#Daily_News
Published 13 December 2024

၁။ မြို့တော်စည်ပင်လိုင်စင်ရရှိထားသူများလည်း ဓာတ်သတ္တု (ရွှေ) လိုင်စင်ထပ်မံလျှောက်ထားရမည်

၂။ ရန်ကုန်အထိုင် စားအုန်းဆီအခြေခံလက်ကား ရည်ညွှန်းဈေးကျလာသော်လည်း ပြင်ပပေါက်စျေးကျဆင်းခြင်းမရှိ

၃။ တနင်္သာရီတိုင်း၌ မိုးလေပြင်းထန်နိုင်ပြီး ကျန်တိုင်းနှင့်ပြည်နယ် ငါးခု၌မိုးရွာနိုင်

၄။ ယူကေ၌သွားရောက်ပညာသင်ယူခဲ့သည့် တရုတ်နိုင်ငံမှ မျက်မမြင်အင်္ဂလိပ်ဆရာ မျက်မမြင်ကျောင်းသားများကို အခမဲ့သင်ကြားပေးနေ ... အစရှိတဲ့ သတင်းတွေကို တင်ဆက်ပေးသွားမှာ ဖြစ်ပါတယ်။

#YMG #Yangon_Times #Yangon_Media_Group

#Local_News
Published 13 Decrmber 2024

▪️ ၂၀၂၄ ခုနှစ် ကိုရီးယားဘာသာအရည်အချင်းစစ်စာမေးပွဲ (EPS-TOPIK)နှင့် Skills Test (ကုန်ထုတ်လုပ်ငန်း ပထမအသုတ်နှင့် ဝန်ဆောင်မှုလုပ်ငန်း အုပ်စု-၁) အောင်မြင်ပြီးသူများကို အလုပ်လျှောက်လွှာ ခေါ်ယူသွားမည်ဖြစ်ကြောင်း အစိုးရပြည်ပ အလုပ်အကိုင်အေဂျင်စီမှ သိရသည်။

▪️ ထိုသို့ အလုပ်လျှောက်လွှာခေါ်ယူခြင်းကို ယခု ဒီဇင်ဘာလ နောက်ဆုံးရက် သတ္တပတ် (သို့မဟုတ်) ၂၀၂၅ ခုနှစ် ဇန်နဝါရီလဆန်းပိုင်းတွင် ဆောင်ရွက် မည်ဖြစ် ကြောင်း၊ ၂၀၂၄ ခုနှစ် ကိုရီးယားဘာသာအရည်အချင်းစစ်စာမေးပွဲ (EPS-TOPIK)နှင့် Skills Test ကို ယခုနှစ် ဧပြီလ ၂၄ ရက်မှ မေလ ၁ဝ ရက်အထိ တကြိမ်၊ မေလ ၂ဝ ရက်မှ ဇူလိုင်လ ၂၆ ရက်အထိ တကြိမ် နှစ်သုတ်ခွဲ ကျင်းပခဲ့ပြီး အောင်စာရင်းများကို မေလ ၁၇ ရက်မှ ဩဂုတ်လ ၅ ရက်အတွင်း ထုတ်ပြန်ပေး ခဲ့ကြောင်း သိရသည်။

▪️ ကိုရီးယားနိုင်ငံတွင် သွားရောက်အလုပ်လုပ်ကိုင်ရန်အတွက် ယခုနှစ် ကျင်းပ သည့် (၁၆) ကြိမ်မြောက် ကိုရီးယားဘာသာစကား အရည်အချင်းစစ်စာမေးပွဲ (EPS-TOPIK) ဖြေဆိုရန် စာရင်းပေးသွင်းသူ အရေအတွက် တစ်သိန်းကျော်အထိ ရှိခဲ့ပြီး စံချိန်တင် မြင့်တက်ခဲ့ကြောင်း သိရသည်။

#YMG/SW #Yangon_Times

စက်သုံးဆီတင်သွင်းသိုလှောင်ဖြန့်ဖြူးခြင်းလုပ်ငန်း ကြီးကြပ်ရေးကော်မတီရဲ့ ရန်ကုန်ဈေးကွက်အတွက် ဒီကနေ့ ထုတ်ပြန်ချက်အရ စက်သုံးဆီ ဈေးနှုန်းအားလုံးကျဆင်းလာတယ်လို့ သိရပါတယ်။
#Local_News
Published 13 December 2024
#စက်သုံးဆီ #စက်သုံးဆီဈေးကျ
#YMG/NN #Yangon_Times

ရန်ကုန်အထိုင် စားအုန်းဆီ အခြေခံလက်ကား ရည်ညွှန်းဈေးကျလာသော်လည်း ပြင်ပပေါက်စျေးကျဆင်းခြင်းမရှိဘူးလို့ စျေးကွက်အတွင်းကနေ စုံစမ်းသိရှိရပါတယ်။
#Local_News
Published 13 December 2024
#စားအုန်းဆီအခြေခံလက်ကား #ပြင်ပပေါက်စျေးတက်
#YMG/SW #Yangon_Times

တနင်္သာရီတိုင်းရှိ  မိုးတိမ်တောင်များ ရွေ့လျားရာနေရာတစ်လျှောက်မှာ မိုးလေပြင်းထန်နိုင်ပြီး ကျန်တိုင်းနဲ့ပြည်နယ် ငါးခုမှာ မိုးရွာနိုင်တယ်လို့ မိုးလေဝသနှင့်ဇလဗေဒညွှန်ကြားမှုဦးစီးဌာနရဲ့ ဒီကနေ့ညနေပိုင်းအထိခန့်မှန်းချက်အရသိရပါတယ်။
#Local_News
Published 13 December 2024
#မိုးတိမ်တောင်များရွေ့လျား #မိုးလေပြင်းထန်နိုင်
#YMG/NN #Yangon_Times

