Published 15 Jan 2023

နီပေါနိုင်ငံ ပိုခါရာ နိုင်ငံတကာလေဆိပ်အနီး ခရီးသည် ၇၂ ဦးပါ ခရီးသည်တင် အေတီအာရ် -၇၂ လေယာဉ်တစ်စီး ဇန်နဝါရီ ၁၅ရက် ဒီကနေ့ ပျက်ကျခဲ့ရာ အနည်းဆုံး လူ ၃၂ ဦးသေဆုံးခဲ့ပါတယ်။ ပျက်ကျတဲ့လေယာဉ်ဟာ ရတီ Yeti လေကြောင်းလိုင်းပိုင်လေယာဉ်ဖြစ်ပါတယ်။

သတင်းပေးပို့တဲ့အချိန်မှာ ကယ်ဆယ်ရေးတွေ လမ်းခုလတ်မှာရှိနေကြပြီး လေဆိပ်ကိုပိတ်လိုက်ပါတယ်။ သေဆုံးသူတွေ အရေအတွက်ဟာ ကြောက်ခမန်းလိလိတိုးလာနေပါတယ်။ လေယာဉ်ပေါ်မှာ မွေးကင်းစကလေးငယ် သုံးဦးနှင့် ကလေးငယ် သုံးဦးလည်းပါဝင်ပြီး အိန္ဒိယနိုင်ငံသား (၅)ဦးလည်း လိုက်ပါသွားပါတယ်။

လေယာဉ်ပျက်တွေကြားထဲက အနည်းဆုံး အလောင်း ၃၂ လောင်း ပြန်တွေ့တယ်လို့ ဟိမဝန္တာတိုင်းမ်သတင်းစာက သတင်းရေးသားပါတယ်။ရိုက်တာကတော့ အလောင်း(၄၀)ရှာတွေ့တယ်လို့ရေးသားပါတယ်။

ခရီးသည်တွေထဲမှာ နီပေါ(၅၃)ဦး၊အိန္ဒိယ(၅)ဦး၊ ရုရှား (၄)ဦး၊ကိုးရီးယား(၂)ဦးနှင့် အိုင်ယာလန်၊ဩစတြေလျ၊အာဂျင်တီးနားနှင့်ပြင်သစ်တို့မှ (၁)ဦးစီဖြစ်ကြတယ်လို့ နီပေါ လေကြောင်းအာဏာပိုင်က သတင်းထုတ်ပြန်ပါတယ်။

ပိုခါရာဟာ နီပေါနိုင်ငံမြို့တော် ကတ္တမန်ဒူကနေ ကီလိုမီတာ ၂၀၀အကွာမှာရှိတဲ့မြို့ဖြစ်ပါတယ်။  နီပေါဝန်ကြီးချုပ် ပရာချန်ဒရာ နှင့်ပြည်ထဲရေးဝန်ကြီး ရာဗီ လာမီချိန်းတို့ဟာ ကယ်ဆယ်ရေးလုပ်ငန်းတွေကြီးကြပ်ဖို့ ကတ္တမန်ဒူက ထရိုင်ဗူဗန် နိုင်ငံတကာလေဆိပ်ကိုရောက်ရှိနေပါတယ်။

ရတီလေကြောင်းလိုင်းပိုင်9N-ANC ATR-72 လေယာဉ်ဟာ ကတ္တမန်ဒူနိုင်ငံတကာလေဆိပ်ကနေ မနက် ၁၀နာရီ ၃၃မိနစ် မှထွက်ခွာခဲ့ပါတယ်လို့ လေကြောင်းအာဏာပိုင်ဌာနကပြောပါတယ်။

ပိုခါရာလေဆိပ်ကို ဆင်းသက်ဖို့ကြိုးစားနေစဉ် လေယာဉ်ပျက်ကျခဲ့ရတာဖြစ်ပြီး လေဆိပ်အဟောင်းနှင့်အသစ် အကြားရှိတဲ့ ဆတ္တီမြစ်ကမ်းပေါ်ပျက်ကျခဲ့တာပါ။

နီပေါနိုင်ငံမှာ လေယာဉ်ပျက်ကျတာဟာ သိပ်မထူးဆန်းတော့သလိုရှိပြီး ယခုပျက်ကျမှုအတွက် အစိုးရအဖွဲ့ အရေးပေါ်အစည်းခေါ်ယူထားပါတယ်။

