Published 28 November 2022

မကွေးတိုင်းဒေသကြီးသည် မြန်မာနိုင်ငံ၏ ဆီအိုးကြီးဖြစ်သော်လည်း သတ်မှတ်ထားတဲ့ ရည်မှန်းချက်ပြည့်မီမှုမရှိတဲ့ အတွက် ကြိုးပမ်းဆောင်ရွက်ကြဖို့ နစက ဥက္ကဋ္ဌက မကွေးတိုင်းဒေသကြီးမှာရှိတဲ့ လုပ်ငန်းရှင်တွေကို မှာကြားခဲ့ပါတယ်။

နိုဝင်ဘာ ၂၈ ရက် ဒီကနေ့မနက်ပိုင်းက နစက ဥက္ကဋ္ဌ ဗိုလ်ချူပ်မှူးကြီးမင်းအောင်လှိုင်ဟာ မကွေးမြို့ မြို့တော်ခန်းမမှာ မကွေးတိုင်းဒေသကြီးအတွင်းမှာရှိတဲ့ အသေးစား၊အငယ်စားနှင့် အလတ်စား စီးပွာရေးလုပ်ငန်းရှင်တွေနှင့် တွေ့ဆုံစဉ် ပြောကြားခဲ့တာဖြစ်တယ်လို့ နစက,က သတင်းထုတ်ပြန်ပါတယ်။

ဆီထွက်သီးနှံများဖြစ်တဲ့ မြေပဲ၊နှမ်း၊နေကြာစိုက်ပျိုးမှုများမှာ အထွက်နှုန်းတိုးတက်အောင် ကြိုးပမ်းကြဖို့ကိုလည်း နစက ဥက္ကဋ္ဌကမှာကြားခဲ့ပါတယ်။

တွေ့ဆုံပွဲတက်ရောက်လာတဲ့ ဆီစက်လုပ်ငန်းရှင်တွေကလည်း ဆီထွက်သီးနှံစိုက်ပျိုးမှုကို ပိုမိုတိုးမြှင့်ဆောင်ရွက်ပြီး ပြည်ပမှ စားအုန်းဆီတင်သွင်းမှုလျှော့ချနိုင်ဖို့ ဆောင်ရွက်နေတာတွေကို တင်ပြဆွေးနွေးခဲ့တယ်လို့်လည်း နစကရဲ့ သတင်းထုတ်ပြန်ချက်မှာဖော်ပြထားပါတယ်။

ဆီထွက်သီးနှံတွေထဲမှာ မြေပဲတစ်ခုတည်းသာ အထွက်နှုန်းကောင်းမွန်ခဲ့၍ ကျန်ဆီထွက်သီးနှံတွေဟာ ပန်းတိုင် အထွက်နှုန်းရည်မှန်းချက်မပြည့်မီခဲ့တာဖြစ်ပါတယ်။အဲဒီအပြင် ဆီအုန်းတွေကိုလည်း ပြည့်ဝစွားစိုက်ပျိုးမှုမရှိတဲ့ အတွက် ဆီထုတ်လုပ်မှုနည်းပါးနေကြောင်းလည်းသိရပါတယ်။

မကွေးတိုင်းဒေသကြီးဟာ ၂၀၂၁-၂၀၂၂ ဘဏ္ဍာရေးနှစ်တွင် မြေပဲ ၁၇၈၇၉၂ ဧက၊ နှမ်း ၁၄၅၈၈၈ ဧကနှင့်နေကြာ ၁၀၉၆၂ ဧကစိုက်ပျိုးခဲ့ပြီး စားသုံးဆီ ၁၅၉၇၀၃ မက်ထရစ်တန်ခန့်မှန်းထွက်ရှိခဲ့တယ်လို့ စိုက်ပျိုးရေးဦးစီးဌာနကို ကိုးကား၍ စားသုံးသူရေးရာဦီးစီးဌာနက သတင်းထုတ်ပြန်ထားပါတယ်။

