Published 3 July 2022

အမည်မဖော်လိုတဲ့ ချီလီအလုပ်သမားတစ်ဦးဟာ လစာစာရင်း မှားယွင်းမှုကြောင့် သူ့လစာအမှန်ဖက် အဆပေါင်း ၃၃၀ဆနီးပါး ရရှိလိုက်ပြီးနောက် အလုပ်မှနှုတ်ထွက်သွားကာ ဆက်သွယ်လို့မရဖြစ်နေတယ်လို့ သတင်းတစ်ပုဒ်က ရေးသားပါတယ်။

အေးခဲအသားထုတ်လုပ်တဲ့ CIAL Alimentos ကုမ္ပဏီမှာ စာပို့လက်ထောက်အဖြစ်အလုပ်လုပ်တဲ့ ဝန်ထမ်းတစ်ဦးဟာ မေ၃၀ ရက်နေ့က လခထုတ်တဲ့အခါ ချီလီငွေ ၁၆၅,၃၉၈,၈၅၁ ပီဆို(ဒေါ်လာ၁၈၀,၄၁၈)ရရှိခဲ့တာဖြစ်တယ်လို့ ဆန်တီယာဂိုအခြေစိုက်  စီးပွားရေးသတင်းစာတစ်စောင် ဖြစ်တဲ့ Diario Financiero က သတင်းရေးသားခဲ့ပါတယ်။

သူတကယ်ရမယ့်လစာက ချီလီငွေ ၅၀၀,၀၀၀ ပီဆို(ဒေါ်လာ၅၄၅) ပဲဖြစ်ပါတယ်လို့ သတင်းစာကပြောပါတယ်။

အဲဒီဝန်ထမ်းက သူ့ရဲ့ ဖြန့်ချိရေးစင်တာက ဒုတိယမန်နေဂျာဆီသွားပြီး သူ့လစာ အဆ၃၃၀လောက်များပြီးရခဲ့တယ်လို့ အသိပေးခဲ့တယ်လို့ သတင်းစာကရေးပါတယ်။

ဒုတိယမန်နေဂျာက အဲဒီအကြောင်းကို လူသားအရင်းအမြစ်ဌာနထံ သတင်းပေးခဲ့ပါတယ်။အဲဒီနောက် အလုပ်သမားကို ဘဏ်သွားပြီး ပိုတဲ့ပိုက်ဆံပြန်လွှဲဖို့ ပြောခဲ့ပါတယ်။

သူက နောက်နေ့သွားလိုက်ပါမယ်လို့ ကတိပေးခဲ့ပါတယ်။ အဲဒီနောက် ပိုက်ဆံလည်းပြနမလွှဲတဲ့အပြင် ဖုန်းဆက်တော့လည်း ဖုန်းမကိုင်တော့ပါဘူး။ WhatsApp ကနေ မက်ဆေ့ပို့လည်း သုံးရက်ကြာတဲ့တိုင် အကြောင်းမပြန်ပါဘူး။

အဲဒီနောက် ဝန်ထမ်းဟာ သူ့ရဲ့ရှေ့နေက တစ်ဆင့် နှုတ်ထွက်စာကို ကုမ္ပဏီထံပို့ခဲ့ပါတယ်လို့ သတင်းစာကရေးပါတယ်။

ကုမ္ပဏီက ဝန်ထမ်းကို ရာဇဝတ်မှုနှင့် တိုင်တန်းထားပါတယ်။ အခုထက်ထိတော့ ဖမ်းဆီးခြင်းမလုပ်သေးပါဘူး။တိုင်တန်းရာမှာ ဝန်ထမ်းဟောင်းဟာ ငွေကြေးတွေကို အလွဲသုံးစားလုပ်တယ်လို့ စွပ်စွဲထားတာဖြစ်ပါတယ်။

