#LocalNews
Published - 29 March 2022

မြန်မာနိုင်ငံမှ တရုတ်နိုင်ငံသို့ ပြောင်းတင်ပို့လိုသူတွေအနေနဲ့ အခွင့်ပြုထားတဲ့ အသင်းအဖွဲ့တွေကနေတစ်ဆင့် မတ်လ ၃၁ ရက်နေ့ နောက်ဆုံးထားပြီး စိုက်ပျိုးရေး၊ မွေးမြူရေးနှင့် ဆည်းမြောင်းဝန်ကြီးဌာနကို လျှောက်ထားရမယ်လို့ ပြောင်းလုပ်ငန်းရှင်အသင်းမှ သိရပါတယ်။

#Yangon_Media_Group

#LocalNews
Published_30 March 2022

ဒေါ်အောင်ဆန်းစုကြည်ရဲ့ အနားမှာနေသူတချို့မှာ ကိုဗစ်ပိုးတွေ့တာကြောင့် သူပါ ကွာရန်တင်းဝင်နေရတဲ့အတွက် မတ်လ ၂၈ ရက်နေ့က ရုံးချိန်းကို မလာခဲ့နိုင်ပါဘူး။

#Yangon_Media_Group

#LocalNews
Published - 30 March 2022

အိန္ဒိယ-မြန်မာ နယ်စပ်မြို့တစ်မြို့ဖြစ်တဲ့ တမူးမြို့တွင် မိုဘိုင်းအင်တာနက်လိုင်း ပြတ်တောက် နေသည်မှာ တစ်လခန့်ရှိလာပြီး အခုလို အင်တာနက်လိုင်းများ ပြတ်တောက်နေမှုကြောင့် ဒေသခံများအနေနဲ့ အခက်တွေ့နေရတယ်လို့ သိရပါတယ်။

#Yangon_Media_Group

#LocalNews
Published - 30 March 2022

ပဲခူးတိုင်းဒေသကြီးအတွင်းရှိ မြို့နယ် ၃ ခုမှာ ညမထွက်ရအမိန့်ကို မတ်လ ၂၄ ရက်နေ့က စတင်ပြီး ည ၁၂ နာရီ မှ နံနက် ၄ နာရီအထိ အချိန်ပြောင်းလဲပြင်ဆင်ထုတ်ပြန်ထားပါတယ်။

ပဲခူးတိုင်းရှိ ပဲခူးမြို့နယ်၊ တောင်ငူမြို့နယ်နဲ့ ပြည်မြို့နယ်စတဲ့ မြို့နယ် သုံးမြို့နယ်တို့မှာ ယခင်က ထုတ်ပြန်ထားတဲ့ ညမထွက်ရအမိန့်ကို ည ၁၀ နာရီမှ နံနက် ၄ နာရီအထိ အစား ည ၁၂ နာရီမှ နံနက် ၄ နာရီအထိ အချိန်ပြောင်းလဲလိုက်တာ ဖြစ်ပါတယ်။

အခုလက်ရှိမှာ ပဲခူးတိုင်းအတွင်း တည်ငြိမ်အေးချမ်းမှုရှိပြီး တရားဥပဒေစိုးမိုးမှုရှိလာပြီဖြစ်တဲ့အပြင် ကိုဗစ် - ၁၉ ရောဂါ ကူးစက်ပြန့်ပွားမှုကလည်း လျော့လာပြီဖြစ်တဲ့အတွက် အချိန်ပြောင်းလဲသတ်မှတ်လိုက်တာဖြစ်တယ်လို့ သိရပါတယ်။

ymg/ei
#Yangon_Media_Group

#LocalNews
Published_30 March 2022

မန္တလေးမြို့၊ ချမ်းအေးသာစံမြို့နယ်၊၈၄ လမ်း နှင့် လမ်း ၃၀ ထောင့်ရှိ ဇွဲထက်ရွှေဆိုင် ဆိုင်ခွဲ(၁၁)အတွင်း လက်လုပ်မိုင်းပေါက်ကွဲမှုဖြစ်ပွားခဲ့ပြီး ထိခိုက်ဒဏ်ရာရရှိသူများရှိခဲ့ကြသောကြောင့် ဒဏ်ရာရရှိသူများအား အရေးပေါ်ဌာနသို့ ပို့ဆောင်ကုသနေကြောင်း သိရသည်။