၂၀၂၂-၂၀၂၃ဘဏ္ဍာနှစ်တွင် တိုင်းဒေသကြီးမှာ မြေပဲ၇၈၉၉၉၀ဧက၊၊ နှမ်း ၁၂၄၂၃၅၆ဧကနှင့် နေကြာ၄၆၆၃၈၀ ဧက စိုက်ပျိုးသွားဖို့လျာထားတယ်လို့လည်း အဆိုပါသတင်းမှာဖော်ပြထားပါတယ်။

ပြည်တွင်းစားသုံးဆီလုံလောက်မှုမရှိတဲ့အတွက်နှစ်စဉ် ပြည်ပမှ တန်ချိန်ကိုးသိန်းကျော်တင်သွင်းနေရတယ်လို့ စီးပွားရေးနှင့်ကူးသန်းရောင်းဝယ်ရေးဝန်ကြီးဌာနက ဆိုပါတယ်။ပြည်တွင်းမှာ စားသုံးဆီစက်တွေက တစ်လကို တန်ချိန်၁၈၀၀၀ကျော် ကြိတ်ခွဲထုတ်လုပ်နိုင်ပေမယ့် အချို့စက်တွေကိုရပ်နားထားရပြီး အချို့မှာ ကုန်ကြမ်း အခက်အခဲကြောင့်စက်စွမ်းရည်အပြည့်မလည်ပတ်နိုင်ဖြစ်ခဲ့ရတယ်လို့လည်းသိရပါတယ်။

နစကဥက္ကဋ္ဌဟာ ဝါစိုက်ပျိုးထုတ်လုပ်မှုမှ အကောင်းဆုံးချည်ထည်များထုတ်လုပ်သည့် တိုင်းဒေသကြီးဖြစ်စေရေးကို လည်း တွေ့ဆုံပွဲမှာ ထည့်သွင်းဆွေးနွေးအကြံပြုခဲ့ပါတယ်။ အဲဒီအပြင် လက်ရှိ ကုန်ထုတ်လုပ်မှုလုပ်ငန်းများတိုးတက် ရေး ဆောင်ရွက်ပေးနေတာတွေကိုလည်း ရှင်းလင်းပြောကြားခဲ့တယ်လို့ သတင်းထုတ်ပြန်ချက်မှာဖော်ပြထားပါတယ်။

အဲဒီနောက် ဗိုလ်ချူပ်မှူးကြီးဟာ  မကွေးတိုင်းဒေသကြီးရဲ့ အသေးစား၊အငယ်စားနှင့် အလတ်စား စီးပွားရေးလုပ်ငန်းရှင်တွေက ခင်းကျင်းပြ သထားတဲ့ ဒေသထုတ်ကုန်ပြခန်းတွေကို စိတ်ဝင်တစားလေ့လာခဲ့ပြီး သိလိုတာတွေမေးမြန်းဆွေးနွေးခဲ့တယ်လို့လည်း သတင်းထုတ်ပြန်ချက်အရသိရပါတယ်။

-ymg/knl

#Myanmar_SG

Published 28 November 2022

ဆူကီယာကီနာဘေး လို့ သိကြတဲ့ ဂျပန်စတိုင် ဟော့ပေါ့ပွဲတော်ကို နိုဝင်ဘာ ၂၇ ရက်က တိုကျိုမှာ ကျင်းပခဲ့ရာမှာ အစား အသောက် သဘောကျသူတွေနှင့် ခရီးသွားတွေအတွက် ဆွဲဆောင်မှုတစ်ခုဖြစ်ခဲ့ပါတယ်။

အဲဒီပွဲတော်ကို တိုကျိုမြို့လယ်ရှိ ပန်းခြံတစ်ခုအတွင်းမှာကျင်းပခဲ့တာဖြစ်ပြီး ဟော့ပေါ့စားသောက်ဆိုင်တွေဟာ သူတို့ရဲ့ အကောင်းဆုံး ဟင်းလျာတွေကို တည်ခင်းခဲ့ကြပါတယ်။