မြို့တော်စည်ပင်က ထုတ်ပေးထားတဲ့ ရွှေလုပ်ငန်းလိုင်စင်ရရှိထားသူတွေအနေနဲ့လည်း ဓာတ်သတ္တု (ရွှေ) လုပ်ငန်းလိုင်စင်ကို ထပ်မံလျှောက်ထားရမယ်လို့ ရန်ကုန်တိုင်းဒေသကြီးရွှေလုပ်ငန်းရှင်များအသင်းက သိရပါတယ်။
#Local_News
Published 13 December 2024
#ဓာတ်သတ္တု(ရွှေ)လိုင်စင် #ထပ်မံလျှောက်ထားရ
#YMG/SW #Yangon_Times

#Local_News
Published 13 December 2024

▪️ ရန်ကုန်မြို့၊ ဗိုလ်တထောင်မြို့နယ်ရှိ  ဗိုလ်တထောင်ကျိုက်ဒေးအပ် ဆံတော်ဦးစေတီတော် လုံးတော်ပြည့် ရွှေစင်ရွှေပြား ရွှေသင်္ကန်းတော်များ ကပ်လှူပူဇော်ခြင်း လုပ်ငန်းကို လာမည့်  ဇန်နဝါရီလ ၁ရက်၌ စတင်ကပ်လှူခြင်းများ ပြု
လုပ်သွားမည်ဖြစ်ကြောင်း   ဗိုလ်တထောင်ကျိုက်ဒေးအပ်ဆံတော်ဦး စေတီတော်လုံးတော်ပြည့် ရွှေသင်္ကန်းကပ်လှူပူဇော်ရေး ဦးစီးကော်မတီမှ  သိရသည်။

▪️ အဆိုပါ  ဆံတော်ဦးစေတီတော်မြတ်ကြီးကို ရွှေသင်္ကန်းတော်ကပ်လှူပူဇော်ရာတွင် ပင်မစေတီတော်ကြီးသာမက၊ အရံစေတီများနှင့် စေတီတော်ရင်ပြင်ရှိ စေတီငယ်များအားလုံးကိုပါ တစ်ပြိုင်တည်း ရွှေချပူဇော်သွားမည်ဖြစ်ကာ
ဗိုလ်တထောင်ကျိုက်ဒေးအပ်ဆံတော်ဦးစေတီတော်မြတ်ကြီးကို ရထားပျံဖြင့် ရွှေသင်္ကန်းတော် ကပ်လှူပူဇော် ခြင်းကို ဇန်နဝါရီ၁ရက် တွင် စတင်ပြီး လုံးတော်ပြည့် ရွှေသင်္ကန်းတော် ကပ်လှူခြင်းလုပ်ငန်းမှာ ၂ဝ၂၅ ခုနှစ် ဧပြီလကုန်တွင်ပြီးစီးအောင် ဆောင်ရွက်သွားမည်ဖြစ်ကြောင်း သိရသည်။

▪️ ထို့အပြင် ၂ဝ၂၅ ခုနှစ် မေလအတွင်း စေတီတော်မြတ်ကြီးကို ဗုဒ္ဓါဘိသေက အနေကဇာတင်ခြင်းနှင့် လှူဒါန်းမှုအစုစုတို့အတွက် စုပေါင်းရေစက်ချအောင်ပွဲကို ကျင်းပသွားမှာ ဖြစ်ကြောင်း သိရသည်။

▪️ လတ်တလောတွင်  ဗိုလ်တထောင်ကျိုက်ဒေးအပ် ဆံတော်ဦးစေတီတော်မြတ်ကြီးနှင့် အရန်စေတီတော်များကို ရွှေစင်ရွှေပြား ကြေးဘောင်ကြေးပြားနှင့် မျက်ပါးရွှေဆိုင်း ရွှေသင်္ကန်းတော်များ ကပ်လှူပူဇော်ခြင်းလုပ်ငန်းကို ဆောင်ရွက် လျှက်ရှိရာ လုံးတော်ပြည့် ငြမ်းစေတီတည်ခြင်းလုပ်ငန်းမှာ ရာနှုန်းပြည့် ပြီးစီးနေပြီဖြစ်ကြောင်း သိရသည်။

#YMG/NN #Yangon_Times

#Local_News
Published 13 December 2024

▪️ နေပြည်တော်၌ အဆင့်မြင့်အိမ်ရာစီမံကိန်းသုံးခု ဖော်ဆောင်ရန် စိတ်ဝင်စားမှုအဆိုပြုလွှာ (EOI)  ခေါ်ယူနေကြောင်း သိရသည်။

▪️ အဆိုပါ စီမံကိန်းများကို နေပြည်တော်စည်ပင်သာ ယာရေးကော်မတီ၊ အင်ဂျင်နီယာဌာန(အဆောက်အအုံ) မှ ဇမ္ဗူသီရိမြိုနယ်အတွင်း၌ အဆင့်မြင့်အိမ်ရာစီမံကိန်းများအဖြစ် ဖော်ဆောင်သွားမည်ဖြစ်ကြောင်း  သိရသည်။

▪️ ထိုသို့ဖော်ဆောင်ရာတွင်  ဇမ္ဗူသီရိမြိုနယ်၊ ပျဉ်းမနား-တောင်ညိုလမ်း အရှေ့ဘက် သုခတော်ဝင်အိမ်ရာအနီးတွင် တစ်နေရာ၊ ပျဉ်းမနား - တောင်ညိုလမ်း အရှေ့ဘက် DENKO စက်သုံးဆီအရောင်းဆိုင်အနီး၌ တစ်နေရာနှင့် ဓနသိဒ္ဒိရပ်ကွက်၊ တော်ဝင်သီရိလမ်း အနောက်ဘက်တွင် တစ်နေရာဖော်ဆောင်မည် ဖြစ်သည်။