Source WION

#Nepal_Plane_Crash

#Yeti Airlines'_9N-ANC ATR-72

#Pokhara_Nepal

Published 11 Jan 2023

အမေရိကန်နိုင်ငံ ဖက်ဒရယ်လေကြောင်းအာဏာပိုင်အဖွဲ့က ဇန်နဝါရီ(၁၁)ရက် ယနေ့မှာ ကွန်ပျူတာစနစ်အကြီးအကျယ်ချို့ယွင်းမှုကြောင့် အန္တရာယ်သတိပေးမှုတွေကို လေယာဉ်မှုးတွေနှင့် အခြားသော လေကြောင်းပျံသန်းရေးဆိုင်ရာ တာဝန်ရှိသူတွေကို အကြောင်းကြားတဲ့အတွက် နိုင်ငံတစ်လွှားမှာရှိတဲ့ လေကြောင်းပျံသန်းမှုတွေကို ရပ်တန့်လိုက်ကြရပါတယ်။

ဗုဒ္ဓဟူးနေ့မနက်ပိုင်းမှာ သတိပေးမှုတွေထုတ်ပြန်တဲ့အထဲမှာ ဖက်ဒရယ်လေကြောင်းအာဏာပိုင်(အက်ဖ်အေအေ)က NOTAM လို့ခေါ်တဲ့ လေကြောင်းမစ်ရှင်သို့ သတိပေးစနစ် ချို့ယွင်းသွားတယ်လို့ပြောခဲ့ပြီး ဘယ်တော့ပြန်ကောင်းမယ်ဆိုတဲ့ အချိန်ကိုလည်း ပြောမသွားခဲ့ပါဘူး။

ဒေသစံတော်ချိန် မနက်၈နာရီအထိ အမေရိကန်နိုင်ငံအတွင်း နှင့်နိုင်ငံပြင်ပ ပျံသန်းမယ့် ခရီးစဉ်ပေါင်း ၂၅၀၀ကျော်ဟာ နှောင့်နှေးခဲ့ကြရတယ်လို့ လေယာဉ်ခရီးစဉ်နောက်ယောက်ခံဝက်ဘ်ဆိုက် FlightAware ကပြောပါါတယ်။ ခရီးစဉ် ၁၅၀ကျော်ကိုလည်းဖျက်သိမ်းလိုက်ပြီး အရေအတွက်ဟာ ထပ်မံတိုးလာဖို့ရှိနေပါတယ်။ ခရီးစဉ်နှောင့်နှေးခဲ့ရတာ တွေအများစုဟာ အရှေ့ဖက်ကမ်းခြေတစ်ဝိုက်ကဖြစ်ပါတယ်။

ဒါဟာဆိုက်ဘာတိုက်ခိုက်မှုလားဆိုတာကိုတော့ အိမ်ဖြူတော်က ငြင်းဆိုလိုက်ပါတယ်။ဒါပေမယ့် သယ်ယူပို့ဆောင်ရေးဝန်ကြီးဌာနကို ဒီလိုပြတ်တောက်မှုဘာကြောင့်ဖြစ်ရတယ်ဆိုတာ စုံစမ်းဖော်ထုတ်ဖို့ သမ္မတ ဘိုင်ဒင်က တိုက်ရိုက်ညွှန်ကြားလိုက်ပါတယ်။

(မှတ်ချက်။နောက်ဆုံးရသတင်းအရ အချို့ခရီးစဉ်များပြန်လည်ပျံသန်းနိုင်ပြီဟုသိရပါတယ်)

Source: WION

#US_Flights_cancelled_due_to_computer_outage

#Federal_Aviation_Administration

#US_Aviation

Published 10 Jan 2023

တရုတ်နှင့်မြန်မာနိုင်ငံတို့ရဲ့အကြီးဆုံးကုန်းပိုင်းနယ်စပ်ပေါက်ကို တရုတ်နိုင်ငံ အနောက်တောင်ပြည်နယ် ရွှေလီမြို့မှာ ပြန်လည်ဖွင့်လှစ်လိုက်ပြီဖြစ်ပါတယ်။