Source Insider

Published 3 July 2022

တက်စ်လာရဲ့ စီအီးအို အီလွန်မတ်စ်နှင့် အမေဇုန်တည်ထောင်သူ ဂျက်ဖ်ဘီဇော့အပါအဝင် ကမ္ဘာ့အချမ်းသာဆုံးပုဂ္ဂိုလ် (၁၀)ဦးဟာ ဒီနှစ်ထဲမှာ အမေရိကန်ဒေါ်လာ စုစုပေါင်း ဘီလျံ၂၅၀ ဆုံးရှုံးသွားခဲ့ကြရပါတယ်။

ဘလွမ်းဘတ် ဘီလျံနာ အညွှန်းကိန်းအရ ၂၀၂၂ခုနှစ်မှာ အမေရိကန်စတော့ဈေးကွက်ကျဆင်းမှုကြောင့် အဲဒီဘီလျံနာ ၁၀ဦး ဟာ ချမ်းသာကြွယ်ဝမှုတွေ  လျော့ကျခဲ့ကြတယ်လို့သိရပါတယ်။ သူတို့တည်ထောင်ထားတဲ့ ကုမ္ပဏီတွေမှာ သူတို့ရဲ့ အသားတင်ကြွယ်ဝမှုတွေဟာ အစိတ်အပိုင်းကြီးကြီးမားမား လျော့ကျသွားခဲ့ကြတာပါ။

၁၉၇၀ ခုနှစ်ကတည်းကဆိုရင် ယခုနှစ်ပထမနှစ်ဝက်မှာ စတော့ဈေးကွက် အဆိုးရွားဆုံး ခံစားခဲ့ကြရတာဖြစ်ပါတယ်။ အချမ်းသာဆုံးကုမ္ပဏီ၅၀၀ဟာ သူတို့ရဲ့တန်ဖိုးတွေရဲ့ ငါးပုံတစ်ပုံ လျော့ကျသွားခဲ့ကြရပါတယ်။

ဆိုလိုတာက မိုက်ခရိုဆော့ဖ်တွဲဖက်တည်ထောင်သူ ဘီလ်ဂိတ်နှင့်အတူ မတ်စ်၊ဘီဇော့ဗ်နှင့် လူးဝစ်ဗီတွန်ရဲ့ စီအီးအို ဘားနတ် အာနော့တို့ရဲ့ ချမ်းသာမှုတွေ အကြီးအကျယ်ထိခိုက်နေပါတယ်။ အထိခိုက်ဆုံးကတော့ မတ်စ်နှင့်ဘီဇော့တို့ဖြစ်ကြပါတယ်။ သူတို့နှစ်ဦးပေါင်းရဲ့ချမ်းသာမှုတွေထဲက ဒေါ်လာ ၁၂၀ဘီလျံလောက် ဒီနှစ်စကတည်းက ဖဲ့ပေးလိုက်ကြရပါပြီ။

တက်စ်လာရဲ့ ရှယ်ယာဈေးတွေဟာ ဒီနှစ်အတွင်း ၄၃ ရာခိုင်နှုန်းကျဆင်းသွားပါတယ်။ စီးပွားရေး မရေရာမှုတွေနှင့် မတ်စ်နှင့် တွစ်တာကိုဝယ်ဖို့ကြိုးစားမှုတွေကြောင့်ပါ။ အမေဇုန်ရဲ့ ရှယ်ယာကလည်း ၂၀၂၂နှစ်စကတည်းကဆိုရင် အခု ၃၅ ရာခိုင်နှုန်း ကျဆင်းသွားခဲ့ပါပြီ။

ဒါပေမယ့် စာရင်းထဲပါတဲ့ အိန္ဒိယနိုင်ငံသားနှစ်ဦးဖြစ်တဲ့ ဂေါတန်အက်ဒါနီနှင့် မူကက်ရှ်အာဘာနီတို့ကတော့ ဒေါ်လာ ၂၂.၁ ဘီလျံနှင့် ဒေါ်လာ ၃.၀၅ ဘီလျံ ပိုပြီးတောင်ချမ်းသာလာကြပါတယ်လို့ဆိုပါတယ်။

