Published 4 march 2022
ရုရှားနှင့်ယူကရိန်းတို့ရဲ့ ဘီလာရုစ်နိုင်ငံမှာပြုလုပ်တဲ့ ဒုတိယအကျော့ ဆွေးနွေးပွဲမှာ အရပ်သားတွေကယ်ထုတ်ဖို့ လူသားချင်းစာနာထောက်ထားမှုဆိုင်ရာ စင်္ကြံတွေ ဖွဲ့စည်းစီစဉ်ဖို့ မတ်လ(၃)ရက် ကြာသပတေးနေ့က သဘောတူညီခဲ့ကြပါတယ်။
အရပ်သားတွေဆွဲထုတ်မယ့်နည်းလမ်းတစ်ခုဖန်တီးရာ မှာ ပူးပေါင်းဆောင်ရွက် နှစ်ဘက်သဘောတူညီခဲ့ကြတာဖြစ်ပါတယ်။
ရုရှားကိုယ်စားလှယ်အဖွဲ့ကို ဦးဆောင်တဲ့ သမ္မတရဲ့လက်ထောက် ဗလက်ဒီမာ မီဒင်စကီးက ကြာသပတေးနေ့ ဆွေးနွေးပွဲမှာ အဓိကအားဖြင့် အရပ်သားတွေကာကွယ်ပေးဖို့ နှင့် လူသာချင်းစာနာထောက်ထားမှုဆိုင်ရာ စင်္ကြံတွေကို ပုံမှန်တိုးတက်မှု ရှိနေအောင်ဖန်တီးဖို့တွေကို ဆွေးနွေးခဲ့ကြတယ်လို့ ပြောပါတယ်။
ဆွေးနွေးပွဲမှာ သဘောတူခဲ့တာတွေကို နှစ်ဘက်ပါလီမန်တွေမှာ အတည်ပြုချက်ရယူဖို့လိုသေးတယ်လို့ ရုရှားနိုင်ငံ ဒူမား နိုင်ငံတကာရေးရာကော်မတီဥက္ကဋ္ဌ လီရွန်နစ်ဆလပ်စကီးက ပြောပါတယ်။ နှစ်ဘက်စလုံးဟာ တတိယအကျော့ ဆွေးနွေးပွဲကို မကြာခင်ထပ်မံကျင်းပဖို့ရှိတယ်လို့လည်း သူကပြောပါတယ်။ သူက ဆွေးနွေးပွဲတွေထပ်လာဦးမယ်လို့လည်း ပြောပါတယ်။
ယူကရိန်းသမ္မတရုံးအကြီးအကဲရဲ့ အကြံပေးဖြစ်သူ မိုင်ခါလိုပိုဒိုလီယတ်ကတော့ ဆွေးနွေးပွဲမှာ ယူကရိန်းဟာ လိုလားတဲ့ ရလာဒ်မရရှိခဲ့ဘူးလို့ ပြောပါတယ်။ယူကရိန်းဘက်က လူသားချင်းစာနာထောက်ထားမှုစင်္ကြံထဲမှာ အပစ်အခတ်ရပ်စဲရေးကိုပါ ထည့်စဉ်းစားကောင်းစဉ်းစားမယ်လို့ သူကပြောပါတယ်။နှစ်ဘက်စလုံးက ဆက်ဆံရေးအထူးလမ်းကြောင်းတစ်ခု ဖွင့်ထားသင့်တယ်လို့လည်းသူကဆိုပါတယ်။
ဒုတိယကျော့ဆွေးနွေးမှုကို ရုရှားက ယူကရိန်းမှာ သူတို့အဆိုအရ အထူးစစ်ဆင်ရေးဆိုတာစတင်ပြီး ရှစ်ရက်အကြာမှာ ပြုလုပ်ခဲ့တာဖြစ်ပါတယ်။
Source CMG
#LocalNews
Published - 4 Mar 2022
မုံရွာမြို့တွင် ဆိုင်ကယ်မတော်တဆမှုဖြစ်စဥ်တွေများပြားနေပြီး တစ်ရက်လျှင် အနည်းဆုံး ၂ မှုမှ ၃ မှုအထိ ရှိနေတယ်လို့ ဒေသခံလူမှုကူညီရေးအသင်းထံမှ သိရပါတယ်။
ယနေ့ မတ်လ ၄ ရက်နေ့တွင် ပြည်ထောင်စုလမ်း၊ကန်သာဈေးအနီးတွင် ဆိုင်ကယ်မတော်တဆမှုဖြစ်စဥ်တစ်ခုဖြစ်ပွားခဲ့ပြီး ဒဏ်ရာရအမျိုးသားလူနာ(၁)ဦးရှိခဲ့သလို ယမန်နေ့(မတ်လ ၃)ရက်နေ့မှာလည်း ပြည်ထောင်စုလမ်း၊ ရေစင်ကြီးမီးပ္ပိုင့်အနီးတွင်ဆိုင်ကယ်မ တော်တဆမှုတစ်ခုဖြစ်ပွားခဲ့ပြီး လူတစ်ဦးထိခိုက်ဒဏ်ရာရရှိခဲ့တယ်လို့ ဆိုပါတယ်။
"မုံရွာမှာ ဆိုင်ကယ်မတော်တဆမှုတွေက ခဏခဏဖြစ်နေတာ အခုနောက်ပိုင်းပိုများလာတယ်။ တစ်ရက်ကို အနည်းဆုံးနှစ်ခု လောက်ဖြစ်နေတယ်။ တစ်ခါတစ်လေ ဖြစ်စဥ်ငါးခု၊ ခြောက်ခုလောက်အထိ ဖြစ်နေတာမျိုးရှိပါတယ်။"လို့ ဒေသခံလူမှုကူညီရေးအသင်းမှ တာဝန်ရှိသူတစ်ဦးက ပြောပြခဲ့ပါတယ်။
ဒါ့အပြင် ဆိုင်ကယ်မတော်တဆမှုဖြစ်စဥ်များကြောင့် ထိခိုက်ဒဏ်ရာရသူများကို နေ့စဥ်ဆေးရုံသို့ ကူညီပို့ဆောင်ပေးနေရတယ်လို့လည်း အဆိုပါလူမှုကူညီရေးအသင်းက ဆိုပါတယ်။