"ဗုံးပေါက်တာ ဟုတ်တယ်။ဒဏ်ရာရတာတွေရှိတယ်ဗျ။ပွန်းတာ ပြဲတာမျိုးတွေပေါ့။ကျွန်တော်တို့ ကနေ ဆေးရုံအရေးပေါ်ဌနကို သွားပို့ခဲ့ရတယ်။အရေအတွက်တော့ မသိတော့ဘူး"ဟု လိုက်ပါကူညီပေးခဲ့ရသော မဏီစလ (လူမှုနာရေးကူညီမှုအသင်း) ၏ တာဝန်ရှိသူကပြောသည်။

အဆိုပါ ပေါက်ကွဲမှုမှာ မည်သည့်အဖွဲ့က ပြုလုပ်သည်ကို မသိရသေးကြောင်းနှင့် ပေါက်ကွဲမှု ဖြစ်စဉ်ကြောင့် အနည်းဆုံး အမျိုးသား ၅ ဦး ၊ အမျိုးသမီး တစ်ဦး ဒဏ်ရာ ရရှိခဲ့ကာ ရွှေဆိုင်သို့လာရောက်ခဲ့သော ဟိုက်ဂျက်ယာဉ်တစ်စီးလည်းပျက်စီးသွားကြောင်း ဒေသခံတစ်ဦးကပြောသည်။

ယခုအခါ လုံခြုံရေးတပ်ဖွဲ့ဝင်များက ရွှေဆိုင်ကိုပိတ်ထားကာ စုံစမ်းစစ်ဆေးမှုများပြုလုပ်နေကြောင်း သိရသည်။

ymg/mt
#Yangon_Media_Group

#LocalNews
Published - 30 March 2022

ကော့ကရိတ်မြို့အနီးက ကော့နွဲကွေ့အနီးမှာ(၂၂)ဘီးယာဥ်တစ်စီး တိမ်းမှောက်ခဲ့ပြီး ကားခေါင်းအတွင်းပိတ်မိနေသူတစ်ဦးကို ဒေသခံလူမှုကယ်ဆယ်ရေးအဖွဲ့တွေက ခက်ခက်ခဲခဲ ကယ်ထုတ်ခဲ့ရတယ်လို့ သိရပါတယ်။

"မြဝတီတက်လာတဲ့ ၂၂ ဘီးယာဉ်တစ်စီး ကော့နွဲကွေ့မှာတိမ်းမှောက်ကြောင်း သတင်းရတာနဲ့ ကျွန်တော်တို့ ပုလဲဖြူ လူမှုကယ်ဆယ်ရေးအဖွဲ့က ထွက်ခွာပြီး ခေါင်းထိခိုက်ထားသူတစ်ဦးကို ဆေးရုံသို့ ပို့ဆောင်ပေးခဲ့ပါတယ်။ ကားခေါင်းအတွင်း ဝဲဘက်လက်ညှပ်ပိထားသူတစ်ဦးကိုလည်း ကရိန်းအကူအညီနဲ့ ကယ်ထုတ်နိုင်ခဲ့ပါတယ်။"လို့ ပုလဲဖြူ လူမှုကယ်ဆယ်ရေးအဖွဲ့က သတင်းထုတ်ပြန်ခဲ့တာပါ။

အဆိုပါ ယာဥ်တိမ်းမှောက်မှုဖြစ်စဥ်ဟာ ဒီကနေ့ မတ်လ ၃၀ ရက်၊ နံနက် ၁၁ နာရီ ၄၅ မိနစ် အချိန်က ဖြစ်ပွားခဲ့ခြင်းဖြစ်ပြီး ထိခိုက်ဒဏ်ရာရသူ နှစ်ဦးရှိခဲ့တာဖြစ်ပါတယ်။

ကော့ကရိတ် - မြဝတီ အာရှလမ်းမကြီးရှိ အဆိုပါ ကော့နွဲကွေ့ဟာ ယာဥ်တိမ်းမှောက်မှုတွေ အများဆုံးဖြစ်ပွားရာ ကွေ့တစ်ခုဖြစ်သည့်အတွက် မော်တော်ယာဥ်များ သွားလာရာမှာလည်း အထူးဂရုပြုသွားလာကြဖို့ကိုလည်း ဒေသခံလူမှုကူညီရေးအသင်းတွေက အသိပေးနှိုးဆော်ထားကြပါတယ်။