ဟော့ပေါ့ပွဲတော်မှာ ဟင်းတစ်ပွဲကို အမေရိကန်ဒေါ်လာ ၅.၅ မှ ၁၁ ဒေါ်လာအထိ ဈေးနှုန်းရှိပြီး နာမည်ကြီး စားသောက်ဆိုင်တွေဟာ တစ်ရက်ကို ပွဲပေါင်း နှစ်ထောင်ကျော်ရောင်းချကြရပါတယ်။

ဒါပေမယ့် လတ်တလောမှာ ပင်လယ်စာနှင့် အမဲသားတွေလိုမျိုး ဟော့ပေါ့ထဲထည့်ရတဲ့ အမယ်တွေရဲ ဈေးတွေက တက်နေလို့ ဟောပေါ့ရဲ့ဈေးနှုန်းတွေလည်း တက်သွားပါတယ်။

ဂျပန်ဒေသခံတွေဟာ အစားအသောက်ဈေးတွေတက်နေလို့ သောကတွေပွားနေကြပါတယ်။ ယခုအထိ ဂျပန်နိုင်ငံရဲ့ အကြီးဆုံးစားသောက်ဆိုင်တွေရဲ့ ၇၀ ရာခိုင်နှုန်းဟာ ဈေးတွေတက်ကုန်ကြပါတယ်။အဲဒီထဲက ၂၀ရာခိုင်နှုန်းဆိုရင် နှစ်ခါ တောင်ဈေးတက်ခဲ့တာပါ။ ဂျပန်မိသားစုတွေဟာ တစ်နှစ်ကို ယန်းခုနှစ်သောင်း ဒါမှမဟုတ် အမေရိကန်ဒေါ်လာ ၅၀၀ခန့် ကို အစားအစာအတွက် ပိုသုံးနေကြရပါတယ်။

Source CCTV+

#Sukiyaki_nabe

#Japan_Hotpot_Festival

#Japan_Food_Prices_Rise

Published 28 Nov 2022

❇️ K ဒရာမာ ဆယ်လီ ဇနီးမောင်နှံဖြစ်တဲ့ ဆွန်ယဲကျင်နှင့် ဟန်ဘင်းတို့က သူတို့ဟာ သားဦးကလေးရဲ့ မိဘတွေဖြစ်လာပြီလို့ ကြေညာ

❇️ မင်းသမီးဆွန်ယဲကျင်ရဲ့ အေဂျင်စီ MSteam Entertainment က သူတို့နှစ်ဦးဟာ သားကလေးကို  နိုဝင်ဘာ (၂၇)ရက်နေ့ တနင်္ဂနွေနေ့ မနက်မှာ မွေးဖွားခဲ့ပြီလို့ကြေညာခြင်းဖြစ်

❇️ “ ဆွန်ယဲကျင်ဟာ ယနေ့ သားယောကျ်ားလေးမွေးဖွားပါတယ်။ မိခင်ရောကလေးပါ ကျန်းမာရေးကောင်းမွန်ပါတယ်” လို့ ကြေညာချက်မှာဖော်ပြ

❇️ အသက်၄၀ဝန်းကျင်ရှိတဲ့ သူတို့နှစ်ဦးဟာ ဒီနှစ်မတ်လမှာ  သီးသန့် မင်္ဂလာပွဲကလေးတတစ်ခုကျင်းပခဲ့ပြီး မင်းသမီးဆွန်ယဲကျင် ကိုယ်ဝန်ရှိနေတာကိုတော့ ဇွန်လမှာကြေညာခဲ့

❇️ သူတို့ဟာ ၂၀၁၈ ခုနှစ်က The Negotiation ဇာတ်ကားမှာ စတင်တွေ့ဆုံခဲ့ကြ

❇️ Crash Landing On You ဒရာမာစီးရီးမှာ မြောက်ကိုးရီးယားဗိုလ်ကြီး နှင့် အမွေခံ တောင်ကိုးရီးယားသူတို့ရဲ့ ဆွတ်ပျံ့ဖွယ် မေတ္တာဇာတ်လမ်းကြောင့် လူသိအလွန်များပြီးအောင်မြင်ခဲ့