ဒါကြောင့်လည်း ဆိုင်ကယ်စီးနင်းသူများအနေနဲ့ ဂရုတစိုက်စီးနင်းကြဖို့ကိုလည်း ဒေသခံ လူမှုကူညီရေးအသင်းအဖွဲ့တွေက မေတ္တာရပ်ခံ အသိပေးနှိုးဆော်ထားပါတယ်။
Photo - CJ
ymg/kg
#Yangon_Media_Group
#DailyNews
Published - 4 Mar 2022
၁။ လျှပ်စစ်ဓာတ်ကြိုးများကို ဖြတ်တောက်ဖျက်ဆီးခိုးယူသူများအား စောင့်ကြည့်သွားမည်။
၂။ လူမှုကူညီရေး ပရဟိတအသင်းများအနေနဲ့ ရေရှည်ရပ်တည်ဖို့မလွယ်ကူသည့် အခြေအနေနဲ့ကြုံနေရ။
၃။ နေ့စဉ်မိုးလေဝသသတင်း။
၄။ အီရတ်နိုင်ငံမှကျန်ရှိနေသေးသော ဂျူးလူမျိုးဝင်များ၏နောက်ဆုံးအမွေအနှစ်များ ပပျောက်တော့မည့်အန္တရာယ်နှင့်ကြုံတွေ့နေရ.......အစရှိတဲ့သတင်းတွေကိုတင်ဆက်ပေးသွားမှာပဲဖြစ်ပါတယ်။
#Yangon_Media_Group
#LocalNews
Published - 4 Mar 2022
စက်သုံးဆီဖိုး တစ်ရက်လျှင် ၂ သိန်းအထိကုန်ကျနေတာကြောင့် လူမှုရေးအသင်းအချို့က အကူအညီပေးမှုများကို ခေတ္တရပ်နားလိုက်ရတယ်လို့ သိရပါတယ်။
ဒါ့အပြင် ယခုကာလမှာ အကြောင်းအမျိုးမျိုးကြောင့်ရပ်နားလိုက်ရတဲ့ လူမှုရေးအသင်းတွေလည်း ပိုမိုများပြားလာခဲ့တယ်လို့လည်း ဆိုပါတယ်။
ပရဟိတအသင်းတွေအနေနဲ့ လူမှုကူညီရေးလုပ်ငန်းများအား လုပ်ဆောင်ရာတွင် ယခင်က တစ်ရက်လျှင် ဆီဖိုး ၅ သောင်းကျပ်သာ ကုန်ကျရာမှ ယခုအခါတွင် စက်သုံးဆီဈေးနှုန်းတွေက အဆမတန်မြင့်တက်လာတာကြောင့် တစ်ရက်လျှင် ဆီဖိုးက ၂ သိန်းကျပ်အထိ ကုန်ကျမှု တွေရှိလာတာဖြစ်ပါတယ်။
"စက်သုံးဆီဈေးနှုန်းတွေ မြင့်တက်လာတယ်။ အလှူရှင်တွေ ရှားပါးလာတယ်။ ဒါကြောင့် လူမှုကူညီရေး ပရဟိတအသင်းတွေအနေနဲ့ ရေရှည်ရပ်တည်ဖို့က မလွယ်ကူတဲ့ အခြေအ နေနဲ့ ကြုံနေရတာပေါ့။ ဒီပုံအတိုင်းသာဆိုရင် ရှေ့ လျှောက်ရပ်တည်ဖို့က မလွယ်ဘူး။ ဘယ်လိုမှ ရပ်တည်လို့မရနိုင်ဘူး။ အရင်က လမ်းကြောင်းတစ်ကြောင်းကို ၅,၀၀၀ လောက်ပဲကုန်တာ။ အခုက ဆီတစ်သောင်းဖိုးဖြည့်လည်း ဘာမှမရ နှစ်သောင်းဖိုးဖြည့်လည်း ဘာမှမရ အဲ့လိုဖြစ်နေတာ။ ကူညီရေးလမ်းကြောင်းတွေထွက်ဖို့တောင် အခက်အခဲတွေရှိနေတာပါ။"လို့ လူမှုကူညီကယ်ဆယ်ရေးအဖွဲ့တစ်ခုမှ တာဝန်ရှိသူတစ်ဦးက ပြောပြခဲ့ပါတယ်။
ယခင်က လူမှုကူညီရေး ပရဟိတအသင်းပေါင်းများစွာရှိသော်လည်း ယခုအခါတွင် ရပ်တည်ရန်ခက်ခဲလာမှုကြောင့် အချို့အသင်းများအနေနဲ့ အကူအညီပေးမှုများကို ခေတ္တရပ်နားလိုက်ရတာတွေလည်း ရှိနေတာပါ။
အခုလို ရပ်နားသွားသည့် လူမှုကူညီရေးအသင်းတွေ များပြားလာသည့်အတွက် လူမှုကူညီ ကယ်ဆယ်ရေးလုပ်ငန်းများ လုပ်ဆောင်ပေးရာမှာ နှောင့်နှေးကြန့်ကြာမှုအချို့လည်း ရှိနေခဲ့တာပါ။
"တတိယလှိုင်းတုန်းက အများပြည်သူ လှူထားတဲ့ ကားလေးကိုရောင်းပြီး အကူအညီပေးခဲ့ရတယ်။ အခုက ရောင်းစရာကားလည်းမရှိဘူးပေါ့ ။ အလှူငွေကလည်း တစ်ရက်ကို နှစ် သောင်း၊ သုံးသောင်း ဒီလောက်ပဲရတယ်။ ရေရှည်ရပ်တည်ကူညီဖို့က မလွယ်တဲ့အနေ
အထားပါ။"လို့ ၎င်းက ဆက်လက်ပြောပြခဲ့ပါတယ်။
Photo - CJ
ymg/kg
#Yangon_Media_Group
#LocalNews
Published - 4 Mar 2022
