ထိုင်းနိုင်ငံမှာပြုလုပ်မယ့် ၂၀၂၅ ဆီးဂိမ်းမှာ ဝင်ရောက်ယှဉ်ပြိုင်နိုင်ဖို့ ခရီးရှည် မြင်းစီးအားကစား အရည်အချင်းစစ်ပြိုင်ပွဲပြုလုပ်ခဲ့တယ်လို့ မြန်မာနိုင်ငံမြင်းစီးအားကစားအဖွဲ့ချုပ်က သိရပါတယ်။
#Local_News
Published 01 July 2024
#ခရီးရှည်မြင်းစီးအားကစား #မြင်းစီးအားကစားအဖွဲ့ချုပ်
#NN #Yangon_Times

ကမ္ဘာ့ရွှေဈေးအနည်းငယ်တက်လို့ ဇွန်လ (၂၉) ရက်အကယ်ဒမီ မီးလင်းရွှေစျေးကွက် အပိတ်ဈေးနှုန်းအဖြစ် 4,483,206 ရှိရာမှ ဇူလိုင်လ (၁) ရက် အဖွင့်ရွှေဈေး4,502,514 ဖြစ်သွားတယ်လို့ YGEA မှ သိရပါတယ်။
#Local_News
Published 01 July 2024
#ရွှေဈေးသောင်းဂဏန်းတက် #YGEA
#tthl #Yangon_Times

တောင်ပြုံးပွဲတော်ကို ဝါခေါင်လဆန်း(၈) ရက် ဩဂုတ်လ(၁၂)ရက်ကနေစလို့ (၁၅)ရက်တိုင်တိုင် ကျင်းပသွားမှာဖြစ်ပြီး ဘုရားဖူးတိုင်းရင်းသားပြည်သူတွေ၊ ရိုးရာဓလေ့ ကိုးကွယ်သူတွေ၊ ဈေးသူဈေးသားတွေ စည်ကားသိုက်မြိုက်စွာပါဝင်ဆင်နွှဲနိုင်တယ်လို့ သိရပါတယ်။
#Local_News
Published 01 July 2024
#'တောင်ပြုံးပွဲတော်ကြီး' #စည်ကားသိုက်မြိုက်စွာကျင်းပ
#tthl #Yangon_Times

#Local_News

Published 01 July 2024

▪️ ရိုးရာဝတ်စားဆင်ယင်ထုံးဖွဲ့မှုများကို မမေ့လျော့အောင် မြန်မာအမျိုးသမီးများနေ့အကြိုအဖြစ် ရန်ကုန်တိုင်း ဒေသကြီးတွင်  "ရိုးရာဆင်မြန်းတော်ဝင်ပန်း" ရိုးရာဝတ်စားဆင်ယင်ထုံးဖွဲ့မှုပြိုင်ပွဲ ကျင်းပပေးခဲ့ကြောင်း ရန်ကုန်တိုင်းဒေသကြီးအစိုးရအဖွဲ့မှ သိရသည်။

▪️ အဆိုပါ "ရိုးရာဆင်မြန်းတော်ဝင်ပန်း" ရိုးရာဝတ်စားဆင်ယင်ထုံးဖွဲ့မှုပြိုင်ပွဲကို ရန်ကုန်တိုင်းဒေသကြီး အမျိုးသမီးကော်မတီ၏ ကြီးကြပ်မှုဖြင့် တိုင်းဒေသကြီးအမျိုးသမီးရေးရာအဖွဲ့မှ ဦးဆောင်ကျင်းပခဲ့ခြင်းဖြစ်သည်။

▪️ ပြိုင်ပွဲဖွင့်ပွဲတွင် ရန်ကုန်တိုင်းဒေသကြီးဝန်ကြီးချုပ် ဦးစိုးသိန်းက အဖွင့်အမှာစကား ပြောကြားရာ "အမျိုးသမီးငယ်အများစုသည် မိမိတို့လူမျိုးအလိုက် ရိုးရာဝတ်စား ဆင်ယင်ထုံးဖွဲ့မှုများကို မေ့လျော့နေကြောင်း၊ ဒါကြောင့်အမျိုးသမီးများအနေဖြင့် မိမိတို့၏ ရိုးရာဝတ်စုံကို ဆင်မြန်းဝတ်ဆင်ထားခြင်းဖြင့် ကျက်သရေမင်္ဂလာရှိတယ်ဆိုတာကိုပေါ်လွင်သိရှိစေရန်အတွက် ယခုလိုပြိုင်ပွဲများကို ပြုလုပ်ပေးခြင်းဖြစ်ကြောင်း "ပြောကြားခဲ့သည်။

▪️ မြန်မာအမျိုးသမီးများနေ့အကြို ရိုးရာဆင်မြန်းတော်ဝင်ပန်း ရိုးရာဝတ်စား ဆင်ယင်ထုံးဖွဲ့မှု ပြိုင်ပွဲဖွင့်ပွဲ အခမ်းအနားကို ဇွန် (၂၉)ရက် နံနက်ပိုင်းက မရမ်းကုန်းမြို့နယ် မင်းဓမ္မလမ်းရှိ မြန်မာကွန်ဗင်းရှင်းစင်တာ(MCC) ခန်းမ၌ ကျင်းပခဲ့သည်။

