#Local_News
Published_23 Jan 2025

▪️ တိုးတက်လာသည့်စစ်နည်းဗျူဟာ၊စစ်လက်နက်ပစ္စည်း၊စစ်အတတ်ပညာများကိုသုတေသနပြုလေ့လာ၍ သင်ခန်းစာတိုးချဲ့သင်ကြားရန်လိုကြောင်း နိုင်ငံတော်စီမံအုပ်ချုပ်ရေးကောင်စီဥက္ကဋ္ဌ တပ်မတော်ကာကွယ်ရေး ဦးစီးချုပ် ဗိုလ်ချုပ်မှူးကြီး မင်းအောင်လှိုင်က ပြောသည်။

▪️ ယမန်နေ့က နေပြည်တော်တိုင်းစစ်ဌာနချုပ်၊ တောင်ညိုတပ်နယ်ရှိ နယ်မြေခံလေ့ကျင့်ရေးသင်တန်း ကျောင်းနှင့် တပ်မတော်ရုပ်မြင်သံကြားထုတ်လွှင့်ရေးတပ်(တောင်ညို)သို့ သွားရောက် ကြည့်ရှုစစ်ဆေးစဉ် အထက်ပါအ တိုင်း ပြောကြားခဲ့ခြင်း ဖြစ်သည်။

▪️ သင်တန်းသားများကို သင်ကြားလေ့ကျင့်ပေးရာ၌ စာပေပိုင်း ဆိုင်ရာများကို အမှန်တကယ်သိရှိနားလည်မှုရှိ အောင် သင်ကြားပေးရမည့်အပြင် လက်တွေ့လေ့ကျင့်မှုများကိုလည်း ကျွမ်းကျင်ပိုင်နိုင်စွာဆောင်ရွက်နိုင်ရေး လေ့ကျင့်ပေးရမည်ဖြစ်ကြောင်းနှင့် ကြံ့ခိုင်ရေးလေ့ကျင့်မှုများ ဆောင်ရွက်ရာတွင် အသက်အရွယ် အဆင့်အလိုက်သတ်မှတ်ထားသည့် စံချိန်စံနှုန်းများအတိုင်း ပြည့်မီအောင်လေ့ကျင့်ပေးရန် ၎င်းက ပြောကြားခဲ့သည်။

▪️ ယင်းအပြင်ခေတ်နှင့် အညီပြောင်းလဲတိုးတက်လာသည့် စစ်နည်းဗျူဟာများ၊ စစ်လက်နက်ပစ္စည်းများ၊ စစ်အတတ်ပညာများကို စဉ်ဆက်မပြတ် သုတေသနပြု လေ့လာ၍ သင်ခန်းစာများတိုးချဲ့သင်ကြားပို့ချပေးသွားရန်၊အရည်အချင်း ပြည့်ဝပြီး လက်တွေ့နယ်ပယ်တွင် ကာကွယ်ရေးနှင့်လုံခြုံရေးတာဝန်များကို ပိုင်နိုင်စွာ ထမ်းဆောင်နိုင်ရေး သင်တန်းသားများကို စနစ်တကျလေ့ကျင့် မွေးထုတ်ပေးရန်လည်း ပြောကြားခဲ့ကြောင်း သိရသည်။

▪️ လေ့ကျင့်ရေးပိုင်းဆိုင် ရာများနှင့် ပတ်သက်၍ ယနေ့ခေတ်တွင် စစ်လက်နက်နည်းပညာများ၊ စစ်နည်းဗျူဟာများသည် အဆက်မပြတ်တိုးတက်လျက်ရှိရာ “လေ့လာ၊ လေ့ကျင့်၊ လိုက်နာ” ဟူသည့်မူဝါဒအတိုင်း စစ်အ တတ်ပညာ များကို အမြဲမပြတ်လေ့လာနေကြကာသင်ယူထားရှိပြီးဖြစ်သည့် စစ်မှုရေးရာနည်း နာများနှင့် အတတ်ပညာများကို ပိုမိုကျွမ်းကျင်အောင် အမြဲလေ့ကျင့်နေရရန်နှင့် ချမှတ် ထားရှိသည့်စည်းမျဉ်းစည်း ကမ်းများအတိုင်း အမြဲလိုက်နာကျင့်သုံးနေရမည်ဖြစ်ကြောင်းလည်း ပြောကြားခဲ့သည်။