ရှမ်းပြည်နယ်(မြောက်ပိုင်း)ရှိ ကျောက်မဲမြို့ပေါ်တွင် ခိုလှုံနေကြရတဲ့ စစ်ဘေးရှောင်ပြည်သူများအနေဖြင့် နေရပ်သို့မပြန်နိုင်ကြသေးဘူးလို့ စစ်ဘေးရှောင်အရေး ကူညီဆောင်ရွက်သူများထံမှ သိရပါတယ်။
အဆိုပါ ရှမ်းပြည်နယ်( မြောက်ပိုင်း)နယ် မြေဒေသအတွင်းမှာ တိုင်းရင်းသားလက်နက်ကိုင်အဖွဲ့အစည်းများဖြစ်တဲ့ RCSS နှင့် SSPP, TNLA တို့အကြား ပြီးခဲ့သည့်နှစ် ဇွန်လဆန်းကစပြီး စစ်ရေးတင်းမာမှုတွေဖြစ်ပေါ် ခဲ့တာပါ။
သို့သော်လည်း ယနေ့ကာလမှာ တိုက်ပွဲဖြစ်ပွားမှု တွေလျော့နည်းလာပေမယ့် အ ကြောင်းအမျိုးမျိုးကြောင့် စစ်ဘေးရှောင်ပြည်သူတွေအနေနဲ့ နေရပ်ပြန်ဖို့ ခက်ခဲနေတာဖြစ်တယ်လို့လည်း ဆိုပါတယ်။
"တိုက်ပွဲတွေကတော့ အေးသွားပြီ။ တော်တော်လေးနည်းသွားပြီလို့ ပြောရင်ရတယ်။ ဒါ ပေမယ့် စစ်ဘေးရှောင်ပြည်သူတွေအနေနဲ့က သူတို့ရွကိုပြန်ဖို့က မဖြစ်နိုင်သေးဘူးလေ။ ဒါကလည်း အကြောင်းအမျိုးမျိုး ရှိတာပေါ့၊ လမ်းခရီးအခြေအနေတွေ မြေမြှုပ်မိုင်းအန္တရာယ် တွေ ရှိတာပေါ့ ။ လက်ရှိတော့ သူတို့ကကျောက်မဲမြို့ ပေါ်မှာပဲ ခိုလှုံနေထိုင်ကြပါတယ်။
တချို့ကျတော့လည်း ဆွေမျိုးသားချင်းအိမ်တွေမှာနေကြတယ်။ စစ်ဘေးရှောင်ခိုလှုံရေးစခန်းတွေလည်း ကျောက်မဲမြို့ပေါ်မှာ ယနေ့အထိရှိပါသေးတယ်။"လို့ ကျောက်မဲမြို့ ဒေသခံတစ်ဦးက ပြောပြခဲ့ပါတယ်။
ပြီးခဲ့တဲ့နှစ်အတွင်းက အဆိုပါ ရှမ်းမြောက်ဒေသမှာ တိုင်းရင်းသားလက်နက်ကိုင်အဖွဲ့များကြား ထိတွေ့တိုက်ပွဲတွေဖြစ်ပွားခဲ့မှုကြောင့် စစ်ဘေးရှောင်ပြည်သူ အရေအတွက်တွေ တိုးလာခဲ့ခြင်းဖြစ်ပါတယ်။
လတ်တလော ကာလမှာတော့ ကျောက်မဲမြို့ အနီးတစ်ဝိုက်မှာ ထိတွေ့တိုက်ပွဲတွေ ဖြစ်ပွားခြင်းတော့မရှိဘူးလို့ ဒေသခံများရဲ့ ပြောပြချက်အရ သိရပါတယ်။
အခုလက်ရှိအချိန်အထိ ကျောက်မဲမြို့ ပေါ်မှာ စစ်ဘေးရှောင်စခန်း(၄)ခုအထိ ဖွင့်လှစ်ပေးထားပြီး စစ်ဘေးရှောင်ပြည်သူလူဦးရေထောင်ချီကို ဒေသခံတွေက ဆက်လက်ကူညီစောင့် ရှောက်ပေးထားရတာလည်းဖြစ်ပါတယ်။
Photo - CJ
ymg/kg
#Yangon_Media_Group
#LocalNews
Published- 4 March 2022
ရခိုင်ပြည်နယ်ဝန်ကြီးချုပ်ဟောင်း ဦးညီပုနှင့် ရခိုင်ပြည်နယ် စည်ပင်ဝန်ကြီးဟောင်း ဦးမင်းအောင်တို့နှစ်ဦးကို ရွေးကောက်ပွဲဆိုင်ရာဥပဒေ ရာဇသတ်ကြီးဥပဒေပုဒ်မ-၁၃၀(က)နှင့် ၁၀၉ တို့ဖြင့် စွဲချက်တင်လိုက်ကြောင်း ရှေ့နေအသိုင်းအဝိုင်းနှင့် နီးစပ်သူများထံမှ သိရသည်။
မတ်လ ၃ ရက်က စစ်တွေအကျဉ်းထောင်ရှိ အထူးတရားရုံးတွင် ရုံးထုတ်စစ်ဆေးခဲ့ခြင်းဖြစ်ပြီး ရွေးကောက်ပွဲဥပဒေကိုကျော်လွန်ပြီး ပြုလုပ်ခဲ့သည်ဟုဆိုကာ ရာဇသတ်ကြီးဥပဒေပုဒ်မ-၁၃၀(က)နှင့် ရာဇသတ်ကြီးဥပဒေပုဒ်မ- ၁၀၉ အမှုကို လျှောက်လဲချက်ပေး၍ စွဲချက်တင်ခဲ့ခြင်း ဖြစ်ကြောင်း သိရသည်။
ရခိုင် ပြည်နယ်ရွေးကောက်ပွဲကော်မရှင်အဖွဲ ဒုတိယဥက္ကဋ္ဌ ဦးသူရိန်ထွဋ်က တရားလိုပြုလုပ်၍ ဦးညီပုနှင့် ဦးမင်းအောင်တို့ကို ရာဇသတ်ကြီးဥပဒေပုဒ်မ- ၁၃၀(က)ဖြင့် ဦးစွာတရားစွဲဆိုပြီးနောက် ရွေးကောက်ပွဲဆိုင်ရာဥပဒေဖောက်ဖျက်မှုကိစ္စရပ်များကို အားပေးကူညီသည်ဟုဆိုကာ ရာဇသတ်ကြီးဥပဒေပုဒ်မ- ၁၀၉ ဖြင့် ထပ်တိုးတရားစွဲဆိုခဲ့ခြင်းလည်းဖြစ်သည်။