ဓါတ်ပုံ - ပုလဲဖြူ လူမှုကယ်ဆယ်ရေးအဖွဲ့

ymg/kg
#Yangon_Media_Group

#LocalNews
Published - 30 March 2022

စစ်ကိုင်းတိုင်းအတွင်းက ပရဟိတအသင်းများအနေနဲ့ မြို့တွင်းလမ်းကြောင်းများကိုသာ အများဆုံးကူညီပို့ဆောင်ပေးနေပြီး နယ်ဝေးလမ်းကြောင်းပို့ဆောင်မှုများကိုတော့ အခြေအနေအရပ်ရပ် ကြောင့် လက်ရှိကာလမှာ ခေတ္တရပ်နားထားတယ်လို့ သိရပါတယ်။

အဆိုပါ နယ်ဝေးလမ်းကြောင်းပို့ဆောင်မှုများကို စက်သုံးဆီစျေးနှုန်းကြီးမြင့်လာမှုနှင့် နယ်မြေ ဒေသအခြေအနေများကြောင့် ရပ်နားထားရတာဖြစ်တယ်လို့ စစ်ကိုင်းတိုင်းအတွင်းရှိ ပရဟိတလူမှုကူညီရေးအသင်းများထံမှ သိရပါတယ်။

"အခက်အခဲတွေကြားက လုပ်နေရတာပေါ့။ ပရဟိတလုပ်ရတဲ့ အခြေအနေက မြို့တွင်းလောက်ပဲ
ပို့ဆောင်ပေးနိုင်တယ်။ အဝေးတွေကျ မသွားနိုင်သလိုအဲ့ဒီနယ်ဝေးလမ်းကြောင်းတွေကျ မသွားရဲဘူးလေ။

တစ်ခါတစ် လေ အ ရေး ပေါ်လူနာ တွေ ဘာ တွေရှိလာရင် တော့ အသည်းအသန်ဆိုရင် တော့ လှည့်ပတ်လုပ်ရတာ ပေါ့။ အဆင် ပြေ အောင် တော့လုပ် ပေးရတာ ပေါ့။
ပြောရရင် နယ် မြေ ဒေသ အ ခြေအ နေက လုံခြုံမှုမရှိဘူး ပေါ့။"လို တမူးမြို ဒေသခံ ပရဟိတသမားတစ်ဦးက ပြောပါတယ်။

လက်ရှိကာလမှာလည်း အလှူရှင်ရှားပါးမှုနဲ့ စက်သုံးဆီစျေးနှုန်း ကြီးမြင့်လာမှုတွေကြောင့် ပရဟိတလူမှုကူညီရေးအသင်းတွေအနေနဲ့ ရပ်တည်ရန်ခက်ခဲလာကြပြီး အချို့လူမှုကူညီရေးအသင်းများအနေနဲ့ ကူညီလုပ်ဆောင်ပေးမှုတွေကို ရပ်နားထားရတယ်လို့လည်း သိရပါတယ်။

"နယ်မြေအခြေအနေ ဒေသအခြေအနေကိုပဲကြည့်ပြီး ပို့ဆောင်ပေးနေရတာပေါ့။ကျွန်တော်တို့က တော့ ကူညီပေးနိုင်သလောက် ဆက်လက်ကူညီပေးသွားမှာဖြစ်ပါတယ်။ ဒီကာလမှာ ပရဟိတအသင်းတွေအနေနဲ့ ရပ်တည်ဖို့ခက်ခဲတာအမှန်ပါပဲ ဒါပေမယ့် ပြည်သူတွေက အကူအညီ တောင်းခံလာတော့လည်း ကူညီပို့ပေးရမှာ ကျွန်တော်တို့တာဝန်ပါ။ ဘယ်လမ်းကြောင်းမဆို ပို့နိုင် အောင်ပဲ ကျွန်တော်တို့ အစွမ်းကုန်ကြိုးစားဆောင်ရွက်နေပါတယ်။"လို့ မုံရွာမြို့အခြေစိုက်ပရဟိတသမားတစ်ဦးက ပြောပြခဲ့ပါတယ်။

ymg/kg
#Yangon_Media_Group

#DailyNews
Published -30 Mar 2022

၁။ တမူးမြို့တွင် မိုဘိုင်းအင်တာနက်လိုင်းများ ပြတ်တောက်နေသည်မှာ တစ်လခန့်ရှိလာပြီဖြစ်