▪️ အလားတူ အုပ်ချုပ်သူများအနေဖြင့် မိမိတို့ကွပ်ကဲနေရသူများကို စနစ်တကျကွပ်ကဲကြပ်မတ်နေရန်လိုသကဲ့သို့ ၎င်းတို့၏သက်သာ ချောင်ချိရေးအတွက်လည်းမိမိတို့တတ်စွမ်းသရွေ့ဖြည့်ဆည်းဆောင်ရွက်ပေးရန်လို ကြောင်း၊ စစ်သည်တစ်ဦးချင်းရသင့်ရထိုက်သည့်အခွင့်အရေးများကိုမှန်မှန်ကန်ကန်ဖြင့်ဖြည့်ဆည်းပေးရန်၊လက်အောက်၏လိုအပ်ချက်ကို ဖြေရှင်းပေးနိုင်ရေး စဉ်းစားဆောင်ရွက်ကြရန်လည်း ပြောကြားခဲ့ကြောင်း သိရသည်။

▪️ မြန်မာနိုင်ငံ၏ လက်ရှိလူဦးရေမှာ ၅၂ သန်းခန့်ရှိပြီး အမျိုးသား ၄၇ ရာခိုင်နှုန်းနှင့် အမျိုးသမီး ၅၃ ရာခိုင်နှုန်း ခန့်ရှိသည့်အနက် လူဦးရေအနည်းငယ်သာ တပ်မတော်သားဘဝကိုခံယူ၍ မွန်မြတ်လှသည့် နိုင်ငံတော်ကာကွယ်ရေးနှင့်လုံခြုံရေးတာဝန်များကို ထမ်းဆောင်နိုင်ကြခြင်းဖြစ်သဖြင့် အများသူငှာလုပ်ဆောင်နိုင်ရန်ခက်ခဲ သည့် တပ်မတော်သားဘဝကို ဂုဏ်ယူတန်ဖိုးထားကြရန်လိုကြောင်း၊ နိုင်ငံနှင့် ပြည်သူတို့အတွက် မြင့်မြတ်လှသည့် တာဝန်များကို ထမ်းဆောင်နေရသည့် တပ်မတော်သားများ၏ ဘဝကိုဂုဏ်ယူတတ်ရန်နှင့် ပေးအပ်လာသည့်တာဝန်များကို ကျေပွန်စွာထမ်းဆောင်သွားရန်လိုကြောင်းလည်း နစကဥက္ကဌကပြောကြားခဲ့ကြောင်း သိရသည်။

#Yangon_Times/PP

#World_News
Published 23 January 2025

▪️ ဗုဒ္ဓဟူးနေ့က လော့စ်အိန်ဂျလိစ်မြောက်ပိုင်းမှာ နောက်ထပ်တောမီးတစ်ခု လောင်ကျွမ်းခဲ့ရာ ဧကပေါင်း ၉၄၀၀ ကျော် လျင်မြန်စွာကူးစက်လောင်ကျွမ်းခဲ့ပြီး လေပြင်းနဲ့ ခြုံထူများက မီးကိုအားပေးသလို ဖြစ်ခဲ့ကာ လူပေါင်း ၃၁၀၀၀ ကျော်ကို မဖြစ်မနေ ထွက်ပြေးတိမ်ရှောင်ဖို့ ညွှန်ကြားခဲ့ရပါတယ်။

▪️ လော့စ်အိန်ဂျလိစ်မြောက်ပိုင်း မိုင် ၅၀ အကွာက The Hughes မီးက မြို့ပြနေရာမှ တောမီးကြီးနှစ်ခုကို အတော်လေးထိန်းချုပ်လာနိုင်တဲ့ မီးသတ်သမားတွေ နောက်ထပ်ရင်ဆိုင်စရာ ဖြစ်လာပါတယ်။

▪️ ဗုဒ္ဓဟူးနေ့ နာရီပိုင်းအတွင်းမှာပဲ The Hughes မီးက Eaton မီးရဲ့ ၃ ပုံ ၂ ပုံလောက်အထိ ကြီးမားလာခဲ့ပါတယ်။

▪️ လော့စ်အိန်ဂျလိစ်ကောင်တီ Castaic Lakeနေရာမှ လူတွေကို အသက်အန္တရာယ် ချက်ချင်းရှိနေပြီလို့ တာဝန်ရှိသူများ သတိပေးခဲ့ပြီး ကယ်လီဖိုးနီးယားတောင်ပိုင်း အများစုမှာ ခြောက်သွေ့လေပြင်းများကြောင့် မီးဘေးအန္တရာယ် ရှိနေဆဲဖြစ်ပါတယ်။