“မနေ့က စွဲချက်လျှောက်လဲချက်ပေးပြီး စွဲချက်တင်ပါတယ်။ အမှုကို ၁၀ ရက်နေ့ ထပ်ပြီးရုံးချိန်းလိုက်ပါတယ်။ အဲဒီနေ့မှာတော့ တရားလိုရယ် ၊ လိုပြသက်သေတွေရယ်ကို ပြန်ပြီးတော့စစ်ဆေးသွားမှာပါ”ဟု ရှေ့နေအသိုင်းအဝိုင်းနှင့် နီးစပ်သူက ပြောသည်။
ဝန်ကြီးချုပ်ဟောင်း ဦးညီပုသည် နိုင်ငံတော်အကြည်အညိုပျက်စေမှုပုဒ်- ၅၀၅(ခ)ဖြင့် ထောင်ဒဏ် ၂ နှစ်ချမှတ်ခံထားရပြီးလည်း ဖြစ်သည်။
၂၀၂၂ ခုနှစ် ဇန်နဝါရီလ ၁၉ ရက်က ရခိုင်ပြည်နယ်တရားရုံးမှ ရခိုင်ပြည်နယ်ဝန်ကြီးချုပ်ဟောင်း ဦးညီပုအပါအဝင် ဝန်ကြီးဟောင်း ၅ ဦးကို အဂတိလိုက်စားမှုတိုက်ဖျက်ရေးဥပဒေပုဒ်မ-(၅၅)ဖြင့် ထောင်ဒဏ်အသီးသီးချမှတ်ခဲ့ရာတွင် ဝန်ကြီးချုပ်ဟောင်း ဦညီပု၊ ဘဏ္ဍာ၊ အခွန်၊ စီမံကိန်းနှင့် စီးပွားရေးဝန်ကြီးဟောင်း ဦးကျော်အေးသိန်းနှင့် လျှပ်စစ်၊စက်မှုနှင့် လမ်းပန်းဆက်သွယ်ရေးဝန်ကြီးဟောင်း ဦးအောင်ကျော်ဇံတို့ကို အလုပ်နှင့်ထောင်ဒဏ် ၉ နှစ်စီ ချမှတ်ခဲ့သည်။
ယင်းအပြင် စည်ပင်သာယာရေးဝန်ကြီးဟောင်း ဦးမင်းအောင်ကိုမူ ထောင်ဒဏ် ၇ နှစ်အဖြစ်လည်းကောင်း ၊ စိုက်ပျိုးရေး၊မွေးမြူရေး၊သစ်တောနှင့် သတ္တုတွင်းဝန်ကြီးဟောင်း ဦးကျော်လွင်ကို ထောင်ဒဏ် ၃ နှစ်စီ ဖြင့်လည်းကောင်း ချမှတ်ခဲ့ခြင်းဖြစ်ကြောင်း သိရသည်။
ယခုအခါ ၎င်းတို့အားလုံးမှာ စစ်တွေအကျဉ်းထောင်တွင် အကျဉ်းကျလျက်ရှိသည်။
ymg/mt
#Yangon_Media_Group
#WorldHealth
Published - 04 March 2022
ကိုဗစ်ရောဂါကူးစက်ပြီးနောက် နောက်ဆက်တွဲလက္ခဏာများခံစားနေရတဲ့ လူနာ ၁၇ ဦးကိုလေ့လာကြရာမှာ လူနာ ၆၀ ရာခိုင်နှုန်းနီးပါးလောက်က အာရုံကြောထိခိုက်ထားတာတွေ့ရကြောင်း၊ ထိုကြောင့် ကုသမှုအသစ်တွေ ခံယူရဖို့ရှိနေကြောင်း အမေရိကန်မှသုတေသီများက မတ်လ ၁ ရက်နေ့မှာ ပြောကြားလိုက်ပါတယ်။
ကိုဗစ်နောက်ဆက်တွဲလက္ခဏာတွေဟာ ရောဂါကူးစက်ခံရပြီး သုံးလအတွင်းပေါ်လာတတ်ပြီး အနည်းဆုံး ၂ လလောက်အထိ ခံစားရနိုင်ပါတယ်။
"ကျွန်မတို့အထင်ကတော့ ကိုဗစ်နောက်ဆက်တွဲလက္ခဏာတွေ ခံစားရတဲ့လူတွေမှာ အသက်ရှူခြင်းလုပ်ငန်း၊ သွေးကြောစီးဆင်းမှု၊ အစာခြေလုပ်ငန်းတို့ကို ထိန်းချုပ်ထားတဲ့အာရုံကြောတွေ ပျက်စီးသွားတာဖြစ်ပါလိမ့်မယ်" လို့ မာဆာချူဆက်စ်အထွေထွေဆေးရုံမှ ဦးနှောက်နှင့်အာရုံကြောအထူးကု ဒေါက်တာ'အန်းလူးဝစ္စအုတ်လန်ဒါ'က ဖော်ပြထားပါတယ်။
ကိုဗစ်ရောဂါဖြစ်ဖူးတဲ့သူ ၃၀ ရာခိုင်နှုန်းလောက်က နောက်ဆက်တွဲဝေဒနာတွေခံစားရနိုင်တယ်လို့ ယူဆရပါတယ်။ကြုံတွေ့ရနိုင်တဲ့လက္ခဏာတွေကတော့ နုံးချည့်ခြင်း၊ နှလုံးခုန်မြန်ခြင်း၊ အသက်ရှူခက်ခဲခြင်း၊ မှတ်ဉာဏ်ဆိုင်ရာအခက်အခဲရှိခြင်း၊ နာတာရှည်နာကျင်ကိုက်ခဲခြင်း၊ အာရုံခံသိရှိမှု မူမမှန်ခြင်း၊ ကြွက်သားအားနည်းခြင်းတို့ ဖြစ်တတ်ပါတယ်။