၂။ တရုတ်နိုင်ငံကို ပြောင်းတင်ပို့လိုသူများ မတ်လ ၃၁ ရက်နေ့ နောက်ဆုံးထားလျှောက်ထားရန်လို

၃။ မိုးလေဝသ သတင်း

၄။ ဗီယက်နမ်ဖခင်က သားဖြစ်သူအတွက် ဒေါ်လာထောင်ပေါင်းများစွာအကုန်အကျခံပြီး ဗင်ကားကို သစ်သားတင့်ကားပြောင်းလဲဖန်တီးပေး...အစရှိတဲ့သတင်းတွေကို တင်ဆက်ပေးသွားမှာ ဖြစ်ပါတယ်။

#Yangon_Media_Group

#LocalNews
Published_30 March 2022

လက်ရှိဖြစ်ပေါ်နေသောပြဿနာများကို အာဃာ၊အမုန်း၊လူသတ်ပွဲများဖြင့်ဖြေရှင်း၍မရ ၊ စားပွဲပေါ်တွင် လမ်းရှာရင်းဖြေရှင်းသွားကြရန် ကရင်အမျိုးသားအစည်းအရုံး(KNU)ဥက္ကဋ္ဌ ဗိုလ်ချုပ်ကြီး စောမူတူးစေးဖိုး က ပြောကြားလိုက်သည်။

ထိုင်းနိုင်ငံ၊ ချင်းမိုင်မြို့တွင် မတ်လ ၂၉ ရက်မှ ဧပြီလ ၂ ရက်ထိ ကျင်းပနေသော NCA ထိုးထားသည့် တိုင်းရင်းသားလက်နက်ကိုင် ၁၀ ဖွဲ့၏ စတုတ္ထအကြိမ် ဒုတိယပိုင်း ထိပ်သီး ညီလာခံအတွင်း ၎င်းက အထက်ပါအတိုင်း ပြောကြားလိုက်ခြင်းလည်း ဖြစ်သည်။

"ကျွန်တော့်ကိုအထူးဖိတ်ကြားသူအနေနဲ့ ဖိတ်ကြားမှုအပေါ်ကျွန်တော်လာခဲ့တယ်။အခမ်းအနားမှာ မိန့်ခွန်းမဟုတ်ဘဲ စကားပြောခွင့်ပေးတဲ့အတွက် အားလုံးကိုကျေးဇူးတင်ပါတယ်။ အထူးဖိတ်ကြားသူအဖြစ်လာခဲ့တာ ဘယ်သူ့ကိုမှ ကိုယ်စားပြုပြီးလာခဲ့တာမဟုတ်ပါဘူး။ ကျွန်တော့်ကိုယ်ကျွန်တော် ကိုယ်စားပြုပြီးလာခဲ့တာဖြစ်တယ်။ခပ်တိုတိုပဲပြောချင်တယ်။ဒီကနေ့ တိုင်းပြည်မှာဖြစ်နေတဲ့ပဋိပက္ခတွေဟာ အခုလိုပွဲမျိုးနဲ့ ကျွန်တော်တို့ အခုလိုပွဲမျိုးနဲ့ ဆက်ပြီးလှုပ်ရှားသွားဖို့မဖြစ်နိုင်ပါဘူး။ ဒီအတိုင်းပဲသွားကြမယ်ဆိုရင် ကျွန်တော်ပြောရဲတယ်။

ကျွန်တော်တို့ရည်မှန်းထားတဲ့ ငြိမ်းချမ်းရေး လူမျိုးချင်းမတူသော်လည်း ကျွန်တော်တို့ရည်မှန်းထားတဲ့ ငြိမ်းချမ်းစွာအတူတကွယှဉ်တွဲနေထိုင်ရေးက ဖြစ်လာမှာမဟုတ်ပါဘူး။ဒါကြောင့်မို့လို အခုလူမျိုးချင်းမတူသော်လည်း ငြိမ်းချမ်းစွာ အတူနေထိုင်သွားနိုင်ရေးက တစ်ပြည်လုံးမှာကြားနေရတဲ့အသံ ၊ အခုလောလောဆယ်အားလုံးက သိနေကြပါတယ်။တစ်ပြည်လုံးမှာ အားလုံးကအပြန်အလှန်သတ်နေကြတယ်။ Facebook မှာ ပြန်ကြည့်မယ်ဆိုလည်း အားလုံးဟာရှုပ်ထွေးနေတဲ့ အချိန်ကာလဖြစ်တယ်။အဲ့တော့ အခုစကားပြောခွင့်ရတဲ့အတွက် ကျွန်တော့်အနေနဲ့လာပြီး ညွှန်ကြားတာမိန့်ခွန်းပြောတာမျိုးမဟုတ်ဘဲနဲ့ ကျွန်တော့်သဘောထားနဲ့ ခံယူချက် ၊ အခုဖြစ်နေတဲ့ပြဿနာက အပြန်အလှန်သတ်ချင်နေကြတဲ့ လုပ်ရပ်ဖြစ်တယ်။