▪️ ဆန်ဂေဘရီယယ်တောင်တန်းတွေက ဧက ၇ သိန်းရှိတဲ့ ဥယျာဉ်ကြီးတစ်ခုလုံးကို ဧည့်သည်ဝင်ရောက်ခွင့် ပိတ်ထားတယ်လို့ အိန်ဂျလိစ်အမျိုးသားသစ်တောက ပြောပါတယ်။

▪️ မီးလျင်မြန်စွာ ကူးစက်လာနိုင်တာကို ခန့်မှန်းပြီး ကယ်လီဖိုးနီးယားတောင်ပိုင်းတဝိုက် မီးသတ်သမား ၁၁၀၀ ခန့် နေရာချထားတယ်လို့ ကယ်လီဖိုးနီးယား မီးကာကွယ်ရေးဌာနက ဆိုပါတယ်။

▪️ Hughesမီးအတွက် မီးသတ်သမား ၄ ထောင်ကျော် ငြိမ်းသတ်နေကြပါတယ်။
ကယ်လီဖိုးနီးယားတောင်ပိုင်းမှာ ၉ လကြာအောင် မိုးမရွာခဲ့ဘဲ အလွန်ခြောက်သွေ့အန္တရာယ်များတဲ့ အခြေအနေဖြစ်ခဲ့ပေမယ့် စနေနေ့မှ တနင်္လာနေ့အထိ မိုးရွာသွန်းမယ်လို့ ခန့်မှန်းရတာကြောင့် မီးသတ်သမားတွေအတွက် အတော်လေးသက်သာရာ ရဖွယ်ရှိပါတယ်။

▪️ ရုပ်သံဗီဒီယိုထဲမှာ ရဟတ်ယာဉ်တွေက ရေကန်ထဲမှ ရေတွေကိုယူနေပြီး တောင်ကုန်းပေါ်ကနေ မီးသတ်ဆေးများ ဖြန်းနေတာ တွေ့ရပါတယ်။

▪️ ဇန်နဝါရီ ၇ ရက်နေ့က စတင်လောင်ကျွမ်းတဲ့ မီးကြီးနှစ်ခုကတော့ အတော်လေး ထိန်းချုပ်ထားနိုင်ပြီ ဖြစ်ပါတယ်။

#Source: Reuters

#World_Health
Published 23 January 2025

▪️ ဆယ်လ်မွန်နဲလားလို့ခေါ်တဲ့ ဘက်တီးရီးယားပိုးဟာ အများပြည်သူ ကျန်းမာရေးပြဿနာ ဖြစ်လာပြီး ပဋိဇီဝဆေးယဉ်ပါးကာ ဆေးကုသမှုတွေကို ခံနိုင်ရည်ရှိသလို ကူးစက်နေရာအမျိုးမျိုးကနေ ပျံ့နှံ့နိုင်ပါတယ်။

▪️ ရောဂါပိုးရှိနေတဲ့ အစားအစာတွေ၊ လူသားတွေ၊ တိရိစ္ဆာန်တွေနဲ့ တိုက်ရိုက်ထိတွေ့မှုကနေ ကူးစက်တတ်သလို ပန်စတိတ်သုတေသီများရဲ့ လေ့လာချက်မှာဆိုရင် အိမ်မွေးခွေးတွေကနေလည်း ကူးစက်နိုင်ပါတယ်။

▪️ ခွေးတွေနဲ့ လူတွေ နီးစပ်တဲ့အခြေအနေကို လေ့လာချက်မှာ အလေးပေးဖော်ပြထားပြီး ဆေးယဉ်ပါးဆယ်လ်မွန်နဲလားတွေက တိရိစ္ဆာန်ကနေ လူသားဆီ ကူးစက်နေတာ စိုးရိမ်စရာ ဖြစ်နေပါတယ်။

▪️ ခွေးတွေမှာ ဆယ်လ်မွန်နဲလားက ရောဂါလက္ခဏာ မပေါ်တတ်ဘဲ ဘက်တီးရီးယားကို သယ်ဆောင်ထားနိုင်ကာ အစားအစာများ သန့်ရှင်းစွာ မကိုင်တွယ်ခြင်း၊ အိမ်မွေးတွေကို ထိန်းသိမ်းရာမှာ မသန့်ရှင်းခြင်းတို့ကြောင့် ရောဂါကူးစက်နိုင်ခြေ များစေပါတယ်။