တရုတ်နိုင်ငံက ယင်းရဲ့ ကိုဗစ်ကပ်ရောဂါစည်းကမ်းသတ်မှတ်ချက်တွေကို ဖြေလျော့ပေးပြီးနောက် နယ်စပ်တွေပြန်လည်ဖွင့်လှစ်ခဲ့ရာမှာ ရွှေလီနယ်စပ်ပေါက်လည်း တစ်ခုအပါအဝင်ဖြစ်ပါတယ်။

နယ်စပ်ပေါက်ပြန်လည်ဖွင့်လှစ်ခြင်းအဖြစ်တရုတ်ဘက်မှာ တရုတ်နိုင်ငံတော်အလံကို လွှင့်တင်ခဲ့ပါတယ်။

“ကျွန်တော်တို့နယ်စပ်ပေါက်ရဲ့ အခြေခံအဆောက်အအုံတွေကို ထိန်းသိမ်းအဆင့်မြှင့်တင်ပြင်ဆင်ဖို့ ကျွန်တော်တို့ ကြိုတင်ပြင်ဆငရေးတွေအများကြီးလုပ်ခဲ့ပါတယ်။ အထူးသဖြင့်ကွန်ယက်ပစ္စည်းတွေ ပြန်လည်ပြုပြင်ရေးဖြစ်ပါတယ်” လို့ ရွှေလီလူဝင်မှုကြီးကြပ်ရေးစခန်းက အရာရှိ ကျွာယူဖေးက ပြောပါတယ်။

ရွှေလီဘက်မှာ အလုပ်လုပ်နေကြတဲ့ အလုပ်လာရှာကြတဲ့  မြန်မာနိုင်ငံသားတော်တော်များများဟာ မိသားစုနှင့်ပြန်တွေ့ကြဖို့ အကြာကြီးစောင့်ဆိုင်းခဲ့ကြရတာပါ။

“ကျွန်မအတော်စိတ်လှုပ်ရှားမိတယ်။ မြန်မာနိုင်ငံမပြန်ရတာအတော်ကြာပြီ” လို့ မြန်မာအမျိုးသမီးပြုံးပြုံးစိန်ကပြောပါတယ်။

လူအုပ်ကြီးဟာ အကြာကြီးစောင့်ဆိုင်းနေခဲ့တဲ့ကာလတွေကိုဖြတ်သန်းခဲ့ကြရတပါ။ သူတို့ဟာ ဓာတ်ပုံတွေရိုက်ကြပြီး အွန်လိုင်းကနေ ဗွီဒီယိုတွေ လိုက်ဖ်တင်ကာ သူတို့ရဲ့အပျော်တွေကို မိတ်ဆွေတွေထံ ဝေမျှပေးခဲ့ကြပါတယ်။

ဒီဝင်ထွက်ပေါက်ဖွင့်လိုက်တဲ့အတွက် အပြုသဘောပြောင်းလဲမှုတွေအများကြီးဖြစ်လာမှာပါ။

“ လူတွေရဲ့ဘဝ၊စီးပွာရေးနှင့် မြို့ရဲ့ ကဏ္ဍပေါင်းစုံမှာ ဖွံ့ဖြိုးတိုးတက်ရေးအတွက် အပြောင်းအလဲကြီးတွေဖြစ်လာမှာပါ” လို့ ဒေသခံတစ်ဦးကပြောပါတယ်။

“ ကျွန်တော်တို့ မြန်မာဘက်နှင့် အလုပ်သမားဝန်ဆောင်မှုပူးပေါင်းဆောင်ရွက်မှုတိုးမြှင့်သွားမှာပါ။ ဒါဟာ ရွှေလီမှာအခြေစိုက်နေတဲ့ အထည်ချုပ်လုပ်ငန်းလိုမျိုး လုပ်သားအခြေပြု လုပ်ငန်းတွေအတွက် အကူအညီဖြစ်စေမှာပါ” လို့ ရွှေလီဒုမြို့တော်ဝန် ကန်ပေါင်တေးက ပြောပါတယ်။

နှစ်နိုင်ငံအကြား အခြားသောယဉ်ကျေးမှုနှင့်ခရီးသွားလုပ်ငန်းတွေကိုလည်း ဖွံ့ဖြိုးတိုးတက်ဖို့ကြံဆမယ်လို့ ဒုမြို့တော်ဝန်က ပြောပါတယ်။ ဥပမာအားဖြင့် နယ်စပ်ကုန်စည်ပြပွဲတွေ၊ နယ်စပ်ဖြတ်ကျော်မာရသွန်ပြေးပွဲတွေနှင့် နှစ်ပတ်လည် ကာနင်ဗယ် ပွဲတော်တွေလိုမျိုးဖြစ်တယ်လို့ သူကပြောကြားလိုက်ပါတယ်။