အက်ဒါနီဟာ ဆိပ်ကမ်းတွေနှင့် အိန္ဒိယရဲ့အကြီးဆုံး ကျောက်မီးသွေးသတ္တုတွင်းတွေကို လည်ပတ်နေပြီး ယူကရိန်းကို ရုရှားကျူးကျော်မှုကြောင့် ကုန်ဈေးနှုန်းတွေ တက်လာပြီး ထောက်ပို့ကွင်းဆက်တွေ ကျပ်တည်းလာတာတွေကနေ အမြတ်ထွက်သွားတာပါ။

အာဘာနီက စက်မှုလုပ်ငန်းရှင်တစ်ဦးဖြစ်ပြီး ကမ္ဘာ့အကြီးဆုံး ရေနံချက်စက်ရုံတွဲတွေပိုင်ဆိုင်ပါတယ်။ ဒါဟာလည်း ယူကရိန်း ကိစ္စကြောင့် လောင်စာဆီဈေးတွေတက်လာတာကနေ စီးပွားဖြစ်သွားတဲ့အကြောင်း Insider ကရေးသားထားပါတယ်။

Source Insider

Published 2 June 2022

အစာအဆိပ်သင့်စေတဲ့ ဆာမိုနီလာပိုးကို တွေ့ရှိရတဲ့အတွက် ဘယ်လ်ဂျီယမ်နိုင်ငံ ဝီဇီမြို့က ကမ္ဘာ့အကြီးဆုံး ချောကလက်စက်ရုံဖြစ်တဲ့ ဆွစ်ဇာလန်ပိုင် Barry Callebaut ဘယ်ရီ ကာလီဘောက် ချောကလက်ကို ထုတ်လုပ်မှုရပ်ဆိုင်းပစ်ခဲ့ရတယ်လို့ ကုမ္ပဏီက ဇွန် ၃၀ရက် ကြာသပတေးနေ့တုန်းကပြောပါတယ်။

ကိတ်မုန့်လုပ်တဲ့ ဖောက်သည် ၇၃ ဦးအတွက် လက်ကားပေးပို့တဲ့ ချောကလက်အရည်တွေကိုထုတ်လုပ်တာကို စက်ရုံက ကာကွယ်မှုရှိစွာနှင့် ရပ်ဆိုင်းလိုက်တာဖြစ်တယ်လို့ ကုမ္ပဏီပြောရေးဆိုခွင့်ရသူက အေအက်ဖ်ပီကို ပြောပါတယ်။

အစာအဆိပ်သင့်ပိုးကူးစက်ခံရတယ်ဆိုတဲ့ သတင်းတွေတော့ တစ်ခုမှမရှိသေးဘူးလို့လည်း ပြောရေးဆိုခွင့်ရှိိသူ ကောနီလ် ဝါလော့ပ်က ပြောပါတယ်။ အဲဒီဆာမိုနီလာပိုးဟာ ဝမ်းပျက်ဖျားနာခြင်းတွေကို ဖြစ်စေတတ်ပြီး အလွန်အကျွံကိစ္စတွေမှာ သာ စိုးရိမ်ရတာမျိုးရှိပါတယ်လို့ သူကပြောပါတယ်။

စစ်ဆေးတွေ့ရှိပြီးကတည်းက ထုတ်လုပ်ထားပြီးဖြစ်တာတွေအားလုံးကို တားဆီးပိတ်ပင်လိုက်ပါတယ်” လို့လည်း သူကပြောပါတယ်။

ဘယ်ရီကာလီဘောက်ဟာ  မသန့်ရှင်းတဲ့ ထုတ်ကုန်တွေကို ဝယ်ယူထားသူများဖြစ်နိုင်တဲ့ ဖောက်သည်တွေအားလုံးကို ဆက်သွယ်ထားပါတယ်။ ဝီဇီရဲ့ ချောကလက်ထုတ်လုပ်ရေးတွေကိုလည်း နောက်ထပ်တစ်စုံတစ်ရာ ကြေညာတာ မလုပ်မချင်း ရပ်ဆိုင်းထားလိုက်ပါတယ်။

