တော်အမတ် ဒေါ်သီရိရတနာက တောတွင်းစခန်းချနေပုံ ၊ လက်နက်ကိုင်ဆောင်ထားသည့်မှတ်တမ်းဓာတ်ပုံများ၊ NUG ၏ သတင်းထုတ်ပြန်ချက်များ ၊ပြည်ပသတင်းဌာနများ၏ သတင်းရုပ်သံဖိုင်များ စသည်တို့ကို အပြန်အလှန်ပေးပို့ခဲ့ကြသည်ဆိုကာ ရဲတပ်ဖွဲ့က ချယ်ရီထက်ကို အမှုဖွင့်ခဲ့ခြင်းဖြစ်သည်။

ymg/mt
#Yangon_Media_Group

#LocalNews
Published - 3 Mar 2022

ရှမ်းမြောက်ဒေသတိုက်ပွဲများအပြီးတွင် စစ်ပွဲကာလတုန်းကကျန်ရှိခဲ့သည့် မြေမြှုပ်မိုင်းအန္တရာယ်ကို ဒေသခံများအနေနဲ့ စိုးရိမ်ထိတ်လန့်နေရတယ်လို့ သိရပါတယ်။

အဆိုပါ ရှမ်းပြည်နယ်(မြောက်ပိုင်း)နယ်မြေဒေသအတွင်းမှာ တိုင်းရင်းသားလက်နက်ကိုင်အဖွဲ့အစည်းများဖြစ်တဲ့ RCSS နှင့် SSPP, TNLA တို့အကြား ပြီးခဲ့သည့်နှစ် ဇွန်လဆန်းကစပြီး စစ်ရေးတင်းမာမှုတွေဖြစ်ပေါ်ခဲ့ကြတာပါ။

ဒါ့အပြင် ပြီးခဲ့တဲ့နှစ်ကုန်ပိုင်းအထိ ပြည်နယ်အတွင်းက နေရာဒေသအချို့မှာ ထိတွေ့တိုက်ပွဲတွေလည်း ဖြစ်ပွားခဲ့တာဖြစ်ပြီး ယခုအခါမှာတော့ တိုက်ပွဲတွေက မရှိသလောက် ပြန်လည်လျော့ကျသွားတာဖြစ်တယ်လို့ ဒေသခံတွေက ဆိုပါတယ်။

သို့သော်လည်း တိုက်ပွဲအကြွင်းအကျန်ဖြစ်တဲ့ မြေမြှုပ်မိုင်းအန္တရာယ်ကိုတော့ ဒေသခံများက ယနေ့အထိ ရင်ဆိုင်နေရတာဖြစ်တယ်လို့လည်း ၄င်းတို့ကပြောပါတယ်။

"တလောက တိုက်ပွဲအကြီးအကျယ်ဖြစ်တဲ့နေရာတွေပေါ့ ၊ တိုက်ပွဲဖြစ်ခဲ့တဲ့နေရာတွေဆိုတော့ မိုင်းအန္တရာယ်ရှိတာပေါ့။ ဒေသခံတွေအ နေနဲ့ တောထဲတောင်ထဲသွားရင် အတော်လေးဂရုစိုက်ရမယ့်အနေအထားပါ။ တိုက်ပွဲတွေဖြစ်ထားတဲ့နေရာက သိတဲ့အတိုင်း ပဲလေ၊ ပြောရရင် မြေမြှုပ်မိုင်းက အခု အတော်လေးကြောက်နေရတယ်။"လို့ ကျောက်မဲမြို့ ဒေသခံတစ်ဦးက ပြောပြခဲ့ပါတယ်။

ဒါ့အပြင် ယခုမတ်လဆန်းပိုင်းအတွင်းမှာလည်း ကျောက်မဲမြို့ ၊ နားခေါ်ရွာရှိ ဒက်ပါခမ်းရေတံခွန်အနီးသို့ ဟင်းစားရှာသွားတဲ့ ဒေသခံပြည်သူနှစ်ဦး မြေမြှုပ်မိုင်းထိမိပေါက်ကွဲမှုကြောင့် အပြင်းအထန်ဒဏ်ရာရခဲ့တာလည်းဖြစ်ပါတယ်။

