#Local_News
Published 02 July 2024

▪️ စမ်းချောင်းမြို့နယ်ရှိ ဗဟိုလမ်းမကြီးနှင့်ကျွန်းတောလမ်းကို ယခင်တစ်လမ်းမောင်းလမ်းအဖြစ်သတ်မှတ်ထားရာမှ ဇူလိုင်(၂)ရက်မှစ၍ နှစ်လမ်းမောင်းအဖြစ်သတ်မှတ်လိုက်ကြောင်း စမ်းချောင်းမြို့နယ်မီးသတ်တပ်ဖွဲ့ဝင်ထံမှ သိရသည်။

▪️ "ဗဟိုလမ်းမကြီးနှင့်ကျွန်းတောလမ်းရော နှစ်လမ်းလုံးကို နှစ်လမ်းမောင်းအဖြစ်သတ်မှတ်လိုက်ပြီ။ ဇူလိုင်(၂)ရက် ဒီမနက် ၁၀နာရီခွဲ‌ ၁၂နာရီလောက်မှာပဲ ယာဉ်မောင်းတွေလည်းသိပြီး ကား‌တွေသွားနေကြပြီ။ နှစ်လမ်းမောင်းလို့ရပြီဆိုတာကို ကြေညာထားပြီးအားလုံးလည်း သိနေကြပြီ "ဟု စမ်းချောင်းအရန် မီးသတ်တပ်ဖွဲ့မှ တာဝန်ရှိသူတစ်ဦးက ပြောသည်။

▪️ ရန်ကုန်တိုင်းဒေသကြီး၊ စမ်းချောင်းမြို့နယ်ကျွန်းတောလမ်းမကြီးအား (ဟံသာဝတီလမ်းထိပ်မှ ဗားကရာလမ်းထိပ်ထိ) ဗဟိုလမ်းမကြီးအား (ဗားကရာလမ်းထိပ်မှဟံသာဝတီလမ်းထိပ်ထိ)ယခင်က တလမ်းမောင်း သတ်မှတ်ထားရာမှအဆိုပါလမ်းမကြီး၂ခုလုံးအား  ယခုနံနက်မှစ၍ ၂လမ်းမောင်းအဖြစ် ပြန်လည်သတ်မှတ်လိုက်ပြီဖြစ်ကြောင်းစမ်းချောင်း မြို့နယ်မီးသတ်တပ်ဖွဲ့ဝင် ရဲသူရိန်မှ ယာဥ်မောင်းသူများ သိရှိနိုင်ပါရန်တင်ပြပေးထားသည်။

▪️ ယင်းအပြင် ကျွန်တောလမ်ကိုနှစ်လမ်းမောင်းအဖြစ် ပြောင်းလဲသတ်မှတ်လိုက်ပြီဖြစ်ကြောင်း ဟံသာဝတီဘက်မှ ဝင်လာနိုင်သလို ဗားကရာ ဘက်ကဝင်လာလို့လည်းရကြောင်း စမ်းချောင်းမြို့နယ်ရှိ Felix ( Car Audio )ဆိုင်၏ ဖော်ပြချက်အရ သိရသည်။

#tthl #Yangon_Times

#Local_News
Published 02 July 2024

▪️ ယခုဘဏ္ဍာနှစ် သုံးလနီးပါးတာကာလအတွင်း ပြည်ပကုန်သွယ်မှုမှ  ကန်ဒေါ်လာခြောက်ဘီယံကျော်ရရှိထားကြောင်း စီးပွားရေးနှင့် ကူးသန်းရောင်းဝယ်ရေးဝန်ကြီးဌာနမှ သိရသည်။

▪️ ယခု ၂၀၂၄-၂၀၂၅ ဘဏ္ဍာနှစ်၊ ဧပြီ ၁ ရက်မှဇွန် ၂၁ ရက်အထိ မြန်မာနိုင်ငံ၏ ပြည်ပကုန်သွယ်မှုဒေါ်လာ ၆ ဒသမ ၂၂၃ ဘီလျံရရှိခဲ့ကြောင်း သိရသည်။

▪️ ပြည်ပကုန်သွယ် မှုများမှယခင်နှစ်ကာလတူတွင် ကန်ဒေါ်လာ ၇ ဒသမ ၇၁၇ ဘီလျံအထိရှိခဲ့သည့်အတွက် ယခုဘဏ္ဍာနှစ် သုံးလအတွင်း ပြည်ပကုန်သွယ်မှု ယခင်နှစ်ကာလထက် ဒေါ်လာ ၁ ဒသမ ၄၉၃ ဘီလျံ လျော့ကျနေခြင်းဖြစ်ကြောင်း သိရသည်။

▪️ မြန်မာနိုင်ငံသည် ပြည်ပနိုင်ငံများသို့ပင်လယ်ရေကြောင်းအပြင်  နယ်စပ်ကုန်သွယ်မှုများမှပါ ကုန်သွယ်လေ့ရှိကြောင်း သိရသည်။