ထုတ်လုပ်ထားတဲ့ ချောကလက်အရည်တော်တော်အများစုဟာ လုပ်ငန်းခွင်ထဲမှာပဲရှိနေဆဲပါလို့လည်း သူကပြောပါတယ်။

ဒါပေမယ့် ကုမ္ပဏီအနေနှင့် ဖောက်သည်တွေအားလုံးကို ဆက်သွယ်ပြီး  ဇွန်၂၅ ရက်ကတည်းက ဝီဇီစက်ရုံကထုတ်လုပ်တဲ့ ချောကလက်နှင့်လုပ်ထားတဲ့ သူတို့ မုန့်တွေကို သင်္ဘောတင်ပို့တာတွေ မလုပ်ကြဖို့ မေတ္တာရပ်ခံထားပါတယ်။

အစားအစာ အန္တရာယ်ကင်းရှင်းရေးဟာ ဘာရီကာလီဘောက်အတွက် အရေးအကြီးဆုံးဖြစ်တယ်။ ဒီလိုဖြစ်ရပ်မျိုးက ဖြစ်တောင့်ဖြစ်ခဲတစ်ခုပါ။ ကျွန်တော်တို့ဆီမှာ အစားအစာ အန္တရာယ်ကင်းရှင်းရေးအတွက် ကောင်းမွန်တဲ့လမ်းညွှန်ချက်တွေနှင့် လုပ်ငန်းစဉ်တွေရှိပြီးသားပါ လို့ ကုမ္ပဏီက သတင်းထုတ်ပြန်ထားပါတယ်။

Source AFP

Published 28 June 2022

ဗြိတိန်၊အမေရိကန်ပြည်ထောင်စု၊ဂျပန်နှင့်ကနေဒါတို့က ရုရှားကို အရေးယူပိတ်ဆို့မှု ထပ်မံတင်းကြပ်လိုက်တဲ့အနေနှင့် ရုရှားနိုင်ငံမှ ရွှေများတင်သွင်းတာကို ပိတ်ပင်ကြဖို့ သဘောတူခဲ့ကြတယ်လို့ ဗြိတိန်သတင်းတွေက ဖော်ပြခဲ့ကြပါတယ်။

အလှည့်ကျ ဥက္ကဋ္ဌ တာဝန်ယူထားတဲ့ ဂျာမနီမှာ တနင်္ဂနွေနေ့က စတင်ကျင်းပတဲ့ G7 ထိပ်သီးအစည်းအဝေးမှာ ယူကရိန်း အကျပ်အတည်းနှင့် ရာသီဥတုပြဿနာတွေလို ကမ္ဘာလုံးဆိုင်ရာ စိန်ခေါ်မှုတွေကို အာရုံစိုက်ဆွေးနွေးခဲ့ကြပါတယ်။

Source CCTV+/AFP

Published 26 June 2022

ရုရှားရဲ့ ဒုတိယအကြီးဆုံး ဘဏ်ကြီးဖြစ်တဲ့ VTB ရဲ့ ဥက္ကဋ္ဌက ရုရှားဟာ BRICS နိုင်ငံတွေနှင့် သူတို့ကိုယ်ပိုင်ငွေကြေး အသုံးပြုပြီး နီးကပ်စွာ တိုက်ရိုက်ကုန်သွယ်မှု ဆောင်ရွက်ဖို့ စိတ်ဝင်စားတယ်လို့ ပြောလိုက်ပါတယ်။ ၂၅ ကြိမ်မြောက် စိန့်ပီတာစဘတ် နိုင်ငံတကာစီးပွားရေးဖိုရမ်နှင့် ယှဉ်လျက်ကျင်းပတဲ့ ဆွေးနွေးပွဲမှာ သူကပြောလိုက်တာပါ။

