#Myanmar_News
Published 5 Feb 2023

 

ထိုင်းနိုင်ငံတွင် ပြန်လာရန်အခက်အခဲများ ကြုံတွေ့ခဲ့သော မြန်မာနိုင်ငံသားများအနက် မွန်ပြည်နယ်မှ နေရပ်ပြန်သူများအား တပ်မတော်(ရေ) စစ်ရေယာဉ်များဖြင့်မော်လမြိုင်မြို့သို့ စီစဉ်ပို့ဆောင်ပေးနေခဲ့ရာ မွန်ပြည်နယ်မှ နေရပ်ပြန် မြန်မာနိုင်ငံသား (၅၂)ဦးကို ဖေဖော်ဝါရီ (၄)ရက်က မော်လမြိုင်မြို့သို့စီစဉ်ပို့ဆောင်ပေးခဲ့ကြောင်းသိရပါတယ်။

 

မွန်ပြည်နယ်မှနေရပ်ပြန်တွေကိုတင်ဆောင်လာတဲ့ ကျန်စစ်သားစစ်ရေယာဉ်ဟာ ယနေ့နံနက်ပိုင်းတွင် ကျိုက္ခမီအဝအနီးသို့ ရောက်ရှိ ပြီး တပ်မတော် (ရေ)မှ ကမ်း ထိုးရေယာဉ်ပေါ်သို့ ပြောင်းလဲတင်ဆောင်၍ မော်လမြိုင်မြို့သို့ စီစဉ်ပို့ဆောင်ပေးခဲ့တာ ဖြစ်တယ်လို့ သတင်းမှန်ပြန်ကြားရေးအဖွဲ့ရဲ့ ထုတ်ပြန်ချက်မှာဖော်ပြထားပါတယ်။

 

ထိုသို့ပို့ဆောင်ပေးရန် စစ်ရေယာဉ်(ကျန်စစ်သား)ဖြင့် တင်ဆောင်လာစဉ် စစ်ရေယာဉ်ရှိအရာရှိ၊ စစ်သည်များက နွေးထွေးစွာကြိုဆိုနှုတ်ဆက်ပြီး ရေယာဉ်အပေါ်၌ စနစ်တကျနေရာချထားပေးခြင်း၊ အာဟာရပြည့် စားသောက်ဖွယ်ရာများကျွေးမွေး၍ ကိုယ်လက်လေ့ကျင့်ခန်းများ ဆောင်ရွက်စေခြင်း၊ အားကစားပြိုင်ပွဲများကျင်းပပေးခြင်း၊ ကျန်းမာရေးစောင့်ရှောက်မှုများ အနီးကပ်ဆောင်ရွက်ပေးခြင်းနှင့် ဖျော်ဖြေရေး အစီအစဉ်များဖြင့် စိတ်ရွှင်လန်းအပန်းပြေစေရန် ဆောင်ရွက်ပေးခဲ့ကြတယ်လို့ သတင်းထုတ်ပြန်ချက်မှာပါရှိပါတယ်။

 

မော်လမြိုင်မြို့သို့ ပြန်လည်ရောက်ရှိလာကြသော နေရပ်ပြန်မြန်မာနိုင်ငံသားများအား မွန်ပြည်နယ် ဝန်ကြီးချုပ် ဦးအောင်ကြည်သိန်း၊ အရှေ့တောင်တိုင်းစစ်ဌာနချုပ် တိုင်းမှူး ဗိုလ်ချုပ်မြတ်သက်ဦးနှင့် တာဝန်ရှိသူတွေ နေရပ်ပြန်မြန်မာနိုင်ငံသားများ၏ မိသားစုဝင်များက ကြိုဆိုခဲ့ကြပါတယ်။အဲဒီနောက် ဘေးအန္တရာယ်ကင်းရှင်းစွာဖြင့် မိသားစုများနှင့် အမြန်ပြန်လည်တွေ့ဆုံနိုင်စေရန် ဆောင်ရွက်ပေးခဲ့တယ်လို့သိရှိရပါတယ်။

 

နစက ဥက္ကဋ္ဌရဲ့ လမ်းညွှန်မှာကြားချက်အရ ထိုင်းနိုင်ငံတွင် ရောက်ရှိနေပြီး အကြောင်းအမျိုးမျိုးကြောင့် မြန်မာနိုင်ငံသို့ပြန်လာရန် အခက်အခဲကြုံတွေ့ခဲ့ရသော နေရပ်ပြန်မြန်မာနိုင်ငံသား (၆၇၉) ဦးတို့အနက် ရန်ကုန်တိုင်းဒေသကြီးနှင့် မွန်ပြည်နယ်တို့မှ နေရပ်ပြန် မြန်မာနိုင်ငံသား (၁၇၀) ဦးတို့အား တပ်မတော်(ရေ)မှ စစ်ရေယာဉ်(ကျန်စစ်သား)ဖြင့် နေရပ်အသီးသီးသို့ ပြန်လည်ပို့ဆောင်ပေးလျက်ရှိတာဖြစ်ပါတယ်။

 

-ymg/knl

#Myanmar

#Myanmar_Migrant_workers_Thailand

#Myanmar_Politics

#Yangon_Media_Group