▪️ ရှေးဦးစွာ တေးသံရှင် မထက်ဧကရီလွင်က ဗမာမလေးပါရှင့် အဖွင့်သီချင်း သီဆိုဖျော်ဖြေခဲ့သလို တိုင်းဒေသကြီး ဝန်ကြီးချုပ်နှင့်အဖွဲ့သည် ရိုးရာအဝတ်အထည်အရောင်းဆိုင်များ၊ ရိုးရာအစားအစာအရောင်းဆိုင်များနှင့် အမှတ်တရပစ္စည်းအရောင်းဆိုင်များသို့ လှည့်လည်ကြည့်ရှု ဝယ်ယူအားပေးကြသည်။

▪️ ၎င်းနောက် တိုင်းရင်းသူ(၈)ဦးက “စည်းလုံးစိုလေ သွေးချင်းတိုရဲ့မြေ” သီချင်းဖြင့် ဖျော်ဖြေကပြ တင်ဆက်ကြသည်။

▪️ ဆက်လက်၍ ကျောင်းသူ (၄၀)ဦးက ရိုးရာဝတ်စား ဆင်ယင်ထုံးဖွဲ့မှုများဖြင့် ပြိုင်ပွဲတွင်ယှဉ်ပြိုင်ကြပြီး နိုင်ငံကျော်အဆိုတော်များက တေးသီချင်းများဖြင့် သီဆိုဖျော်ဖြေ၍လည်းကောင်း၊ အမျိုးသားယဉ်ကျေးမှုနှင့် အနုပညာတက္ကသိုလ် (ရန်ကုန်)မှ ကျောင်းသူ (၁၄)ဦး က “လှမျိုးစုံကြွယ် ယဉ်တစ်ကိုယ်မယ်” “ခေတ်(၆)ခေတ်” ဝတ်စားဆင်ယင်ထုံးဖွဲ့မှု အလှပြအစီအစဉ်များဖြင့် လည်းကောင်း တင်ဆက်ကြသည်။

▪️ ထို့နောက် ရိုးရာဆင်မြန်း တော်ဝင်ပန်း ရိုးရာဝတ်စားဆင်ယင် ထုံးဖွဲ့မှုပြိုင်ပွဲ (၄၀) ဦးမှ (၁၀) ဦးအား ပဏာမရွေးချယ်ခဲ့ကြပြီး ၎င်း (၁၀) ဦးမှ (၅)ဦးအား ထပ်မံရွေးချယ်ကြပြီး နှစ်သိမ့်ဆုရရှိသူ(၅)ဦးအား စည်ပင်သာယာရေး ဝန်ကြီး (မြို့တော်ဝန်)၏ ဇနီးက ဆုများချီးမြှင့်သည်။

▪️ ယင်းနောက် ရွေးချယ်ထားသော (၅)ဦးအား ဒိုင်အဖွဲ့မှ ဗဟုသုတဉာဏ်စမ်း မေးခွန်းများမေးမြန်း၍ ပဉ္စမမှပထမရရှိကြသည့် ပြိုင်ပွဲဝင်များနှင့် ဖျော်ဖြေရေးအဖွဲ့များအား တိုင်းဒေသကြီး အမျိုးသမီးကော်မတီမှ တာဝန်ရှိသူများ၊ တိုင်းဒေသကြီး ဥပဒေချုပ်၊  တိုင်းဒေသကြီးအစိုးရအဖွဲ့ဝန်ကြီးများ၏ဇနီးများ၊ တိုင်းဒေသကြီး တရားလွှတ်တော် တရားသူကြီးချုပ်၊ တိုင်းစစ်ဌာနချုပ် တိုင်းမှူး၏ဇနီးနှင့် တိုင်းဒေသကြီး ဝန်ကြီးချုပ်၏ဇနီးတို့က ဆုများချီးမြှင့် ပေးအပ်ခဲ့‌ကြောင်း သိရသည်။

#tthl #Yangon_Times

#Local_News
Published 1 July 2024

▪️ ဒဂုံမြို့သစ်(အရှေ့ပိုင်း)၌ယနေ့တွင် ယာဉ်တိုက်မှုဖြစ်ပွားပြီး တစ်ဦးသေဆုံးခဲ့ကြောင်း မြန်မာနိုင်ငံမီးသတ်တပ်ဖွဲ့မှသိရသည်။

▪️ ဖြစ်စဉ်မှာ ဇူလိုင်၁ရက်နေ့၊ နေ့လယ် ၁၂ နာရီ၂၁ မိနစ် အချိန်ခန့်က ရန်ကုန်တိုင်းဒေသကြီး၊ ဒဂုံမြို့သစ်(အရှေ့ပိုင်း)မြို့နယ်၊ ဒဂုံမြို့သစ်(အရှေ့ပိုင်း)စက်မှုဇုန်၊ ဦးရွှေဘင်လမ်းတွင် ယာဉ်တိုက်မှုဖြစ်ပွားကြောင်း သတင်းရရှိသဖြင့် ဒဂုံမြို့သစ်(အရှေ့ပိုင်း)မြို့နယ်မီးသတ်စခန်းမှ မီးငြှိမ်းသတ်ယာဉ်(၁)စီးဖြင့် ရှာဖွေကယ်ဆယ်ရေးလုပ်ငန်းများ ထွက်ခွာဆောင်ရွက်ခဲ့ကြောင်း သိရသည်။