❇️ ၂၀၂၁ ဇန်နဝါရီမှာ အဲဒီဒရာမာစီးရီး ထုတ်လုပ်မှုပြီးဆုံးချိန်မှာ သူတို့ချစ်ကြိုးသွယ်နေတာကို တရားဝင်အသိပေးခဲ့ကြ

Source: CNA/sr

Published 27 Nov 2022

တရုတ်နိုင်ငံတောင်ပိုင်း ကွမ်ရှီးပြည်နယ်က ယူလင်းပြည်နယ်က ကြက်မွေးမြူရေးစခန်းတစ်ခုမှာ မွေးမြူရေးလုပ်ငန်းတွေ တိုးတက်ဖို့အတွက် စက်ရုပ်နှင့် ဒစ်ဂျစ်တယ် ပလက်‌ဖောင်းတွေကို စတင်အသုံးပြုနေပါတယ်။

မွေးမြူရေးစခန်းမှာ စမ်းသပ်မှုတွေပြုလုပ်ပြီးနောက် နိုဝင်ဘာလကစပြီး ဒစ်ဂျစ်တယ် ပလက်ဖောင်းကို စတင်အသုံးပြု ဆောင်ရွက်နေတာဖြစ်ပါတယ်။  ကြက်လှောင်အိမ်ထဲမှာရှိတဲ့ အတန်းတစ်တန်းစီက ကြက်တွေကို စက်ရုပ်တစ်ရုပ်က မျက်မြင်စစ်ဆေးပေးပါတယ်။ အပူချိန်၊စိုထိုင်းဆ၊အလင်းရောင်အခြေအနေနှင့် နေမကောင်းတဲ့၊သေသွားတဲ့ကြက်တွေရဲ့ အနေအထားစတာတွေကို ဒစ်ဂျစ်တယ်ပလက်ဖောင်းကနေ ပြသပေးနေပါတယ်။အဲဒီသတင်းအချက်အလက်တွေဟာ ဝန်ထမ်းတွေရဲ့လက်ကိုင်ဖုန်းတွေဆီမှာ ထည့်သွင်းထားတဲ့ အက်ပလီကေးရှင်းတွေဆီ စဉ်ဆက်မပြတ်ပို့လွှတ်ပေးနေပါတယ်။

“ အရင်တုန်းက ကြက်အကောင်ငါးထောင်ကို မျိုးဖောက်သူတစ်ဦးထားခဲ့ရာက အခု ကြက်အကောင် တစ်သိန်းရှစ်သောင်းကို တစ်ယောက်အထိ ရလာပါတယ်”လို့ စိုက်ပျိုးရေးနှင့် တိရိစ္စ္ဆာန် မွေးမြူရေးခြံများရဲ့ နည်းပညာ ဒါရိုက်တာ လီဖားရှန်းက ပြောပါတယ်။

သေနေတဲ့ကြက်တွေရဲ့ ၉၉ရာခိုင်နှုန်းလောက်အထိ စက်ရုံတွေက သိနိုင်ကြတယ်လို့ ဝန်ထမ်းတစ်ဦးကပြောပါတယ်။  စက်ရုပ်ပေါ်မှာရှိတဲ့ အမှတ်အသားကနေ အလုပ်သမားတွေဟာ ဖျားနာနေတဲ့ သေနေတဲ့ကြက်တွေကို ရှာနိုင်ကြတာ ဖြစ်ပါတယ်။