ဇွန်၁၅ ရက်ကနေ ၁၈ ရက်အထိ ကျင်းပတဲ့ အဆိုပါဖိုရမ်မှာ နိုင်ငံပေါင်း၁၃၀ကျော်က နိုင်ငံရေးနှင့်စီးပွားရေး ထင်ရှားသူတွေ တက်ရောက်ခဲ့ကြပြီး ကမ္ဘာ့စီးပွားရေးမှာ ရင်ဆိုင်နေရတဲ့ အဓိက စိန်ခေါ်မှုများအပေါ် သူတို့ရဲ့ စိတ်ကူးတွေကို အတူမျှဝေခဲ့ကြပြီး အဖြေတွေလည်းထုတ်ခဲ့ကြပါတယ်။

အမေရိကန်က သပိတ်မှောက်ပြီး ဥရောပနိုင်ငံတော်တော်များများမတက်ခဲ့ကြတဲ့ကြားထဲက အဲဒီဖိုရမ်မှာ လူပေါင်း တစ်သောင်းလေးထောင်ကျော် တက်ရောက်ခဲ့ကြပါတယ်။ စီးပွားရေးဆက်သွယ်ချိတ်ဆက်မှုပေါင်း ၆၉၁ ခုလုပ်ခဲ့ပြီး အမေရိကန်ဒေါ်လာ ဘီလျံ ၁၀၀ နှင့်ညီမျှတဲ့ ၅.၆ ထရီလီယံရူဘယ်လ်တန်ဖိုးရှိတဲ့ စီးပွားရေးတွေ ဆက်သွယ်ဆောင်ရွက်ခဲ့ကြပါတယ်။ ပြီးခဲ့တဲ့နှစ်ထက်စာရင်တောင် ပိုပြီးတိုးတက်မှုရှိသေးတယ်လို့ ဖိုရမ်ကိုကြီးမှူးကျင်းပတဲ့ ရော့စ်ကွန်ဂယက်က ပြောပါတယ်။

“BRICSဟာ အချို့သောနိုင်ငံရေးအခွင့်အလမ်းတွေလည်း တူညီတာတောင်မှ စီးပွားရေးဖွံ့ဖြိုတိုးတက်မှု အနေအထားဆင်တူကြတဲ့ နိုင်ငံတွေဖြစ်ကြတယ်။ ဒါဟာ အတော်အရေးကြီးတယ်။ အတွေးအခေါ်ပိုင်းဆိုင်ရာ ကွာခြားမှုမရှိဘူး။ နိုင်ငံရေးဒီအထဲမှာ မပါဘူး။ တကယ်စီးပွားရေးနှင့်ဘဏ္ဍာရေးသက်သက် အဖွဲ့အစည်းဖြစ်တယ်။ ကမ္ဘာ့စီးပွားရေးအတွက်လည်း အရေးကြီးတဲ့ အန်းကဏ္ဍကနေပါဝင်နိုင်တယ်” လို့ VTB ဘဏ် ဥက္ကဋ္ဌအင်ဒရေးကော့စတင်က ပြောပါတယ်။

ရုရှားဟာ အမေရိကန်ရဲ့ဒေါ်လာလက်နက်ကိုဆန့်ကျင်ပြီး အခြားသော BRICS နိုင်ငံတွေနှင့် နီးကပ်တဲ့ တိုက်ရိုက်ကုန်သွယ်ရေးကို နိုင်ငံတွေရဲ့ကိုယ်ပိုင်ငွေကြေးအသုံးပြုပြီး ဆောင်ရွက်ဖို့စိတ်ဝင်တစားရှိတယ်လို့ သူက ဆက်ပြောပါတယ်။