ဒီလက္ခဏာတွေနဲ့ပတ်သက်ပြီး အသေးစိတ်စမ်းသပ်မှုတွေ ပြုလုပ်နေပါတယ်လို့ ဒေါက်တာ'အုတ်လန်ဒါ'က ဆိုပါတယ်။ခံစားရတဲ့သူအများစုမှာ အာရုံခံသိရှိမှုပေးနိုင်ပြီး ခန္ဓာကိုယ်ကမထိန်းချုပ်နိုင်တဲ့လှုပ်ရှားမှုတွေပြုလုပ်တဲ့ အာရုံကြောအသေးလေးတွေ ထိခိုက်သွားတာကိုတွေ့ရှိရပါတယ်။
ဒီတွေ့ရှိချက်တွေဟာ ပြီးခဲ့တဲ့ဇူလိုင်လအတွင်း ကာတာ ဝေးလ်ကော်နယ်ဆေးဘက်ဆိုင်ရာမှ ဒေါက်တာ'ရေးယက်ဇ်မာလစ်'တွေ့ရှိခဲ့တဲ့ မျက်ကြည်လွှာအတွင်း အာရုံကြောထိခိုက်မှုနဲ့ နောက်ဆက်တွဲလက္ခဏာခံစားရမှုတိုကြားဆက်စပ်နေမှုနဲ့ ကိုက်ညီနေတာတွေ့ရပါတယ်။
လူနာ ၁၇ ဦးထဲမှ ၁၁ ဦးကို အာရုံကြောထိခိုက်သူတွေမှာကုသပေးတဲ့ နည်းတွေနဲ့ကုသပေးခဲ့ပါတယ်။
အချို့လူနာတွေမှာ တိုးတက်မှုရှိပေမယ့် သက်သာပျောက်ကင်းတဲ့သူတော့ မရှိပါဘူး။
ဒီလိုအာရုံကြောထိခိုက်ထားတဲ့ ကိုဗစ်နောက်ဆက်တွဲဝေဒနာခံစားရသူတွေမှာ ကိုယ်ခံအားကုသမြှင့်တင်ခြင်းဖြင့် သက်သာစေနိုင်မှာဖြစ်ကြောင်း အာရုံကြောဆိုင်ရာခုခံအားကျွမ်းကျင်ပညာရှင် ဒေါက်တာ'အာဗင်ဒရာနက်သ်'က ပြောကြားလိုက်ပါတယ်။
ဒီလိုလူနာများကို သင့်တော်တဲ့လေ့လာမှုတွေပြုလုပ်နိုင်ဖို့နဲ့ ဆေးဝါးများဖြင့်ကျပန်းစမ်းသပ်မှုပြုလုပ်ဖို့လိုအပ်ကြောင်း ဒေါက်တာ'နက်သ်'က အကြံပြုလိုက်ပါတယ်။
Source: The Straits Times
#Local_Health
Published_ 4 Mar 2022
မြန်မာနိုင်ငံ ပုဂ္ဂလိကကျန်းမာရေးလုပ်ငန်းဆိုင်ရာ ဗဟိုအဖွဲ့အနေဖြင့် ဥပဒေပါ ပြဋ္ဌာန်းချက်များနှင့်အညီစိစစ်ပြီး ကိုက်ညီမှုရှိသော ပုဂ္ဂလိကကျန်းမာရေးလုပ်ငန်းများကို လိုင်စင်ထုတ်ပေးလျက်ရှိရာ ပုဂ္ဂလိကဆေးရုံ ၂၅၉ ရုံအား လုပ်ငန်းလိုင်စင်များခွင့်ပြုထား ပြီးဖြစ်ကြောင်း သိရပါတယ်။
ကျန်းမာရေးဝန်ကြီးဌာန၊ ပြည်ထောင်စုဝန်ကြီး ပါမောက္ခဒေါက်တာသက်ခိုင်ဝင်းက မြန်မာနိုင်ငံပုဂ္ဂလိက ဆေးရုံများအသင်း ဒသမအကြိမ်နှစ်ပတ်လည် အထွေထွေမျက်နှာစုံညီအစည်းအဝေးမှာ ပြောကြားခဲ့တာဖြစ်ပါတယ်။
ထို့ပြင် ကိုဗစ်-၁၉ ရောဂါ ပထမလှိုင်း၊ ဒုတိယလှိုင်း၊ တတိယလှိုင်းနှင့် စတုတ္ထလှိုင်း တို့တွင် ပုဂ္ဂလိကကဏ္ဍမှ ကျန်းမာရေးဝန်ကြီးဌာနနှင့် လက်တွဲပြီး လိုအပ်သည့် ဆေးဘက်ဆိုင်ရာ စက်ပစ္စည်းကိရိယာများ၊ လူအင်အားများကို ကူညီပံ့ပိုးပေးခဲ့သည့်အတွက်လည်း မှတ်တမ်းတင် ဂုဏ်ပြုခဲ့ပါတယ်။
ကိုဗစ်-၁၉ ရောဂါ ရှာဖွေရေးလုပ်ငန်း၊ ကာကွယ်ကုသရေးလုပ်ငန်းများတွင် အထောက်အကူဖြစ်စေရန်အတွက် ပုဂ္ဂလိကဆေးရုံနှင့် ရောဂါရှာဖွေရေးဓာတ်ခွဲခန်းများတွင် ကိုဗစ်-၁၉ Test & Care ၊ ကိုဗစ်-၁၉ ကာကွယ် ဆေးထိုးလုပ်ငန်းများကိုလည်း ကျန်းမာရေးဝန်ကြီးဌာနမှ ထုတ်ပြန်ထားသော လုပ်ငန်းလမ်းညွှန်များနှင့်အညီ စိစစ်ခွင့်ပြုလျက်ရှိနေတယ်လို့ ဝန်ကြီးကဆိုပါတယ်။
ကိုဗစ်-၁၉ Test & Care အတွက် ပုဂ္ဂလိကဆေးရုံနှင့် ရောဂါရှာဖွေရေး ဓာတ်ခွဲခန်းများ ၃၉ ခုရှိပြီး ကိုဗစ်-၁၉ ကာကွယ်ဆေးထိုးလုပ်ငန်းများဆောင်ရွက်ရန် ပုဂ္ဂလိက ဆေးရုံ/ဆေးခန်း ၃၆ ခုကို ခွင့်ပြုထားပြီးဖြစ်ကြောင်း သိရပါတယ်။
ymg_mnn