ကျွန်တော်တို့ရပ်တန်းကမရပ်ဘဲ ဒီအတိုင်းသာသွားနေမယ်ဆိုရင် ကျွန်တော်ပြောရဲပါတယ်။ကျွန်တော်တို့တိုင်းပြည်ငြိမ်းချမ်းရေးက ကျွန်တော် တို့သက်တမ်းမှာ မမှီတော့ပါဘူး။ ကျွန်တော်တို့ ကွဲကွဲပြားပြားနဲ့ပဲ နိဂုံးချုပ်သွားရမှာ အဲဒီတော့ NCA လက်မှတ်ထိုးတုန်းက ကျွန်တော်ပြောခဲ့သလိုပဲ။ ကျွန်တော်တို့ အားမနာတမ်းရဲရဲတောက်သတ်ဖြတ်ခဲ့သလို အခုငြိမ်းချမ်းရေးယူတဲ့နေရာမှာလည်းပဲ ကျွန်တော်တို့ သတ္တိရှိရှိနဲ့ သွားရမှာဖြစ်ပါတယ်။အခုအခြေအနေက ကျွန်တော့်ခံယူချက်အနေနဲ့က ကျွန်တော်တို့တိုင်းပြည်ပြဿနာက ကျွန်တော်တို့စားပွဲပေါ်မှာပဲ သွားရမှာဖြစ်တယ်။အားမနာတမ်း ကျွန်တော်တို့ သတ္တိရှိရှိသတ်ဖြတ်နေကြမယ်ဆိုရင် ကျွန်တော်တို့ပန်းတိုင်ကို ရောက်မှာမဟုတ်ပါဘူး။

ကျွန်တော်တို့ဆန္ဒရှိမယ်ဆိုရင် ကျွန်တော်တို့မျက်နှာချင်းဆိုင်အပြန်အလှန် စားပွဲပေါ်မှာဆွေးနွေးရမှာပဲဖြစ်တယ်။ဆက်လက်ပြီး နိဂုံးချုပ်အနေနဲ့ ဒီပြဿနာကို ကျွန်တော့်ကိုလာမေးတိုင်း အဘိုးကြီးအိုခါးကုန်းကုန်း ကျောင်းနေတုန်းကအတိုင်း ကျွန်တော်ရွတ်ပြတယ်။နောက်ဧပြီလကျရင် ၈၉ နှစ်ပြည့်ပြီ။ကျွန်တော် မသေသေးပါဘူး။ဒါကြောင့်မို့ နောက်နှစ်အခါ ဒီအဘိုးကြီးကြည့်ချင်တဲ့ပွဲဟာ ငြိမ်းချမ်းရေးပွဲဖြစ်ပါတယ်။ အခုလိုပွဲမျိုး မဟုတ်ပါဘူး။အခုလိုပြောနေတာတွေက တစ်ဖက်က ခေါင်းဆောင်တွေကြားမှာပဲလို့ ယုံကြည်ပါတယ်။ဒါကြောင့်မို့ အခုလိုဖြစ်တဲ့ပြဿနာတွေကို စားပွဲပေါ်မှာတွေ့ဆုံဆွေးနွေးပြီး ဖြေရှင်းကြဖို့ပဲဖြစ်ပါတယ်။အာဃာတရားအမုန်းတရားတွေအခြေခံနဲ့ ဖြေရှင်းသွားလို့မရဘူး။ဒီလိုလူသတ်ပွဲတွေနဲ့ ဖြေရှင်းသွားလို့မရဘူး။စားပွဲပေါ်မှာ လမ်းရှာရင်း ဖြေရှင်းသွားကြဖို့ပြောကြားရင်း နိဂုံးချုပ်ပါတယ်"ဟု ဗိုလ်ချုပ်ကြီး စောမူတူးစေးဖိုးက ပြောကြားခဲ့သည်။