▪️ ဆယ်လ်မွန်နဲလားလို ဘက်တီးရီးယားက ကျန်းမာရေးအန္တရာယ်များစေပေမယ့် ကျန်းမာရေးအတွက် ကောင်းမွန်စေတဲ့ ဘက်တီးရီးယားတွေလည်း ရှိနေပါတယ်။
အိမ်မွေးတွေနဲ့ အနီးကပ်နေတဲ့အခါ ကျန်းမာရေးအန္တရာယ်များအကြောင်း သတိထားဖို့လိုပါတယ်။

▪️ အမေရိကန် FDA ထံမှ ဇီဝစောင့်ကြည့်ရေး အချက်အလက်များမှ ခွေးများရဲ့ ဆယ်လ်မွန်နဲလား ကူးစက်မှုတွေကို ဆန်းစစ်ခဲ့ရာ လူသားတွေမှ ကူးစက်မှုတွေနဲ့ ကိုက်ညီနေပါတယ်။

▪️ ခွေးတွေမှာတွေ့ရတဲ့ ရောဂါပိုးမျိုးနွယ်တွေဟာ လူသားတွေမှာ ဆေးယဉ်ပါးတဲ့ မျိုးနွယ်တွေဖြစ်နေပါတယ်။

▪️ ဒီအတွက် လက်ဆေးခြင်းလိုမျိုး တစ်ကိုယ်ရည် သန့်ရှင်းမှုအလေ့အထများ ပြုလုပ်ဖို့အရေးကြီးကြောင်း သုတေသနပြုစုသူ အန်ကူချီယာအမ်အီကာနာထာက ပြောသွားပါတယ်။

▪️ ဒီသုတေသနရဲ့ ရည်ရွယ်ချက်က အိမ်မွေးတိရိစ္ဆာန်မွေးခြင်းကို အားမပေးချင်တာမဟုတ်ဘဲ အန္တရာယ်တွေအကြောင်း သိရှိစေလိုတာ ဖြစ်ပါတယ်။

#Source: India Today

#World_Health
Published 23 January 2025

▪️ အချိုဓာတ်နဲ့ ပြည့်ဝဆီ ပါဝင်မှုများတဲ့ အစားအသောက်က ဦးနှောက်အတွင်း ရောင်ရမ်းမှုဖြစ်စေကာ ဦးနှောက်ဆဲလ်များကို ထိခိုက်စေနိုင်ပြီး ဒီမန်ရှာရောဂါ ဖြစ်နိုင်ခြေများစေဖွယ်ရှိတယ်လို့ လေ့လာချက်တွေမှာ တွေ့ရှိယူဆထားကြပါတယ်။

▪️ ပြည့်ဝဆီမြင့်မားတဲ့ အသားကြီးတွေ အထူးသဖြင့် အဆင့်ဆင့် ထုပ်ပိုးထုတ်လုပ်ထားတဲ့ အသားကြီးတွေကို အစားများပါက ရံဖန်ရံခါမှ စားသုံးတာထက်ပိုပြီး ဦးနှောက်စွမ်းဆောင်ရည် ကျဆင်းခြင်းနဲ့ ဒီမန်ရှာဖြစ်နိုင်ခြင်းတို့ ဖြစ်စေနိုင်ကြောင်း တွေ့ရှိထားပါတယ်။

▪️ ဒါ့အပြင် အသားကြီးတွေက ဆီးချိုရောဂါ ဒုတိယအမျိုးအစားနဲ့ နှလုံးရောဂါတို့လည်း ဖြစ်နိုင်ခြေများစေကာ ဦးနှောက်ကျန်းမာရေး ယုတ်လျော့စေတယ်လို့လည်း ဘရစ်ဂမ်နဲ့ အမျိုးသမီးဆေးရုံမှ ဒေါက်တာ ဒေါင်ဝမ်က ပြောပါတယ်။

▪️ အသားကြီးတွေထဲမှာ အမဲသား၊ ဝက်သား၊ သိုးသားတို့ပါဝင်ပြီး အဆင့်ဆင့်ထုတ်လုပ်ထားတဲ့ အသားကြီးတွေက အရသာမှုန့်များ၊ ဓာတုပစ္စည်းများ ပါဝင်တဲ့ ဝက်ပေါင်ခြောက်၊ ဟော့ဒေါ့၊ ဝက်အူချောင်းနဲ့ အလားတူထုတ်ကုန်များ ဖြစ်ပါတယ်။