Source CCTV+

#China_Myanmar_Border_Gate

#Rulli_border_port_opened

#China_Myanmar

Published 16 Dec 2022

မြန်မာနိုင်ငံရဲ့ ပထမဆုံးသော ၅၀၀ ကေဗွီ ကံကောင်း(မိတ္ထီလာ)-စပါးကြွယ်(တောင်ငူ) ဓာတ်အားလိုင်းအပြီးသတ်ချိတ်ဆက်လုပ်ငန်းများ ဆောင်ရွက်ရန်ရှိတဲ့အတွက် အဆိုပါလုပ်ငန်းများ ဆောင်ရွက်မယ့် ဒီဇင်ဘာ (၁၇)ရက် နှင့် (၁၈)ရက်နေ့တွင် ဓာတ်အားများလျော့နည်းရရှိမှာဖြစ်တဲ့အကြောင်း လျှပ်စစ်စွမ်းအားဝန်ကြီးဌာနက အများပြည်သူသို့ကြိုတင်အသိပေးပန်ကြားချက်အဖြစ် ယနေ့ ဒီဇင်ဘာ (၁၆)ရက်နေ့မှာ သတင်းထုတ်ပြန်ပါတယ်။

အဆိုပါလုပ်ငန်းများကြောင့်  ဒီဇင်ဘာ ၁၇ ရက်နှင့် ၁၈ ရက်များတွင် မနက် ၆ နာရီမှ ည ၇ နာရီအထိ နိုင်ငံတော်ဓာတ်အားစနစ်အတွင်း ဓာတ်အားထုတ်လုပ်ဖြန့်ဖြူးမှု ဝန်အား ၁၅၀ မဂ္ဂါဝပ်ခန့် လျော့နည်းမှာဖြစ်တယ်လို့ အဆိုပါ သတိပေးထုတ်ပြန်ချက်မှာဖော်ပြထားတယ်လို့ နိုင်ငံပိုင်ရုပ်သံများက ထုတ်လွှင့်သွားပါတယ်။ သို့သော်လည်း ညပိုင်းတွင် ပုံမှန်အတိုင်း ပြန်လည်ပြည့်ဝစွာ ထုတ်လုပ်ဖြန့်ဖြူးပေးသွားမယ်လို့လည်းသိရပါတယ်။ နေ့ပိုင်းမှာ ဝန်အားလျော့နည်းနေသော်လည်း နိုင်ငံတော်ဓာတ်အားစနစ်ကို ထိန်းညှိမောင်းနှင်ရန် ဆက်လက်ဖြန့်ဖြူးနေမှာဖြစ်တယ်လို့ သတင်းထုတ်ပြန်ပါတယ်။

“သို့ဖြစ်ပါ၍ လုပ်ငန်းများဆောင်ရွက်နေစဉ်အချိန်အတွင်း အချို့သောနေရာများမှာ ဝန်အားလျှော့ချခြင်းလုပ်ငန်းတွေကို မလွှဲမရှောင်သာ ဆောင်ရွက်သွားရမှာဖြစ်ရာ ပြည်သူများအနေဖြင့် နားလည်ပေးနိုင်ပါရန်နှင့် ယခု ၅၀၀ကေဗွီ ဓာတ်အား စနစ်ပြီးစီးပါက နိုင်ငံတော်ဓာတ်အားစနစ်အတွင်း ဓာတ်အားပို့လွှတ်စီးဆင်းမှု ပိုမိုကောင်းမွန်လာမှာဖြစ်ပါတယ်” လို့လည်း လျှပ်စစ်စွမ်းအားဝန်ကြီးဌာနက အသိပေးထားပါတယ်။