▪️ ထိုသို့နယ်စပ်များမှကုန်သွယ်ရာတွင်  အိမ်နီးချင်းနိုင်ငံများဖြစ်သည့် တရုတ်၊ ထိုင်း၊ အိန္ဒိယ၊ ဘင်္ဂလာဒေ့ရှ်နှင့် လာအိုနိုင်ငံတို့ဖြင့် ကုန်သွယ်ရေးစခန်း ၁၅ ခုဖွင့်လှစ် ဆောင်ရွက်နေခြင်းဖြစ်ကာ ယင်းအနက် တရုတ်နယ်စပ်နှင့် ထိုင်းနယ်စပ်တို့တွင် ကုန်သွယ်ရေးစခန်း ၁၁ ခုထိဖွင့်လှစ်ကာ အဓိက ဆောင်ရွက်နေခြင်းဖြစ်ကြောင်း သိရသည်။

▪️ ပြီးခဲ့သည့်နှစ်မှစတင်၍ နယ်မြေအခြေအနေများကြောင့် နယ်စပ်ကုန်သွယ်ရေးများလျော့နည်းလာခြင်းဖြစ်ကြောင်း ကုန်သည်များထံမှ သိရသည်။

#YMG/NN #Yangon_Times

#Local_News
Published 2 July 2024

▪️ တောင်ကိုရီးယားနိုင်ငံသို့အလုပ်သွားရောက်လုပ်ကိုင်ရန်  EPS-TOPIK ဖြေဆိုအောင်မြင်ပြီးသူများကို Skills Test စစ်ဆေးခြင်းယခုလအတွင်း၌ ပြုလုပ်သွားမည်ဖြစ်ကြောင်း အစိုးရပြည်ပအလုပ်အကိုင်အေဂျင်စီမှ သိရသည်။

▪️ ၂၀၂၄ခုနှစ်အတွင်း ၁၆ကြိမ်မြောက် ကိုရီးယားအရည်အချင်းစစ် EPS-TOPIK စာမေးပွဲ (ဆောက်လုပ်ရေးလုပ်ငန်း၊ စိုက်ပျိုးရေးနှင့်မွေးမြူရေးလုပ်ငန်း၊ ဝန်ဆောင်မှုလုပ်ငန်း အုပ်စု၂ )ဖြေဆိုအောင်မြင်ပြီးသူများအတွက် အခြေခံကျွမ်းကျင်မှုစစ်ဆေးခြင်း Skills Test ဖြေဆိုမည့်နေ့ရက်များမှာ ဇူလိုင်၂၈ ရက်မှ ဩဂုတ် ၁ ရက်နေ့အထိဖြစ်ကြောင်းသိရသည်။

▪️ ထို့အပြင်  Skills Test ဖြေဆိုရမည့် အချိန်၊ နေရာများနှင့်  ဝန်ဆောင်မှုလုပ်ငန်းအုပ်စု၁၏ ဖြေဆိုရမည့် နေ့ရက်၊အချိန်၊ နေရာများကိုလည်း ဆက်လက်ကြေညာပေးသွားမည်ဖြစ်ကြောင်း သိရသည်။

#YMG/NN #Yangon-Times

#Local_News
Published_ 2 July 2024

▪️ ဘရာဇီးနိုင်ငံဆိုင်ရာ မြန်မာသံအမတ်ကြီး ဦးအောင်ကျော်ဇံသည် ဇူလိုင်(၂၈)ရက် တွင် ကိုယ်ခံအားမြှင့်ဇီဝကမ္မဆေးဝါးများထုတ်လုပ်မှု၌ အထင်ကရ ဆေးသုတေသန ဌာနဖြစ်သည့် Butantan Institute သို့သွားရောက်ခဲ့ပြီး မြန်မာနိုင်ငံ၌ မြွေဆိပ်ဖြေဆေး ထုတ်လုပ်ရာ၌အသုံးပြုသော နည်းပညာများ မြှင့်တင်ရေး စီမံကိန်းသဘော တူညီချက်အရ မြန်မာကျွမ်းကျင်ပညာရှင်များ မကြာမီလာရောက်မည့်ကိစ္စနှင့် မြွေဆိပ်ဖြေဆေးနှင့် ပတ်သက်၍ ပူးပေါင်းဆောင်ရွက်မှုများကို ဆွေးနွေးခဲ့ကြောင်း သိရပါတယ်။

▪️ ထို့ပြင် Butantan Institute နှင့် အခြားဆေးသုတေသနနယ်ပယ်များ၌ ပူးပေါင်းဆောင်ရွက်နိုင်မည့်နည်းလမ်းများကို ဇွန်(၂၆)ရက်မှ(၂၈)ရက်အထိ ဆောင်ပါလိုမြို့သို့ (၃) ရက်ကြာသွားရောက်ခဲ့တဲ့ အလုပ်သဘောခရီးစဉ် သွားရောက်ခဲ့စဉ် ဆွေးနွေးခဲ့တာ ဖြစ်ပါတယ်။

▪️ ဇွန် (၂၆)ရက်တွင် ဆောင်ပါလိုမြို့ရှိ ဆောင်ပါလို ကုန်သည်ကြီးများအသင်း (ACSP) အဆောက်အဦ၌ ACSP ဥက္ကဋ္ဌ Mr. Roberto Mateus Ordine နှင့် တွေ့ဆုံ၍ မြန်မာနှင့် ဘရာဇီးတို့မှ စီးပွားရေး လုပ်ငန်းရှင်များအကြား စီးပွားရေးနှင့် သတင်းအချက်အလက်များ ဖလှယ်နိုင်ရေး၊ ရင်းနှီးမြှုပ်နှံမှု လုပ်ငန်းများ ပူးပေါင်းဆောင်ရွက်မှုများ တိုးမြှင့်နိုင်ရေး အတွက် B2B ပုံစံဖြင့် အွန်လိုင်းဆွေးနွေးပွဲ ကျင်းပနိုင်ရေးကိုလည်း ဆွေနွေခဲ့ကြပါတယ်။