#Yangon_Media_Group
#WorldPolitics
Published - 04 March 2022
ရုရှားနဲ့စစ်ရေးပဋိပက္ခဖြစ်ပွားနေတဲ့ကာလမှာ နိုင်ငံတော်လုံခြုံရေးကိစ္စတွေကို ပိုပြီးစိုးရိမ်ပူပန်နေရတဲ့အတွက် ဥရောပသမဂ္ဂ(EU)အဖွဲ့ဝင်ဖြစ်မြောက်ရေးက အခုအချိန်မှာ ယူကရိန်းအတွက်အဓိကမဟုတ်ကြောင်း ယူကရိန်းသမ္မတ'ဗိုလိုဒီမီယာဇဲလန်စကီ'က ကြာသပတေးနေ့က ဝန်ခံလိုက်ပါတယ်။
"အခုအချိန်မှာ ယူကရိန်းအနေနဲ့ ဥရောပသမဂ္ဂအဖွဲ့ဝင်ဖြစ်ရေးက အဓိကမကျဘူးလို့ ကျွန်တော်ထင်ပါတယ်။ အရေးကြီးဆုံးက နိုင်ငံတော်လုံခြုံရေးနဲ့စစ်ပွဲအခြေအနေတွေပါပဲ။ ဒါပေမဲ့ ယူကရိန်းအပေါ် သူတို့ရဲ့သဘောထားပြသမှုကလည်း အရေးပါတဲ့ထောက်ပံ့မှုဖြစ်ပါတယ်" လို့ 'ဇဲလန်စကီ'က ပြောကြားသွားတာဖြစ်ပါတယ်။
ယူကရိန်းကို တရားဝင်ဥရောပသမဂ္ဂအဖွဲ့ဝင်အဖြစ် အသိအမှတ်ပြုဖို့ တောင်းဆိုချက်တင်သွင်းပြီး ရက်ပိုင်းအကြာမှာ 'ဇဲလန်စကီ'က အခုလိုပြောကြားလာတာဖြစ်ပါတယ်။
ယူကရိန်းကို အဖွဲ့ဝင်အဖြစ်အမြန်ဆုံးလက်ခံသွားဖို့ 'ဇဲလန်စကီ'က တနင်္လာနေ့က တောင်းဆိုလိုက်ပြီး နောက်တစ်နေ့ဥရောပပါလီမန်၌ မိန့်ခွန်းပြောကြားရာမှာလည်း အဖွဲ့ဝင်ဖြစ်မြောက်ရေးကို အားဖြည့်ကူညီပေးဖို့ တိုက်တွန်းခဲ့ပါတယ်။
"သင်တို့က ကျွနိုပ်တို့နဲ့အတူရှိနေပြီး လက်လွှတ်မခံနိုင်ဘူးဆိုတာကို သက်သေပြပေးပါ။ တကယ့်ဥရောပသားတွေဖြစ်တယ်ဆိုတာကို သက်သေပြပေးပါ။ ဘဝရှင်သန်ခြင်းက သေဆုံးခြင်းတရားကို အနိုင်ယူပြီး အမှန်တရားက အကြောက်တရားကို အနိုင်ယူနိုင်တယ်ဆိုတာ သက်သေပြပေးပါ" လို့ 'ဇဲလန်စကီ'ကပြောကြားခဲ့ရာ အားလုံးက မတ်တပ်ရပ်ပြီးလက်ခုပ်ဩဘာပေးခဲ့ကြပါတယ်။
ဒါပေမဲ့လည်း ဥရောပသမဂ္ဂထိပ်သီးအရာရှိတွေက ယူကရိန်းအားအဖွဲ့ဝင်အဖြစ်သတ်မှတ်ဖို့ကိစ္စမှာ နှောင့်နှေးနေကြကြောင်း၊ အဖွဲ့ဝင်ဖြစ်လာဖို့အရေးက ချက်ချင်းအထမမြောက်နိုင်သလို နှစ်တွေအများကြီးကြာသွားနိုင်ကြောင်း သတိပေးလိုက်ပါတယ်။
လက်ရှိဥရောပသမဂ္ဂအဖွဲ့ထဲကို အဖွဲ့ဝင်အသစ်တွေဝင်ရောက်လာဖို့က ဖြတ်လမ်းနည်းမရှိပါဘူး။အဖွဲ့ဝင်ဖြစ်လာရန် ဝင်ရောက်ဖို့လျှောက်ထားတဲ့နိုင်ငံတွေအနေနဲ့ နိုင်ငံရေးနဲ့စီးပွားရေးအခြေအနေတွေမှာ သတ်မှတ်ချက်တွေပြည့်မီဖို့လိုပါတယ်။
ယူကရိန်းနိုင်ငံရှိ အနောက်နိုင်ငံအဖွဲ့လိုလားသူနိုင်ငံရေးသမားတွေကြားမှာ ယူကရိန်းအနေနဲ့ ဥရောပသမဂ္ဂအဖွဲ့ဝင်ဖြစ်မြောက်ရေးအကြောင်းကို နှစ်ပေါင်းများစွာတိုင်အောင် ဆွေးနွေးပြောကြားခဲ့ကြပါတယ်။
သို့ပေမယ့်လက်တွေ့မှာတော့ အောင်မြင်မှုမရသေးပါဘူး။ဥရောပသမဂ္ဂအဖွဲ့ဝင်ဖြစ်မြောက်ရေးဟာ ၂၀၁၄ တော်လှန်ရေးအဖြစ်အပျက်များရဲ့ အဓိကအချက်တစ်ချက်ဖြစ်နေပါတယ်။
ယူကရိန်းတပ်ဖွဲ့များက ပုန်ကန်ရေးနယ်မြေများဖြစ်တဲ့ ဒိုနက်စ်နဲ့လူဟန့်စ်က်ဒေသများကို ချေမှုန်းရန်ကြိုးပမ်းခဲ့ပြီးနောက် ယူကရိန်းအရှေ့ဘက်ဒေသတွေမှာ နှစ်ရှည်လများပဋိပက္ခတွေ ဖြစ်ပွားနေခဲ့တာဖြစ်ပါတယ်။
Source: RT
#Local_News
Published_ 4 Mar 2022