▪️ ထို့ပြင် စီမံကိန်းမြေဧရိယာများ သတ်မှတ်ထားပြီး တည်ဆောက်ရေးလုပ်ငန်းများအတွက် စိတ်ဝင်စားသည့် လုပ်ငန်းရှင်၊ ကုမ္ပဏီများကိုလည်း စိတ်ဝင်စားမှုဖော်ပြခြင်းလျှောက်လွှာ Expression of Interest ကို တရားဝင်ဖိတ်ခေါ်ထားကာ အဆိုပြုလွှာပုံစံကိုလည်း  ကုမ္ပဏီဆိုင်ရာအထောက်အထားမိတ္တူများ ပြသပြီး လာရောက်ဝယ်ယူနိုင်ကာ ဒီဇင်ဘာလ (၃၁)ရက် နောက်ဆုံးထားတင်သွင်းရမည် ဖြစ်ကြောင်း သိရသည်။

#YMG/NN #Yangon_Times

#Local_News
Published 13 December 2024

▪️ ပုဂ္ဂလိကပိုင်ပြုလုပ်ရေး ကော်မရှင်လက်ဝယ်ရှိ မြေနှင့်အဆောက်အဦ ၊ တိုက်ခန်းနှင့်မြေကွက် စုစုပေါင်း(၂၃)ခုကို အိတ်ဖွင့်တင်ဒါစနစ်ဖြင့်ရောင်းချသွားမည်ဖြစ်ကြောင်း သိရသည်။

▪️ ထိုအိတ်ဖွင့်တင်ဒါအတွက် လျှောက်လွှာများကို ၂၀၂၄ ခုနှစ် ဒီဇင်ဘာ ၉ရက်နေ့မှ ၂၀ ရက်နေ့အထိ ပုဂ္ဂလိကပိုင်ပြုလုပ်ရေးကော်မရှင်ရုံးတွင် ရောင်းချမည်ဖြစ်ပြီး စပေါ်ငွေသွင်းရမည့်တန်ဖိုးကို အဆိုပြုလွှာဝယ်ယူသည့်အခါတွင် ပူးတွဲဖော်ပြပေးရမည်ဖြစ်ကြောင်း၊ တင်ဒါတင်သွင်းသူများအနေဖြင့် ဝယ်ယူလိုသည့် Lot No. တစ်ခုချင်းစီအတွက် သီးခြားအဆိုပြုလွှာတစ်စောင်စီတင်သွင်းရမည်ဖြစ်ပြီး သတ်မှတ်စပေါ်ငွေ P.O Cheque (Payment Order Cheque)အား တင်ဒါတင်သွင်းလွှာနှင့်အတူ ပူးတွဲတင်ပြရမည်ဖြစ်ကြောင်း သိရသည်။

▪️ တင်ဒါတင်သွင်းရမယ့်ရက်မှာ၂၀၂၄ခုနှစ် ဒီဇင်ဘာ ၂၇ရက် ဖြစ်ပြီး Lot No.(1) မှ (23)အထိ ရုံးအမှတ် (၃၂) ၊ နေပြည်တော်တွင် နံနက် (၁၀)နာရီမှစ၍ အစဥ်လိုက် လက်ခံသွားမည်ဖြစ်ကြောင်း၊ ထို့အပြင် ဝယ်ယူလိုသည့် မြေနှင့်အဆောက်အဦ ၊ တိုက်ခန်းနှင့်မြေကွက်များအားကြော်ငြာစတင်သည့်နေ့မှ စတင်ပြီးသွား ရောက်ကြည့်ရှုနိုင်ကြောင်း သိရသည်။

#YMG/SW #Yangon_Times

#World_News
Published 13 December 2024

▪️ အမေရိကန် ကျောထောက်နောက်ခံပြု ကာဒစ်ရှ်တပ်ဖွဲ့တွေနဲ့ တူရကီနောက်ခံပြု သူပုန်များကြား တိုက်ခိုက်နေကြတဲ့ ဆီးရီးယားမှာ တည်ငြိမ်အေးချမ်းရေး ဖော်ဆောင်ဖို့ အရေးကြီးကဏ္ဍအကြောင်း ဆွေးနွေးရန် အမေရိကန် နိုင်ငံခြားရေးဝန်ကြီး အန်တိုနီဘလင်ကန်ဟာ ကြာသပတေးနေ့က တူရကီသို့ ရောက်ရှိလာပါတယ်။

▪️ တနင်္ဂနွေနေ့က ဆီးရီးယားသမ္မတ ဘာရှာအယ်အက်ဆက်ဒ်အစိုးရ ဖယ်ရှားခံရပြီးနောက် ဘလင်ကန်ဟာ ဂျော်ဒန်သို့ အရင်သွားရောက်ခဲ့ကာ အန်ကာရာ အက်ဆင်ဘိုဂါလေဆိပ်မှာ တူရကီသမ္မတ တာယစ်အာဒိုဂန်နဲ့ တွေ့ဆုံခဲ့ပါတယ်။

▪️ အာဒိုဂန်နဲ့ ဘလင်ကန်တို့ ဆီးရီးယားမှာ ဖွံ့ဖြိုးတိုးတက်မှုများ လုပ်ဆောင်ရန် ဆွေးနွေးခဲ့ကြကာ အဖွဲ့အစည်းများ ပြန်လည်တည်ဆောက်ဖို့အတွက် အတူတကွ လုပ်ဆောင်သွားကြရန် အာဒိုဂန်က နိုင်ငံတကာ အသိုင်းအဝိုင်းကို တောင်းဆိုခဲ့တယ်လို့ ဖော်ပြထားပါတယ်။

▪️ တူရကီဟာ အကြမ်းဖက်လို့ ယူဆတဲ့ အဖွဲ့အစည်းအားလုံးကို ဆန့်ကျင်ပြီး ဆီးရီးယား နိုင်ငံတော်လုံခြုံရေးအတွက် ကြိုတင်ကာကွယ်မှုများ ပြုလုပ်သွားမယ်လို့ အာဒိုဂန်က ပြောခဲ့ကာ အစ္စလာမ်တွေနဲ့ တိုက်ခိုက်ရာမှာ ပျော့ညံ့နေမှာမဟုတ်ဘူးလို့လည်း ပြောသွားပါတယ်။