"အခုက တိုက်ပွဲတွေက မဖြစ်တော့ဘူးဆိုပေမယ့် မိုင်းအန္တရာယ်ကတော့ ကြောက်နေရတာပါပဲ။ သူတို့အဖွဲတွေက တောင်ပိုင်းကို ရောက်သွားကြပြီလို့လည်းပြောနေကြတယ်။ ကျောက်မဲမြို့တစ်ဝိုက်မှာတော့ တိုက်ပွဲဖြစ်တာတွေကရှားသွားပါပြီ။ ဒါပေမယ့် စောနက ပြောသလို မိုင်းအန္တရာယ်ကရှိနေတယ်။ ဒေသခံတွေအနေနဲ့က အတော်လေးအခက်တွေ့ပါတယ်။"လို့ ၄င်းက ဆက်လက်ပြောပြခဲ့ပါတယ်။

အဆိုပါရှမ်းမြောက်ဒေသမှာဖြစ်ပွားနေတဲ့ တိုင်းရင်းသားလက်နက်ကိုင်တိုက်ပွဲတွေဟာ လက်ရှိကာလမှာအေးသွားသော်လည်း စစ် ဘေးရှောင်ပြည်သူတွေအနေနဲ့က အခြေအနေအကြောင်းအမျိုးမျိုးကြောင့် ယနေ့အထိ နေရပ်ပြန်နိုင်ခြင်းမျိုးမရှိသေးဘူးလို့ စစ်ဘေး ရှောင်အရေး ကူညီဆောင်ရွက်ပေးနေသူများထံမှ သိရပါတယ်။

Photo - CJ

ymg/kg
#Yangon_Media_Group

#LocalNew
Published- 3 March 2022

မလေးရှားနိုင်ငံ Berjaya Land Bhd's (Bland) ကော်ပိုရေးရှင်းအနေဖြင့် မြန်မာနိုင်ငံရန်ကုန်မြို့တွင် အိမ်ရာနှင့် ရောနှောဖွံ့ဖြိုးရေးစီမံကိန်းသဘောတူညီချက်(Concession Agreement - CA) ကို ရပ်ဆိုင်းလိုက်ပြီဖြစ်ကြောင်း အဆိုပါကော်ပိုရေးရှင်းက ထုတ်ပြန်ချက်ကို ကိုးကား၍ ပြည်ပသတင်းဌာနများတွင် ရေးသားထားကြသည်။

Berjaya Land Berhad (BLand) က ရန်ကုန်တိုင်းဒေသကြီးအတွင်း ၎င်း၏ ၈၀ ရာခိုင်နှုန်းပိုင်ဆိုင်သော လုပ်ငန်းခွဲ BDS Smart City Co., Ltd. အနေဖြင့် ခန့်မှန်းခြေ အမေရိကန်ဒေါ်လာ သန်း ၇၈၀ ကျော် ရင်းနှီးမြှုပ်နှံမည့် အိမ်ရာနှင့် ဘက်စုံသုံးစီမံကိန်းအတွက်သဘောတူညီချက်ကို ရပ်စဲရန် ရန်ကုန်တိုင်းဒေသကြီးအစိုးရအဖွဲ့(YRG)ထံ မတ်လ ၁ ရက်က စာပေးပို့အသိပေးထားခြင်း ဖြစ်ကြောင်း သိရသည်။

၎င်းတို့အနေဖြင့် ရပ်ဆိုင်းနှုတ်ထွက်သော်လည်း အစုရှယ်ယာရှင်များ၏ အစုရှယ်ယာများအပေါ် သက်ရောက်မှုမရှိကြောင်းလည်း developer က ပြောကြားထားကြောင်းသိရသည်။