မွန်ပြည်နယ်၊ သထုံမြို့နယ်၌ အမှတ် (၉၀) အစုန်ရထားအား မိုင်းထေသထုံမြို့နယ်၌ အမှတ်(၉၀)အစုန်ရထားအား မိုင်းထောင်ဖောက်ခွဲတိုက်ခိုက်ခံရဟု နစက ထုတ်ပြန်ာင်ဖောက်ခွဲတိုက်ခိုက်ခံခဲ့ရကြောင်း နစက က သတင်းထုတ်ပြန်ထားပါတယ်။
မတ်လ ၂ ရက်နေ့ နံနက် ၁၀ နာရီအချိန်ခန့်မှာ မွန်ပြည်နယ်၊ သထုံမြို့နယ်၊ နန်းခဲရပ်ကွက်ရှိ သထုံဘူတာအနီး၌ ပေါက်ကွဲမှုဖြစ်ပွားခဲ့ခြင်း ဖြစ်ပါတယ်။
မော်လမြိုင်မှ ရန်ကုန်သို့ စက်ခေါင်းမောင်း ဦးမင်းလွင်၊ ရထားထိန်း ဦးမြင့်အောင်၊ တွဲထိန်း ဦးသန်းဇော်ဦးတို့ မောင်းနှင်လာသည့် လူစီးတွဲ ၁၂ တွဲ၊ မိုင်းခံတွဲ ၁ တွဲ၊ ဂတ်တွဲ (၁) တွဲပါ ခရီးသည် ၃၅၀ ဦးခန့်လိုက်ပါခဲ့တဲ့ စက်ခေါင်းအမှတ် DF 1228 အမှတ် (၉၀) အစုန် ရထားဟာ မိုင်တိုင်အမှတ် ၁၃၈ မိုင် ၂ ဖာလုံနှင့် ၃ ဖာလုံကြား သထုံ ဘူတာနှင့် ၆ ဖာလုံခန့်အကွာ အလံချိုးတဲ့နေရာအရောက်မှာ ရထားတွဲအမှတ် BDFEZ-12205 ဒုတိယတွဲ (ပထမတန်း) အောက်မှ လက်လုပ်အသံမိုင်း ၁ လုံး ပေါက်ကွဲခဲ့ခြင်းဖြစ်ကြောင်း သိရပါတယ်။
ပေါက်ကွဲမှုကြောင့် ကွန်ကရစ်ဇလီဖားတုံး ၁ တုံး ၄ လက်မပတ်လည်ခန့် ပျက်စီးခဲ့ပြီး သံလမ်းထိန်းကလစ် ၁ ကွင်း အနည်းငယ်ကွေးသွားခဲ့ပါတယ်။
ထိုကဲ့သို့ လမ်းပန်းဆက်သွယ်ရေးပြတ်တောက်စေရန်အတွက် ရထားအား မိုင်းထောင်ဖောက်ခွဲတိုက်ခိုက်ခဲ့သူများအား ဖော်ထုတ်ဖမ်းဆီး၍ ဥပဒေနှင့်အညီ ထိရောက်စွာ အရေးယူနိုင်ရေး လုံခြုံရေးတပ်ဖွဲ့ဝင်များက ဆက်လက်ဆောင်ရွက်လျက်ရှိတယ်လို့ နစက က သတင်းထုတ်ပြန်ထားပါတယ်။
ymg_mnn
#Yangon_Media_Group
#WorldHealth
Published - 04 March 2022
ဖန်ပြွန်သန္ဓေသားမျိုးစပ်ခြင်း(IVF)ဖြစ်စဉ်တွင် အေးခဲထားသောသန္ဓေသားလောင်းအား အရည်ပျော်စေပြီးနောက် အမျိုးသမီးသားအိမ်ထဲသို့ပြောင်းရွှေ့ခြင်း(FET)ဟာ အဓိကလုပ်ငန်းစဉ်တစ်ခုဖြစ်ပါတယ်။
mRNA ကိုဗစ်ကာကွယ်ဆေးတွေထိုးနှံခြင်းက အဆိုပါ FET ဖြစ်စဉ်အပေါ် ဆိုးကျိုးသက်ရောက်မှုမရှိစေနိုင်ကြောင်း အစ္စရေးလ်နိုင်ငံ ရှီဘာဆေးကုသစင်တာရဲ့လေ့လာချက်ကို Fertility and Sterility ဆေးပညာဂျာနယ်မှာ ကြာသပတေးနေ့က ဖော်ပြလိုက်ပါတယ်။
သုတေသီတွေလေ့လာဆန်းစစ်ခဲ့တဲ့ သန္ဓေသားလောင်း ၆၇၂ ယောက်ဟာ အသက် ၃၈ နှစ်အရွယ်တွေအထိပါဝင်တဲ့ အမျိုးသမီး ၄၂၈ ဦးထံ ရွှေ့ပြောင်းခဲ့ကြတာဖြစ်ပါတယ်။
ထိုအမျိုးသမီးတွေဟာ IVF နည်းလမ်းဖြင့် သန္ဓေယူခဲ့ကြပြီး အဲဒီအထဲက ၁၄၁ ယောက်ဟာ mRNA ကာကွယ်ဆေးနှစ်ကြိမ်ထိုးထားသူတွေနဲ့ ကိုရိုနာဗိုင်းရပ်စ်ကူးစက်ခြင်းမှ သက်သာလာသူတွေပါဝင်ပါတယ်။
အဲဒီနောက်မှာတော့ ကာကွယ်ဆေးထိုးထားတဲ့အမျိုးသမီးတွေနဲ့ ကာကွယ်ဆေးမထိုးထားတဲ့သူတွေကြား ကိုယ်ဝန်သန္ဓေအောင်မြင်မှုနှုန်း ခြားနားခြင်းမရှိကြောင်း သုတေသီတို့ တွေ့ရှိခဲ့ကြပါတယ်။
