#World_News
Published 22 January 2025

▪️ အမေရိကန်မှာ မွေးဖွားသူများ နိုင်ငံသားဖြစ်ခွင့်ကို ပြန်လည်ရုပ်သိမ်းမယ့် အမေရိကန်သမ္မတ ဒေါ်နယ်ထရမ့်ရဲ့ ကြိုးပမ်းမှုကို ဒီမိုကရက်တစ်ဦးဆောင်တဲ့ ပြည်နယ်များနဲ့ အရပ်ဘက် လူ့အခွင့်အရေး အဖွဲ့အစည်းများက ပိတ်ဆို့ရန်အတွက် အင်္ဂါနေ့က တရားရုံးမှာ စွဲဆိုချက်အများအပြား တင်သွင်းခဲ့ပါတယ်။

▪️ တနင်္လာနေ့ ကျမ်းသစ္စာကျိန်ဆိုပွဲမှာ ရီပတ်ဘလစ်ကန်နိုင်ငံရေးသမား ထရမ့်က အမေရိကန်အေဂျင်စီများကို ညွှန်ကြားခဲ့ရာမှာ အမေရိကန်မှာ မွေးဖွားသူများအနေနဲ့ ယင်းတို့ရဲ့ အဖေ သို့မဟုတ် အမေက အမေရိကန်နိုင်ငံသား သို့မဟုတ် တရားဝင်အမြဲတမ်းနေထိုင်သူ မဟုတ်ပါက နိုင်ငံသားဖြစ်ခွင့် မပေးခိုင်းထားပါဘူး။

▪️ ကိုလံဘီယာခရိုင်၊ ဆန်ဖရန်ဆစ္စကိုမြို့နဲ့အတူ ဒီမိုကရက်တစ်ဦးဆောင်တဲ့ ပြည်နယ် ၂၂ ခုက ဘော့စ်တွန်နဲ့ ဆီအက်တယ်လ်ရှိ ဖက်ဒရယ်တရားရုံးတွေမှာ တရားစွဲဆိုချက်များ တင်သွင်းခဲ့ပြီး ထရမ့်ဟာ အမေရိကန် ဖွဲ့စည်းပုံအခြေခံဥပဒေကို ချိုးဖောက်တယ်လို့ စွပ်စွဲလိုက်ပါတယ်။

▪️ ထရမ့်ကနေ သမ္မတအမိန့်များ လက်မှတ်ရေးထိုးပြီး နာရီပိုင်းအတွင်းမှာပဲ အမေရိကန် အရပ်ဘက် လစ်ဘာတီသမဂ္ဂ၊ လူဝင်မှုကြီးကြပ်ရေး အဖွဲ့အစည်းတွေကနေလည်း အလားတူစွဲဆိုချက်မျိုး တင်သွင်းခဲ့ပါတယ်။

▪️ ထရမ့်ကြိုးပမ်းနေတဲ့ လူဝင်မှုကြီးကြပ်ရေး ဖြိုခွင်းမှုကြီးရဲ့ ဗဟိုချက်တစ်ခုကို ဦးတည်ပြီး စွဲဆိုလာကြတာ ဖြစ်ကာ ထရမ့်ညွှန်ကြားချက်အတိုင်း ဆက်ရှိနေပါက အမေရိကန်မှာ နှစ်စဉ်မွေးဖွားနေတဲ့ ကလေးပေါင်း ၁ သိန်းခွဲကျော်ဟာ နိုင်ငံသားဖြစ်ခွင့် ဆုံးရှုံးမှာဖြစ်ကြောင်း မာဆာချူဆက်စ် ရှေ့နေချုပ် အန်ဒရီယာဂျွိုင်းကမ့်ဘဲလ်ရုံးက ပြောပါတယ်။

▪️ နိုင်ငံသားဖြစ်ခွင့် ဆုံးရှုံးတဲ့သူတွေဟာ ဖက်ဒရယ်အစီအစဉ်တွေဖြစ်တဲ့ Medicaid ကျန်းမာရေးအာမခံ၊ အရွယ်ရောက်လာတဲ့အခါ ဥပဒေနည်းအရ အလုပ်လုပ်ခြင်း မဲဆန္ဒပေးခြင်းတို့ ရရှိမှာမဟုတ်ပါဘူး။

▪️ အခုလို တရားစွဲဆိုချက် တင်သွင်းရတာဟာ ပြည်သူတွေနဲ့ အခြေခံဖွဲ့စည်းပုံ ရပိုင်ခွင့်များအတွက် ရပ်တည်မယ်ဆိုတာကို ထရမ့်အစိုးရအဖွဲ့ထံ အသိပေးလိုက်တာ ဖြစ်တယ်လို့ နယူးဂျာစီ ရှေ့နေချုပ် မက်သရူးပလက်ကင်က ဖော်ပြသွားပါတယ်။

▪️ နောက်ထပ်စွဲဆိုချက်များလည်း တင်ပြလာနိုင်ဖွယ်ရှိသလို အီလွန်မက်စ်ဦးဆောင်တဲ့ အစိုးရသက်သာထိရောက်ရေးဌာနကို စွပ်စွဲထားတဲ့ အမှုတွေလည်းရှိနေပြီး အရပ်သားလုပ်သားများအတွက် ကာကွယ်ခွင့်လျော့ပါးလာစေတဲ့ ထရမ့်ရဲ့အမိန့်လည်း ပါဝင်ပါတယ်။