ဒဂုံဆိပ်ကမ်းမြို့နယ်တွင် အမေရိကန်ဒေါ်လာ ၇၈၀ ကျော်တန်ဖိုးရှိ စီမံကိန်းတည်ဆောက်ရန် တိုင်းဒေသကြီးအစိုးရအဖွဲ့နှင့် BDS Smart City Co., Ltd တို့အကြား Concession Agreement လက်မှတ်ရေးထိုးပွဲအခမ်းအနားကို ၂၀၂၀ ပြည့်နှစ် ဖေဖော်ဝါရီလ ၇ ရက်က ရန်ကုန်တိုင်းဒေသကြီးအစိုးရအဖွဲ့ရုံး၊ မင်္ဂလာခန်းမတွင် ပြုလုပ်ခဲ့ခြင်းဖြစ်သည်။

ယင်းစီမံကိန်းကို ဒဂုံမြို့သစ်(ဆိပ်ကမ်း)မြို့နယ်၊ ရွှေလီလမ်းနှင့် မြနန္ဒာလမ်းထောင့်ရှိ မြေဧရိယာ(၁၈၃)ဧက ခန့်တွင် အကောင်အထည်ဖော်ဆောင်ရွက်သွားရန်၊ BDS Smart City Project ကိုအပိုင်း(၁၂)ခုဖြင့် ခွဲခြားထားပြီး Affordable Housing, High End residential, Shop Lots, Shop House, School, Hospital, Community Centre များနှင့် Mix development project အဖြစ် တည်ဆောက်သွားရန်၊ Project တစ်ခုလုံး၏ Gross Development Value (GDV) မှာ အမေရိကန်ဒေါ်လာ ၇၈၂ ဒသမ ၇၂ သန်းရင်းနှီးမြှုပ်နှံရန် သဘောတူခဲ့ကြခြင်း ဖြစ်သည်။

Project ကာလမှာ ၆ နှစ်မှ ၁၀ နှစ်အထိ ကြာမြင့်မည်ဖြစ်ကာ ရန်ကုန်တိုင်းဒေသကြီးအစိုးရအတွက် Affordable Housing ကို Net Floor Area (NFA) (၂၄၂,၇၉၉ ဒသမ ၅၂) စတုရန်းမီတာနှင့် ညီမျှသော အိမ်ခန်းယူနစ်ပေါင်း (၃,၈၄၈)ယူနစ်၊ ကာလတန်ဖိုး အမေရိကန်ဒေါ်လာ (၁၈၂)သန်းကျော်ကို ဆောက်လုပ်ပေးရန်လည်း သဘောတူခဲ့ကြသည်။

ymg/mt
photo-YRG
#Yangon_Media_Group

#LocalNews
Published - 3 Mar 2022

သီတဂူကမ္ဘာ့ဗုဒ္ဓတက္ကသိုလ်(ရန်ကုန်)၌ စတုတ္ထအကြိမ် ဘွဲ့နှင်းသဘင် အခမ်းအနားကြီးကို(မတ်လ ၂ ရက်) နေ့က အောင်မြင်စွာ ကျင်းပနိုင်ခဲ့တယ်လို့ သိရပါတယ်။

ဘွဲ့နှင်းသဘင်အခမ်းအနားတွင် ဘီအေဘွဲ့ရပုဂ္ဂိုလ်( ၂၂၁)ဦးကို အခမ်းအနားချိန် ၁ နာရီအတွင်း ပြီးစီးအောင်မြင်စွာဖြင့် ဘွဲ့များကို ချီးမြှင့်အပ်နှင်းနိုင်ခဲ့တယ်လို့ ဆိုပါတယ်။