▪️ အမေရိကန်နဲ့ တူရကီဟာ ဆီးရီးယားအစိုးရအနေနဲ့ တာဝန်ခံနိုင်ပြီး ပူးပေါင်းပါဝင်နိုင်မယ့် အစိုးရအဖြစ်သို့ အသွင်ကူးပြောင်းခြင်းကို ထောက်ခံကြောင်း ဘလင်ကန်က မှတ်ချက်ပြုခဲ့တယ်လို့ အမေရိကန် နိုင်ငံခြားရေးဝန်ကြီးဌာနမှ ပြောရေးဆိုခွင့်ရှိသူ မက်သရူးမီလာက ပြောပါတယ်။

▪️ အစ္စလာမ်အဖွဲ့အစည်းကို အနိုင်ယူသွားဖို့ အရေးကြီးတာဝန်များ ဆက်လက်ဆောင်ရွက်ဖို့ကိုလည်း အလေးပေး ပြောကြားသွားပါတယ်။

▪️ နေတိုးမဟာမိတ်တွေဖြစ်တဲ့ အမေရိကန်နဲ့ တူရကီတို့ဟာ ဆီးရီးယားပြည်တွင်းစစ် ၁၃ နှစ်တာအတွင်း ဆီးရီးယားသူပုန်များကို ထောက်ခံခဲ့ကြပေမယ့် ကာဒစ်ရှ်တို့ဦးဆောင်တဲ့ ဆီးရီးယားဒီမိုကရက်တစ်တပ်ဖွဲ့တွေနဲ့ ပတ်သက်လာတဲ့အခါမှာ အကျိုးစီးပွား အချင်းများလာကြပါတယ်။

#Source: Reuters

“တူရကီကျော်ထောက်နောက်ခံပြုထားသည့် သူပုန်အုပ်စုက သမ္မတအာဆတ်ကိုဖြုတ်ချကာ ဆီးရီးယားနိုင်ငံအစီအစဉ်သစ်တစ်ခုတည်ဆောက်မည်ဟုစတင်ပြောလာချိန်တွင် ထိုအုပ်စု၏ ကာလရှည်ရန်သူ  တော်ဖြစ်ခဲ့သည့်အမေရိကန်ကျောထောက်နောက်ခံပြုကာ့ဒ်သူပုန်အဖွဲ့ရှေ့ရေးမည်သို့ဖြစ်မည်လဲ...”

၁၂ ဒီဇင်ဘာ ၂၀၂၄

News

ဆီးရီးယားသမ္မတ ဘာရှာအာဆတ်ကို ဖြုတ်ချခဲ့တဲ့ ဂျီဟတ်သူပုန်တွေက ဆီးရီးယားနိုင်ငံကို ညီညွတ်ပြီး အားလုံးပါဝင်တဲ့ နိုင်ငံတစ်နိုင်ငံအဖြစ်တည်ဆောက်လိုတယ်လို့ပြောလိုက်ပါတယ်။

ဒါပေမယ့် ၁၄နှစ်နီးပါးကြာမြင့်ခဲ့တဲ့ ပြည်တွင်းစစ်ကြောင့် အဲဒီစိတ်ကူးယဉ်မှုကို လက်တွေ့ကျင့်သုံးဖို့ အတွက်ကတော့ လွယ်ကူလိမ့်မှာမဟုတ်ပါဘူး။

အမေရိကန်ရဲ့ အနီးကပ်ဆုံးမဟာမိတ်ဖြစ်တဲ့ ဆီးရီးယားရဲ့ လူနည်းစု ကာ့ဒ်အတွက်ကတော့ ယခုလို အစီအစဉ်အသစ်တစ်ခုထဲဝင်ရောက်လာတာဟာ သူတို့အတွက် ပိုပြီး စိန်ခေါ်မှုတွေနှင့်ရင်ဆိုင်ရမယ့် အခြေအနေတစ်ခုဖြစ်နေပါတယ်။

Views

ဆီးရီးယားပြည်တွင်းစစ် တလျောက်မှာ ကာ့ဒ်လက်နက်ကိုင်တွေဟာ အမေရိကန်နှင့်မဟာမိတ်လုပ်ကာ  လက်နက်ကိုင်အဖွဲ့အမျိုးမျိုးကို တိုက်ထုတ်ခဲ့ပြီး အစ္စလမ်မစ်နိုင်ငံတော်အုပ်စု(အိုင်အက်စ်)ကိုလည်း နှိမ်နှင်းခဲ့ပါတယ်။ အဲဒီအပြင် ရေနံကြွယ်ဝတဲ့ ဆီးရီးယားအရှေ့ပိုင်းမှာလည်း အကြီးမားတဲ့ ကိုယ်ပိုင် အုပ်ချုပ်ခွင့်ရဒေသတစ်ခုကို ခွဲထုတ်ရယူခဲ့ကြပါတယ်။

ဒါပေမယ့် အာရပ်မဟုတ်တဲ့ အဆိုပါ ကာ့ဒ်တွေရဲ့အောင်မြင်ခဲ့မှုတွေက ယခုအခါ စိုးရိမ်စရာဖြစ်လာပါပြီ။  ကာ့ဒ်တွေရဲ့ ကာလရှည်ကြာရန်သူလည်းဖြစ်ပြီး တူရကီရဲ့ အကူအညီကိုရယူထားတဲ့ ဆွန်နီအာရပ် သူပုန်တွေဟာ အာဆတ်ကိုဖြုတ်ချနိုင်ခဲ့ပါတယ်။ ဆီးရီးယားနိုင်ငံအသစ်မှာ ကာ့ဒ်တွေအတွက် နေရာ တစ်ခုရဖို့အလွန်ခက်ခဲမှာဖြစ်ပြီး ပဋိပက္ခဟာ ဆက်လက်ရှည်ကြာသွားနိုင်တဲ့ အခြေအနေမှာရှိနေ ပါတယ်။