▪️ အဆိုပါဖြစ်စဉ်ကြောင့် ယာဉ်မောင်း ကျား(၁)ဦး(သေဆုံး)အား မီးအိမ်ရှင်ပရဟိတလူမှုကူညီရေးအသင်းယာဉ်ဖြင့် မြောက်ဥက္ကလာပပြည်သူ့ဆေးရုံကြီးသို့ ပို့ဆောင်ပေးခဲ့ကြောင်း သိရသည်။

#YMG/NN #Yangon_Times

#Local_News
Published_1 July 2024

▪️ ဧရာဝတီမြစ်နှင့် ချင်းတွင်းမြစ်ကမ်းဘေးတွင် နေထိုင်သည့်ပြည်သူများအနေဖြင့် ယခုရက်ပိုင်းအတွင်း မြစ်ရေကြီးမှုကို ကြိုတင်ကာကွယ်မှုများ လုပ်ဆောင်ထားရန်လိုအပ်ကြောင်း မိုးလေဝသနှင့် ဇလဗေဒညွှန်ကြားမှု ဦးစီးဌာနမှ ညွှန်ကြားရေးမှူးချုပ် ဦးကျော်မိုးဦးက သတိပေးပြောဆိုလိုက်သည်။

▪️ လက်ရှိကာလမှာ မုတ်သုံလေအားကောင်းနေပြီးမိုးများသည့် ကာလဖြစ်သည့်အတွက် ရေကြီးရေလျှံမှုများ ဖြစ်လေ့ဖြစ်ထရှိသည့် ကာလဖြစ်သည့်အပြင် ဧရာဝတီမြစ်အထက်ပိုင်းရှိ မြစ်ကြီးနားမြို့တွင် စိုးရိမ်ရေမှတ် ထက်ကျော်လွန်နေသည့်အတွက် ယင်းမြစ်ကြောင်းအောက်ဖက်တစ်လျှောက်ရှိ ပြည်သူများအနေဖြင့် မြစ်ရေ လျှံခြင်းကို ကြိုတင်ကာကွယ်ထားသင့်ကြာင်း သူကဆိုသည်။

▪️ "မြစ်ရဲ့အထက်ပိုင်းဖြစ်တဲ့ပူတာအိုမြို့မှာဆိုရင် စိုးရိမ်ရေမှတ်ထက် သုံးပေလောက်ကိုကျော်နေပြီ။ နောက်ပြီး နောက်ရက်တွေမှာလည်း အဲ့ဒီဒေသတွေမှာ မိုးကပိုနေနိုင်သေးတယ်။ အဲ့ဒီလိုမိုးပိုလာရင် မြစ်ရေတွေက အောက်ဘက်ကိုဆင်းလာမှာပဲ။ အဲ့ဒီလိုဆင်းလာရင် မြစ်ကြောင်းတစ်လျှာက်မှာရှိတဲ့ပြည်သူတွေအနေနဲ့ မြစ်ရေကြီးမှုဒဏ်ကို ခံရနိုင်တယ်။ နောက်ပြီးချင်းတွင်းမြစ်ဆိုရင်လည်း ခန္တီးမြို့မှာ စိုးရိမ်ရေမှတ်နားကိုကပ်နေပြီ။ ဒီတော့ နောက်ရက်မိုးပိုလာမှာနဲ့ဆိုရင် သူလည်းပဲ မြစ်ရေကြီးတာတွေဖြစ်လာနိုင်တယ်" ဟု ဦးကျာ်မိုးဦးက YMG ကို ရှင်းပြသည်။

▪️ တိုင်းတာတွက်ချက်ချက်များအရ လာမည့်ရက်များတွင်လည်း မြန်မာနိုင်ငံအထက်ပိုင်းဒေသများ၌မိုးပိုနေနိုင်ပြီး မြန်မာနိုင်ငံတောင်ပိုင်း(အောက်ပိုင်းဒသ)များတွင်မူ မိုးအနည်းငယ်လျော့နည်းနိုင်ကြောင်းနှင့် တောင်ကုန်း တောင် တန်းပေါများသည့်ဒေသများတွင် မြစ်ရေကြီးမှုနှင့်အတူ မြေပြိုမှု အန္တရာယ်ကိုပါ အထူးသတိပြုရန်လို အပ်ကြောင်း ၎င်းကထပ်လောင်း ပြာဆိုသည်။

▪️ ယခုအခါဧရာဝတီမြစ်ရေလျှံထက်မှုကြောင့် မြစ်ကြီးနားမြို့၏ ၇၅ရာခိုင်နှုန်းခန့်မှာ မြစ်ရေဖုံးလွှမ်းခံထားရပြီး ပြည်သူများအနေဖြင့်လည်း ဘေးလွတ်ရာသို့ ထွက်ပြေးခိုလှုံနေရပြီး အကူညီများလိုအပ်လျှက်ရှိကြောင်း ဒေသခံများထံမှသိရသည်။