ကွမ်ရှီးက စိုက်ပျိုးရေးလုပ်ငန်းတွေကို big data(ဘစ်ဒေတာ)နှင့်ပေါင်းစပ်ဖို့အတွက် ဉာဏ်ရှိတဲ့ မွေးမြူရေးသုံး စက်ရုပ်တွေကို ရွေးချယ်အသုံးပြုတာဟာ အထင်ကရ စီမံကိန်းတစ်ခုဖြစ်နေပါတယ်။ ဒါဟာ  အမေရိကန်ဒေါ်လာ ၉.၈၁ သန်းနှင့်ညီမျှတဲ့ ရင်းနှီးမြှပ်နှံမှု ယွမ် သန်း၇၀ကျော်ရှိတဲ့ အလိုအလျောက်ထိန်းချုပ်သည့် ဉာဏ်ရည်ရှိစိုက်ပျိုးမွေးမြူရေး ဂေဟနည်းကျလူ့အသိုက်အဝန်းစီမံကိန်းကြီးရဲ့ အစိတ်အပိုင်းလည်းဖြစ်ပါတယ်။

“ ကြက်ဥတွေနှင့် မွေးမြူရေးလုပ်ငန်းအတွက် ဒစ်ဂျစ်တယ်စီမံခန့်ခွဲမှုပလက်ဖောင်း သုတေသနနှင့်ဖွံ့ဖြိုးရေးလုပ်ငငန်းဟာ ထုတ်လုပ်မှုကုန်ကျစရိတ်ကို သိသာစွာလျှော့ချပေးပါတယ်။  ကျေးလက်ဒေသဖွံ့ဖြိုးတိုးတက်ရေးကို အရည်အသွေးမြင့် ဒစ်ဂျစ်တယ်စိုက်ပျိုးရေးတိုးတက်မှုနှင့်အတူ လုပ်ဆောင်ဖို့ ကျွန်တော်တို့အားပေးနေပါတယ်” လို့ အဲဒီ ခြံရဲ့ ဘုတ်အဖွဲ့ ဥက္ကဋ္ဌ တန်ရှန်ဆောင်းက ပြောပါတယ်။

Source: CCTV Plus

#Robots_and_Digital_platforms_in _livestock

#China_ Guangxi

#China_Modern_farming

Published 24 Nov 2022

အသေးစား၊အငယ်စားနှင့် အလတ်စား စီးပွားရေးလုပ်ငန်းများ ဖွံ့ဖြိုးတိုးတက်ရေးရန်ပုံငွေကို ထပ်မံထူထောင်ပေးမယ်လို့ နစက ဥက္ကဋ္ဌ ဗိုလ်ချူပ်မှူးကြီးမင်းအောင်လှိုင်ကပြောပါတယ်။

နိုဝင်ဘာ ၂၄ ရက် ကြာသပတေးနေ့ က နေပြည်တော်မှာကျင်းပတဲ့ ဘဏ္ဍာရေးဆိုင်ရာကော်မရှင်အစည်းအဝေးမှာ ဗိုလ်ချူပ်မှူးကြီးက ပြောကြားခဲ့တာဖြစ်ကြောင်း နစကရဲ့သတင်းထုတ်ပြန်ချက်မှာဖော်ပြထားပါတယ်။

“ နိုင်ငံတော်အနေနှင့် နိုင်ငံ့စီးပွားမြှင့်တင်ရေး ရန်ပုံငွေကို ကျပ်ဘီလီယံ၄၀၀၀နှင့် မတည်ထူထောင်ပေးထားပြီးဖြစ်ပါတယ်။ မကြာမီကာလမှာ အသေးစား၊အငယ်စားနှင့် အလတ်စား စီးပွားရေလုပ်ငန်းများ ဖွံ့ဖြိုးတိုးတက်ရေးရန်ပုံငွေကိုလည်း ထပ်မံထူထောင်ပေးဖို့ ဆောင်ရွက်လျက်ရှိပါတယ်” လို့  ဘဏ္ဍာရေးကော်မရှင်ဥက္ကဋ္ဌဖြစ်သူ ဗိုလ်ချူပ်မှူးကြီးက ပြောဆိုခဲ့တာဖြစ်ပါတယ်။