အဆိုပါ ညီလာခံသို့ KNU ဥက္ကဋ္ဌ ဗိုလ်ချုပ်ကြီးစောမူတူးစေးဖိုး၊ မွန်ပြည်သစ်ပါတီ(NMSP)ဥက္ကဋ္ဌ နိုင်ဟံသာ၊ ရှမ်းပြည် ပြန်လည်ထူထောင်ရေးကောင်စီ(RCSS)ဥက္ကဋ္ဌ ဗိုလ်ချုပ်ကြီး ယွက်စစ်တို့က သဘာပတိများအဖြစ် တာဝန်ယူခဲ့ကြကြောင်းသိရသည်။

ymg/mt
#Yangon_Media_Group

#LocalNews
Published-30 Mar 2022

ကချင်ပြည်နယ် မိုးညှင်းခရိုင် မိုးညှင်းမြို့၌ မတ်လ(၃၀)ရက် ယနေ့ နံနက်ပိုင်းက နန့်ပုတ်တံတားကျိုးကျ၍ ယာဉ်မောင်းနှင့် ယာဉ်နောက်လိုက်တစ်ဦး သေဆုံးသွားခဲ့ကြောင်း မိုးညှင်းမြို့နယ်ရဲတပ်ဖွဲ့ကနေ သိရပါတယ်။

ဖြစ်စဉ်မှာ ယနေ့နံနက် ၆ နာရီကျော်ခန့်က မိုးညှင်းမြို့မှ ကာဒူကျေးရွာသို့ ဆက်သွယ်ထားသည့် ကားလမ်းမပေါ်တွင် နန့်ပုတ်ကျေးရွာကုန်ထုတ်လမ်းအတိုင်း ယာဉ်မောင်ဦးအောင်မြင့်ထွန်းမောင်းနှင်သော သစ်ခွဲသားများ တင်ဆောင်လာသည့် ယမ်းဖောင်(၆)ဘီးယာဉ်သည် နန့်ပုတ်ကျေးရွာအဝင် ပေါ်တော်မူဘုရားအနီးရှိ နန့်ရင်းချောင်းကူးတံတား အကျယ်(၁၂)ပေနှင့် အရှည်(၁၅၀)ပေရှိသော သစ်သားတံတားပေါ်သို့ ဖြတ်သန်းမောင်းနှင်စဉ် အဆိုပါတံတားကျိုးကျသွားခဲ့ပြီး ၎င်းယာဉ်ပါပြုတ်ကျမှုဖြစ်ပွားခဲ့တာဖြစ်တယ်လို့ သိရပါတယ်။

အဆိုပါဖြစ်ပွားမှုကြောင့် ယာဉ်မောင်းနှင့် ယာဉ်နောက်လိုက် သုံးဦးအနက် မိုးညှင်းမြို့၊ မြို့မရပ်ကွက်၊ သိမ်အင်းရပ်တွင်နေထိုင်သူ ယာဉ်မောင်း ဦးအောင်မြင့်ထွန်းသည် အခင်းဖြစ်ပွားရာနေရာတွင် သေဆုံးသွားခဲ့ပြီး ယာဉ်နောက်လိုက် မောင်အောင်မြင့်မှာ နေအိမ်၌ဆေးကုသမှုခံယူနေစဥ် သေဆုံးသွားခဲ့တယ်လို့ သိရပါတယ်။

ymg/hm
#Yangon_Media_Group

#WorldMilitary
Published - 30 March 2022
ယူကရိန်း-ရုရှားအရေးကိစ္စအကြောင်းညှိနှိုင်းဆွေးနွေးကြရာမှာ ယူကရိန်းမြို့တော်ကိဗ်နဲ့ နောက်ထပ်မြို့ ကြီးတစ်မြို့ မှာ စစ်ရေးတိုက်ခိုက်မှုများကို လျှော့ချသွားဖို့ ရုရှားတို့ ကတိပေးချက်ကို ယူကရိန်းကယုံစားနေမှာမဟုတ်ဘူးလို့ တုန့်ပြန်လိုက်ပါတယ်။