▪️ မြန်မာနိုင်ငံကုန်သည်များနှင့် စက်မှုလက်မှုလုပ်ငန်းရှင်များ အသင်းချုပ် (UMFCCI) နှင့် ဆောင်ပါလိုကုန်သည်ကြီးများအသင်း (ACSP) တို့အကြား လက်မှတ်ရေးထိုးထားပြီး ဖြစ်သည့် နားလည်မှုစာချွန်လွှာပါ သတ်မှတ်ချက်များနှင့်အညီ လက်တွေ့ကျကျ အကောင်အထည် ဖော်နိုင်ရေးကိုလည်း ဆွေးနွေးခဲ့ကြောင်း သိရပါတယ်။

▪️ ဇွန်(၂၇)ရက်တွင် သံအမတ်ကြီးသည် ဘရာဇီး စိုက်ပျိုးရေးဆိုင်ရာ အထင်ကရအကြံပေးအဖွဲ့အစည်း (DATAGRO) ၏ ဖိတ်ကြားချက်အရ Global Agribusiness Forum နှင့် Global Agribusiness Festival တို့သို့ ဘရာဇီးလျားမြို့အခြေစိုက် ဥရုဂွေး၊ ကင်ညာ၊ ဆူရီနမ်၊ ဘော့ဆွာနာ သံအမတ်ကြီးများနှင့်အတူ တက်ရောက်ခဲ့ပါတယ်။

▪️ အဆိုပါဖိုရမ်တွင် စိုက်ပျိုးရေးဆိုင်ရာ စီးပွားရေးဥပဒေများ၊ နည်းပညာများနှင့် ကမ္ဘာ့ဈေးကွက် အခြေအနေများကို တက်ရောက်လာတဲ့ သက်ဆိုင်ရာ အစိုးရအဆင့်မြင့် ပုဂ္ဂိုလ်များ၊ တာဝန်ရှိသူများနှင့် ကျွမ်းကျင်ပညာရှင်များက ဆွေးနွေးပြောကြားခဲ့ကြောင်း သတင်းရရှိပါတယ်။

#Ymg_mnn #Yangon_Media_Group

#Local_News
Published 02 July 2024

▪️ ကချင်ပြည်နယ်၊ဗန်းမော်တွင် ဧရာ၀တီမြစ်ရေကြီးနေ၍ ကူညီရွှေ့ပြောင်းပေးနေရကြောင်း မြန်မာနိုင်ငံ မီးသတ်တပ်ဖွဲ့မှ သိရသည်။

▪️ ဇူလိုင်၂ရက်နေ့၊ ၀၆ ၀၀ အချိန်ခန့်၊ ကချင်ပြည် နယ်၊ ဗန်းမော်မြို့၊ မြေနိမ့်ပိုင်းရပ်ကွက်များသို့ ဧရာ၀တီမြစ်ရေဝင်ရောက်မှုကြောင့်  ဗန်းမော်ခရိုင်မီးသတ်စခန်းမှ ရှာဖွေကယ်ဆယ်ရေးယာဉ်(၁)စီး၊ မီးသတ်စက်ယာဉ်(၁)စီး၊ ရှာဖွေကယ်ဆယ်ရေးလှေ(၈)စီး၊ သန္ဓေမီးသတ်တပ်ဖွဲ့ဝင်များနှင့် သက်ဆိုင်ရာအဖွဲ့အစည်းများ ပူးပေါင်း၍ ကူညီရွှေ့ပြောင်းပေးခြင်းလုပ်ငန်းများနှင့် သတိပေးဆော်ဩခြင်းလုပ်ငန်းများ ဆောင်ရွက်လျက်ခဲ့သည်ဟုဆိုသည်။

▪️ ယင်းအပြင် ၁.၇.၂၀၂၄ ရက်နေ့၊ ၀၈ ၃၀ အချိန်၊ ကချင်ပြည်နယ်၊ ဗန်းမော်မြို့၊ ပေါက်ကုန်းရပ်ကွက်(ပညာ့ရိပ်သာရပ်)တွင် ဧရာဝတီမြစ်ရေမြင့်တက်ဝင်ရောက်လာ၍ နေအိမ်များအတွင်းသို့ ရေဝင်ရောက်မှုဖြစ်ပွားကြောင်း သတင်းရရှိသဖြင့် ဗန်းမော်ခရိုင်မီးသတ်စခန်းမှ ရှာဖွေကယ်ဆယ်ရေးယာဉ်(၁)စီး၊ မီးသတ်စက်ယာဉ်(၁)စီး၊ ရှာဖွေကယ်ဆယ်ရေးတပ်ဖွဲ့ဝင်များ၊ သက်ဆိုင်ရာအဖွဲ့အစည်းများနှင့် ပူးပေါင်း၍ ရေဘေးလွတ်ရာ ဓမ္မိကာရုံဘုန်းတော်ကြီးကျောင်းသို့ ကယ်ဆယ်ကူညီရွှေ့ပြောင်းပေးခြင်းလုပ်ငန်းများ ဆောင်ရွက်လျက်ရှိကြောင်း မြန်မာနိုင်ငံ မီးသတ်တပ်ဖွဲ့မှ ထုတ်ပြန်ထားသည်။