▪️ ယခုစွဲဆိုချက်တွေမှာ ထရမ့်ရဲ့ညွှန်ကြားချက်က အမေရိကန် အခြေခံဖွဲ့စည်းပုံ ပြင်ဆင်ဖြည့်စွက်ချက်-၁၄ နိုင်ငံသားဖြစ်ခွင့်အပိုဒ်ကို ချိုးဖောက်ရာကျတယ်လို့ ဆိုထားပါတယ်။

#Source: Reuters

#Local_News
Published -22 Jan 2025

▪️ ကျောက်ဖြူအထူးစီးပွားရေးဇုန် ရေနက်ဆိပ်ကမ်းစီမံကိန်း Long Stop Date သက်တမ်းတိုးကာလပြည့်ရန် နှစ်လကျော်သာကျန်ရှိ၍လုပ်ငန်းပြီးစီးရန် ဆောင်ရွက်ရေးညှိနှိုင်းနေကြောင်း သိရသည်။

▪️ ကျောက်ဖြူအထူးစီးပွား ရေးဇုန်စီမံခန့်ခွဲမှုကော်မတီနှင့် တရုတ်နိုင်ငံ ( CITIC Group ) ကျောက်ဖြူအထူးစီးပွားရေးဇုန် ရေနက်ဆိပ်ကမ်းကုမ္ပဏီ လီမိတက်တို့လုပ်ငန်းလုပ်ကိုင်ခွင့် သဘောတူစာချုပ် (Concession Agreement) ကို ၂၀၂၀ ပြည့်နှစ် နိုဝင်ဘာလ ၅ ရက်တွင် ချုပ်ဆိုခဲ့ရာ ယင်း စာချုပ်၏ နောက်ဆက်တွဲစာချုပ် (Addendum) ကို ၂၀၂၃ ခုနှစ် ဒီဇင်ဘာလ ၂၆ ရက်တွင် လက်မှတ်ရေးထိုးခဲ့ပြီး Long Stop Date ကို ၁၈ လကာလ သက်တမ်းတိုးပေးခဲ့ခြင်းဖြစ်ကြောင်း သိရသည်။

▪️ အဆိုပါ Long Stop Date သက်တမ်းတိုးမြှင့်ထားသည့်ကာလမှာ ၂၀၂၅ ခုနှစ် ဇွန်လ ၂၆ ရက်တွင် ပြည့်မြောက်မည်ဖြစ်၍ သက်တမ်း မပြည့်မြောက်မီ နှစ်လအလိုဧပြီလ ၂၆ ရက်မတိုင်မီ လုပ်ငန်းများပြီးပြတ်အောင်ဆောင်ရွက်နိုင်ရန် ရည်မှန်းချက်ထားသောကြောင့် သတ်မှတ်ရက်မရောက်မီ လုပ်ငန်းများပြီးစီးရေး
သက်ဆိုင်ရာဌာနများနှင့် ပူးပေါင်းညှိနှိုင်းဆောင်ရွက်ကြရန် မြန်မာအထူးစီးပွားရေးဇုန်ဆိုင်ရာ ဗဟိုလုပ်ငန်းအဖွဲ့ဥက္ကဋ္ဌ ရင်းနှီးမြှုပ်နှံမှုနှင့် နိုင်ငံခြားစီးပွားဆက်သွယ်ရေးဝန်ကြီးဌာန ပြည်ထောင်စုဝန်ကြီးဒေါက်တာကံဇော်က ပြောသည်။

▪️ ဇန်နဝါရီလ ၂၁ ရက် က နေပြည်တော် စီးပွားရေးနှင့် ကူးသန်းရောင်းဝယ်ရေးဝန်ကြီးဌာန အစည်းအဝေးခန်းမ (၁) ၌ ကျင်းပသည့် ကျောက်ဖြူအထူးစီးပွားရေးဇုန် ရေနက်ဆိပ်ကမ်းစီမံကိန်းဆောင်ရွက်နိုင်ရေးအတွက် မြန်မာဘက်နှင့် CITIC ဘက်မှ နှစ်ဖက်ကြိုတင်ဖြည့်ဆည်းရမည့်အချက်များနှင့်စပ်လျဉ်းသည့် လုပ်ငန်းညှိနှိုင်းအစည်းအဝေး အတွင်း ယင်းကအထက်ပါအတိုင်းပြောကြားခြင်းဖြစ်သည်။

▪️ ကျောက်ဖြူ အထူးစီးပွားရေးဇုန် ရေနက်ဆိပ်ကမ်းစီမံကိန်း အကောင်အထည် ဖော်ရေးအတွက် အစုရှယ်ယာရှင်များနှင့် သက်ဆိုင်သော သဘောတူစာချုပ် (Share-holders’ Agreement) တွင် မြန်မာ-တရုတ်နှစ်ဖက်အနေဖြင့် စီမံကိန်းမစတင်မီ ကြိုတင်ဖြည့်ဆည်းဆောင်ရွက်ရမည့် စာချုပ်ပါအချက် ၁၆ ချက်အနက် မြန်မာဘက်က ဆောင်ရွက်ရမည့်အချက် ၁၀ ချက်၊ မြန်မာ-တရုတ် ပူးပေါင်းဆောင်ရွက်ရမည့်အချက်လေးချက် စသည့်လုပ်ငန်းတာဝန်များပါရှိကြောင်းသိရသည်။