ရုရှားတို့ က ယူကရိန်းနိုင်ငံရဲ့အခြားအစိတ်အပိုင်းနေရာတွေမှာ အင်အားတိုးချဲ့လာနိုင်တယ်လို့ အနောက်နိုင်ငံတွေက ခန့်မှန်းထားကြပါတယ်။

ယူကရိန်းကို ရုရှားတို့ ကျူးကျော်တိုက်ခိုက်ပြီး တစ်လကျော်ကြာတဲ့အချိန်မှာ အစ္စတန်ဘူလ်နန်းတော်၌ တွေ့ဆုံညှိနှိုင်းခဲ့ကြတာဖြစ်ပါတယ်။

ဒုတိယကမ္ဘာစစ်နောက်ပိုင်း ဥရောပနိုင်ငံတစ်နိုင်ငံအပေါ် အကြီးမားဆုံးတိုက်ခိုက်မှုကြီးပြုလုပ်ခဲ့တာဖြစ်ပြီး ဒဏ်ရာရ/သေဆုံးသူ ထောင်ဂဏန်းအထိရှိလာကာ လူပေါင်း ၄ သန်းနီးပါး နေရပ်စွန့်ခွာထွက်ပြေးနေကြရပါတယ်။

အနောက်နိုင်ငံတွေက ရုရှားစီးပွားရေးကိုဒဏ်ခတ်ပိတ်ဆို့မှုတွေပြုလုပ်ပြီး အထိနာအောင်ပြုလုပ်ခဲ့ပါတယ်။ စစ်မြေပြင်တွေမှာ ယူကရိန်းတပ်ဖွဲ့ တွေကြံ့ကြံ့ခံခုခံထားတာကြောင့် ရုရှားတို့ ဆက်လက်မကျူးကျော်နိုင်ဘဲဖြစ်နေပါတယ်။

အဝိုင်းခံထားရတဲ့မြို့တွေထဲမှာ ပိတ်မိနေတဲ့အရပ်သားတွေရှိနေတဲ့ကြားထဲက ယူကရိန်းတပ်ဖွဲ့တွေဟာ အချို့ နယ်မြေတွေကို ပြန်လည်သိမ်းယူနိုင်ခဲ့ပါတယ်။

"သဘောတူညှိနှိုင်းရေးပြုလုပ်ဖို့ လိုအပ်ချက်တွေဖြည့်ဆည်းပြီး အပြန်အလှန်ယုံကြည်မှုရယူဖို့ အတွက် ကိဗ်နဲ့ချာနိုင်ဟစ်ဗ်မြို့ တွေမှာ စစ်ရေးတိုက်ခိုက်မှုတွေလျှော့ချဖို့ အဓိကဆုံးဖြတ်ခဲ့ကြပါတယ်" လို့ ရုရှားဒုကာကွယ်ရေးဝန်ကြီး'အလက်ဇန်ဒါဖိုမင်'က သတင်းထောက်တွေကို ပြောကြားခဲ့ပါတယ်။

အပစ်အခတ်အများဆုံးဖြစ်နေကြတဲ့ အရှေ့တောင်ဘက်ရှိ မာရီယူပိုလ်၊ အရှေ့ဘက်ရှိ ဆူမီနဲ့ ခါကစ်ဗ်၊ တောင်ဘက်ရှိ ခါဆန်နဲ့ မစ်ကိုလေ့ဗ်မြို့ များကိုတော့ ထည့်သွင်းဖော်ပြသွားခြင်းမရှိပါဘူး။

ယူကရိန်းသမ္မတ'ဗိုလိုဒီမီယာဇယ်လန်စကီ'က အင်္ဂါနေ့ကတုန့်ပြန်ပြောကြားရာမှာ "ယူကရိန်းလူမျိုးတွေက တုံးအတဲ့သူတွေမဟုတ်ပါဘူး။ လွန်ခဲ့တဲ့ ၈ နှစ်အတွင်း ဒွန်ဘတ်စ်ဒေသမှာဖြစ်ပွားနေတဲ့တိုက်ပွဲတွေနဲ့ အခု ၃၄ ရက်တာကျူးကျော်ခံရတဲ့ဖြစ်စဉ်တွေကနေ အတွေ့အကြုံရလိုက်ပါပြီ။ လက်တွေ့အခိုင်အမာပြနိုင်တဲ့ရလာဒ်တွေကိုပဲ ယုံကြည်သွားကြမှာပါ" လို့ ဆိုပါတယ်။