▪️ ဒါတွေစားသုံးခြင်းရဲ့ ကျန်းမာရေးဆိုးကျိုးတွေထဲမှာ ဒီမန်ရှာက ထိပ်ဆုံးကပါဝင်နေပါတယ်။

▪️ ဒီမန်ရှာဆိုတာက မှတ်ဉာဏ်စွမ်းရည်၊ အာရုံစူးစိုက်မှု၊ ပိုင်းခြားဆင်ခြင်မှုတို့ ဆုံးရှုံးလာတဲ့ အခြေအနေဖြစ်ပြီး အသားကြီးတွေကို လက်တစ်ဖဝါးစာ အရွယ်အစားရဲ့ ၄ ပုံ ၁ ပုံမျှ နေ့စဉ်စားသုံးခြင်းဖြင့် ဒီမန်ရှာဖြစ်နိုင်ခြေ ၁၃ ရာခိုင်နှုန်း ပိုများစေပါတယ်။

▪️ နောက်တစ်မျိုးက မှတ်ဉာဏ်စွမ်းရည်နဲ့ စဉ်းစားတွေးတောနိုင်စွမ်းတို့ ဆိုးရွားလာတဲ့ အခြေအနေဖြစ်ပါတယ်။

▪️ နေ့စဉ် အဆင့်ဆင့်ထုတ်လုပ်ထားတဲ့ အသားကြီးကို လက်တစ်ဖဝါးစာ အရွယ်အစားရဲ့ ၄ ပုံ ၁ ပုံမျှစားသုံးခြင်းဖြင့် ထိုအခြေအနေ ဖြစ်နိုင်ခြေ ၁၄ ရာခိုင်နှုန်းများစေပါတယ်။

▪️ ဒါ့အပြင် ထိုကဲ့သို့အသားတွေ များများစားခြင်းဖြင့် ဦးနှောက်ရဲ့ မှတ်မိနိုင်စွမ်း၊ ကျိုးကြောင်းဆင်ခြင်းမှု၊ ပြဿနာဖြေရှင်းစွမ်းရည်တို့လည်း ထိခိုက်စေကာ နေ့စဉ်စားသုံးခြင်းဖြင့် ဦးနှောက်ကို ၁.၆၁ နှစ်ခန့် အိုမင်းစေပါတယ်။

▪️ အသားကြီးစားမယ့်နေရာမှာ အခွံမာသီး၊ ပဲအမျိုးမျိုး၊ ငါးတို့စားသုံးခြင်းဖြင့် ဒီမန်ရှာဖြစ်နိုင်ခြေ လျော့နည်းစေပါတယ်။

▪️ အသားကြီးစားသုံးတဲ့အခါမှာလည်း ခပ်သေးသေးပမာဏကို ပြောင်းဂျုံဆန်များ၊ ဟင်းရွက်များ၊ အသီးအနှံများ၊ ပဲများနဲ့ စားသုံးသင့်တယ်လို့ နော့သ်ဝဲလ်ကျန်းမာရေး လီနော့စ်ဟေးလ်ဆေးရုံမှ အာဟာရပညာရှင် အက်ရှ်လေဘော်မိုလ်က ပြောသွားပါတယ်။

#Source: New York Post

တနင်္ဂနွေနေ့မှာ အစ္စရေးလ်-ဟားမတ်စ် အပစ်အခတ်ရပ်စဲရေး သဘောတူညီချက် စတင်အသက်ဝင်လာပြီး ထောင်ချီရှိတဲ့ စစ်ဘေးရှောင် ပါလက်စ်တိုင်းအရပ်သားများ ဂါဇာတောင်ပိုင်း ရာဖာမြို့သို့ ပြန်လာချိန်မှာ ထားရစ်ခဲ့ရတဲ့ နေအိမ်တွေလုံးဝပျက်စီးနေတာကို တွေ့ရှိကြရပါတယ်။
#World_Crisis
Published 22 January 2025
#အစ္စရေးလ်-ဟားမတ်စ် #ပါလက်စ်တိုင်းအရပ်သား
#YMG #Yangon_Times #Yangon_Media_Group

#Daily_News
Published 22 January 2025

၁။ ဝင်းစိန်တောရဆရာတော်ကြီး၏ ၁၀၄ နှစ်မြောက် ဝိဇာတမွေးနေ့ပူဇော်ပွဲမနက်ဖန်ကျင်းပမည်

၂။ ပဲစဉ်းငုံလွတ်လပ်စွာတင်သွင်းခွင့် အိန္ဒိယနှစ်တိုးသတ်မှတ်လိုက်‌သောကြောင့် ဈေးမာလာနိုင်