#Yangon -Times/PP

#Local_News
Published_22 Jan 2025

▪️ အိန္ဒိယအစိုးရက မြန်မာနိုင်ငံတွင်ပြုလုပ်မည့်အသေးစား ဖွံ့ဖြိုးတိုးတက်ရေး စီမံကိန်းသစ် (၃)ခု တည်ဆောက်မည်ဖြစ်ကြောင်း မြန်မာနိုင်ငံဆိုင်ရာ အိန္ဒိယ သံရုံးက ဇန်နဝါရီလ ၂၁ ရက်တွင် ထုတ်ပြန်လိုက်သည်။

▪️ အဆိုပါစီမံကိန်းများထဲမှနှစ်ခုတွင် မြန်မာနိုင်ငံရှိ ပြည်နယ်နှင့်တိုင်းဒေသကြီး (၁၀) ခုရှိ Home Science School ၌ သက်မွေးဝမ်းကျောင်းသင်တန်းနှင့် စာသင်ခန်းဆိုင်ရာ အခြေခံအဆောက်အအုံများ ပံ့ပိုးပေးခြင်း ပါဝင်ကြောင်း၊ အဆိုပါ စီမံကိန်းအသစ် (၃)ခုအတွက် ပံ့ပိုးကူညီမှုဆိုင်ရာနားလည်မှု စာချွန်လွှာကို နေပြည်တော်တွင် ဇန်နဝါရီလ ၂၁ ရက်ကလက်မှတ်ရေးထိုးခဲ့ကြောင်း သိရသည်။

▪️ စီမံကိန်းများကို ရန်ကုန်၊ မန္တလေး၊ မော်လမြိုင်၊ တောင်ငူ၊ မြစ်ကြီးနား၊ ဖျာပုံ၊ ပုသိမ်၊ ရွာငံ၊ စစ်တွေ၊ ဟားခါး နှင့် ထားဝယ် စသည့်မြို့ကြီး (၁၁) မြို့ကို ဖြန့်ကျက်ဆောင်ရွက်သွားမည်ဖြစ်ကြောင်း သိရသည်။

▪️ တတိယစီမံကိန်းကို ရန်ကုန်၊ မန္တလေး၊ ကချင်၊ ရှမ်းနှင့် ကရင်ပြည်နယ် အပါအဝင် ပြည်နယ်နှင့် တိုင်းဒေသကြီး (၅) ခုတွင် မူးယစ်ဆေးစွဲခဲ့ကြသူများ ပြန်လည်ထူထောင်ရေးအတွက်အသက်မွေးဝမ်းကြောင်းဆိုင်ရာ သင်တန်း များ ဖွင့်လှစ်ခြင်းနှင့်သင်ကြားရေးအထောက်အကူများ ပေးအပ်ခြင်းတို့ကို အဓိကထားဆောင်ရွက်သွားမည်ဖြစ်ကြောင်း သိရသည်။

▪️ ယင်းအသေးစား ဖွံ့ဖြိုးတိုးတက်ရေး စီမံကိန်းများ အကောင်အထည်ဖော်ရေး အတွက် အိန္ဒိယ ထောက်ပံ့ကူ ညီရေး နားလည်မှုစာချွန်လွှာမူဘောင်ကို ၂၀၁၀ ပြည့်နှစ် ဇူလိုင်လ ၂၇ ရက်တွင် လက်မှတ်ရေးထိုးခဲ့ပြီး ၂၀၁၅ ခုနှစ် ဇူလိုင်လ ၂၈ ရက်နှင့် ၂၀၂၀ ပြည့်နှစ် ဇူလိုင်လ ၂၈ ရက်တွင် နှစ်ကြိမ် သက်တမ်းတိုးခဲ့ကြောင်း သိရသည်။

▪️ အဆိုပါအသေးစားဖွံ့ဖြိုးတိုးတက်ရေး မံကိန်း မူဘောင်အရ အိန္ဒိယနိုင်ငံအစိုးရအနေဖြင့်စစ်ကိုင်းတိုင်း မုံရွာမြို့ရှိ မျိုးသမီးနှင့် ကလေးဆေးရုံကြီး အဆင့်မြှင့်တင်ရေး၊ ရခိုင်ပြည်နယ် စစ်တွေ ကွန်ပျူတာ တက္ကသိုလ်သို့ ကွန်ပျူ တာများ ထောက်ပံ့မှု နှင့် ရခိုင်ပြည်နယ်သို့ ထွန်စက်များနှင့် စပါးရိတ်သိမ်းစက်များ ထောက်ပံ့မှုအပါအဝင် အ ကျိုးသက်ရောက်မှုရှိသည့် စီမံကိန်းများအတွက်ပံ့ပိုးကူညီမှုများကို တိုးချဲ့ဆောင်ရွက်လျက်ရှိကြောင်း သိရသည်။