ပြီးခဲ့သည့်အပတ်က ဒမတ်စကတ်သို့ စီးနင်းဝင်ရောက်လာသည့် ဂျီဟတ်သူပုန်များသည် ကာ့ဒ်များကို ငြိမ်းချမ်းစွာ ချည်းကပ်ခဲ့ပါတယ်။ ဒါပေမယ့်  အရှေ့ပိုင်းက ဒီယာအယ်လ်ဇိုးမြို့မှာ အစိုးရတပ်   တွေရုပ် သိမ်းသွားပြီးသိပ်မကြာခင်မှာ အဲဒီသူပုန်တွေကပဲ ကာ့ဒ်သူပုန်တွေကို အကြမ်းဖက်မောင်းထုတ်ခဲ့ပါ တယ်။

မြောက်ပိုင်းမှာ တူရကီက ကျောထောက်နောက်ခံပေးထားတဲ့ သီးခြားခွဲထုတ်ရေးအတိုက်အခံတစ်ဖွဲ့ဟာ  ကာ့ဒ်တွေနှင့် နှစ်ပေါင်းများစွာ တိုက်ပွဲတွေဖြစ်နေခဲ့ပါတယ်။ သူတို့ဟာ မန်ဘစ်မြို့ကိုသိမ်းထားပါတယ်။  ပြီးတော့ ကာ့ဒ်ယာဉ်တန်းတစ်ခုကို တူရကီနိုင်ငံက လေကြောင်းတိုက်ခိုက်ခဲ့ပါတယ်။ အဲဒီယာဉ်တန်းဟာ အစိုးရရဲ့ လက်နက်တိုက်တွေက လုယူလာတဲ့ အကြီးစားလက်နက်တွေသယ်ဆောင်လာတာလို့ပြော ပါတယ်။

ကာ့ဒ်တွေက အဲဒီစိန်ခေါ်မှုတွေကိုရင်ဆိုင်ရင်းနှင့်ပင် ကာလရှည်ကြာကတည်းက အမေရိကန်ဆီက အကူအညီတွေရယူနိုင်ခဲ့ပါတယ်။ ဆီးရီးယားအရှေ့ပိုင်းမှာ အမေရိကန်တပ်သား ၉၀၀ခန့်ရှိနေပါတယ်။ အဲဒီဒေသမှာ အမေရိကန်တပ်တွေဟာ အစ္စလမ်မစ်သောင်းကျန်းသူတွေ ပြန်လည်ထကြွလာမှာကို ဟန့်တားနိုင်ဖို့ ကာ့ဒ်သူပုန်တွေကို ကူညီပေးနေခဲ့ပါတယ်။ ဒါပေမယ့် အဲဒီလုပ်ငန်းဟာလည်း သမ္မတ ဒေါ်နယ်ထရမ့်တက်လာရင် မသေချာတော့ပါဘူး။ ထရမ့်က ဆီးရီးယားနိုင်ငံမှာ အမေရိကန်ပါဝင်ပတ် သက်နေမှုအပေါ် မယုံမကြည်ဖြစ်နေခဲ့တာကြပါပြီ။

ကာ့ဒ်တွေ ဘယ်လိုအကျပ်အတည်းကြားထဲရောက်နေသလဲ၊ အနီးကပ်သုံးသပ်ပါမယ်။

ဆီးရီးယားနိုင်ငံထဲက အမေရိကန်မဟာမိတ် ကာ့ဒ်လက်နက်ကိုင်တွေဆိုတာ ဘယ်သူတွေလဲ

ကမ္ဘာပေါ်က အကြီးမားဆုံး နိုင်ငံမဲ့ လူနည်းစုအုပ်စုကြီးတွေထဲမှာ ကာ့ဒ်တွေလည်းပါဝင်ပါတယ်။ သူတို့  ဟာ လူဦးရေသန်း၃၀ခန့်ရှိနေပြီး တူရကီ၊အီရန်၊အီရတ်နှင့်ဆီးရီးယားနိုင်ငံပိုင်နက်တွေထဲမှာ ခွပြီးနေထိုင်  နေကြပါတယ်။ အဲဒီနိုင်ငံတွေအားလုံးမှာ သူတို့ဟာ လူနည်းစုဖြစ်နေပါတယ်။

မကြာခဏဆိုသလိုနှိပ်စက်မှုခံရလို့ အဲဒါတွေက ကာ့ဒ်တွေ လက်နက်ကိုင်ပုန်ကန်ထကြွအောင် မီးထိုးသလို  ဖြစ်ခဲ့တယ်လို့   ဆိုပါတယ်။

ဆီးရီးယားနိုင်ငံ ပြည်တွင်းစစ်စောစောပိုင်းကာလမှာ သူတို့ဟာ ကိုယ်ပိုင်အုပ်ချုပ်ခွင့်ရတဲ့ နယ်မြေတစ်ခု ဖဲ့ယူနိုင်ခဲ့ကြပါတယ်။ ဒါပေမယ့် သူတို့ဟာ အာဆတ်အစိုးရနှင့်ရော သူ့ကိုဖြုတ်ချခဲ့တဲ့ သူပုန်တွေနှင့်ရော ဘယ်တော့မှ တည့်အောင်မပေါင်းခဲ့ကြပါဘူး။

၂၀၁၄ခုနှစ်မှာ အိုင်အကစ်အုပ်စုက နိုင်ငံရဲ့ သုံးပုံတစ်ပုံသိမ်းပြီးတဲ့အချိန်က   အမျိုးသမီးတွေကိုပါနေရာ  ပေးတဲ့ လောကီဝါဒီသမား ကာ့ဒ်လက်နက်ကိုင်သူပုန်တွေဟာ အစွန်းရောက်တွေနှင့် အနိုင်မခံအရှုံးမပေး စစ်ပွဲဆင်နွှဲခဲ့လို့ အမေရိကန်တွေမျက်စေ့ကျသွားပြီး အားပေးကူညီမှုတွေစတင်ရရှိခဲ့ကြပါတယ်။