မြန်မာနိုင်ငံမြောက်ပိုင်းရှိ ရေအားလျှပ်စစ်ဓာတ်အားပေးစက်ရုံများမှထွက်ရှိလာတဲ့ ဓာတ်အားများကို မြန်မာနိုင်ငံ တောင်ပိုင်းသို့ပို့ဆောင်ရာမှာ ဗို့အားအဆင့် ၂၃၀ ကေဗွီ ဓာတ်အားလိုင်း ဖြင့်သာပို့လွတ်လျှက်ရှိတဲ့အတွက် ဓာတ်အား စနစ်အတွင်း အရန်ဓာတ်အားလိုင်းမရှိသဖြင့် ရံဖန်ရံခါ ဓာတ်အားစနစ်အတွင်း တည်ငြိမ်မှုနည်းပါးကာ ဓာတ်အားစနစ်တစ်ခုလုံး လျှပ်စစ်ဓာတ်အားဖြတ်တောက်ခြင်း (System Breakdown) ဖြစ်ပေါ်တတ်တဲ့အခြေအနေမှ ကာကွယ်ရန်နှင့် မြန်မာပြည်မြောက်ပိုင်းမှ လျှပ်စစ် ဓာတ်အားများကို တောင်ပိုင်းသို့ ပြည့်ဝစွာသယ်ဆောင်ပို့လွှတ်နိုင်ရေး ရည်ရွယ်ပြီး အဆိုပါ ၅၀၀ ကေဗွီ ကံကောင်း(မိတ္ထီလာ)-စပါးကြွယ်(တောင်ငူ)ဓာတ်အားလိုင်းစီမံကိန်းကို ၂၀၁၃ ခုနှစ် စက်တင်ဘာလမှစတင်ပြီး တည်ဆောက်ခြင်းလုပ်ငန်းများဆောင်ရွက်ခဲ့ခြင်းဖြစ်ပါတယ်။

ယခုအခါ စီမံကိန်းတစ်ခုလုံးရဲ့ ၉၉ ရာခိုင်နှုန်းပြီးစီးနေပြီး  ရာနှုန်းပြည့် ပြီးစီး ဆောင်ရွက်ဖို့ တောင်ငူ(ပင်မ) ဓာတ်အားခွဲရုံတွင် အပြီးသတ်ချိတ်ဆက်ရေးလုပ်ငန်းများ ဆောင်ရွက်ဖို့ ယခုလိုစီစဉ်ခဲ့တာဖြစ်ကြောင်းသိရှိရပါတယ်။

-ymg/knl

#Yangon_Media_Group

Published 13 Dec 2022

စက်သုံးဆီတွေကို တတ်နိုင်သမျှချွေတာသုံးစွဲဖို့အတွက်  စက်ဘီးကဲ့သို့သော ယာဉ်များကို တိုင်းချစ်ပြည်ချစ်စိတ်ဖြင့် အသုံးပြုကြစေလိုတယ်လို့ နစက ဥက္ကဋ္ဌဗိုလ်ချုပ်မှူးကြီးမင်းအောင်လှိုင်ကပြောပါတယ်။

ဒီဇင်ဘာ ၁၃ ရက်က ကချင်ပြည်နယ် မြစ်ကြီးနားမြို့တွင် ကချင်ပြည်နယ်အတွင်းရှိ အသေးစား၊အငယ်စားနှင့် အလတ်စား စီးပွားရေးလုပ်ငန်းရှင်တွေနှင့် တွေ့ဆုံရာမှာ ဗိုလ်ချူပ်မှူးကြီးက အဆိုပါအတိုင်းပြောဆိုခဲ့တာဖြစ်တယ်လို့ နစကရဲ့ သတင်းထုတ်ပြန်ချက်အရသိရပါတယ်။

“ စက်သုံးဆီတွေကိုပြည်ပမှနှစ်စဉ်တင်သွင်းနေရလို့ နိုင်ငံခြားငွေသုံးစွဲမှုတွေ များစွာကုန်ကျနေပါတယ်။ အဲဒါကြောင့် စက်သုံးဆီတွေကို တတ်နိုင်သမျှချွေတာသုံးစွဲကြဖို့လိုပါတယ်။ စက်သုံးဆီသုံးစွဲဖို့မလိုတဲ့ စက်ဘီးကဲ့သို့သော ယာဉ်တွေကို တိုင်းချစ်ပြည်ချစ်စိတ်ဖြင့် အသုံးပြုကြစေလိုပါတယ်။ စက်သုံးဆီသုံးစွဲမှုနည်းပါးပြီး ကုန်စည်များစွာကို ပို့ဆောင်နိုင်တဲ့ ရထားဖြင့်သယ်ယူပို့ဆောင်ခြင်းကို ဆောင်ရွက်ရပါမယ်” လို့ နစက ဥက္ကဋ္ဌကပြောခဲ့တာဖြစ်ပါတယ်။