#Yangon_Times/PP

#Local_News
Published_22 Jan 2025

▪️ ကယားပြည်နယ် လွိုင်ကော်တက္ကသိုလ်ပြုပြင်တည် ဆောက်ရေးအတွက် သဘာဝဘေးအန္တရာယ်ဆိုင်ရာ ရန်ပုံငွေကို အသုံးပြုမည်ဖြစ်ကြောင်း နိုင်ငံတော်စီမံအုပ်ချုပ်ရေးကောင်စီအတွင်းရေးမှူး ဗိုလ်ချုပ်ကြီးအောင်လင်းဒွေးက ပြော သည်။

▪️ ယနေ့ ဇန်နဝါရီလ ၂၁ ရက်က ပြုလုပ်သော ကယားပြည်နယ် လွိုင်ကော်တက္ကသိုလ်ကို အကြမ်းဖက်သောင်း ကျန်းသူများ ဖျက်ဆီးမှုကြောင့် အဆောက် အဦများ ပျက်စီးခဲ့မှု အခြေအနေနှင့် ပြန်လည်ပြုပြင် ရေးဆိုင်ရာ ညှိနှိုင်းအစည်းအဝေးအတွင်း ယင်းကအထက်ပါအတိုင်း ပြောခြင်းဖြစ်သည်။

▪️ တက္ကသိုလ်၏ လိုအပ်ချက်များ ကိုက်ညီရန်အတွက် ပညာရေးဝန်ကြီးဌာန၊ ဆောက်လုပ်ရေး ဝန်ကြီးဌာနနှင့် ကယားပြည်နယ်အစိုးရ အဖွဲ့တို့အနေဖြင့် ပြန်လည်ပြုပြင်တည်ဆောက်ရေးလုပ်ငန်းများစနစ်တကျ အမြန်ဆုံးစတင်ဆောင်ရွက်နိုင်ရေး ပေါင်းစပ်ညှိနှိုင်း ဆောင်ရွက်သွားကြစေလိုကြောင်းလည်း ယင်းက ပြောသည်။

▪️ ယခုအခါ ကယားပြည်နယ် လွိုင်ကော်ဒေသသည် ပုံမှန်အခြေအနေအတိုင်း ပြန်လည် တည်ငြိမ်အေးချမ်း လာပြီဖြစ်သည့်အတွက် ဒေသခံ တိုင်းရင်း သား ပြည်သူများ အဆက်မပြတ် ပြန်လည်ဝင်ရောက်နေထိုင် လျက်ရှိပြီး လိုအပ်သည့် ပြန်လည် ထူထောင်ရေး လုပ်ငန်းများကို သက်ဆိုင်ရာတာဝန်ရှိသူများက ကြိုးပမ်း ဆောင်ရွက်လျက်ရှိကြောင်းလည်း သိရသည်။

▪️ ယင်းအပြင် ၂၀၂၄-၂၀၂၅ ပညာသင် နှစ်က စပြီး လွိုင်ကော်နည်းပညာတက္ကသိုလ်၊ ကွန်ပျူတာ တက္ကသိုလ်၊ ပညာရေးဒီဂရီကောလိပ်နှင့် အစိုးရစက်မှုလက်မှုသိပ္ပံ တို့ကို ပြန်လည်ဖွင့်လှစ်ပေးကာဒေသခံ ကျောင်းသား ကျောင်းသူများ စဉ်ဆက်မပြတ်ပညာသင်ယူမှုအခွင့်အရေးမဆုံးရှုံးအောင် ဆောင်ရွက်ပေးခဲ့ကြောင်း သိရသည်။

▪️ ဝိဇ္ဇာ သိပ္ပံဘာသာရပ်များကို သင်ယူဆည်းပူးနိုင်သည့် နေ့သင်တန်းနှင့် အဝေး သင်တက္ကသိုလ်သင်တန်းများ တက်ရောက်ရန် အခက်အခဲ ကြုံတွေ့နေသည့် ကျောင်းသား ကျောင်းသူ ထောင်ပေါင်းများစွာအတွက် “လွိုင် ကော် တက္ကသိုလ် အမြန်ဆုံးပြန်လည် ပြင်ဆင်ဖွင့်လှစ်နိုင်ရေး”ကို ညှိနှိုင်း ဆွေးနွေးပေးကြရမည် ဖြစ်ကြောင်းလည်း ၎င်းကပြောသည်။

▪️ အကြမ်းဖက်သောင်းကျန်းသူများ ဖျက်ဆီးမှုကြောင့် လွိုင်ကော်တက္ကသိုလ်၏ ၃ ထပ် ပင်မဆောင် ၊ ၂ ထပ် ဘွဲ့နှင်းသဘင်ခန်းမ၊ ၂ ထပ် စာသင်ဆောင်များ၊ ရေသန့်စနစ်နှင့် လျှပ်စစ်ကဏ္ဍဆိုင်ရာ ဆက်စပ်ပစ္စည်းများ၊ ၂ ထပ် ဆရာ၊ ဆရာမများ ဆောင်၊ အရာရှိ အိမ်ရာ၊ ၄ ခန်းတွဲ ၂ ထပ် ဝန်ထမ်းအိမ်ရာများ၊ ၄ ခန်းတွဲ ၄ ထပ်၊ ၈ ခန်းတွဲ ၂ ထပ် ဝန်ထမ်း အိမ်ရာများ၊ ပါမောက္ခချုပ်နေအိမ်၊ ဒုတိယပါမောက္ခချုပ်နေအိမ်များ၊ ၂ ထပ် ကျောင်းသား ကျောင်းသူဆောင်များ၊ အားကစားရုံနှင့် အားကစားခန်းမ၊ ၂ ထပ် စာကြည့်တိုက်များ၊ ၂ ထပ် ကျောင်းသား ကျောင်းသူနားနေဆောင်ပျက်စီးခဲ့ကြောင်း သိရသည်။