"ကမ္ဘာတဝန်းမှာ ကိုရိုနာဗိုင်းရပ်စ်ကာကွယ်ဆေးတွေ စတင်ထိုးနှံနေတဲ့အချိန်ကတည်းက ကိုယ်ဝန်ဆောင်အရွယ်အမျိုးသမီးတွေ ပူပန်နေရတဲ့ကိစ္စတစ်ခုရှိပါတယ်။ ကာကွယ်ဆေးထိုးနှံခြင်းက IVF ဖြစ်စဉ်ကို ဆိုးကျိုးသက်ရောက်စေနိုင်တယ်ဆိုတဲ့ အတွေးပါပဲ။ အမျိုးသမီးတွေနဲ့ မိခင်အများအပြား ဒီကိစ္စနဲ့ပတ်သက်ပြီး စိုးရိမ်ပူပန်နေကြပါတယ်" လို့ ရှီဘာဆေးရုံ IVF ဌာနမှ ညွှန်ကြားရေးမှူး ပရော်ဖက်ဆာ'ရာအူးလ်အော်ဗီယေတို'က ပြောပြခဲ့ပါတယ်။
တစ်ကမ္ဘာလုံးမှာ ကာကွယ်ဆေးထိုးနှံသူတွေများပြားလာပေမယ့် ဒီလိုဆိုးကျိုးသက်ရောက်မှုတွေကို စိုးရိမ်နေတဲ့သူတွေကြောင့် ကာကွယ်ဆေးထိုးနှံဖို့ နှောင့်နှေးနေကြပြီး ကာကွယ်ဆေးထိုးနှံမှုနှုန်း အခက်အခဲဖြစ်နေပါတယ်။
ကာကွယ်ဆေးထိုးနှံပြီးနောက် နောက်ဆက်တွဲဆိုးကျိုးတွေက ပြင်းထန်ခြင်းမရှိပေမယ့် အအေးမိဖျားနာလက္ခဏာတွေကနေ ရောဂါလက္ခဏာတွေအထိ ခံစားရနိုင်ပါတယ်။
နိုင်ငံတော်ကျန်းမာရေးအဖွဲ့ အစည်းရဲ့ ဖော်ပြချက်အရ ကာကွယ်ဆေးထိုးပြီးတဲ့အမျိုးသမီးအချို့ မှာ ရာသီဓမ္မတာစက်ဝန်း တစ်ရက်တာပိုကြာနိုင်တယ်လို့ သိရှိရပါတယ်။
၂၀၂၁ ခုနှစ်မေလအတွင်း မျိုးပွားခြင်းဆိုင်ရာဇီဝဗေဒဂျာနယ်မှာ mRNA ကိုဗစ်ကာကွယ်ဆေးမထိုးခင်နဲ့ ထိုးအပြီး IVF လုပ်ငန်းစဉ်တွေမှာ 'မ'မျိုးဥလှုံ့ဆော်ခြင်းနဲ့ သန္ဓေသားအောင်နိုင်စွမ်းအခြေအနေတွေ ပြောင်းလဲခြင်းမရှိကြောင်း ဖော်ပြခဲ့ပါတယ်။
ပြီးခဲ့တဲ့လအတွင်း လူသားမျိုးပွားခြင်းဆိုင်ရာဂျာနယ်ရဲ့ဖော်ပြချက်အရ ကိုဗစ်ကာကွယ်ဆေးထိုးပြီး ၃ လအတွင်း အမျိုးသမီးတွေရဲ့သားဥထွက်ရှိမှု ပြောင်းလဲခြင်းမရှိပါဘူး။
"အကျဉ်းချုပ်ကြည့်ရင် ကာကွယ်ဆေးထိုးနှံခြင်းက FET နည်းလမ်းဖြင့် အမျိုးသမီးတွေကိုယ်ဝန်ဆောင်နိုင်မှုနှုန်းကို ဆိုးကျိုးမသက်ရောက်စေပါဘူး" လို့ 'အော်ဗီယေတို'က သုံးသပ်သွားပါတယ်။
Source: The Jerusalem Post.
#Local_News
Published_ 4 Mar 2022
မိုးကုတ်မြို့နယ်တွင် ငွေကျပ် ၂၀ ဘီလီယံတန်ဖိုးရှိ အိုက်စ် (မက်သ်အဖက်တမင်း) များ ဖမ်းဆီးရမိခဲ့ကြောင်း မြန်မာနိုင်ငံရဲတပ်ဖွဲ့က သတင်းထုတ်ပြန်ထားပါတယ်။
ဖြစ်စဉ်မှာ မူးယစ်ဆေးဝါးတားဆီးနှိမ်နင်းရေးရဲတပ်ဖွဲ့မှ တပ်ဖွဲ့ဝင်များနှင့် ပူးပေါင်းအဖွဲ့ဟာ မတ် ၁ ရက် မွန်းလွဲ ၁၂ နာရီခွဲခန့်မှာ မန္တလေးတိုင်းဒေသကြီး မိုးကုတ်မြို့နယ်၊ လယ်ကြီး ပူးပေါင်းစစ်ဆေးရေးစခန်းတွင် မိုင်းလုံမှမိုးကုတ်သို့ မောင်းနှင်လာသည့် Nissan ၆ ဘီး ယာဉ်ကိုစစ်ဆေးရန် ရပ်တန့်ခိုင်းစဉ် ယာဉ်မောင်းဖြစ်သူ ဝေသူမှာ ထွက်ပြေးသွားပြီး ယာဉ်နောက်လိုက် အေးနိုင်(ခ)စိုးမြင့်နိုင် ၃၀ နှစ်နှင့်အတူ ဒေသကာလတန်ဖိုးငွေကျပ် ၂၀ ဘီလီယံတန်ဖိုးရှိ အိုက်စ် (မက်သ်အဖက်တမင်း) ၁ တန် သိမ်းဆည်းရမိခဲ့ကြောင်း သိရပါတယ်။
စစ်ဆေးဖော်ထုတ်ချက်အရ သိမ်းဆည်းရမိ အိုက်စ် (မက်သ်အဖက်တမင်း) များကို ရှမ်းပြည်နယ် (မြောက်ပိုင်း) မှ မန္တလေးတိုင်းဒေသကြီးသို့ သယ်ဆောင်ခြင်းဖြစ်ကြောင်း သိရှိရပါတယ်။
ကွင်းဆက်ပြစ်မှုကျူးလွန်သူများကို ဆက်လက်စစ်ဆေးဖော်ထုတ်ပြီး အရေးယူဆောင်ရွက်သွားမယ်လို့ မြန်မာနိုင်ငံရဲတပ်ဖွဲ့က သတင်းထုတ်ပြန်ထားပါတယ်။
ymg_mnn
#Yangon_Media_Group.
Page 1353 of 1403