#tthl #Yangon_Times

#World_News
Published 02 July 2024

▪️ အမေရိကန်တရားရုံးချုပ်က ချမှတ်တဲ့ သမ္မတအမှုကင်းလွတ်ခွင့်ဟာ သမ္မတတွေ ရှင်ဘုရင်ကဲ့သို့ ဖြစ်လာစေနိုင်တဲ့ အန္တရာယ်ရှိ အစဉ်အလာဖြစ်ပြီး အမေရိကန်ပြည်သူများအနေဖြင့် နိုဝင်ဘာလရွေးကောက်ပွဲမှာ ဒေါ်နယ်ထရမ့်ကို ငြင်းပယ်ပြီး သဘောမတူကြောင်း ငြင်းဆန်ကြရန် လက်ရှိသမ္မတ ဂျိုးဘိုင်ဒင်က တောင်းဆိုလိုက်ပါတယ်။

▪️ တရားရုံးချုပ်ရဲ့ ဆုံးဖြတ်ချက်က နိုဝင်ဘာ ၅ ရက် ရွေးကောက်ပွဲမတိုင်မီ ထရမ့်အနေဖြင့် အမှုစစ်ဆေးမခံရတဲ့ အခြေအနေ ဖြစ်လာနိုင်ပြီး အမေရိကန်သမ္မတွေ ရှင်ဘုရင်ဖြစ်လာနိုင်စေတယ်လို့ ဘိုင်ဒင်က အိမ်ဖြူတော်ကနေ သတိပေးပြောကြားလိုက်တာ ဖြစ်ပါတယ်။

▪️ ထရမ့်ဟာ သမ္မတဖြစ်စဉ်တုန်းက အခြေခံဥပဒေစည်းမျဉ်းများအတွင်း ပြုလုပ်ခဲ့တာတွေအတွက် တရားစွဲဆိုမခံရနိုင်ဘူးလို့ တရားရုံးက ဆုံးဖြတ်ခဲ့တာ ဖြစ်ပါတယ်။

▪️ ဒီပြည်ထောင်စုဟာ ဘုရင်စနစ်တွေနဲ့ အခြေခံထားတာ မဟုတ်ကြောင်း၊ လူတိုင်းလူတိုင်းဟာ ဥပဒေရှေ့မှောက်မှာ တန်းတူညီမျှ ရှိနေကြောင်း၊ ဘယ်သူမှ ဥပဒေအထက်မှာ ရှိမနေကြောင်း ဘိုင်ဒင်က ပြောပြပါတယ်။

▪️ တရားရုံးချုပ်ရဲ့ ဆုံးဖြတ်ချက်ဟာ သမ္မတတစ်ယောက် လုပ်ကိုင်နိုင်စွမ်းနဲ့ ပတ်သက်ပြီး အကန့်အသတ်မရှိ ဖြစ်လာစေနိုင်တယ်လို့ ပြောပါတယ်။

▪️ ပြီးခဲ့တဲ့ ရက်သတ္တပတ်က ထရမ့်နဲ့ စကားရည်လုပွဲမှာ ဘိုင်ဒင်သေချာယှဉ်မပြောနိုင် ဖြစ်ခဲ့ပြီးနောက် ပထမဆုံးအကြိမ် ပြောကြားလိုက်တာ ဖြစ်ပါတယ်။

▪️ စကားရည်လုပွဲမှာ ပိုင်ပိုင်နိုင်နိုင် မပြောနိုင်ခဲ့တာကြောင့် ရွေးကောက်ပွဲ ထပ်မံယှဉ်ပြိုင်ပြီး နောက်ထပ် ၄ နှစ်အုပ်ချုပ်နိုင်ပါ့မလားဆိုတာကို လူအများမေးခွန်းထုတ်လာကြပါတယ်။

▪️ ဒီစည်းမျဉ်းအပေါ် သဘောမတူငြင်းဆန်ကြဖို့ ဖော်ပြထားတဲ့ တရားသူကြီး ဆိုနီယာဆိုတိုမိုင်ယာရဲ့ သဘောထားကို ထောက်ခံကြောင်း၊ အမေရိကန်ပြည်သူတွေလည်း ငြင်းဆန်ကြသင့်ကြောင်း ဘိုင်ဒင်က ပြောသွားပါတယ်။

▪️ အခုဆိုရင် အမေရိကန် လွှတ်တော်အဆောက်အအုံကို လူအုပ်ကြီးဝင်ရောက်သောင်းကျန်းစေခဲ့တဲ့ လူက ရာဇဝတ်မှုစွပ်စွဲချက်ဖြင့် ရင်ဆိုင်နေရမှာဖြစ်ကြောင်း၊ အမေရိကန်ပြည်သူတွေအနေနဲ့ ရွေးကောက်ပွဲမလာခင် အဖြေသိကြားခွင့်ရှိကြောင်း ပြောသွားပါတယ်။

#Source: Reuters

#Local_News
Published_ 2 July 2024

▪️ ၅၀၀ ကေဗွီ ဘုရားကြီး-လှိုင်သာယာ လှိုင်မြစ်ကျော်ဓာတ်အားလိုင်းသွယ်တန်းခြင်း လုပ်ငန်း ၉၇ ရာခိုင်နှုန်းပြီးစီးနေပြီဖြစ်ကြောင်း သိရပါတယ်။