#Yangon_Times/PP

#Local_News
Published_21 Jan 2025

▪️ မြန်မာနိုင်ငံနှင့်ထိုင်းနိုင်ငံတို့တရားမဝင်လူကုန်ကူးမှုများ၊ အွန်လိုင်းငွေကြေး လိမ်လည်မှုများ ပပျောက်ရေးနှစ်နိုင်ငံအစိုးရနှင့်တပ်မတော်အကြားပူးပေါင်းဆောင်ရွက်သင့်သည့် ကိစ္စ၊ ထိုင်းနိုင်ငံမှ မြန်မာရေပိုင်နက်အတွင်း တရားမဝင်ငါးဖမ်းလှေနှင့် လှေလုပ်သားများအပေါ် မြန်မာနိုင်ငံမှ အရေးယူထားရှိမှုနှင့် ဆက်လက်ဆောင်ရွက်လိုသည့်အစီအစဉ်များ၊ နယ်စပ်ဒေသတည်ငြိမ်အေးချမ်းရေးအတွက် သတင်းအချက်အလက်များ အပြန်အလှန်ဖလှယ်ရေးဆိုင်ရာကိစ္စ၊ တပ်မတော်နှစ်ရပ်အကြား အဆင့်မြင့်တပ်မတော်အရာရှိကြီးများ ချစ်ကြည်ရေးခရီးများ လည်ပတ်ရေးဆိုင်ရာကိစ္စ များနှင့် ပူးပေါင်းဆောင်ရွက်မှုများ တိုးမြှင့်ဆောင်ရွက်ရေးဆိုင်ရာကိစ္စ များကို ဆွေးနွေးကြကြောင်း သိရသည်။

▪️ ယနေ့ ဇန်နဝါရီလ ၂၁ ရက်က နိုင်ငံတော်စီမံအုပ်ချုပ်ရေးကောင်စီဒုတိယဥက္ကဋ္ဌ ဒုတိယတပ်မတော်ကာကွယ်ရေးဦးစီးချုပ်ကာကွယ်ရေးဦးစီးချုပ်(ကြည်း) ဒုတိယဗိုလ်ချုပ်မှူးကြီး စိုးဝင်းနှင့် ထိုင်းဘုရင့်ကြည်းတပ်ဦးစီးချုပ်ရုံး၊ အကြံပေးဘုတ်အဖွဲ့ဥက္ကဋ္ဌနှင့် Army Operations Center Neighboring Countries Coordination Center (NCCC) General Direk Bongkarn ဦးဆောင်သည့် ကိုယ်စားလှယ်အဖွဲ့တို့ နေပြည်တော်ရှိ ဘုရင့်နောင်ရိပ်သာဧည့်ခန်းမဆောင်၌ တွေ့ဆုံစဉ် အထက်ပါအတိုင်း ဆွေးနွေးကြခြင်း ဖြစ်သည်။

▪️ အဆိုပါ တွေ့ဆုံပွဲသို့ နိုင်ငံတော်စီမံအုပ်ချုပ်ရေးကောင်စီဒုတိယဥက္ကဋ္ဌ ဒုတိယ တပ်မတော်ကာကွယ်ရေးဦးစီး ချုပ် ကာကွယ်ရေးဦးစီးချုပ်(ကြည်း)နှင့်အတူ ညှိနှိုင်းကွပ်ကဲရေးမှူး(ကြည်း၊ရေ၊လေ) ဒုတိယဗိုလ်ချုပ်ကြီးကျော်စွာလင်းနှင့် ကာကွယ်ရေးဦးစီးချုပ်ရုံးမှ တပ်မတော်အရာရှိကြီးများ တက်ရောက်ကြပြီး ထိုင်းဘုရင့်ကြည်းတပ် ဦးစီးချုပ်ရုံး၊ အကြံပေးဘုတ်အဖွဲ့ဥက္ကဋ္ဌနှင့်အတူ ထိုင်းဘုရင့်တပ်မတော်အရာရှိကြီးများ၊ မြန်မာနိုင်ငံဆိုင်ရာ ထိုင်းဘုရင့်ကြည်းတပ်စစ်သံမှူး Senior Colonel Thanwit Yomchinda(တန်ဝစ်ယုံချင်ဒါ)တို့ တက်ရောက် ခဲ့ကြ ကြောင်း သိရသည်။

#Yangon_Times/PP

#World_Science
Published 22 January 2025

▪️ အပြင်ဘက်ရေကန်တွေ၊ မြစ်၊ စမ်းချောင်းတို့မှာ တွေ့ရတဲ့ ရောဂါပိုးမွှားတစ်မျိုးဟာ နှာခေါင်းလမ်းကြောင်းကနေ ဦးနှောက်ကို တိုက်ရိုက်ထိခိုက်စေနိုင်ဖွယ် ရှိပါတယ်။

▪️ ဒီပိုးမွှားကတော့ Naegleria fowleri လို့ခေါ်ပြီး ဦးနှောက်စားသုံးအမီးဘားလို့လည်း သိကြကာ အသက်အန္တရာယ် ပေးနိုင်တဲ့ပိုးမွှားမျိုး ဖြစ်ပါတယ်။