▪️ မိုးလေဝသအခြေအနေလေ့လာသူတစ်ဦးဖြစ်သူ ဦးဝင်းနိုင်ကလည်း ပူတာအို၊ဆွန်ပရာဘွမ်၊ မြစ်ကြီးနား၊ ဖားကန့်၊ ကာမိုင်း၊ ဟိုပင်၊ ကသာ၊ ရွှေကူ၊ ဗန်းမော် ဒေသများတွင် ဂြိုဟ်တုပုံ+ရေဒါပုံရိပ်များအရ မိုးသည်း ထန်မည့်အခြေအနေများ ဆက်လက်ဖြစ်ပေါ်နေကြောင်းနှင့် ယင်းအခြေအနေ မှာ လာမည့် ၃ ရက်မှ ၄ ရက်အထိ ဆက်ရှိနေနိုင်သည့်အတွက် ပြည်သူများအနေဖြင့် အထူးသတိပြုကြစေလို ကြောင်း ၎င်း၏ လူမှုကွန်ယက်စာမျက်နှာတွင်သတိပေးပြောဆိုထားသည်။

မြစ်ကြီးနားမြို့ရေကြီးရေလျှံမှုကိုတွေ့ရစဉ်
Photo - Wati Zu fb
#Yangon_Yimes/TH

#Local_News
Published 1 July 2024

▪️ ပြည်တွင်းဆန်ဈေးကွက်တွင် သင့်တင့်မျှတသည့် ဈေးကွက်ဈေးနှုန်းထက်ပိုမို၍ ဈေးနှုန်းမြှင့်တင် ရောင်းဝယ်နေသူများအား  ဖော်ထုတ်အရေးယူထားကြောင်း'နစက'က ယမန်နေ့ညပိုင်းကသတင်းထုတ်ပြန်ထားသည်။ 

▪️ နိုင်ငံတော်အနေဖြင့် ပြည်တွင်းစီးပွားရေးတည်ငြိမ်စေရေးနှင့် ဖွံ့ဖြိုးတိုးတက်စေရေးအတွက် အဘက်ဘက်မှ ကြိုးပမ်းဆောင်ရွက်လျက်ရှိရာ အချို့လုပ်ငန်းရှင်များသည် စီးပွားရေးကမောက်ကမဖြစ်စေရန် ရည်ရွယ်ချက်ဖြင့် ပြည်တွင်းဆန်ဈေးကွက်အတွင်း ဆန်ဈေးနှုန်းများ အဆမတန် မြှင့်တင်ရောင်းဝယ်လျက် ရှိသောကြောင့် အများပြည်သူမှာ ဆန်ဝယ်ယူစားသုံးရန် အခက်အခဲများဖြစ်ပေါ်ပြီး ကြပ်တည်းမှုများ ကြုံတွေ့နေရကြောင်း သတင်းရရှိသည့်အတွက် နေပြည်တော်အပါအဝင် ပြည်နယ်နှင့်တိုင်းဒေသကြီးများ၏ မြို့ကြီးများရှိ ဆန်ဂိုဒေါင် ၁၀၂ လုံး၊ ဆန်စက် ၂၅ ခု၊ ဆိုင်ခန်း ၇ ခုတို့မှ ဆန်စပါးလုပ်ငန်းရှင် ၅၈ ဦးအား မြန်မာနိုင်ငံဆန်စပါး အသင်းချုပ်မှ လစဉ်ထုတ်ပြန်သည့် သင့်တင့်မျှတသောဈေးကွက်ဈေးနှုန်းထက်အမြတ်အစွန်း ပိုမိုရယူကာ ရောင်းချမှုရှိ/မရှိအား လုံခြုံရေး အဖွဲ့အစည်းများက ဖော်ထုတ်စစ်ဆေးခဲ့ကြောင်း သိရသည်။

▪️ အဆိုပါ  စစ်ဆေးတွေ့ရှိချက်များအရ မြန်မာနိုင်ငံဆန်စပါးအသင်းချုပ်မှ လစဉ်ထုတ်ပြန် သည့် သင့်တင့်မျှတသော ဈေးကွက်ဈေးနှုန်းထက် ၁၀ ရာခိုင်နှုန်းအထိ အမြတ်အစွန်းပိုမို ရယူကာရောင်းချခဲ့သည့် ဆန်စပါးလုပ်ငန်းရှင် ၂၇ ဦး၊ သတ်မှတ်ဈေးနှုန်းထက် ၁၁ ရာခိုင်နှုန်းမှ ၃၀ ရာခိုင်နှုန်းအထိ ပိုမိုအမြတ်တင်ရောင်းချခဲ့သည့် ဆန်စပါးလုပ်ငန်းရှင် ၂၄ ဦး၊ သတ်မှတ်ဈေးနှုန်းထက် ၃၁ ရာခိုင်နှုန်းမှ ၇၀ ရာခိုင်နှုန်းအထိပိုမို၍ အကျိုးအမြတ်များစွာ ရယူရောင်းချခဲ့သည့် ဆန်စပါးလုပ်ငန်းရှင် ၇ ဦးရှိကြောင်း စိစစ်တွေ့ရှိရကြောင်း၊ ထို့ကြောင့် သတ်မှတ်ဈေးနှုန်းထက် ၁၁ ရာခိုင်နှုန်းမှ ၃၀ ရာခိုင်နှုန်းအထိ ပိုမို အမြတ်တင်ရောင်းချခဲ့သည့် ဆန်စပါးလုပ်ငန်းရှင် ၂၄ ဦးကို ၎င်းတို့ရရှိခဲ့သည့် အကျိုးအမြတ် များအပေါ် ဒဏ်ကြေးနှင့်အခွန် ထပ်မံစည်းကြပ်သွားမည်ဖြစ်ကြောင်း၊ သတ်မှတ်ဈေးနှုန်းထက် ၃၁ ရာခိုင်နှုန်းမှ ၇၀ ရာခိုင်နှုန်းအထိ ပိုမို၍ အကျိုးအမြတ်များစွာ ရယူရောင်းချခဲ့သည့် အောက်ပါဆန်စပါး လုပ်ငန်းရှင် ၇ ဦးကို ၂၀၁၂ ခုနှစ်၊ အရေးကြီး ကုန်စည်နှင့် ဝန်ဆောင်မှု ဥပဒေပုဒ်မ-၅ အရ အရေးယူ ဆောင်ရွက်သွားမည်ဖြစ်ကြောင်း သိရသည်။