▪️ အဆိုပါ ဓာတ်အားလိုင်းသည် မြန်မာနိုင်ငံမြောက်ပိုင်းရှိ ဓာတ်အားပေးစက်ရုံများမှ ထွက်ရှိလာသော ဓာတ်အားများကို ဓာတ်အားသုံးစွဲမှုများပြားသည့် ရန်ကုန်တိုင်းဒေသကြီး အပါအဝင် မြန်မာနိုင်ငံ တောင်ပိုင်းဒေသများသို့ ဓာတ်အားပျောက်ဆုံးမှု နည်းပါးစွာနှင့် ဗို့အားပြည့်ဝတည်ငြိမ်စွာ ပို့လွှတ်နိုင်ရေးအတွက် တည်ဆောက်နေတာ ဖြစ်ပါတယ်။

▪️ လျှပ်စစ်စွမ်းအားဝန်ကြီးဌာနဝန်ကြီး ဦးဉာဏ်ထွန်းသည် ရန်ကုန်တိုင်းဒေသကြီး ဝန်ကြီးချုပ် ဦးစိုးသိန်းနှင့်အတူ ဇူလိုင်(၁)ရက်တွင် ရွှေပြည်သာမြို့နယ်ရှိ ဝါးတရာကျေးရွာ အနီး လျှပ်စစ်ဓာတ်အားပို့လွှတ်ရေးနှင့် ကွပ်ကဲရေးဦးစီးဌာနမှ ဆောင်ရွက်လျက်ရှိတဲ့ ၅၀၀ ကေဗွီ ဘုရားကြီး-လှိုင်သာယာ လှိုင်မြစ်ကျော်ဓာတ်အားလိုင်း သွယ်တန်းခြင်းလုပ်ငန်းဆောင်ရွက်နေမှုကို သွားရောက်ကြည့်ရှုစစ်ဆေးခဲ့ပါတယ်။

▪️ ဝန်ကြီးက ပြည်သူများ လျှပ်စစ်ဓာတ်အားပြည့်ဝစွာ အမြန်ဆုံးသုံးစွဲနိုင်ရေးအတွက် မြစ်ကျော်ဓာတ်အားလိုင်း သွယ်တန်းခြင်းလုပ်ငန်းများကို သတ်မှတ်ချိန်အတွင်း အချိန်မီပြီးစီးနိုင်ရေး ကြိုးပမ်းဆောင်ရွက်သွားရန်၊ လုပ်ငန်းများဆောင်ရွက်စဉ် ရေလမ်းကြောင်း အန္တရာယ်ကင်းရှင်းရေးနှင့် ဝန်ထမ်းများ အန္တရာယ်ကင်းရှင်းစွာဆောင်ရွက်နိုင်ရေး အဆင့်ဆင့်ကြပ်မတ်ဂရုပြုဆောင်ရွက်သွားရန်၊ လုပ်ငန်းခွင်သုံးပစ္စည်းများ စံချိန်စံညွှန်း ပြည့်မီရေးနှင့် လေလွင့်ဆုံးရှုံးမှု မရှိစေရေး ဆောင်ရွက်ဖို့ ပြောဆိုခဲ့ပါတယ်။

▪️ ထို့နောက်ဝန်ကြီးနှင့် တိုင်းဒေသကြီးဝန်ကြီးချုပ်တို့သည် စီမံကိန်းလုပ်ငန်းခွင်အတွင်း မြစ်ကျော်တာဝါတိုင်များ တည်ဆောက်ပြီးစီးမှု၊ မြစ်ကျော်ဓာတ်အားလိုင်း ကြိုးဆွဲခြင်းလုပ်ငန်းများ ဆောင်ရွက်နေမှုနှင့် ရေလမ်းကြောင်းအန္တရာယ် ကင်းရှင်းရေး ဆောင်ရွက်ထားမှုအခြေအနေများကို ကြည့်ရှုစစ်ဆေးခဲ့ကြပါတယ်။

▪️ လက်ရှိအချိန်တွင် ၂၃၀ ကေဗွီဗို့အားစနစ်ဖြင့် နိုင်ငံတော်ဓာတ်အားစနစ်နှင့် ချိတ်ဆက်၍ ကနဦးဓာတ်အားပို့လွှတ်နိုင်ရန်အတွက် လှိုင်မြစ်ကျော် ဓာတ်အားလိုင်း သွယ်တန်းခြင်းလုပ်ငန်းများကို ဆောင်ရွက်လျက်ရှိရာ ဇူလိုင်လပထမပတ်အတွင်းပြီးစီးနိုင်ရေး လျှပ်စစ်ဓာတ်အားပို့လွှတ်ရေးနှင့် ကွပ်ကဲရေးဦးစီးဌာနမှ အင်ဂျင်နီယာများ ဦးဆောင်၍ လျှပ်စစ်ကျွမ်းကျင်ဝန်ထမ်း ၂၄၀ ဖြင့် အဖွဲ့လေးဖွဲ့ခွဲကာ ကြိုးဆွဲခြင်း လုပ်ငန်းများဆောင်ရွက်နေတာဖြစ်ပါတယ်။