▪️ ရှားပါးပြီး အသက်အန္တရာယ်ရှိနိုင်တဲ့ အမီးဘားဦးနှောက်အမြှေးရောင်ရောဂါ ဖြစ်စေနိုင်ပြီး အထူးသဖြင့် ငယ်ရွယ်တဲ့ယောက်ျားလေးတွေမှာ ဖြစ်တတ်ပါတယ်။

▪️ အသက်သေဆုံးမှုနှုန်း အလွန်မြင့်မားပြီး အမေရိကန် ရောဂါထိန်းချုပ်ကာကွယ်ရေးစင်တာရဲ့ အချက်အလက်များအရ ရောဂါဖြစ်ပွားသူ ၁၆၄ ဦးမှာ ၄ ဦးသာအသက်ရှင်ပါတယ်။

▪️ ရောဂါပိုးက ပါးစပ်ကနေ ဝင်တာမဟုတ်ဘဲ နှာခေါင်းနဲ့ အသက်ရှူလမ်းကြောင်းတို့ကနေ ဝင်ရောက်ကာ ဦးနှောက်နဲ့ ဗဟိုအာရုံကြောစနစ်တို့ကို တိုက်ရိုက်ထိခိုက်စေပါတယ်။

▪️ ရောဂါပိုးရှိနေတဲ့ရေနဲ့ နှာခေါင်းဆေးကြောမိတဲ့သူတွေမှာ အမီးဘားဝင်ရောက်လာတတ်ပါတယ်။

▪️ အမီးဘားက ရေချို၊ မြစ်၊ ရေပူစမ်း၊ စမ်းချောင်း၊ ရေကန်ရေအိုင်တွေမှာ ရှင်သန်တတ်ပြီး အထူးသတိပြုရပါမယ်။

▪️ ရေကူးတာကမှန်ပေမယ့် ခေါင်းမမြုပ်အောင်သတိထားပြီး နှာခေါင်းကို ရေမထိအောင် ဂရုပြုရပါမယ်။

▪️ ရေကူးကန်ဆိုရင်လည်း ကလိုရင်းဖြင့် သေချာပိုးသန့်စင်ထားတဲ့ရေဖြစ်အောင် လုပ်ရပါမယ်။

▪️ ဒီရောဂါက ဖြစ်နိုင်ခြေနည်းပေမယ့် ကူးစက်မိရင်တော့ အသက်အန္တရာယ်များပါတယ်။

#Source: WION

#World_Health
Published 22 January 2025

▪️ ကင်ဆာဖြစ်နိုင်ခြေ ရှိတာကြောင့် လွန်ခဲ့တဲ့ ၃၅ နှစ်နီးပါးလောက်က အလှကုန်ပစ္စည်းတွေကနေ တားမြစ်ခံခဲ့ရတဲ့ Red 3 ဆိုးဆေးကို ပြီးခဲ့တဲ့ ဗုဒ္ဓဟူးနေ့က အမေရိကန် ထိန်းသိမ်းကွပ်ကဲသူများဟာ အစားအစာထုတ်လုပ်မှုတွေကနေလည်း ပိတ်ပင်လိုက်ပါတယ်။

▪️ အစားအစာ ဘေးကင်းရေးနဲ့ ကျန်းမာရေးထောက်ခံသူ နှစ်ဒါဇင်ခန့် တင်ပြခဲ့တဲ့ ၂၀၂၂ လျှောက်တင်လွှာကို အစားအစာနဲ့ ဆေးဝါးကွပ်ကဲဦးစီးဌာန(FDA) အရာရှိများက ခွင့်ပြုလိုက်ပါတယ်။

▪️ သကြားလုံးတွေ၊ မုန့်တွေမှာ အနီရောင်တောက်တောက်ဖြစ်စေတဲ့ ဓာတုပစ္စည်း အသုံးပြုခွင့်ကို ရုပ်သိမ်းပေးဖို့ တိုက်တွန်းခဲ့ကြတာ ဖြစ်ပါတယ်။

▪️ ဒီဆိုးဆေးက ဓာတ်ခွဲခန်းကကြွက်တွေမှာ ကင်ဆာဖြစ်စေတယ်လို့ တွေ့ရှိပြီးနောက် Delaney Clause စည်းမျဉ်းအရ လူတွေနဲ့ တိရိစ္ဆာန်တွေမှာ ကင်ဆာဖြစ်စေတဲ့ မည်သည့်ဆိုးဆေးမဆို FDAမှ တားမြစ်သွားရမှာ ဖြစ်ပါတယ်။

▪️ erythrosine သို့မဟုတ် Red 3 လို့ခေါ်တဲ့ ဆိုးဆေးကို အစားအစာများ၊ ဖြည့်စွက်စာများ၊ ဆေးဝါးများမှ အသိအမှတ်ပြု ဆိုးဆေးစာရင်းကနေ ထုတ်ပယ်လိုက်ပါပြီ။

▪️ လွန်ခဲ့တဲ့ ဆယ်စုနှစ်သုံးခုကျော်လောက်က FDAဟာ Red 3 ကို အလှကုန်ပစ္စည်းများနဲ့ လိမ်းဆေးတွေမှာ အသုံးပြုခွင့် ပိတ်ပင်ခဲ့ပါတယ်။