၃။ ယခုနှစ်မှစတင်ကာမတ်လ ၂၁ ရက်နေ့ကို ကမ္ဘာ့ရေခဲတောင်များနေ့အဖြစ် သတ်မှတ်

၄။ နေရပ်ပြန်လာသည့် စစ်ဘေးရှောင်ပါလက်စ်တိုင်းအရပ်သားများ နေအိမ်အပျက်အစီးများသာကြုံတွေ့ ... အစရှိတဲ့ သတင်းတွေကို တင်ဆက်ပေးသွားမှာ ဖြစ်ပါတယ်။

#YMG #Yangon_Times #Yangon_Media_Group

၂၂ ဇန်နဝါရီ ၊၂၀၂၅

အမေရိကန်သမ္မတဒေါ်နယ်ထရမ့်က အမေရိကန်ရဲ့ နိုင်ငံခြားအကူအညီပေးရေး အစီအစဉ်တွေအားလုံးကို ရက်ပေါင်း ၉၀ တိတိ ဆိုင်းငံ့လိုက်တဲ့ သမ္မတအမိန့်ကို လက်မှတ်ရေးထိုး လိုက်ပါတယ်။ သူ့အနေနှင့်အဲဒီရက်ပေါင်း ၉၀ အတွင်း အဲဒီအကူအညီတွေဟာ သူ့ရဲ့ နိုင်ငံရေးရည်မှန်းချက်တွေနှင့်ကိုက်ညီမှု ရှိမရှိ သုံးသပ်မယ်လို့ဆိုပါတယ်။

ဘာဖြစ်လို့သူအဲသလိုလုပ်ရသလဲ

-အမေရိကန်ရဲ့ နိုင်ငံခြားအကူအညီတွေဟာ အမေရိကန်ရဲ့အကျိုးစီးပွားနှင့် ကိုက်ညီမှုမရှိ၊  အမေရိကန်တန်ဖိုးတွေနှင့် ဖြောင့်ဖြောင်းကြီးဆန့်ကျင်နေလို့ဖြစ်တယ်လို့ အမိန့်မှာပါရှိပါတယ်။

-အဲဒီအစီအစဉ်တွေဟာ နိုင်ငံခြားတိုင်းပြည်တွေမှာ  နိုင်ငံတွင်းနှင့်နိုင်ငံအကြားရှိ သဟဇာတနှင့် တည်ငြိမ်သော ဆက်ဆံရေးများအပေါ်  တိုက်ရိုက်ဆန့်ကျင်နေသော အိုင်ဒီယာများကို မြှင့်တင် ကာ ကမ္ဘာ့ငြိမ်းချမ်းရေးကို မတည်ငြိမ်ဖြစ်အောင်လုပ်ဆောင်နေခြင်းကြောင့်ဟုဆိုပါတယ်။

ဘာတွေဖြစ်မလဲ

-အမေရိကန်ရဲ့ နိုင်ငံခြားအကူအညီအစီအစဉ်များ ချက်ခြင်းရပ်ဆိုင်းရတော့မည်။

နောက်လာမည့် အမေရိကန်၏ နိုင်ငံခြားရေးအကူအညီများသည် သမ္မတထရမ့်၏ နိုင်ငံခြားရေးမူဝါဒ နှင့် ကိုက်ညီရမည်။

-လက်ရှိအကူအညီများကို ရပ်ဆိုင်းပြီး ရက်ပေါင်း ၉၀ အတွင်းသုံးသပ်မည်။

ယင်းနောက်ဘာတွေဖြစ်မလဲ

- ပြန်လည်သုံးသပ်ပေးပြီးနောက် အကူအညီပေးရေးအစီအစဉ်များ ပြန်လည်စတင်မည်။

- နိုင်ငံခြားအကူအညီအသစ် များကို နိုင်ငံခြားရေးဝန်ကြီးက အတည်ပြုရမည်။ နိုင်ငံခြားရေးဝန်ကြီးက အစီအစဉ်များကို ရပ်ဆိုင်းခွင့်ရှိသည်။

အာမခံအမျိုးအစားသစ် ခြောက်မျိုးကို ထပ်မံဝန်ဆောင်မှုပေးဖို့ရှိတယ်လို့ အာမခံလုပ်ငန်းကြီးကြပ်ရေးအဖွဲ့ရဲ့ (၃၈) ကြိမ်မြောက် အစည်းအဝေးက သိရပါတယ်။
#Local_News
Published 22 January 2025
#အာမခံအမျိုးအစားသစ် #ထပ်မံဝန်ဆောင်မှုပေး
#YMG/SW #Yangon_Times