အဲသလိုရန်ပုံငွေတွေမတည်ပေးနေတာဟာ ကိုဗစ်-၁၉ ကြောင့်ကျဆင်းခဲ့ရတဲ့ နိုင်ငံ့စီးပွားရေးပြန်လည်မြှင့်တင်ပေးဖို့ ဖြစ်တယ်လို့လည်း နစက ဥက္ကဋ္ဌကပြောပါတယ်။

ကိုဗစ်ကပ်ရောဂါနှင့် နိုင်ငံကြီးတွေအကြား စစ်ရေး၊နိုင်ငံရေးအားပြိုင်မှုတွေ၊ကမ္ဘာ့ရွှေဈေး၊ရေနံဈေး မတည်ငြိမ်မှုတွေက တစ်ဆင့် အထွေထွေကုန်ဈေးနှုန်းတွေမြင့်တက်လာတာ။ငွေကြေးဖောင်းပွလာတာနှင့်အမေရိကန်ဒေါ်လာငွေကြေး တန်ဖိုးမြင့်တက်လာတာတွေကြောင့် အခြားနိုင်ငံတွေရဲ့ ပြည်တွင်သုံးငွေတန်ဖိုးကျဆင်းမှုတွေစတဲ့ အခြေအနေတွေအရ စီးပွားရေးဖွံ့ဖြိုးတိုးတက်အောင်ဆောင်ရွက်ရာမှာ စိန်ခေါ်မှုတွေနှင့် ရင်ဆိုင်နေရတယ်လို့လည်း ဘဏ္ဍာရေးကော်မရှင် ဥက္ကဋ္ဌက ထုတ်ဖော်ပြောဆိုခဲ့ကြောင်း သတင်းထုတ်ပြန်ချက်မှာဖော်ပြထားပါတယ်။

အဲဒါကြောင့် စိုက်ပျိုးမွေးမြူရေးနှင့် ကျေးလက်ဖွံ့ဖြိုးတိုးတက်ရေးတွေကို အားပေးမှာဖြစ်ပြီး အသေးစား၊အငယ်စားနှင့် အလတ်စား စီးပွားရေးတွေတိုးတ်ကဖို့လည်းအားပေးသွားမယ်လို့လည်း ဗိုလ်ချူပ်မှူးကြီးကပြောပါတယ်။

ယခုအစည်းအဝေးမှာ  ဘဏ္ဍာရေးကော်မရှင် ဒုတိယဥက္ကဋ္ဌ ဒုတိယဗိုလ်ချူပ်မှူးကြီးစိုးဝင်းနှင့် ကော်မရှင်အတွင်းရေးမှူးနှင့် ကော်မရှင်အဖွဲ့ဝင်တွေ တက်ရောက်ခဲ့ကြတာဖြစ်ပါတယ်။

-ymg/knl

#Myanmar_Finanace_Meeting

Published 22 Nov 2022

တရုတ်နိုင်ငံ အလယ်ပိုင်းရှိစက်ရုံတစ်ရုံမှာ တနင်္လာနေ့ မွန်းလွဲပိုင်းက မီးလောင်ကျွမ်းခဲ့တဲ့အတွက် လူပေါင်း ၃၈ ဦးသေဆုံးပြီး (၂)ဦး ဒဏ်ရာရရှိခဲ့တယ်လို့ နိုင်ငံပိုင်မီဒီယာကဖော်ပြပါတယ်။ ဒီမီးလောင်ကျွမ်းမှုဟာ တရားမဝင် ဂဟေဆော်တဲ့အတွက်ကြောင့် ဖြစ်ရတယ်ဆိုပြီး အာဏာပိုင်တွေက အလုပ်သမားတွေကို အပြစ်တင်ထားပါတယ်။

တရုတ်နိုင်ငံ အလယ်ပိုင်း ဟိုနန်ပြည်နယ်က အန်ယန်မြို့မှာရှိတဲ့အန်ယန်ခိုင်ဇင်ဒါကုန်သွယ်ရေးကုမ္ပဏီပိုင် စက်ရုံတစ်ရုံမှာ တနင်္လာနေ့ ညနေ ၄နာရီ ၂၂မိနစ်ခန့်က  မီးစတင်လောင်ကျွမ်းခဲ့တာပါ။