▪️ ဓာတ်ခွဲခန်းထဲမှာ Red 3 ဆိုးဆေးမြင့်မားစွာ ထိတွေ့ခဲ့ကြတဲ့ ကြွက်ထီးတွေမှာ ကင်ဆာဖြစ်ပွားတဲ့ အထောက်အထား တွေ့ခဲ့တယ်လို့ FDA လက်ထောက်ကော်မရှင်နာ ဂျင်ဂျုန်းစ်က ပြောသွားပါတယ်။

▪️ စားစရာ ထုတ်လုပ်သူတွေအနေနဲ့ ယင်းတို့ထုတ်ကုန်တွေကနေ Red 3 ကိုဖယ်ရှားဖို့ ၂၀၂၇ ဇန်နဝါရီမတိုင်ခင်အထိ အချိန်ရထားပြီး အခြားနိုင်ငံတွေမှာတော့ အသုံးပြုခွင့်ရသေးပေမယ့် တင်သွင်းကုန်တွေကတော့ အမေရိကန် စံနှုန်းအသစ်နဲ့ ကိုက်ညီရပါမယ်။

▪️ တားမြစ်တယ်ဆိုတာမျိုးက တရားရုံးမှာရင်ဆိုင်ရမှာဖြစ်ပြီး သိပ္ပံနည်းကျ အထောက်အထား မပြနိုင်ရင် ရှုံးနိမ့်မှာဖြစ်တယ်လို့ FDA ကော်မရှင်နာ ဒေါက်တာ ရောဘတ်ကယ်လစ်ဖ်က ဒီဇင်ဘာကြားနာပွဲမှာ ပြောခဲ့ပါတယ်။

▪️ Red 3 ကို ဥရောပ၊ ဩစတြေးလျ၊ နယူးဇီလန်တို့မှာ အစားအစာတွေမှာ အသုံးပြုခွင့် ပိတ်ပင်ထားပါတယ်။

#Source: India Today

ဈေးနှုန်းများမြင့်တက်နေတဲ့ကြားက ဂျပန်နိုင်ငံ တိုကျိုမှ အကြီးမားဆုံး ကျောက်မျက်ရတနာပြပွဲမှာ ဝယ်ယူသူများရဲ့ စိတ်ဝင်စားမှုကို အခိုင်အမာဆွဲဆောင်နိုင်ခဲ့ကြပြီး တန်ဖိုးကြီးပစ္စည်းများကို ပြန်လည်တန်ဖိုးထားလာတာ မြင်ရပါတယ်။
#World_Event
Published 21 January 2025
#ကျောက်မျက်ရတနာပြ #ဂျပန်နိုင်ငံတိုကျို
#YMG #Yangon_Times #Yangon_Media_Group

၂၁ ဇန်နဝါရီ၊ ၂၀၂၅

အမေရိကန်သမ္မတဟောင်း ဘားရက်အိုဘားမားဟာ ဟောလီဝုဒ်မင်းသမီးချော ဂျနီဖာ အင်နစ်စတန်နှင့် ချိန်းဆိုတွေ့ဆုံကြတယ်ဆိုတဲ့ ကောလာဟလများထွက်ပေါ်နေပြီး ဇနီးဖြစ်သူ မီချယ်လ်အိုဘားမားနှင့် အိမ်ထောင်ရေးအဆင်မပြေတော့ဘဲ မိတ်တွေတွေလိုအဆင့် ကူးပြောင်းနေကြပြီလို့ သတင်း မီဒီယာ   များက သတင်းရေးသားကြပါတယ်။

ပွဲတော်တော်များများမှာ အိုဘားမားနှင့်အတူ မီချယ်အိုဘားမားတစ်ယောက် အတူတွဲမတက်ခဲ့တာတွေ ရှိ နေလို့ အဆိုပါသတင်းများကို ဟုတ်နိုးနိုးပိုဖြစ်စေပါတယ်။

သမ္မတဟောင်းဂျင်မီကာတာရဲ့ နာရေးမှာ အိုဘားမား တစ်ဦးတည်းတက်လာပြီးနောက် သူတို့နှစ်ဦးဟာ တစ်သီးတစ်ခြားစီခွဲနေကြတယ်လို့တောင် သတင်းတွေထပ်ထွက်လာပါတယ်။

ဘားရက်အိုဘားမားနှင့် အန်နစ်စတန်တို့ဟာ ၂၀၀၇ခုနှစ် ဟောလီဝုဒ်ပွဲတစ်ခုမှာ စတင်တွေ့ခဲ့ကြပါတယ် လို့ဆိုပါတယ်။ အန်နစ်စတန်ကတော့ အဲဒီကောလာဟလတွေကို တောက်လျောက်ငြင်းဆိုခဲ့ပါတယ်။

“ ကျွန်မတို့ တစ်ကြိမ်ပဲတွေ့ကြတာ။ တကယ်တမ်းတော့ ကျွန်မက အိုဘားမားထက် မီချယ်လ်နှင့်ပိုခင် တာဖြစ်တယ်” လို့လည်း သူမက ပြောခဲ့ပါတယ်။