ယခုနှစ်မှစတင်ကာ မတ်လ ၂၁ ရက်နေ့ကို ကမ္ဘာ့ရေခဲတောင်များနေ့အဖြစ် သတ်မှတ်ပြီး နှစ်စဉ်ပြုလုပ်သွားမယ်လို့ ၂၀၂၅ ခုနှစ်၊ နိုင်ငံတကာရေခဲတောင်များ ထိန်းသိမ်းရေးနှစ် အထိမ်းအမှတ်အခမ်းအနားမှ သိရပါတယ်။
#Local_News
Published 22 January 2025
#ကမ္ဘာ့ရေခဲတောင်များနေ့ #အထိမ်းအမှတ်အခမ်းအနား
#YMG/SW #Yangon_Times

မြန်မာ့ပဲစဉ်းငုံလွတ်လပ်စွာ တင်သွင်းခွင့်ကို အိန္ဒိယနှစ်တိုးသတ်မှတ်လိုက်‌တာ ကြောင့် ပြည်တွင်းဈေးမာလာနိုင်တယ်လို့ စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ မြန်မာကုန်သွယ်မှုမြှင့်တင်ရေးအဖွဲ့က သိရပါတယ်။
#Local_News
Published 22 January 2025
#မြန်မာ့ပဲစဉ်းငုံ #အိန္ဒိယနှစ်တိုးသတ်မှတ်
#YMG/NN #Yangon_Times

မွန်ပြည်နယ်ဝင်းစိန်တောရဆရာတော်ဘုရားကြီး၏ သက်တော်(၁၀၄)နှစ်မြောက် ဝိဇာတမွေးနေ့ပူဇော်ပွဲကို မနက်ဖန်မှာ ကျင်းပသွားမယ်လို့ နာယကဆရာတော် ဘဒ္ဒန္တသောဟုလာ(ခ) ဦးဇင်းလေး ကရန်ကုန်မီဒီယာဂရုကိုမိန့်ကြားပါတယ်။
#Local_News
Published 22 January 2025
#ဝင်းစိန်တောရဆရာတော်ကြီး #ဝိဇာတမွေးနေ့ပူဇော်ပွဲ
#YMG/NN #Yangon_Times

#Local_News
Published 22 January 2025

▪️ လန်ချန်း-မဲခေါင်တရားဥပဒေစိုးမိုးရေး “ဇင်ယော်” ပူးပေါင်းလှုပ်ရှားမှု ဒုတိယအပိုင်းကို ယခုနှစ်၏ သင့်တော်သောအချိန်တွင် စတင်သွားမည်ဖြစ်ကြောင်း လန်ချန်း-မဲခေါင် တရားဥပဒေစိုးမိုးရေးပူးပေါင်းဆောင်ရွက်မှုစင်တာ (LMLECC) က ဇန်နဝါရီလ ၂၁ ရက်တွင် တရုတ်နိုင်ငံ ယူနန်ပြည်နယ်ကူမင်းမြို့၌ “ဇင်ယော်” ပူးပေါင်းလှုပ်ရှားမှု ပြန်လည်သုံးသပ်ခြင်းအစည်းအဝေးမှ သိရသည်။

▪️ အဆိုပါအစည်းအဝေးသို့ ကမ္ဘောဒီးယားနိုင်ငံ ပြည်ထဲရေးဝန်ကြီးဌာန၊ တရုတ်နိုင်ငံပြည်သူ့လုံခြုံရေးဝန်ကြီးဌာန၊ လာအိုနိုင်ငံ ပြည်သူ့လုံခြုံရေး ဝန်ကြီးဌာနနှင့် ကာကွယ်ရေးဝန်ကြီးဌာန၊ မြန်မာနိုင်ငံ ပြည်ထဲရေးဝန်ကြီးဌာန၊ ထိုင်းနိုင်ငံ တော်ဝင်ရဲတပ်ဖွဲ့၊ ဗီယက်နမ်နိုင်ငံ ပြည်သူ့လုံခြုံရေးဝန်ကြီးဌာနတို့မှ ကိုယ်စားလှယ်အဖွဲ့များ တက်ရောက်ကြပြီး ကုလသမဂ္ဂ မူးယစ်ဆေးဝါးနှင့် ရာဇဝတ်မှုဆိုင်ရာရုံး (UNODC)၊ အာဆီယံရဲတပ်ဖွဲ့စသည့် နိုင်ငံတကာအဖွဲ့အစည်းများကိုလည်း အစည်းအဝေးသို့ တက်ရောက်ရန် ဖိတ်ကြားခဲ့ကြောင်း သိရသည်။