သူတို့ဟာ ဆီးရီးယားဒီမိုကရက်တစ်အင်အားစု ဆိုပြီးဖွဲ့စည်းခဲ့ကြပါတယ်။ သူတို့အဖွဲ့မှာအာရပ် တိုက်  ခိုက်ရေးသမားတွေလည်းပါဝင်လာပါတယ်။ အမေရိကန်ဦးဆောင်တဲ့လေကြောင်းတိုက်ခိုက်မှုတွေ၊ အမေ  ရိကန်အထူးတပ်ဖွဲ့တွေရဲ့အကူအညီကိုရယူခဲ့ပြီး သူတို့ဟာ အိုင်အက်စ်တွေကို ဆီးရီးယားနိုင်ငံရဲ့ နေရာ  ခပ်များများကနေ မောင်းထုတ်နိုင်ခဲ့ကြပါတယ်။ ၂၀၁၇ ခုနှစ်မှာ ကာ့ဒ်ဦးဆောင်တဲ့တပ်တွေဟာ အစွန်း  ရောက်တွေကိုယ်ပိုင်အုပ်ချုပ်နေတဲ့ ပိုင်နက်ရဲ့ မြို့တော်ဖြစ်တဲ့ ရက်ကာကို သိမ်းယူနိုင်ခဲ့ကြပါတယ်။

ဘာကြောင့် တူရကီတွေက ကာ့ဒ်တွေကို တိုက်ခိုက်နေသလဲ

ဆီးရီးယားဒီမိုကရက်တစ်အင်အားစုကို သူ့ရဲ့နယ်စပ်တွေအတွင်း ကာ့ဒ်တွေရဲ့ ဆယ်စုနှစ်များစွာအကြာ သူပုန် ထမှုတွေရဲ့ ချဲ့ထွင်မှုတစ်ခုလို့ တူရကီတွေက ရှုမြင်ထားခဲ့တာကြာပါပြီ။  သူတို့ဟာ အိုင်အက်စ်လိုပဲ နောက်ထပ် အကြမ်းဖက်အုပ်စုတစ်စုလို့ တူရကီက သဘောထားပါတယ်။ အဲဒါကြောင့် သူတို့ဟာ ဆီရီးယား နိုင်ငံအသစ်ထဲမှာ မပါဝင်သင့်ဘူးလို့ တူရကီကပြောထားပါတယ်။

ပြီးခဲ့တဲ့နှစ်များအတွင်း တူရကီဟာ ဆီရီးယားအမျိုးသားအင်အားစုလို့ သိထားတဲ့ တိုက်ခိုက်ရေး သမား  တွေကို လေ့ကျင့်ပေးပြီး ငွေကြေးနှင့်အကူအညီတွေပေးခဲ့ပါတယ်။ တူရကီနှင့်နယ်စပ်ထိတွေ့ နေတဲ့ ဆီးရီးယား မြောက်ပိုင်းကကာ့ဒ်တွေဆီကနေ နယ်မြေတွေ ရယူထိန်းချုပ်ဖို့ တူရကီက ကူညီပေး  ခဲ့ပါတယ်။ တူရကီ ကျောထောက်နောက်ခံပြုထားတဲ့ သူတို့ဟာ သူတို့ကိုယ်သူတို့ အာဆတ်ရဲ့ အတိုက်  အခံတွေအဖြစ် ပုံဖော်ထားကြပါတယ်။ အချို့သော ဝေဖန်သုံးသပ်သူတွေကတော့ သူတို့ဟာ အခွင့်အရေး  သမားတွေနှင့် ကာ့ဒ် မုန်းတီရေးသမားတွေဖြစ်တယ်လို့ ပြောကြပါတယ်။

ကာ့ဒ်တွေဟာ ယခုနှစ်ပိုင်းတွေအတွင်း ဆီးရီးယားအမျိုးသားအင်အားစုကို အာရုံစိုက်တိုက်ခိုက်ခဲ့ပါတယ်။  တူရကီနှင့်ကာလရှည် ဆက်ဆံရေးရှိထားတဲ့ ဒမတ်စကတ်က ခေါင်းဆောင်သစ်ဟာ ပိုပြီးရှည်လျားတဲ့ ရှေ့ပိုင်းစစ်မျက်နှာအသစ်တစ်ခု ထပ်ဖွင့်နိုင်ပါတယ်။

ဆီးရီးယားသူပုန်တွေက ကာ့ဒ်တွေကို ဘယ်လိုရှုမြင်ကြသလဲ

အယ်ကေးဒါးစစ်သွေးကြတစ်ဦးဖြစ်ခဲ့ဖူးပြီး အဲဒီအဖွဲ့နှင့် (၈)နှစ်ကြာ အဆက်ဖြတ်ထားခဲ့ပြီးဖြစ်တဲ့ အဘူ မိုဟာမက်အယ်ဂိုလာနီလို့သိကြတဲ့ အာမက်အယ်လ်ရှာရားဦးဆောင်တဲ့ အဓိက သူပုန်ခွဲထွက်အနေနှင့်  အာဏာရှင်လွတ်ကင်းတဲ့ ဆီးရီယားနိုင်ငံသစ်တည်ဆောက်လိုတယ်လို့ သူကပြောပါတယ်။ အဲဒီနိုင်ငံသစ် ဟာ ဘာသာပေါင်းစုံနှင့် လူနည်းစုတွေအတွက် အလုပ်လုပ်မယ်လို့သူကဆိုပါတယ်။