အဆိုပါ ဘွဲ့နှင်းသဘင်အခမ်းအနားကို ခေတ်အခြေအနေအရ အကြပ်အတည်းကာလမှာ အခမ်းအနားကို ကျဉ်းနိုင်သမျှကျဉ်းအောင် တိတ်ဆိတ်ငြိမ်သက်စွာ ကျင်းပခဲ့သော်လည်း ဝေဝေဆာဆာမြိုင်မြိုင်ဆိုင်ဆိုင်ရှိခဲ့ကြောင်းနှင့် ဘွဲ့နှင်းသဘင်အခမ်းအနားမှာ ပါဝင်ကြသည့် သင်္ကန်းအလှူရှင်၊ နဝကမ္မအလှူရှင်၊ ဆွမ်းအလှူရှင်၊ တံဆိပ်တုံးအလှူရှင်များနှင့် ဝေယျာဝစ္စ ပါဝင်ကုသိုလ်ပြုကြသူအားလုံးတို့အား အထူးကျေးဇူးတင်ရှိကြောင်း သီတဂူစတားအဖွဲ့က သတင်းထုတ်ပြန်ခဲ့ပါတယ်။

အခမ်းအနားအပြီးတွင် သင်္ကန်းအလှူနှင့် နေ့ဆွမ်းတို့ကိုလည်း ဆက်ကပ်လှူဒါန်းခဲ့တယ်လို့ သိရပါတယ်။

ဓာတ်ပုံ - သီတဂူစတား။

ymg/kg
#Yangon_Media_Group

#DailyNews
Published - 3 Mar 2022

၁။ ကျောက်တူးခွင့်ပိတ်ထားသည့်ကြားမှ ဖားကန့်မြေစာပုံပြိုကျမှုဖြစ်ပွားဟု ဒေသခံများပြော

၂။ တရုတ်-မြန်မာ နယ်စပ်ဂိတ်များအားလုံး ပြန်ပိတ်သွားပြန်

၃။ မိုးလေဝသ သတင်း

၄။ ဗင်နီဇွဲလားပန်းချီဆရာတစ်ဦး ကမ္ဘာလှည့်သွားလာ၍ ကလေးတွေကိုပန်းချီပညာသင်ကြားပေးလျက်ရှိ.......အစရှိတဲ့သတင်းတွေကိုတင်ဆက်ပေးသွားမှာပဲဖြစ်ပါတယ်။

#Yangon_Media_Group

#LocalNews
Published-3 March 2022

ရခိုင်ပြည်နယ်မှ မလေးရှားနိုင်ငံသို့သွားမည့် မြန်မာစကားမပြောတတ်သည့် အထောက်အထားမဲ့ ၆၅ ဦးကို ကရင်ပြည်နယ်၊ မြဝတီမြို့တွင် မတ်လတစ်ရက်က ဖမ်းဆီးအမှုဖွင့်ခံလိုက်ကြောင်း သိရသည်။

၎င်းတို့ မှာရခိုင်ပြည်နယ် စစ်တွေ ၊ မောင်တော ၊ ဘူးသီးတောင်မြို့နယ်များမှဖြစ်ပြီး မြဝတီမြို့ ရပ်ကွက်(၂) ရှိနေအိမ်တစ်လုံးတွင်တည်းခိုနေစဉ် မြဝတီမြို့မှ ရဲတပ်ဖွဲ့နှင့် လဝကတို့၏ ဖမ်းဆီးခြင်းကိုခံခဲ့ရခြင်းဖြစ်ကြောင်း လူဝင်မှုကြီးကြပ်ရေးနှင့် ပြည်သူ့အင်အားဝန်ကြီးဌာနက သိရသည်။

"သူတို့တွေက ရခိုင်ပြည်နယ် စစ်တွေ ၊ မောင်တော ၊ ဘူးသီးတောင်မြို့နယ်တွေက မွတ်ဆလင်တွေလို့ သိရတယ်။သူတို့ကို မေးကြည့်တဲ့အခါ မလေးရှားက ဆွေမျိုးတွေဆီကိုသွားမယ်လို့ ပြောတယ်။ထိုင်းကနေတစ်ဆင့် သွားကြမှာပေါ့။ရောက်လာတာကိုဒေသခံတွေက သိလို့ ဖမ်းကြတာ။မြန်မာစကားမပြောတတ်ကြဘူး"ဟု လူဝင်မှုကြီးကြပ်ရေးနှင့် ပြည်သူ့အင်အားဝန်ကြီးဌာနက တာဝန်ရှိသူကပြောသည်။