မြန်မာနိုင်ငံမှာရေအားလျှပ်စစ်ထုတ်လုပ်နိုင်တဲ့အရင်းအမြစ် မီဂါဝပ် ၄ သောင်းခန့်ရှိပေမယ့် အကြောင်းအမျိုးမျိုးကြောင့် စီမံကိန်းတွေရပ်တန့်ခဲ့ရတယ်၊ ကချင်ပြည်နယ်မှာ ရေအားလျှပ်စစ်ထုတ်လုပ်နိုင်တဲ့ အရင်းအမြစ်များစွာရှိပြီးဖြစ်လို့ အကျိုးရှိရှိအသုံးချစေလိုတယ်လို့ ဗိုလ်ချူပ်မှူးကြီးကပြောပါတယ်။ ဒါပေမယ့် သမ္မတဦးသိန်းစိန်လက်ထက်မှာ ရပ်ခဲ့တဲ့ ကချင်ပြည်နယ်က မြစ်ဆုံရေအားလျှပ်စစ်စီမံကိန်းကိုတော့ အမည်နာမရည်ညွှန်းပြောဆိုသွားခြင်းမရှိပါဘူး။

ကချင်ပြည်နယ်မှလုပ်ငန်းရှင်တွေက MSMEလုပ်ငန်းတွေအခက်အခဲကြုံတွေ့နေရမှုနှင့် အစိုးရမှလိုအပ်တာ တွေကူညီပေး ဖို့၊ ဒေသထွက်ကုန်ကြမ်းတွေကနေ ကုန်ချောတွေကို ပြည်ပသို့တင်ပို့ရာမှာ ကုန်သွယ်ခွန်နှုန်းထားလျှော့ချစေရေး သက်ဆိုင်ရာနိုင်ငံတွေနှင့် ညှိနှိုင်းဆောင်ရွက်ပေးဖို့၊ အတိုးနှုန်းသက်သာသည့် ရင်းနှီးမတည်ချေးငွေများရယူလိုမှုနှင့် အခြားအချက်အလက်တွေကိုတင်ပြခဲ့ကြတယ်လို့ သတင်းထုတ်ပြန်ချက်မှာ ဖော်ပြထားပါတယ်။

ပြည်တွင်းမှာထုတ်ကုန်တွေကို လုံလောက်စွာထုတ်လုပ်နိုင်လျှင် ကုန်ဈေးနှုန်းတွေကျဆင်းလာလိမ့်မယ်လို့ ဗိုလ်ချူပ်မှူး ကြီးက ပြန်လည်ပြောကြားခဲ့ပါတယ်။ ကချင်ပြည်နယ်မှာ ဒေသထွက်ပစ္စည်းတွေကိုအခြေခံပြီး တန်ဖိုးမြင့်ထုတ်ကုန်တွေ ထုတ်လုပ်ကာ ပြည်ပနိုင်ငံတွေကို တင်ပို့နိုင်မည်ဆိုပါက အကျိုးရှိမယ်လို့လည်း ဗိုလ်ချူပ်မှူးကြီးက တိုက်တွန်းပြောဆို ပါတယ်။

နစက ဥက္ကဋ္ဌဟာ MSME လုပ်ငန်းတွေဖွံ့ဖြိုးတိုးတက်ဖို့ တိုင်းဒေသကြီးနှင့်ပြည်နယ်တွေက လုပ်ငန်းရှင်တွေနှင့် တိုက်ရိုက် ထိတွေ့ဆွေးနွေးမှုတွေလုပ်ဆောင်နေရာမှာ ယခု ကချင်ပြည်နယ်မှာလည်း အလားတူတွေ့ဆုံဆွေးနွေးပွဲကျင်းပခဲ့ခြင်း ဖြစ်ပါတယ်။