▪️ အလားတူ နေပြည်တော်အပါအဝင် ပြည်နယ်နှင့်တိုင်းဒေသကြီးများ၏ မြို့ကြီး များရှိ ဈေးဝယ်စင်တာနှင့်စတိုးဆိုင်ကြီးများတွင် အလေးချိန်အမျိုးမျိုးဖြင့် အသင့်ထုပ်ပိုး ထားသည့်ဆန်အိတ်များ(Consumer Package)ကို မြန်မာနိုင်ငံဆန်စပါးအသင်းချုပ်မှ လစဉ်ထုတ်ပြန်သည့် သင့်တင့်မျှတသော ဈေးကွက်ဈေးနှုန်းထက် ပိုမိုအမြတ်တင်ရောင်းချ လျက်ရှိကြောင်း သိရှိရသည့်အတွက် ဈေးဝယ်စင်တာနှင့် စတိုးဆိုင်ကြီး ၅၃ ဆိုင်၏ ဆန်ရောင်းဝယ်မှုအခြေအနေများအား လုံခြုံရေး အဖွဲ့အစည်းများက ဝင်ရောက်စစ်ဆေးခဲ့ပြီး တာဝန်ရှိသူများကို ထိန်းသိမ်း စစ်ဆေးခဲ့ကြောင်း သိရသည်။

▪️ အဆိုပါ  စစ်ဆေးတွေ့ရှိချက်များအရ အထက်ပါ ဈေးဝယ်စင်တာနှင့်စတိုးဆိုင်ကြီးများသည် အလေးချိန်အမျိုးမျိုးဖြင့် အသင့်ထုပ်ပိုးထားသည့် ဆန်အိတ်များ (Consumer Package)ကို မြန်မာနိုင်ငံဆန်စပါး အသင်းချုပ်မှလစဉ်ထုတ်ပြန်သည့် သင့်တင့်မျှတသော ဈေးကွက်ဈေးနှုန်းထက် ၂၀ ရာခိုင်နှုန်းအထိ အမြတ်အစွန်းပိုမိုရယူကာ ရောင်းချလျက် ရှိသည့် စတိုးဆိုင် ၁ ဆိုင်၊ ၂၁ ရာခိုင်နှုန်းမှ ၅၀ ရာခိုင်နှုန်းအထိ ပိုမိုအမြတ်တင်ရောင်းချလျက်ရှိသည့် ဈေးဝယ်စင်တာနှင့်စတိုးဆိုင် ၃၀ ဆိုင်၊ ၅၁ ရာခိုင်နှုန်းမှ ၇၀ ရာခိုင်နှုန်းအထိ ပိုမိုအမြတ်တင်ရောင်းချလျက်ရှိသည့် ဈေးဝယ်စင်တာ ၂၂ ဆိုင်ရှိကြောင်း၊ ထို့အပြင် ဈေးဝယ်စင်တာနှင့် စတိုးဆိုင်အချို့မှာ ၎င်းတို့၏ ကုမ္ပဏီဝန်ထမ်းစရိတ်၊ အရောင်းမြှင့်တင် ရေးစရိတ်များကိုပါ အကျိုးအမြတ်ရယူရောင်းချသည့်နှုန်းများတွင် မလိုလားအပ်ဘဲ ထည့်သွင်းတွက်ချက် ရောင်းဝယ်လျက်ရှိကြောင်း စိစစ်တွေ့ရှိရကြောင်း ၊ စစ်ဆေးတွေ့ရှိရသည့်ဆိုင်များအနက် သတ်မှတ်ဈေးနှုန်းထက် ၂၁ ရာခိုင်နှုန်းမှ ၅၀ ရာခိုင်နှုန်းအထိ ပိုမိုအမြတ်တင်ရောင်းချခဲ့သည့် ဈေးဝယ်စင်တာနှင့်စတိုးဆိုင် ၃၀ ဆိုင်ကို ၎င်းတို့ရရှိခဲ့သည့် အကျိုးအမြတ်များအပေါ် ဒဏ်ကြေးနှင့် အခွန်ထပ်မံ စည်းကြပ်သွားမည်ဖြစ်ကြောင်း၊ သတ်မှတ်ဈေးနှုန်းထက် ၅၁ ရာခိုင်နှုန်းမှ ၇၀ ရာခိုင်နှုန်း အထိပိုမို၍အကျိုးအမြတ်များစွာ ရယူရောင်းချခဲ့သည့် ဈေးဝယ်စင်တာ ၂၂ ဆိုင်မှ အောက်ပါ တာဝန်ရှိသူ ၄ ဦးကို ၂၀၁၂ ခုနှစ်၊ အရေးကြီးကုန်စည်နှင့် ဝန်ဆောင်မှု ဥပဒေပုဒ်မ-၅ အရ အရေးယူဆောင်ရွက်သွားမည်ဖြစ်ကြောင်း သိရသည်။