အဆိုပါ ၆၅ ဦးတွင် အမျိုးသမီး ၃၈ ဦး ၊ အမျိုးသား ၂၇ ဦးဖြစ်ကြောင်းနှင့် ယင်းအထဲတွင် ကလေးငယ် ၁ဝ ဦးလည်းပါဝင်ကြောင်း ၊ယခုအခါ လဝက အက်ဥပဒေပုဒ်မ(၆၃)ဖြင့် အမှုဖွင့်ထားပြီး ပြစ်ဒဏ်ချမှတ်ပြီးပါက ရခိုင်သို့ ပြန်ပို့ရန်စီစဉ်သွားမည်ဖြစ်ကြောင်းလည်း သိရသည်။

ymg/mt
#Yangon_Media_Group

#Local_News
Published_ 3 Mar 2022

ကရင်ပြည်နယ်မှ အကြောင်းအမျိုးမျိုးကြောင့် ခွင့်မဲ့ပျက်ကွက်ဖြစ်ခဲ့သော ပညာရေးဝန်ထမ်း ၂၆၅ ဦး လုပ်ငန်းခွင်သို့ ပြန်လည်ဝင်ရောက်ခွင့် ရရှိခဲ့ကြောင်း သိရပါတယ်။

အလုပ်ပြန်လည်ဝင်ခွင့်ရရှိသူများမှာ သင်ကြားရေးဝန်ထမ်း အထက်တန်းပြ ၃၀ ဦး၊ အလယ်တန်းပြ ၇၈ ဦး၊ မူလတန်းပြ ၁၂၈ ဦးနှင့် ရုံးဝန်ထမ်း ၁၃ ဦး စုစုပေါင်း ၂၆၅ ဦး ဖြစ်ကြောင်း သိရပါတယ်။

အကြောင်းအမျိုးမျိုးကြောင့် ခွင့်မဲ့ပျက်ကွက်ခဲ့ကြတဲ့ ပညာရေးဝန်ထမ်းများအား ကရင်ပြည်နယ်အတွင်း လူသားအရင်းမြစ်များ မဆုံးရှုံးစေရေးအတွက် ထုတ်ပယ်ခြင်းခံရသူများထဲမှ အယူခံတင်ပြမှုအပေါ် ရာထူးတိုး ၂ နှစ် ဆိုင်းငံ့တဲ့ ပြစ်ဒဏ်ကိုသာချမှတ်၍ ဆက်လက်တာဝန်ထမ်းဆောင်စေခဲ့တယ်လို့ နစက၊ကရင်ပြည်နယ်ဝန်ကြီးချုပ် ဦးစောမြင့်ဦးက ပြောပါတယ်။

ဝန်ထမ်းများအနေဖြင့် ပါတီနိုင်ငံရေးကင်းရှင်းရမည်ဖြစ်ကာ အစိုးရကပေးအပ်တဲ့တာဝန်ကို ကျေပွန်စွာထမ်းဆောင်ရမယ်လို့ ဝန်ကြီးချုပ်က ဆိုပါတယ်။

အစဉ်လေ့လာသင်ယူနိုင်သော လူ့ဘောင်အဖွဲ့အစည်းကိုဖန်တီးပေးနိုင်တဲ့ ပညာရေးစနစ်တစ်ခုဖြစ်ထွန်းလာစေရန် ကြိုးစားဆောင်ရွက်ပေးကြဖို့ အလုပ်ပြန်လည်ဝင်ရောက်လာကြတဲ့ ပညာရေးဝန်ထမ်းတွေကို သူက တိုက်တွန်းထားပါတယ်။

#ymg_mnn
#Yangon_Media_Group