အဲဒီ့အပြင် နစက ဥက္ကဋ္ဌ၊တပ်မတော်ကာကွယ်ရေးဦးစီးချုပ်ဗိုလ်ချူပ်မှူးကြိး မင်းအောင်လှိုင်ဟာ ဒီဇင်ဘာ ၁၃ရက် မနက်ပိုင်းမှာ မြောက်ပိုင်းတိုင်းစစ်ဌာနချုပ် မြစ်ကြီးနားတပ်နယ်မှ အရာရှိ၊စစ်သည်၊မိသားစုတွေကိုတွေ့ဆုံပြီး နိုင်ငံ့ သမိုင်း ကြောင်းဖြတ်သန်းခဲ့မှုနှင့် နိုင်ငံရေးဖြစ်ပေါ်ပြောင်းလဲမှုအခြေအနေတွေ၊ တပ်မတော်က ထိန်းသိမ်းဆောင်ရွက်နေရတဲ့  အခြေအနေတွေ၊ရှင်းလင်းပြောဆိုခဲ့တယ်လို့  သတင်းထုတ်ပြန်ချက်အရသိရပါတယ်။

-ymg/knl

#Myanmar_Politics

Published 12 Dec 2022

တရုတ်ပြည်တွင်းထုတ် C919 လေယာဉ်ဟာ နိုင်ငံတကာ ဂျက်လေယာဉ်ကြီးဈေးကွက်မှာ ဘိုအင်းနှင့်အဲယားဘတ်စ် ကုမ္ပဏီနှစ်ခုပဲ ကြီးစိုးထားတာကို အဆုံးသတ်စေလိမ့်မယ်လို့ မျှော်လင့်ပြီး ဖောက်သည်တွေအတွက် ရွေးချယ်စရာ ပိုများလာစေလိမ့်မယ်လို့ အဆိုပါလေယာဉ်ရဲ့ ဒီဇိုင်းအင်ဂျင်နီယာချုပ် ဝူကွမ်ဟွေ့က ပြောလိုက်ပါတယ်။

ပထမဆုံး C919 လေယာဉ်ကို ပထမဆုံးဖောက်သည်ဖြစ်တဲ့ တရုတ်အရှေ့ပိုင်းလေကြောင်းလိုင်းကို သောကြာနေ့က ပေးပို့ ခဲ့ပါတယ်။ ဒါဟာ တရုတ်နိုင်ငံရဲ့ မြို့ပြလေကြောင်းသယ်ယူပို့ဆောင်ရေးဈေးကွက်မှာ ပထမဆုံး ပြည်တွင်းထုတ် ဂျက်လေယာဉ်ကြီးစတင်ရရှိလိုက်တာပဲဖြစ်ပါတယ်။

အဲဒီလေယာဉ်ဟာ ခရီးသည်မပါဘဲ နာရီ၁၀၀ စမ်းသပ်ပျံသန်းမှုတွေပြုလုပ်မှာပါ။အဲသလိုပျံသန်းတဲ့အခါ ရှန်ဟိုင်း၊ပေကျင်း နှင့် ကွမ်ကျိုးတို့မှာ ရပ်နားပါလိမ့်မယ်။

၂၀၂၃ခုနှစ် နွေဦးမှာတော့ လေယာဉ်ကို ခရီးစဉ်တွေစတင်ပျံသန်းဖို့ မျှော်မှန်းထားကြပါတယ်။

“ ၂၀၁၇ခုနှစ်မှာ C919 ကိုပထမဆုံးပျံသန်းခဲ့တာကနေ လေကြောင်းပျံသန်းခွင့်လက်မှတ် ၂၀၂၂မှာရခဲ့တဲ့အထိ ကျွန်တော်တို့ ငါးနှစ်တာကာလပတ်လုံး စမ်းသပ်မှုတွေ အများကြီးလုပ်ခဲ့ပြီးပါပြီ။ အဲဒီအထဲမှာ မြေပြင်နှင့်ဝေဟင်စမ်းသပ် မှဒတွေကနေ လေယာဉ်အန္တရာယ်ကင်းရှင်းမှု အသေအချာဖြစ်စေဖို့အထိပါဝင်ပါတယ်” လို့ တရုတ်ဗဟိုရုပ်သံနှင့် တနင်္ဂနွေနေ့က အင်တာဗျူးမှာ ဝူက ပြောခဲ့ပါတယ်။

တရုတ်လေကြောင်းလိုင်းတွေဟာ C919 ကို နိုင်ငံတကာခရီးစဉ်တွေမှာ ပျံသန်းနိုင်မယ်လို့ သူကမှတ်ချက်ပေးပါတယ်။ ဒါပေမယ့် အကယ်၍ နိုင်ငံခြားလေကြောင်းကုမ္ပဏီတွေက C919 ကို ဝယ်ယူပျံသန်းချင်ရင် သူတို့ရဲ့မိခင်နိုင်ငံတွေဆီက လေယာဉ်ပျံသန်းခွင့်လက်မှတ်အရင်ရယူဖို့လိုမယ်လို့လည်းသူကပြောပါတယ်။