▪️ အဆိုပါ ဓာတ်အားလိုင်းတည်ဆောက်ပြီးစီးပါက ရန်ကုန်မြို့သို့ ၅၀၀ ကေဗွီ ဘုရားကြီး-လှိုင်သာယာ ဓာတ်အားလိုင်း၊ ၂၃၀ ကေဗွီ ရွှေတောင်-မြောင်းတကာ-လှော်ကား ဓာတ်အားလိုင်း၊ ၂၃၀ ကေဗွီ ကမာနတ်-လှော်ကား ဓာတ်အားလိုင်းနှင့် ၂၃၀ ကေဗွီ ကမာနတ်-သန်လျင်-သီလဝါ ဓာတ်အားလိုင်းတို့ဖြင့် ဗိုအားပြည့်ဝတည်ငြိမ်စွာ ပို့လွှတ်သွားနိုင်မှာ ဖြစ်ပါတယ်။

#Ymg_mnn #Yangon_Media_Group

#Local_News
Published 02 July 2024

▪️ တရုတ်နိုင်ငံမှ ကျင်းပသည့်'ဟိမဝန္တာတောင်တန်းဒေသနိုင်ငံများအကြား အပြည်ပြည်ဆိုင်ရာ ပူးပေါင်းဆောင်ရွက်မှုဖိုရမ်'သို့ မြန်မာနိုင်ငံမှ ကိုယ်စားလှယ်အဖွဲ့တက်ရောက်မည်ဖြစ်ကြောင်း သိရသည်။

▪️ စတုတ္ထအကြိမ်မြောက် တရုတ်နိုင်ငံ ရှီးကျန်းဒေသ၏ ဟိမဝန္တာတောင်တန်းဒေသနိုင်ငံများအကြား အပြည်ပြည်ဆိုင်ရာ ပူးပေါင်းဆောင်ရွက်မှုဖိုရမ် (4th China Xizang Trans-Himalaya Forum for International Cooperation) ဇူလိုင် ၃ ရက်မှ ၅ ရက်အထိ တရုတ်ပြည်သူ့သမ္မတနိုင်ငံ ညန်ချီမြို့၌ ကျင်းပမည်ဖြစ်သည်။

▪️ အဆိုပါဖိုရမ်သို့ တက်ရောက်ရန် သယံဇာတနှင့် သဘာဝပတ်ဝန်းကျင်ထိန်းသိမ်းရေးဝန်ကြီးဌာန ပြည်ထောင်စုဝန်ကြီး ဦးခင်မောင်ရီ ဦးဆောင်သော မြန်မာကိုယ်စားလှယ်အဖွဲ့ တက်ရောက်မည်ဖြစ်ပြီး တရုတ်ပြည်သူ့သမ္မတနိုင်ငံ ညန်ချီမြို့သို့ ထွက်ခွာရာ မြန်မာနိုင်ငံဆိုင်ရာ တရုတ်သံရုံးနှင့်ဝန်ကြီးဌာနမှ တာဝန်ရှိသူများက ရန်ကုန်အပြည်ပြည်ဆိုင်ရာလေဆိပ်၌ ပို့ဆောင်နှုတ်ဆက်ခဲ့ကြသည်။

▪️ ဟိမဝန္တာတောင်တန်းဒေသနိုင်ငံများအကြား ပူးပေါင်းဆောင်ရွက်မှုနှင့် ဖွံ့ဖြိုးတိုးတက်မှု၊ လူသားများနှင့်သဘာဝတရားအကြား သဟဇာတဖြစ်သော ဖွံ့ဖြိုးမှု၊ သဘာဝပတ်ဝန်းကျင်ထိန်းသိမ်းမှု စသည့် ကဏ္ဍသုံးခုကို ချိတ်ဆက်ပေးရန် ရည်ရွယ်ချက်ဖြင့် ကျင်းပခြင်းဖြစ်ကြောင်းနှင့် နိုင်ငံပေါင်း ၁၂ နိုင်ငံမှ ကိုယ်စားလှယ် စုစုပေါင်း ၃၀၀ တက်ရောက်မည်ဖြစ်ကြောင်း သိရသည်။

#tthl #Yangon_Times

#World_Health
Published 02 July 2024

▪️ စမ်းသပ်ချက်တစ်ခုမှာ ကက်တမင်း(Ketamine) ဖြည်းဖြည်းချင်း ထုတ်လွှတ်ပေးတဲ့ ဆေးတွေဟာ စိတ်ဓာတ်ကျဝေဒနာ ပြန်လည်ခံစားရခြင်းကို ကာကွယ်နိုင်တယ်လို့ တွေ့ရှိလာပြီး ရောဂါပြင်းထန်တဲ့သူတွေအတွက် ကုသနည်းအသစ်တစ်မျိုး ဖြစ်လာဖွယ်ရှိပါတယ်။

▪️ သာမန်သမားရိုးကျ စိတ်ကျရောဂါကုဆေးများ၊ ကုသနည်းများ အသုံးမဝင်တဲ့အခါ ကက်တမင်းကို အသုံးပြုနေကြပါတယ်။

▪️ ဒါပေမဲ့ လက်ရှိမှာ ကက်တမင်းကို သွေးကြောထဲ ဆေးထိုးသွင်းတဲ့နည်းလမ်း တစ်မျိုးတည်းသာရှိနေပြီး ဆေးရုံဆေးခန်းမှာ ကြပ်မတ်အသုံးပြုနေရပါတယ်။