ကနဦးအနေအထားတွေကတော့ အပြုသဘောဆောင်ပါတယ်လို့ ဂျာမနီအခြေစိုက် ကာ့ဒ်လေ့လာရေးစင် တာအကြီးအကဲ နာဝမ်ခါလီက သုံးသပ်ပါတယ်။ နိုင်ငံတစ်လွှားမှာ သူတို့ရဲ့ လျင်မြန်လှတဲ့ ထိုးစစ်တွေ  လွန်ခဲ့တဲ့ နှစ်ပတ်ကစတင်ပြီးနောက် သူတို့ဟာ အလီပိုမြို့က ဆီးရီးယားဒီမိုကရက်တစ်အင်အားစု ထိန်းချုပ်ထားတဲ့ နယ်မြေနှစ်ခုကို သူပုန်တွေက ရှင်းလင်းနိုင်ခဲ့ပါတယ်။

“ ဆီးရီးယားဒီမိုကရက်တစ်အင်အားစုအပေါ် သူတို့က အဆိုးမပြောခဲ့တာ ဒါဟာ အပြုသဘောဆောင် တာပဲ” လို့သူကပြောပါတယ်။

သို့သော် အဲဒီခံယူချက်ကို သူတို့ဘယ်လောက်အထိတောင့်ခံထားမလဲဆိုသည်ကိုတော့ စောင့်ကြည့်ရပါ မယ်။ ဒီယာအဲလ်ဇိုးကို ဒီတစ်ပတ်ထဲ ဝင်ရောက်လာပြီးတဲ့နောက် အယ်ရှာရားအုပ်စုမှ စစ်သားတစ်ဦးက  သူတို့ဟာ ရာကာနှင့် ဆီးရီးယားအရှေ့ပိုင်းနေရာတွေဆီမကြာမီ တပ်ချီလာမယ်လို့ ဗီံဒီယိုတစ်ခုရိုက်ပြီး တင်ခဲ့ပါတယ်။ အဲဒါကြောင့် ကာ့ဒ်တွေနှင့် နောက်ထပ် တိုက်ခိုက်မှုတွေဖြစ်လာနိုင်ခြေမြင့်တက်လာ ပါတယ်။

အာဆတ်အလွန်နိုင်ငံရေးအစီအစဉ်ထဲ ကာ့ဒ်တွေပူးပေါင်းလာဖို့အတွက် သူပုန်တွေဟာ ကာ့ဒ်တွေနှင့် သဘောတူညီချက်အချို့ရရှိဖို့ ကြိုးစားလာနိုင်ပါတယ်။ ဒါပေမယ့် အဲသလိုသဘောတူဖို့က အရှေ့ပိုင်းမှာ ကာ့ဒ်တွေအတွက် ကိုယ်ပိုင်အုပ်ချုပ်မှုအဆင့်တစ်ခုခုကို သူပုန်တွေက လက်ခံဖို့ လိုအပ်လာပါလိမ့်မယ်။  အဲဒါဟာ ယခုအခါ ဆီးရီးယားရဲ့ အာဏာအပေးအယူမှာ အဓိကကျနေတဲ့ တူရကီအတွက် ဒေါသဖြစ်လာ နိုင်စရာရှိနေပါလိမ့်မယ်။

ထရမ့်အစိုးရက ကာ့ဒ်တွေကို ထောက်ခံမှာလား

အမေရိကန်စစ်တပ်ရဲ့ အရှေ့အလယ်ပိုင်းဆိုင်ရာ ထိပ်တန်းတပ်မှူးကြီးတစ်ဦးဖြစ်တဲ့ ကြည်းတပ်ဗိုလ်ချုပ် ကြီး အာရစ် ကာရီလာဟာ အင်္ဂါနေ့က ဆီးရီးယားမှာရှိတဲ့ ဆီးရီးယားဒီမိုကရက်တစ်အင်အားစုတွေနှင့် တွေ့ဆုံခဲ့ပါတယ်။ ဒါဟာ ဘိုင်ဒင်အစိုးရအနေနှင့် အာဆတ်အလွန်မှာ မဟာမိတ်တွေကို ကတိကဝတ် ထပ်ပြုလိုက်တဲ့သဘောဖြစ်ပါတယ်။

ဒါပေမယ့် အဲဒါဟာ ဇန်နဝါရီ ၂၀ ရက်နေ့မှာ ပြောင်းလဲသွားနိုင်ပါတယ်။

ထရမ့်ဟာ အရှေ့အလယ်ပိုင်းမူဝါဒနှင့်ပတ်သက်ပြီး အသေးစိတ်အနည်းငယ်သာ ချပြပါသေးတယ်။  သူဟာ ဒေသစစ်ပွဲတွေ အဆုံးသတ်ချင်တယ်။ အမေရိကန်ကို အဲဒီစစ်ပွဲတွေဆီကနေ ပြန်ထုတ်ချင်  တယ်လို့ပြောနေတာကလွဲပြီး ဘာမှအသေးစိတ်မပြောသေးပါဘူး။

အာဆတ်ဖြုတ်ချမခံရခင် အချိန်ပိုင်းကလေးအလိုမှာ ထရမ့်က ဆိုရှယ်မီဒီယာတစ်ခုမှာ စာရေးခဲ့ပါတယ်။ “ ဆီးရီးယားဟာ အရှုပ်အထွေးကြီးပဲ။ ပြီးတော့ ကျွန်တော်တို့ရဲ့မိတ်ဆွေလည်းမဟုတ်ဘူး။ ဆီးရီးယားနှင့် ပတ်သက်လို့ အမေရိကန်ပြည်ထောင်စုဟာ ဘာမှကိုမလုပ်သင့်ဘူး။ ကျွန်တော်တို့တိုက်စရာမဟုတ်ဘူး” လို့ ထရမ့်ကရေးခဲ့တာပါ။