▪️ “ဇင်ယော်” တရားဥပဒေစိုးမိုးရေး ပူးပေါင်းလှုပ်ရှားမှုသည် ကမ္ဘောဒီးယား၊ တရုတ်၊ လာအို၊ မြန်မာ၊ ထိုင်း၊ ဗီယက်နမ် စသည့် ၆ နိုင်ငံ၏ တရားဥပဒေစိုးမိုးရေးဌာနများမှ ညှိနှိုင်းပြီး ဒေသဆိုင်ရာ ဆက်သွယ်ရေးလိမ်လည်မှု၊ ကွင်းဆက်ရာဇ၀တ်မှုများနှင့် လက်နက်ခဲယမ်းမှောင်ခိုမှု အတူတကွတိုက်ဖျက်ခဲ့ကြသည့်လှုပ်ရှားမှုဖြစ်ပြီးအဆိုပါလှုပ်ရှားမှုသည် နိုင်ငံအသီးသီး၏ တရားဥပဒေစိုးမိုးရေး အရင်းအမြစ်များ စုစည်းထားပြီး ဒေသတွင်း ဆက်သွယ်ရေးလိမ်လည်မှုနှင့် လက်နက်ခဲယမ်းမှောင်ခိုမှု တိုက်ဖျက်ရေးအတွက် ထိရောက်သော ပူးပေါင်းဆောင်ရွက်မှုအင်အားဖြစ်ကြောင်း၊ အစားထိုး၍မရသော ဒေသဆိုင်ရာ တရားဥပဒေစိုးမိုးရေးပူးပေါင်းဆောင်ရွက်မှုပလက်ဖောင်းအနေဖြင့် ကောင်းမွန်စွာ ပါဝင်ခဲ့ကြောင်း၊ မျှော်မှန်းထားသော ရလဒ်များ ရရှိခဲ့ကြောင်း၊ ဒေသတွင်း လုံခြုံရေးနှင့် တည်ငြိမ်အေးချမ်းရေးကို ထိရောက်စွာ ကာကွယ်ပေးနိုင်ခဲ့ကြောင်း ဘက်အသီးသီးတို့မှ တညီတညွတ်သဘောတူကြကြောင်း သိရသည်။

▪️ ဇင်ယော်လှုပ်ရှားမှုမှတဆင့် ဆက်သွယ်ရေးလိမ်လည်မှုကို အဓိကထားသော ရာဇဝတ်မှုအသီးသီး စုစုပေါင်း ၁၆၀ မှုကို စုံစမ်းဖော်ထုတ်နိုင်ခဲ့ပြီး တရားခံပေါင်း ၇ သောင်းကျော် ဖမ်းဆီးခဲ့ကာ ပြည်သူ ၁၆၀ ဦးအား ကယ်ဆယ်နိုင်ခဲ့ကြောင်း ၊ယခုနှစ်၏ သင့်လျှော်သောအချိန်ကောင်းတွင် “ဇင်ယော်”ပူးပေါင်းလှုပ်ရှားမှု ဒုတိယအပိုင်းကို စတင်သွားမည်ဖြစ်ပြီး ဆက်သွယ်ရေးလိမ်လည်မှုနှင့် ကွင်းဆက်ရာဇ၀တ်မှုများအား အဆက်မပြတ်အာရုံစိုက်တိုက်ဖျက်သွားမည်ဖြစ်ကြောင်း၊အထူးသဖြင့် နိုင်ငံအသီးသီးမှပျောက်ဆုံး၊ ပိတ်လှောင်ခံနေရသော ပြည်သူ ပြည်သားများကို အစွမ်းကုန်ကယ်ဆယ်သွားမည်ဖြစ်ပြီး ဒေသတွင်းနိုင်ငံအသီးသီးမှ နိုင်ငံသားများ၏ အသက်အိုးအိမ်စည်းစိမ်လုံခြုံရေးနှင့် ဒေသတွင်း လုံခြုံတည်ငြိမ်အေးချမ်းရေးတို့ကို လက်တွေ့ကျကျ ကာကွယ်စောင့်ရှောက်သွားမည်ဖြစ် ကြောင်း သိရသည်။

#YMG/SW #Yangon_Times