▪️ စမ်းသပ်မှုကြီးပြုလုပ်စဉ် အကျိုးကျေးဇူးများပါက ကက်တမင်းဆေးပြားများကို ဈေးသက်သာစွာဖြင့် အိမ်မှာပင် လွယ်ကူစွာ အသုံးပြုနိုင်မှာဖြစ်ပြီး ဘေးထွက်ဆိုးကျိုးလည်း နည်းသွားနိုင်တယ်လို့ သုတေသီများ ဆိုပါတယ်။

▪️ ရလဒ်က သိပ်ပြီးမသေချာပေမယ့် အသုံးဝင်နိုင်မယ့်နယ်ပယ်က ကြီးမားလွန်းတယ်လို့ ကင်းစ်ကောလိပ်လန်ဒန်မှ ပရော်ဖက်ဆာ အယ်လန်ယန်းက ပြောပြပါတယ်။

▪️ ကက်တမင်း ဖြည်းဖြည်းချင်း ထုတ်လွှတ်တဲ့နည်းလမ်းက ဆေးကိုခန္ဓာကိုယ်အတွင်းသို့ ၁၀ နာရီအတွင်း ထုတ်လွှတ်ပေးသွားမှာ ဖြစ်ပါတယ်။

▪️ ကုသနည်းက ပိုမိုထိရောက်ရန်နဲ့ ဘေးထွက်ဆိုးကျိုးတွေ လျော့နည်းသွားဖို့ မျှော်မှန်းထားကြတာ ဖြစ်ပါတယ်။
ပါဝင်စမ်းသပ်ခံသူ ၂၃၁ ယောက်ထဲမှာ ၁၆၈ ယောက်က ရောဂါလက္ခဏာ သိသိသာသာ လျော့နည်းသွားပါတယ်။
ဘေးထွက်ဆိုးကျိုး များများစားစားမရှိခဲ့ဘဲ ဆေးပမာဏများတဲ့ သူတွေမှာတော့ အာနိသင်ရှိသလို မူးဝေတာမျိုးလည်း ရှိခဲ့ပါတယ်။

▪️ ဒါဟာ သမားရိုးကျဆေးတွေနဲ့ အလုပ်မဖြစ်တဲ့ စိတ်ကျဝေဒနာလူနာ သန်းပေါင်းများစွာအတွက် နည်းလမ်းတစ်ခု ဖြစ်လာနိုင်ပါတယ်။

▪️ ကက်တမင်းကို ဆေးထိုးသွင်းတဲ့နည်းလမ်းအတိုင်း အာနိသင်ရပြီး ရေရှည်မှာ ဘေးကင်းမယ်ဆိုရင် အလွန်အကျိုးရှိမှာဖြစ်တယ်လို့ အောက်စ်ဖို့ဒ်ကျန်းမာရေး NHS မှ စိတ်ကျန်းမာရေးပညာရှင် ဒေါက်တာ ရူပတ်မက်ရှိန်းက ပြောပြသွားပါတယ်။

▪️ ကက်တမင်းကို သောက်သုံးတဲ့ ဆေးဝါးအဖြစ်နဲ့ဆိုရင် အာဟာရစုပ်ယူခြင်းနဲ့ ဇီဝဖြစ်စဉ်တို့မှာ တစ်ဦးနဲ့တစ်ဦး ကွာခြားသွားနိုင်တာကို သတိပြုရမှာဖြစ်ကာ ဆေးပမာဏဘယ်လောက် လိုအပ်နိုင်သလဲဆိုတာကို နောက်ထပ်သုတေသန ပြုလုပ်သွားရမှာဖြစ်တယ်လို့ ဒေါက်တာ ပေါလ်ကိဒ်ဝဲလ်က ဆိုပါတယ်။

#Source: The Guardian

#World_Health
Published 02July 2024

▪️ ခါးနာခါးကိုက်ခဲခြင်းဟာ အဖြစ်များလေ့ရှိတဲ့ ဝေဒနာတစ်ခုဖြစ်ပြီး အထူးသဖြင့် အချိန်ကြာမြင့်စွာ ထိုင်လေ့ရှိသူတွေမှာ ဖြစ်ကြပါတယ်။

▪️ ခါးနာခြင်းဝေဒနာကနေ ပြန်လည်သက်သာသူတွေထဲက ၇၀ ရာခိုင်နှုန်းလောက်ဟာ တစ်နှစ်အတွင်း ထပ်မံဖြစ်ပွားတတ်တယ်လို့ လေ့လာချက်တစ်ခုမှာ သိရပါတယ်။

▪️ ဒီရောဂါအကြောင်း သိရှိထားခြင်းနဲ့ လမ်းလျှောက်ခြင်းတို့ ပေါင်းစပ်ထားတဲ့ အစီအစဉ်ဖြင့် ခါးကိုက်ခြင်းဝေဒနာ ပြန်ဖြစ်နိုင်ခြေ လျှော့ချနိုင်တယ်လို့ ဖော်ပြထားပါတယ်။

▪️ လေ့လာချက်ပြုလုပ်ရာမှာ မကြာမီကမှ ခါးကိုက်ဝေဒနာကနေ သက်သာလာတဲ့ လူ ၇၀၁ ယောက်ကို စမ်းသပ်ခဲ့ကြပြီး အချို့ကို လမ်းလျှောက်ခြင်းနဲ့ အသိပညာပေး အစီအစဉ်မှာ ပါဝင်စေခဲ့ကာ ကျန်လူတွေကို ဘာကုသနည်းမှ မပြုလုပ်ခဲ့ပါဘူး။