ကိဗ်မြို့တော်နားတဝိုက်မှာ ရုရှားတပ်ဖွဲ့ အနည်းငယ်မျှ ရွှေ့ပြောင်းသွားကြပေမယ့် ဒါဟာ တပ်ဆုတ်တာမျိုးမဟုတ်ဘဲ တပ်ဖွဲ့ နေရာပြန်ချခြင်းသဘောဖြစ်ကြောင်း ပန်တဂွန်ကပြောကြားခဲ့ပါတယ်။

ယူကရိန်းရဲ့အခြားနေရာဒေသတွေကို အဓိကတိုက်ခိုက်လာနိုင်တာကြောင့် ကြိုတင်ပြင်ဆင်ထားဖို့ လိုအပ်ကြောင်း၊ ယူကရိန်းကအန္တရာယ်ကြားက မလွတ်မြောက်သေးကြောင်း ပန်တဂွန်မှပြောရေးဆိုခွင့်ရှိသူ'ဂျွန်ကာဘီ'က စာနယ်ဇင်းရှင်းလင်းပွဲမှာပြောကြားခဲ့ပါတယ်။

ဗြိတိန်ကာကွယ်ရေးဝန်ကြီးဌာနက ရရှိလာတဲ့ထောက်လှမ်းရေးအချက်အလက်များကို သုံးသပ်ကာ ရုရှားတို့ က ယူကရိန်းမြောက်ဘက်ကနေ အရှေ့ဘက်ရှိ ဒိုနက်စ်နဲ့လူဟန့်စ်ဒေသတွေကို စစ်အင်အားရွှေ့ပြောင်းလာနိုင်ကြောင်း အသိပေးခဲ့ပါတယ်။

ရုရှားတို့ စစ်ရေးတိုက်ခိုက်မှုလျှော့ချဖို့ ကတိပေးခဲ့တဲ့နယ်မြေအများစုက သူတို့ စစ်ရှုံးနေတဲ့နေရာတွေသာဖြစ်ကြောင်း သုံးသပ်လေ့လာထားကြပါတယ်။ ပိုလန်နိုင်ငံရှိ အမေရိကန်တပ်ဖွဲ့ တွေက ယူကရိန်းတပ်တွေနဲ့ချိတ်ဆက်လျက်ရှိပြီး စစ်လက်နက်များနဲ့ F-18 လေယာဉ် ၁၀ စင်း ပေးအပ်ခဲ့တဲ့အပြင် ရုရှားနိုင်ငံနားရှိ နေတိုး(NATO)အဖွဲ့ ဝင်နိုင်ငံလစ်သူရေးနီးယားကို တပ်အင်အား ၂၀၀ ကျော်နေရာချထားခဲ့ကြောင်း 'ကာဘီ'က ပြောပြသွားပါတယ်။
Source: Reuters

#LocalNews
Published_30 March 2022

ရွှေသံလွင်ကုမ္ပဏီ ဥက္ကဌလည်းဖြစ်၊ Sky Net ရုပ်သံလိုင်း ပိုင်ရှင်လည်းဖြစ်သော ဦးကျော်ဝင်းအား ဖမ်းဆီးထားသည်ဆိုသောသတင်းမှာ မဟုတ်မှန်ကြောင်း ပြန်ကြားရေးဝန်ကြီးဌာန ဒုဝန်ကြီး ဗိုလ်ချုပ်ဇော်မင်းထွန်းက YMG ကို ပြောသည်။

"ဦးကျော်ဝင်းကို ဖမ်းတာမဟုတ်ပါဘူး။အဲဒီသတင်းမဟုတ်ဘူးဗျ"ဟု ယင်းကဆိုသည်။

သို့သော်လည်း မီဒီယာတစ်ခုတွင် ဦးကျော်ဝင်းအား လွန်ခဲ့သော ၄ ရက်ခန့်ကပင် ဖမ်းဆီးသွားကြောင်း ရေးသားထုတ်ပြန်သည့်အတွက် အဆိုပါ သတင်းကို ပြန်လည်ဝေမျှသူများကြောင့် လူမှုကွန်ရက်တွင် ပျံ့နှံသွားခြင်းဖြစ်ကြောင်းလည်း သိရသည်။

ymg/mt
#Yangon_Media_Group