ထရမ့်ရဲ့ အရင်သမ္မတသက်တမ်း ၂၀၁၉ခုနှစ်တုန်းက တူရကီတွေ ကျူးကျော်မှုမတိုင်ခင် ကာ့ဒ်တွေကို ထရမ့်ကစွန့်လွှတ်ခဲ့ဖူးပါတယ်။  ဒေသထဲက အဆုံးမရှိတဲ့စစ်ပွဲတွေမှာ အမေရိကန်ပတ်သက်မှုကိုရပ်ပစ် မယ်ဆိုတဲ့ သူ့ရဲ့ မဲဆွယ်ပွဲကတိကို ဖြည့်ဆည်းတဲ့အနေနှင့် ထရမ့်ကလုပ်ခဲ့တာဖြစ်ပါတယ်။

အဲသလိုလုပ်ခဲ့လို့ ထရမ့်ဟာ ကြီးမားတဲ့ အပြစ်တင်မှုတွေ ဝေဖန်မှုတွေ ခံခဲ့ရပါတယ်။ မဟာမိတ်တွေကို သစ္စာဖောက်သူလို့ ရီပတ်ဗလီကန်တွေက သူ့ကို စွပ်စွဲပါတယ်။ နောက်ပိုင်းမှာ ထရမ့်က သူ့အကြံကို ပြန်ရုပ်သိမ်းပေးခဲ့ရပါတယ်။ အရှေ့ပိုင်းက ရေနံတွင်းတွေလု့ခြုံရေးအတွက် ကျယ်ပြန်တဲ့မစ်ရှင်တွေကို  သူသဘောတူခဲ့ရပါတယ်။  တပ်တွေဟာ သူတို့ရှိတဲ့နေရာတွေမှာဆက်ထားခဲ့ရပြီး မဟာမိတ်ဖြစ်မှုကို ဆက်ထိန်းသိမ်းထားခဲ့ရပါတယ်။

ညီလတ်

America’s closest ally in Syria is losing ground as a new order takes shape by AP

@knl/ymg

#World_Science
Published 13 December 2024 
▪️ တစ်ခုနဲ့တစ်ခု နှစ်ပေါင်း ၂ သောင်းခွဲအတွင်း ကမ္ဘာဂြိုဟ်ကို ထိမှန်ခဲ့တဲ့ ဂြိုဟ်သိမ် ၂ ခုဟာ ကြာရှည်သက်ရောက်မှု မရှိခဲ့ဘူးလို့ သုတေသီများ တွေ့ရှိထားပါတယ်။ 

▪️ ယနေ့ ရုရှားနိုင်ငံရှိတဲ့နေရာကို ထိမှန်ခဲ့တဲ့ ဂြိုဟ်သိမ်ဆိုရင် မိုင် ၆၀ ခန့် ပေါက်ကွဲရာကြီး ဖြစ်နေခဲ့ပါတယ်။ 

▪️ နောက်တစ်ခုကတော့ လွန်ခဲ့တဲ့ နှစ် ၃၆ သန်းခန့်က အမေရိကန် အရှေ့ကမ်းရိုးတန်း ချေဆာပိခ်ပင်လယ်အော်မှာ ထိမှန်ခဲ့တာ ဖြစ်ပါတယ်။ 

▪️ ထိုပေါက်ကွဲရာတွေက ကမ္ဘာပေါ်မှာ အကြီးမားဆုံးဖြစ်ခဲ့ပေမယ့် နှစ်ပေါင်း ၁ သိန်းခွဲလောက် ကြာတဲ့အထိ ရာသီဥတု ပြောင်းလဲမှုကြီး မဖြစ်စေခဲ့ပါဘူး။ 
ဒီလို ဂြိုဟ်သိမ်ကြီးတွေ ထိမှန်ရာကနေ ပြောင်းလဲမှုကြီးများ ဖြစ်ပေါ်မယ်လို့ ထင်ခဲ့ပေမယ့် ဘာမှပြောင်းလဲမှု မဖြစ်စေခဲ့ဘူးလို့ ဦးဆောင်သုတေသီ ဘရစ်ဂက်ဝိတ်ဒ်က ပြောပါတယ်။ 

▪️ ပင်လယ်ကြမ်းပြင်က ရှေးခေတ်သတ္တဝါများရဲ့ ရုပ်ကြွင်းများကို တွေ့ရှိခဲ့ကြပြီး အရွယ်အစားက ဆန်စေ့မျှသာရှိကာ မိုက်ခရိုစကုပ်ဖြင့် ကြည့်တဲ့အခါ မျိုးစိတ်အမျိုးမျိုး တွေ့ရပါတယ်။ 

▪️ ဒီလိုမျိုး ဂြိုဟ်မွှားတွေ ရိုက်ခတ်ခဲ့ပေမယ့် ကမ္ဘာ့ရာသီဥတု တည်မြဲနေတာကို အံ့အားသင့်ရတယ်လို့ ဆိုပါတယ်။ 

▪️ ဒါပေမဲ့ ရေရှည်ရာသီဥတုကိုသာ ကြည့်ခဲ့ကြတာဖြစ်ပြီး ရေတိုသက်ရောက်မှုအနေနဲ့ ပျက်စီးမှုများ ရှိနိုင်ပါတယ်။
 
▪️ လူ့သက်တမ်းအနေနဲ့ ကြည့်မယ်ဆိုရင်တော့ ဂြိုဟ်မွှားတစ်ခုခု ရိုက်ခတ်ခြင်းက ကပ်ဆိုးတစ်ခု ဖြစ်လာနိုင်ပါတယ်။ 

▪️ အဆိုပါ ဂြိုဟ်သိမ်တွေက ၅ မိုင်ခန့်သာ ကျယ်ဝန်းပေမယ့် ပေါက်ကွဲရာတွေက ကြီးမားလွန်းတာကြောင့် ဘယ်လောက်အထိ ပြင်းထန်သလဲဆိုတာ သိသာစေပါတယ်။ 

▪️ ဂြိုဟ်မွှားရိုက်ခတ်ခြင်းကြောင့် နေရောင်ကို ခဏတာ ပိတ်ကွယ်စေကာ တိမ်တွေမှာဖုန်မှုန့်တွေနဲ့ ပြည့်နှက်နေနိုင်ပါတယ်။ 

#Source: WION