အခြားနိုင်ငံတွေဆီက ပျံသန်းခွင့်လက်မှတ်ကို ခပ်မြန်မြန်ရနိုင်သမျှရယူသွားမှာဖြစ်ပြီး ကမ္ဘာလုံးဆိုင်ရာ ဖောက်သည်တွေ အတွက် ရွေးချယ်စရာပိုများလာမှာဖြစ်တယ်လို့ ဝူကပြောပါတယ်။

“လေယာဉ်ပျံကြီးတွေရဲ့ဈေးကွက်ဟာ အလွန်ကြီးတယ်။ပြီးတော့ အလွန်လျင်မြန်စွာဖွံ့ဖြိုးနေတယ်။ တရုတ်လေယာဉ် တွေ အဲဒီဈေးကွက်ထဲရောက်ရှိလာပြီး လာမယ့် အနှစ်(၂၀)အတွင်း အရေအတွက်နှစ်ဆတိုးလာလိမ့်မယ်။ အဲသလို ဖွံဖြိုးမှုနှုန်းနှင့် ဈေးကွက်ဟာ တတိယနှင့် စတုတ္ထမြောက် လေယာဉ်ကြီးထုတ်လုပ်သူတွေအတွက် လုံလောက်တဲ့ နေရာ ဖြစ်လာလိမ့်မယ်။ ကျွန်တော်တို့ ဒီဈေးကွက်မှာ အားလုံးအောင်နိုင်တဲ့ ပူးပေါင်းဆောင်ရွက်မှုတွေရှိလာနိုင်မယ်လို့ယုံကြည် တယ်” လို့လည်း သူကပြောပါတယ်။

C919 ဟာ  အားသာချက်တွေအများကြီးရှိပြီး ကမ္ဘာပေါ်မှာ ခေတ်အမီဆုံးခရီးသည်တင်လေယာဉ်တွေထဲက တစ်စီး ဖြစ်တယ်လို့ ဝူကပြောပါတယ်။

“ C919ဟာ ဒီဇိုင်းအသစ်တွေ အများကြီးသုံးထားတယ်။ တည်ဆောက်ပုံ၊အသုံပြုတဲ့ပစ္စည်းနှင့်အင်ဂျင်အရ ပြောရရင် ခေတ်အမီဆုံးလေယာဉ်တွေထဲမှာ ပါဝင်နေတယ်။ ကျွန်တော်တို့ရဲ့ ထုတ်ကုန်အပေါ် ကျွန်တော်တို့ ယုံကြည်မှုအပြည့်အဝ ရှိတယ်။ C919 ကိုကမ္ဘာ့နိုင်ငံတွေကို ရောင်းနိုင်ပြီးတစ်နေ့နေ့မှာ လေယာဉ်ဟာ ကမ္ဘာအနှံ့ပျံသန်းနေတဲ့လေယာဉ်ဖြစ်လာ မယ်လို့မျှော်လင့်ယုံကြည်ထားတယ်” လို့လည်း သူကပြောပါတယ်။

ခေတ်အမီဆုံးလေယာဉ်တွေထဲက တစ်ခုဖြစ်တဲ့ C919 ဟာ ဆယ်စုနှစ်များစွာ ဖွံ့ဖြိုးတိုးတက်ပြီးဖြစ်တဲ့ အခြား  ကုမ္ပဏီတွေက အသားကျပြီး လေယာဉ်တွေနှင့် ယှဉ်ပြိုင်ရမှာဖြစ်တယ်လို့လည်းသူကပြောပါတယ်။

လွယ်ကူလှတဲ့အလုပ်မဟုတ်ဘူးလို့လည်း သူကဆိုပါတယ်။ အတော်အပင်ပန်းခံကြိုးစားခဲ့ရပြီး ယခုထက်ထိ ပြဿနာကြီးကြီးကျယ်ကျယ်မကြုံခဲ့ရဘူးလို့ တရုတ်နိုင်ငံပိုင်ရုပ်သံကို ဝူကပြောကြားခဲ့တာဖြစ်ပါတယ်။

Source CCTV+

#C919_Jet

#China_Made_Jet_Liner

#China_Aviation