▪️ ထိုသို့ ဆန်ဈေးနှုန်းများ မြှင့်တင်ရောင်းချမှုများကြောင့် အခြေခံပြည်သူများမှာ ဆန်ဈေးနှုန်းမြင့်မားစွာဖြင့် ဝယ်ယူစားသုံးရလျက်ရှိသည့်အပြင် နိုင်ငံတော်၏စီးပွားရေး ဈေးကွက်တည်ငြိမ်မှုကိုလည်း အနှောင့်အယှက်ဖြစ်စေခဲ့သဖြင့် ၎င်းတို့အား ဥပဒေနှင့် အညီထိရောက်စွာအရေးယူဆောင်ရွက်သွားမည်ဖြစ်ကြောင်း အသိပေးသတင်း ထုတ်ပြန်အပ်ကြောင်း ဖော်ပြပါရှိသည်။

#YMG/ NN #Yangon_Times

#Local_News
Published 1 July 2024

▪️ရန်ကုန်မြို့သင်္ဃကျွန်းမြို့နယ်၊ သုဝဏ္ဏ၊ဇေယျာသုခလမ်း၌ ယမန်နေ့နေ့လယ်က  ဖြိုချလက်စတိုက် ပြိုကျပြီးအမျိုးသားသုံးဦးထိခိုက်ခဲ့ကြောင်း ပရဟိတအသင်းများထံမှ သိရသည်။

▪️ ဖြစ်စဉ်မှာ သင်္ဃကျွန်းမြို့နယ်၊ သုဝဏ္ဏ၊ ဇေယျာသုခလမ်း၌ ယမန်နေ့ နေ့လယ် ၁၂နာရီအချိန်က နှစ်ထပ်တိုက်ဖြိုချနေချိန် ပြိုကျခဲ့၍ အဆောက်အဦးပျက်များကြား လူပိတ်မိခြင််းများဖြစ်ပွားခဲ့ကြောင်း သိရသည်။

▪️ ထို့ကြောင့် MNRO - မေတ္တာညွန့် လူမှုကူညီကယ်ဆယ်ရေးအဖွဲ့မှ  မီးသတ်အထောက်အကူပြုယာဉ်တစ်စီး၊ လူနာတင်ယာဉ်တစ်စီးများဖြင့် ကူညီမှုများ ပေးအပ်ခဲ့ကြောင်း၊ အဆိုပါဖြစ်စဉ်ကြောင့် ဒဏ်ရာရလူနာသုံးဦးရှိခဲ့ပြီး ၎င်းတို့အား ပရဟိတအသင်းများမှ  စံပြဆေးရုံကြီးသို့  ကူညီပို့ဆောင်ပေးခဲ့ကြောင်း သိရသည်။

#YMG/NN #Yangon_Times

#Local_News
Published_1 July 2024

▪️ ရန်ကုန်တိုင်းဒေသကြီး၊ ရန်ကုန်မြို့မှ စစ်ကိုင်းတိုင်းဒေသကြီး၊ မုံရွာမြို့သို့ မောင်းနှင်ထွက်ခွာလာသည့် ခရီးသည်တင်ယာဉ်များ တိုက်ခိုက်ခံရသောကြောင့် ခရီးသည်အမျိုးသမီးတစ်ဦးသေဆုံးခဲ့ကာ သံဃာတော်တစ်ပါး၊ အမျိုးသား ၁၃ ဦး၊ အမျိုးသမီး ၁၀ ဦး ထိခိုက်ဒဏ်ရာရ ရှိခဲ့ကြောင်း သိရသည်။

▪️ ဇွန်လ ၃၀ ရက် နံနက်ပိုင်းက ချောင်းဦးမြို့နယ်၊ ငါးယှန်ကျေးရွာအနီးတွင် PDF များက လက်လုပ်မိုင်းများဖြင့် ဖောက်ခွဲတိုက်ခိုက်ပြီး လက်နက်ငယ်များဖြင့် ပစ်ခတ်တိုက်ခိုက်ခဲ့ခြင်းဖြစ်ကြောင်း နစက သတင်းထုတ်ပြန်ရေး အဖွဲ့က ထုတ်ပြန်ထားသည်။

▪️ ရန်ကုန်မှထွက်လာသော ရွှေစင်စင်္ကြာ၊ စိန်ဌေးလှိုင်၊ နယူးစွမ်း ၊ FAMOUS ခရီးသည်တင်ယာဉ် ၃ စီး၊ ရွှေမန္တလာနှင့် ရွှေသလ္လာ စုစုပေါင်း ခရီးသည်တင်ယာဉ် ၈ စီးမှာ ဇွန်လ ၃၀ ရက် နံနက် ၈ နာရီခွဲခန့်အချိန်က ချောင်းဦး မြို့နယ်၊ ငါးယှန်ကျေးရွာအနီး ဖြတ်ကျော်စဉ် အထက်ပါအတိုင်း တိုက်ခိုက်ခံခဲ့ရခြင်းဖြစ်ကြောင်း သိရသည်။