“ လက်ရှိအခြေအနေအောက်မှာ ရုရှားဟာ ဥပမာအားဖြင့် ပြည်တွင်းငွေကြေးတွေနှင့် ယွမ်လို၊ရူပီးလိုနှင့်အခြာငွေကြေးလိုမျိုးနှင့် တိုက်ရိုက် ကုန်သွယ်ဖို့ အလွန်စိတ်ဝင်စားပါတယ်။ အဲဒါကို တိုးတက်ဖွံ့ဖြိးအောင်လုပ်သင့်တယ်လို့ ကျွန်တော်ထင်ပါတယ်။  ကျွန်တော်တို့ အခု ဒေါ်လာကို လက်နက်သဖွယ်သုံးနေတာ နိုင်ငငံရေးအကြောင်းပြချက်တွေမှာ ဒေါ်လာကို ဘယ်လိုအသုံးချနေတာ တွေ့မြင်နေကြရပြီဖြစ်တယ်။  ဒါဟာ ကျွန်တော်တို့တွေအတွက် အတော့်ကိုအရေးကြီးတဲ့ကိစ္စလို့ ကျွန်တော်မြင်ပါတယ်။ ပထမဆုံးလုပ်ကြရမယ့်အလုပ်လို့မြင်တယ်။ အဲဒါဆိုရင် ကျွန်တော်တို့ရဲ့ အပြန်အလှန်ကုန်သွယ်မှုနှင့် စီးပွားရေးပူးပေါင်းဆောင်ရွက်မှုတွေ ကြီးမားစွာတိုးတက်လာမှာဖြစ်တယ်” လို့သူကပြောပါတယ်။

BRICSဟာ ဘရာဇီး၊ရုရှား၊အိန္ဒိယ၊တရုတ်နှင့် တောင်အာဖရိကနိုင်ငံ ငါးနိုင်ငံပါဝင်တဲ့အဖွဲ့ဖြစ်ပါတယ်။

Source CCTV+

Published 26 June 2022

တရုတ်နိုင်ငံက Influencers တွေဟာ သူတို့အနေနှင့် ဥပဒေရေးရာ၊ကျန်းမာရေးနှင့် ဘဏ္ဍာငွေကြေးကိစ္စတွေလို အကြောင်း  အရာတွေကို တိုက်ရိုက် ဆွေးနွေးထုတ်လွှင့် live-streaming တင်ဆက်လိုတယ်ဆိုရင် သူတို့အနေနှင့် အရည်အချင်း   သတ်မှတ်ချက်တွေ လိုအပ်တော့မှာ ဖြစ်ပါတယ်။

တရုတ်ရေဒီယိုနှင့်ရုပ်မြင်သံကြားအုပ်ချုပ်ရေးအဖွဲ့က တိုက်ရိုက်ဆွေးနွေးထုတ်လွှင့်မယ့်သူတွေနှင့်ပတ်သက်လို့ လမ်းညွှန်ချက် အသစ်တွေကို ဗုဒ္ဓဟူးနေ့ကထုတ်ပြန်လိုက်ပါတယ်။အဲဒီလမ်းညွှန်ချက်ထဲမှာ အဆင့်မြင့် ပညာရပ်တွေဖြစ်တဲ့ အချို့သော ခေါင်းစဉ်တွေကို ပြောဆို ဆွေးနွေးမယ်ဆိုရင် ထုတ်လွှင့်တင်ဆက်သူဆီမှာ သင့်လျော်တဲ့ အရည်အချင်းသတ်မှတ်ချက်  တွေရှိဖို့လိုတယ်လို့ ပါဝင်ပါတယ်။

အဲဒီခေါင်းစဉ်တွေက ကျန်းမာရေးစောင့်ရှောက်မှု၊ဥပဒေ၊ဘဏ္ဍာငွေကြေးနှင့်ကျန်းမာရေးစသည်တို့ဖြစ်ကြောင်းဖော်ပြထား ပေမယ့် ဘယ်လိုအရည်အချင်းတွေလိုတယ်လိုတော့ အတိအကျဖော်ပြမထားပါဘူး။