▪️ ကုသနည်းမှာပါဝင်တဲ့ လူတွေကို ကျွမ်းကျင်သူများဖြင့် ကြပ်မတ်ကာ ၆ လအတွင်း လူနာတစ်ဦးချင်းစီရဲ့ လိုအပ်ချက်များအတိုင်း လမ်းလျှောက်တဲ့ အစီအစဉ်တွေ ပြုလုပ်ပေးခဲ့ပါတယ်။

▪️ ဒါ့အပြင် တိုးတက်မှုတွေကို စောင့်ကြည့်ပြီး ဖြစ်လာသမျှ အခက်အခဲ ပြဿနာတွေကို ဖြေရှင်းပေးခဲ့ပါတယ်။

▪️ တစ်နေ့ကို မိနစ် ၃၀ ခန့်ဖြင့် တစ်ပတ်ကို ၅ ကြိမ်လျှောက်ခိုင်းစေခဲ့ပြီး စမ်းသပ်မှုအစီအစဉ်ပြီးတဲ့အခါမှာလည်း ဆက်လျှောက်ရန် တိုက်တွန်းခဲ့ပါတယ်။

▪️ ခါးနာခါးကိုက်ခြင်း ပြန်ဖြစ်ခြင်းရှိမရှိ သိရှိဖို့အတွက် အချိန် ၃ နှစ်အထိ စောင့်ကြည့်ခဲ့ကြရာ ကုသမှုအစီအစဉ်အတိုင်း ခံယူခဲ့ကြတဲ့လူတွေဟာ ခါးကိုက်ဝေဒနာ ပြန်ခံစားရနိုင်ခြေ ၂၈ ရာခိုင်နှုန်းနဲ့ စောင့်ရှောက်ကုသခံယူမှု လိုအပ်ချက် ၄၃ ရာခိုင်နှုန်း လျော့နည်းသွားပါတယ်။

▪️ ခါးကိုက်ဝေဒနာ ကင်းဝေးတဲ့အချိန်လည်း ပိုကြာရှည်ပြီး စောင့်ရှောက်ကုသဖို့အတွက် ကုန်ကျစရိတ်လည်း ပိုသက်သာခဲ့ပါတယ်။

▪️ လမ်းလျှောက်ခြင်းက ခါးနာခါးကိုက်ဝေဒနာအတွက် အထောက်အကူ ဖြစ်ရတဲ့ အကြောင်းအရင်းနဲ့ ပတ်သက်ပြီး သေချာမသိရှိရပေမယ့် ဖြည်းဖြည်းချင်း ရွေ့လျားခြင်း၊ ကျောရိုးမဖွဲ့စည်းမှုများနဲ့ ကြွက်သားများ သန်မာစေခြင်း၊ စိတ်ပြေလျော့စေခြင်း၊ ဖိအားလျော့စေခြင်း၊ နာကျင်မှုကို သက်သာစေတဲ့ အင်ဒေါ်ဖင်းဟော်မုန်းများ ထွက်စေခြင်းတို့တော့ ပါဝင်နေပါတယ်။

#Source: India Today

အသီးတို့ရဲ့ ဘုရင်လို့တင်စားထားတဲ့ ဒူးရင်းသီးတွေကို တရုတ်တွေအလွန်နှစ်ခြိုက်တာကြောင့် ထိုင်းနိုင်ငံရဲ့ ဒူးရင်းသီးစီးပွားရေး စံချိန်တင်မြင့်တက်လာကာ စိုက်ပျိုးသူများအတွက် အခွင့်အလမ်းတွေ ထွက်ပေါ်လာပါတယ်။
#World_Business
Published 01 July 2024
#ထိုင်းဒူးရင်းသီးစိုက်ပျိုးသူများ #စီးပွားအလွန်ဖြစ်နေ
#YMG #Yangon_Times #Yangon_Media_Group

#Daily_News
Published 01 July 2024

၁။ ဩဂုတ်လထဲတွင် 'တောင်ပြုံးပွဲတော်ကြီး' (၁၅)ရက်တိုင်တိုင် စည်ကားသိုက်မြိုက်စွာကျင်းပမည်

၂။ ယခုအပတ်အဖွင့်ရွှေဈေး(YGEA)သောင်းဂဏာန်းတက်၊ (၄၅)သိန်းကျော်သွား

၃။ ထိုင်း ဆီးဂိမ်း၌ဝင်ရောက်ယှဉ်ပြိုင်နိုင်ရန် ခရီးရှည် မြင်းစီးအားကစား အရည်အချင်းစစ်ပြိုင်ပွဲပြုလုပ်

၄။ ထိုင်းဒူးရင်းသီးများကို တရုတ်မှ စံချိန်တင်ဝယ်ယူလာသဖြင့် ထိုင်းမှ ဒူးရင်းသီးစိုက်ပျိုးသူများ စီးပွားအလွန်ဖြစ်နေ ... အစရှိတဲ့ သတင်းတွေကို တင်ဆက်ပေးသွားမှာ ဖြစ်ပါတယ်။

#YMG #Yangon_Times #Yangon_Media_Group