▪️ အခင်းဖြစ်ပွားရာနေရာသို့ မုံရွာမြို့နှင့် ချောင်းဦးမြို့မှလုံခြုံရေးတပ်ဖွဲ့ဝင်များ သွားရောက်ခဲ့ရာ ငါးယှန်ကျေးရွာ ၏အရှေ့ဘက် မီတာ ၂၀၀၀ ခန့်အကွာ မန္တလေး-မုံရွာ လမ်းမကြီးပေါ်၌ အသင့်စောင့်ဆိုင်းနေရာယူထားသည့် PDF များနှင့် ထိတွေ့မှုဖြစ်ပွားခဲ့သေးကြောင်း သိရသည်။

▪️ ထိတွေ့မှု ဖြစ်ပွားပြီးနောက် ခရီးသည်တင်ယာဉ်များ ပစ်ခတ်တိုက်ခိုက်ခံရသည့်ပတ်ဝန်းကျင်နေရာ တစ်ဝိုက် ကိုနယ်မြေခံလုံခြုံရေးတပ်ဖွဲ့ဝင်များကအမြန်ဆုံးသွားရောက်စစ်ဆေးခဲ့ရာတွင် မပေါက်ကွဲသေးသည့် လက်လုပ် မိုင်းမျိုးစုံ အလုံး ၃၀ သိမ်းဆည်းရမိခဲ့ပြီး ထိခိုက်ဒဏ်ရာရရှိခဲ့သည့်ခရီးသွားပြည် သူများအား ပြည်သူ့ ဆေးရုံသို့ ပို့ဆောင်၍ ဆေးကုသမှုခံယူနိုင်ရေးဆောင်ရွက်ပေးခဲ့ကြောင်း သိရသည်။

#Yangon_Times/PP

၁ ဇူလိုင် ၂၀၂၄
ဇွန်၃၀ရက် တနင်္ဂနွေနေ့က တောင်ကိုရီးယားနိုင်ငံ ဂျေဂျူးမှာ မိုးသည်ထန်ပြီးလေပြင်းများ တိုက်ခိုက်တဲ့ အတွက် လေယာဉ်နှင့် သင်္ဘောခရီးစဉ်အချို့ကိုဖျက်သိမ်းခဲ့ရပါတယ်။
Source CCTV+

#Local_News
Published 01 July 2024

▪️ ဧရာဝတီမြစ်ရေမြင့်တက်လာပြီး မြစ်ကြီးနားရှိရပ်ကွက်အချို့ထဲရေဝင်နေ၍ ကူညီကယ်ဆယ်ရေးများ ဆောင်ရွက်ပေးနေရကြောင်း  မြန်မာနိုင်ငံမီးသတ်တပ်ဖွဲ့မှ သိရသည်။

▪️ ဇွန်လ(၃၀)ရက်တွင် ၀၈ ၀၀ အချိန်ခန့်၊ ကချင်ပြည်နယ်၊ မြစ်ကြီးနားမြို့နယ်တွင် ဧရာဝတီမြစ်ရေ မြင့်တက်မှုကြောင့် လယ်ကုန်း၊ ကြက်ပေါင်ခြံ၊ ရမ်ပူရပ်ကွက်များတွင် ရေများဝင်ရောက်မှုဖြစ်ပွားခဲ့သည်ဟု ဆိုသည်။

▪️ အဆိုပါရေကြီးခြင်း ရေဝင်ရောက်ခြင်းကိုမြစ်ကြီးနားမြို့နယ် မီးသတ်စခန်းမှ သန္ဓေမီးသတ်တပ်ဖွဲ့ဝင်များနှင့် အရန်မီးသတ်တပ်ဖွဲ့ဝင်များဖြင့် ရှာဖွေကယ်ဆယ်ရေးလုပ်ငန်းများ ဆောင်ရွက်လျက်ရှိကြောင်း မြန်မာနိုင်ငံမီးသတ်တပ်ဖွဲ့မှဖော်ပြထားသည်။

▪️ မိုးသည်းထန်စွာရွာသွန်းတဲ့အတွက် မြစ်ရေများတိုးပြီးဇူလိုင်လတွင် ဧရာဝတီမြစ်၊ ချင်းတွင်းမြစ်၊ မြစ်သာမြစ်၊ ပဲခူးမြစ်၊ တိုးမြစ်၊ သံလွင်မြစ်၊ သောင်ရင်းမြစ်၊ ဒုဌဝတီမြစ်၊ လေးမြို့မြစ်၊ ရွှေကျင်မြစ်၊ ဘီးလင်းမြစ်စတဲ့ မြစ်များသည် စိုးရိမ်ရေအမှတ်အထက်ရောက်ရှိလာဖို့ရှိကြောင်း မိုးလေဝသနှင့်ဇလဗေဒညွှန်ကြားမှုဦးစီးဌာနမှ သတိပေးဖော်ပြထားသည်။