အချက်ပေးသံရရှိပြီးနောက် မြူနီစပါယ်မီးသတ်အဖွဲ့ဟာ မီးလောင်ရာကိုချက်ခြင်းသွားပြီး ငြှိမ်းသတ်ခဲ့လို့ မီးကို ည၁၁နာရီခန့်မှာ အပြီးငြှိမ်းသတ်နိုင်ခဲ့တယ်လို့ စီစီတီဗွီက ပြောပါတယ်။

စီစီတီဗွီသတင်းဌာနရဲ့ သတင်းဗွီဒီယိုထဲမှာ မီးတောက်တွေထဲကနေ မီးခိုးလုံးအမည်းကြီးတွေလိပ်တက်လာတာကိုတွေ့ကြရပါတယ်။ မီးသတ်ကား အနည်းဆုံး(၂)စီးကလည်း မီးတွေကို ကြိုးစားငြှိမ်းသတ်ပေးခဲ့ကြပါတယ်။

သေဆုံးတဲ့သူတွေအပြင် ဒဏ်ရာရသူနှစ်ဦးကို ဆေးရုံပို့ဆောင်လိုက်ရပေမယ့် သူတို့နှစ်ဦးဟာ အသက်အန္တရာယ် မစိုးရိမ်ရဘူးလို့ တရုတ်အစိုးရရဲ့ ပြည်သူ့နေစဉ်သတင်းစာက သတင်းရေးသားပါတယ်။

မီးလောင်မှုဖြစ်ပွားရတဲ့ တရားခံလို့သံသယရှိသူတွေကို ရဲကဖမ်းဆီးခေါ်ဆောင်သွားတယ်လို့လည်း အာဏာပိုင်တွေက ပြောပါတယ်။

ကနဦးစုံစမ်းစစ်ဆေးမှုတွေအရ အလုပ်သမားတွေဟာ အန္တရာယ်ကင်းရှင်းရေးစည်းကမ်းသတ်မှတ်ချက်တွေကို ချိုးဖောက်ပြီး လျှပ်စစ်ဂဟေဆော်ခဲ့ကြရာကနေ မီးလောင်ရတာဖြစ်တယ်လို့ စီစီတီဗွီရုပ်သံကကြေညာပါတယ်။

အန္တရာယ်ကင်းရှင်းရေးစံသတ်မှတ်ချက်တွေအားနည်းမှုနှင့် အရာရှိတွေ အကျင့်ပျက်လာဘ်စားမှုတွေကြောင့် တရုတ်နိုင်ငံမှာ စက်ရုံအလုပ်ရုံ မတော်တဆထိခိုက်မှုတွေဟာ ပုံမှန်လိုဖြစ်နေကြတယ်လို့ အေအက်ဖ်ပီက သတင်းရေးသားပါတယ်။

အန်ယန်မြို့စက်ရုံမီးလောင်သလိုပဲ အဲဒီတစ်ရက်တည်းမှာတင် ရှန်ဇီပြည်နယ်မြို့တော် ထိုင်ယွမ်မြို့အနီး ဓာတုဗေဒစက်ရုံတစ်ရုံမှာလည်း ပေါက်ကွဲမှဒတစ်ခုဖြစ်ခဲ့ပါသေးတယ်။

ဇွန်လအတွင်းက ရှန်ဟိုင်းက ဓာတုဗေဒစက်ရုံတစ်ရုံမှာ ပေါက်ကွဲမှုဖြစ်လို့ တစ်ဦးသေဆုံးပြီး နောက်တစ်ဦး ဒဏ်ရာရရှိခဲ့တဲ့အကြောင်း အေအက်ဖ်ပီကသတင်းပေးပို့တာဖြစ်ပါတယ်။

Source: AFP/CCTV

#China_factory_Fire

#Anyang_City_Henan_Province

#Fire_killed_38_in_Anyang_factory