“ တိုက်ရိုက် streaming တင်ဆက်သူတွေဟာ အရေးကြီးတဲ့ တာဝန်တွေထမ်းဆောင်ရတာဖြစ်တယ်။ သိပ္ပံပညာနှင့် ယဉ်ကျေးမှုဆိုင်ရာ အသိအမြင်ဗဟုသုတတွေဖြန့်ဝေရာမှာ၊စိတ်ပိုင်းနှင့်ယဉ်ကျေးမှုဘဝတွေကိုစိုပြည်စေရာမှာ၊ပြီးတော့ စီးပွားရေးနှင့်လူမှုရေးဖွံ့ဖြိုးတိုးတက်ရေးမြှင့်တင်ရာမှာအရေးကြီးတဲ့ အခန်းကဏ္ဍမှာရှိနေကြတယ်” လို့ အသိပေးချက်ထဲမှာ ဖော်ပြထားပါတယ်။

စည်းမျည်းအသစ်တွေဟာ “ အပြုသဘောဆောင်ပြီးကျန်းမာသန်စွမ်း စနစ်ကျကာ သဟဇာတဖြစ်တဲ့ အင်တာနက် ဟင်းလင်း  ပြင်ကို မြှင့်တင်ပေးလိမ့်မယ်လို့လည်း ဖြည့်စွက်ရေးသားထားပါတယ်။

အဲဒီအပြင် live-streaming တင်ဆက်လို့မရတဲ့ အကြောင်းအရာ ၃၁မျိုးကိုလည်း ထည့်သွင်းထားပါတယ်။ အဲဒီအထဲမှာ လောင်းကစား၊အကြမ်းဖက်မှု နှင့်မူးယစ်ဆေးဝါးသုံးစွဲမှုတို့ကို အားပေးရာရောက်တဲ့အကြောင်းအရာတွေ  စတာတွေ ပါဝင်နေ ပါတယ်။

အဲဒီအပြင် တင်ဆက်သူတွေဟာ တရုတ်ကွန်မြူနစ်ပါတီဦးဆောင်မှုနှင့်ဆိုရှယ်လစ်စနစ်ကို အားနည်းစေမယ့်၊ ပုံပျက်ယွင်း စေမယ့်၊ ငြင်းပယ်တဲ့ အကြောင်းအရာတွေ ထုတ်လွှင့်ခြင်းမပြုဖို့လည်း တားမြစ်ထားပါတယ်။

အစားအစာကို အလဟသဖြစ်စေတာမျိုးနှင့် အလွန်အကျွံစားပြတဲ့ mukbang ပုံစံမျိုးကိုလည်း ခွင့်ပြမှာမဟုတ်ဘူးလို့လည်း ဖြည့်စွက်ဖော်ပြထားပါတယ်။

ဒီလမ်းညွှန်ချက်တွေဟာ တရုတ်နိုင်ငံမှာ ကြီးထွားလာနေတဲ့ live-streaming လုပ်ငန်းတွေကို ဆက်လက်နှိမ်နှင်းနေတဲ့ အချိန်မှာ ထွက်ပေါ်လာတာဖြစ်ပါတယ်။ တရုတ်နိုင်ငံမှာ ၂၀၂၀ပြည့်နှစ်တစ်နှစ်တည်းတင် အဲဒီလုပ်ငန်းဈေးကွက်ဟာ (၁) ထရီလီယံ ယွမ်ငွေ(ဒေါ်လာ ၁၅၆ ဘီလျံ)အထိရှိနေတယ်လို့ အကြံပေးကုမ္ပဏီ KPMG ကခန့်မှန်းထားပါတယ်။

တင်ဆက်သူတော်တော်များများဟာလည်း အံအားသင့်ရလောက်အောင် လူသိများကြပါတယ်။ သစ္စာရှိတဲ့ နောက်လိုက် ဖော်လိုဝါတွေ သန်းနှင့်ချီရှိနေကြတာဖြစ်ပါတယ်။

Ref: Insider