▪️ ဇူလိုင်လအတွင်းမြစ်ရေများတိုးပြီး စိုးရိမ်ရေအမှတ်အထက်ကျော်လွန်ရောက်ရှိနိုင်တဲ့အတွက်  မြစ်နားကမ်းနားနေထိုင်သူများ၊ မြေနိမ့်ပိုင်းနေထိုင်သူများအ‌နေဖြင့် အထူးသတိပြုနေထိုင်ကြရန်လိုအပ်ကြောင်း သိရသည်။

#tthl #Yangon_Times

#World_News
Published 01 July 2024

▪️ အမေရိကန်သမ္မတ မဲပေးပွဲမှာ ရီပတ်ဘလစ်ကန် ကိုယ်စားလှယ်လောင်းအဖြစ် ယှဉ်ပြိုင်မယ့် ဒေါ်နယ်ထရမ့်ဟာ ၂၀၂၄ အမေရိကန် ရွေးကောက်ပွဲစည်းရုံးရေး အလုပ်များနဲ့ အလုပ်ရှုပ်နေပါတယ်။

▪️ အကယ်၍ ဒေါ်နယ်ထရမ့်သာ သမ္မတဖြစ်လာမယ်ဆိုရင် သူ့ဇနီးဖြစ်သူ မယ်လာနီယာထရမ့်နဲ့ သိပ်ပြီး မြင်တွေ့ရဖွယ် မရှိပါဘူး။

▪️ မယ်လာနီယာဟာ အသက် ၇၈ နှစ်ရှိ သမ္မတဟောင်းနဲ့ အပေးအယူတစ်ခု ပြုလုပ်ခဲ့တယ်လို့ Page Six သတင်းဌာနက ဖော်ပြလိုက်ပါတယ်။

▪️ ဒေါ်နယ်ထရမ့်သာ သမ္မတဖြစ်သွားရင် မယ်လာနီယာဟာ သမ္မတကတော်အဖြစ် ၂၄ နာရီတစ်ပတ်လုံး ရှိနေနိုင်မှာမဟုတ်ဘူးဆိုတဲ့ အပေးအယူ ပြုလုပ်ခဲ့တယ်လို့ အဆိုပါ သတင်းရင်းမြစ်မှာ ဖော်ပြထားပါတယ်။

▪️ သမ္မကတော်ဟောင်းဟာ သားဖြစ်သူ ဘာရွန်ထရမ့်အတွက် အချိန်ပိုပေးချင်တဲ့အတွက် ဒီလိုအပေးအယူ လုပ်ခဲ့တာလို့လည်း ဖော်ပြထားပါတယ်။

▪️ အသက် ၁၈ နှစ်ရှိ ဘာရွန်ထရမ့်ဟာ နယူးယော့ခ်စီးတီးရှိ တက္ကသိုလ်တစ်ခုသို့ ပြောင်းရွှေ့တော့မှာဖြစ်ပြီး မယ်လာနီယာက သူ့သားဘဝသစ်စနိုင်အောင် ကူညီထောက်ပံ့ပေးချင်တာ ဖြစ်ပါတယ်။

▪️ သူမဟာ ကိုယ်တိုင်ပြုစုပေးချင်တဲ့ မိခင်ဖြစ်ပြီး နယူးယော့ခ်စီးတီးမှာ လတိုင်းအပတ်တိုင်း အချိန်အတော်များများ ရှိနေဖို့ အစီအစဉ် ဆွဲပြီးသားဖြစ်နေပါပြီ။

▪️ "ဘာရွန်ဟာ သူ့ဘာသာ ဘယ်တုန်းကမှ မနေခဲ့ဖူးကြောင်း၊ ကောလိပ်မှာ ကျောင်းသားသစ် ဖြစ်နေတဲ့အပြင် သမ္မတဖြစ်လာနိုင်သူ တစ်ယောက်ရဲ့ သားအဖြစ် ဖိအားတွေရှိနေကြောင်း၊ သူ့အဖေသာ သမ္မတဖြစ်လာရင် ကျောင်းမှာတုန့်ပြန်မှုတွေ ဖြစ်ပေါ်လာနိုင်တဲ့အပေါ် မယ်လာနီယာက စိုးရိမ်နေကြောင်း သတင်းမှာ ဖော်ပြထားပါတယ်။

▪️ မယ်လာနီယာဟာ အလွန်ကာကွယ်ပေးတတ်တဲ့ မိခင်တစ်ဦးဖြစ်ပြီး ဘာရွန်ဟာ ဖလော်ရီဒါကနေ ရီပတ်ဘလစ်ကန် ကိုယ်စားလှယ်အဖြစ် ဝင်ရောက်နိုင်မယ်ဆိုတဲ့ အကြောင်းအရာကိုလည်း ငြင်းဆန်ခဲ့ပါတယ်။

▪️ ဒေါ်နယ်ထရမ့်နဲ့ ဂျိုးဘိုင်ဒင်တို့ဟာ နိုဝင်ဘာ ၅ ရက်နေ့ ရွေးကောက်ပွဲမတိုင်ခင်မှာ မဲရရှိမှုအခြေအနေသူမသာကိုယ်မသာ ဖြစ်နပေါတယ်။

#Source: NDTV