ရေဒါအွန်လိုင်း သတင်းဌာနရဲ့ရေးသားချက်အရ အိုဘားမားတို့အိမ်ထောင်ရေးဟာ ယခုနှစ်ပိုင်းအတွင်း ဆိုးရွားလာခဲ့တယ်လို့ဆိုပါတယ်။

တစ်ခါတုန်းက အလွန်အတွဲညီကြတဲ့ လင်မယားဟာ ဂျနီဖာအင်နစ်စတန်ရဲ့ ကောလာဟလတွေကြောင့် တင်းမာမှုပိုမြင့်တက်ခဲ့ရတယ်လို့သတင်းကရေးပါတယ်။

မီချယ်လ်ဟာ ဂျင်မီကာတာရဲ့ နာရေးနှင့် ဒေါ်နယ်ထရမ့်ရဲ့ ကျမ်းကျိန်ပွဲနှစ်ပွဲလုံး အိုဘားမားနှင့်အတူ မတက်ရောက်ဘဲ ပျက်ကွက်ခဲ့ပါတယ်။ ဒါဟာ သူတို့နှစ်ဦးအကြား မသင့်မြတ်တာတွေကြီးထွားလာနေ  တာတွေကိုပြသနေပါတယ်။

ဒါပေမယ့် မီချယ်ရဲ့ရုံးကတော့ သူမမတက်ရောက်တာဟာ အခြားကြိုတင်စီစဉ်ထားတာတွေနှင့်တိုက်ဆိုင် နေတာရယ် ၊သူမအနေနှင့် ထရမ့်ကိုမနှစ်သက်တာကြောင့်ဖြစ်တယ်လို့ဖြေရှင်းထားပါတယ်။

Source Times of India

#Daily_News
Published 21 January 2025

၁။ ရန်ကုန်မြို့၌ တရုတ်နှစ်သစ်ကူးအထိမ်းအမှတ်ချိုင်းနားတောင်းပွဲဈေးကျင်းပမည်

၂။ စိုက်ပျိုးရေးနှင့် မွေးမြူရေးတက္ကသိုလ်များ ထပ်မံဖွင့်လှစ်မည်

၃။ ဆီထွက်သီးနှံများထွက်ရှိချိန်၌ စားအုန်းဆီလျော့ချ တင်သွင်းရန်လိုအပ်ဟုဆို

၄။ ဂျပန်နိုင်ငံ၏အကြီးမားဆုံး ကျောက်မျက်ရတနာပြပွဲ တိုကျို၌ကျင်းပပြီးစီး ... အစရှိတဲ့ သတင်းတွေကို တင်ဆက်ပေးသွားမှာ ဖြစ်ပါတယ်။

#YMG #Yangon_Times #Yangon_Media_Group

#Local_News
Published 21 January 2025

▪️ လက်ဝှေ့ချန်ပီယံဟောင်း သမန်းကျားသည် ယနေ့ ဇန်နဝါရီ (၂၁)ရက် ၊ မနက် ၈နာရီ ၁၀မိနစ်အချိန်တွင်ရန်ကုန်မြို့၊ တိုက်ကြီးမြို့နယ်ရှိ နေအိမ်၌ ခရစ်တော်၌ အိပ်ပျော်သွားကြောင်း ရိုးရာလက်ဝှေ့ အသိုင်းအဝိုင်းနှင့် နီးစပ်သူများထံမှ သိရသည်။

▪️ ဦးစောလှမင်း (ခ) သမန်းကျားသည် ကွယ်လွန်ချိန်၌ အသက် (၇၃)နှစ် အရွယ်ရှိပြီဖြစ်ကာ ဇနီးဖြစ်သူ ၊သားတစ်ဦးနှင့်သမီးနှစ်ဦးကျန်ရှိကြောင်း သိရသည်။

▪️ ဘားအံမြို့ဇာတိဖြစ်သူ ဦးစောလှမင်းအား သင်္ဂြိုဟ်မည့်ရက်နှင့် အချိန်ကို စီစဉ်လျက်ရှိပြီး ထပ်မံအသိ ပေးသွားမည်ဖြစ်ကြောင်းသိရသည်။

▪️ ၎င်းသည် အသက်၂၄နှစ်အရွယ်တွင် လက်ဝှေ့ချန်ပီယံတစ်ဦးဖြစ်လာခဲ့ပြီး အသက်၅၉ အထိ လက်ဝှေ့ထိုးခဲ့ကြောင်း၊ ၂၀၂၄ခုနှစ်တွင် ဆီးကျိတ်ကင်ဆာ ရောဂါဖြစ်ပွားခဲ့ကြောင်း သိရသည်။

#YMG/NN #Yangon_Times

၂၀၂၅ ခုနှစ် တရုတ်နှစ်သစ်ကူးအထိမ်းအမှတ် ချိုင်းနားတောင်းပွဲဈေးကို
အခုလအတွင်း ၇ ရက်တိုင်တိုင် ရန်ကုန်မြို့မှာ ကျင်းပသွားမယ်လို့ ပွဲတော်ကျင်းပရေးကော်မတီတာဝန်ရှိသူတစ်ဦးက ရန်ကုန်မီဒီယာဂရုကို ပြောပါတယ်။
#Local_News
Published 21 January 2025
#တရုတ်နှစ်သစ်ကူးအထိမ်းအမှတ် #ချိုင်းနားတောင်းပွဲဈေး
#YMG/NN #Yangon_Times